الاثنين، 30 مارس 2009

يوم من حياتى

هاحكيلكوا يوم من حياتى ... امبارح الحد فضلت نايم لغايه ما زهقت من النوم و بعد كده صحيت اتغديت و فضلت قاعد اقرا لغايه مازهقت من القرايه و بعدين قعدت على النت شويه لغايه مازهقت من النت ... شويه و جبت مودرن سبورت عشان الماتش بتاع مصر و زامبيا
المهم مودرن كانت عامله لقاءات مع شويه ناس من اللى رايحين الاستاد .. المهم جابوا شويه مزز ( او شويه بنات لكل الناس اللى مشتركه فى حركه انا مش مزة ) .. المهم انا ندمت انى مش فى مصر .. بعيد عنكوا انا فى بلد بتسمى اللبن اللى بنشربه و بيغلى و كده حليب و بتسمى الرايب لبن ، و طبعا عشان انا جاهل و غريب و الغريب اعمى و لو كان بصير .... جبت اللبن ( اللى هو الرايب ) على انه اللبن اللى بنشربه ( اللى هو هنا حليب ) و طبعا ماعرفتش الا لما سخنت اللبن اللى هو مش حليب و لقيته جبن و عمل زبادى ..... المهم جه الماتش و اتفرجت عليه و اتغميت مش عشان احنا اتغلينا انما عشان احنا كان مستوانا وحش و ماكوناش نستاهل نفوز .. ما علينا .. شويه و نزلت اشتريت شويه لبس و رجعت البيت .. قعدت اتفرج على الدش لغايه الساعه 6 الصبح و بعدين نمت
ده روتين حياتى كل يوم .... يل رب صبرنى ( مع الاعتذار للمدونه صبرنى يا رب ) .. ملل ملل ملللللللللللللل

الأحد، 29 مارس 2009

انا و الاسد

دى صورة من البوم الصور القديمه بتاعتى من سنتين كده ... اتصورت مع الاسد و هو صاحى و مفترس زى ما انتو شايفين .. و لما سألت على الدبه قالولى انها ماكلتش فمارضتش اتصور معاها عشان مامدش ايدى عليها لو فكرت تعمل حاجه كده ولا كده عشان جعانه ، اصلى مش باحب الافترا


الجمعة، 27 مارس 2009

انا ملبن ولا ايه

كنت من مده بأقرا مدونه واحد مثقف جدا ... المهم فى وسط الحوار اللى باللغه العربيه الفصحى لقيته كاتب جمله موتنى على نفسى من الضحك ، الجمله كانت " ايه ده انت طرى أوى و ملبن " ... المهم فى وسط حاله الملل اللى انا باعدى بيها لقيت نفسى بأفكر فى حاجات غريبه ... مثلا زى ان فى الغابه الحيوانات مابتكونش غير نفسها ... يعنى مثلا التعبان بيكون تعبان و الكلبه بتفضل كلبه و كده .... افكار غريبه أوى مش عارف انا بأفكر فيها ليه
حاجه تانيه ان العلاقات الانسانيه نسبه الحقيقه بتكون قليله .. زى ما اكون اول مرة اعرف الحقيقه دى
حاجات غريبه جدا ..... و يفضل السؤال السرمدى ..... " هو انا بأيت ملبن ولا ايه " ... يا ريت حد يجاوب عليا

الأربعاء، 25 مارس 2009

الملل

أيــوب رمــاه البيــن بــكل الـعـلل
لسبع سنين مـرضـان وعنـده شلل
الـصبر طيب . . صبر ايوب شفاه
بس الأكادة مــات بـفـعـل . المــلل

الأحد، 22 مارس 2009

اعتذار

أعتذر عن الغياب الذى لا أعرف الى متى سيطول

الاثنين، 9 مارس 2009

خمسه اوسكار

البوست ده اهداء لزيكا و مياسى و عادل باشا لانهم اكتر تلاته مدونين مهتمين بالسينما و صناعه الافلام انا اتعرفت عليهم
و انا ممتن جدا لكل الناس اللى سألوا عليا لما طولت الغيبه شويه و اخص منهم بالذكر زيكا و مياسى و منوش و عاشقه و غلبانه و حروف بس معلش كان عندى ظروف كتير ملخبطه و الحمدلله ابتدت تتعدل
نيجى للبوست نفسه ... البوست النهارده على افلام الاوسكار ... الافلام السنه دى كلها حلوة .. اغلبها مميز ، طبعا ممكن واحد عبقرى يقول ان السبب فى ده انها افلام الاوسكار انما كان بيجى سنين تلاقى فيلم او اتنين بس اللى مميزين و الباقى افلام كويسه بس مش لدرجه التميز ، و بما ان الافلام كتير فهنتكلم النهاردة عن خمس افلام بس و نخلى الباقى لو فى العمر باقى

فيلم The Dark Knight كان اجمل فيلم انا شفته فى سنه 2008 و الحوار فيه مكتوب بحرفيه عاليه جدا .. الفيلم اكتسب شهرة فوق شهرته لما الممثل اللى قام بدور الجوكر اتوفى بسبب جرعه ادويه زياده و كانت ادويه مش مخدرات .. الممثل ده و اسمه Heath Ledger عمل حرفيا و فعليا دور عمره ، كان دور مميز جدا تفوق بيه على Jack Nicholson الجوكر القديم و واحد من اكتر الممثلين المعروفين باجادتهم لادوار السايكو ، و مش هاكون باكدب لو قلت ان جايزة احسن ممثل مساعد اللى كان مترشح ليها هيث ليدجر هى الجايزة الوحيدة اللى انا كنت عارف من هيكسبها قبل الاوسكار ، و عجبنى انما لما اسمه اتنده الناس اللى فى قاعه كوداك كلهم قاموا وقفوا لانهم هنا بيحيوا ممثل راحل مش مجرد ممثل خد الجايزة و فعلا تفوقه هيكون عقده كبيره للى هيجى بعده عشان يمثل دور الجوكر

فيلم The Wrestler واحد من اجمل الافلام الانسانيه اللى ممكن تتفرج عليها ، القصه بدون حرقها للى ماشافش الفيلم لسه عباره عن حياه مصارع اكتشف انه لو عايز يعيش لازم يبطل المصارعه ، المشكله و الحبكه الدراميه فى الفيلم انه مابيعرفش اى حاجه فى حياته غير المصارعه ليه بنت مابيشوفهاش ، عنده علاقه براقصه استربتيز بس علاقه مش مستقرة و من ناحيته هو اكتر من ناحيتها هى ، وظيفه عبارة عن مجرد دخل ثابت مش اكتر .. الحاجه الوحيده اللى بتحسسه انه لسه عايش هى المصارعه و دلوقتى عشان يفضل عايش لازم يسيب الحاجه اللى بتحسسه باحساس الحياه ... دور متميز ل Mickey Rourke فى دور المصارع و هو فعلا قال انه كان بيمثل قصه حياته .. ميكى فى التسعينات كان ممثل وسيم و موهوب جدا .. ادمن المخدرات و بعد عن السينما و اتجه للملاكمه و كسب حزامين فيها و لعب مصارعه شويه ، قعد يتعالج نفسيا 12 سنه منهم تقريبا 5 سنين كان بينام فى الدولاب و كل الناس قالت لا يمكن يرجع يمثل تانى بس هو اثبت انه مفيش مستحيل ( المعلومات عن ميكى رورك كان مصدرها الاساسى صديقى امير لذا وجب التنويه و الشكر ) .. زى ما قلت .. فيلم جميل

فيلم The Reader الفيلم ده كان من اغرب الافلام اللى انا شفتها السنه دى فى الاوسكار لكذا سبب .. انه من ايام فيلم Schindler`s List سنه 1993 ماشفتش فيلم بيتكلم على النازى و اليهود و الهولوكوست و اوشفيتز و كل الكلام ده اترشح للاوسكار ، سبب تانى انه بالنسبه لافلام الاوسكار استغربت انه يكون فى الفيلم Full Frontal Nudity بالنسبه للمثلين و الممثلات لان الموضوع ده مشهور فى السينما الايطاليه بوجه خاص ، و اخر حاجه مشهورة شفت فيها كده كانت مسلسل Rome ، بالنسبه للفيلم نفسه فالفيلم بغض النظر عن قصته اللى يمكن كعرب مانعجبش بيها انما انا هنا هاتكلم عن التمثيل فكان دور جميل جدا بالنسبه ل Kate Winslet ممثله تيتانك المشهورة او اللى اتشهرت بسبب تيتانك ، كانت اكتر واحده مميزة فى الفيلم و مش هاكون باكدب لو قلت انها كانت المحور الرئيسى اللى الفيلم كله بيدور حواليه و المشكله اللى مقابلانى فى الكلام عن الفيلم ده انه ماينفعش اتكلم عنه من غير ما اكشف احداثه فانا هاستنى اللى اتفرج عليه عشان اتكلم عليه معاه ، بس فيلم مميز و جميل أوى

فيلم Doubt فيلم رائع بكل ما تحمله الكلمه من معانى يستحق انه يكون فى ترشيحات احسن فيلم و الابطال التلاته اللى فيه يستحقوا يترشحوا للجوايز التلاته .. الجميله Meryl Streep اللى اترشحت 15 مرة للاوسكار و كانت مترشحه لجايزه الاوسكار لاحسن ممثله فى دور رئيسى و استحقت كلام كيت وينسلت اللى فازت بالجايزة لما قالت انه مجرد وجودها فى نفس الترشيح مع ميريل سترييب جايزة فى حد ذاته ، و فعلا خلتنى اسأل يا ترى ايمانى بالشئ و برأيى كافى انه يكون سبب ان الشئ ده او رأيى يكون صح .... الممثل التانى Philip Seymour Hoffman اللى كان مرشح لوسكار احسن ممثل مساعد بس الجايزة راحت لهيث ليدجر لانه زى ما الاجانب بيقولوا you can never compete with a dead guy بس كان دوره محير جدا و انسانى جدا لانه اتكلم عن الضعف الانسانى بوجه عام ... و الممثله التالته Amy Adams اللى كانت مرشحه لجايزة احسن ممثله مساعده و اللى عبرت عن الطيبه و حسن الظن الموجود فى الناس و كانت مثال جميل لان الدنيا لسه بخير مع ان الدنيا ابعد ما يكون عن الخير ... فيلم يستحق المشاهده

فيلم Slumdog Millionaire اكتر فيلم جميل شفته السنه دى ... فيلم مثال للبطوله الجماعيه ، ماتقدرش تطلع منه ممثل متميز بعينه انما فريق العمل كله مميز ، اكتر حاجه لمست روحى و انا باتفرج على الفيلم و مش هاكون باكدب لو قلت ان الاجانب ممكن يكونوا انبهروا بيها انما عمرهم ماحسوها ولا هيحسوها ان الاجواء الموجوده فى الفيلم انا شايفها بعينى فى بلدى ، السرقه .. اطفال الشوارع ، بيع الناس و استغلالها ، الفقر المحيط بكل حاجه ، لما تكون فرصتك الوحيده للنجاه من كل ده عباره عن حلم ان تكسب اللوتارى او زى بطل الفيلم تكسب المليون .... اخراج مميز ل Danny Boyle و زوايا ممتازة لمدير التصوير .. موسيقى تصويريه تعيشك فى جو الفيلم من غير ماتخدك منه بس مع كده انت ملاحظها ، معادله صعبه نجح فى تنفيذها A.R. Rahman و استحق الاوسكار عليها ... قصه جميله جدا و بسيطه جدا و من وجهه نظرى انه بساطتها هى سر جمالها و ساتحقت القصه الحصول على الاوسكار .. الفيلم كسب 8 جوايز اوسكار و كلهم كانوا مستحقين ... فيلم تخسر كتير لو ما شوفتوش