الاثنين، 30 مارس 2009

يوم من حياتى

هاحكيلكوا يوم من حياتى ... امبارح الحد فضلت نايم لغايه ما زهقت من النوم و بعد كده صحيت اتغديت و فضلت قاعد اقرا لغايه مازهقت من القرايه و بعدين قعدت على النت شويه لغايه مازهقت من النت ... شويه و جبت مودرن سبورت عشان الماتش بتاع مصر و زامبيا
المهم مودرن كانت عامله لقاءات مع شويه ناس من اللى رايحين الاستاد .. المهم جابوا شويه مزز ( او شويه بنات لكل الناس اللى مشتركه فى حركه انا مش مزة ) .. المهم انا ندمت انى مش فى مصر .. بعيد عنكوا انا فى بلد بتسمى اللبن اللى بنشربه و بيغلى و كده حليب و بتسمى الرايب لبن ، و طبعا عشان انا جاهل و غريب و الغريب اعمى و لو كان بصير .... جبت اللبن ( اللى هو الرايب ) على انه اللبن اللى بنشربه ( اللى هو هنا حليب ) و طبعا ماعرفتش الا لما سخنت اللبن اللى هو مش حليب و لقيته جبن و عمل زبادى ..... المهم جه الماتش و اتفرجت عليه و اتغميت مش عشان احنا اتغلينا انما عشان احنا كان مستوانا وحش و ماكوناش نستاهل نفوز .. ما علينا .. شويه و نزلت اشتريت شويه لبس و رجعت البيت .. قعدت اتفرج على الدش لغايه الساعه 6 الصبح و بعدين نمت
ده روتين حياتى كل يوم .... يل رب صبرنى ( مع الاعتذار للمدونه صبرنى يا رب ) .. ملل ملل ملللللللللللللل

هناك 42 تعليقًا:

Mafrousa يقول...

ماشاء الله ماشاء الله
روتين حياتك كل يوم؟؟؟؟؟؟
كل يوم؟؟؟؟؟؟
كل يوم تنزل تجيب لبس؟؟؟؟
هههههههه
طيب انا عاوزة روتين حياتي يكون فيه حاجتين من اللى انت بتعملهم
انى اقرا لغاية لما ازهق
و اني اعمل شوبينج كل يوم
ههههههههه
اما بالنسبة للماتش فمستوانا كان....ولا بلاش

معلش هوه ده تمن الغربة الزهق
و انت برضه لما تكون فى مصر ساعات حتحس بالغربة و الزهق
فكر تعمل حاجة ما تخليش الزهق يفقدك حماسك
زيي انا الزهق افقدني الحماس لعهمل حاجات كتيرة كنت بحب اعملها
تحياتي
اما اللبن و الحليب
ده فيه بلاد كتيرة بتقول عليه كده
معلش الواحد بيتعلم برضه
تحياتي

Che يقول...

مفروسه
طبعا كل يوم بنزل اجيب لبس .. الفكرة انى مش باجيب اللى انا عايزه كله فى يوم واحد عشان يكون عندى حاجه اعملها تانى يوم .. المشكله مش فى الغربه لانه احنا برضه اغراب فى بلدنا المشكله فعلا فى الزهق .. بس ايه الحاجات اللى انتى كنتى متعوده تعمليها

Unknown يقول...

احنا بنسمي اللبن الزبادي رايب
وبنسمي اللبن حليب:)

ما تكون عنا وانا مش عارفه؟

Che يقول...

مياسى
لسوء الحظ انا مش عندكم بس قريب منكم جدا و ممكن اكون عندكم بعد ساعه زمن
بس يا ترى هتكون مشكلتى الزهق برضه ؟

Unknown يقول...

خلاص عرفت وينك
في بلاد الحرم أكييييييييد

لا يا عمرو الزهق عنا أخف بأكد لك

هو الزهق من الغربه ولا من روتين الغربه؟

Che يقول...

مياسى
كلامك صح .. و الزهق من الاتنين و من الوحده لانى مليش غير صاحب واحد بس هنا و مش باشوفه على طول

Unknown يقول...

والله ما بقدر أحكيلك غير ربنا يهون عليك
معك معك بتتعود؛ هاد بس لأنك لسا جديد؛ والبني آدم بس يكون جديد في أي مكان بدو يعاني شوية في الأول

بتهون

Che يقول...

يا رب يا مياسى يا رب

Unknown يقول...

عزيزي
تحياتي لك
بس احنا اتغلبنا مش علشان مستوانا وحش لا احنا اتغلبنا علشان مجاملة شحاتة لمتعب اللى هوا كان الاسؤ فالمباراة
على فكرة انا في شغلي معايا جنسيات كتير عربية واهمهم 3 جزائرين شغلين معايا.. امبارح قبل الماتش قطعتهم كلام بثقة اننا هناكل زامبيا بس اليوم هما اللى هرونى تريأة
تحياتي والى الامام

fnoonh يقول...

مش فلسفة مني ولا حاجة
بس اعتبرها نصيحة من اختك الصغيرة حاول تعملك ورد يومي في اليوم حتى لو صفحتين من القران بس
ولو تصلي السنن حتى لو مش كلها يعني بالتدريج
اشغل وقتك في عمل حاجة مفيدة وانت والله ماهتحسش بالملل
حتى لو كان في ملل ماهيكونش في ذنوب وكل ما العبد بيبعد عن ربنا والله بيحس بديق شديد و
ربنا يعينك

وبالنسبة للبن العملته جبنة ده
انا مقيمة في السعودية وعندنا اللبن ده وللاسف بقيت احبه جدا ودلوقتي والله معايا كوباية منه بشربه اتفضل معانا هههههههه
ولما بنزل مصر بقعد ادور عليه لحد ما الاقيه ان شاالله لو كان في الصعيد

وربنا يارب يبعد عنك الملل ويقدرلك الخير

تقبل تحياتي

اه اقولك جرب اللبن ده مع التمر بيكون جميييييييييييل

*البت المشمشية *حلوة بس شقية * يقول...

اايه ياعم الحاج

انتا اتحسدت ولا ايه

مكنتش بتبطل ضحك بس يمكن عشان انتا بعيد عن مصر

حاسس بملل
بس انا لو منك اروح وانط فى كل ممكان
ومتنساش الهدية بتاعتى ان اوسالى وعادل

MaNoOoSh يقول...

انت زهقان من ايه بس
طب منت لقيت تغيير اهو
حتى بالامارة جبت لبن لقيته رايب
ههههههههههههه
الملل اللى انت فيه دة فعلا من الوحدة
ربنا معاك ويرزقك بالصحبة النافعة

عاشقه وغلبانه يقول...

ماشاء الله
بتجيب لبس كل يوم
يابختك
علي فكره ده حسد
هههههههههههههههههههههه


وبعدين ايه وداك عندك


ومعا ضدد شعار هي مزه
هههههههههههههههههههههه

خالتى بمبة يقول...

انت بتشتري لبن ولبس كل يوم بس دا كده هتعمل ازمة ملابس والبان بس ليك حق تزهق

بلسم المعرفة يقول...

ياااااااااه ربنا يكون فيعونك فعلا حياتك مملة جدا جدا

Magi Mostafa يقول...

لا فعلا انت متعذب اجازه ودش وانترنت وشوبنج وعندك اكتئاب!!!!!!!!!!!!!!!!!!!!!

بص خد قرص بروزاك وقرصين منوم وارجع مصر وانت هتبقى تمام

Che يقول...

MEDUS
كلامك صح .. بس عندى سؤال .. ايه كان لازمتها نشمت ان الجزاير اتعادلت و احنا كمان اتعادلنا بعديهم .. اصلى عملت زيك ، قعدت اتريق على خلق الله لغايه ما اتريقوا عليا

Che يقول...

فنونه
انا فعلا ابتديت اعمل بالنصيحه بتاعتك ، و بعدين يا ستى ما تزعليش .. اصل انا كمان فى السعوديه بس واخدها طيران من مكان لمكان ، اظن انتى فى جده لو ماخنتنيش الذاكره

Che يقول...

مشمشه
شكلها كده .. بس يا ترى مين اللى حسدنى .. هو ده السؤال
و طبعا مش هانسى الهدايا .. مفيش سلام خالص لوجه الله كده .... هههههههه

Che يقول...

منوش
فعلا السبب الرئيسى للملل هو الوحده .. بس اعمل ايه .. اصاحب اى حد فى الشارع .. المشكله ان الشوارع هنا فاضيه ... يعنى رضينا بالهم و الهم مش راضى بينا
و يا ستى فعلا موضوع اللبن كان تغيير

Che يقول...

عاشقه
اللى ودانى عندى يا دوك النصيب ... و بعدين بالنسبه لموضوع اللبس فانا باوزعه على الاسبوع عشان الاقى حجه انزل بيها .. بس ماتقلقيش .. كلها كام يوم و هاكون جبت كل اللى انا عايزه و ساعتها مش هانزل خالص ... عشان تبطلى تحسدينى يا دوك

Che يقول...

خالتى بمبه
بالنسبه لازمه اللبن ماتخافيش اصلى مش باشرب نيدو ولا بيبى لاك و بالتالى مفيش خطر على الاطفال .. و بالنسبه لموضوع اللبس ماظنش انى هاعمل ازمه عشان اللبس هنا على قفا مين يشيل .. اهم حاجه انك تكيشى

Che يقول...

بلسم الجراح
مش كده و النبى ... وربنا يستجيب منك يا رب

Che يقول...

ماجى
مش لاقى بروزاك ولا زولام هنا .. اضرب ايه تانى فى الكيميا ... هههههه

Magi Mostafa يقول...

مفيش بروزاك طيب معلش عليك بقى بالخلطه دى

H2so4 و Hno3 بنسبه 3:1 وابلعهم كده مره واحده

Che يقول...

ماجى
حرام عليكى .. عايزانى اخد سلفوريك اسيد و نيبتريك اسيد بالنسب دى .. هو انا قلتلك انى عايز اعمل نيتروجلسرين ولا حاجه
على فكره انتى مش بتردى على المسنجر بتاعك :P

سوبيا يقول...

انت هنا


والبلد فاضية



وانا عماله ادور عليك

معلش عندي دي

متوقعتكش هنا في 5 جد



ماشي ماشي

لينا كلام كتييييييييييييير

يارب التعليق يظهر
لاني خلاص كده هاعيط

Che يقول...

سوبيا
انا هنا والله .. و ادى التعليق بان

Magi Mostafa يقول...

تشى انت زعلان ليه دى وصفه متجربه بس انت جربها كده وهتدعيلى

ماسنجر ايه؟؟؟؟؟؟؟

سارة نجاتى يقول...

ايه عم الملل اللى حط عليك فجأة ده ؟
بس على فكرة مش لازم الفراغ يكون مرتبط بالملل , أنا كل يوم ورايا حاجات و ملانة برده
بس أديك بتقرأ ,بس حاول تكسر الروتين يعنى بص دى حلول بحطها أنا وصحابى عشان نكسر الروتين و مش بنعملها
1) نروح كلاس هيب هوب
2) نركب مركب من القلعة عندنا
(لينا سنتين بدون مبالغة بنقول ح نعمل دول )
3)تروح الكوافير ( ده بنعمله الصراحة مكدبش عليك )
ههههههه
هيس يا معلم

تامر علي يقول...

ياريت الواحد يأنتخ زيك كده ...انت زعلان من القرايه واللبن ؟؟؟ بكره يا سيدي حياتك تبقى اثارة وتقول كنت فين يافراغ لما كنا فاضيين :)

GIA يقول...

سلام
وحياتك وقت تزهق بس قلي..... وانا بسليك
انشالله نهارك سعيد
انا حبيت سلم عليك وأشكر مرورك ع مدونتي وترك تعليقك عندي
وتنشالله تكون فرصة سعيدة أتعرف عليك
gia

مثلية فقط يقول...

مرحبا , كيفك اليوم ؟ بتمنى تكون تغيرت حالة الملل

تحياتي

Che يقول...

ماجى
انا فعلا جربت الوصفه دى ايام الكليه بس دى كانت ايام و راحت لحالها .. و بالنسبه للماسنجر سورى دى كانت غلطه خلطت فيها بينك و بين شخص تانى.. اصف مرة تانيه

Che يقول...

سارة
الحقيقه ان شاكر للمعونه و الافكار بتاعتك بس المشكله ان كلها ماتنفعش اعملها عشان انا فى مصر حاليا و ماعندهمش هنا قلعه عشان اخد مركب من جنبها

Che يقول...

تامر على
الحقيقه انى حياتى مش فيها فراغ زى ما انت فاكر ، المشكله انها ممله أوى مع انى باشتغل و مشغول بس بيفضل عندى وقت كتير مش عارف اعمل فيه عشان انا متعود انام 4 ساعات فى اليوم ، و يا سيدى لو على الانتخه دى سهله .. ما عليك الا ان تقرر انك تبقى انتوخ
بس عندى سؤال يا ترى انت تقصد ايه بكلمه اثاره ؟؟ ههههههه

Che يقول...

GIA
اسم لفيلم من اجمل افلام انجلينا جولى
المهم انى حاسس بملل مالوش اول من اخر اليومين دول .. و لا شكر على التعليق .. خدت بالى ان نشاطك على المدونه قليل ، ليت المانع خير .. و يا ستى وقت ما تكونى فاضيه اكيد هاكون انا كمان فاضى قياسا على حاله الملل الل انا فيها
نورتينى

Che يقول...

مثلية فقط
انا كويس .. بس حاله الملل لسه موجوده .. فينك من زمان مختفيه فين

أسما يقول...

تصدق صعبت عليا... انا احلهالك، نبدّل. انت تيجي مكاني و انا اروح مكانك، و اهو بالمرة اعمل شوية شوبنج و اقعد لوحدييييييييييي. جتنا نيلة ف حظنا الهباب

GIA يقول...

Hi
شكرا صديقي

Che يقول...

lsolde
مايصعبش عليكى غالى .. ولو على البدل انا موافق بس عندى شرطين
الاولانى انى باشتغل 12 ساعه فلازم تحافظى على شغلى
و التانى لو حياتك ممله اكتر منى يبقى انا راضى بحياتى
ايه رايك .. لسه عايزة تبدلى ؟

Che يقول...

GIA
Hi back
العفو .. بس شكرا على ايه ؟ ههههههه