الأربعاء، 7 يناير 2009

ثقافه الاختلاف

و انا باقرا التعليقات على مدونه الصديقه قطه الصحراء لاحظت انه فى بعض التعليقات فيها سب و قذف مباشر و ده فعل يعاقب عليه القانون ... قطه الصحراء مشغله الاشراف على التعليقات برغم كده كان عندها قمه الديموقراطيه انها تنشر حتى التعليقات اللى بتتشتم فيها .. و هى من كرم اخلاقها و عشان ماتنزلش لمستوى اللى شتم مش بترد عليه
انا بحييها على الديموقراطيه بس باختلف معاها فى انها مش بترد لان كل اللى دخل الجيش ( و طبعا انا عارف انها مادخلتش الجيش ) عرف انه فى مبدا مهم فى العسكريه هو انه اذا ارتفعت الايدى تساوت الرتب و كمان " و الذى اغتالنى ليس ربا لقتلنى بمشيئته ..... ليس انبل منى ليقتلنى بسكينته .... ليس امهر منى ليقتلنى باستدارته الماكره "
و على فكره موضوع التعليقات السافله مش حكر على قطه الصحراء بس .. تقريبا كل الناس اللى ليها مدونات بيتهاجموا ... و حتى فى كلامنا العادى مع بعض دايما بنهاجم بعض مش بنتكلم و ساعات الكلام ممكن يتطور الى ضرب
هاديكوا مثال بالمدونات و طبعا انتو يمكن تكونوا عارفين حالات اكتر منى ... يعنى مثلا المدونات اللى بتتكلم فى مواضيع سياسيه زى مدونه قطه الصحراء تلاقى الاتهامات بانها عميله و يهوديه و حاجات من دى كتير .... و المدونات اللى بتتكلم شويه فى مواضيع دينيه زى صبرنى يا رب تلاقى الاتهامات بانها ما ينفعش تفتى ( مع انها ما بتفتيش ) و انها كافره ( مع انه لو اتنين مسلمين قال واحد فيهم للتانى انت كافر فقد باء بها احدهما ) و اتهامات تانيه كتير .... و فى مدونات مثلا عن المثليين تلاقى واحد داخل يقول " يا شواذ يا ولاد الكلب " على راى محمود عبد العزيز فى الساده الرجال ....
و فى صفه مشتركه فى اصحاب كل التعليقات البذيئه انهم دايما بيبانوا على انهم Anonymous او غير معروف .. طيب مدام انت راجل و قد الشتيمه بتشتم و انتى مستخبى ليه ؟؟؟ ..... و اصلا لو مش عاجبك الكلام اللى انت بتقراه بتقراه ليه و تعتبره كلام مهم لدرجه انه كلام يستاهل انك ترد عليه بالشتيمه و قله الادب و سوء الخلق و عدم التربيه
و اللى فاكر برنامج الاتجاه المعاكس بتاع فيصل القاسم اكيد فاهم كلامى من انه فى اتنين جايين عشان يشتموا بعض و بعدين يمشوا ... و عشان محدش يفتكر ان الشتيمه مقصورة على الناس اللى على العاديه فبرضه المثقفين بيشتموا بعض ( زى مثال الاتجاه المعاكس ) ... و لو حد فاكر انها حكر على الناس اللى على باب الله فبرضه الحكام بيشتموا ( زى ابو عزه بتاع العراق لما شتم امير الكويت ... و القذافى لما شتم الملك عبدالله بتاع السعوديه ايام ما كان لسه الامير .. و الموقفين كانوا فى اجتماعات القمه العربيه بتاعت جامعه الدول ) ... و لو فاكر انها بس بتحصل بين العيال و الناس الصغيره فى السن يقعد فى اى مكان يحبه و يسمع الناس الكبيرة و هى بتشتم بعض
تلاقى الاخوان بيشتموا فى الحكومه و اليساريين ( اللى بيسموهم كفرة و شيوعيين ) ، و الحكومه بتشتم الاخوان ( اللى مسمينهم المحظورة ) و بيشتموا باقى المعارضه معاهم ، و باقى المعارضه بيشتموا الناس كلها .. و انت بأه على حسب توجهك السياسى عشان تشوف انت هتشتم مين
يعنى الشتيمه و قله الادب حاجه متاصله فينا مش حاجه عارضه ولا ظرفيه ولا الكلام الفاضى اللى طبالين الزفه بيحاولوا يروجوه ... و المسلمين بيشتموا المسيحين ، و المسيحين بيسبوا و بيلعنوا للمسلمين مع انه " لكم دينكم و لى دين " ( و عشان محدش يفهمنى غلط انا مش باقول انه الواحد مايكونش عنده حميه على دينه بس الواقع اننا دخلنا فى دايرة مقفوله و عمرنا ماهنخرج منها ابدا و اللى يقول غير كده يا اما بيكدب او بيضحك على نفسه ) ... و تلاقى واحد طالع يقولك مهو فى بلاد بره برضه بيشتموا بعض ( مع انك بتكلمه على بلاد جوه ) .. حقيقه بره بيشتموا بعض و بيضربوا بعض و بيموتوا بعض كمان بس الفكرة فى حاجه اسمها احصائيا هما بيعملوا كده اد ايه ... يعنى عشان اللى مفهمش كلمه احصائيا بنسبه كام بيشتموا بعض و بنسبه كام بيتحاورا بالحجه و المنطق .. و نسبتنا احنا كام مدام احنا مصرين اننا نقارن نفسنا بيهم ( و اللى يغيظك اننا دايما بنقارن نفسنا بيهم فى السلبيات و عمرنا مافكرنا نقارن نفسنا بيهم فى اى حاجه ايجابيه - حتى الدين اللى بنقول اننا متمسكين بيه و هما لا ( مع اعتراضى على النقطه دى ) ده قول حق يراد به باطل لان " الدين المعامله " و بيتهايئلى كلنا شايفين احنا بنعامل بعض ازاى ) .... انا و انا باكتب البوست ده حاسس انى بدن فى مالطه و اخر حاجتين هاقولهم هما " لقد أسمعت لو ناديت حياً... ولكن لا حياة لمن تنادي ..... وناراً لو نفخت بها أضأت... ولكن أنت تنفخ في رمادِ " و زى ما سعد زغلول باشا قال " مفيش فايده " و ربنا يرحمنا من عنده

هناك تعليقان (2):

غير معرف يقول...

ana awel mara agy 3andak hena bas 2areet ur last post,la2etec betetkalem f mawdoo3 mohem geda2 o howa el shetema,bos ana ha2olak 7aga ana et3alemtaha el shetemah deh da3f aslan o mesh qowah o mesh 2elet adab,ana yama etshatamt fel blog el 2adeem beta3y o el nas 2alet en ana kafrah 3ashan methleya o mnhom elly 7awel yehdeny b tare2a mo2adaba,bas 3omoma2 el nas fakrah enaha keda mota7adera o laken lel asaf homa mesh mota7adereen wala 7aga,hena f usa ma7adesh beyeshtem 7ad 7ata sa3at benetkalem fel deen ma3a ba3d bas 3omr ama 7ad etawel 3ala 7ad yemken yekoon feh 2e7'telaf f weghat el nazar o dah akeed beye7sal f kol 7eta fel 3alam bas f masr lel asaf feh 7'alal saqafy o ta7a'alof o akeed mesh kol el nas keda yemken 2a3'labhom beykoony qaraweyeen sazgeen o mesh fahmeen el 7ayah mashya ezay aslan,o qetet el sa7ara2 toul 3omraha ensana kalamha mo7taram o heya aslan ensana mo7tarama geda2 o betehfeham o mn el nas elly ana sha7'seya2 ba7teremha geda2
salam

Che يقول...

Sola
اولا اهلا بيك و اول مرة تشرفينى بالزيارة و اتمنى ماتكونش الاخيرة
بصى يا ستى ... انا عجبنى فى كلامك انك مش بتعممى مش بتقولى كل الناس كده و انا متفق معاكى فى كده بس الحقيقه انه فى نسبه كبيرة جدا ماعندهاش ثقافه الاختلاف لاننا مانعرفش يعنى ايه آخر عشان نختلف معاه او لا ببساطه اللى مش من رايى يبقى ضده و حمار و لازم ياخد بالجزمه و يقول كمان و زى ما قلت يستوى فى كده كل الطبقات و المستويات و الاعمار
بالنسبه لكلامك ان الناس فى مصر قروين ساذجين انا بختلف معاكى هنا شويه .. عموما القروى الساذج عندنا ساعات بيكون وعيه اصح و اصدق من المثقف لانه بيحسبها بسجيته مع التسليم بان الناس فى مصر مابقاش عندهم نفس كميه التسامح زى زمان ... انا متاكد انه ماقبلكيش ناس فى مصر مؤمنين بحريه التوجه الجنسى و انك مثليه بس ده مش عشان تخلف بس عشان ده بيصطدم مع كل الموروثات الدينيه و الثقافيه عندهم ... انا يمكن ماكونش موافق على انك مثليه بس فى الاخر ده يفضل قرارى انا و انتى مش ملزمه بيه و انا لازم احترم قرارك لان دى حياتك و انتى اللى تختارى الانسب ليكى لانك انسانه عندك شخصيتك و عندك عقلك اللى لازم تستخدميه و انتى حرة فى استخدامه مدمتى بتطبقى القاعده الاساسيه " حريتى تنتهى عند بدايه حريه الاخرين " و عشان برضه اكون صريح معاكى انا اظن انه عمر ما النظرة للمثليين هتتغير مهما تغير الزمان و الظروف عندنا انا كل اللى نفسى فيه اننا نبطل نحاكم بعض و نحاسب بعض و نعاقب بعض كمان لاننا كده " playing god " زى مابيقولوا فى امريكا و اوربا
بالنسبه لقطه الصحراء محدش يقدر ينكر انها انسانه محترمه و موضوعيه كل اللى انا بسال عليه ليه هى مش بترد مع ان الرد ده هو حقها الطبيعى لكن رجعت و قلت انها برضه حرة فى وجهه نظرها فى عدم الرد كل العمليه انى مختلف عنها يمكن عشان انا شخص هجومى بطبيعتى
و باهديلك البيتين دول عشان ابين بيهم اننا مش نسخ كربون من بعض من الطلاسم لايليا ابو ماضى
رب قبح عند زيد هو حسن عند بكر ...
فهما ضدان فيه وهو وهم عند عمرو ...
فمن الصادق فيما يدعيه ... ليت شعري
ولماذا ليس للحسن قياس ؟ ...
لست أدري !
و اخيرا شرفتينى بمرورك و مستنى الزيارة الجايه