الأحد، 25 يناير 2009

Mr.Nice Guy Is Leaving The Building

يعد شويه نوم .. و بعد شويه تفكير ... و بعد فنجان قهوة .... استعدت ذاكرتى و افتكرت انى ليا عقل و عشان كده رجعت
عمرى ما اتعودت اخاف من حاجه و لا من حد و لا من كلمه انا قلتها لانه ما يقبضش الروح الا اللى خالقها .. و ما تعودتش اكون امعه اذا احسن الناس احسنت و اذا اساءوا مليت الدنيا سيئات زيهم و الحمدلله مش مستنى مصلحه ولا رضا سامى من حد ..... ماتعودتش اذا حد قالى كلمه ماردهاش عليه بعشرة و يمكن بأكتر اذا ربنا قدرنى ... ماتعودتش اقول كلمه و استخبى او اقول كلمه و ارجع اقول ماقولتهاش
من كام يوم و انا مع نادر صاحبى قالى انا حاسس انك على المدونه بتاعتك شخص مختلف شويه عن اللى انا اعرفه ، سألته يعنى انا منافق يا عم نادر .. رد و قالى مش الفكرة ، الفكرة انى باحس انك على المدونات طيب أوى و مؤدب أوى ... اعترف انى بعد شويه نوم و شويه تفكير و فنجان القهوه فهمت اللى هو قاله
انا طول عمرى شخص هجومى و انا عاجبنى انى اكون شخص هجومى لانه فى بلدنا دى المحترم الناس ممكن الناس ماتعملوش حساب انما البلطجى كل الناس بتعمله حساب عشان احنا بلد وسخه و شعب فرعون يخاف مايختشيش
اخر حاجه فى الحاجات اللى انا ماتعودتهاش انى ماتعودتش اكون غير عمرو و لحسن حظى عمرو صحى خلاص

هناك 26 تعليقًا:

fnoonh يقول...

اول تعليق لفنونة اوك


يارب ماحدش يكون سبقني

هقرا واجي على طول

fnoonh يقول...

سبحان الله فعلا بعض الناس تلاقيهم بيغيرو طبعهم من مكان للتاني بس مااعتقدش ان ده نفاق ممكن حسب ظروف المكان بيغيروا نفسهم ويحاولو يتكيفوا معاه

بس انا مش معاك في حكاية البلطجي لانهم هيعملو له حساب قدامة اما من وراه اتلاقيهم بيقولو كل حاجة وحشه عليه

وبعدين ليه كده انت شايل في قلبك قوي من مصر ولا ايه دي ام الدنيا هههههههههه

تقبل مروري

Che يقول...

fnoonh
ازيك عامله ايه ... الفكرة انى مش هاكون بلطجى بقله ادب .. الفكرة انى مش هاكون مؤدب أوى .. انا مش هاحاول ابان مثالى لانى مش مثالى و فى نفس الوقت مش عايز اكون منافق
و هاقولك حاجه عشان تعرفيها عننا فى مصر ... الناس فى كل وقت و مهما كنتى بتتعاملى معاهم بتتكلم عليكى من ورا ضهرك
و بعدين انا مش شايل من مصر ولا حاجه ... مش لدرجه انى اقول مصر دى امى لانه على رأى محمود حميده امى نايمه جوه
نورتينى بتعليقك الاول و اللى اظن انه هيكون الاخير على البوست

ستيتة يقول...

الى السيد الثوري ابن اخويا
انت فاكر يعني اني مش ها اعلق؟
لع بالعند فيك ها اعلق
اولا انت شخص هجومي؟ فله بقينا اتنين مع اختلاف العمر
ثانيا هاجم يابابا وشوف ستيته ده انا رد فعليه اعجبك جدا مش من نفس المكان المنيل؟

بس بذمتك وانا راضية ذمتك فيه حد يهاجم علشان معرفش مين قالوه انت بتتغير؟ خايف من التغيير؟ مش وحش زي ما سموك فاكر

وانت فاكر ياباشا انك مش ها تتغير؟
مع كل يوم عمرك بيزيد ومعرفتك بتزيد ها تتغير ومش للأوحش زي ما سيادتك فاكر اطلاقا
لأ ها تنضج يعني ها تبقى احسن .. انت بتكبر .. ونفوخك بيكبر .. ونفسيتك بتهدى لأنها بتفهم أكتر .. فيه ناس قبلك كانوا نار ودلوقتي وجهوا النار دي بطريقة أحسن وبقى ليهم أصدقاء من كل الدنيا وبرضوا على أهدافهم مبيغيروهاش
يعني لما برد مع ناس اختلف معاهم في الفكر بشكل راقي كده وبمنطقية ابقى اكتسبت اصدقاء وانا ثابت زي ما انا
ثانيا الناس دي لو عرفوني شيء انا كنت فهماه غلط مش عيب خالص ان اقول ان نفوخي "لو لسه عندي بقايا " وتعليمي "اللي هو اعدادية قديمة" كان غلط .. ده قمة النضج وانا عنوان مدونتي عاوزة اعرف لأني متأكده اني مش عارفه

اللي ها تتعجب له أني كأني شفت الموقف بتاعي ده وكتبت نفس الكلام قبل كده لدرجة اني عارفه "ديجافو" كده انت ها ترد تقول ايه

مصر مش امك لأ ياروحي أمك مش مرات ابوك

اقول انا بقى كلام ستيتة اللي جاية من فحت البحر :ما كان الرفق في شيء الا زانه ولا نزع من شيء الا شانه

فتــافيت (رحاب الخضري) يقول...

حلو البوست ده
وعاجبني فيه انك مبسوط انك شخصية هجومية .. والحمد لله لاقيت حد مقتنع بان الهجوم بجد هو خير وسيلة للاحترام من الناس.

عارف انت ليه هنا مش هجومي .. لانك المتحكم في الامور او بمعنى تاني انت اللي هاتقول واحنا هانسمع يبقى مافيش لازمة للهجوم محنا كدا كدا هانسمع.
لكن بره كلنا .. بنسمع وبس .. لازم نهاجم علشان الناس تحس بوجودنا.. لان فيه ملايين غيرنا بتسمع .. بس مافيش كتير بتتكلم.. والكلام في زمانا ده في حد ذاته هجوم.
طولت عليك اسفة.. بس كانوا كلمتين واقفين في زوري وحاولت ابلعهم بالمية شوية وبالقهوة شوية.. ماتبلعوش .. قولت اقولهم بقى وخلاص.
تقبل مروري أ. تشي
سلااااااااام

Che يقول...

عمتى ستيته
كل اللى انتى بتقوليه ده حلو جدا يا عمتى بس انا مش قصدى عليكى انك الشخص اللى هامارس عمليه الهجوم عليه ... انتى محترمه بتنشرى رأيك و رأى اللى ضدك .. بتختلفى باحترام يعنى مافيش سبب للهجوم .. ممكن نشد مع بعض شويه فى التعليقات او التعليقات تطلع حاده مش هنهاجم بعض ابدا لانك انسانه بتحترم معنى الخلاف فى وجهات النظر
و بعدين سيبك انت البوست ده مش موجه ليكى اصلا يا عمتى اللى قبله بتاع الاعتذار هو اللى موجه ليكى لانى فعلا كانت حاد فى عرض وجهه نظرى و انتى استحملتيها كالعاده
البوست ده بدايه لبوستات الهجوم على شخص عمل مدونه و حط اسامى ناس فيها و من ضمنهم اسمى و بيهاجمنا ... طبعا انا ماعرفش رأى الناس دى ولا وجهه نظرهم فى انهم مايردوش الهجوم .. بس انا مختلف عنهم انى ماستحملتش انى اتهاجم عشان بس باقول رأيى فى حين انه لسانى طويل و انا لافف لسانى على وسطى .. فقررت مش بس ارد اهاجم الواطى ده انما هاتبع كده بكل الحاجات اللى انا شايف انها رد لاعتبارى
و فى الاخر انتى دايما مرحب بيكى عندى زى ما انا اتمنى انى اكون مرحب بيا عندك
و بعدين هو فى حد يهاجم عمته برضه ... ده تبقى قله تربيه مش قله ادب
معلش اذا كنتى فهمتى البوست ده بالمقلوب و مستنى اسمع ردك لما تقرى ردى

Che يقول...

فتافيت
انا فعلا مبسوط انى شخص هجومى لانى انا كده و مش هينفع اتغير عشان اعجب الناس ... ان شاالله عنهم ماعجبهم و يروحوا يشربوا من البحر
و الهجوم مش هو احسن وسيله لكسب الاحترام على طول ... انما ساعات بيكون مفيش غيره لما تكونى بتتعاملى مع ناس مابيفهموش غير اللغه دى و بيفسروا سكوتك على انه ضعف او على انه اعتراف بالغلط من غير مايعرفوا انه احترام و ادب منك
بس زى ماقالوا زمان " لكل مقام مقال و لكل زمان رجال " ... عجبنى أوى تحليلك للسبب اللى خلانى افقد بعضا من هجوميتى و اندفاعى و لما فكرت فيه لقيت انه تفسير صح و يكاد يكون السبب الرئيسى بس فى اسباب تانيه جنبه
و انتى طبعا تقولى اللى انتى عايزاه من غير ماتخلى حاجه تقف فى زورك .. ان شالله ولاد القطه السوده و انتى لا
سعيد بمرورك و سعيد اكتر بتعليقك و مستنى منك تعليقات كتيييير
ملحوظه اخيره .. بلاش استاذ و الرسميات دى كفايه انك تقوليلى عمرو او تشى
فى انتظار المزيد و سعيد لمعرفتى بثوريه ( بس يا رب مانتلمش فى بوكس واحد ) .. مستنى تعليقاتك دايما
نورتينى

فتــافيت (رحاب الخضري) يقول...

طيب تمام كدا وكفايا على رأيك che ونتلم في بوكس طبعا .. بس سيبك البوكس للجدعان .. في زمان الجدعان فيه بح .

ميرسي على ذوقك في الرد .. وياريت تبقى تزور مدوني اللي لسه مولودة.. وماطلعلهاش شهادة ميلاد
ربنا يسهل واطلع لها شهادة كمبيوتر .. ما خلاص بقى الزحمة بتاعة الدعم خلصت ؛)

واكيد هاتشوف تعليقاتي كتير .. ده انا لازقة كوبي .. علشان جيفارا بقى وكدا :)

سلام che

Che يقول...

فتافيت
طبعا هازور مدونتك من غير ماتقولى ... و يا ستى لازقه لازقه مش مشكله على قلب مدونتى زى العسل
سلام

david santos يقول...

Excellent work, Che!
Congratulations!!!!!
Have a nice week!!!!

Desert cat يقول...

للاسف يا عمرو فى ناس بتفتكر الانسان المؤدب ضعيف وكل لما يزيد فى قلة ادبه انت تتعامل باخلاقك وتربيتك يزيد فى عبطه فى الحاله دى بيكون لازم توقف عند حده
وقول لنادر ده مش اسمه نفاق انما فعلا فى شخصيات بتجبر الواحد على احترماها وشخصيات تانية بتجبر الواحد على استعمال اشد انواع العقاب معاها ايا كان بقى هذا العقاب

مودتى

ستيتة يقول...

والله وباضت لك في القفس يانوووووووووووسة
ابن اخوكي بيردوا عليه الأسبان بالعنجليزي
اديك ياسيدي بقيت من الفيمس اهو وبقيت انترناشونال
يعني اللي يهاجمك يتوكس
مش عارفه ياعمرو دايما مثالي في الحياة الرد ع الندل أجتنابه بس برضه احترم ان لسانك اللي متلفع بيه ها يرد
وده ليه بقى
لأني بحب جنازة وأشبع فيها فرجة

Che يقول...

Desert cat
والله ده اللى انا قلته لنادر لما قرا البوست و قالى تعليقه عليه فى التليفون و عشان كده انا هادى الواطى ده بالجزمه على دماغه و اظن انك تعرفى الواطى ده يبقى مين
نورتينى بتعليقك

Che يقول...

عمتى ستيته
طبعا يا عمتى عشان تعرفى ابن اخوكى بس يقدر على ايه ( مع ان دافيد سانتوس بيرد على ناس كتير مش على انا مخصوص ) .. و بالنسبه للى بيشتمنى ده بيشتمنى بالتبعيه بس انا هاعرف ارد عليه و هتبقى فرجه للصبح عشان تفرحى يا عمتى

سمكه واحده يقول...

علي فكره
ده من وجهه نظري طبعا
او عن نفسي شخصيه النت تختلف تماما عن الشخصيه الحقيقه لعلمك ممكن كون الشخصيه علي النت جرئيه شويه وتكون في الحقيقه خجوله جدا ممكن تكون العكس في كل حاجه يعني في حجات متقدرش تعملها في الحقيقه فعشان ده عالم افتراضي ممكن الشخصيه دي تظهر الجانب اللي متقدرش تظهره في الحقيقه اما عن الشخص الهجومي او المش هجومي فده بردو حسب شخصيه كل شخص
ايه الكلام اللي بقوله ده!
ما علينا
علي فكره مدونتك لذيذه وموضيعك حلوه
تقبل مروري
سمكه

kmt يقول...

السلام عليكم ورحمة الله وبركاته

اولا انا متابعة المدونه حتى لو معلتقش لكن البوست دا كان محتاج شوية كلام
على الرغم اني حاسة انه تصفية حساب مع حد معين لكن انا هاتكلم ع العموم

اوقات كتير بنكون ع الميل او البلوج مختلفين شويه ودا مش نفاق
لسبب بسيط ان لكل مقام مقال يعني اعذرني البلد دي من (تييييييييت ) والللي خلاها (تيييييت ) احنا ناسها مش هي وتقوليش هي البلد ايه غير ناس .

يعني كونك بتتكلم بلطف وذوق ع البلوج دا لازم لان البلوج بيتك ولازم اللي داخل عندك يحس انه في امان من انه يسمع لفظ جارح واوطريقة كلام سيئه لانه باختصار من وجهة نظري داخل يسمع فكر ودماغ مش حاجة تانيه
سيبك من الناس كل واحد يفهمك على راحته المهم انك تكون فاهم نفسك والناس مش هانقدر نرضيها
بيشرفني اني ادخل مدونتك وبيشرفني ديما تعليقاتك لانها بتعبر عن دماغ :)

تحياتي
الى اللقاء

MaNoOoSh يقول...

بيتهيئلى عادى جدا لما تكون شخصيتا مختلفة شوية فى التدوين عن الحقيقة, وانا شخصيا لو كنت ولد كنت هعمل كل اللى اقدر عليه علشان ابلطج واخد حقى.. بس الحمد لله ان انا بنوتة وان شاء الله مسيرى يبقالى راجل وادبسه هو فى موضوع حقى دة (وش بيطلع لسانة).

Che يقول...

سمكه
اولا اهلا بيكى صاحبه مدونه مش مجرد معلقه عندى
ثانيا كل اللى بتقوليه صح عن الفرق بين عالم النت و العالم الحقيقى .. بس دايما بتلاقى التغير ده للاسوء او للاجرء انما انا مشكلتى انى على النت باتغير اكون مؤدب أوى يعنى للاحسن و الاكثر خجلا
بس فى حاجه انا مقتنع بيها .. من خالف قوله فعله فهو منافق
جايز اكون فاهم الموضوع غلط بس الفكره انى مش مستريح و باحاول استريح
نورتينى و مستنى تعليقات كتير منك

Che يقول...

Kemet
بجد و من غير تهريج بتوحشنى تعليقاتك لانك مش من الناس اللى بتعلق و خلاص لمجرد انها تمضى فى دفتر الحضور ، و سعيد اكتر بمتابعتك لمدونتى و ان بجد فى حد لاقى انه كلامى يستاهل يضيع شويه من وقته عشان يقراه
بالنسبه للبوست ده فده مش تصفيه حسابات مع حد انما تقدرى تقولى انه انذار بالحرب لانى ماتعودتش اكون جبان و اضرب واحد على غفله لازم يكون عارف عشان يرد على الضربه لو قدر .. و الحقيقه الواحد ده عامل مدونه مالوش فيها سيره غير انه كاتب اسامى شويه ناس و حاططها فى لسته و بيدعو الناس انها تهاجمنا او على الاقل تتجاهلنا
انا مش مديله اهميه بس لما يوصل الاتهام الى اننا كفره و خونه فانا كده مقدرش اسكت لانى معنديش كرم اخلاق زى باقى الناس اللى انا اتشرف انى معاها فى اللسته ولا فى نفس الوقت عندى بطحه على راس و باحس عليها ... عشان كده كان لازم ارد
يعنى انا بارد عشان ادافع عن دماغى مش هجوم لمجرد انى فاضى
و انا دايما باتشرف بالتعليق عندك لانك واحده من اللى بيكتبوا بجد مش بكتبوا عشان عندهم اسهال فكرى و لازم يكتبوا و خلاص
تشرفت بتعليقك و مستنى تعليقات كتير منك
نورتينى و زدتى المدونه نور

Che يقول...

MaNoOoSh
كلامك صح حوالين اننا فى التدوين شخصايتنا بتختلف عن الحقيقه ... الفكرة انى باحاول اقلل الاختلاف ده لاقصى درجه
و بما انك بنوته و لغايه ما يبقالك راجل و تدبسيه انه ياخد حقك لو حد داس لك على طرف ... اخواتك الرجاله قاعدين هنا مستنين اشاره ... هههههه
نورتينى و مستنى تعليقات تانيه منك

حروف يقول...

صحيت
طب صباح الخير يامصر مش مهم نايم صاحي المهم تكون مرتاح وتقول اللي عايزة وتحترم المحترم وتدي اللي مش محترم علي دماغة
ومتهيئلي هو دة عمرو قبل وبعد النوم
دمت يابن خالي

Che يقول...

حروف
ازيك يا بنت العمه ... صباح النور يا عبله .. و طبعا انا مش هقل ادبى على الناس المحترمه .. مش بلطجه هيا
و زى ما انتى قلتى ... اهم حاجه انى اكون مرتاح عشان اريح الللى حواليا
مستنى تقوليلى رأيك ايه يا جميل فى التغيير

ستيتة يقول...

فين البوستات الجديدة
انت متعرفش اني بدور عليها اول ما اصحى من النوم بتاع اهل الكهف
ولا بوست واحد على أي مدونة؟ خسئت
اشتغل يابابا اشتغل
مش قلت لك عاوزة عركة "وش شرير وعنين محولة

kmt يقول...

السلام عليكم ورحمة الله وبركاته

اولا شكراعلى كلامك الكبير بالنسبه لي
انا عارفه المدونه دخلت عليها قبل كده وهي من المدونات من الاخر اللي صاحبها دماغهم فاضيه ومش لاقين حاجه يعملوها
ومن رأيي انك انت واللي معاك في لسته الاستاذ ده متعبروش وتجاهلوه ومتدهوش فرصه يتكلم كتير
من الاخر كأنه فراغ تعب بقي من الكلام ماتعبش هو حر لكن متضعيش وقتك - اسفه- في هيافة ناس فاضية

تحياتي
الى اللقاء

Che يقول...

حاضر يا عمتى ستيته
هابتدى اكتب شويه عشان لما تصحى من نوم اهل الكهف تلاقى حاجه تقريها على غيار الريق

Che يقول...

Kemet
والله انا عارف ان وجهه نظرك دى هى اللى مخليه اكتر الناس ماتردش عليه
بس انا محروق لان اللى بينقدنى ده مليان عيوب اكتر منى و مش طايق اسكت