الثلاثاء، 7 يوليو، 2009

التطرف و قضيه مروة

بقالنا اسبوع تقريبا او اقل شويه بنتكلم على السيده مروة الشربينى الله يرحمها .... قريت كلام كتير فى المدونات و بره المدونات حواليها .... الاسم اللى اشتهرت بيه هذه السيده هو شهيده الحجاب .... ناس كتير مع الاسم و ناس كتير بتعارض الاسم ده و شايفه انه حصر للحقيقه فى نقطه واحده خاصه بالاسلام و بس ...... عموما انا فى المواضيع اللى بتحصل برة مصر بحاول اتابع الموضوع من وجهه نظر خارجيه ، مش عشان انا مش وطنى ولا حاجه ... انما فكرة ان وكالات الانباء العالميه بيكون ليها Code Of Honor و بيتعاملوا مع اى موضوع بطريقه محترفه لا عواطف فيها ، بعكسنا احنا الشرقيين عموما اللى مش بنقدر نفصل بين عواطفنا و بين شغلنا فى اغلب الاوقات
مبدئيا اسم شهيده الحجاب ده موجود فى الصحافه الغربيه مش احنا اللى اخترعناه ، لانهم معترفين ان سبب الجريمه اللى حصلت هو التطرف العنصرى الدينى مش اكتر ولا اقل ... يعنى الراجل الالمانى اللى من اصل روسى ده شتم مروة عشان حجابها اللى هو دلاله اسلامها و هو شاف انه دلاله على ارهابها ..... و بعد كده الموضوع تطور فى المحكمه لغايه ما مروة توفت من الطعنات اللى بلغ عددها 18 و ده عدد كبير و محتاج وقت و مستغرب ان الراجل جوه مبنى المحكمه لقى الوقت الكفايه انه يضرب مروة 18 مرة من غير مايتدخل اى حد من امن المحكمه زى ما يكونوا بيتخانقوا فى الشارع مش فى قاعه محكمه
انا مش هاتكلم فى الموضوع لانه اتغطى من كل الجوانب و الكلام فيه مش هيعمل اكتر من انه يزود الوجع اللى احنا كلنا حاسيين بيه كمسلمين و كمصريين كمان .... انا هاتكلم على نقطه واحده بس هى نقطه التطرف مش اكتر .... و انا قصدى على التطرف اللى موجود فى البلوجز
طبعا الاغلب الاعم كان هى نقطه محورة الموضوع حوالين الاسلام ، و سواء شئنا ام ابينا ده صح لان سبب الجريمه الاساسى هو حجاب مروة ... بس تصوير الموضوع انه هجوم على الاسلام ككل مش حاله فرديه انا شايف هنا انه تهويل مش فى حجمه ... لانى عشان اعتبر الموضوع حاله عامه بيتطلب ان الموضوع يكون متكرر بشكل كبير مش مجرد حالات فرديه و ده مش اللى حاصل هنا ، لانه برضه شئنا ام ابينا اغلب الاجانب ( و انا بقول اغلب مش كل ) عندهم احترام للاخر بغض النظر عن الاخر ده ، و ده كان واضح فى ان اللى بلغوا الشرطه كانوا الاجانب الالمان مش مروة نفسها ...... طبعا استغلال وفاه اى انسان لاثبات وجهة نظر ما ده غلط ، بس انا يمكن اكون فاهم الموضوع لان اولا مروة مسلمه و ده رابطه بينى و بينها من غير حتى ما اكون اعرفها ، ثانيا انها مصريه زينا كلنا و ده رابطه تانيه ... ممكن افهم ان الناس كتبت تحت تأثير الصدمه و الغضب و انا باحترم النقطه دى لان فى الاخر مينفعش الواحد يكون محايد بنسبه 100 % و لازم يكون فيه بعض التحيز لاننا فى الاخر بشر مش مجرد مكن ممكن يتطفى و يشتغل بزرار
الحاجه اللى انا مش قادر افهمها و اتعشم انكم تسامحونى لو كان فى الفاظ خارجه او هتجرح شعور حد بس بجد حاولت انى اشيلها اكتر من مرة من البوست و مقدرتش.... الحاجه اللى انا مش قادر افهمها ان فى ناس حاولت تقلل من الموضوع و خدوا الموضوع بأستخفاف شديد و اتخذوا الموضوع ذريعه للهجوم على الاسلام نفسه ... يعنى بالبلدى استغلوا الموضوع للترويج عن وجهة نظرهم ... ده حقهم انهم يقولوا اللى هما عايزينه .... بس انا شايف ان اللى حصل ده اقل لفظ يتوصف بيه هو وساخه و ملهاش حدود كمان و الناس اللى عملت كده ناس وسخه و كمان بنت وسخه عشان اهاليهم معرفوش يربوهم او على تقدير ممكن انى اقول عليهم كده لان الولد الوسخ يجيب لاهله النعيله على رأى المثل .... يعنى انى استغل حادثه وفاه انسان و انا هنا مش باتكلم على انها ست او راجل .. مسلمه او مسيحيه .. انما هى فى الاخر انسان .. و اخد الموضوع ده و احرفه و مش كفايه كده انما كمان اسخر سخريه واضحه من الموضوع ده فده وساخه ....... يعنى واحده بتعلق و بتقول انها مش شهيده عشان الشهيد هو اللى بيدافع عن قضيه ، ماشى صح جدا ... بس يا ترى مروة كانت بتعمل ايه جوة المحكمه لو ماكنتش بتدافع عن قضيه و عن حقها ، هى المحكمه مثلا راحتها كرحله فى الويك اند ..... واحد ابن مره وسخه بيقول بكره هنسمع عن شهيده المنديل ابو اويه ، ده لو مش تريقه صريحه يبقى اسمها ايه .... واحده بنت مره اوسخ بترد و بتقول ناقص اللى يموت من جرعه هيروين يقولوا عليه شهيد ... و تلاقى واحد طلع زى الجيصه و يقولك يا جماعه دى مش تريقه ولا سخريه انما مجرد رأى .... اشخر انا بأه ولا امضيلهم على احا زى اخوانا الاسكندرانيه بيقولوا ...... انا اعرف انى لما اتريق على واحد اتريق على حد يقدر يرد عليا ....... انما الشخص ده بين ايدين ربنا دلوقتى ... يعنى ادعيله بالرحمه و ان ربنا يثبته ساعه السؤال .... هاحكى على حكايه صغيرة .... ايام الرئيس السادات كان الكتاب يا اما مش بيكتبوا و فى بيوتهم يا اما بره مصر و بيكتبوا من بره مصر ، و فى اواخر ايام السادات كان الكتاب يا اما فى السجن يا اما بره مصر .... لما مات السادات الناس قالت لمحمود السعدنى السادات مات اكتب بأه .... الراجل المحترم قال لا شماته فى الموت و لا خلاف مع ميت ، و قال لما كان السادات عايش كان يقدر يرد ، انما دلوقتى ربنا اللى بيحاسبه و يرحمه بأه
للمرة التانيه بعتذر عن انفعالى و عن اى لفظ جرح اى حد من غير ما اقصد ، بس بجد لو كان الخلاف فى رأى كنت هابقى اهدى من كده ... انما لما الموضوع يبقى شخصى أوى كده فسورى ... مروة و ماتت و مش هتقدر ترد انما انا الحمدلله و ربنا يديمها عليا نعمه عندى لسان و لسان زفر كمان و اعرف ارد بيه ... مش قادر امسك نفسى .... سلام

هناك 26 تعليقًا:

زهور الامل يقول...

أنا بكيت لما قرأت الموضوع ده وحسيت اني اندبيت بخنجر من هول الفاجعة دي
لما واحدة مسلمة تنضرب 18 طعنة في ساحة محكمة ده معناه ان المسلمين والمصريين بالنسبة لهم نكرة

زهور الامل يقول...

وانا معاك ان مش كل الاجانب بيعاملونا كدة بس اغلبهم واكترهم بيعتبرونا ارهابيين ولا بد من سحقنا

Che يقول...

زهور
ده فعلا صح .. احنا ملناش قيمه و نكره ... لما احنا جوه بلادنا منساويش حاجه ، يبقى متوقعه ايه لما نكون براها
نورتينى

زهور الامل يقول...

بالنسبة للناس اللي بتتريق عليها فدول يعتبروا ناس تافهين وليس لديهم وطنيه ولا حب لدينهم ووطنيتهم ودول فعلا هما اللي مايستحقوش الحياة

زهور الامل يقول...

الله يرحمها مروة الشربيني ويرحم كل مسلم مات غدر او اتظلم في اي دولة اجنيبة

زهور الامل يقول...

وانا بلوم عليك يا عمرو في عصبيتك دي انك قولت الالفاظ دي لان دول ما يستحقوش انك تاخد سيئة واحدة بسببهم
سيبهم للزمن والله وهو اللي هيعاقبهم
تحياتي

Che يقول...

زهور
مسأله اغلب الاجانب او شويه منهم مش الاساس .. بس الحقيقه انه فيه نسبه منهم مهما كان حجم النسبه دى بيعتبرنا ارهابين و متخلفين و قولى كل اللى انتى عايزاه
الناس اللى بتتريق دى انا مش هاتكلم عليهم تانى عشان كفايه اشتم مرة واحده مش كل شويه اقعد اشتم
و انا عارف انى فى البوست ده كنت عصبى زياده عن المعهود ... بس والله انا بصيت على البوست و حاولت اشيل منه الشتيمه بس ايدى ماطوعتنيش ... و انا اسف مرة تانيه و تالته و عاشره
ربنا يرحمها يا رب و يثبتها عند السؤال
نورتينى يا زهور و يارب اشوفك فى بوستات احسن من كده

adel يقول...

بس ياعمرو انا رغم ان مش بحب الالفاظ في الكتابة بس اناا متأكد انك كتبت كده عشان فعلا مش مستحمل

بس زي ما انت قلت اسم (شهيدة الحجاب) ده مش بتاعنا و احنا خدنا كده

مروة مش شهيدة حجاب ... مروة شهيدة التعصب العرقي و الديني و احنا للاسف هنا بنعمل زيهم بشكل او باخر

يمكن كانت اوضح في التسعينات بس دلوقتي الموضوع بقي مستتر اكتر

صح ؟؟؟

بس الموضوع فعلا مينغعش يتسكت عليه لانه حق البت اللي ماتت دي و اهلها و ايه 18 طعنة في محكمة

انا اسف للتشبية بس انا عار انك هتفهم قصدي
ده لو كلب مات في الشارع بطعنة هيقوموا الدنيا ... ما بالك بانسانة و في محكمة

اعتقد لازم يكون في موقف حتي لو قطعنا علاقتنا بيهم

بس انا لسه معترض علي التسمية ...هي واحدة ماتت نتيجة الجهل و التعصب ولازم ناخد حقها و نصلح الصورة دي لانها بتسوء يوم بعد يوم

magi يقول...

معاك فى جزء كبير من الموضوع ده لا شماته فى الموت خصوصا انها اتقتلت غدر وربنا يرحمها

Che يقول...

عادل
انت عارفنى من زمن على البلوج دلوقتى ... اظن انى عمرى ما استخدمت اى الفاظ و كنت دايما بحط مكانها نقط ... بس اللى انت قلته صح .. انا بجد مكنتش مستحمل المره دى ... enough is enough زى ما الاجانب بيقولوا
بالنسبه لاسم شهيده الحجاب انا بس عايز اوضح حاجه ... فى ناس استخدمته عشان تحصر الموضوع فى نقطه معينه .. انما انا استخدمته زى ما الاجانب استخدموه ... لانه كان السبب الرئيسى فى الاحداث اللى ادت للجريمه دى و تانى حاجه كأداه تعريف ... زى مثلا ما بنقول مجنون بنى مزار و فتاه العتبه و كده
مروه فعلا ضحيه التعصب الدينى زى ما انت قلت ... و بالنسبه لينا هنا فى مصر انا عارف اننا بنعمل كده و اكتر شويه كمان .... ايام التسعينات انا كنت فى المنيا و شوفت بعينى حصر التجول هناك .... لسوء الحظ التعصب ده متبادل و دخل دايره من الفعل و رد الفعل و مش هيخرج منها و اخرها الحادثه بتاعت المنصورة
و كمان معاك حق اننا مينفعش نسكت ، لان اللى ماتت دى فى الاول و الاخر مصريه ... يعنى لو كان حصل الكلام ده لمصرى مسيحى برضه كنت هاقول كده .. لانه بغض النظر عن ديانته فهو مصرى زى زيه .... بس لسوء الحظ انا مش متفائل أوى ان الموضوع هيجيب نتيجه و الواد هيترمى فى السجن سنتين تلاته و يخرج تانى ... و على فكرة ده مش عشان هما ضدنا انما عشان القضاء بتاعهم بيحكم بكده فى اغلب الحالات
انا فهمت سبب اعتراضك على التسميه و اتمنى تفهم سبب استخدامى ليها ايه
نورتنى يا عادل

Che يقول...

ماجى
سعيد اننا متفقين المره دى .... ربنا يرحمها يا رب و يثبتها عند السؤال
نورتينى يا ماجى

adel يقول...

انا فاهم و انا معاك و ك\مختلفناش

و فعلا القضاء بتاعهم مش بيحكم احكام زينا و رغم اني شايف ان القضاء عندهم مظبوط
بس الا دي

و انا فاهم انك بتتكلم في مصري دون النظر للديانة و ده برضه انا متفق معاه تماما

وبعدين حتي لو معندهاش دين ...انسانيا مينفعش اللي حصل ده

مياسي يقول...

شوف انا فاهمه قصدك

انو الموضوع اصلا انها لو ما كانت محجبه يمكن الموضوع ما كان اتطور لهالمرحله

بس انا نفسي افهم انو الناس اللي محسوبين علينا على اساس ليه متحسسين هالقد من كونها محجبه؟ يعني لو هي مش محجبه وصار معها هيك ساعتها نصعّد الموضوع ونقول يا حرام؟!!

ولا هي معايير مزدوجه والسلام؟!! اشي بيجلط جد؛ الله يرحمها ويصبّر أهلها

Che يقول...

عادل
الله ينور عليك يا معلم ... ده بالظبط اللى انا اقصده
و مع انى عارف ان الناس اللى بتقرا فاهمه انا قصدى ايه .. بس انا برضه قلت فى البلوج انى مش باتكلم على انها راجل او ست ... مسلم او مسيحى ... انما باتكلم على انها انسان قبل اى حاجه
طول عمرك معايا على الخط يا دولا يا حبيبى
منورنى على طول

Che يقول...

مياسى
بالظبط هو ده اللى انا اقصده ... انا هنا مش باتكلم على الحجاب كرمز للاسلام .. انما انا بوضح ان الحجاب كرمز هو اللى ادى للتطور المأساوى ده
و برضه تانى و تالت و عاشر ... حتى لو كانت مش محجبه او مش مسلمه او حتى مش مصريه او عربيه من الاساس .. دى بنى ادم قبل اى حاجه
الناس اللى انتى بتتكلمى عليهم يا مياسى معندهمش غير معايير مزدوجه اساسا
و آمين يا رب ربنا يرحمها و يصبر اهلها

a mero يقول...

أصبحت العاده هذه الأيام كل مايكون في موضوع جاد أن أصاب بصدمه وقرف وأكتئاب من الأعلام و ردود الناس وأن أجد التعزيه في أفكار بعض العقلانيين ومنهم البوست بتاعك.
أخيرا في حد انكلم علي ان المشكله في مقتل انسان مصري وان فكر التعصب الديني بالتأكيد ليه دخل في الموضوع ولكنه مش الموضوع كله .لكن مش هو ده الفكر اللي بيتنشر لكن الموضوع تحول الي استثارة مشاعر من ناحيه دينيه بحته لدرجة اني سمعت للأسف ناس بتقول في المظاهره "لا اله الا الله الألمان عدو الله" ما هذه السخافه وهل من المعقول ان اصف شعب بأكمله هكذا (مع اعتراضي اني لا أفهم حتي الآن كيف يكون الأنسان عدوا لله) لم أسمع الشعب الألماني يعلن الحرب علينا بالرغم من مقتل العديد منهم في حادثة الأقصر الشهيره.
ما حدث كان عمل فردي من شخص متعصب مجنون ولكنه بالتأكيد علامه علي ازدياد التعصب لدي الشعوب الغربيه.
كل من حول القضيه لخدمة أفكاره الشخصيه هو اهانه لأنسانية مروة المصريه قبل كل شيء وكل من سخر منها فهو فعل حيواني غبي.
سامحني علي الرغي الكتير يا عمر بس هي فعلا حاجه تفقع . سلام
A fanatic is one who can't change his mind and won't change the subject.

Winston Churchillbadass1

Che يقول...

ميرا حبيبى
انت فين يا عم و فين رناتك ... انا بعت الارقام على فكره على الايميل بتاعك
بالنسبه لتعليقك فانا مش هازيد عليه كلمه واحده .... كعادتك دائما عاقل و متزن .... تحليلك عجبنى جدا و انت عارف من غير ما اقول انك واحد من الناس اللى انا بستمتع بالنقاش معاها .... و يا عم ارغى براحتك مش هقولك مدونه اخوك انما هى مدونتك
جميل جدا اللى انت كاتبه فى الاخر على لسان وينستون تشرشل ... بس يا ترى الناس دى نسبتها اد ايه فى مجتمعنا دلوقتى
منورنى على طول يا امير و مستنى اشوفك بفارغ الصبر

MaNoOoSh يقول...

الاهانة فعلا لينا كمصريين ان الموقف ده حصل فى المحكمة

وصحيح ازاي كل ده يحصل بدون ما حد من الحراس يوقف الراجل ده

والكلام بتاع الناس اللي شتمتهم دول ففعلا اقل ما يقال عليه انه قلة أدب

البنت اتقتلت علشان لابسه حجاب.. وربنا يرحمها ويثبتها وقت السؤال ويشفي زوجها علشان خاطر ابنها

بجد بجد كل يوم عن التاني المصري بيعرف قد ايه بقى دمه رخيص
وللأسف بإيده حتى لو كان غصب عنه

Che يقول...

منوش
انا ماكنش عندى مشكله ان الاهانه و انهم يعرفونا تحصل لانها بتحصل كل يوم جوة بلدنا و براها ... انما التمن اللى اتدفع عشان نعرف كده المره دى غالى أوى
الناس اللى انا شتمتهم مش هاتكلم عليهم تانى عشان مش عايز اشتم تانى
ربنا يرحمها و يثبتها عند السؤال و يصبر اهلها
نورتينى يا منوش

micheal يقول...

متفهم وجهة نظرك في طرح الموضوع يا تشي بس أنا أكتر حاجة شاغلة بالي هو رد الخارجية المصرية وقيمة التعويض لاننا لو سكتنا المرة دي يبقي ده حيتكرر للمصريين في كل حتة
يعني أنا أصلا من الأول مندهش من التعويض الهايف اللي حكمت به المحكمة علي الراجل العنصري نتيجة ألفاظه العنصرية ضد كروة
طب تخيل معايا لو مروة طلعت قالت في ألمانيا أن هتلر موت 5.5 مليون يهودي بدل 6..كان حيبقي ازاي الحال بقي
تحياتي

Che يقول...

مايكل
الداخليه مش هتعمل حاجه يا عم .. كانت عملت قبل كده ... حكايه التعويض انا برضه مستغرب منها زيك
و لو هى كانت قالت اللى انت بتقوله على اليهود مش هاقولك كانت باعت عيالها انما كانت البلد كلها باعت معاها
نورتنى يا مايكل

سمكه واحده يقول...

بص انا دمي محروق زيك والله ومش لوحدي يمكن كل المصرين كلنا كمصرين ومسلمين
بس اللي يغيظك ان مش في ايدينا حاجه غير حرقه الدم والدعاء
الموضوع ده بيفتح الكلام لقضايا كتير اوي اوي
اسكندريه كانت مقلوبه وسبحان الله تشيع الجنازه كان فظيع يابختها والله شهيده طبعا واللي يقول غير كده يبقي حمار
الواحد مش عارف يقول ايه ولا ايه
وكلنا مقدرين اللي انت بتقوله ناس عاوزه ضرب النار والله جتهم الف خيبه
ربنا يرحمها ويثبتها
ويهدينا بقي يااااااارب ويصلح حالنا
بجد مش عارفه اقول ايه انا همشي
سلام

سمكه واحده يقول...

عاوزه اسال سوال واحد بس بجد
نفسي حد يرد عليه
احنا ليه بقينا رخاااص اوي كده!!!!!!

Che يقول...

سمكه
انا مكنتش فى اسكندريه بس شفت الجنازة ... ربنا يرحمها و يصبر اهلها
و بالنسبه ليه احنا رخاص ... عشان احنا جوة بلدنا ملناش تمن فطبيعى نبقى ملناش تمن براها
نورتينى يا سمكه

*البت المشمشية *حلوة بس شقية * يقول...

عموووووووووووووووووووور
ان امعاك ياريس
بس فيه منهم ناس كتير بتفهم
وناس عندهم الفكرة اننا ارهابين

Che يقول...

شوشو
فينك يا بنتى مختفيه من زمان كده ... على كل انا معاكى فى اللى انتى قلتيه ده ... بس الفكره احنا عايزين نغير الصورة دى ولا لا
ابقى بانى على المسنجر شويه يا شوشو
نورتينى يا شوشو