الجمعة، 9 يناير 2009

مواقف و عيوب

ما اكثر من مدوحنى شفاهة و ما اقل من فعلوها تحريرا ... محمود السعدنى
هذا البوست اهداء الى عمتى ستيته
ـــــــــــــــــــــــــــــــــــــــــــــــــــــ
بدايه خلونى اتفق معاكوا على حاجه .. محدش مفيهوش عيوب و محدش معصوم من الغلط
انا هاتكلم النهارده شويه عن نفسى ... قبل شهر سبتمبر 2003 كنت شخص غير اللى الشخص اللى موجود دلوقتى ... مش بابالغ لو قلت انه 99% من حياتى و تصرفاتى كانت غلط على اى مقياس و تحت اى ظروف ... ابرز عيوبى كانت انى مستهتر .. مش واخد حاجه جد ابدا فى حياتى .. اهم واحد فى حياتى كان انا و تانى اهم واحد برضه انا و تالت اهم واحد انا مره تالته و بعد كده ياتى الاخرون ... كنت مبسوط بحياتى و شايف انى عايشها بالطول و العرض .. كنت مغرور جدا و كنت ناسى ان الغرور ده اول خطيئه ارتكبت فى الوجود ( عندما اغتر ابليس بنفسه و عصى امر ربه ) .. كنت ناسى ان " لوسيفر " باللاتينيه معناها امير البهاء يعنى المتيه و المعجب بنفسه و المغرور جدا .. كنت ناسى ان الغرور ده اول الطريق لجهنم
لغايه يوم ما والدى مات و دفنته .. الموضوع ده كان اول موقف و اول صدمه خلتنى اعيد حساباتى فى كل حاجه .. ابتديت اتغير ، لدرجه ان اعز اصحابى ماكانوش مصدقين انى باتغير و فاكرينها حاله من حالات تفاعل ما بعد الصدمه و بعد كده كل حاجه هترجع لاصلها و عمرو هيرجع زى ماكان ... ابتديت اخلى افعالى تطابق اقوالى عشان مابقاش بوشين و منافق او على احسن تعبير مجرد انسان مؤمن بمدأ ميكافيلى .. حاجات كتير اتغيرت و حاجات كتير لا بس الفكرة انى دايما باحاول
تانى موقف اثر فيا و سبب ليا صدمه كهربائيه و خلانى اغير حاجات كتير من سلوكياتى كان لما كنت فى يوم ماشى مع صديقى وجدى ( و المتابعين ل
واحد جامعه الاسم مش هيكون غريب عليهم ) و قالى على موقف هو حضره من 3 سنين و مرضيش يقولى عليه عشان ما يجرحنيش و خلاصه الموقف انه فى اتنين اتكلموا عليا بطريقه مش حلوة و محدش قدر يغلطهم عشان اللى قالوه كان صح ... انا مش هاقول الموقف ولا هاقول على الاتنين اللى اتكلموا بس اللى وجعنى ان اللى اتكلموا عليا كانوا ناس مش فوق مستوى الشبهات و اسوا منى فى حاجات كتير و مع كده اتكلموا عليا و محدش قدر يدافع عنى ... الموقف ده وجعنى جدا و نفسى صعبت عليا أوى و ابتديت اتغير اكتر عشان اكون احسن عشان خاطر نفسى اولا مش عشان خاطر الناس
تالت موقف حصل من اسبوع ... و اكتشفت انى غلطان فيه جدا .. لانه بدون الدخول فى تفاصيل انا كنت بانصح ناس و باحل مشاكلهم و ناسى انى احل مشاكلى انا الاول و اكتشفت انى خالفت مبدأ مهم اوى فى حياتى .. " من نظر فى عيب نفسه انشغل عن عيب غيره " و الحكمه دى الامام على بن ابى طالب هو اللى قالها ... و ندمت انى حطيت نفسى فى الموقف الوحش ده و انى غلطت فى حق ناس كتير و قبل ماغلط فى حقهم غلطت فى حق نفسى .. و اعتذرت و ناوى اتبع الاعتذار الشفوى باعتذار عملى عشان الكلام لوحده مش كفايه من غير فعل
يا ترى انتو بأه ايه غلطاتكوا و ايه المواقف اللى اثرت فيكو لدرجه انكو تتغيروا ؟؟ ... انا مش مستنى اجابه انما و انتو قاعدين مع نفسكو كده فكروا على مهل و شوفوا انتو صح ولا غلط

هناك تعليقان (2):

ستيتة يقول...

ايه بس كل الثقافة والعمق ده
ياولدي انت خلتني خجلت من نفسي ده انت عقليه عارف ليه؟
" من نظر فى عيب نفسه انشغل عن عيب غيره " لأنك قلت الحكمة الوحيده التي يكرهها "بني وطني" على رأي جمال عبد الناصر وأقرأ بوست المهندس احمد ابو العلا وانت تفهم.
استمر استمر وغير كمان وكمان
معرفش على ما تكمل تغير ها تبقى ارقى واحسن من كده ايه؟
تمنياتي لك بالتوفيق والسداد

Che يقول...

عمتى ستيته
اولا انا سعيد انك على طول مخليه بالك منى ( ابن اخوكى بأه هتعملى ايه ) .. و مستغرب ايه اللى مصحيكى بدرى كده
ثانيا انتى كل مرة بتخجلينى بكلامك عنى ( و بعدين انا وشى بيحمر - اصلى وش كسوف اوى ) .. ثالثا احنا فعلا بنكره اننا نصلح و نقوم نفسنا قبل ما نقوم الاخرين و بما انك ذكرتى الزعيم " جمال عبد الناصر " ماتنسيش تترحمى عليه و على ايامه و تقريله الفاتحه و تقرى علينا احنا كمان الفاتحه
و اخيرا انا هافضل اتغير و احاول اتغير لان اليوم اللى هبطل فيه تغير هيكون يوم من اتنين .. يا اما انا وصلت للمثاليه و القمه ( و ده عمره ما هيحصل ) .. يا اما هاكون اصبحت فى ذمه من هو اكثر عدلا بما لا يقاس و انا بصراحه و ماخبيش عليكى خايف من اليوم ده جدا
شكرا على زيارتك الصباحيه السريعه و بانتظار المزيد من القناديل لكى تضيئى لنا اكثر