الأربعاء، 29 يوليو 2009

ازاى نسامح بعض

شوشو من يومين كانت بتقولى انها عايزه نعمل بوست مشترك ، حاجه كلنا نتكلم عليها فى وقت واحد و ننزل ليها بوست واحد بس كل واحد يكتب من وجهه نظره ... انا طبعا وافقت لان دى فكره جميله ..... المهم امبارح قالتلى انها اتفقت على البوست ده و انه هيكون النهارده و ان موضوعه هيكون حوالين التسامح و ازاى نسامح بعض .... يا ريت كل الناس بتحط افكارها النظريه مطرح التطبيق العملى بسرعه كده زى شوشو كان حالنا هيبقى غير كده
المهم بالنسبه للبوست فده صعب عليا انى اكتب فيه ...... انا من مده قريبه لسه خارج من موضوع منيل ..... الموضوع نفسه ماوجعنيش اد ما ردود افعال ناس وجعتنى .... انا فى الغالب بيكون تنبئى بردود افعال الناس صح و نادرا ما بغلط ... مش عشان انا مكشوف عنى الحجاب ، انما عشان انا دايما بتوقع الاسوأ من الناس و الناس مابتخيبش ظنىى ...... المهم انا قلت لشوشو انى آخر واحد اقدر اكتب فى موضوع التسامح ده ...... لانى بطبيعتى انسان مش متسامح .... بيقى صعب عليا انى انسى ..... انا طبعا عارف ان المسامح كريم ، بس انا لست بهذا الكرم فى الموضوع ده ..... حتى فى القرآن كل آيات العفو جت بعد آيات القصاص ... يعنى انت ربنا بيقولك انه الاحسن انك تسيب ربنا ياخدلك حقك ، بس فى نفس الوقت لو انت عايز انك تاخد حقك بأيدك فده مش غلط ..... بس مش معنى كده بأه انى فى خلال الفتره دى بقعد على نار ....... و نظام هعمل ايه فيهم الخونه دول ..... و اه بس لو اتلايم عليهم ..... و بكره يشوفوا ..... انا المسأله عندى ابسط من كده ...... انا اتعلمت من زمان ان الدنيا دوارة ....... يعنى اللى بيعمل فيك حاجه النهارده بيجى بكره و انت بتقدر تردها ، سواء الحاجه دى كانت خير او شر ..... الفكره ان اغلب الناس مابتقدرش تصبر ، بتبقى مستعجله و عايزه تاخد حقها وقتى ....... ناس كتير بيقولوا عليا قلبى اسود و منفسن عشان مبقدرش اسامح .... بس الفكره انك تسامح و انت تقدر تاخد حقك غير انك تسامح عشان مفيش حاجه تعملها ..... و انا اكتر حاجه الاحساس بالعجز ...... يعنى انا ممكن اصبر اصبر لغايه ما يجى الوقت اللى اقدر آخد فيه حقى ... بس ساعتها كل اللى بعمله ان الشخص اللى ظلمنى ده مش بعمل فيه زى ما عمل فيا .... انا ساعتها بقوله انا دلوقتى اقدر اخد حقى منك بس انا هسايبك لانك مش من مستوايا و انا لو عايز انتقم انتقم من حد من مستوايا مش اقل منى .... الاحساس اللى بيحسه بالدونيه ده و انه ميسواش حاجه و قهرته هو ده بيكون انتقامى منه ..... انا صريح جدا فى البوست و مش بحاول ازوق نفسى ولا اكدب ولا اتجمل
و اخيرا بمناسبه الصوره انا عايز اقول حاجه تعليق عليها ....... انا اسف بس مش هقدر اسامحكوا ........ سلام

هناك 38 تعليقًا:

زهور الامل يقول...

ازيك يا عمرو

مش عارفة ليه مش مصدقة انك قلبك اسود ومش بتسامح
انا من خلال كتاباتك بحس انك انسان طيب جدا وقلبك ابيض ومش منفسن ولا حاجة
بالنسبة ليا بقى وموضوع التسامح انا بيتهيالي اني اكتر واحدة في الدنيا اتقهرت من اعز اصحابي ومن ناس تانية
تخيل لما خمس افراد يتفقوا على تدميرك ويكسروك بكل قسوة وعنف كل اللي قدرت اعمله اني من كتر الزعل جالي حمة وجاتلي حالة توتر عصبي وكل اللي بقدر عليه اني اقول حسبي الله ونعم الوكيل واوف فيهم يوم بس مش بايدي هيكون باذن الله بايد ربنا سبحانه وتعلالى لانه هو الحكم العدل
وبالمناسبة انا كنت اقدر اخد حقي في ساعتها وادمرهم برضو بس انا فضلت اتركهم لربنا ويايابخت من بات مظلوم ومابتش ظالم

تحياتي

Che يقول...

زهور
انا الحمدلله كويس .... انتى عامله ايه
والله يا زهور زى ما انا قلت انى فى البوست ده كنت صادق أوى ... انا عارف ان الكلام اللى انا كتبته ممكن يعمل صدمه و يخلى الناس ممكن تاخد فكره وحشه عنى
انا لو فى مكانك يا زهور مكنتش هعمل اللى انتى عملتيه ... و فعلا انا اتحطيت فى مكانك و يومها الجامعه من اولها لاخرها اتفرجت على الناس اللى عملت معايا كده
المثل بتاع المظلوم و الظالم صح ... بس لسوء الحظ انى مش من الناس اللى بتسيب عيالها ولا حقها بره
نورتينى يا زهور و معلش اذا كنت صدمتك

*البت المشمشية *حلوة بس شقية * يقول...

لالاء
انتا مش قلبك اسود خالص
انتا قلبك قلب خساية
لاء بجد يا عمرو
انتا بنى ادم جميل اوى وطيب
وحاول تتغير وتتسامح مع نفسك وتتوقع الافضل من الناس

Che يقول...

شوشو
انتى اللى ورطتينى فى الموضوع ده ... بس معلش
بالنسبه لانى اتغير و اتسامح مع نفسى فانا عارف ان ده مستحيل .. امر الله بأه
نورتينى يا شوشو

adel يقول...

علي فكرة الموضوع انك تكتب وجهة نظرك عن التسامح وهو ده المطلوب يعني مدام مش بتعرف تسامح يبقي عادي ده انت
واعتقد ربنا مش بيخلقنا كده الناس دفعتك لكده يبقي هما يستاهلوا ده بس
مع الوقت عتتعلم انك تنسي و الحالتين انتي اللي مستفيد مش هما

Che يقول...

عادل باشا
اللى مش بنشوفه غير فى الاعياد و المناسبات الرسميه
بالنسبه لنقطه ان الناس دفعتنى لكده ولا لا فانا بجد عمرى ما فكرت فيها ... كل اللى اعرفه انى انا كده طول عمرى و فى الغالب هفضل كده برضه
حكايه انى مع الوقت هتعلم مظنش ... اصلى انا بقالى كتير فى الدنيا دى يا عادل
نورتنى يا دولا

رحلتنا في الحياة يقول...

الكلام دا بجد ولا بتهزر انت شوية شوية هتتضربنا بالنار ايه دا :(
انا خفت على فكرة خفت جدا خفت خااااااالص انت قلبك مش اسود بس انت اسود خااااالص
لا هى بصراحة دى وجهة نظرك ولازم نحترامها وانت صريح مع نفسك بانك مش بتعرف تسامح ودا مش عيب فى حد ذاته لكن العيب انك تكابر ومش تحاول حتى تسامح يعنى سامح فى الامور الصغيرة مع مرور الوقت هتسامح فى الاكبر
بس ربنا دايما لو بسيت هتلاقى ع كل ايات العذاب يقولك انه غفور رحيم ودود وهكذا من الصفات دى كلها
يعنى حتى لو الناس بتذنب ومقصرة فى حق ربنا مجرد ما تتطلب العفو من ربنا بيسامح ما بال احنا البشر
لازم نكون متسامحين اكتر من كدا وصحيح هو انت ميرو اللى على الفيس بوك :))
لا انت الصورة هى هى

سالى فوزى يقول...

انا معاك ..ما بادرشى أسامح..
ولكن الى بيغلط فيه لو اعتذر ممكن اسامحه ولكن اكون حذره منه..

مي يقول...

ازيك يا جميل عامل ايه؟ يارب تكون بخير بص ياسيدى انت بجد والله انسان جميل جدا بس قلبك مش اسود لانك كمان بتجيلك فرصة للانتقام بس مش بتنتقم ده بقى اسمه تسامح انت اعترفت انك كده بتتسامح حتى لو عايز تظهر غير ذلك لنفسك
انت بتعف عن الانتقام لانك كويس مش زى الشخص التانى اللى اساء ليك
بص ياسيدى اصلى لتاتة ولما بفتح فى الكلام مش بسكت ههههههه اللى يعملك حاجة سيبنى عليه يا معلمى ههههههه
تحياتى ليك يا جميل

Che يقول...

ايوشه
اولا اهلا بيكى لاول مره و اول تعليق ... و اييييييه ... حبه فوق و حبه تحت
المهم ... انا والله زى ما قلت انى مش هكدب و انا مكدبتش و ربنا يعلم ... المهم نقطه المسامحه انا فعلا فى الغالب بسامح فى الحاجات الصغيره ... انما كل ما الحاجه تكبر بيبقى صعب عليا انى اسامح
و طبعا لازم ربنا يسامحنا لانه ارحم علينا من نفسنا ... بس اللى انا قلته انه مش غلط ان الواحد مايسامحش فى حقه
على فكره انا ميرو بتاع الفيس
نورتينى يا ايوشه

Che يقول...

سالى
انا لو الواحد اعتذر بعمل زيك ... يعنى مش معقوله هيعتذر و انا هقول لا انا مش مسامحه ... يعنى هدبحه ... بس الفكره انى بعد كده يا باخد بالى منى يا اما مش بتعامل معاه تانى لو لقيت انى مش هصفى من ناحيته
نورتينى يا سالى

Che يقول...

مى
عامله ايه يا جميل و ايه اخبارك ... و ربنا يكرمك على الكلام اللى انتى قلتيه .... انتى اللى نصفتينى النهارده ... يا رب يخليكى ليا
و بالنسبه للى هيعملى حاجه بعد كده انا عرفت انه ورايا ناس تاكل الزلط ... هههه
نورتينى يا مى

غير معرف يقول...

هو المسامحه من اصعب الأمور التي تتقبلها النفس والأنسان اللي بيسامح بجد اعتقد انه وصل لمرحله كبيره من السلام الداخلي. انا ساعات باسامح وساعات بانتقم ولكن مشكلتي في المسامحه ان نفسي فعلا لما اشوف الشخص الي غلط نفسيتي منة ناحيته تبقي قريب من الأول وده فعلا صعب.
الحمد الله ان انا ماشفتكش وانت بتنقم من حد, اوعي يابني تكون زعلان مني ولا حاجه!
He who cannot forgive breaks the bridge over which he himself must pass"mark twain" s
To forgive is to set a prisoner free and discover that the prisoner was you

Che يقول...

غير معرف
انا حاسس انى اعرفك .... تكونش ميرا بس متخفى ... الله اعلم
الكلام اللى انت قلته او قلتيه فى تعليقك صحيح ... و بعد انا الاول اعرف انت مين عشان اعرف انا زعلان منك ولا لا ... لانه فى الوقت الحالى اللسته بتاعت الناس اللى انا وعلان منهم مليانه
نورتنى

عاشقه وغلبانه يقول...

هم من امتي بتوع الجوزاء كان قلبهم اسود....؟؟؟؟؟؟


اخبارك ايه ياعموره..؟

Che يقول...

عاشقه
ازيك يا دوك عامله ايه .... ضحكتينى و انا مش عايز .....هههههههه
ال الجوزاء قلبهم اسود ال ..... هههههه
انا الحمد لله كويس .... ابقى طمنينى عليكى يا دوك و ماتغيبيش كده
نورتينى يا دوك

كلام فارغ اوى يقول...

شوف يا عمرو القصاص ماهواش عيب ومش معنى انك مش بتستحمل انك تسيب اللى عمل فيك حاجه ده يسيء لك او الناس تعتبره انك قلبك اسود
بالعكس لان ربنا قال"ولكم في القصاص حياه" يعنى مش عيب فيه ناس بتقول منه لله وما بترضاش تاخد حقها وفي ناس تانيه ما بتستريحش الا لما تاخد حقها
انا عن نفسي ببقى نفسي اخد حقي وهموت واخده بايدي وبيموتنى احساسي بالعجز انى مش طايله اعمل حاجه عشان كده دايما ربنا بياخد لى حقي
بس برضه التسامح حلو لان بيبقى لك ثواب كبير اوى عند ربنا
كلامك جميل وطالع من القلب اوى

سمكه واحده يقول...

اهلا اهلا بالناس الجامده اللي مش بتسامح ايه ده بقي كل ده يطلع منك يا عمرو افندي

بص هقلك في ناس زي منتا بتقول مش بتقدر تسامح وفي ناس بتسامح علي طول
بس زي منتا بتقول مش معني ان الواحد مش قادر ياخد حقه يقوم يقول انا هسامح وكده
لا الاهم اني اقدر اخد حقي ومبقاش ضعيف وسعتها بقي اقول برحتي اني مسامح او مش مسامح
بصراحه بجد يعني
انا من النوع الاهبل اوي وبسامح بسرعه ويضحك عليا مش بحب اشيل من حد خاصا لو حد بحبه او بعزه او بيمثل ليا حاجه فبزعل منه بس لو جه صالحني بعاتب واتقمص واهستهبل بس بيني وبين نفسي ببقي خلاص
لكن لو حد ميهمنيش ولا يمثل ليا اي شئ بطلع عينه وبرخم جدا ومش بتفرق معايا وبحاول اتجنبه بقي

Che يقول...

كلام فارغ أوى
انا مش عارف اناديطى بمها ولا مهره .... المهمم ... انا عايز ارحب بيكى فى المدونه و بجد بشكرك على تعليقك ده
انتى تقريبا واحده من الناس القليله اللى فهموا انا قصدى ... انا كل اللى كنت بقصده ان التسامح فضيله كبيره و قيمه عظيمه فى حياتنا بس انا غير قادر عليها .... و انه مش معنى انى بخد حقى و مش بعرف اسامح ان كده قلبى اسود
نورتينى و شكرا للاضافه على الفيس بوك

Che يقول...

سمكه
شفتى بأه يا سمكه انا طلع قلبى اسود ازاى ... ههههه
كل اللى انتى قلتيه يا جميل صح ... لانه فعلا مفيش معنى للمسامحه اذا مكنش فيه اى اختيار تانى ادامى .... المحك الحقيقى انه يكون ادامى خيار انى اسامح او لا .... ايه رأيك فى التعليق اللى مليان كلام كبير ده
و انتى معنى كلامك ان قلبك ابيض
نورتينى يا سمكه

Polka Dotted يقول...

enak tesame7 da she2 gameel... bas eli mesh kol el nas t3rafo eno mn as3ab el 7agat begad 3shan keda "el3afw 3END al makdera"... mesh kol el nas t2dar 3alih

ana mn el nas eli basame7 3la tool bas fi nas beyes3ab 3alik nafsak mogarad enak tfakar tesame7hom....

w el aham mn enak tesame7 enak tensa... yalla rabena y2adarna

الست فرويد يقول...

عمرو
تصحيح بسيط لو سمحت

من قال اللى مش بيقدر يسامج وهو مقهور وحاسس انى فى حد ظلمه وهو مش قادر ياخد حقه يبقى قلبه اسود ؟

بالعكس ده احساس طبيعى جدا
وحتى الحكمة بتقول العفو عند المقدرة

يعنى من غير مقدرة يبقى مفيش تسامح ولا عفو

يبقى قلة حيلة

طبعا مش قصدى انى اللى معرفش ياخد حقه يبقى ضعيف لان فى ربنا ممكن نوكله ونقول حسبى الله ونعم الوكيل وننتظر انتقامه

بس عارف فى الغالب لما بيحصل ده مش بتلاقى نفسك سعيد

زى ما يجى لك فرضة تاخد حقك من اللى ظلمك فتلاقى نفسك معندكش الرغبة فى الانتقام
ضاعت الرغبة من مجرد القدرة عليها


موكد انت قلبك مش اسود لانه اللى انت شرحته ده مش قلب اسود

السواد حاجة تانية خالص ربنا يعفينا منها

بس مش هاتكلم عنها بقى احسن انا رغيت كتير :)))

تحياتى يا عمرو

بالمناسبة انا مش مصدومة ولا حاجه زى التانين

البوست متناسق مع صورتك اللى بتنقلها كلامك دايما

امممممم
سلام بقى احسن شكل مود الرغى حضر ومش هنخلص

سلام :)))

عمرو يقول...

يااااااااااااه دا انت طلعت قلبك اسد قوي يا جدع
وأنا اللي باقل عليك طيب
:)
لا والله أنا شايف إن المغفرة تكون للي بيستحق. يعني فيه ناس تستحق وناس عايزة الحرق
حلوة الفكرة
:)

غير معرف يقول...

ezayak
3ala fekra mafesh 7ad beysame7 7ad meya fel meya 2e7na ben7awel nesame7 bas fel 3a2l el baten mesh bensame7 bel3aks 2e7na ben7ot el ensan elly el mafrid en 2e7na same7nah dah ta7t moraqba daqeqa 3ashan nesbet eno lesa beye3'lat tany
ana kont basame7 dayman bas mesh hasame7 tany 3ashan ma7adesh yestahel el sama7
ta7eyaty

Unknown يقول...

بص ياشى
وبصراحة
انا ما بسامحش
لكن برضه اضعف من
انى افكر اخد حقى بأيدى
او انتقم او كده لان فعلا
والحمد لله بيخلص لى تارى فى
التو واللحظة ومش حأكذب
عليك ببقى فرحانـــــة
فهل انا شريرة ياترى؟

Che يقول...

بطابيط
كلامك جميل جدا ... الاصعب من انك تسامح انك تنسى ... انتى جبتى الخلاصه
لان الانسان ممكن يسامح بس بيبقى شبه مستحيل انه ينسى
نورتينى يا بطابيط

Che يقول...

فرويده
انا بجد مش عارف ارد على تعليقك ... واحده من القليلين اللى فهموا انا عايز اقول ايه .... سيبك انى طبعا عايز اشكرك انك مش شايفه انى قلبى اسود .... و سعيد اكتر ان البوست اللى انا كاتبه طلع فعلا بيعبر عن حقيقتى لانه من اصعب الحاجات ان الواحد يتكلم على حقيقته بجد
و بعدين ارغى براحتك يا فرويده .. احنا ورانا ايه
نورتينى يا فرويده

Che يقول...

عمووووووور
ايه يا عم الصوره دى .. انا لما شفتها معرفتكش
و شفت انا قلبى اسود ازاى ... جوزاء يا عم عمرو
بالنسبه لتعليقك فعلا فيه ناس عايزه الحرق ... و بجاز مش نضيف ... مقلتش بجاز وسخ عشان فيه آنسات و مدامات هنا و عيب نقول الالفاظ دى ... هههههه
نورتنى يا عمور

Che يقول...

سالى
انا كويس يا سالى انتى عامله ايه
اللى انتى قلتيه ده صحيح .... انتى بتشتغلى دكتوره نفسيه ولا ايه ... كلامك فيه مصطلحات كده ... عقل باطن و كده
و على فكره الناس اللى هتقول انها بمجرد ماسامحت بتبقى نسيت اشط فى كلامهم .. لاننا فى الاخر مش ملايكه
نورتينى يا سالى

Che يقول...

نور
اللى انتى قلتيه يخليكى مش شريره ... يخليكى حاجتين
اولا يحليكى بنى آدم طبيعى لاننا كلنا كده و اللى يقول غير كده يبقى ربنا مديله سعه نفسيه كبيره أوى و اقرب الى ان يكون ولى
و ثانيا يخليكى صادقه مع نفسك انك معترفه بده مش بتحاولى تضحكى على نفسك او توهمى الناس انك ملاك
لاننا مش ملايكه ... زى ما احنا مش شياطين برضه
على فكره انا نزلت بوست جديد على واحد جامعه من نص ساعه كده عشان انتى قلتى عايزه المزيد و مستنى تعليقك على بوست وجدى اللى هنا لو هتعلقى
نورتينى يا نور

سمكه واحده يقول...

هو انا من اللي لقوا ان قلبك اسود
ولا من اللي لاقوه قلب خسايه؟؟؟
لالالا خالص يا عمور
طلما انت بتتكلم وتحكي وتقول كده فأستحاله حد يكون قلبه اسود ويتكلم بالطريقه دي طبعا
انت حد جميل وطيب ومش نفاق ولا مجامله ابدا والله
انا بس كنت بهزر لما قلتلك انت طلعت كده
كمان من اسلوبك وحكاويك وبوستاتك صورتك واضحه جدا
اللي قلبه اسود ده حاجه تانيه خالص بتلاقيه رفيع جدااااا ووشه اصفر وعمال ياكل في نفسه وديما مغموم وعنده غل كده
ربنا يعفينا ويعفيك ياسيدي
انت طيوب خالص
والله اعلم بردو هو احنا نعرفك في الحقيقه يا اخي اوعي كده بلاش كلام فارغ(وش مطلع لسانه)
تحياتي
حبيت انوه بس
حلوه انوه دي
سمكمك

ذو الوجه المبتسم يقول...

السلام عليكم

التسامح من اجمل صفات المخلوقات
ومن اهم السمات اللى المفروض يتسم بها الانسان هى التسامح

بس السؤال هنا ؟
مين نسامح وازاى نسامح
وهل التسامح فى كل شئ ولا فيه اشياء لا يحق لنا التسامح فيها

اشكرك على البوت المميز ده
تقبلى تحياتى

micheal يقول...

شفت البوست في أكتر من بلوج والفكرة عجباني الصراحة

Che يقول...

مايكل
مدام الفكره عجبتك يبقى انت معانا البوست الجاى يا ريس

The illusionist يقول...

استاذ تشى
اعذرنى مدونتك كانت ضايعه من عندى
انا ااااااااااااااااااااااااااااسف

مجتش بقالى كتيييييييييير
اعذرنى يا باشا

Che يقول...

THE illusionist
ولا يهمك يا باشا ... المهم انك وصلت بالسلامه
نورتنى

Che يقول...

ذو الوجه المبتسم
اهلا بيك لاول مره فى المدونه و يارب ماتبقاش اخر مره
كل كلامك اللى فى التعليق صح جدا جدا جدا
فعلا السؤال اللى انت طرحته صح جدا .. و صعب الاجابه عليه جدا برضه
بجد مش عارف المفروض نسامح مين و مين اللى مش نسامحه
اشكرك فى تعليقك بشده
نورتنى يا باشا

مثليه يقول...

كل سنة وانت طيب يا عمور و رمضان كريم
وحشتني اوي