الأحد، 18 يناير 2009

السياسه فى بلدى




كنت من كام قاعد مع صديقى العزيز نادر على القهوه اللى ورا سينما اوديون ... المهم قعدنا نتكلم على الناس اللى نعرفها و اتكلمنا كتير فى حاجات كتير و على ناس اكتر لانى باحب اتكلم مع نادر جدا لانه مثقف بجد مش مدعى ثقافه ... المهم و احنا ماشيين جت سيره صديقنا اللى اصبح القيادى الشاب اللى انا اتكلمت عليه قبل كده فى واحد جامعه ... جت سيرته و احنا معديين من ادام نقابه المحاميين .. لقيت نادر بيقولى مش القيادى الشاب بيشتغل هتيف اليومين دول لصالح واحد من المرشحين لمنصب نقيب المحاميين و بيقود جزء من حملته الانتخابيه فى المحافظات .. انا استغربت عشان صديقنا القيادى ده يعتبر اقرب لليساريين فى فكره و المرشح ده بشكل او باخر محسوب على الاسلاميين فانا استغربت ايه اللى لم الشامى على المغربى و يا ترى مين فيهم بيتبع مبدأ ميكافيللى و بعدين قلت اكيد الاتنين بيتبعوا المبدأ ده ... صديقنا نادر كان بيتكلم على ال Face Book و انه لما عمل اكونت عليه لقى بنت كانت زميلتنا فى الجامعه عامله اكونت و عندها تقريبا 300 صديق .. نادر قالى انه معندوش ولا صديق على ال Face Book و قالى انه البنت دى حاطه الصورة بتاعتها و هى واخده ال Pose بتاع الجواز و انه من الاخر البنت دى بتدور على عريس ... و بعدين افتكر صاحبنا القيادى الشاب و انه على الصفحه بتاعته فى ال Face Book بنات كتير هتموت و تشوفه لدرجه ان نادر قال هى السياسه اتغيرت عن اللى احنا نعرفها ولا ايه ... ناس كتير قالتلى انى اكتب خلفيه عن صديقنا القيادى الشاب ده .. اولا انا ماعرفتوش لدرجه كفايه .. بس انا اعرف عنه انه مثقف و ده شئ مش كتير فى الاوساط اللى هو فيها دلوقتى
خلينى اكلمك شويه عن السياسه ماشيه ازاى فى بلدنا ... صديقنا القيادى ده قيادى فى حركه 6 ابريل .. المهم الحركه دى انشق عنها حركه تانيه اسمها " احنا المعارضه بجد مش المعارضه لمجرد المعارضه " و اى متابع للحركات السياسيه الخايبه فى بلدنا هيعرف كده ..... برضه كان فى اجتماع للناس اللى كانوا فى حركه 6 ابريل عشان يعملوا حركه مستقله .. الاسم بتاع الحركه كان " هنقدر " ابتدت بسبع افراد .. اتقابلوا يوم الجمعه الصبح بدرى فى جنينه الميريلاند عشان القائد بتاعهم يتاكد انه مفيش حد بيراقبهم .. و بعدين قلهم انهم يحطوا الموبيلات بعيد " عشان امن الدوله ممكن يراقب الموبيلات " .. و بعدين قلهم يقفلوها " عشان برضه حكايه المراقبه " .. و شويه و قلهم يشيلوا منها الشرايح " عشان امن الدوله ممكن يراقب الموبيلات حتى و هى مقفوله " و الحق لازم يتقال ان الراجل كان عنده بعد نظر لانى شفت الحركه دى بعد كده فى فيلم Eagle Eye و بعد ماخلصوا الاجتماع قلهم مايخرجوش سوا و كل واحد يمشى من طريق مختلف ... شفتوا بأه الرفيق كان مدى لنفسه اهميه اد ايه ... و طبعا الحركه انتهت من قبل ما تبدأ
و قيس على كده حكايت سياسيه كتير ريحتها تزكم الانوف ... هى دى السياسه فى بلدنا

هناك 8 تعليقات:

ستيتة يقول...

الأخ اللي انت بتتكلم عليه ده مش حاجة نادرة
ده للأسف قاعدة دلوقتي
في وقت التخبط الفكري وضياع منهج معتدل تلاقي المصلحة هي اسمى امانينا
انا لله وانا اليه راجعون

Che يقول...

الاخ اللى انا باتكلم عليه كان واحد من ابرز زمايلنا فى القسم

Desert cat يقول...

ماهو دلوقتى كلهم بيشتغلوا هتيفه
وان مش لقيوا حاجه يهتفوا عليها ينظموا مظاهره علشان يهتفوا برضه ولو سالتهم الغرض من المظاهره ايه تلاقيهم بيتلفتوا حواليهم مستنين ملاك يطلع من الارض علشان يرد مكانهم المهم انهم هتفوا
بس القائد بتاع هنقدر ده قائد قائد يعنى بس امن الدولة كان ممكن تراقبهم من خلال الهوا ايوا صدقنى الهوا متراقب
:)))

Unknown يقول...

واو!!!!

القصه جد مثيره؛ كمان السياسه عرفوا يسوقوها لمصلحتهم

جد في ناس قادره!!

Che يقول...

Desert cat
ابقى فكرينى اكملك حكايات عن زعماء الحياه السياسيه عندنا
و طبعا مصدقك ... بس ربك بيسترها

Che يقول...

مياسى
كل حاجه فى بلدنا و انا اقصد بلاد العرب عموما قابله للتسويق و البيع .. المهم انك تكسبى من وراها

dr.lecter يقول...

فيلم ايجل اي مش تهريج هو فعلا بينتقد الخوف المستقبلي من تدخل الامن القومي في التجسس علي المواطنين

المشروع ده من سنه 1998 وهو محض جدال

هنا بقي والحمد لله في مصر مش محتاجين مشروع احنا متراقبين فعلا من ساعه ماتولدنا ده انا متاكد ان كل مواطن له ملف في امن الدوله

ومش بعيد يكون واحد منهم بيشارك في المدونات وفي الفيس بوك كمواطن عادي علشان يدخل مابيينا

وهوووب مره واحده تصحي تلاتقي نفسك في وسطهم

Che يقول...

dr.lecter
انا مش معترض على اللى انت بتقوله .. بس الحقيقه انهم مابقوش محتاجين يراقبونا .. احنا بنراقب نفسنا بنفسنا
شكرا على تعليقك و على زيارتك السريعه و مستنى المزيد من الزيارات