الأربعاء، 29 أبريل 2009

Marley And Me

عندى سؤال غريب شويه ، يا ترى انى الاحسن ان الانسان يكون مقيد ولا يكون حر ....... فى ناس بتعتبر الحب ضعف و ناس تانيه بتعتبره قوة .... ناس بتعتبره قيد و ناس تانيه بتعتبره حريه .... ناس بتعتبره نهايه و ناس بتعتبره بدايه ....... ناس بتعتبره اكبر حقيقه و ناس بتعتبره اكبر وهم ......... مش مهم انت بتعتبره ايه المهم انك جربته ولا لا ؟
طيب سؤال تانى ... لو انت جربته يا ترى النهايه كانت ايه ؟ ... يعنى كانت قصه حب فاشله و لا ناجحه ... مثلا انا اعرف واحد بيعتبر ان الانسان لازم يفشل فى الحب عشان ينجح فى حياته العمليه .... كنت بأتكلم مع صديقه عزيزة و قالتلى ان الحب ده عبارة عن اكبر اكذوبه و وهم احنا بنعيش فيه ... و اعرف ناس تانيه ممكن تضحى بأى حاجه عشان الحب .... يعنى الموضوع ملوش مقياس و دايما كل مرة بشكل
سؤال كمان على الماشى ...... احنا اللى بنختار الحب ولا الحب اللى بيختارنا ..... يعنى مثلا الانسان فى مرحله معينه من حياته بيكون مهيأ انه يحب ولا الحب بيكبس عليه فجأة ........ طيب لو فى مرحله معينه يا ترى ايه احسن مرحله ممكن الانسان يخوض تجربه الحب فيها
سؤال رابع ( شكلنا فى لجنه امتحان ولا ايه ) ..... اذا افترضنا انك حبيت تتأكد انك بتحب بجد ازاى ، و بافتراض انك لقيت طريقه تتأكد بيها من حبك تتأكد من حب الطرف التانى ازاى ، مع الاخذ فى الاعتبار ان القلوب بين اصبعين من اصابع الرحمن يقلبهم كما شاء و عشان كده من احسن الادعيه اللى ممكن الانسان يدعى بيها هى اللهم يا مقلب القلوب ثبت قلبى على دينك
و اخيرا فى جمله عجبتنى فى ماستر سين فى فيلم Marley And Me و هو بالمناسبه فيلم جميل و يستحق المشاهده

الكلب ليس لديه رغبة فى السيارات الفارهة ، المنازل الكبيرة او الملابس الانيقه ... لعب التقاط الكرة على الشاطئ يكفيه تماما
الكلاب لا تهتم اذا كنت غنيا او فقيرا .. ماهر او ابله .. ذكى او غبى ......... احبهم من قلبك و سيحبونك فى المقابل
كم من الناس بمكن ان تقول هذا عنهم ؟
كم من الناس يمكن ان يجعلوك تشعر بأنك فريد و نقى و مميز ؟
كم من الناس يمكن ان يجعلك تشعر بأنك اسثنائى ؟

و تعليق اخير من عندى 99 % من الناس على اختلاف العلاقات الاجتماعية بينهم مايستحقوش يكونوا كلاب و اكيد كل واحد فى حياته شويه ناس من دول ........... سلام

الخميس، 16 أبريل 2009

مش وحشانى خلاص

النهارده ولاسباب مفيش داعى من ذكرها فقدت اخر صله ليا بمصر .... المهم من كام يوم كنت باتكلم مع عادل صاحب مدونه بحب السيما و شوشو صاحبه مدونه البت المشمشيه على موضوع الغربه ... عادل مقتنع انه بلدنا اولى بينا و شوشو معاه انا قلتلهم انى مقتنع برأيهم بس المشكله اللى عندى انى حسيت ان البلد رفضانى ، انى مهما كنت عايز اعمل حاجه فى مصر مش هقدر اعمل نتيجه لرفض البلد ... قلت لعادل و شوشو ان الانسان بيفضل يقاوم كل المظاهر السلبيه اللى موجوده فى بلدنا .. بيقاوم الاوضاع الغلط .. بيقاوم و بيحس انه بيقاوم البلد كلها و الناس كلها و ده مش بيكون غلط بدرجه كبيره لاننا فى مصر فى الاخر بنقول خلاصه الحكمه بتاعتنا فى اكتر من 7000 سنه " اللى تعرفه احسن من اللى ماتعرفوش " .. " امشى جنب الحيط تسلم " .. و امثال كتير و النتيجه اننا بنكون نسخ بالكربون من بعض و حتى الناس اللى مختلفه شويه بنهاجمها
افتكرت بوست كانت اسماء عونى صاحبه مدونه مكعب سكر انها عشان بره مصر حاسه انه حتى الزباله وحشتها و انا ساعتها استغربت من الجمله دى .. و جيت بعد كده فى بوست ليها تانى اسمه الغربه قلت انى حاسس اللى هى كتبته و ان مصر كلها على بعضها وحشتنى .. بس الحقيقه انى النهارده مر مش وحشانى .. مش قادر افتكرها غير و افتكر فشلى هناك ، افتكر مشاكلى هناك ، افتكر احلامى اللى حتى مبقتش فاكرها
اديت مثال لعادل و شوشو حوالين مقاومتى فى مر و امتى اتكسرت و اتكسر معاها حاجه جوايا مش قادر ارجعها .. انا هاقولكوا على المثال ده .. انا خريج علوم قسم كيميا \ حشرات .. بعد ما خلصت فكرت فى حاجه افيد نفسى و افيد بلدى بيها ، فى حاجه اسمها علم الحشرات الجنائى يعنى ببساطه استخدام الحشرات فى العلوم الجنائيه و ده حاجه موجوده فى العالم من الخمسينات .. المهم فكرت اعمل ماستر فى الحاجه دى ، قعدت ادور على دكتور يشرف عليا و بعد ما لفيت لقيت دكتور واحد فى جامعه الازهر هو اللى متخصص فى الموضوع ده .. لما قابلته سألنى اذا كنت ناوى اسافر امريكا او اوربا ولما قلت لا قالى يبقى بلاش الموضوع ده لانى هاضيع وقت و مجهود و مش هاستفيد حاجه ... و فى الاخر لما لقانى مصر قالى انى اروح مصلحه الطب الشرعى و اشوف اذا كانوا هيقبلوا بحاجه زى دى ولا لا و اذا قبلوا هو موافق يشرف عليا ... عشان انا كنت لسه متفائل و عندى امل رحت هناك و بعد انتظار 5 ساعات شخيه هناك قابلتنى و بعد ما انا شرحت و استفضت فى الشرح بصلى و قالى " يعنى حضرتك عايز تسرح ظباط المباحث و تشغل الصراصير و الخنافس مكانهم " و بعدين ضحك ضحكه عمرى ما هانساها و قالى " يا بنى شوف مستقبلك " .. و بعديها انا قررت انى اسيب البلد و اشوف مستقبلى
يا ترى انا غلط و لا صح .... و عادل و شوشو متفائلين ولا مش لسه مش عارفين البلد مع الاخد فى الاعتبار ان عادل نفسه قال انه فى حلم من اجلامه مش هيقدر يحققه فى مصر و انا ارجو ان عادل و شوشو مايزعلوش انى اتكلمت على الحوار ده اللى حصل بينا
مستنى رأيكم

الخميس، 9 أبريل 2009

الخميس، 2 أبريل 2009

خمسه جد

اظن ان دى اول مره اكتب موضوع جد أوى فى المدونه دى .. المهم سيبنا من المقدمات
هاحكى على حاجه صغيرة و شخصيه مع انى مش باميل لمناقشه اى حاجه شخصيه سواء ليا او لاى شخص تانى ... من كام سنه وقعت فى مشكله كبيرة و ماكنتش عارف اخرج منها ازاى ، انما ربنا بعتلى اللى ساعدنى و خرجنى من مشكلتى و ماكنش يعرفنى .. وبعد الشكر كل اللى طلبه منى انى لو عايز ارد المعروف بتاعه انى اساعد اى حد يكون فى مشكله من غير ماكون مستنى اى حاجه مقابل كده
المهم النهارده شفت الشخص ده .. شفته بعد سنين و شفته فى بلد غير بلدنا و بعد السلامات و كده سألنى اذا كنت ساعدت اى حد ولا لا ... الحق انى احترت ارد عليه اقول ايه ، كان سهل اكدب عليه .. بس اكدب على ربنا ازاى .. المهم قلتله انى ماسعدتش اى حد و ماكنتش مهتم بحد اغلب الوقت غير نفسى
الشخص ده حملنى امانه انى اساعد اى حد و قالى ان اللى بيعمل الخير و بيرميه البحر الخير ده بيرجعله تانى بس اكتر
قعدت افكر مالقتش طريقه اساعد بيها اى حد خصوصا انى مش فى بلدى و معرفش حد فى البلد اللى انا فيها .. و فكرت انى الطريقه الوحيده اللى اقدر اساعد الناس بيها هى النت ..... اغلب المشاكل بتاعتنا اللى مش بنلاقيلها حل مابنسألش حد لاننا فى الغالب بنتكسف من الناس اللى نعرفها .. بنتكسف لان المشكله ساعات بتكون محرجه و ساعات عشان بنخاف صورتنا تتهز فى عيون اللى يعرفونا
انا عملت جروب على الفيس بوك و هاسيب عنوانه ، و كمان هاسيب اميلى عشان اللى مش عايز يدخل على الفيس بوك ، و كمان اى حد ممكن يبعت اللى عايزه فى تعليق و كده كده التعليقات عندى عاملها موديريشن يعنى محدش هيشوف اللى هيتبعت
حاجه كمان انا الاسم المشهور بيه هو عمرو تشى او تشى على طول مش عمرو خالد يعنى مش هاعمل واعظ لانى عن نفسى عملت بلاوى كتير .. و كمان انا مش هاقول انى اسامه منير و هاقعد احل كل المشاكل ... الفكرة انى عديت بأغلب المشاكل اللى الشباب و الناس الكبيره شويه عدوا بيها عشان انا كانت المشاكل هوايتى انى ادخل فيها بس برضه انا مش كلى المعرفه يعنى فى حاجات كتير ماعرفهاش ... اى حد يقدر يساعد يساعد يا جماعه ، و اللى عنده اقتراحات حوالين ازاى نقدر نساعد بعض يقولهالنا ، و اللى عنده مشكله عدى بيها و يقدر يساعد اى حد تانى يا ريت يعمل كده .. فى الاخر انا مش متوقع استجابه او متوقعها ضعيفه لدرجه لا تذكر ، بس عشان اديت الامانه اللى عليا
عنوان الجروب على الفيس بوك
http://www.facebook.com/group.php?gid=85430985029
و الايميل بتاعى
a_m_e_81@yahoo.com
و مستنى رأيكوا حوالين الموضوع ده

الأربعاء، 1 أبريل 2009

خمسه كتب

بمناسبه حاله الثقافه اللى انا فيها و عشان انا بحبكوا ( اه و الله و ربنا عالم باللى فى القلوب و خد من قلبى و صر يا رب ) .. ماعلينا المهم انا هاتكلم النهارده عن 3 كتب بس
الاولانى كتاب مصر و المصريين فى عهد مبارك ( 1981 - 2008 ) للدكتور جلال امين
بجد يا جماعه اللى عايز يقرا ثقافه يقرا الكتاب ده ، و برضه اللى عايز يقرا سياسه يقرا الكتاب ده برضه ، و اللى عايز يقرا علم اجتماع فكمان مره هيكون ده الكتاب المناسب .. يعنى من الاخر اللى عايز يقرا عن مصر بجد يقرا الكتاب ده
الكتاب التانى ... " كلنا هناخد فيها " أشرف عبد الباقى من فيلم خالى من الكوليسترول نقلا عن كتاب ابن عبد الحميد الترزى لعمر طاهر .. الكتاب ده عباره عن تأريخ للسينما المصريه من عصر ما قبل التاريخ .. كتاب ممتع و اسلوب عمر طاهر غنى عن التعريف
الكتاب التالت ... "بيقولك واد روسى عمل ( هاك ) لموقع البنتاجون و حمل عليه MP3 ، انت تعرف ان ( هاك ) / Hack معناها اختراق " .... " يا عم مهو كله اليومين دول يقى ( بيتهاك ) ، ده حتى الحكومه ( بتتهاك ) عينى عينك " ... احمد العايدى فى روايته ان تكون عباس العبد .... روايه جميله ... بس فى تحذير للناس اللى شافت ان اسلوبى فى الكتابه فاضح شويه ان الروايه دى مكتوبه بنفس الاسلوب مع الاعتماد على التلميح ، يعنى الامر فى النهايه راجع لنيتك .. لو حلوة او وحشه و الله اعلم بنوايا العباد
بس كده .. كفايه كتب النهارده