الأربعاء، 1 أبريل، 2009

خمسه كتب

بمناسبه حاله الثقافه اللى انا فيها و عشان انا بحبكوا ( اه و الله و ربنا عالم باللى فى القلوب و خد من قلبى و صر يا رب ) .. ماعلينا المهم انا هاتكلم النهارده عن 3 كتب بس
الاولانى كتاب مصر و المصريين فى عهد مبارك ( 1981 - 2008 ) للدكتور جلال امين
بجد يا جماعه اللى عايز يقرا ثقافه يقرا الكتاب ده ، و برضه اللى عايز يقرا سياسه يقرا الكتاب ده برضه ، و اللى عايز يقرا علم اجتماع فكمان مره هيكون ده الكتاب المناسب .. يعنى من الاخر اللى عايز يقرا عن مصر بجد يقرا الكتاب ده
الكتاب التانى ... " كلنا هناخد فيها " أشرف عبد الباقى من فيلم خالى من الكوليسترول نقلا عن كتاب ابن عبد الحميد الترزى لعمر طاهر .. الكتاب ده عباره عن تأريخ للسينما المصريه من عصر ما قبل التاريخ .. كتاب ممتع و اسلوب عمر طاهر غنى عن التعريف
الكتاب التالت ... "بيقولك واد روسى عمل ( هاك ) لموقع البنتاجون و حمل عليه MP3 ، انت تعرف ان ( هاك ) / Hack معناها اختراق " .... " يا عم مهو كله اليومين دول يقى ( بيتهاك ) ، ده حتى الحكومه ( بتتهاك ) عينى عينك " ... احمد العايدى فى روايته ان تكون عباس العبد .... روايه جميله ... بس فى تحذير للناس اللى شافت ان اسلوبى فى الكتابه فاضح شويه ان الروايه دى مكتوبه بنفس الاسلوب مع الاعتماد على التلميح ، يعنى الامر فى النهايه راجع لنيتك .. لو حلوة او وحشه و الله اعلم بنوايا العباد
بس كده .. كفايه كتب النهارده

هناك 13 تعليقًا:

fnoonh يقول...

ماليش دعوة انا اول تعليق

fnoonh يقول...

ربنا يجعل نوايانا حلوة
للاسف مش عارفة ان كنت اقدر اوصل للكتب دي ولا لاه بس يلا هحاول وان ماقدرتش يبقى عليك انت تجيبهم لنا ايوة مش تعرفنا بس بيهم وخلاص لا تجيب كام نسخة وتوزعهم على البيقرأو اوك ههههههههه
تقبل تحياتي وتقديري

Che يقول...

فنونه
انتى اول تعليق فعلا يا ست فنونه ، و بالنسبه للكتب فانا فعلا معايا نسختين من الكتابين التانى و التالت ، الفكرة فعلا ازاى اوصلهملك .. مشكله كبيره مع انى فى نفس البلد اللى انتى فيها بس هنعمل ايه مع الهيئه اللى فى البلد دى
نورتينى يا جميل

magi يقول...

شكلها كلها كتب ممتعه لولا بس انى مشغلوه اليومين دول بس اكيد اول ما فضى هقراهم

بس الكتاب الاخير فاضح الى اى حد يا تشى
يعنى فى المعقول ولا اوفر ياريت تقولى قبل ما اشتريه

Che يقول...

ماجى
طبعا الكتاب فى المعقول مش فاضح مثلا زى عماره يعقوبيان او شيكاجو
بس بجد كتاب لذيذ
و اسف على اخر تعليق ليا عندك فى المدونه

adel يقول...

كتب حلوة فضلي بتاع جلال امين ان شاء الله هاقراه قريب

بس رواية العايدي علي قد ماهي ممتعة بس مسروقة من فيلم fight club
و اكيد انت عارف الفيلم :):)

Che يقول...

عادل باشا
طبعا عارف الفيلم بس زى ما انت قلت انها ممتعه ، ماقدرش انكر الشبه اللى واصل لحد التطابق تقريبا بين الفيلم و الروايه بس فى الاخر هى روايه ممتعه و مش هاتندم على الوقت اللى انت قضيته و انت بتقراها
نورتنى يا باشا

Isolde يقول...

و الله انا من اول ما شفت اسم Che ده و انا قلت ان دماغك عالية... شكرا عالكتب

سوبيا يقول...

طيب هو انت عندك نسختين 2 بس

كده انا وافنان هانلغي الهدنة ونعلن حالة الحرب

ويا انا يا افنان
في موضوع الكتاب والرواية

Che يقول...

lsolde
ربنا يكرمك يا رب و شكرا على تانى تعليق .. و يا ستى لا شكر على كتب
نورتينى يا جميل

Che يقول...

سوبيا
واله يا سوبيا الموضوع متوقف على انك و افنان فى نفس البلد ولا لا .. و عموما ممكن ادى واحده فيكوا نسختى بس ترجعهالى تانى ... ده بس عشان الهدنه اللى بينك و بين افنان تستمر

Isolde يقول...

ايه ده ، انت عرفت منين ان انا جميل، هو انا مشهورة اوي كدة... يا حلاوة :)

Che يقول...

lsolde
طبعا يا جميل انتى مشهورة جدا كمان
نورتينى تانى يا جميل