الاثنين، 26 يناير 2009

تحلم بأيه

يا ترى فى كام واحد منكو بامانه لما قرى العنوان قال كامننا ... نتكلم جد شويه
طبعا فى ناس كتيرة منكم متابعه برنامج الحلم بتاع عمرو دياب ... الحقيقه انه عمرو دياب ممكن تتفق معاه و ممكن برضه تختلف معاه بس ماتقدرش ماتحترمهوش ( اللهم الا اذا كنت من الناس اللى بيحرموا الاغانى و بتوع " و لا ابالى حين اقتل مسلما على اى جنب كان فى الله مصرعى " بس ده مش موضوعنا ) .. واحد بقاله تقريبا 28 سنه بيحفر فى الصخر لغايه ما بقى عمرو دياب و احد من اهم اتنين فى حياتنا الغنائيه و الاولانى هو الكينج محمد منير ... المهم و انا باتفرج على البرنامج ده سألت نفسى هو انا عندى حلم ، عندى حاجه مستعد اضيع عمرى كله مقابل انى اشوفها ..... بأمانه لما بصيت لحياتى لقيت احلامى كلها احلام وقتيه ..... يعنى مثلا حلم انى اتخرج من الكليه و اتخرجت ، حلم انى اتجوز و ده لسه ربنا ما اذنش بيه .. احلام زى كده ... بس مالقتش عندى حلم يستاهل يبقى حلم العمر كله
مش عارف ... طبعا فى ناس بتحلم انها تكون اغنيا و ناس بتحلم انها تكون مشهورة و ناس بتحلم تربى عيالها كويس و تطلعهم محترمين فى وقت اصبحت فيه الدعاره و القواده هى اساس مجتمعنا ... طبعا كل دى احلام تستاهل الاحترام ... مشكلتها من وجهه نظرى انها احلام عامه ، كل الناس بمختلف افكارها و توجهاتها بتحلم بيها ... مفيش فيها خصوصيه و تفرد حلم العمر
دلوقتى بأه اسئل كل واحد فيكو .... بتحلم بأيه ؟ .. و عشان خاطرى ما تقولش كامننا
سايبلكوا اغنيه بحبها جدا لعمرو دياب يا رب تعجبكوا و مستنى اقرا عن احلامكم ..... سلام

هناك 47 تعليقًا:

Empress appy يقول...

الاحلام خطوات
يعنى انا مبقاش موظف صغير وفجأه احلم انى وزير ابقى هبله بجد
حلم كل فتره بحاجه علشان احققها
ومحلمش وانسى الواقع لانى لازم اربط الاتنين ببعض
انا بمشى على ده على طول والحمد لله محققه كتير من اللى عاوزاه

Che يقول...

Appy
اولا اهلا بيكى ... ثانيا انا مش مختلف معاكى فى اللى انتى قلتيه
بس انا كان قصدى انتى ايه الحلم اللى انتى حاطه فى اخر السلم الوظيفى بتاعك ... يعنى ايه اللى نفسك قبل ما تموتى ( بعد الشر عليكى طبعا ) تكونى عملتيه او وصلتيله
اكيد مش هاقولك تصحى الصبح تكونى رئيسه جمهوريه .. لان الاحلام من غير تعب تبقى اوهام مش احلام
اتمنى انى اكون وضحت سؤالى ... الا ايه رأيك فى الاغنيه
نورتينى و مستنى تعليقاتك على طول

حروف يقول...

اية دة حد معلق قبلي دية مهزلة انا الاول مكرر وامري لله حقرا وارجع اعلق

fnoonh يقول...

بص الانسان طبعة طموح بلاش اقول طماع خليها طموح احسن ومتامل للاحسن فاحسن عشان كده ماتلقيش عنده حلم واحد لا حلم واتنين وتلاته وبيحقق الاول بيحلم بالتاني وعلى كده ماشي الحال يعني دورة حياة طويلة بس الصراحة البحلم بيه تلاتة حجات لو اتحققتلي مش ححلم بحاجة بعدها اولا اكون مطبقة لديني كويس وراضية ماما وبابا عشان بكده يتحققلي الحلم التاني الهوه رضا ربنا الهيوصلني للتالت وهو دخول الجنة وبعدها مافيش حلم

dina يقول...

ممممممممممممم
انا مقتنفة اوى ان عمرو دياب لازم نحترمه عشان حلم و صمم يحقق حلمه و قدر يعمل دا فعلا...انا عن نفسى عندى حلم بحلم بيه اوى...بحلم اغير الدنيا...و بحلم اعمل حاجة بجد لبلدى و لدينى و طبعا لنفسى....بحلم اعيش الجملة اللى اتهرينا بيه فى المدراس (خلق الله الانسان لاعمار الارض)..عاوزة اطبقها مش بس اقولها.....عاوزة اقلب الدنيا دى عشان ارجع اعدلها...طبعا حلم بعيد و يمكن مقدرش اعمله...بس اول خطوة فيه انى ابدأ بنفسى و احاول ابقى انا الاول حاجة
موضوع جامد
تحياتى

ستيتة يقول...

شفت صحيت من نوم أهل الكهف جبت النوسكافيه وجيت على طول
زماااااااااااان ومش زمان قوي كان عندي احلام تطول الجبال
كنت بحلم اعمل علم ينتفع بيه ويقعد لي بقى في القبر يشيل عني البلاوي التانية اللي بعملها
كنت بحلم اكون الاحلى والاحسن والافضل
وفعلا يابن اخويا في هذا الزمان الماضي كنت طاووس يمشي على الارض حاسة اني ليا لزمة

لسبب معلوم وهو يأسي من بلد العلم فيها لا يكيل بالبتنجان وتزوير البحث العلمي ارخص من الخيار وان الفهلوي واصل واصل وان معاش استاذ جامعة مات وهو خمسين سنه وبقالوا 7 سنين استاذ هو 600 جنيه

تغيرت عمتك تماما وبقت عديمة الأحلام خالص وبقيت عاملة زي الفانبيرز

وتحولت الى ست مصرية تقليدية "للأسف" بحلم بولادي ومستقبلهم بس وده طبعا جايب لي مرض نفسي كومبلكس لأن اللي زي صعب قوي قوي تتحول فجأه لستيته

لو رجعت احلم تاني ها اقول لك
كده قلبت علي المواجع والبطاطس؟ ماشي

Che يقول...

ادينى قاعد مستنيكى يا حروف

Che يقول...

fnoonh
طبعا كل اللى انتى قلتيه ده صح و كلنا بيحلم بكده ... بس برضه لسه عايز اعرف حلم خاص بيكى انتى لوحدك
نورتينى

Che يقول...

dina
حلمى زى حلمك ... مشكلتى انى مش عارف اقلب الارض عشان ارجع اعدلها تانى ازاى
نورتينى و زدتى المدونه بهاء .... مستنى تعليقات كتير منك

Che يقول...

عمتى ستيته
انا والله عارف اللى انتى بتقولى عليه من حال الاساتذه الجامعيين اللى المفروض يكونوا واجهه و عنوان للبلد و بالتالى انا عارف حال البلد عامل ازاى ... انما هاقول ايه ... لنا الله
مستنى اعرف احلامك قبل ما تبقى مدام الحمش و كنتى صغننه كده

سمكه واحده يقول...

امممم تصدق خلتني افكر ده انا عندي احلام يمكن انا تلت تربع حياتي احلام وكتير اوي فيها اللي ممكن يتحقق وفيها اللي مستحيل يتحقق بس احلي حاجه الاحلام يعني
الحلم الخاص بيا بتمني يتحقق اني الف الدنيا بجد في كل بلد رحاله يعني واشيل بؤجه كده والف العالم ومبقاش مسؤله عن حاجه ولا خايفه علي حاجه وطبعا يكون معايا الفلوس اللي هتوفر السفر ده واتعرف علي ثقفات جديده وناس جديده وطبعا طبعا يكون معايا واحد هو اللي يعرفني علي العالم ده واحس اني طفله معاه ويكون زي بظبط مجنون تطق في دماغه فكره ننفزها علي الفور من غير تفكير ولو مكنش وربنا مأردش بتمني بردو اسافر والف العالم
لوحدي
يبقي معايا فلوس كتير كتير وابني بيت كبير واجيب فيه ايتام واربيهم واتكفل بيهم واجبلهم ناس كويسه من اطباء نفسين ومشرفات ولااد حلال ولما يكبورا كل واحد فيهم اكون حاطاله فلوس في البنك وبنيه عماره لكل واحد فيهم شقه ونفسي القانون يتغير بتاع مجهولي النسب ويكون من حقهم دخول شرطه وسفر خارج مصر وحجات كتير من حقهم ومسلوبه


ابني مؤسسه لذوي الاحتياجات الخاصه بس مش العبط اللي موجود في مصر ده لا حاجه مهمه واجيب ليهم دكاتره ومعلمين علي اعلي مستوي ويكون في دورات تدريبه لينا ونتعلم نتعامل مع الصم والبكم لانهم فئه ليست بقليله في البلد

بحلم ونفسي اوي اوي اعمل عمره واروح احج وانا لسه صغيره والرجاله كلها تصلي الفجر في جماعه والستات كلها نحتشم بالزي الاسلامي وانا كمان والبنات كلها متحطش هباب في وشها وتغير شكل وشها وبدل ما احج كل سنه بقي ابني مدينه للشباب المتنيل علي عينه بس مدينه مدينه مش زي بتاعه طلعت مصطفي لا مدينه ناس تسكن فيها وتبقي راقيه واسكن فيها الشباب ببلاش بجد والشباب تعيش بقي تعيش علي اساس اني معايا فلوس علي قلبي بقي مش حلم بئي وانادي في الميكرفون كده ياله كله يجري الشقق ببلاش و2 ونص تعالي في الدور التالت بص والعيال تجري والناس تموت بعضها شقق بقي وهيتجوزوا بئي ده هيقطعوا بعض

بحلم بقي ان الرجاله تتسحل من افاها طول الاسبوع شغل ومفيش اجازات ليها والستات يكون شغلها 3 ايام في الاسبوع بس وباقي الاسبوع في البيت مدلعه كده ومفرفشه وبتتفرج علي مولدتشي

حاليا بحلم اني اقوم اجيب اكل لاني هموت من الجوع والمدونات هتجنني والنت هيعبطني من دخول مدونه لمدونه وانا عايزه اكل وانام ومتنيله لزقه في الكرسي وياسلام بقي لو اكلت اكله كده من اللي قلبك يحبها وكانز بسيبسي بس خلاص مقطعاه خلاص مقاطعه اممم كفايه كده لحسن انا تعبت من الاحلام هقوم انا واسرح بقي برحتي لحسن صدعتك لو اتكلمت هتكلم للصبح

Che يقول...

سمكه هانم
يا ستى اولا انتى تتكلمى و ترغى مش من هنا للصبح انما من هنا لبعد بكرة كمان
احلامك جميله أوى .. انتى اول واحده تقول على احلامها
بس فى حاجه ... لو الرجاله اتسحلت طول الاسبوع و الستات قعدوا يتزوقوا فى البيت ففى الغالب الراجل من دول هيرجع مقتول و مراته هتقوله معلش يا حبيبى ان ماكانش النهارده يبقى بكرة .. مع انه مش هيكون فى بكرة ابدا
نورتينى و مستنى تعليقاتك على طول

kmt يقول...

السلام عليكم ورحمة الله وبركاته

تحلم بإيه
اولا مفتكرتش كماننا الا لما انت قولت :)
ثانيا موضوع الحلم دا كبير اوي
تعرف اننا محتاجين نتعلم اذاي نحلم ولما نحلم نحلم بإيه .
ايه دا هو الحلم محتاج علام ؟
بيتهيألي اصل ليه في ناس عرفت تحلم وناس لما تسألها بتحلم بإيه تلاقي صمت ودماغها تصفر من الهدوء والفراغ

تحياتي
الى اللقاء

Che يقول...

Kemet
محتاجين نتعلم ازاى نحلم ... كلمه صح أوى و وجعتنى أوى عشان زى ما انتى قلتى الحلم مش محتاج علام انما الظاهر اننا حتى نسينا ازاى نحلم
تحياتى على رأيك الجميل بجد و لسه مستنى اعرف حلمك لانك اكيد مش من الناس اللى دماغها بتصفر من الهدوء و الفراغ
نورتينى كالعاده

صبرني يارب يقول...

يوووووووه انا عايزه كتاب يا ابنى عشان اكتب الى انا باحلم به والله بجد انا مفتريه اوي فى الاحلام

وعلى فكره مين قالك ان احنا فى عالم الدعاره والقواده ومش عارف ايه ده ؟؟؟؟

انا مش شايفه كده انا لا انكر وجود ده وكتير
لكن مش الاكثر

وبعدين مين عمرو دياب ومحمد منير مش فاكره فكرني كده ؟؟؟

سوري باسترخمهم الاثنين معلش يا اخويا اصل انا قديمه شويه ههههههههههههههههههههه

Che يقول...

خالتى صبرنى
اولا نورتينى و بقالى كتير ماشفتش تعليقات ليكى عندنا
و بعدين انا كتبت عن عمرو دياب و محمد منير عشان انا ماوعاش على عبده الحامولى و ايام امان يا للى
نورتينى و مستنى اقرا الكتاب بتاع احلامك

hasona يقول...

مش قولت كامننا - ولا حاجة

الاحلام والاماني- شئ كويس
لكن ليس الجميع يستطيع الحلم ومنهم من اذا حلم لم يتحرك لتحقيقه
،،،
ومنهم من ينتظر الحلم ومنهم من يقف علي باب الحلم ويتأرجح بينه وبين الامل

ومنهم من يعامل الحلم كسلعة وينتظر تحقيق الثمن قبل أن يحلم

بس كنت عايز أوضح ان ممكن يبقي هناك أحلام وقتية وأحلام أكبر وهكذا
يعني ممكن نصنف الاحلام
أحلام علي مدار أشهر وأحلام علي مدار سنوات وأحلام العمر كما يقولون


،،،،،
طبعا أختلف معك في موضوع عمر دياب ومحمد منير - لكن ليس هذا مجاله

لسنا كلنا عمرو دياب
وهناك حالات أفضل من عمرو بكثير
يمكن الفرق هو التسليط الاعلامي لا أكثر
وعندما علماء أحلامهم كانت أكبر وأكبر
والحمد لله حققوا ذلك -لكن ليس علي أراضي مصرية-وده مش موضوعنا علي رأيك
،،،
المهم عايز أقول للناس ان الاحلام مجانية
ورفعوا الضرائب اللي كانت عليها
وعايزين الناس تبدأ تحلم بقي


شكرا علي دعوتك للناس بالحلم

وكل سنة وانت بخير
تحياتي

Che يقول...

hasona
عجبنى اوى تقسيمك للاحلام من ناحيه الوقت ... و عجبنى تعليقك اوى
بس برضه ماردتش عليا ... بتحلم بأيه
نورتنى

Unknown يقول...

انا بحلم طبعا غير كامننا اكيد بحلم انى ابقى معالجة نفسية كبيرة - بعد الدكتوراه وعليك خير- وحلم عمرى بقى هو مركز علاج نفسى كبييييييير بس ميكونش اسعاره هبلة ويبقى العلاج النفسى متوفر لينا كلنا حتى الطبقات الدنيا - دة لو فضلنا عايشين - عايزة اعمل قسم لتاهيل اطفال الشوارع واخليهم بنى ادمين وقسم لاضطرابات الطعام....بس كدةبالنسبة لاحلامك الوقتية المشكلة مش فى كدة المشكلة ان انت كدة بتعامل مع حياتك على انها فترات مستنيها تخلص فترة الدراسة بعدها فترة العزوبية ودة فى رايي بيفقدك ميزة الاستمتاع بس كدة...حلو البوست دة على فكرة

Che يقول...

enjy
عارفه يا انجى احنا لسوء الحظ مانعرفش قيمه العلاج النفسى فى مصر و بنعتبره كله شغل مجانين ... مش عارف ليه يمكن عشان احنا ناس مجانين فعلا بس خايفين نتعالج
بس انا عايز اعرف الفوزيته كام عشان اكشف
نورتينى و مستنى تعليقاتك على طول يا دوك

Desert cat يقول...

انا مش متابعه البرنامج الحقيقة
بس انا انا فعلا نفسى نبقى زى الدول المتقدمة وكل واحد يخليه فى حاله ومش يحشر نفسه فى حياة غيره

Che يقول...

كلنا هذا الرجل يا قطه
انما برضه نفسى اعرف حلمك اللى ماقلتيش عليه لحد ايه هو
نورتينى

سارة نجاتى يقول...

طب تعمل ايه فى اللى عاوزه أحلام لا تحقق الا لناس اختارها الله بعدد صوابع الايد الواحدة فى الدنيا دى ؟؟

يعنى هل كل كاتب ينفع يبقى ماركيز ؟؟ أنا مشكلتى عاوزه التوب فى كل حاجة و ان شاء الله ح أقع على جدور رقبتى هههه
أحمد ربنا أن أحلامك وقتية

تحياتى

صبرني يارب يقول...

البوست الجديد نزل

اهو ياعم عملت بوعدي وجيت اقولك ا ي خدمه

Che يقول...

سارة
انا عارف قصدك والله ، بس عايز اقولك على حاجه انا مؤمن بيها جدا
على السعى و ليس على ادراك النجاح ... بس اهم حاجه اسعى بجد
نورتينى

Che يقول...

العزيزة صبرنى
دمتى ليا يا غاليه
و انا جاى وراكى على طول

hasona يقول...

(((عجبنى اوى تقسيمك للاحلام من ناحيه الوقت ... و عجبنى تعليقك اوى
بس برضه ماردتش عليا ... بتحلم بأيه
نورتنى)))
يعنى مثلا حلم انى اتخرج من الكليه و اتخرجت ، حلم انى اتجوز و ده لسه ربنا ما اذنش بيه .. احلام زى كده ... بس مالقتش عندى حلم يستاهل يبقى حلم العمر كله
،،،،
حضرتك عمالة تقرري في الناس والعالم اللي رايحة واللي جاية((مفيش فيها خصوصيه و تفرد حلم العمر
دلوقتى بأه اسئل كل واحد فيكو .... بتحلم بأيه ؟ )))
ومش قولت صراحة علي أحلامك
أو تحدثت عن احلامك الدنيا والكبري ولكنك تحدثتي عن الاحلام العامة

أجب أبن أفصح - ما هي أحلامك الخاصة جدا ؟؟؟

تحياتي

Che يقول...

hasona
اولا انا ضمير مذكر مش مؤنث .. يعنى ماتفتكرش و انا باكتب الضماير على انى مذكر انى عندى عقده مثلا او من البنات اللى بتتكلم على نفسها بضمير المذكر و اكيد رغم انى ماكنتش باحب النحو بس لسه فاكر الضماير .. ده غير انى كتبت انى اسمى عمرو و ماظنش انه فى بنت اسمها عمرو يمكن فى بنت اسمها حنفى بس مفيش بنت اسمها عمرو
ثانيا انا شخصيا بادور على حلمى لسه و ماكنتش باقرر الناس بس كنت عايز الناس تشاركنى ... و عن حلم العمر كله بتاعى نفسى اعمل حاجه اغير بيها حياة ولو واحد بس ايه هى الحاجه انا لسه مش عارفها بس اكيد لما اعرفها هاقولك

kmt يقول...

السلام عليكم ورحمة الله وبركاته

ايوة انا تاني :)

مش عارفه ها تصدقني ولا لأ بس بجد سؤالك صعب
محتاج مني حبتين تفكير مش لان الحلم مش واضح لا لكن في احلام ممكن تتقال واحلام بتكون خاصة بصاحبها
يعني اصل الاحلام على حسب .

الحلم الواضح جوايا ومؤمنه بيه وان شاء الله يتحقق حلم روحاني شوية :)

لكن الاحلام الماديه بمعني الدنياويه فهي مشتركه بين الناس زي حلمك انت ودينا احلام كبيرة وصعبه واوقات بتكئبنا واوقات بتكون سبب ليأسنا يعني .......

بتحلم بإيه ؟
هاقولك
ممكن استرسل معاك في الكلام
بتحلم بإيه ؟

بحلم بأسرة تكون وحدة المجتمع بحق يطلع منها انسان حر والحرية مش تمرد ولا عصيان ولكن حر بمعني انه يقدر يقول لا وقت ما يكون معارض ولا مش بالكلام وحسب بالفعل كمان
وكمان يقدر يصقف للحق ويكون معاه حتي لو الحق دا مش عاجب ؟

بتحلم بإيه ؟
بحلم والحلم من حقي بحلم ببلد حرة حرة من العادات والتقاليد المخالفه لحرية الانسان كما اردالله ان تكون له الحريه
بحلم بمصرين احرار في الفكر والعمل

بحلم بكلمة مسموعه _ مش تدخل من الاذن اليمين لتخرج من الشمال _ لا مسموعه اي مؤثرة بالفعل تغير مش تتناثر في الفضاء اشلاء

بحلم بلوحه تحسسني بالجمال وغنوة تخليني اخرج من الدنيا للتحليق في السماء
بحلم بلحن يهز الدنيا يكون موطنه بلادي مش المولد وزكي والكلام الفاضي

بحلم بعلماء البلدي في البلد مش بلد تاني عايشين وخيرهم ليها مش لحد تاني

بحلم بالحريه والحرية كرامه وكلمه مسموعة وفعل يغير المهانه

سألت بتحلم بإيه وقولت لك الحلم من حقي لكن اوقات بيكون سبب احباطي :)

الاصعب ان الحلم يتولد حلم ويعيش حلم ويموت ويا صاحبه وهو برده حلم.

تحياتي
الى اللقاء

Che يقول...

Kemet
استرسلى براحتك ، المدونه و صاحب المدونه تحت امرك
عارفه اللى انتى بتحلمى بيه ده زى معانى الحق و الخير و الجمال حاجه رائعه .. بس المشكله انه لو اتحقق حلمك هنكون عايشين فى الجنه مش فى الدنيا
عجبتنى أوى آخر جمله ليكى " الاصعب ان الحلم يتولد حلم ويعيش حلم ويموت ويا صاحبه وهو برده حلم " ... جمله حلوة أوى و بتلخص حالنا
نورتينى و مستنى مزيد من الاسترسال

فتــافيت (رحاب الخضري) يقول...

تعرف رغم اني بموت في عمرو دياب لكن ما اتفرجتش على ولا حلقة من البرنامج لانه جه في وقت غلط بالنسبة ليا

المهم بحلم بايه.. حلم شخصي زي اي بنت يكون عندها بيت واسرة والاقي راجل بجد.. مش راجل من بتوع ذكر في خانة الجنس في البطاقة ويبقى عندي طفل او طفلة واربيهم بعيد عن التخلف والعنصرية بتاعتنا كعرب.

بحلم بقى وده حلم عمري..بس والله ما كلام شعرات خالص .. بحلم ان يكون ليا دور مهم في ان اسرائيل تتحاكم كمجرمة حرب على جرايمها كلها في حق المسلمين من ايام 1917
الحلم ده يمكن يكون صعب او صعب جدا.. بس مش مستحيل.. كمان عارفة انه مش هايتحقق في سنة ولا اتنين ولا عشرة ويمكن اموت قبل ما يوصل للنتيجة اللي نفسي فيها.. بس على الاقل يكون سهل للي بعدي انه يكمل فيه.

عارفة ممكن تكون يتقول البت ديه بتخرف ولا خيالها وسع منها.. بس والله فيه امل.. وفيه خطوة عملنها ويارب تكمل.

حلم بقى مصري جدا.. نفسي ما اسمعش عن طبور العيش تاني.. ولا قطر ولع.. ولا واحد وقع في بلاعة.. ولا اطفال الشوارع
بالمختصر مصر حلها يتصلح على الاقل اجتماعيا مش هاقول سياسيا لان ديه من عند ربنا وحده

طولت عليك.. بس معلش
سلاااام تشي

Che يقول...

فتافيت
ممكن تنزلى حلقات الحلم من على اى موقع .. يعنى اعملى search فى الجوجل و انتى هتلاقى مواقع كتير
بالمسبه لاحلامك مش ممكن اقول انك بتخرفى و لا اى حاجه زى دى لانه احلام كل انسان ليه احلام غير التانى
و انا بادعى انه احلامك كلها تتحقق و انه ربنا يعدلها من عنده
نورتينى

Zika يقول...

اممممم
بعيدا عن كامننا
احب اقولك ان الاحلام كتيره بالنسبالي
وكل حلم لوحده يعني ماينفعش اقول اني نفسي اتجوز او نفسي انجح في مجالي
لا
هي الفكره في النجاح بتختلف من انسان لاخر
يعني انا مثال بحلم ابقي افضل مصمم اصتعراضات في مصر وافضل شاعر وافضل وافضل وافضل

يجي واحد تاني انا عايز ابقي افضل واحد في الوطن العرب
واحد تاني
افضل واحد في العالم
وهكذا
يعني كل ما بتوصل لحاجه بتبقي عايز تعديها

لكن للاسف الاحلام دي صعبه وبتبقي علي المدي الطويل معقده جدا
اخر حلم يا عم اللي انت عاوز توصله
اللي في اخر السلم الوظيفي
نفسي اخد الاوسكار
سلام

Che يقول...

Zika
اولا ان لم تخنى الذاكره اول مرة تشرفنى بتعليقك
ثانيا انا طبعا عارف ان طريق تحقيق الاحلام طويل و ان الاحلام بتخبلف حتى بالنسبه للحاجه الواحده من شخص للتانى .. بس يمكن اللى كلنا بنتفق عليه ان كل واحد نفسه يكون احسن واحد بس بنختلف فى تحديد احسن واحد بالنسبه لايه .. يعنى زى ما انت قلت احسن واحد فى مصر ولا العالم العربى ولا العالم عموما
نورتنى بتعليقك و مستنى تعليقاتك دايما

Unknown يقول...

تعرف انت دايما مواضيعك بتعجبني جدآ مع اني مش بعلق كتير

بص يا سيدي انا شخصيا من الناس الي يتقال عليها طموحه بشكل مالوش حدود و دايما عندي احلام مستنيه احققها

محمد فوزي يقول...

الأحلام خطوات ده صحيح لكن لو انا مش عارف ايه هو حلمي النهائي عمر خطواتي ما هتكون منتظمه بالعكس ممكن تتخبط وتبقى ضد بعض , يعني لازم يكون عندي حلم بعيد وكبير وسقف لأحلامي وكل إنسان على قد طموحه طبعا وابدأ بعدين أقسمه لخطوات مش العكس

وفيه جمله جميله كنت قريتها لكاتب أمريكي بيقول فيها إبدأ والنهايه واضحه في ذهنك

ومن رأيي إنه لكي تجد حلمك بسهوله فيجب ان تعرف موقعك , هل حلمي يعتمد على دراستي يعني زي العلماء واهل البحث العلمي والأكاديمي , أم أن حلمي يعتمد على مواهبي ده اذا كان عندك موهبه , او حلمي يعتمد على الشغف بشيء معين يمكن تحقيقه والسعي إليه من خلال تسخير المال ؟
فمثلا لو انا مجالي مش أو أكاديمي أو علمي بس مش بحبه ومعنديش موهبه أدبيه او فنيه يبقى لازم اسعى أساسا لإكتساب المال لتوجيهه في إتجاه حلم مادي مفيد

معلش يا عمرو انا مش دايما كلامي بيتفهم بس يارب اكون وضحت فكرتي

على فكره موضوعك هايل وعلى فكره انا طول عمري بشوف عمرو دياب شخصيه تستحق الإهتمام ومثل جذاب جدا للنجاح المدوي من حيث الشكل ( شكل النجاح يعني ) فهو شكل للنجاح مغري للغايه واعتبره احد من يمتلكون كاريزما خاصه ,

تحياتي

MaNoOoSh يقول...

انا صحيح جاية متأخر قوى بس هرد
انا ليا شوية أحلام بسيطة قوى
أولا انى أعرف أعيش بكرامتى فى بلدى أو برة بلدى
وانى ابنى بيت أكون سعيدة فيه مع زوجى وأبنائى
وان ربنا يهدينى ويهديلى كل أحبابى
وانى اعمل حاجة فى حياتى أى حاجة مفيدة انشالله حتى علم انقلة لحد محتاجه
وطبعا نفسى اشتغل بس علشان اكسب فلوس لان لو كل اللى فات دة حصل هبقى حققت ذاتى ومش ناقصنى غير الفلوس
هههههههههههههه
ربنا يحققلنا أحلامنا جميعا
سلام

مثلية فقط يقول...

عزيزي

حلمك هو انت ... هو خلاصة حياتك
و خلاصة يلي جواتك بكل صدق و بعفوية و محبة

أكيد فيك تلاقي حلم حياتك و تشتغل عليه

الله يوفقك

Che يقول...

EmY
على فكرة انا سعيد انك بتقرى البوستات مش مشكله انك بتعلقى او لا مع انى اكيد بكون اسعد لما الاقى اسمك منور المدونه
احلى حاجه انك ماعندكيش حدود لطموحك
نورتينى

أنا حر يقول...

في البداية احييك انك ذكرت الاسطورة عمرو دياب والملك محمد منير لاني من عشاقهم
اما بخصوص الحلم فخليني اقولك اننا ما افتقدناش الحلم انما افتقدنا الادوات اللي تحقق الحلم
انا عن نفسي بطلت احلم ومش هقولك السبب علشان ما اوجعش دماغك بس هو بشكل عام ان من وانا صغير لما كنت بحلم كان تحقيق الحلم بيكون سهل لكن في عوامل خارجية زي الفساد والواسطة وحاجات كده بتدمر احلامنا
الاحلام محتاجة مناخ سوي واحنا بنفتقد المناخ ده
موضوع رائع
تحياتي

Che يقول...

محمد فوزى
كلامك مش معقد اوى يمكن يكون فيه شويه لخبطه فى شرحك لفكرتك بس كلنا نحس الحاجه و مش شرط اننا نعرف نعبر عنها المهم اننا نكون عارفينها و حاسينها احسن حاجه عجبتنى فى كلامك انك مقسم حلمك ... عارف اننا لو خدنا حلمنا على بعضه هنتعقد منه عشان هنحس انه كبير اوى
نورتنى و شرفتنى ... مستنى تعليقاتك على طول

Che يقول...

منوش
اكتر حاجه عجبتنى فى تعليقك انك جبتى من الاخر و قلتى نفسك فى فلوس عشان كلنا دايما نفسنا فى الفلوس لانه لسوء الحظ الفلوس بتعمل الب الحاجات اللى نفسنا فيها
نورتينى يا جميل

Che يقول...

مثليه
عجبنى تعليقك اننا احلامنا هى احنا .. المشكله اننا ساعات مابنعرفش احنا مين
نورتينى بتعليقك و مستنى تعيقاتك دايما

Che يقول...

انا حر
فينك من زمان ... بعد كده صدع دماغى يا سيدى زى ما انت عايز ، بس انا يمكن مختلف معاك انه الحلم فى حد ذاته مش محتاج لمناخ اكيد تحقيقه هو المحتاج للمناخ ده ... شكلنا فعلا نسينا ازاى نحلم
نورتنى و مستنى تعليقاتك

hasona يقول...

السلام عليكم
حبيت أعتذر عن الخطأ في الضمائر
بس مع سرعة الكتابة بتلاقي انتشار في الضمائر وزيادات غير مقصودة
أسف فعلا لذلك

Che يقول...

hasona
و عليكم السلام و رحمه الله و بركاته يا عم حسونه
المسأله مش محتاجه اعتذار ولا حاجه و انا كنت باكتب للتوضيح بس
مستنى زيارتك دايما

غير معرف يقول...

بحلم يكون عندي حلم بحلم اضيف ولا اكون اضافه بحلم اكون حي قبل ما اموت نعم اعيش لكني احلم بان احلم