الجمعة، 17 يوليو، 2009

وجدى و مشروع اللانجيرى

البوست ده نازل هنا كأسثناء عشان مش عارف انشره على واحد جامعه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قلت قبل كده ان اكتر شخصيتين جالى كومنات عليهم هما فناجيلى و وجدى المعروف وسطينا بوجدى مشاريع عشان مشاريعه الكتير اللى مش بتخلص و حكيت على مشروعين قبل كده من مشاريعه هنا و هنا ..... المهم انا النهارده جاى اوفى بالوعد لما وعدتكوا انى هاحكى على مشروع جديد من مشاريع وجدى
المشروع ده وجدى ابتداه و هو فى اخر سنه كليه .. سنه رابعه دابلر و استمر فيه سنه بعد كده تقريبا او اقل شويه .... فى يوم لقيت وجدى جاى بيكلمنى على النظم الاداريه للمشاريع و ازاى ممكن يبقى فيه شكل هرمى و شكل شجرى و اشكال تانيه كتير كنت شويه منهم اعرفهم و الباقى عرفته بعد كده منه و ساعه لما اشتغلت فى مجال الدعايه لاننا بنعتمد على النظم دى فى شغلنا بشكل او بأخر .... المهم بعد ما وجدى لقانى استكيفت من كلامه تمام التمام ... سألته هو المشروع ايه يا برنس و الكلام على ايه .... قام قالى انا قررت اعمل مشروع لانجيرى .... طبعا انا مكنتش هادخل مع وجدى لانى اتعلمت من مشروع الارانب و من مشروع لبس المدارس اللى كان مع ايمن انما كنت بسمع من قبيل العلم باشئ و بعدين يعنى صاحبى جاى يفضفضلى اقوم انفضله ... ده حتى تبقى عيب
المهم انا قلته ربنا معاك يا ريس و شد حيلك .... وجدى ابتدى يعمل الخلايا الشبكيه بتاعته عشان المشروع و جدير بالذكر ان كل اللى دخلوا كانوا بنات لاننا كولاد يا اما مش هندخل مع وجدى مشاريع للاسباب السابق ذكرها او حتى لو فكرنا ندخل ، هنبيع لانجيرى ازاى كولاد لبنات ... صحيح احنا بجحين و وشنا مكشوف بس مش للدرجه دى ( و محدش يفتكر انى بلقح على وجدى ... فى النهايه هو المدير و المؤسس و صاجب حقوق الملكيه الفكريه ) .... المهم المشروع مشى حلاوة مع وجدى ( مكنتش اعرف اد ايه البنات بتهتم بالحاجات دى مع ان الحاجات ساعه الجد والله مابتفرق معانا ) و وجدى ابتدا يجيب كتالوجات و يروح لمصانع و محلات يتعاقد معاها ... بس كان بيشترط ان الكتالوجات تبقى على موديلات بلاستيك او متصورة مش على بنات ( عشان احنا مش عايزين ذنوب ... اللهم ما قوى ايمانك يا اخ وجدى ) .. و البليه لعبت معاه و ابتدا يحسرنا على الفرصه اللى ضيعناها لما مدخلناش معاه .... المهم هو خلص الكليه و اشتغل شويه فى المشروع من بره و كان بيفكر يفتح محل .... و فى يوم لقيته جاى الجامعه و معاه شنطه بس مليانه على الاخر ... بقوله ايه يا وجدى انت مسافر ولا ايه و ايه اللى معاك فى الشنطه دى ..... و يا ريتنى ما سألت .... لقيته قالى انه جايب اوردرات يسلمها للبنات اللى طلبوها فى الجامعه .... و كأثبات لكلامه فتح الشنطه و ابتدى يطلع و يفرجنى .... احنا ساعتها كنا قاعدين قدام شباك شئون الطلبه بتاعنا ، اللى هو فى المبى الرئيسى بتاع كليتنا ، اللى هو عند السلم اللى بيودى لتجارة و نص الجامعه التانى .... يعنى تقريبا نص الجامعه بتعدى من عندنا .... و وجدى عمال يطلع قمصان النوم و يفرد و يفرجنى ... و الناس تعدى علينا و تبص و انا هموت و اقوله خلاص يا وجدى ... يقولى لسه .... و شويه يقولى انا هاوريك حاجه جديده و يقوم مطلعلى اندر وير بينور و واحد بيطلع مزيكا و واحد ليه قفل لما تصقف يقوم القفل مفتوح ( و ساعه الجد هيروح واقع على طول ) ويقولى زى اللى منه شلبى كانت لابسه فى الفيلم بتاع احمد ادم ... و انا اقوله خلاص يا عم شيل الحاجه و يقولى لا لسه هافرجك .... يا عم انا اكتفيت هخلاص ... شويه و الناس تكون ماشيه و تيجى تهدى عندنا ... الولاد يضحكوا و البنات يا يبصوا بقرف يا اما يقعدوا يتودودا ( مش عارف بيقولوا ايه ) ... وانا اقوله كفايه يا عم هيتعملنا قضيه آداب و انا هاضيع عشان انا لسه فى الجامعه انما انت خلصت ... يقولى متخافش هاشغلك عندى .... يابنى طيب عشان الحاجه تفضل بكيسها و انت بتديها لاصحابها ... يقولى هأطبقها لما اخلص .... المهم فى الاخر انا قمت و سيبته ..... بعد كده وجدى توقف عن المشروع ... بسأله ليه ... قالى البنات لما خلصوا جامعه كل واحده سابت المشروع و انا مش عارف اشغله .... يعنى هابيع لمين .... قلتله على رأيك ... و كانت فرصتنا عشان نثبتله اننا كنا صح لما مدخلناش المشروع ... بس تفتكروا وجدى سكت على كده .... ابدا .... عمل مشروع تانى .... بس ده للمرة الجايه ..... سلام

هناك 28 تعليقًا:

micheal يقول...

ههههههههههههه..طب مش كنت تاخدني معاكوا بدل ما أنا عاطل
بص يا سيدي..في مصر معظم اللي بيبيعوا لانجري رجالة وأنا عموما عملت استفتاء في الموضوع دع قبل كده بين أصدقائي البنات اللي أكدولي أنهم يفضلون شراء اللانجري من الرجال لان لما اللي بتبيع ست بتظهر أمور النفسنة..هع هع هع
الوحيدة بقي اللي قالتلي أنها لا تفضل شراء لانجري من من رجالة أبدا مش مصرية أصلا
عشان متعودة علي كده في بلدهم
يخرب بيت فقركوا يا عيال
تحياتي

Che يقول...

موكا باشا
يا باشا انا كان نفسى تبقى معانا و على كل ملحوقه عشان وجدى مشاريعه مش بتخلص
بالنسبه للاستفتاء اللى انت عملته كنت خدتنى انا معاك ... انا بحب الاستفتاءات دى جدا .. ههههه
اكيد اللى قالتك انها مش بتحب تشترى من رجاله من بلاد الشام لانى اعرف انهم هناك مش بيستريحوا للرجاله فى الحاجات دى
نورتنى يا مايكل

magi يقول...

بس كان بيشترط ان الكتالوجات تبقى على موديلات بلاستيك او متصورة مش على بنات ( عشان احنا مش عايزين ذنوب
.................مش عايز ذنوب مممممممم
بس هو سؤال هو كان بيبيع الحجات دى فى الكليه كده عادى يعنى!!!!!!!

Che يقول...

ماجى
هو يعنى بيبيع مخدرات لاسمح الله ؟؟ ... و بعدين ايوه يا ماجى كان بيبيعها فى الكليه ... بس مش نظام السوق الخيرى للطلبه يعنى ... يعنى بيجيب كتالوجات و اللى بتعوز حاجه معينه بيجيبها و كده
نورتينى يا ماجى

مي يقول...

هههههههههبجد موقف يكسف ويفطس من الضحكككككككككك
وجدى ده حكاية يخرب بيت مشاريعه الحمد لله ان امن الكلية مش مسكوا
ههههههههه تحياتى ليك
يابخت من زار المدونة وخفف

Che يقول...

مى
اهلا بيكى اول زياره و اول تعليق لو الذاكره ماخانتنيش
بالنسبه لوجدى فده مجرد مشروع واحد من مشاريعه اللى مش بتخلص
و ياستى خشى المدونه و طولى فيها ... مدونتك برضه
نورتينى يا مى

عمرو يقول...

الله يخرب بيت عقلك يا تشي
ضحكتني فعلاً, ربنا يستر من المشروع الجاي
:)

Che يقول...

عمرو باشا
سعيد جدا انى ضحكتك ... بس صدقنى الموضوع لو عشته معايا كنت هتلاقى ليه طعم تانى
نورتنى يا عمور

adel يقول...

هههههههههههههههههههه

هو لسه شغال فيهم

اعمل معاه شغل نار

هههههههههههههههه

موديلات بلاستيك و ذنوب ياراجل
كده كده ده لبس يا عم و شغل و الشغل مش عيب ولا حرام
واللي يتكسف من بنت عمه مايجبش منها مخلل

وبعدين عادي لانجيري في الجامعة عملوها عندنا في عين شمس
هههههههههههههههههههه

Che يقول...

عدول حبيبى
هو حاليا بطل بس انت ممكن تقنعه يرجع لو انت عايز ... بس نصيحه اخويه ... بلالالالالاش
و بعدين يا عم هو دماغه كده فى الشغل ... لما تشتغل معاه ابقى اظبطه على موجتك
و والله انا سعيد يا عدول انك رفعت معنوياتى و عرفت البشريه انه اللانجيرى ده حق طبيعى لكل بنات جامعات مصر
نورتنى يا عدول

micheal يقول...

شمال إفريقيا يا باشا
:))

سمكه واحده يقول...

انا عماله اضحك والبت المفعوصه بنت خالتي الصغيره 4 سنين متلقحه جمبي وكل شويه تشدني عاوزه اغنيه عاوزه اتفرج علي كارتون وتسألني بتضحكي علي ايه وساعه ما نفضتلها لقتها قعدت تلعب في الجهاز مسحت كل التعليق وقالتلي معلش اصلي كنت بروق لما قلتلها ايه اللي هببتي ده
تفتكر اقوم اعملها كوبايه لبن عشان تتهد شويه ولا اجوعها عقاب ليها؟؟؟

عموما هو البنات اللي كانت بتتودود يأما علي حاجتين
منهم انها عاجبها حاجه من اللي عارضينها عيني عينك كده
او بتمصمص شفيفها وتقول شوف الرجاله والله بقي اخر زمن وتشتم بقي ههههههههه

السؤال بقي
محدش بلغ عنكوا؟
الحمد الله جت سليمه
نشوف بقي المشروع الجديد
مستنين

Che يقول...

موككاا
ماشى يا عم الانترناشيونال .... بس افتكر ان احنا لينا ماتش مع الجزاير عشان تصفيات كاس العالم ... هههه
نورتنى يا مايكل

Che يقول...

سمكه
بنت حالك دى تشربيها دوا كحه عشان تنام ، ده عقابها الوحيد
البنات اللى كانت بتتودود بيتهايئلى انه كان نظام شتيمه اكتر لان اللى شكلهم قرفانين مننا كان هو الاكتر
و الحمدلله ماتمسكناش و جت سليمه
نورتينى يا سمكه

sandy يقول...

فظيع يا عمرو انتا فقر تصور واحشنى موت اما فنجيلى ده فده ربنا يديلو الصحه وعلى فكره انتا وعدتنى انك هتورهونى عشان ده من الشخصيات اليتتمنى تشوفها....سلام

حررروووف يقول...

هههههههههههههه حكتفي باني اضحك

زهور الامل يقول...

ههههههههههههه فكرتني لما كنت واقفة قدام محل ملابس جهزة وجت واحدة ست بكل بجاحة وهي واقفة في نص الشارع وسالت صاحب المحل بعلو صوتها
استاذ فلان عندك كوكو من اللي تسقفله ينزل وتسقفله يطلع قالها يعني لو انت واقفة في فرح يفضل طول الوقت طالع نازل
ربنا يكفيني شر مشاريع صاحبك دي يا عم

Che يقول...

ساندى
يا بنتى الكلام هنا على وجدى مش فناجيلى .... و على كل فناجيلى اجازة فى مصر ... ياتلحقيه يا ماتلحقيهوش
منورانى على طول يا ساندى

Che يقول...

حرووف
و انا هاكتفى انى اقولك انى سعيد على ضحكك
نورتينى يا حرووف

Che يقول...

زهور
جامد جدا الموقف بتاع الست ده ... و الاجمد منه الرد ... ههههه
و بعدين يا زهور ده انا شفت مشاريع مع وجدى ... يالهوووووووووى
نورتينى يا زهور

a mero يقول...

عموره أزيك, ايه ياعم هو الأيميل ما وصلكش ولا ايه؟
الصراحه الناس اللي عندها أفكار لمشاريع كتير دي عندها ابداع لأن الواحد ساعات يعصر مخه عشان يجيب فكره واحده يكونوا همه طلعوا بعشره ودي موهبه بس طبعا مش معناها ان الواحد يودي نفسه في داهيه.
لي واحد صاحبي علي غاوي مشاريع برده بس عيبه انه واثق في نفسه بزياده قعد يقوللي انه لو والدي يقدر يسهله انه يقابل القسم بتاع المشروم لأنه ناوي يبتدي في المشروع ده وهيوزع علي فنادق شارع الهرم .المهم انه اشتري كميه صغيره وزرع من غير اشراف ومن غيرمايتفق مع حد وانه يعرف ناس في الفنادق كتير ومش هيغلب.
بيحكيلي انه راح الفندق معاه كرتونه واحده كعينه وبعد ماقابل المسئول من غير مايقوله و لا كلمه راح جايبله عينه من المشروم اللي عندهم ولما مسكهم جنب بعض علي حس ان المشروم بتاعه ميفرقش عن بتاع الفندق غير انه هو ده شكله بعد ما يبوظ ويمرض وينكمش!
واعتذر مره أخري عن الأطاله

Che يقول...

امير حبيبى
الايميل وصلنى يا عم و رديت عليك والله فى ايميل و بعتلك ارقامى انا و نادر ... بص فى الجينك ميل بتاعك او السبام
صاحبك على ده جامد على فكره ....... هههههههه
على فكره وجدى برضه عمل المشروم و عمل دود القز و عمل بلاوى متلتله مسيرى احكى عليها
نورتينى يا ميرا يا حبيبى

الشعب لابد له من حكومه تشكمه يقول...

تشى:يرحمكم الله:)

ههههههههههه انا عارفه البنات كانوا بيتودودوا بيقولوا ايه:)) زمانهم قطعوا فروتكو , قطعوها دا زمان مبقاش فى فروه اصلا,يعنى انا لو مكانهم بصراحه هقول مين سوسن ومديحه دول هههه:))
وانا مختلفه مع مايكل,انا مشاركتش فى الاستفتاء دا يامايكل انا ضد فكره الولد دا نوهاااااااااائى اذا كان فى اللبس العادى لو لقيت ولد ماشى ورايا فى المحل ويقولى ها عاوزه ايه طب خدى دى هتجنن عليكى ولا دى هتنطق عليكى بسيب المحل وبخرج:))

Che يقول...

شيمو
الله يرحمك يا شيمو هانم .. هههه
كده برضه يا شيمو ، سوسن و مديحه ... طيب هو بيبيع يبقى سوسن يبقى مديحه زى ما يختار ... انا ذنبى ايه .... ههههه
و حقك طبعا تختلفى مع مايكل براحتك ... بس تضربوا بعض على باب المدونه مش جواها .... ههههه
نورتينى يا شيمو

سارة نجاتى يقول...

أنا مش قادرة أتخيل أبدا هههههههههه

ايه ده ؟؟؟ لانجيرى كده فى الكلية و و البنات كانوا بيتعاملوا نعاه ازاى , قصدى اللى بيبعوا

و البنات اللى رايحين الكلية يجيبوا لانجيرى دول هههههههه ؟؟؟
ده تلاقيه جرسك هناك

و بعدين موضوع موديلات بلاستيك ده بجد ؟؟؟

Che يقول...

ساره
والله يا بنتى ده بجد ... و بعدين عادل قال انه برضه فيه كده فى عين شمس
و البنات كانوا بيتعاملوا عادى .... تحسى اننا فى دكان مينى فاتوره فى الازهر
و بالنسبه لموضوع الموديلات البلاستيك ده والله بجد
نورتينى يا ساره

الست فرويد يقول...

ههههههه

ده مجنون

بس البوست لذيذ جدا

وضحكنى جدا

:))))))

ارق تحياتى لك

Che يقول...

الست فرويد
وجدى مش مجنون .... بس هو عنده طموح على سنه طرقعه و ذره تصميم و فسفوسه لسعان .... بس هو ده وجدى .... هههههه
و انا سعيد ان البوست عجبك
نورتينى يا فرويده