الأربعاء، 14 يناير، 2009

اسباب الخيانه عند الراجل

قريت البوست بتاع عمتى ستيته و استمتعت بتحليلها جدا و بعرضها لوجهات النظر المختلفه حول الزواج التانى ... و عشان عمتى ستيته نصحتنى انى اخرج من الموود فانا هاسمع نصيحتها و اخرج من المود و هاكمل على كلامها يمكن تعرف الراجل ممكن يخون او يتجوز على مراته ليه ( و اللى الستات بيعتبروه خيانه برضه ) و اليكم مقال عمر طاهر فى جريده الدستور عن اسباب الخيانه عند الراجل

سالتنى صديقه ليه الراجل ممكن يخون مراته ؟ .. الخيانه مرض عند الراجل زى مرض الشوبنج عند الستات
مع العشيقه الراجل لا يحتاج لفياجرا ، و اذا احتاج بيكون ليها فايده ، او كما قال الكاتب الساخر محمد السيد محمد ايش تعمل الفياجرا فى الوش العكر
الست دايما بتتهم الراجل انه خاين من غير مايخونها فبيضطر يخونها لانه كده كده واخد اللقب
الراجل بيخون عشان الحب حاجه و الجواز حاجه و الجنس حاجه
الراجل بيخون علشان كل المكتشفين العظماء كانوا رجاله
الراجل بيخون لانه لا كرامه لنبى فى وطنه ، و لان زمار الحى لا يطرب
الراجل بيخون علشان العشيقه فيها ميزة انها غالبا مابتبانش
الراجل بيخون لانه زى الشجره ما ينفعش يشيل عصفورة واحده
الراجل بيخون عشان مراته بتقرف
الراجل بيخون لان الستات عموما بتحب الراجل الواطى و هو بيجتهد علشان يخليها تحبه
الراجل بيخون لان مراته كتير بتتهمه انه قاعد فى البيت مابيعملش حاجه
الراجل بيخون علشان مراته مابتدخلش السرير غير لما تحس انها تعبانه و عايزة تنام
الراجل بيخون عشان اكتشف واحده بتعرف تعمل مساج
الراجل بيخون مراته عشان بقاله كذا سنه بيحاول يعرف هى بتبقى مبسوطه معاه ولا لا و ما بيعرفش ... الامر الذى يعنى ان الخيانه عند الراجل احيانا بتكون اختبار ذكورة
الراجل بيخون مراته لانها بترفض تاخد معاه دش ... و احيانا بترفض تاخد دش اصلا
الراجل بيخون مراته لما يحس انها زهقت و بتلمح بالطلاق ، بيخونها على سبيل تشجيعها على اتخاذ القرار
الراجل بيخون مراته لانه يجد عند العشيقه قدرا من المياصه و التلميحات الجنسيه ، التلميحات الوحيدة التى يجدها الراجل عند زوجته هى تلميحات بخصوص مصاريف البيت
الراجل بيخون مراته علشان لما قالها عايز اتجوزك و نعيش و نكبر مع بعض ماكانش عارف انها هتكبر اسرع منه
الراجل بيخون مراته علشان بتبقى حامل بالتسع شهور
الراجل بيخون مراته لانه بطبيعته مغامر و عاشق للتحديات
الراجل بيخون مراته لانه بيحترمها زياده عن اللزوم .. بيحترمها للدرجه اللى بتخليه يتكسف يقول لها ماتقومى ترقصى شويه
الراجل بيخون مراته علشان يتعلم حاجات تنفعهم هما الاتنين
الراجل بيخون مراته عشان كان فاكر نفسه اتجوز واحدة زى امه لحد ما مراته ابتدت تلبس فى البيت ترنجات زى اللى كان بيلبسها ابوه
الراجل بيخون مراته عشان بتفضل تقول هاخس هاخس .. و مابيحصلش
الراجل بيخون مراته عشان فيه جزء من ملابسها بيفكره بحبل الغسيل بتاع جدته
الراجل بيخون مراته لانها بتبرر عصبيتها دايما بالدورة الشهرية .. الراجل بيفتكر ان الموضوع ده مابيخلصش عشان مراته عصبيه طول الوقت
الراجل بيخون مراته عشان يتأكد انه بيحبها
الراجل بيخون لان عشيقته لما بترقص بترجعله ثقته فى نفسه ، لكن مراته لما بترقص بتخليه يفصل من كتر الضحك
الراجل بيخون مراته عشان بتاخد ساعه تجهز و بعد الساعه بيلاقيها زى الاول برضه
الراجل بيخون مراته علشان يقلل المسئوليات اللى عليها
الراجل بيخون مراته بدل ما حد تانى يخونها
الراجل بيخون مراته عشان احنا عايشين فى مجتمع ذكورى
الراجل بيخون مراته عشان عشيقته مابتطلبش تطفى النور
الراجل بيخون مراته عشان كده كده كان بيخون قبل الجواز .. ايه اللى اتغير يعنى
الراجل بيخون مراته علشان فى الاول كان بيبعدها عن حضنه عشان يعرف ينام ساعتين ، و دلوقتى بقت هى اللى بتبعده
الراجل بيخون مراته عشان متاكد انها بتحبه و هتسامحه

و بعد المقال ده انا ماعنديش حاجه ازودها ... اللى شايف فى اى سبب تانى للخيانه يا ريت يقولنا عليه عشان " العلم نورن " برضه

هناك 30 تعليقًا:

norahaty يقول...

من وجهة نظرى
هذا شىء فى الجينات
الذكورية !!!!!!!
وماتستغربش !!!!!!
ولاجل هذا ربنا سبحانه
وتعالى اباح الزواج الثانى
والثالث والرابع (وما ملكت
إيمانكم) فى ديننا الحنيف حتى لا تستشرى
الخيانة ولكن زواج على سنة الله ورسوله
مقنن ومعلوم مين وفين وأمتى.

Che يقول...

norahaty
اوافقك تماما و كلامك صح مليون فى الميه
اسعدتنى اضافتك القيمه و بانتظار المزيد

fnoonh يقول...

سبحان الله في بعض الحجات صحيحة في كلامك لكن مش كلها يعني الخيانة عموما محرمة شرعا بس لو راح واتجوز تانية وتالته ورابعة على سنة الله ورسوله ماحدش هيقوله حاجة طبعا لانه بيعمل حاجة حلال رسوله الكريم عملها بس انه يخون ويمشي في طريق الحرام فده طبعا مايجوزش شرعا
عموما اي حد ممكن يتكلم ويقول البقولة بس انا طبعا واي انثى ماترضاش على نفسها ابدا الحكاية دي ولازم الوحده يكون ليها كرامتها بردو وكمان في خيانة بتحصل من الزوجات بس ده بيكون نادر لان دي طبيعة المراه اغلب الاحيان بتشوف الراجل الترتبط بيه انه احسن واحد في الدنيا
عموما ربنا يعين
تقبل مروري

Che يقول...

fnoonh
ده كان مجرد مقال و رغم انه ساخر الا انه لخص حاجات كتير ... اكيد الخيانه حرام .. انما انا كتبت انه كمان الستات بيعتبروا الجواز التانى نوع من انواع الخيانه
شكرا على اول زياره و شدى حيلك فى الثانويه

حروف (دلو مرة ثانية وجرح ثاني سابقا) يقول...

بردوا بحجز وحعلق لما اخلص وربنا مدة مش بتخلص معايا شكرا علي دعمك
النفسي واكثر من الدعوات ليا اوعي تدعي عليا سلام مؤقت ونعود بعد الفاصل انتظرونا
صحيح قول لخالتو اني معرفتش ادخل البلوج بتاع غزة وخليها تبعتلي اللينك عشان اقرا البوست بتاعها اوعي تنسي"وش بيعمل بايبيهات كتير"

sandy يقول...

اه ده هيخون مراته عشان لقى واحده تعملوا مساج طب لو مراته عملتلو مساج هيخونها ليه فاهمنى طبعا غير كده المقال يجنن وساخر مووت لذيذ ملحوظه انا زعلانه منك

Che يقول...

حروف
ربنا معاكى و ادينا مستنين .. بس انتى اوعى تتاخرى علينا
و انا نشرت التعليق عشان خالتك اللى هى عمتى تقراه بنفسها

Che يقول...

Sandy
طبعا فاهمك .. و هو فى حد فاهمك ادى يا جميل
و معلش ما تزعليش منى انا مقصر فى حقك اليومين دول

ستيته حسب الله الحمش يقول...

الواد الجامد قوي ابن اخويا العلومانجي العتيق
جبت المقال التحفة ده منين

الخائن "الراجل غلط" يخون حتى لو لبست ليه بدلة رقص وعملت ليه مساج وسربت العيال عند امها ومطفتش النور واكلته بط وقالتله انت سبع الرجال مفيش منك اتنين ياختي كاتكيتو بني

الخائن لا يشعر بوجوده الا بالخيانه وعلشان كده ربنا يوم القيامة ها يعذبه بتقريب لحم طيب ولحم نتن فيترك الطيب ويأكل النتن

بس انا لا اعفي الست مطلقا من وصول الراجل للجواز التاني لأن كل اللي كاتب المقال بيقوله بيحصل وده ليه؟
يمكن لأن الستات اتعمت ورغم الثقافة والاعلام اللي بينبهم طول النهار والليل مصرة تلبس توب ست ابوها وناظلة
ويمكن لأن تربيتها اصلا غلط "كام ام بتثقف بنتها على اطلاق العموم قبل ما تدخل بيت حسب الله؟
ويمكن من كتر الاستقلال المادي للستات مبقاش يفرق معاهم " من حبنا حبيناه ومن كرهنا طظ فيه يجي واحد تاني هو انا قليله" جهل عام يابا متفشي بين الستات والرجالة
تحياتي

Eng. Ahmed Abo El-Ella يقول...

بص ياجميل

أنا مش بعتبر الزواج الثاني خيانه

لكن عموما أنا موافق على كل الأسباب اللي فوق أنها ممكن تدفع الراجل للخيانه -لو كان لموأخذه واطي- أو للزواج الثاني -لو كان بيدور على عفاف النفس

جميل موضوعك
شكرا

Che يقول...

عمتى ستيته
اولا انا جبت المقال ده من الدستور ( هو مش من الدستور بالظبط انما من مجله شارع الصحافه اللى بتنشر اهم المواضيع اللى اتنشرت طول الشهر فى كل المطبوعات ) ... و تانى حاجه كلامك كله صح
فى رجاله مايملاش عنيها غير التراب زى ما برضه فى ستات تستاهل الحرق
الفكره اننا مش بنتكلم على الحالات الفرديه او الاستثناء احنا بنتكلم على القاعده
شرفتينى و نرتينى بتعليقك كالعاده

Che يقول...

سعاده الباشمهندس احمد
انا زيك مش باعتبره خيانه انا كتبت انه الستات بيعتبروا الجواز التانى خيانه و بما اننا رجاله فغالبا هيتقال علينا اننا عينينا فارغه ( بس برضه احنا جامدين و مش بيهمنا ) .. اسعدنى رؤيه تعليقك و مستنى كبشه تعليقات كمان

مياسي يقول...

ههههههههههههه

جد ضحكت من قلبي

مش عارفه ليش الراجل بيخون؛ بس بدي اعلق على نقطه العشيقه؛ العشيقه بترقص لأنو ما وراهاش لا أولاد ولا شغل بيت

يعني الخلاصه الزلمه بيخون لأنو بدو ست مكوكيه بتاعت كل حاجه

ع فكره؛ انتا جوزاء أي شهر؟

Che يقول...

مياسى
والله انا سعيد انك ضحكتى من قلبك
و طبعا العشيقه بترقص عشان رايقه امال عشيقه ازاى .. يا اما الراجل يبقى حمار عشان يسيب النكد فى البيت و يروح يلاقيه عند العشيقه
سعدت بتعليقك و مستنى نعليقاتك دايما
انا مواليد شهر 6 يعنى اخر الجوزاء بس مع كده انا جوزاءى اصيل

مياسي يقول...

و أنا كمان

جوزاء شهر 6

هيك احنا في نفس الخانه:)

بيقولو عني جوزاء في جوزاء؛ مع أنو أنا شخصيا بحسش حالي هيك؛ هذا والله أعلم

Che يقول...

مياسى
الجوزاء ده اجمل برج فى الدنيا ... مش عشان انا منه انما عشان دى الحقيقه
و لو عايزة ممكن نعمل رابطه لمواليد برج الجوزاء .. عايزة تنضمى ؟ هههههه

مياسي يقول...

آه أحسن برج:)

خصوصا جزئية المزاجيه اللي بتخلي حياتك مستحيله

بس هاد مش معناه أبدا أني بكره برجي بالعكس أنا فخوره فيه جدا

أنا معاك في الرابطه أول وحده أنا:)))

Che يقول...

مياسى
ايه النشاط ده كله و الهمه دى كلها
المهم اننا عايزين نتكلم فى امور الرابطه التنظيميه و طبعا دى اسرار ماينفعش اللى مش جوزاء يعرفوها عشان مانتحسدش .. يعنى عايزين نتكلم فى السكرته ... هههههه

مياسي يقول...

باعتباري جوزاء ومزاجيه

فكمان شوي تعال حتلاقيني غيرت رأيي:)

Che يقول...

مياسى
انتى كده جوزاء بجد .. و دى الحاجه الوحشه اللى فينا .. كل ساعه برأى
على كل انا مستنى اا ماغيرتيش رأيك

مياسي يقول...

:) مش عارفه!!

Che يقول...

مياسى
فكرى على راحتك و على اقل من مهلك
بس افتكرى اللى عمر الخيام قاله ... لا تشغل البال بماض الزمان ... ولا بأت العمر قبل الأوان .... فاغنم من الحاضر لذاته .... فليس في طبع الليالي الأمان

مياسي يقول...

رح أحاول ما أفكر ولو أنها صعبه شوي ع شخصي المتواضع

شكرا عالأبيات:)

Che يقول...

مياسى
ماظنش انك هتعرفى ماتفكريش .. و العفو على الابيات و احنا كان نفسنا نخدم يا فندم
مستنى نتيجه عدم التفكير

OverFOrty يقول...

نسيتوا اهم سبب الرجل بيخون علشان مراته مش بترضى تخليه يتجوز عليها حتى لو كانت متدينه و المثل بيقول ميت عشيقه و لا لزيقه
و اللزيقه من اللزقه اى الجواز الشرعى الدائم الثانى

Che يقول...

OverFOrty
الخق لازم يتقال .. ماينفعش اتقبل من اى ست انها لما جوزها يقولها انا هاتجوز عليكى تبارك له لانها كده يا اما مش بتحبه يا اما هتخونه هى كمان يا اما بتعتبره من الكماليات اللى فى البيت و مش فارق معاها
و انا هنا مش باتكلم على انه حلال او حرام .. لان الجواز التانى و التالت و الرابع و ما ملكت ايمانكم حلال مليون فى الميه انا هنا كنت باتكلم عن الطريقه اللى بنبص ليها للموضوع
شرفتنى بتعليقك و مستنى تعليقات تانيه

حروف (دلو مرة ثانية وجرح ثاني سابقا) يقول...

اديني جيت وعلقت عايزة اقوللك جيت لسببين
السبب الاولاني كنت حاجزة وبرغم انيمش في مود جيد لتعليق وتاركة التعليق بقالي يومين الا اني بنفذ وعوديالسبب التانياني عرفت انك مضايق فقلتاجي اسئللك ماللك دة احنا حتي قرايب؟؟؟؟؟ ربنا ييسر حاللك
بلنسبةللبوست بص انت ضحكتني بجد برغم ضيقتي بس عايزةاقوللك حاجة انا بنت وحيدة وبفكر بطريقة غريبة تصور انيبفكرلوجوزي اتجوزعليا انا اللي اختارها وتعيش معانا عشان انا مش بحب اكون وحيدة بس ساعات بفكر اني مش حنفذ دة لو في الحقيقة واني بقول كدة عشان برا الموضوع انا طيبة بس مش ساذجة ولا عبيطة بس يعنيالعقلانية معايا بتاخد حيز اكبر بمعني ايام الرسول صلي الله عليةوسلم وزوجاتةبس ارجعواقول كان في غيرة من حب النبي لسيدة خديجة بعدوفاتها وكذللك لبنت ابس بكررضي الله عنهما بدليل موقف العسل واتفاقهم بان ينفروامن رائحة فم الرسول صلي الله عليةوسلم عندما ياتي من عندها لانة كان يحب العسل وقالواله ان العسبل سببلة رائحةسيئة فحرم الرسول صلي الله عليةوسلم العسل عن نفسة فنزلت الاية الكريمة"لاتحرموا علي انفسكم ما حلل الله لكم" هل معني ذللك ان الحب اوالزواج انانية وامتلاك هلمعني ذللك انها غريزة برفض واقع المشاركةفي الزوج
مش حجاوب علي الاسئلة لانيمش عارفة الاجابة
بس حرجع للاسباب للخيانةوبلاشنسميها خيانةلان الخيانة"الزنا"من الكبائر وصعب انها تسامح بسهوله
خلينا في الزواج الثاني زي ما الست بتكبر فالراجل بيكبر........ الحياةعندالست مشكلها معاشرة الست بتحتاج اشياءاخريالحنان الاحتواءالفكري الاعتماد عليها عشان كدةاول ما بيرجع بترميلةكل المشاكل لانها بتحب احساس انها مسؤلة منه وان في حد في النهاية بترجعلة لو رجعنا للدين ولوصايا الرسول صلي الله عليةوسلم مكنش حد اشتكي يعنيالنوم لما الست تكون تعبانة وتنامويجي الزوج يطالبها بحقةمفيشمراعاهولما ياخدحقة ميجيش يسال نفية بانها راضيةاو مبسوطة ولالا الزوجمشلازم يطلبمن مراتة تقوم ترقص هو ممكن يشغلموسيقي هادية ويحضرها لبس ويقولها عازمكفي بيتنا انهردةمعتقدتش انها حترفض ويرقصمعاها ولو غير الموسيقي لرتم سريع اكيدهي حترقص واكيد لو طلب منها في وقتها حترقص طب لو رقصت ليةيضحك ويفصل من الضحك ولما هو يتحرج انه يطلب منها ترقص لية بيشتكي من انها بتطلب انهاتطفي النور وفي النهايةالزواج سكن ومودة مش كله هونجا بونجا علي راي بنت خيخة
بوست جميل ياعمرو

Che يقول...

العزيزة حروف
اولا انتى تيجى و تعلقى براحتك .. حاجزة مش حاجزة محدش يقدر يكلمك و تبأى فى اول الصف كمان امال خالتك تبقى عمتى و احنا قرايب ببلاش كده
و ثانيا ربنا يعينك و انا رغم انى مش عارف ايه اللى مضايقك اللى انى بدعى ربنا انه يفرج كربك و يذهب عنك همك و غمك آمين يا رب العالمين و انا دلوقتى احسن كتير
و ثالثا انا مبسوط جدا انك ضحكتى و انتى بتقرى البوست وده نساك الضيقه ولو لوقت قصير أوى
نيجى للتعليق بأه ... انتى بتعليقك علقتى على كل حاجه مكتوبه فى البوست و ده شئ جميل و انا باعتز بكده لانى باعمل كده مع الناس اللى كلامهم بيفرق معايا مش باعلق لمجرد التعليق
و كل اللى انتى قلتيه صح ولا جدال عليه و انا مش مع الجواز التانى ولا ضده انا بس كنت باكتب من وجهه نظر رجالى كل الاسباب الحقيقيه و الغير حقيقيه اللى بتخلى الراجل يتجوز تانى او يخون مراته ( مع التسليم بأن الخيانه حرام بس يفضل فى رجاله ديلها نجس ) ... و فعلا انتى لما قلتى انتى بتفكرى ازاى انا ابتسمت مش سخريه والله بس عشان السبب اللى انتى نفسك قلتيه انك لو فى نفس الموقف مش هتتصرفى كده ... و انا عايز احيى فيكى انك انسانه بتحتكم للعقل لانه ده الصح مع انه متعب بس ده الصح
و فعلا فى النهايه الجواز مش كله هونجا بونجا لانه فيه برضه القرف و الملل و فيه كمان السعاده و الفرح .. بس بصراحه و مين غير زعل .. الهونجا بونجا هى المتعه الوحيده اللى اصبحت ببلاش فعشان كده كله بيفكر فيها
سعدت جدا بتعليقك و مستنى التعليق الجاى

nudy يقول...

انا رايي ان الراجل بيخون لانه نادم عي تحمل المسئؤلية ولانه بيتهياله ان مراته بتعرف كل هاجه بس مش بتعملها له بس ده مش حقيقي الراخل بيخون لانه بيشوف ان عيب قوي يقول لمراته ايه اللي بيبسطه وهو حتي عمره ما بيفكر يسالها عن اي حاجة بتبسطها هي وكانها مش موجودة اصلا وبيعتبر الامر كله مجرد اثبات للمجتمع بانه راجل ميه ميه

Che يقول...

nudy
اتفق معاكى فى انه ده سبب من اسباب الخيانه .. و المشكله فى السبب ده انه الراجل بيحس بالكسوف و الخجل من زوجته مع ان زوجته هى اكتر انسان المفروض مايحسش بالخجل منه
اشكرك على تعليقك و مستنى تعليقات زياده