السبت، 10 يناير، 2009

حكايه قصيره جدا

الساعه دلوقتى بعد واحده بليل .. و انا ماشى فى الشارع فاجأنى انى اشوفها واقفه لوحديها فى عز التلج ده .. كانت مستخبيه فى حما عربيه راكنه .. صغيرة لدرجه مش معقوله .. صوتها ضعيف و واطى اوى لدرجه انه قطع قلبى لما سمعته .. كانت كانها بتبذل مجهود عشان تطلعه و تسمعه لاى حد .. بصيت حواليا .. الناس اللى ماشيه قليله جدا و مع كده اللى ماشى مش بيلتفت ليها اصلا كانها مش موجوده و كانى انا بس اللى شايفها و سامعها ... معقوله وصلنا للدرجه من القسوة و تحجر القلب .. المهم اخدتها معايا البيت و روحت بيها ... مجرد ما دخلت فى الجو الدافى بتاع الشقه ابتدت تستعيد حيويتها تانى .. كانت ميته من الجوع .. بس لازم تستحمى الاول .. شدتها و جرتها جر غصب عنها و دخلت معاها الحمام و ابتديت احميها بايدى و اشيل التراب اللى على جسمها .. كانت بتقاومنى مقاومه رهيبه ... بس كانت اضعف من انى اعتبر المقاومه دى جديه .... بعد ما حمتها و نضفتها نشفت جسمها و ابتديت اسرح ليها شعرها و هى مش عاجبها و بتحاول تهرب منى بس انا كنت ماسكها كويس ... بعد كده قمت حطيتلها اكل و اكلت كتير جدا ... اد كده كانت جعانه .. بعد كده ابتدت تنعس ... اخدتها جنبى على السرير و نيمتها فى حضنى و الحقيقه انى كنت باحاول استفيد من الحراره اللى طالعه من جسمها و استعين بالحرارة دى فى مواجهه الصقيع اللى احنا عايشين فيه ... شويه ابتديت احس بانتظام انفاسها و سكونها التام ... دلوقتى اقدر انام و انا مطمن عليها ... كنت حاسس انه مش هاممنى انه حد يشوفنى معاها فى بيت واحد .. فى سرير واحد .. يشوفنا كيان واحد ... كل اللى كان هاممنى انها تنام فى حضنى و بس .. احساس ابوة .. يمكن .. احساس حب .. اكيد ... يا ترى فى احاسيس تانيه ... مايهمنيش و مش مهتم اعرف و سايب المعرفه دى للناس اللى غاويه تحليل
بكرة ان شاء الله لما تصحى هابقى اعرفكم عليها .. مع انى انا نفسى لسه ماعرفتش اسمها .. بس مش مشكله انا هاديها اسم من عندى






اسمها بسبس ... و هى قطتى الجديده

هناك 12 تعليقًا:

ستيته حسب الله الحمش يقول...

اقسم بالله انا كان فاضلي دقيقة واطالب بشنقك
في الاول جبت لي صدمة وبعدين لما لقيتها بسبس رجعت قرأت تاني باستمتاع
ليه الرحمة والحنان بيثيروا في نفس الناس السوية كل هذا الفرح. انا مبسوطة بالحدوتة اللي هي حلوة مش ملتوتة

طيب سؤال لما بشوف ع اليوتيوب فيديو تعذيبات الشرطة داخل الأقسام والظابط اللي بيصور سعيد جدا وهو شايف الضرب والصراخ ده كله بقول ازاي ممكن انسان يكون ضد الفطرة الأنسانية وياريته واحد دول كتير؟
لما الأسرائيلي بيعذب اهل غزة كل التعذيب ده ازاي كبني ادام بيعرف يكمل حياته تاني؟
ازاي ناس ربنا اداها من اسمه الرحيم وازاي ناس نزعت من قلوبها الرحمة وبتقدر تعيش وتاكل وتشرب وتتجوز؟
سؤال ليس له اجابة

Che يقول...

عمتى ستيته
الحمدلله انك صبرتى عليا الدقيقه دى عشان كنت روحت بلاش او " روحت التمن " على راى يوسف السباعى فى ام رتيبه
بالنسبه ليه الرحمه و الحنان بيبسطوا الناس السويه و يفرحوها انتى رديتى على نفسك " ناس سويه " .. بالنسبه بأه لظباط البوليس و الجنود الاسرائيلين انصحك انك تقرى نيتشه عشان تشوفى ازاى الانسان ممكن يبص للانسان اللى زيه على انه مش انسان اصلا و بالتالى انه يعذبه او يموته بيكون حاجه عادى لانه اولا مش بيعذب او يقتل انسان .. و ثانيا انه فاكر انه بيؤدى واجبه مش اكتر و بيعمل خدمه للبلد
يا رب اكون عرفت اجاوبك على السؤال اللى مالوش اجابه

Teawater يقول...

ه فكره انا من الول عارفه انها قطه

عارف ليه

عشان هي امورة وصغننه

وانا عندي القطط ديه حاجه كده مالهاش زي

بموت فيها وبحبها

مبروك بسبسه

ديه اول مرة اجي ياريت مكنش دمي تقيل

شكرا لاستضافتي الدقايق ديه

Che يقول...

Teawater
يا مراحب بيكى ضيفه عزيزة لاول مرة و يارب ماتبقاش اخر مرة ... و طبعا انتى ضيفه خفيفه و مش تقيله و انا مش محتاج اوضح ده
بالنسبه للقطط فهى عشقى الابدى و مابحبش حاجه اد مابحب القطط
شكرا على زيارتك اللى عدت زى الطيف و مستنى الزياره الجايه

واحدة مفروسة يقول...

ههههههههه
عارف انا كنت حقول ديه قطة
بس يا قلبك يا نفسك الحلوة
انك تاخدها جنبك على السرير
دول بيبقوا مليانين براغيت
حتى بعد ما تحميها
لانهم لازمن لهم شامبو طبي بيكون من مكوناته دوا يمنع البراغيت
ادخل استحمى بقا و استعمل انت الشامبو
هههههههههههههه

Che يقول...

واحدو مفروسة
هو انا كنت مفقوس اوى كده ولا انتو اللى بتمشوا فى شوارع مليانه قطط ولا عمتى ستيته هى اللى لسه على سجيتها او جايز ماعندهاش ثقه كبيره فيا
المهم .. انا طبعا عارف الشامبو ده و هو عندى .. ده غير انى كتبت انى سرحتلها شعرها بس ماقلتش انى فليتها .. و طبعا انا عارف الحاجات دى عشان بربى قطط من و انا عندى 11 سنه و ياما ورد على اشكال و الوان منها .. الشيرازى و السيامى و البلدى زى المتوحشه اللى عندى دلوقتى
و اخيرا انا هادخل استحمى و اخد بنصيحتك
شكرا على تعليقك و على نصايحك القيمه بخصوص الشامبو و البراغيت و مستنى الزياره الجايه و بالمره ابقى هاتيلى شامبو معاكى اهو الزياده منه مابتضرش

رئـــــيسـة حزب الأحلام يقول...

هههههههههههه

تحفة بجد دمها خفيف وجميلة اوى
ماشاء الله ربنا يخليها لك
تحياتى

Che يقول...

رئيسة حزب الاحلام
ربنا يخليكى على مجاملتك الرقيقه
و ربنا يسمع منك بس لو هى تبطل عض و خربشه هتبقى عسل
شكرا على الزياره الطيارى و مستنى زياره اطول المره الجايه

maha يقول...

سلام عليك يا تشي
كنت عارفة من اول لحظة انها قطة :)
هههههههههههه
مضحكتش عليا
مع اني بحب جدا طريقةالكتابة دي
بس فعلا موقف جميل اوي لو حقيقي
القطط شئ غريب فيها بيحسسك انك شقي و جميل و طيب اول ا بتلعب معاها و تجري عليك
تعرف لو كنت بتتكلم جد و القطةدي بقت عندك و سبتها في يوم في البيت
هتعرف لوحدها و تتعود علي معاد رجوعك للبيت
ابي اسال اي حد قبل ما ترجع البيت يشوف القطة هتعمل ايه قبل ما تدخل من الباب :)
سلام
مها

Che يقول...

maha
اولا انا سعيد انك اول مرة تشرفينى
ثانيا انا لسه مستنى اول ما القطه تشد حيلها شويه و بعدين هانشر صورتها .. اللى انتى بتقولى على القطط شئ حقيقى جدا عشان كده انا بموت فيهم
و واضح انه عمتى ستيته بس اللى ماكنتش عارفه انها قطه
شكرا على الزياره السريعه و مستنى القعده تطول الزياره الجايه

GiGi يقول...

يعنى يمكن فعلا رايي يزعل حضرتك
بس انا فعلا مع اللى بيحصل ده نفسي قلبنا يبقى فى الرحمه دي للبنى الادمين الاول
مش هقول فى فلسطين
لا هنا كمان مع المرض والجوع اللى بيجتاحنا هنا
القطط ليها حق
بس فى طفل تانى جعان كان له حق اكتر
مش عارفه الرحمه بالحيوان شئ جميل
بس هل ده معناه ان بوش راجل كويس
مش دايما اللى رحيم بالحيوان يبقى صاحب قلب كبير
ربنا يكرمك على قلبك ده
بس فعلا الواحد خلاص قرفان من اللى بيحصل
موت ودمار وارامل وايتام فى كل مكان
وربنا يرحمنا

Che يقول...

GiGi
اولا رايك ماينفعش انى ازعل منه لانه رايك و انتى حرة كل الحريه فيه و فى كل الاحوال حتى لو الراى ضدى فهو راى يستحق الاحترام فى النهايه
بالنسبه للى بيحصل هنا و فى فلسطن و فى كل مكان اكيد ده غلط و اكيد الناس دى ليها حقوق علينا وربنا يقدرنا على اداء جزء من هذه الحقوق لعل الله يرحمنا يوم المشهد العظيم .. و طبعا بوش مش راجل رحيم ولا عادل ولا اى حاجه و حسابه عند خالقه ... الفكرة كلها انى حكيت موقف حصلى فى الشارع مع قطه .. الحيوانات بتختلف عننا انها مابتقدرش تعبر عن نفسها بالكلام - مع انه للاسف اصبح فى ناس برضه مابتقدرش تعبر عن نفسها بالكلام - و بغض النظر عن اى حاجه الواحد ماينفعش يقول عن عمل خير هو عمله لانه هنا يبتغى فضل الناس ولا يبتغى وجه الرحيم القهار
و انا بادعى معاكى من كل قلبى انه ربنا يرحمنا
شكرا على مرورك و تعليقك المحترم و بانتظار المزيد من التعليقات