الثلاثاء، 21 يوليو 2009

المرساه

كل واحد فينا اكيد حس فى لحظه من اللحظات انه ضايع و تايه و مش عارف يرسى على ارض ... الاحساس ده بايخ جدا .... و معاه ممكن تجيلك احاسيس تانيه ..... زى مثلا انك تسأل نفسك انت عايش ليه .... لو مت بكره مين اللى هيفرق معاه الموضوع ده .... و ممكن الاحساس ده ياخدك فى سكه تانيه خالص و اخر السكه دى الكفر و العياذ بالله ...... و ممكن ياخدك فى سكه اللى يروح ميرجعش .... اصل اللى ملوش بر يرسى عليه ممكن يدور على بر بمعرفته .... يمشى فى سكه بنات ( او تمشى فى سكه ولاد لو انتى بنت ) ... سكه حشيش و ميه و مخدرات لانك فى الاخر هتحس ان مفيش حاجه فارقه معاك و اديك بتجرب يمكن تلاقى البر بتاعك .... و ممكن تخليك تنتحر
طبعا احساس الضياع ده ليه كذا وجه .... يعنى مثلا ممكن تحس انك فجأه مهم و ان الدنيا بتتمحور حواليك .... او تحس انك ولا اى حاجه ....... تتخيل نفسك مثلا اخبارك مهمه تنزل فى الصفحه الاولى من الجرايد القوميه .... او تتخيل ان حياتك ممله و رتيبه ...... تتخيل نفسك دايما مشغول .... او برضه تتخيل نفسك فاضى لدرجه الفراغ ..... تبقى سعيد جدا بأنجازات متهمش حد غيرك ... و ساعات برضه مايبقاش عندك ولا انجاز ..... بس كله ضياع فى الاخر
الاجانب عندهم حاجه فى ثقافتهم اسمها المرساه ... يعنى بالبلدى يكون ليكى نقطه ثابته ترجع ليها لما الدنيا تضيق بيك .......... حاجه كل ماتضيق الدنيا فى وشك تفتكرها عشان تحس انك ليك حاجه فى الدنيا تستاهل انك تعيش عشانها و تفكر الف مرة قبل ما تعمل اى حاجه غلط
احنا برضه عندنا موضوع المرساه ده بش مش بنفلسفه كده زى الاجانب ..... احنا ناس بتجيب من الشكمان عدل ......... فى ناس المرساه بتاعتهم هى الوازع الدينى و الدين .... و ناس تانيه المرساه بتاعتهم بتكون متمثله فى شخص او عده اشخاص ..... و ناس المرساه بتاعتهم بتكون حاجه معنويه زى فكرة محدده او ذكرى معينه
يا ترى انت المرساه بتاعتك ايه .... مستنى ردودكوا على البوست ....... سلام

هناك 26 تعليقًا:

مي يقول...

ازيك يا جميل ايه اخبارك؟ يارب تكون بخير
انا بكون سعيده جدا وانا فى مدونتك
اولا ياسيدى انت فعلا كلامك كله بحصل لنا يعنى بنمر بازمات كتيرة فى حياتنا بس المفروض عدم الاستسلام لها عشان النهاية متكونش وحشة
انا المرساه بتاعتى طبعا انى برجع لربنا الاول الحمد لله وبعدين برجع لنفسى بتكلم مع نفسى بصراحة مطلقة كانى الوجه الاخر
واحاول احل المشكله
تانى حاجة برفض الاستسلام ليه بقى ؟ عشان بحب عائلتى جدااااااااا بلاقى ناس بيحبونى وواقفين جنبى يبقى مش لازم استسلم واتخاذل
موضوعك حلو اوىىىىىىى
وبجد خلانى افكر واعترف ههههههههههه
سجل اعترافى يا حضرة القاضى
تحياتى ليك والى الامام دائما وربنا يعينك على الرغى بتاعى

Che يقول...

مى
انا الحمدلله يا مى ... يمكن النهارده يوم مش لذيذ بس الحمدلله انه خلص
قبل الرد على تعليقك الجميل بجد عايز اشكرك على على الكلام الحلو اللى انتى قلتيه ، بس الظاهر انى مش بتكلم جد غير و انا مكتئب
المهم يا ستى نيجى للتعليق ... حكايه عدم الاستسلام دى صح ، بس فى اوقات كتير صدقينى بتحسى انك تعبتى من كتر المقاومه و بتحسى انك مش بتستسلمى انما بتحسى انك بتاخدى هدنه ... المشكله لو الهدنه دى طولت
مسأله انك تتكلمى مع نفسك بصراحه دى ممتازه ، بس ساعات صراحتك ممكن تجرحك انتى شخصيا حتى من غير ما حد يعرف
المهم بأه اسجل اعترافك بأيه يا حضرة الشاهده ( مرضتش اقول المتهمه ) .... و يا ستى ارغى براحتك ... انا اصلا بموت فى الرغى
نورتينى يا مى و بجد شكرا

زهور الامل يقول...

ازيك يا عمرو انا بحييك جدا على الموضوع الرائع ده
وانت عندك حق فعلا في كل كلمة قولتها
لاننا كتير جدا بنحس بالملل والفراغ وان حياتك واقفة زي الماية الراكدة ومفيش فيها اي انجاز وخصوصا لما تكون متخرج بقالك كام سنة ومفيش فيها اي جديد يخليك تحب الحياة
وساعات بيجي للانسان اكتئاب لمدة يومين او تلاتة كدة ويحصل موقف صغير يخليه يرجع تاني لنفسه والرجوع لربنا وانه لا ياس مع الحياة ولا حياة مع الياس
ولازم نخلي دايما عندنا أمل في بكرة وثقة بان ربنا سبحانه وتعالى كبير

عايزة اعرف رايك في الموضوع بتاعي الاخير

تحياتي

Che يقول...

زهور
اولا احيكى على الكلام الجميل اللى انتى قلتيه ده مع تسليمى انه مجامله لانى لا استحق اغلبه ... و بجد اشكرك تانى لانى فعلا محتاج لشويه دعم اليومين دول و كلامك الجميل ده وفر الدعم ليا فشكرا مره تانيه
اللى انتى قلتيه ده صحيح ... بس على فكره ده مش مرتبط انك اتخرجتى و قاعده من غير شغل ... حتى لو بتشتغلى بس دخلتى فى دايره ( و اسف على المثال القادم ) دخلتى فى دايره التور اللى مربوط فى ساقيه برضه هتحسى بملل و فراغ ... بس فعلا يفضل ان احسن ملاذ و آخر ملاذ ليكى هو ربنا
و مسأله الاكتئاب اللى بيدوم ايام ده حاجه طبيعيه عندى ... بدخل قوقعه و مش بخرج منها غير بحل و اغلب الاوقات بخرج منها برحمه ربنا
معلش انى مقصر فى الزياره و اكيد هشوف موضوعوك الاخير و هرد عليه
نورتينى يا زهور

MaNoOoSh يقول...

ازيك يا تشي
طبعا انا كنت مختفية شوية
بس الحمد للله رجعت للتدوين ولبلوجر تاني


موضوع المرساة ده فعلا حقيقي
بس مش كل الناس بتكون المرساة بتاعتهم هي الوازع الديني لانه فى الغالب بقى مجرد مظاهر الوقتي بينما القلوب مليانة سواد

الوازع الديني ده للي بيبقى بيخاف من ربنا بجد فى تصرفاته.. وعلى العموم هو موجود فى اغلب البشر مهما ارتكبوا من ذنوب

بس بالنسبالى انا شخصيا اللى بيخرجني من الاكتئاب هم الناس اللي بحبهم.. واحساس انهم بيخافوا عليا ويحبوني ده هو مرساتي فى معظم الاحيان
وعلى فكرة انا ملقتش الاحساس دة غير قريب قوي
بس رغم الخوف من ربنا ورغم حبنا ليه.. وقت الزعل ووقت ما بنتقوقع على نفسنا بنحتاج بشر يحبونا هم اللي يشدوا ايدينا

Che يقول...

منوشه
انتى فعلا كنتى مختفيه ... بس المهم انك رجعتى ... حمدالله على السلامه
انا متفق معاكى فى نقطه الوازع الدينى ... بس لسوء الحظ كل واحد عايز يبان ( و خلى بالك من يبان ) يبان ملتزم ، بغض النظر انه ملتزم فعلا ولا لا
انا سعيد ان اللى بيخرجك من الاكتئاب الناس اللى بتحبيهم و بيحبوكى ... مع ان مش ده اللى بيخرجنى من الاكتئاب
بجد يا منوشه تالت تعليق يشد من ازرى النهارده
نورتينى يا منوشه

عمرو يقول...

أهلا تشي
أنا المرساة بتاعتي مجموعة أفكار. نفسي أعيش لغاية ما أحققها. بس إيه اللي جاب الموضوع ده على بالك يا تشي؟ حاجة غريبة والله
:)

دون كيشوت يقول...

عمووووووووووور فعلا موضوع رائع بس اوعي تنسي ان في ناس هوايته انها تدمرك الرواسي بتاعتك وتشكك في فايدتها

سمكه واحده يقول...

اولا
اذيك يا تشي اخبارك ايه؟؟؟
يارب تكون بخير
انت عارف طبعا ومن زمان اني بحب مدونتك جداااا مش هقول طبعا(من قلت خلاص ايه العته ده يابت ياسمكمك ) وكمان موضوعاتك بتعجبني وافكارك

بالنسبه لانسان لما بيضايق ويتخنق زي ماقلت بظبط
انا عن نفسي اول حاجه بقرب من ربنا
اكتر بحس اني مقصره في حقه بحاول اطلع نفسي بسررررررررعه لاني من النوع الي مش بحب الغم بتبقي حاجه غصب عني بحاول اتخطها مهما كنت مكتئبه بحاول ادور علي اي حاجه تبسطني حتي لو كانت هايفه وملهاش اي معني اقعد اقول لنفسي الحمد الله غيري كتير عنده كذا وكذا انا الموضوع ميستهلش الحمد الله يمكن ده اختبار من ربنا اقعد اكلم نفسي احاول اخرج من المود سعات بقي لما اتخنق جدا اعمل زي العيال الصغيره وادبدب في الارض وانكش شعري في هذا الوقت المرير محدش يتجرأ في البيت يقرب ليا بيسبوني لحد ما اهدي خالص ممكن حاجه عبيطه جدا تخليني اطلع من المود
سعات كتير ممكن اعيط لحد ما انام علي نفسي زي العيال
سعات اكلم نفسي في المرايا
سعات اقعد اتخيل بقي اني عاوزه اموت واخلص من اللي انا فيه بس اقعد افتكر ماما واهلي وكل واحد هيعمل ايه اعيط وازعل عشانهم شوف الهبل اصلهم بيقولولي اني نواره البيت
(وش مكسوف)
ولما ارجع افتكر ان بعد فتره الناس بتنسي اللي بيموت مع مرور الوقت اكشر ومش يصعبوا علياهههههههههه

سمكه واحده يقول...

بس تعرف ياعمرو
ان لو كل واحد فينا ليه هدف معين
مش هيحاول يكتئب او بيرجع بسرعه
واكيد كل واحد فينا مهما كان ظروف الحياه والمعيشه والهم اللي عنده في حته حلوه في حياته ولو بسيطه اما اكتشفها او لسه مكتشفهاش بس اكيد كله في عنده حاجه صغيره امال يعني الدنيا هتبقي كلها كده
لازم حته وردي كده ده الواحد يروح يموت نفسه بقي
يعني لو حد عنده زوجه زي القمر واطفال زي العسل هيحاول يقول كله يهون علي شانهم

لو العكس بردو
لو حد عنده حاجه معينه جميله في حياته بيحاول يتخطي كل ده مهما كان ويفكر في الحاجه الجميله اللي في حياته
سواء طفل جميل
او زوج عاوز ضرب النار اقصد يخليه ليه يارب
او زوجه هاديه عسوله
او بقي موزه استغفر الله العظيم ويحاول يعمل كل اللي يقدر عليه عشان تبقي معاه علي طول ده اللي بيصبره علي كل اللي عنده وبعد كده يضرب نفسه الف مره ويقول ايه اللي خلاني اعمل كده؟!!!
او عنده اصحاب بينسي الدنيا وهو معاهم
المهم انت عامل ايه مقلتلناش انت بتعمل ايه
استحمل اختك وصدقتك بتموت في الرغي

salwaa يقول...

موضوع شيق جداوانا عندما يصبنى الملل والزهق ليس لدى مرساه انا اتعصب واشتم واصرخ لغية ما تعدى!!

Che يقول...

عمور
عامل ايه يا باشا و اخبارك ايه ... و الله يا باشا انا الموضوع ده انا كاتبه من شهر ، بس لسه ناشره ، و ايه اللى جابه فى دماغى الله اعلم
جميل جدا ان المرساه بتاعتك تكون افكارك اللى عايز تحققها ... بس افتكر ان الافكار بتموت زى البشر ما بيموتوا ( بعد الشر على افكارك يا باشا ) ... تعليق قصير بس فى الجون
نورتنى يا عمور

Che يقول...

ندور
شكرا يا باشا و مبسوط ان الموضوع عجبك .... طبعا الناس دى موجوده فى كل حته ... بينطبق عليهم المثل بتاع لا منه و لا كفايه شره ... بس النقطه انك تكون مؤمن بالرواسى بتاعتك
منورنى دايما يا ندور يا حبيبى

Che يقول...

سمكه
انا الحمدلله كويس .... انتى عامله ايه يا جميل و ايه اخبارك .... طبعا انا عارف اللى انتى قلتيه من زمان و مبسوط بيه جدا ( وش متواضع ) ... نيجى للتعليق بأه
انتى كده مرساتك هى الدين زى الغالبيه مننا ... و بعدين مش عيب انك تدبدبى برجلك زى العيال الصغيره ، ولا انك تنكشى شعرك ( مع ان دى اوفر شويه ... هههه ) .. انما تكلمى نفسك فى المرايه يبقى انتى كده مش لازم تسكتى على نفسك .. ههههه
انا لما قريت تعليقك ده حسيت بأمل و اشراق فى بكره .. ايه يا سمكه اللى انتى بتعمليه ده ... حرام عليكى نفسك يا بنتى ... خصوصا ان السمك غالى جدا اليومين دول .. هههه
نيجى للتعليق التانى بمناسبه عرض الاتنين فى واحد ... الهدف اللى انتى بتقولى عليه هو ده بالظبط اللى انا اقصده من كلمه المرساه بتاعتى و كل الامثله اللى انتى قلتيها دى تنويع عليها
انا كويس و يا ستى ارغى براحتك مدونتك برضه مش مدهاقول مدونه اخوكى
نورتينى يا سمكه

Che يقول...

سلوى
جميل جدا انك بتتعصبى و تصرخى و تشتمى ... ده نوع من انواع تفريغ الطاقات النفسيه و كلنا بنعمل كده ... بس السؤال لو ملقتيش حد تشتميه و تصرخى فيه .. بتعملى ايه
نورتينى يا سلوى

*** حور- نور*** يقول...

أحيانا بحس بالإحساس ده لكن بيزول بسرعة لأن اللى حواليا مش بيحبونى منطوية على نفسى انا أساسا بيبان عليا رغم انى بخبى جوايا كتير وممكن أمون بضحك وأنا قلبى بيبكىبرضة عنيا بتفضحنى
بس الحاجة الوحيده اللى بتخلينى فى حاله غريبة هى وانا بكتب شعر
خليها فى سرك بقى
لك خالص تحياتى
صحافية حرة

Che يقول...

صحافيه
اهلا بيكى لاول مره صاحبه مدونه مش ضيفه
كده انتى المرساه بتاعتك على حسب ما انا فهمت من كلامك الناس اللى حواليكى ..... و برضه لما تطلعى احاسيسك فى صورة شعر
و متخافيش ... سرك فى بير
نورتينى يا صحافيه و مستنى الزياره الجايه

micheal يقول...

لأ..أنا في الضياع وعالم الغيبوبة طبعا
مفيش مرساة بكل أسف
:(
قلبت المواجع
تحياتي يا باشا

Che يقول...

مايكل
ايه يا عم مايكل ... ليك يومين عايش فى الاكتئاب ده ليه كده يا عم
و بعدين ما كلنا فى الهوا سوا يا عم ... تعالى انت بس نطلع المقطم و انا انتشلك من الضياع ده
مستنيك يا مايكل

*البت المشمشية *حلوة بس شقية * يقول...

يعنى ايه مرساه
هههههههههههههههههههه
اصلى مفهمتش حاجة من الكلام الملعبك ده
لاء بجد
البنى ادم احيانا بيحس بملل كبير جدا
طبعا انتا معايا على الخط فى الكأبة بيبقا محتاج لحد يكلم معاه ويشكى همو
مش بيقلاى غير ناس بتنط على الياهو
شوشوووووووووووووووووووووووو يكلم معاهم
بس بيكأبوه اكتر

Che يقول...

شوشو
انا مش هعلق غير بكلمه واحده
هههههههههههه
نورتينى يا شوشو

Zika يقول...

هو ماحدش سالك يعني ايه ميه اللي بعد المخدرات دي ههههههههههههههه
بوست في وقته يا اخي انت عليك توقيتات مناسبه بشكل مريب
:D

Che يقول...

زيكا حبيب قلبى
تصدق فعلا غريبه محدش سألنى يعنى ايه ميه دى ، يعنى انت و مايكل ممكن تكونوا هرشتوها ، بس يا ترى كل الناس هرشتها كده .... ههههههههه
انا نازل اجازه قريب يا زيكا و لازم اشوفك انت و مايكل
نورتنى يا زيكا

sandy يقول...

وانتا يا معلم المرسى بتاعك اه واه الميه اللى بتتكلموا عليها

Che يقول...

ساندى
تخيلى انك اول واحده تسأل السؤال ده مع انك آخر واحده معلقه لغايه دلوقتى
انا هجاوب بشرط انك تجاوبى على نفس السؤال
المرسى بتاعى هو ربنا برضه ... انا مش شيخ ... و آخر واحد ينفع يقول على نفسه شيخ ... بس دى الحقيقه ، ان باب ربنا هو الباب اللى عمره ما بيتقفل فى وشك
بالنسبه للميه دى فهى اسم كودى للخمره
نورتينى يا ساندى و مستنى ردك على السؤال

الست فرويد يقول...

كل سنة وانت طيب يا عمرو

ورمضان كريم