الخميس، 16 أبريل، 2009

مش وحشانى خلاص

النهارده ولاسباب مفيش داعى من ذكرها فقدت اخر صله ليا بمصر .... المهم من كام يوم كنت باتكلم مع عادل صاحب مدونه بحب السيما و شوشو صاحبه مدونه البت المشمشيه على موضوع الغربه ... عادل مقتنع انه بلدنا اولى بينا و شوشو معاه انا قلتلهم انى مقتنع برأيهم بس المشكله اللى عندى انى حسيت ان البلد رفضانى ، انى مهما كنت عايز اعمل حاجه فى مصر مش هقدر اعمل نتيجه لرفض البلد ... قلت لعادل و شوشو ان الانسان بيفضل يقاوم كل المظاهر السلبيه اللى موجوده فى بلدنا .. بيقاوم الاوضاع الغلط .. بيقاوم و بيحس انه بيقاوم البلد كلها و الناس كلها و ده مش بيكون غلط بدرجه كبيره لاننا فى مصر فى الاخر بنقول خلاصه الحكمه بتاعتنا فى اكتر من 7000 سنه " اللى تعرفه احسن من اللى ماتعرفوش " .. " امشى جنب الحيط تسلم " .. و امثال كتير و النتيجه اننا بنكون نسخ بالكربون من بعض و حتى الناس اللى مختلفه شويه بنهاجمها
افتكرت بوست كانت اسماء عونى صاحبه مدونه مكعب سكر انها عشان بره مصر حاسه انه حتى الزباله وحشتها و انا ساعتها استغربت من الجمله دى .. و جيت بعد كده فى بوست ليها تانى اسمه الغربه قلت انى حاسس اللى هى كتبته و ان مصر كلها على بعضها وحشتنى .. بس الحقيقه انى النهارده مر مش وحشانى .. مش قادر افتكرها غير و افتكر فشلى هناك ، افتكر مشاكلى هناك ، افتكر احلامى اللى حتى مبقتش فاكرها
اديت مثال لعادل و شوشو حوالين مقاومتى فى مر و امتى اتكسرت و اتكسر معاها حاجه جوايا مش قادر ارجعها .. انا هاقولكوا على المثال ده .. انا خريج علوم قسم كيميا \ حشرات .. بعد ما خلصت فكرت فى حاجه افيد نفسى و افيد بلدى بيها ، فى حاجه اسمها علم الحشرات الجنائى يعنى ببساطه استخدام الحشرات فى العلوم الجنائيه و ده حاجه موجوده فى العالم من الخمسينات .. المهم فكرت اعمل ماستر فى الحاجه دى ، قعدت ادور على دكتور يشرف عليا و بعد ما لفيت لقيت دكتور واحد فى جامعه الازهر هو اللى متخصص فى الموضوع ده .. لما قابلته سألنى اذا كنت ناوى اسافر امريكا او اوربا ولما قلت لا قالى يبقى بلاش الموضوع ده لانى هاضيع وقت و مجهود و مش هاستفيد حاجه ... و فى الاخر لما لقانى مصر قالى انى اروح مصلحه الطب الشرعى و اشوف اذا كانوا هيقبلوا بحاجه زى دى ولا لا و اذا قبلوا هو موافق يشرف عليا ... عشان انا كنت لسه متفائل و عندى امل رحت هناك و بعد انتظار 5 ساعات شخيه هناك قابلتنى و بعد ما انا شرحت و استفضت فى الشرح بصلى و قالى " يعنى حضرتك عايز تسرح ظباط المباحث و تشغل الصراصير و الخنافس مكانهم " و بعدين ضحك ضحكه عمرى ما هانساها و قالى " يا بنى شوف مستقبلك " .. و بعديها انا قررت انى اسيب البلد و اشوف مستقبلى
يا ترى انا غلط و لا صح .... و عادل و شوشو متفائلين ولا مش لسه مش عارفين البلد مع الاخد فى الاعتبار ان عادل نفسه قال انه فى حلم من اجلامه مش هيقدر يحققه فى مصر و انا ارجو ان عادل و شوشو مايزعلوش انى اتكلمت على الحوار ده اللى حصل بينا
مستنى رأيكم

هناك 34 تعليقًا:

عاشقه وغلبانه يقول...

انا عايشه هنا ومش وحشاني برضو

يمكن التدوين بس اللي وحشني الفتره اللي فاتت

magi يقول...

بص يا تشى انا بحب مصر جدا لكن عندك الف حق انا جاتلى الفرصه انى اسافر ومش حسيبها تضيع من ايدى

انت كمان؟؟؟ههههههههه

تخيل انا كنت هدخل ك وحشرات كنت متأثره بالمسلسلات الاجنيه لما كانوا من نوع الذباب والحشرات بيتعرفوا على مكان الجريمه وساعه وقعها والكلام ده
بس بعد مماما ادتنى شويه تريقه وبعد ملقيت ان لقبى فى مرحله التحول لحشره قولت خلينى ك وبيولجى خصوصا ان عرفت ان مفيش حاجه اسمها معمل جنائى فى مصر وان الكلام ده كله اشاعات مغرضه بس فالح نائب جامعه القاهره واى جامعه حتى الجماعه بتوع الحزب الوطنى يتكلموا عن اهميه كليه العلوم واحنا مبتبهدلين زى منت شايف

Che يقول...

عاشقه
فينك من زمان يا دوك .... مش لوحدك اللى مصر مش وحشاكى و ده مش معناه اننا وحشيين او مش بنحب بلدنا بس الفكرة اننا حاسيين ان البلد مش بتحبنا اد ما احنا بنحبها
و بالنسبه للتدوين انا حتى ماكنتش قادر اكتب بس كان لازم اكتب النهارده يا اما كان ممكن يحصلى حاجه
نورتينى يا دوك

Che يقول...

ماجى
عاقله و الله يا ماجى و كويس انك مادخلتيش حشرات
و بالنسبه للى بيقولك ان كليه علوم مهمه فكلامهم صح بس مش مهمه فى بلدنا
احنا بنتخرج عشان نشتغل مندوبين دعايه و مبيعات فى شركات الادويه
او بنشتغل اى حاجه زى المعهد القومى للبحوث اللى كان اخر اختراع ليه استيكه
نورتينى يا قمر

MaNoOoSh يقول...

والله مش عارفة اقولك ايه...
انا عايشة فيها وكل ما احلم حلم بيفطس ومش عارفة اكرهها بس بردو مش عارفة اعيش فيها بكرامتى.
بس للأسف ايوة انت عندك حق.. صعب الواحد يحلم فى مصر وصعب الواحد يحقق حلمة.

Che يقول...

منوش
والله عارف اللى انتى بتقوليه و تقريبا كلنا حاسين نفس الاحساس
بس المشكله اننا مش اندال و عشان كده هنفضل نحب بلدنا

MǿиY El-Shreef يقول...

انا عن نفسي مبسوطه ف السعوديه اكتر من مصر ورتاحه نفسيا

هو اه انا بحب انزل ف الاجازات وكده

بس عشان بتبقى فتره قصيره واهلي واحشني

وبعدين حتى انا ان شاء الله ناويه اطلع اشتغل بره مصر عشان اعرف احقق طموحاتي

انت فعلا صح

بس بردوا هحبها

Che يقول...

مونى
من غير تحيز و من غير شوفونيه ... انا فاهم انتى قلتى كده ليه .. يمكن عشان انتى عايشه فى السعوديه و بتيجى مصر فى الاجازات فبتعتبريها لذيذه و كده .. انما انا اكتر حاجه وجعانى و واجعه ناس كتير انها بجد جوه دمنا و مش قادرين نستغنى عنها .. لو ماكنتش فارقه معانا ماكناش نبقى تعبانين كده
عارفه احنا لما نقول انها مش وحشانا .. عاملين زى اللى بيحب واحد اوى و بيقول انه مش بيحبه مع انه هيموت من كتر الحب
جايز انا صح و جايز انا غلط بس اللى اكيد انى هافضل مصرى
نورتينى يا مونى

*البت المشمشية *حلوة بس شقية * يقول...

عمور اعمل تعديل بسرعه عادل صاحب مدونة البلد دى فيها حكومة وبحب السيما مش المخرج
المهم
انتا عارف ومتاكد وانا قولتلك مهما كان هترجع
مش هتقدر تستحمل
هتبقا نفسك تنزل تبوس ترابها
ومش هتستحمل غربيتك
وايه يعنى
ماحنا ياما بنشوف منها
ولسه هنشوف بس بنحبها
وهتبقا مشتاقة تاكل سندوتشات فول وطعمية
وتخرج بليل انتا واصحابك
وتسهر وتعمل كل حاجة هنا متقدر تعملها هنا
وانا متاكدة انا بقول ايه
دى حالة بس
وكل حاجة هتتظبط
وهسنماك تنزل مصر عشان تجيبلى هدية

Che يقول...

شوشو
شكرا على المساعده يا شوشو و التعديل تم و اسف يا عادل
بالنسبه لنقطه انى هارجع انا اكيد هارجع بس الفكرة امتى هى دى النقطه
و كل اللى انتى بتقوليه ده انا حاسس بيه بالفعل بس انا فعلا حاسس ان مصر مش وحشانى او جايز مش وحشانى دلوقتى
جايز تكون حاله و هتعدى ، الزمن لوحده هو اللى هيجاوب على السؤال ده
نورتينى يا شوشو

Bant El7ag Dracula يقول...

بص يا ch

حلو وحشه العيب مش فيها ولو كل واحد سبها ومشى يبقا لازم تفضل كدا

وانامعاك هى وحشه وحكومتها وحشه كفايه انك هتكبر وتكبر ويتقال عليك دا مصرى هتحس سعتها انها وحشاك مش الا فيها لا بلدك نفسها ونفسك ترجعلها وتقوله بصى انا بقيت ايه

بس والله يا بنى الا عيب مش فيها

وفى كلها الحلاتين انت صح ومش صح
صح فى انك حابب تحقق حلمك وفى بلدك ومش عارف ودا يزعلك وان معاك

ومش صح فى انها موحشتكش لان الوم مش عليها ...

ولو بتقول مش فاكر اى حاجه فيها

اكيد نفسك ترجع وتفتكر كل حاجه وهيجى عليك الوقت ويبقا نفسك تفتكر الوحش والحلو

حاسه انى اتكلمت ككتير بس معلش انا بحب البلد دى ومش بحب حد منها ينسها ؟؟؟

Che يقول...

بنت عم دراكيولا
الفكره مش فكرة حلوة ولا وحشه ، الفكرة انها عشان بلدنا احنا نفسنا انها تكون احسن بس زى ما تكون هى اللى مش عايزه كده
و هاسألك سؤال ، لو مش قادره تحققى اى حاجه فى بلدك يا ترى هتستنى و تفضلى تنطحى فى الصخر مع العلم ان الصخر بعد مش هيتكسر ولا تحاولى تحققى حلمك لانك مش بتعيشى غير مرة واحده و بعد كده بالنسبه لبلدك اكيد هترجعيها بس لكل حادث بعد كده حديث
و بعدين انا مش باقول انها مش وحشانى انا باقول مش وحشانى خلاص ، يمكن بعد شويه اغير رأيى ، يمكن اكون منفعل ، و يمكن اكون صح
بس برضه ده مش هينفى حقيقه انى مصرى و هافضل مصرى
و يا ستى اتكلمى براحتك ، اما بالنسبه لمسأله اننا نسيناها ، لو كنا نسيناها كان زمانا مرتحاين انما اللى تاعبنا اننا مش قادرين ننساها
نورتينى يا مرعب .. هههه

Bant El7ag Dracula يقول...

على فكره انت قولت كلامى بس بصيغه تانى

انا مقلتكش انت غلط قولتلك انت غلط وصح

صح فى انك حابب تحقق حلمك وفى بلدك ومش عارف ودا يزعلك وان معاك

ومش صح فى انها موحشتكش لان الوم مش عليها ...


يعنى كل كلامك هو نفس كلامى بس بمجرى تانى او قلته بطريقه تانيه

اقرا كلامى تانى

Che يقول...

بنت عمو دراكيولا
انا معترضتش على كلامك و فعلا احنا الاتنين قلنا نفس الكلام بس كل واحد من زاويه
انا بس بافضفض من كتر همى
و بعدين تعلقين فى يوم واحد .. ده كتير عليا
نورتينى يا عم الفامبير

Bant El7ag Dracula يقول...

ششوفت ياعم حرمتكش من حاجه

وادى التالت

عد الجمايل بقا يامعلم

وانشاء الله تيجى مصر وانت حاجه جامده كدا


التالت تعلقات بجنيه ايدك على جنيه

نيهاهاهاهاهاها

Che يقول...

بنت دراكيولا
ربنا يكرمك يا رب و مش عارفين نودى جمايلك دى فين
و بالنسبه لموضوع الجنيه ده فيبقالك عندى و انا هاحوشهولك

سوبيا يقول...

في مقولة مشهورة نزلها فيرجن جديدة
بتقول ايييييييييه

لو لم أكن مصريا
لوددت أن أكون
مصريا بجد

كلنا وحشانا بلدنا
لدرجة انها مبقتش توحشنا خالص

انا
عالاقل

حاسة فيها باغتراب
فظيييييييييييع

ومعدش فيها حاجة حلوة بتحضن تخبطي ده

اكيد فترة وتعدي
لاني مش هاقدر استمر فيها كدهه

احساسك طبيعي فوق الطبيعي

لان كواحدة عايشة فيها
مش وحشاني

حاسة انها من كتر القبح والدمامة اللي في وشها

مبقتش عارفاها
ومبقتش توحشني

في افراد بيوحشوني
وفي اماكن بتوحشني

لكن هي ككل
بقيت أخاف في حضنها
وانا ماشية في شوارعها
بخاف من ضلمتها

ايه اللي بكتبه ده


بص

انت طبيعي
ماتقلقش

Che يقول...

سوبيا هانم
الواضح ان دى مشكله عامه لانى لغايه دلوقتى ملقتش حد قال كلام مختلف
بس مشكلتنا انها مع كل القبح و الدمامه اللى وشها هتفضل برضه امنا و عشان احنا مش ولاد حرام هنفضل نحبها برضه
و الحمدلله انى طلعت طبيعى
نورتينى يا سوبيا هانم

مياسي يقول...

مممم

مش الفتره شوي قصيره عشان تنسى هيك بسرعه؟

Che يقول...

مياسى
انتى مختفيه فين
انا ماقلتش انى نسيتها لانى ماينفعش انساها ، انا كل اللى قلته انها مش وحشانى خلاص
و حتى الكلام ده مشكوك فيه لانى لو ماكانتش وحشانى كان زمانى مستريح انما انا مش مستريح
تقريبا نفى النفى اثبات
نورتينى يا قمر

مياسي يقول...

مممم مختفيه فين؟ سؤال كويس والله

أول شي جهازي كان عطلان؛ تاني شي عندي متقشه-المفروض كمان كم أسبوع- فعم بحاول أخلّص الي علي وملحوقه

فكرك أي أصعب: النسيان ولا انك بطلت تشتاقلها؟

Che يقول...

مياسى
حمدالله على سلامه جهازك
و يارب تلحقى تخلصى اللى وراكى عشان المناقشه
و بالنسبه لسؤالك فبجد مش عارف الاجابه
افتكرت و انا بقراه بيت الشعر بتاع كالمستجير بالرمضاء من النار
تفتكى انتى انى الاصعب يا مياسى ؟

adel يقول...

‘مرو انا النت قاطع بقاله 4 ايام بس هرد بسرعة

1-انا فعلا احلامي اتدمرت قبل حتي ما احاول احققها و انت عارف السبب

2-انا بحب مصر بغباء و مش عارف سبب ...هي اه طلعت عين اهلي بس مش عارف اكرها ... زي كل بنت بحبها ...بسيبها و انا لحد النهاردة بفتكرها بكل خير و بقول لسه بحبها ....غبي قوي انا

ههههههههههه

3-مصر مش وحشاك دلوقتي بس صدقني قريب قوي هتحس احساس عمرك ما هتحسه

4-انا قلت انا هترجع بعح 5 او 6 سنين
بس والله ياعمرو و انت عارف ان كلام صح .... اللي بيسافر مش بيرجع

Che يقول...

عادل
حمدالله على سلامه النت
و انا يا عادل عارف السبب زى ما انت قلت ... انا كمان بحب مصر يا عادل مش عارف ليه كل الناس خالطه ما بين ان مصر وحشانى و انى لسه بحبها
يا عم عادل دى حاجه بتجرى جوانا و ماينفعش نشيلها
و جايز الاحساس اللى انت بتقول عليه اكون انا حاسه دلوقتى
و بالنسبه للرجوع اكيد راجع لانى مانسيتش كلامك اننا لازم ندفن فى بلدنا
نورتنى يا عدول يا حبيب قلبى

kemet يقول...

السلام عليكم ورحمة الله وبركاته

كلنا بنقول اننا بنحب مصر
بس
اوقات القسوة وعدم احترام الانسان
بيخلونا نقول بس ....اننا نحب
لكن هل فعلا احنا نفعل ؟

التجارب حوالينا فاشله كتير جدا
يمكن انت مغلطش من وجهة نظر
لكن من وجهه تانيه انت استسلمت مع اول عقبه وقفت قدامك
والسؤال هو

انت حققت حلمك ده بره مصر ؟
لو كانت الاجابه نعم
يبقى انت مغلطتش ويمكن في يوم تقدر تساعدها من مكانك

لكن لو كنت سافرت وعملت غير حلمك
سامحني يبقى انت مكنتش تقصد مصر انت كنت تقصد عمرو
تقصد ان عمرو يعمل ماستر مختلف عن الكل وبس
لكن لما لقى الموضوع صعب
قال خلاص هما الخسرانين باي
سامحني
بس اصل في مشكله اننا اوقات بنتكلم واحنا بالذات كمصريين بنتكلم لكن كلامنا غير
اوقات من كتر الكلام بنصدق نفسنا
لكن فعلا نفسنا بتكون غير
مش لاننا منافقين لكن لا
لاننا مغلوبين وراضيين بالغلب
بنحاول نغير لكن بنستسلم بسرعه
وبنحاول ديما نبرر اننا معانا حق
لكن فعلا الحق مع مين دا سؤال صعب

تحياتي
الى اللقاء

Che يقول...

Kemet
و عليكم السلام و رحمه الله و بركاته
اولا متفق معاكى فى اننا كلنا بنقول بس شويه اللى بيعملوا حاجه عشان الكلام اسهل من الفعل ، بس مختلف معاكى فى انك فاكرة التجربه اللى انا كتبتها دى كانت اول عقبه و اول فشل مع ان اللى انا قلته انى فضلت اقاوم لغايه ما مقاومتى خلصت
بالنسبه لنقطه حلمى و انى حققته او لا انا فعلا لسه ماحققتوش ، سيبك انه مش غلط انى افكر انى احقق حلمى بالعكس ده حق مشروع ليا انى ادور على حلمى و احققه لانى مش هاعيش غير مرة واحده و لازم استغلها عشان معنديش فرصه تانيه
و بالنسبه لنقطه اننا مغلوبين على امرنا فده حقيقه و انا قلت كده فى البوست ، لانه للاسف لقمه العيش اهم حاجه عندنا و مش مهم كميه الذل اللى هيا متغمسه بيه و طعمها ايه و احنا بناكلها
و اكيد صعب نعرف الحق مع مين
نورتينى يا كيميت

Isolde يقول...

طبعا انا مش هاقوللك انا باشوف ايه في الجامعة، و ده مكان شغلي، اصلي بعيد عنك اتوكست و اتعينت فيها معيدة... مع اني لو كنت شيلتلي كام مادة و عيدت لي سنتين ولا حاجة كان بقي حالي احسن بكتيييييييير، قال ايه كان نفسي ابقي استاذة ف الادب الانجليزي، تخيل؟ استاذة مرة واحدة و انا اصلا مش عارفة اسجل للماجستير، و ما اقولكش عالتريقة اللي باسمعها لما اقول لحد علي موضوع رسالتي... بص انا اخر مرة دخلت فيها الجامعة و انا عندي امل ف حاجة كدة خرجت منها و انا باقول" ياكش تولع" هي و البلد. و علي فكرة، انا المنحة بتاعتي جت و هامشي من هنا، و برده ياكش تولع، دي بلد عايزة الحرق

Che يقول...

Isolde
طبعا انا مش محتاج اسمع منك اى حاجه لانى عارف الجو اللى فى الجامعه و عارف المعيدين عاملين ازاى لان ليا اصحاب معيدين كتير و اساتذه مساعدين و حتى اساتذه
برضه مش هاسألك على موضوع رسالتك و لا على التريقه لانى زى ما انا كاتب عشت الجو ده بنفسى
و بالنسبه للمنحه الف مبروك عليكى و شدى حيلك على الاقل عشان ماتشمتيش حد فيكى
بس انا مختلف معاكى فى نقطه واحده بس ، انا مش نفسى البلد تولع انا نفسى اللى فيها هما اللى يولعوا
نورتينى يا ثائرة يا متمرده

مثلية فقط يقول...

مرحبا

انطلق بأول طائرة لأبعد مكان

الله يوفقك

سارة نجاتى يقول...

لا طبعا يا عموره لأن انت فى الحالة دى مضطر يا أما تدرس الشىء اللى أنت بتحبه و تقدر تفيد فيه يا اما تقعد تتوكس هنا

ما أنت لو بتشتغل سورى يعنى رقاصه مكناش قلنالك سافر و لا اتنيل اتغرب لكن دى حاجة الناس مش فاهماها أصلا

ده زويل كان زمانه بقى ناظر مدرسة فنى صناعى لو كان قعد هنا

شق طريقك لامام يا معلم و لما تفيد نفسك بره , أكيد ح تيجى تفيد بلدك هنا عشان أنت بنى ادم جدع

بييييس

Che يقول...

مثلية فقط
هو ده بالظبط اللى انا عملته يا جميل
نورتينى و متبقيش تغيبى كده

Che يقول...

سارة
يارتنى كنت رقاصه يا سارة ماكنش ده بأه حالى ، بس حظى المهبب انى مش رقاصه
و بالنسبه لمسأله تفيد بلدك دى مش اكيدة عشان البلد شكلها مستكفيه و زى الفل

dr.lecter يقول...

سافر

بص انا بحب مصر كمكان كبلد لكن كناس وسكان وعيشه ونظام ومجتمع حقير قاسي

لا ارفضه

انا اكرم لي اسافر بره واتبهدل علي اني اتبهدل جوه بلدي ومن ناسي

مافيش مستقبل في مصر خلااص الزمن ده مش زمننا ومافيش حد هيفلح طول ماهو هنا

سافر بجد

Che يقول...

dr.lecter
انا موافق على كل اللى انت قلته يا ليكتر ، و اللى مزعلنى انه للاسف الشديد صحيح و انا فعلا سافرت
نورتنى يا دكتور و مستنى زيارتك تانى