الجمعة، 10 يوليو، 2009

الخط الاحمر

للى مش عارفين او مش مهتمين انا بكتب روايه و بنشرها .... طبعا انت مهما حاولت لا يمكن ترضى كل الناس او تخلى كل الناس تجمع عليك لانه ربنا عز و جل نفسه مش كل الناس مجمعه يبقى ازاى انا البنى ادم هاخلى الناس تجمع عليا ..... و جايز انا اسلوبى زفت و روايتى دى مش عاجبه حد غيرى
المهم انا نسبه كبيره من التعليقات اللى جاتلى بتطالبنى انى اقلل شويه من الالفاظ اللى انا بستخدمها و كنت مستغرب جدا من الموضوع ده لان انا شايف ان اللى انا بكتبه مش حاجه اوفر للدرجه الكبيره دى و كنت بأرد عليهم و كنت مختلف معاهم جدا و ساعات كنت بأتريق على ناس منهم ... يعنى مثلا لما واحده تقولى ان جو الروايه بتاعتى المقزز بيفكرها بجو روايات نجيب محفوظ اللى عمرها ما فكرت تقراها ، طيب لما واحد زى خلص روايات نجيب محفوظ كلها قبل ما يكمل 17 سنه المفروض يرد يقول ايه .... بس زى ما ساره قالت ان الكارما مش بتسيبنا فى حالنا ( هى مش قالت كده بالظبط انما انا باتبلى عليها ) ..... الكارما دى ساقتنى انى ادخل على مدونه و منها على مدونه تانيه و منها على مدونه تالته ...... المدونه التالته دى مدخل البوست النهارده .... اولا انا زى ما قلت قبل كده و بقول دايما و هافضل اقول على طول انى مقتنع بمبدأ الحريه الشخصيه و انك حقك تقول اللى انت عايزه و انا حقى انى اتفق معاك او اختلف ، انى اقتنع بيه او ارفضه
المهم المدونه دى عباره عن روايه بس ... ابتديت اقراها عادى ... شويه و لقيت فيها الفاظ واضحه و صريحه بغض النظر عن تحفظى على استخدامها بشكل عام بس فى الاخر مدونته و هو حر فيها و انا لو مش عاجبنى ممكن امشى و خلاص .... شويه و لقيت تلميح للسخريه على الاديان و التلميح واضح بدرجه انك مينفعش تقول انك فهمت غلط او انك انت اللى بتلكك لصاحب المدونه .... شويه و التلميح بأه تصريح .... الشخص ده اتريق على الاسلام و المسيحيه ... على سيدنا محمد و على سيدنا عيسى ... يعنى مينفعش تتهمه انه منحاز لطرف على حساب طرف .... هنا لازم اعترف انى مش مستريح خلاص بس مكمل عشان اعرف نهايه الروايه الخرا دى ايه ( اعتذر عن استخدامى لهذا اللفظ بس ده اكتر لفظ محترم ممكن استخدمه هنا ) ... شويه و الهجوم انتقل من الهجوم على الاديان و الانبياء للتهجم على الذات الالهيه نفسها .... هنا اتفاجأت و الحقيقه انى كان بقالى زمن مفيش حاجه فاجأتنى من زمن
بعد ما خلصت الروايه قعدت افكر شويه .... سبب المفاجأه الاساسى اللى حصلتلى ان الروايه تعدت خط احمر عندى عمرى ما اتعداه حتى لو حصل ايه ... انا ممكن اختلف مع اشخاص .. ممكن اختلف مع سياسات ، ممكن ادخل فى صراعات ..... بس لما يوصل الموضوع للاديان و الانبياء و ربنا يبقى كده خلاص مفيش كلام .... انا شخص عقلانى جدا .. بأستخدم عقلى فى كل حاجه .... بس فى حاجات لازم تؤمن بيها من غير ماتشوفها ... غيبيات ... مسلمات .... سميها زى ما تسميها ، بس لازم عشان ايمانك يكتمل تؤمن بيها ... انا هنا مش باتكلم على حاجات بالنسبه لينا احنا بس كمسلمين ، او حتى مسيحين ... انما اى دين او ديانه او حتى فكر معين فى نسبه من الغيبيات لازم تؤمن بيها
هنا ابتديت افكر فى الناس اللى كانت بتعلق عندى و انا كنت مش معجب برأيهم ..... لقيت نفسى بأقول اكيد الروايه و الكلام اللى فيها داست و عدت خط احمر بالنسبه ليهم عشان كده كانت تعليقاتهم بالشكل ده ... و انى لازم اقبل الرأى الاخر ... ارد عليه .... و مش لازم صاحبه يقتنع باللى انا باقوله
يعنى المسأله من اولها نسبيه .... متوقفه على مكان الخط الاحمر بتاعك مش على اى حاجه تانيه .... يا ترى انتوا بأه الخط الاحمر بتاعكوا ايه ؟؟ ...... مستنى ردودكوا .... سلام

هناك 18 تعليقًا:

adel يقول...

انا قريته علي الفيس بس مش فاكر علقت ولا لا

بس انا معك في كل كلمة واننا نحترم حريات الاخريين و خطوطهم الحمر مش عيب

انت حر مالم تضر

ولو حد بيضرر من الفاظ مثلا يبقي بلاش منها ولا ايه ؟؟ :):)

Che يقول...

عادل
يا باشا سيبت تعليق على الفيس او لا انت تشرف فى كل وقت و فى كل مكان
السؤال بأه اللى انت سألته بأه انا مش فاهمه كويس ... بس هارد على اد فهمى
انا مثلا قريت موضوع فيه الفاظ ماعجبتنيش مثلا ... قدامى حل من اتنين .. يا اما اقرا و معلقش لانه محدش غاصبنى انى اقرى بالعكس انا باقرا بمزاجى
يا اما مقراش الموضوع خالص و يا دار مادخلك شر
هى دى نقطه الحريه ... حريتى انى اكتب و حريتك انك تختلف معايا او تتفق
مش عارف انا كده رديت على اللى فى دماغك ولا لا يا عدول
نورتنى يا عادل

زهور الامل يقول...

تعرف يا عمرو انا اكتر حاجة شدتني في اسلوبك ايه انك بتتكلم بطبيعتك جدا وواقعي جدا واسلوبك يقدر اي حد يفهمه ويستوعبه

زهور الامل يقول...

وكمان دي حرية شخصية وكل واحد ليه اسلوبه في التعبير عن خواطره واللي مش عاجبه يبقى يفتح الله والباب يفوت جمل

زهور الامل يقول...

وبعدين انا مش شايفة في اسلوبك اي الفاظ خارجة غير البوست اللي فات فقط وده ناتج من انك كنت متعصب جدا نتيجة التريقة على الدكتورة مروة وانت ليك الحق في كدة
تحياتي

سالى فوزى يقول...

che
شدنى موضوعك واسمح لى ان اختلف مادمت طلبت الاراء .. كفايه بقى خطوط حمراء وصفراء وخضراءايه المانع ان واحد ملحد
يتكلم ويتناقش معى بالساعات مادام يحترم عقيدتى ولايسخر منها دعونا نقبل
الاخر لكى يحترمنا انت فى بوست مروى الشربينى هاجمت من لم يتفق معك وبالفاظ
قاسيه لم لا نتقبل اراء الآخرين ونناقشها بهدوء واعتقد ان من اسباب تقدم الغرب ان الاراء محترمه وان من
يهاجم السيد المسيح لايصفوه بالكافر
والزنديق بل هو صاحب راى..
آسفه لاطالتى ..
وارجو تقبل اختلافنا..

Che يقول...

زهور
مش مجامله لانى مش الناس اللى بتعرف تجامل ... انما بجد انتى شخص محترم جدا
ممكن فى يوم نختلف مع بعض فى الرأى بس مش هنشتم بعض ابدا
بالنسبه للالفاظ انا مكنش قصدى على بوستاتى فى خمسه جد .. لانى طول 72 بوست عمرى ما استخدمت الالفاظ دى و كنت دايما بستعيض عنها بنقط ... انماالالفاظ دى فى الروايه
كل اللى انا قلته انى بس فهمت وجهه نظر الناس .. بس ده مش هيخلينى اغير وجهه نظرى او اجامل حد
نورتينى يا زهور

Che يقول...

سالى
اهلا بيكى و طبعا نختلف مش مشكله مدام الاحترام فى الاختلاف هو ده الاساس
موضوع الخطوط الحمرا موجود فى كل الازمان و عند كل الاشخاص تقريبا ( و خدى بالك من كلمه تقريبا ) ... انا معنديش مشاكل انى اعمل زيك و اتكلم مع اى حد سواء ملحد او غير ملحد مدام الاحترام موجود
بس المثال اللى انتى ضربتيه مش مظبوط ... لان فى حاله الناس اللى انا شتمتهم ( و على فكره انا مش نادم على الشتيمه دى و مستعد اكررها فى اى وقت ) .. الاختلاف ماكنش فى الرأى .. ده غير انهم خالفوا المبدأ اللى انتى بنفسك حطتيه و هو مبدأ الاحترام ... يعنى مثلا الروايه اللى انا اتكلمت عليها قلت ان حق اللى كاتبها يقول اللى هو عايزه بما كده شتيمه الانبياء و ربنا نفسه مدام ده رأيه ... انما انا كل اللى قلته ان الشتيمه دى تعدت الخطوط الحمرا اللى عندى ( على قله خطوطى الحمراء ) .. انا كل اللى عملته انى استخدمت نفس اسلوب الناس دى فى الرد عليهم و هو اسلوب السخريه و الشتيمه ... يعنى زى ماهو موجود فى كل الاديان و كل الشرايع استخدمت مبدأ العين بالعين مش اكتر مش شتيمه عشان اوريكوا انى بعرف اشتم
تقدم الغرب انا من زمان بقول ان سبب من اسبابه حريه الرأى و حريه التعبير ده عن الرأى ده و انا طول عمرى بقول كده و لسه ماغيرتش رأيى
و يا ستى طولى براحتك و طبعا الخلاف لا يفسد للود قضيه
نورتينى يا سالى

الشعب لابد له من حكومه تشكمه يقول...

شوف هقولك حاجه البلوج ملك صاحبه يعنى اسلوبه وطريقته وافكاره هو حر فيها انا مش داخله بيت واحد علشان افرض عليه حاجه بمعنى هو انسان عاقل وبالغ ومسؤل عن كلامه اللى هيتحاسب عليه.هو حر, ومتنساش ان الخطوط الحمرا نسبيه.ممكن خطوطى الحمرا تكون خضرا عندك.دى حاجه متفاوته.
متفقين على ده؟؟؟متفقين.
ندخل باه على الالفاظ انا شخصيا مش بحب البلوجات اللى كده دا خطى الاحمر,,, بعمل ايييه لو دخلت بلوج ولقيته كده؟
ببساطه مش بعلق اصلا على البوست ولو لقيت الموضوع بيزيد ببطل ادخل .تقولى مش هتتناقشى؟؟؟ او مثلا فى موضوع زى ان حد يتعدى على الاديان نسكت عليه.
اقولك اوقات السكوت بيكون افضل من مناقشه ملهاش جدوى, دا واحد فكر وكتب ونشر فى بلوج هو عارف كويس ان فى ناس هتقراه يعنى مع سبق الاصرار والترصد.
فانا لابدخل اقوله الفاظ ولا اتناقش انا ببطل ادخل اصلا ,انت حر تكتب اللى انت عاوزه وانا حره انى مقراش..
لكن فى ناس تتوسم فيها المناقشه من غير متطول لسانها وبتحترم اللى بيناقشها بمعنى مهما اختلفنا فى الاراء فى نقطه احترام بنقف عندها ولا نتعداها, دول ممكن اتناقش معاهم وحصلت قبل كده معايا.لكن فى ناس لو اتناقشت معاهم تباه بتهين نفسك.
دا راى المتواضع....

مدحت محمد يقول...

ان الذين يحادون الله ورسوله كبتوا كما كبت الذين من قبلهم
صدق الله العظيم

ده كبت ده اللى عنده

وكل نفس بما كسبت رهينة

Che يقول...

شيمو
رأيك ده مش متواضع ، بالعكس ده رأى محترم جدا و عقلانى جدا
بجد مش لاقى حاجه ارد بيها على تعليقك ده غير ياريت يبقى فى ناس كتير بتفكر زيك ... كان حالنا اكيد هيبقى احسن من كده
نورتينى يا شيمو

Che يقول...

مدحت محمد
صدق الله العظيم
نورتنى لاول مره يا مدحت

Zika يقول...

بقولك ايه قول اللي انت عاوزه سواء كده او كده الناس هاتعترض
كويس انك حطيت نفسك مكان الناس
بس بارضه اكتب اللي ييج يعلي دماغك
انت مش شايفني بالش اد ايه في المدونه عندي
وماحدش بيعترض
هي الحياه كده
وعلي فكره يعني
انا ابتديت اقرا منها

عمرو يقول...

الزمالك وحده لديه خطان أحمران
هههه
تعرف أنا برضه لا يمكن أقبل سب الأديان أيا كانت. لكن الألفاظ اللي بتتكلم عنها دي مسألة تذوق
اكتب وكبر دماغك
:)

Che يقول...

زيكا
كلامك كله صح يا زيكا .... الحاجه الجديده اللى حصلت انى اول مرة اشوف الموضوع من الناحيه التانيه .... و كده كده اللى بتقوله صح ... انا خاكتب اللى يجى على دماغى و اللى يرحنى
نورتنى يا زيكا

Che يقول...

عمرو باشا
انت فين من زمان يا عمور ... و يا عم ماتجيبش سيره الزمالك لحسن يكون فيه زملاكويه قاعدين ولا حاجه
انا و انت كده نفس المبدأ متفقين عليه
و هاكتب و اكبر دماغى ... و هاعيش و هانتعش

غير معرف يقول...

انت تعبر عما تريد بالطريقة التي تراها فهذا حقك ........ وان يعترض الناس علي ما تقول فهذا حقهم , مادام ما تقوله مطروحا علي الناس من حولك ....... فان شئت ان تسمع نفسك فقط فلا تهتم لاراء الاخريين وان تحجبها ايضا...... وان شئت نصيحتي فلتستمع للنقد ثم تلجأ الي العقل وتقرر ما تريد.

ولا تنسي ان اي رواية من فجر التاريخ تكتب من جديد مع كل قارئ لها ...... وتظل دائما متارجحة مابين قمة الابداع الفني والبشري الي قمة الاسفاف والتدني , فكما ان هنالك كتب يضيق بها قارئوها , فان هنالك كتب سيئة الحظ دوما بانها تقع في ايدي القارئ غير المناسب ...... فكم من الكنوز كتبت في عصور ما واهال عليها الناس التراب ثم عادت تلمع من جديد في عصور اخري ..... بشرط ان تكون حقا من ذهب .

وشكرا

مصطفي محمود

Che يقول...

مصطفى محمود
لا اجد ردا يفى بحقك ... شكرا
نورتنى