الأربعاء، 21 يناير 2009

سيبك منه و ركزى معايا

امبارح قابلت نادر و امير ... كنت فى عزا و على صلاه العشا قابلت امير فى اول فيصل و نزلنا على طلعت حرب عشان نقابل نادر ... المهم انا اول ما باكون فى وسط البلد فى حاجتين لازم اعملهم .... اعمل حمام فى طلعت حرب مول و اكل كبده و سجق من بندق اللى ادام سينما اوديون .. ماعرفش ايه الزنقه و الجوع اللى بيجوا عليا ساعة مابنزل وسط البلد
المهم ... هنقعد فين يا عم نادر قالك تعالى نقعد على زهرة البستان يمكن نشوف ميكى هناك .. و ميكى ده اسم الدلع اللى نادر مطلعه على مكاوى سعيد من ساعه ما اتصاحبوا على بعض ... ماشى يا عم نادر .. بينا على الزهرة
و زهرة البستان عباره عن ترابيزات كتير فى الشارع و قدماها جراج و موصله بالشارع اللى بيطلع على ريش .. كان زمان بيقعد اليساريين عليها .. مش عارف انى زمان بس اهو زمان و خلاص
انا كان عمرى ما قعدت عليها .. لا هى ولا التكعيبه .. اكتر مكانين المدونين و البلوجاتيه و الفيس بوكاويه بيقعدوا عليهم .. ده بالاضافه طبعا لدار ميريت اللى فى اول القصر العينى
قعدنا على ترابيزة .. جه بندق شغال فى الزهرة و سأل تشيشوا يا جماعه .. طبعا نادر و امير مالهمش فى الشيشه و انا كنت تعبان فقلنا لا مش هنشيش النهارده .. جه بندق تانى و قال تشربوا ايه يا جماعه .. طلبنا انا و نادر شاى بلبن ( كل واحد كبايه مش هنخمس فى كبايه واحده طبعا ) و امير طلب قهوة عشان كان مصدع ... هب هب جت المشاريب و ابتدينا نشرب .. المشاريب دى كان طعمها طين .. فكرتنى بغرزة مره قعدت عليها مرة فى الزاويه الحمرا و عشان اديكوا فكره عن مستوى الغرزة دى كان اغلى طلب فيها هو السحلب و كان ب 35 قرش ايام ماكانت اعفن كبايه سحلب بره ب 2 جنيه ... فل كده ... المشاريب بتاعت الزهرة دى اعفن من غرزة الدرب الاحمر دى
طبعا ابتدينا نتكلم ... انا اكمنى جوزاء و اكمن مواليد البرج ده مايعرفوش يقعدوا هاديين طول ما انا قاعد عمال الف حوالين نفسى و ابص حواليا و شويه ربنا كرمنى بقطه صغيرة جت و قعدت تتمسح فى رجلى و قعدت العب معاها .. المهم خدت بالى انه كان فى ترابيزة كان قاعد عليها 3 بنات عمالين يبصوا علينا ... الترابيزة دى كل شويه يجى واحد يقعد مع التلات بنات عليها و شويه يقوم و معاه واحده من التلاته و يمشوا و بعدين البنت ترجع لوحدها من غير الشاب الحليوة اللى كان معاها ... المشهد ده اتكرر مع التلات بنات ... ده طبعا غير الاشكال الضاله من الشباب و البنات اللى انا متاكد انهم شبهه و انك لو مشيت معاهم اكيد هتتاخد تحرى و يمكن يتعملك محضر اداب كمان ... ما علينا .... شويه و جت بنت مع شابين و قعدوا على ترابيزة تانيه جنبنا ... الحق البنت كانت محافظه على شعور الشباب اللى معاها .. كانوا الشابين مدين ضهرهم لينا و البنت هى اللى فى وشنا و كانت بتغمز لينا من غير ما الكباتن اللى معاها يبصوا علينا عشان مانجحرش شعورهم برضه ... طبعا احنا نفضنا عشان البنت دى يا دوب ينفع تتف عليها مش اكتر من كده مع انى متاكد انه ليها سوق عشان اللى نفسهم حلوة كتير .... و شويه و جم ناس زى ما يكونوا من تنزانيا ولا الصومال و قعدوا ورانا ..... الحاجه المشتركه بين كل البنات اللى قاعده على اختلاف مستوياتهم و اشكالهم انهم بيشربوا سجاير يا بيشيشوا و فى شويه منهم معاهم لاب توبات و كلهم لابسين لبس محترم ... بس فى حاجه فى شكلهم بتقولك انه ده مجرد لبس بس مش سلوك عام
و طول ماحنا قاعدين عمالين انا و امير نتريق على نادر على المكان الزباله اللى احنا قاعدين فيه .. و انا اقوله تلاقى فى الجراج ده فى سراير بيأجروها بجنيه عشان اللى معاه موكنه و بيته بعيد يدخل بيها على الجراج على طول من غير ما يضيع وقت ... و نتكلم على الناس و نتريق على نفسنا و نحكى على اخبارنا
المهم جت الساعه 11 و قلنا نمشى عشان نادر عنده شغل الصبح ... نادر حاسب و ابتدينا نمشى ناحيه الاسعاف كده ... المهم عدينا على الراجل اللى ادام اوديون عشان اضرب كام سندوتش كبده و سجق قبل ما امشى ... لقيت واحده من التلات بنات اللى كانوا قاعدين جايه الكشك اللى جنبنا عشان تشترى سجاير و الناحيه التانيه على الرصيف بتاع السينما 3 شباب لابسين ترنجات و اقفين مستنينها ... هى اشترت السجاير و ماشيه و معديه علينا ... لقيت البرنجى اللى فى العيال التلاته ماشى معاها و بيقولها سيبك منه ( قصده على شاب رياضى من الاتنين اللى معاه من اللى لابسن ترنجات ) و ركزى معايا انا اللى هاحاسب بس انتى ماتضربيش فى العالى .... طبعا كده لو كان عندى سوء ظن بيهم اكون كده اتاكدت ان المدام شغل ... جايز تكون واخداها كوظيفه و جايز تكون هوايه او بتسلى وقت فراغها او يمكن مثلا عشان احنا فى الشتا و ليل الشتا طويل و ممكن برضه واخدها من باب اشمعنى القطط هى اللى الموسم بتاعها دلوقتى و احنا لا ... الله اعلم
طبعا ابتدينا نمشى وراهم عشان نعرف هيتفقوا ولا البت مش هترضى تعملهم ديسكاونت على اساس انهم 3 سوا يعنى باكدج على بعضه .... البت ماشيه بتتدلل عليهم و هما ماشيين ناقص يبوسوا ..... يبوسوا ايدها ( مشوها ايدها المرة دى ) ... المشكله ان البت لا شكل و لا منظر و لا جسم و لا اى حاجه ... بالكتير تنفع مبوله زى اللى موجوده فى طلعت حرب مول كده يعنى حتى مش مبوله نضيفه تفتح نفسك انك تعمل حمام بس المزنوق مابيختارش و كان واضح ان التلاته الامامير دول مزنوقين على الاخر و المزة اللى ماشيه دى هى اللى هتفك زنقتهم .... بعد 5 دقايق الشاب البرنجى اقنعها و مشيوا كلهم سوا طبعا مش رايحين يجهزوا نفسهم لصلاه الفجر مع انى متاكد انهم هيكونوا صاحيين لما الادان يدن بس مش هيقوموا يصلوا ... و جايز صحتهم ماتساعدهم يستنوا للفجر و البت تقلبهم فى ساعه زمن بالكتير بس دى اعراض ناس و انا ماينفعش اتكلم عليها
انا ساعتها افتكرت جزء من اميات نجيب سرور و عذرا لانى هاكتبه بالنقط بس اللى عارف القصيده هيعرف الجزء اللى انا باتكلم عليه
بلدنا بلد ....... الكل .... فيها
شوف الخريطه تلاقيها فاتحه رجليها
ربك خلقها كده .. راح تعمل ايه فيها
مش لاقى حاجه تانيه اكتبها الا انه لو كانت الحريه هى دى يبقى احسن لينا نعيش عبيد بدل مانتظاهر بحاجه و احنا عكسها ..... ربنا يرحمنا برحمته

هناك 28 تعليقًا:

fnoonh يقول...

اول تعليق

ويارب مايكونش حد قبلي والا هزعل

هقرا واجي اعلق

fnoonh يقول...

ياه بجد مش معقول انا كنت فاكرة ان الحجات دي افلام وبس طلعت حقيقة وبتتشاف بالعين كمان
اصل كمني مش عايشة في مصر وحتى لما بنزل مابشوفش من كده اكتر حاجة بشوفها ان البت والبوي فريند بتاعها ماشيين مع بعض مش اكتر بس للدرجاتي وصلت الحجات دي في مصر تقول دولة اوربية وغير اسلامية ياااااااااااه دا ربنا صابر على عباده قوي يلا ربنا يرحمنا برحمته ويثبتنا على دينة ولازم ندعي الدعاء ده كتير مادام الحال وصل لكده((اللهم لا تعذبنا بمافعل السفهاء منا))

دمت بكل الود

Che يقول...

fnoonh
ماتزعليش يا ستى عشان انتى اول تعليق عشان انا ماقدرش على زعل الجميل
و فى حاجات اكتر من كده بتحصل كمان بس مش ده المجال لذكرها بالاضافه الى انه ليس كل ما يعرف يقال
بس عشان مايتقالش انى باشوه سمعه مصر كانى يهودى مثلا ... انتى قاعده فين ... لانى متاكد مكان ما انتى قعدتى فى الحاجات دى برضه لانه ده موجود فى كل مكان دلوقتى ... و لو مش مصدقه ممكن تسألى او تدورى على الافلام بتاعت البلو تووث اللى بتكون متصور بالموبايل و طبعا اللى مصورينها الشباب العربى من المحيط الى الخليج
ربنا يرحمنا برحمته

fnoonh يقول...

لا دا مش تشويه منك لمصر انت شوفت واقع وبتحكيه يعني عادي ثم مصر دي بلدي بردو واحب انها تكون كويسه وانا عارفه ان الحكايات دي بتحصل هنا بس انت عارف هنا بيعملو من ورى لورى لان في قوانين للدولة بردو بس الحمدلله عمري ماشوفت بعيني بس بسمع وبحاول اقول انها اشاعات بس البيزعلني ان السعوديين نفسهم لما بيروحو مصر وانت عارف بقا لما السعوديين بيطلعو بره بلدهم على قول المثل ((كانو في جرة وطلعو بره ))بيعملو ايه وبيروحو فين وبيجو يحكولي عن حجات انا المصرية عمري ماشوفتها في مصر لاني الحمدلله بحاول مااروحهاش
يلا ربنا يغفر للجميع ويثبتنا

Che يقول...

fnoonh
انا طبعا متاكد انك مصريه و انك بتحبى مصر زى و يمكن اكتر كمان
و طبعا انا متفق معاكى فى كلامك ماعدا نقطه ان السعوديين بيعملوا كده فى الخبينى عشان انا عارف كده لانى عشت هناك ... جده تشهد على كلامى و المولات بتاعت الرياض ... و طبعا انا عارف لما بييجوا مصر بيعملوا ايه .. كفايه اللى بيعملوه لما الطياره تطلع فى الجو و يتاكدوا انه مفيش مطوعين ولا فى سلطه ولا رقابه
و انا بادعى معاكى ربنا يغفر لينا جميعا

fnoonh يقول...

اها انا عايشة في جده بس بروح المولات وكده يعني اكتر حاجة اشوفها المعاكسات سواء من الشباب ولا الجديدة الطالعة البتكون للاسف من البنات بس مواقف زي الحكيت انت عنها دي مابلقيش او ممكن انا البحاول اتجاهل ومااشوفش يلا ربنا يعين

Che يقول...

fnoonh
انتى مابتشوفيش مواقف زى دى لانك محترمه و متربيه عشان كده مش بتستنى لغايه ماتشوفى
و عندك حق ..... ربنا يعين

ستيتة يقول...

ياعمروووووووووو
يامثقفني ثقافة سودة
لما انتو رايحين تشوفوا ميكي ولقيتوا بندق وقعدته طين
كنتوا خلتوكوا في مجلة سمير احسن طالما مجلة ميكي منيلة كده
انتم ياعيال ثقافتكم دي خايفة توديكم اللوماااااااااااااان
وبعدين البنات من عينة متقال السيد متقال مش لازم تخضعوهم لمراقبات علومية تنتهي بتجربة مشاهدة استنتاج

حلوة حكايات الفضى بتاعتك دي اديني عشت عمر مشفتش فيه بلوة زي دي والحمد لله مش عاوزة اشوف يامثقفني

Che يقول...

عمتى ستيته
اللى يعيش ياما يشوف و اللى يلف يشوف اكتر
و بعدين انا لازمتى ايه اذا ما ادتيش الدور التنويرى اللى المفروض اعمله عشان اكون فرد صالح فى المجتمع
مستنى تعليقك على واحد جامعه يا عمتى

سارة نجاتى يقول...

ده أنت مسخرة ههههههه
بس بجد الله ينور , أنت قلت ملاحظة نفسى كل ولد يعترف بيها أن فى بنات بيبقى لبسهم محترم بش التعبيرات اللى على وجوهم لا توحى بأى احترام , و بنات متير اتعودتوا يلبسوا اللى هما عاوزينه بس على المستوى الأخلاقى محترمين جدا , يعنى ربط اللبس بالعفة ده هوا عين الازدواجية , بس طبعا الموقف ده مالوش علاقة بالحرية , لأنه موجود فى مجتمعات حرة و مجتمعات زى بتاعتنا كده

و بعدين اللى موديك الأماكن دى بس , مش عيب , ابقى خدنى و نبى أتفرج المرة الجاية هههه

سلام

انا حره يقول...

هههههههههه

افتكرت رامز جلال فى فيلم الباشا تلميذ لما محمد رجب بيقولو ايه فى مزه بتشاورلك ولا ايه قالو مزه ايه ياعم دى ماتت 3 مرات قبل كدا هههههههه

بس والله بوست جميل

انا اول مره ازور مدونتك على فكره

Che يقول...

سارة
ربنا يخليكى يافندم و ده بعض ماعندكم
انا فعلا مش لسه معترف بموضوع ربط اللبس بالاخلاق لانى عارف كده من زمان ... و جايز لو كان فى العمر بقيه احكى يوم على بنت كانت معانا فى الجامعه و كانت منقبه بس اسم الشهرة بتاعها كان kiss me و طبعا السبب واضح او على الاقل انا هاوضحه زياده ... مشكلتى انى شفت كتير و اتعلمت بالطريقه الصعبه او زى ما الاجانب بيقولوا the hard way ان المظاهر خداعه جدا .. يعنى نربط اللبس بالاخلاق .. الحجاب و النقاب بالادب و قيسى على كده كتير
و والله انا مش بحب اروح الاماكن دى بس نادر صاحبى الله يسامحه قالى انها ملتقى الثقافه و المثقفين و اللى انا شفته هناك كان اقرب للافلام الثقافيه مش اكتر ... و اذا كان لينا عمر و نصيب مش هابقى اروح معاكى عشان انا احتمال مبقاش فاضى بس ممكن اوصفلك تروحى ازاى او اخلى نادر بس نصيحه ماتنسيش البطاقه و انتى رايحه ... هههههه
متشكر على تعليقك و مستنى التعليق الجاى

Che يقول...

انا حره
يا مرحب يا مرحب .. منورانى والله و مبسوط انه اول مرة تزورينى تلاقى بوست يعجبك لدرجه التعليق عليه
و المشهد اللى انتى بتقوليه ده فعلا اكتر حاجه مناسبه انى اوصف بيها البنت دى
متشكر على تعليقك و على زيارتك و مستنى تعليقات و زيارات كتير
اهلا بيكى مرة تانيه

غير معرف يقول...

اهلااهلا يامثقفاتي مش حارمنا من حاجة
والعلم نورا

نو كومينت عل الموقف عشان انا عارفه انه بيحصل واكتر من كدة وفي الحرم الجامعي وبلاش فضايح ربنا يرحمنا برحمتة
دمت بالف خير

Che يقول...

حروف
انتى فينك من زمان .... مصدقك انه بيحصل اكتر من كده فى الجامعه ... لو ربنا ادانا عمر مسيرى هاحكى عن ال love street المشهور بتاعنا فى جامعه القاهرة و اللى تلاقيه فى الشارع ده من حب عذرى لحب مش عذرى اوى لحشيش و بانجو ... و يمكن اتكلم برضه عن البنت بتاعت تجارة اللى عسكرى مسكها فى مدرج مقفول مع واد لوحديهم و الواد هرب و العسكرى جرها متلبسه لغايه مكتب قائد الحرس ... و متلبسه دى يعنى بيجرها و بنطلونها نازل و اكتر من كده بس ربك بيحوش
ربنا يرحمنا برحمته

Unknown يقول...

هههههههه

في بوست قرأته قبل مده في مدونه "أنا حر" وكان بيحكي عن موضوع المثقفين والبلوجريه والشواذ وخلافه في وسط البلد

ع فكره المنظر هاد موجود في كل مكان مش مصر بس؛ هون في الأردن مثلا في ظاهرة منتشره مؤخرا وبشكل كبير و ما كانتش قبل هيك؛ هي ظاهرة اللي بيوقفو للبنت بالسياره؛ هيك فجأة بيطلعولك: كانت البنت محجبه مش محجبه لابسه مش لابسه؛ أنا بعرف متجوزات وحوامل وصارت معهم نفس الحركه

بس بتعرف أحلى شي عجبني اللي بتغمزكم وبتزبط اللي معاها كمان شغاله ع جميع الجهات

الله يهدي يا سي عمرو

Che يقول...

مياسى
انا عارف ان المنظر ده موجود فى كل مكان بس المشكله انه فى ناس بترفض انها تعترف ان الحاجات دى موجوده و يقولوا ظواهر فرديه ... مع انها اصبحت فى حكم التفكير الجماعى دلوقتى
و على الفكرة البنت دى ماكانتش بتظبطنا و بتظبط الشابين اللى معاها ... الشابين دول كانوا كباتن يعنى بالفصحى قوادين للحلوة عشان يتفقوا مع الزباين و يحموها لو لزم الامر
نورتينى بتعليقك يا ست مياسى

Unknown يقول...

أيون

يعني بودي جاردات بمعنى ألطف:)

الله يكرمك يا عمرو

Che يقول...

ماشى يا مياسى
هنمشيها بودى جاردات عشان خاطرك مع انهم مش بودى جاردات انما كباتن

Unknown يقول...

هههه
طيب حتى كباتن هاي مؤدبه شوي

ع فكره؛ أنا بأيد كلامك انو صارت الظاهره ضمن التفكير الجماعي

أكبر دليل اللي حكيت لك ياه في أول تعليق؛ انو بطل في فرق وصارو يوقفو لأي وحده بالسياره وفي أي مكان؛ معناتو انو فعلا صار عادي

Che يقول...

مياسى
انا معترف معاكى انها ظاهرة و مابقتش بتفرق معاهم محجبه ولا بشعرها .. حامل ولا ماشيه فاضيه
الواضح ان الشباب بأه عندها سعار جنسى

روابط يقول...

الشئ الوحيد اللى هأعلق عليه فى التدوينة هو مستوى المقاهى فى الزاوية الحمرا, حيث أننى من قاطنيها
وأحب اعرف سيادتك انه نظرا لامتلاء الحى بالعواطلية, فالقهاوى على قفا مين يشيل وبعضها عالية المستوى
انت تلاقى بس حظك وحش وقعدت على غرزة عمال بالخطأ

وانا يا عم عازمك عالمشاريب فى الزاوية, عشان تشوف التقدم اللى بقت فيه
تحياتى

Che يقول...

حازم سويلم
انا مقصدتش الزاويه الحمرا كمكان يا عم حازم ... انا متربى فى دار السلام على فكرة يعنى مش من سكان مصر الجديده ولا القطاميه هايتس
و على فكره العواطليه فى كل مكان دلوقتى و القهاوى ماليه مصر كلها و الغرز فى كل مكان .... محسوبك قعد على غرز فى الجيارة و رحت اسكندريه و قعدت فى غيط العنب و ابو خروف .... يا عم حازم فى مثل بيقول العظمه لله و التناكه لولاد ..... ربنا يبعدنا عن التناكه و التنكين
و اكيد هاجى ازورك و طبعا هابقى مستنى زيارتك ... احنا برضه ولاد بلد و نفهم فى الاصول و نعجبك
شرفتنى يا عم حازم و مستنى تعليقات تانيه منك و انا اسف للمره التانيه لو كان كلامى اتفهم غلط

ست الحسن يقول...

شوف يا تشي

أنا قررت أجرب الراجل بتاع الكبدة ده على ضمانتك
وبالنسبة للمشاريب في البستان فعندك حق هي وحشة أوي... أنا على طول بطلب فيروز

وحكاية البنات اللي بيشربوا سجاير وشيشة دي بقت عادية جداً
وعلشان تعرف
كان فيه مناقشة بيني وبين أخويا امبارح في الموضوع ده
وانا بقوله ان السجاير والشيشة عادات سيئة وبتضر صحة كل الناس وايه رأيك بأة تبطلهم علشان صحتك
بصلي باستنكار وقالي آه بيبوزوا الصحة
ماشي وبوظوا صحتنا ... تبوزوا انتوا كمان بأة
وبصراحة كان حوار كوميدي خالص

بالنسبة بقى للمزز اللي كنتم بتابعوهم
ف زمان الشغلانة دي كانت ليها أماكن ورخص وحاجات تانية
دلوقتي بقى أي حد يشتغلها
المهنة باظت

يا أخي
روحوا ذاكروا بدل الأفلام العربي دي

Che يقول...

ست الحسن
اولا انا مش عارف ليه الناس عندها يقين انى لسه طالب مع انى خلصت يمكن عشان وشى بيبى فيس
و ثانيا المشاريب فعلا وحشه و القعده زفت و الناس اللى هناك شبهه
بالنسبه للشيشه و السجاير عادى ... انا بس كنت باقول تعليق مش اكتر و سايب كل واحد يفهم اللى يفهمه من التعليق ده
و بالنسبه للشغلانه دى انها كان ليها رخص عارف و كانوا بيكشفوا فى مستشفى الحوض المرصود كمان ... و كلامك ان الشغلانه دى بأت تلم فده حقيقه ... بس برضه الش.... تفضل ش..... حتى لو كانت بنت باشا
مش كده ولا ايه

soly88 يقول...

يا عزيزى كلنا لصوص
وخلى الشعب يعيش
وبطلوا حقد بقه دا أنت كنت مبسوط علشان قطه بتتمسح فى رجليك
طيب دى مهما كان مزه
حقد
تحياتى

Che يقول...

Soly
والله انا مقتنع اننا يا عزيزى كلنا لصوص
بس والله ما كانت مزة ... لو كانت مزة كنت عذرتهم انما دى ماتنفعش تكون مزة
يعنى حتى لو انت اعمى و مابتشوفش و جيت حسست برضه مش هتلاقيها مزة
بس على رايك خلى الولاد يعيشوا يومين
نورتنى بالزياره و مستنى زيارات جايه

بث تجريبي يقول...

وانت بتقول الموقف ده فكرتنى بموقف حصل يجى من تلات سنين على الاقل
الموقف ده على ما افتكر
كنا فى الشتا والدنيا برد زى الايام دى
المهم كنت ساعتها قاعدة فى سكن طالبات فى القاهرة مع صحاباتى المهم
احنا كنا قاعدين فى البلكونة(اساسا كنا محتلين البلكونة ...تقدر تقول عايشين فيها اربعة وعشرين ساعة )
المهم كان الشارع فاضى والدنيا برد وهدوء...المهم اذا فجاءة كده لقينا واحد واحدة ماشين جنب بعض والواد ماسك فى ايد البت وهوب يا خويا لقينا ايه الواد راح مثبت البت تحت عمود نور...طبعا موقفنا كمتابعين هللنا وقلنا الله اكبر هيبوسها هيوبسها...
قلت للبنات عيب عليكوا افرض اخدوا بالهم مننا والواد اتكسف وعملنا ليه احراج ...المهم نزلنا راسنا تحت السور وكل شوية واحدة تطلع تشوف ايه اخر التطورات ... وكل ما يقرب منها نهلل احنا...لحد ايه بقى...لقينا انه افتكر الظاهر انها زى اخته وفات علينا منظر بوسة لايف...منهم لله