الجمعة، 9 يناير، 2009

بعض المواقف من داخل المساجد

لسه حالا قارى تعليق لعمتى ستيته اللى نصحتنى فيه انى اقرا البوست بتاع المهندس احمد ابو العلا .. ماكدبتش خبر و رحت قريت البوست و عجبنى جدا
قبل اى حاجه انا مش باشوه صورة المساجد ولا اللى بيصلوا فى المساجد انا هاقول شويه حاجات حصلت قدامى و من غير اى تدخل منى اللهم انى باقوم بدور الراوى فقط لا غير و هاخلى وجهه نظرى للاخر
الموقف الاولانى لما كنت فى السعوديه باعمل عمرة من 3 سنين .. كنت باصلى فى جامع و الامام و هو بيقرا قرا ايه غلط .. قام دكتور سودانى اعرفه كان واقف جنبى رده .. الامام قراها غلط تانى .. الدكتور رده تانى ... الامام قراها غلط لتالت مره ... الدكتور سكت المرة دى .... خلصنا الصلاه و الامام بيسلم و مجرد ما خلص تسليم كمل و لف ناحيتنا ... قال " من اللى كان بيردنى ؟ " الدكتور قاله " انا " الامام قاله " و انت بتشتغل ايه " الدكتور قاله " دكتور " قاله " يعنى مش شيخ ، يبقى بتردنى ازاى ؟ " الدكتور قاله " انا حافظ كتاب الله و ممكن نخلى المصحف يحكم بينا " الشيخ قاله الخلاصه و جابله من الديل " احنا بنصلى هنا كده مش عاجبك روح صلى فى الجامع اللى على اول الشارع " .. انتهى الموقف ولا تعليق
الموقف التانى ... مجموعه من زمايل اخويا فى صلاه الجمعه .. الخطيب خلص و اقاموا الصلاه و هيبتدوا يصلوا و الامام بيقولهم حاذوا المناكب و سدوا الفرج بينكم ... واحد زميل اخويا واقف جنب الراجل اللى واقف فى الو الصف جنب الحيطه قرب على الراجل و حط قدمه قريبه من قدم الراجل .. الراجل بعد شويه قام صاحب اخويا قرب منه .. الراجل بعد تانى صاحب اخويا قرب منه تانى .. قام الراجل بصله و بعلو صوته فى الجامع اللى هو بيت ربنا ربنا و قاله " هى ال......... ( كلمه عاميه تنم عن فعل لا يتصف صاحبه بالرجوله و اسم الفاعل منها شتيمه ) فى الصلاه كمان ولا ايه ؟ " ... انتهى الموقف ولا تعليق
الموقف التالت ... اللى حكالى الموقف ده صديقى نادر ( و برضه الاسم مش غريب للى بيتابع
واحد جامعه ) .. عندهم جامع صغير فى يوم نادر رايح يصلى لقى راجل كبير من اهل المنطقه قاعد على باب الجامع بيطرد العيال انهم يدخلوا ( زى ما يكونوا داخلين بيت ابوه مش بيت ربنا ) نادر سأله ليه كده الراجل قاله احنا ناقصين عيال صغيره و خوته و وجع دماغ ( اهداء الى المهندس احمد اللى سال ممكن يخشوا يصلوا بعد كده ) .. على فكرة الراجل ده كان تاجر مخدرات و دخل السجن و لسه ليه نشاط " بس دى نقره و دى نقره " ... و الراجل ده بيعتبر نفسه متعهد المسجد ( زى عادل امام لما كان متعهد الحكومه فى شاهد ماشافش حاجه كده ) .. انتهى الموقف ولا تعليق
الموقف الرابع ... برضه نادر مع نفس الراجل متعهد المسجد .. الراجل بما انه المتعهد فكل صلاه يجرى على الميكروفون عشان يأذن ( مهو المتعهد بأه ) .. المهم الاوقاف بعتت امام للمسجد ده .. الراجل كان محروق جدا عشان الامام ده مش من اهل المنطقه و انه صغير فى السن و ان المتعهد عايز هو اللى يقول الخطبه بتاعت الجمعه ... انتهى الموقف و لا تعليق
الموقف الخامس .. و ده بخصوص استخدام بعض الائمه لالفاظ عاميه لا تتناسب مع قدسيه الجوامع .. كنت باصلى انا و اخويا و الامام كان بيتكلم عن الحروب و اهميه الايمان فى الحروب و بيدى مثال بحرب 73 لما كانوا الجنود بيقولوا الله اكبر ( كلام جميل .. كلام معقول .. مقدرش اقول حاجه عنه على رأى ليلى مراد الله يرحمها ) .. بعد كده الامام قال السر الخفى اللى خلانا انهزمنا فى حرب 67 هو ان الجنود بدل ما كانوا بيقولوا الله اكبر كانوا بيقولوا " هع " انا سمعت هع دى من هنا انا و اخويا و مقدرناش نمسك نفسنا من الضحك لغايه ما خرجنا من الجامع ( يا رب تكون صلاتنا اتقبلت فى اليوم ده ) .. انتهى الموقف و لا تعليق
الموقف السادس و الاخير عشان ماطولش عليكو .. صديق دخل المسجد عشان صلاه الجمعه .. الامام قعد يخطب خطبه طويله ( كانه ماسمعش ان الرسول يدعو الى عدم تطويل الخطب ) .. المهم الظاهر ان الامام كان ممل على نحو او اخر و صاحبى ماكنش نام كويس فابتدا ينعس ( و انا مش باعفى صاحبى من الغلط ) .. المهم ان الامام كان بيحكى عن الخيانه الزوجيه و قال كلمه الحبيب و هو يقصد بيها العشيق .. صاحبى صحى على كلمه الحبيب و قام قايل " صلى الله عليه و سلم " طبعا كان الجامع هس و كل الناس قعدت تبصله و ماقلكوش على اللى اتقاله بعد كده
ربنا يرحمنا برحمته

هناك 8 تعليقات:

Eng. Ahmed Abo El-Ella يقول...

شوف ياجميل

مهمه أوي نقطة معاملة الأطفال الصغيره ديه

للأسف وللأسف الشديد جدا الناس بتعامل الطفل على أنه وباء داخل المسجد لازم نخلص منه. وديه الظاهره السائده في التعامل مع الأطفال داخل المسجد

لو الطفل لوحده ومش معاه حد كبير, هيتبهدل ويتعامل معاملة الكلاب

زي مانت قلت, مش ممكن الأطفال ديه هنشوفها في الجامع تاني ابدا

شكرا ياجميل على الموضوع الجميل

Che يقول...

مهندس . احمد
اولا يا مراحب بيك لاول مره ضيف عزيز عندى
ثانيا متشكر على مجاملتك .. ثالثا بأه نقطه الاطفال الصغيرة دى اهم نقطه فى الموضوع ده لان احنا كبرنا و خلاص انما دول لسه عجينه طريه بتتشكل لسه و اظن اننا كده بنعمل منهم اى حاجه غير انهم يكونوا اسوياء
شكرا على زيارتك و مستنى الزيارة الجايه

ستيته حسب الله الحمش يقول...

اجمل ما في المدونات من وجهة نظري:
اولا بتلم ناس ذوي فكر عالي قوي ميعرفوش بعض
ثانيا بتثري حورات رائعة لما كل واحد يساهم بفكره ويبعبع بدل ما كل منا بيكلم نفسه
ثالثا ان ستيته بتعرف اللي مكنتش عارفاه

وانا في السعودية عرفت من رئيس جمهورية بيتنا واصدقاءه شيء لو قلت لكم عليه ها تتعبوا نفسيا بس ها اقوله اماااااال لازم تتعبوا ده دوري الثوري

في يوم اتأخر الأمام عن الصلاة في المسجد اللي جنب بيتنا والأئمة هناك والمؤذنين بيندفع ليهم مبلغ وقدره فالأفندي جاي بعربيته من منطقة بعيده
المهم في مصر لو الأمام اتأخر في صلاة الضهر مثلا بيقوم اي راجل صالح حافظ من اقامة الصلاة لأن الناس دي وراها مصالح مش قاعدين على ذمته
قام صاحب الباشا وهو راجل كبير مصري مصلي ونحسبه على خير اقام الصلاة وصلى بالناس
وعينك ما تشوف الا النور جه الأمام وقال له انت ازاي تصلي بالناس ممنوع يا سيد. ليه يا شيخ؟ علشان لا يقيم الصلاة ويصلي بالناس الا سعودي اياني واياك تعيدها تاني؟؟؟؟؟؟؟؟؟؟؟؟؟؟؟؟؟؟؟؟؟؟؟

اما بالنسبة للأطفال فدي حالة جهل عامة لما كان الباشا بياخد مانوسة وهي صغنونة معاه في صلاة العشا علشان ها يشتري طلبات البيت بعدها كان اللي في المسجد ينظروا له شزرا لكن كان ولا يهمه يقول امال ها تحب دينها وتعرف احنا مين ازاي؟
اما عن المتشرد الصغير بتاعي فده محدش يقدر يبص ليه ربع بصة لأن ابني سوبر مان بالكلام ياكل اي حد بس بيزعل لما حد يقول له العيال تقف ورا الصفوف. يرد الراجل ده مجنون ولا إيه انا رااااااااااااااااااجل هو ميعرفش. ازعه بس ابن ستيته لسانه منشار
تحياتي لعمرو باشا

واحدة مفروسة يقول...

انا جيت ارد الزيارة

قؤيت البوست
و لو ده بيحصل فى الايام ديه
يبقى ندعوا الله بكل ما فينا من عزم و اخلاص
انه يعدل الميزان من تاني لانه هوه العادل
و لا يصح الا الصحيح
المشكلة حضرتك فى النماذج ديه انه فيه اكتر منها بكتير و افظع و اخطر
و للأسف المفروض انها تكون متراقبة مراقبة قوية من قبل الحكومة
بس يظهر زيها زي اللى بيحصل فى غزة
فيه حد مستفيد
وهوه ابليس و ذريتة و احفادة
ربك يحفظنا و يثبتنا و يلهمنا بالصواب
لأنه كله اتلخبط على كله
تحياتي

Che يقول...

عمتى ستيته
الفكرة بيتهايئلى مش انها بس بتلم ناس عندها فكر الاكتر من كده اننا كلنا بنحاول نفهم وجهات نظر بعض حتى لو احنا مختلفين مع بعض و عشان احنا مانعرفش بعض فده بيكون سبب فى انتفاء شبهه اى مجامله لان كل واحد بيقول اللى فى نفسه
بالنسبه للاطفال انا متفق معاكى انى دى حاله جهل عامه و اسبابها كتير .. منها النظره الدونيه للاطفال - مع ان الاطفال دى هتكبر فى يوم و تفتكر ده كله و تطلعه على عنينا - و منها ان الاطفال دول ناقصى الاهليه و المفروض مالهمش حقوق اصلا ... على فكرة انا كنت باحلم و انا صغير انى اكون زى ابنك .. بس ياله مضى قطار العمر خلاص
ربنا يخليكى ليا يا عمتى و مايحرمنيش منك ولا من زياراتك ابدا

Che يقول...

واحدة مفروسة
انا متشكر على رد الزياره و لو انه ماكانش فى لزوم للتعب و خصوصا ان الدنيا تلج اليومين دول
و اللى انا قلته بيحصل و بيحصل اكتر منه كمان زى ما انتى قلتى بس انتى عارفه ليس كل ما يعرف يقال و فى الاخر انا قصدى التوضيح انما الحلول فدى باسيبها للى يقدر عليها
و يارب يحفظنا و يثبتنا و يقوى ايماننا
شكرا على الزياره و اتمنى انها تتكرر فى القريب العاجل

GiGi يقول...

نعمل ايه هما دول املتدينين هنعمل ايه يعنى
مليون فناه دينيه واخلاقيات الناس زي ماهى تطفش الجن من الاسلام
ربنا يرحمنا
اذكر بس موقف واحد مره فى بنت ربنا يكرمها اسلمت وكنا قاعديوهى بتشهر اسلامها
فالشيخ قال هاتولها طرحه وخليها تتوضا علشان تنطق الشهادتين
واحده من المتدينات ربنا يكرمهم ويهديهم
قالت لا ماينفعش دى حاطه مونيكير
ولا تعليق

Che يقول...

GiGi
سمعت عن حوار الطرشان .. اهو ده الاساس فى حياتنا و القاعده المقدسه فى كلامنا و بالنسبه لموضوع القنوات الدينيه ده فانا مقتنع انه بيزنس اللهم الا فيما ندر عشان انا برفض مبدأ التعميم فى اى حاجه
و الموقف اللى انتى قلتيه ده انا شايف انه عادى لانه اكيد انتى تعرفى 100 موقف اجمد و اشد منه
مش عارف هالحق ارد زيارتك دى كلها امتى بس هاحاول .. شكرا على تعليقك و مستنى المزيد من التعليقات