الأحد، 4 يناير 2009

كام مرة خنت مبادئك

طبعا كلنا عندنا مبادئ فى حياتنا .. يمكن مبادئ صح او غلط بس يفضل عندك مبادئ , حتى الشخص اللى بيقول انه ماعندوش مبدأ لازم هتلاقيه ماشى على مبدأ بس هو مش عارف او مش قادر يعرف انه اى واحد فى الدنيا عنده " pattern " او نمط بس هو مش قادر يستنبطه
و طبعا كلنا عارفين ان المبادئ لا تتجزأ و المبادئ ثابته مع اختلاف الاشخاص ... يعنى مثلا ان لو اتوضعت فى موقف معين مرتين بس الاشخاص مختلفين او اهدافى انا الشخصيه مختلفه المفروض انه يكون تصرفى واحد فى الموقفين مدام الموقفين متماثلين ... سؤالى هنا ليك - و افتكر انك قاعد لوحدك و محدش شايفك ولا عارف انت بتفكر فى ايه - يا ترى انت فعلا عندك مبدأ فى حياتك انت مصمم تمشى عليه و تطبقه مهما كانت النتايج ... و لو كده حصل انك خنت مبدأك كام مرة بصراحه و يا ترى خنته عشان مصلحه شخصيه هتجيلك من تغيير مبدأك حاجه بسيطه - او خلينا نسميها اعداه فهم للمبدأ نفسه - ولا خنته عشان انت كنت خايف ولا يا ترى خنته عشان انت اصلا مش مقتنع باهميه المبدأ ده و انت ماشى بالمثل اللى بيقول مطرح ما ترسى دقلها
عن نفسى انا خنت مبادئى قبل كده بس مش عشان مصلحه شخصيه انما عشان كان اصرارى على مبدأى هيجيبلى مشاكل فقلت اتجنبها ... بس بعد كده اكتشفت انى ماتجنبتش و خسرتى مبدأى و احترامى لنفسى فى الموقف ده لانى كنت جبان ... و من وقتها خليت مبدأى ثابت
انت بأه عملت ايه

هناك 4 تعليقات:

صبرني يارب يقول...

تصور مش قادره افتكر خيانه حقيقيه لمبادئي ؟؟؟

مش عارفه مش معقول انا يعنى ماشيه صح طول عمري

لكن انا عموما لما باتخذ حاجه مبدأ بامشي عليها قدر المستطاع

لكن يمكن لان شايفه ان مرجعية المباديء دي لازم تكون لكتاب الله وسنة نبيه الى هى ثابته اصلا عشان كده هى ثابته عندي

الاان طبعا ما حدش معصوم طبعا لكن ولله الحمد مؤكد كل اخطائي سقطات لكن مش خيانات عن عمد للمبدأ .

مش عارفه حد فهم حاجه من كلامي ؟؟؟
ههههههههههههههه

Che يقول...

الضديقه صبرنى يا رب
اولا باحييك على شجاعتك فى الاعتراف انك مش دايما ماشيه صح لان زى ما انتى عارفه انى فى ناس بتقول انها عمرها مابتعمل غلط زى ما يكونوا مخبين جناحات الملايكه تحت هدومهم
ثانيا انا معاكى ان مبادئنا مستمده من اصل الدين و صحيحه .. بس ساعات بيكون لينا مبادئ فى التعامل مع الاخرين بتكون مستمده من خبراتك فى الحياه من خبرات الناس اللى انتى تعرفيها
و مش شرط نكون احنا فاهمين المهم انتى تكونى فاهمه و حتى لو مش فاهمه برضه مش مهم لان اغلب الكلام اللى طالع من جوه بيكون فى الغالب مش مفهوم بس بيكون محسوس ... شكرا على مرورك الكريم و منتظر زيارتك تانى

Unknown يقول...

اااخ سؤال محرج

بصراحه انا احيانا طبعا ممكن اعمل حاجه عكس مبادئ بس مش لمصلحه شخصيه بيكون لاسباب تانيه

يعني مثلا شخص مش هاقدر اقوله لاء او ازعله او موقف مالوش حل عندي

سؤال جميل بس صعب

Che يقول...

EmY
والله انا ماكنش قصدى الاحراج حتى انا قلت " انت قاعد لوحدك و محدش شايفك "
ثانيا مش لازم دايما خيانه المبدأ تكون عشان مصلحه شخصيه بس فى الغالب بتكون للاسباب اللى انتى ذكرتيها و انا معاكى انه كلنا بنعمل كده ... بس تفتكرى مش ده بيكون خوف من مواجهة الواقع ( و انا مش قصدى خوف بمعنى جبن ) انما ممكن يكون خوف على مشاعر شخص زى ما انتى قلتى .. طيب لو ماسمهوش خوف ولا خيانه لانه جايز الكلمات دى تكون كبيره و قاسيه شويه اسميه ايه
و يفضل السؤال انا ممكن امشى على مبدأى و اخلى ليه شويه استثناءات ولا المبدأ ماينفعش يتجزأ و لازم امشى عليه على طول ... انا معاكى انه سؤال صعب و اجابته اصعب
شكرا على مرورك و مستنى الزياره الجايه