الأربعاء، 1 يوليو، 2009

و منين يا بلدينا ، و بلدكوا ايه ..... احسن ناس

بعد النكد بتاع البوست اللى فات قلت اغير الموود شويه و اتكلم على حاجه لذيذه .... طبعا كلنا عارفين ان كل بلد او محافظه عندنا ليها حاجه مشهورة بيها .... يعنى مثلا المنيا ( و انا قلت ابتدى بيها عشان بلدى و محدش يقول انى هاتريق على الخلق و انسى نفسى ) مشهوره بأنها بدل زينب ..... و حكايه زينب دى حكايه ، بيقولك فى بدايه ما عملوا السكه الحديد واحد راح هو و بنته عشان يقطعوا تذكرتين ، المهم الكمسارى بتاع التذاكر قاله التذاكر خلصت يا حاج .. الراجل مصمم يسافر و الكمسارى عمال يقوله مفيش تذاكر , و الراجل فاكر ان الكمسارى بيلاوعه و مش عايز يديله ... قام تفتق ( حلوة تفتق دى ) ذهنه عن فكره عبقريه .... قال لبنته حبى عمك يا بت يا زينب ، و الترجمه يعنى بوسى عمك يا بت ... الراجل قال يغرى الكمسارى بأى حاجه .... الله يجحمه بوظ سمعه المحافظه كلها و من يومها المحافظه معروفه ببلد زينب
نسيب المنيا و ننقل على حته تانيه .... طبعا ناس كتير عايشه فى القاهرة و الجيزة و ميعرفوش ليهم بلد .... بتوع القاهره بنقول عليهم طرد بلاد و بتوع الجيزة بأه هما الجيزاويه .... يعنى جاره رابعه ... يعنى السوبر جيت و عمر افندى القديم و الميدان و فول المانش ..... يعنى شارع البحر الاعظم و كازينو الحمام ( الحمام اللى بيطير مش الحمام اللى هو بيت الراحه ) .... يعنى المنيب و موقف الصعيد و عايزين نفر عشان نطلع .... يعنى طموه و الحوامديه و البدرشين و ابو النمرس و كمل لاخر الخط يا استاذ .... يعنى ارض اللوا و ابيض و ناهيا .... يعنى بولاق و ادب بولاق و احلى تحيه لشباب بولاق .... يعنى امبابه و البصراوى و احترس نفسك ... و عموما دول فى الجيش من اسوأ الناس اللى تعرفهم
محافظه المنوفيه ... طبعا مش هقول مشهورة بأيه لانكوا عارفين ( مشهورة انها بلد 2 روساء مش انها بلد البخل ... ده حتى قمه الكرم انها ادتنا اخر رئيسين و يمكن تدينا التالت ) ... و سمعنى السلام الجمهورى
الشرقيه .... البلد اللى عزموا القطر ... و دى على فكره حادثه حقيقيه ... فى يوم من ايام رمضان ايام العز بتاع الزمانات ( مش العز بتاع الدخيله ) الناس طلعوا ساعه ادان المغرب و وقفوا ادام القطر و خلوا الناس تنزل و تفطر معاهم غصب و اقتدار ..... حاجه كمان كانوا مشهورين بيها و اسمها تحويد العروسه و العتبى على يوسف ادريس ... ان زمان لما كانت العروسه من بلد و العريس من بلد كان اهل العروسه و كل بلدها يطلعوا معاها عشان يوصلوها بلد العريس ( نوع من الفشخره الكدابه المتأصله فينا من زمان ) ... طبعا فى طريقهم هيعدوا على بلاد تانيه لو بلد العريس مش لازقه فيهم ... قوم ايه ... اهل البلد التانيه دول يقطعوا عليهم السكه ( مش عشان السرقه و الاغتصاب زى ايامنا السودة ) ... لا ... انما عشان برضه يعزمهوهم عندهم كنايه عن الكرم ( مش بقولكوا فشخره كدابه ) .... و عنها يا سيدى اهل البلدين يقعدوا يتخانقوا ... لو بلد العروسه فازت يكملوا الطريق و لو اتغلبوا امرهم لله يقعدوا و ياخدوا واجبهم و خلاص ... اطيب ناس عندنا فى مصر الشراقوه دول مش عشان بلد امى انما عشان دى الحقيقه
نيجى بأه للقليوبيه ... و سمعنى اجدع سلام لشبرا الخيمه و كريستال عصفور و يا نجفك يا قليوبيه ... بلد حلوه .... فيها القناطر و المراجيح و خد حبيبتك ادامك على العجله بس ماتلزقش أوى يا عسل و فيها كمان بلد هى اصل كل بتوع الفطير و الفطاطريه فى مصر بس انا مش فاكر اسم البلد .... و كمان ماينفعش ننسى بنها العسل .... اكتر حاجه بتضايقهم لما الناس بتقول عليهم القلابوة ... عشان احنا ببنطق القاف همزة و صباح قله الادب
خش على المنصورة .... بلد الزحاليق ... اولها مصنع صابون و اخرها ( مش هاقول ) ..... بس سيبكوا احلى بنات فى مصر هما بتوع المنصوره .... لدرجه انه كان فيه واحده زميلتنا كانت بتقول انها من المنصورة و احنا مش مصدقين عشان هى مش حلوه أوى ( و الحلاوه حلاوه الروح .... روح على رأى ميلودى ) ... المهم الموضوع كبر فى دماغ البنت و جابتلنا بطاقه ابوها و فعلا مكتوب فيها انهم من المنصورة .... طيب نحلها ازاى .... بسيطه ..... قلنالها ان العسكر الفرانسويه وقفوا عند البلد اللى قبل بلدهم و مدخلوش بلدهم عشان كده هما مش حلوين
نيجى لخط القناه السويس و الاسماعيليه و بورسعيد .... بورسعيد بلد السوق الحره و الشيكولاته المستورده و سمعنى سلام احلى طقم فيكى يا جمهوريه و فى ناس بيقولوا انهم غدارين و واخدين طبع التجار ( غصب عنهم طبعا ) و سلملى على ابو العربى ياولا يا حمو ... السويس بلد الجمبرى السويسى و تاكل احلى سمك بربون منها ... الاسماعيليه بلد المانجه ..... و عموما خط القناه كله بيقولوا عليهم .... ميه مالحه ... و كملوا انتوا الباقى
اسيوط .... دى المقابل فى الصعيد للمنوفيه ... ابخل ناس فى الصعيد .... بلد الويكه ... و صباح النداله و البيعه .... الاسايطه بيقولوا علينا احنا المنياويه مش صعايده اصلا و احنا نقولهم لا دى بنى سويف اللى مش صعايده ( معلش بأه جت فى بنى سويف ، بس يعنى اكدب ) و نقول عليهم انهم بخله و معندهمش عزيز
سوهاج .... البلد اللى بتقلب الجيم دال ( مش هى البلد دى انما البلد اللى دنبهم ) .... ناس فى حالها و ملهمش حس .... بس بجد اللى نفسه يشوف الدماغ الصعيدى على حق عنده اسيوط و سوهاج
بنى سويف ( البلد اللى قلنا عليها من شويه مش صعايده ) و فى ناس بتسميها اسم تانى بس مش هقدر اقوله ، بس ليه علاقه انهم معاهم معاهم ، عليهم عليهم ... و بأه ليهم منطقه مستقله فى التجنيد ( ابسطوا يا عم مش هتيجوا الجيزه تانى ) ... و صباح الحمام الاوليمبى و سمعنى سلام الرياضه و العقل السليم فى الجسم السليم
الفيوم .... يعنى محافظه الكتاكيت .... يعنى بلد المانجه اللى اسمها بيض العجل ...... يعنى بحيرة قارون ... و كفايه كده عشان امير صاحبى منها
دمياط ... بلد المشبك و العفش و صباح الناس اللى عايزة تتجوز .... و اطلع على راس البر و شوف الشواطئ عامله ازاى ( انا مش عارف نضفوها ولا لسه زى ما هى ) .... بس خلى بالك من تسوس الاسنان و انت بتاكل المشبك اللى غرقان عسل و خدها نصيحه من واحد لسه حاشى نص دسته ضروس
قنا ... مدد يا سيدى عبد الرحيم يا قناوى ..... و سمعنى احلى سلام للقلل و سلامى لكل الاخوه اللى شغالين فى الغردقه و من قنا و على فكره دول تقريبا اكتر من تلات اربع الناس الشغاله هناك ، يعنى عاملين جاليه ابناء قنا فى الغردقه
اسوان ... بلد السمان الاسوانى و البلطى اللى على ابوه اللى خارج من بحيره ناصر و الحنه السوده مش الحمره ( و الحمره دى تبقى .... ايد القرد و محدش دماغه تروح لبعيد ) و سمعنى سلام الفول السودانى و معاها سلام حتشبسوت و كل الفراعين
مرسى مطروح .... و شط الغرام و صخره ليلى مراد و سمعنى سلام اللب الابيض عشان سمعنا سلام الفول السودانى فوق
السلوم و خلى بالك من التهريب و السجاير المضروبه بتاعت ليبيا ... و سمعنى سلام قناديل البحر
اسكندريه ... و مهما قلت مش هاوفيها حقها .... اسكندريه ماريا ... يعنى الرمل و بير مسعود ... يعنى القلعه و لو ليك فى العلم متحف الاحياء البحريه ... يعنى سيدى بشر قبلى و هريسه احمد حسنين .... يعنى ابو قير و كل المشوى اللى لسه طالع من البحر يا استاذ ... يعنى ميامى و العجمى و المنتزه .... يعنى ابو خروف و غيط العنب و عايزين واحد عشان الكارو تطلع يا جدعان ..... يعنى زنقه الستات و خناقات الستات هناك ( و على فكره لما بيتخانقوا بيقلعوا ملط و لو راجل خش فض بينهم ) ... يعنى امشى على الشط و يا رب تقابل حد هيدبح ترسه و تاخدلك كبايه ( بيقولوا بتشفى من الروماتيزم و فياجرا طبيعى و ادعى لعمك فى ساعه رضا ) ... يعنى بنات اسكندريه اصل الدلع و اللى يودوك البحر و يرجعوك عطشان ( ده لو رجعت اصلا ) .... على فكرة و دى بجد الامام الشافعى قال من لم يتزوج مصريه فقد مات اعزب ، بس دى حوارها طويل .... اسكندريه يعنى تشرب عصير خروب قدام الجامعه بدينك و انتى مستنى المزة بتاعتك .... اسكندريه و كلامى يطول عليها و مش هيخلص .... و نظره يا مرسى يا ابو العباس مددددددددددددددد
سينا .... يعنى صباح البانجو و العرانيس الاصلى .. يعنى البدو و الرحلات اللى فى الصحرا ( بس خلى بالك من بوليس الاداب ... و بوليس المخدرات بالمره ) ... يعنى سانت كاترين .. بس ابقى خد بطانيه و انت طالع عشان الجو تلج فوق ، و خد فلاتر للكاميرا عشان الصور بتاعتك ماتتطلعش محروقه و انت بتصور شروق الشمس ... و ماتنساش تدعيلنا من فوق
اللى دخل الجيش ... او المدينه الجامعيه .... او من بلد انا نسيت اقولها او قولتها ... يبعت يشاركنا ... بس اللى هيشتم يقول بلده ايه عشان اعرف انا قلت ايه عليها .... و فى الاخر احلى بلاد الدنيا بلادى .... انا مصرى و ابن مصرى و ابن مصر الله عليه ( الله يا ست نانسى ) .... سلام

هناك 37 تعليقًا:

الشعب لابد له من حكومه تشكمه يقول...

مممممممممممم انا المنصوره وتفسيرك لجمال بنات المنصوره غلط على فكره لانه مش علشان الفرنساويين زى مكتير بيقولوا لكن لو نزلت عندنا وسألت هتعرف ان اغلب العائلات بتمتد بأصول تركيه,ودول برضه معروفين بالجمال ومعروف زمان ان الاتراك كانوا عايشين فى المنصوره.
انا كنت فى سكن طالبات نسيت بتوع كفر الشيخ والفسيخ:)

Che يقول...

شيمو
معلش على تفسيرى الغلط لجمال بنات المنصورة .. بس يمكن عشان الشائع ان سبب الجمال هما الفرنساويين ... بس برضه الاتراك حلوين
مكنتش اعرف حكايه الفسيخ و كفر الشيخ بس طول ما الواحد عايش بيتعلم
نورتينى يا شيمو

adel يقول...

ايه ياعم البوست الجامد ده :):)
ههههههه
والله فكرتني
انا كمان بموت في اسكندرية
بس نسيت في القاهرة المقطم يعني الكورنيش يعني ميدان النافورة يعني كشك سمسم و شمعني شريط عمرو دياب الجديد

و بعدين انا ابويا اسيطي و انت كده بتلعب في عداد عمرك :):):):)

Che يقول...

عدول حبيب قلبى
انت فين يا عم مش باين و مختفى كده و قاعد تحت الرادار ... ربنا يخليكى على مجاملتك الحلوة يا عدول
كلنا بنموت فى اسكندريه و اللى ميحبش اسكندريه يبقى الغلط فيه
و بالنسبه لموضوع المقطم و الكورنيش و ميدان النافورة يبقى انت كده بتتكلم على ..... ولا بلاش
بالنسبه لوالدك معلش يا عدول جت فيه .. بس انا طلعت كويس و قلت على الويكه بس و مرضتش اقول على الملوخيه الناشفه
نورتنى يا عدول

MaNoOoSh يقول...

حلو قوي البوست ده
انا سخسيا خليط من المنصورة على الجيزة

وعلي فكرة بنات المنصورة مش بس حلوين
لا
دول جدعان جدااااا كمان

Che يقول...

منوش
انتى فين يا جميل و مش باينه و ليكى كتير مش بتعلقى ... لعل المانع خير
مبسوط ان البوست عجبك ... و اجدع سلام للمنصورة و الجيزة سوا
و طبعا بنات المنصورة جدعان و انتى اصدق مثال على كده
نورتينى يا جميل

magi يقول...

حلوه الجوله الحره فى مصر دى بس انت نسيت جنوب سينا وشمال سينا وطنطا وبلاد تانيه مش فكراها

Che يقول...

ماجى
كويس ان الجوله عجبتك ... بس انا اتكلمت على سينا كلها مش هاقعد افصصها بأه ... انما طنطا عندك حق فيها ، بس ملحوقه
نورتينى يا ماجى

a mero يقول...

ازيك ياعموره
انا خليط بين الوجه البحري (الفيوم) و الوجه القبلي (المنيا) رمزا لتحالف قوي الشعب المصري.
بعد ما قريت البوست ده افتكرت اول مره رحت البلد واحد بيسألني انت فين في القاهرة فقلتله شارع الهرم فرد "ياخوفو من الحاجات دي".
بوست جميل جدا ودايما للأحسن

دون كيشوت يقول...

بووووووووست جامد ياعمرو كعادتك دايما

Che يقول...

امير حبيب قلبى
الايميل وصلك ولا لا يا عم ؟ ... جميله أوى فكره التحالف بين قوى الشعب دى ، حتى بتوطد العلاقات بين المحافظات الشقيقه ( حلوة توطد دى يا ميرا ) ... و بعد ما قالك يا خوفو .. انت قلتله ايه سليل الفراعنه ده
منورنى على طول يا ميرا

Che يقول...

ندور باشا
يا عم يا عم ... كل ما ادخل مدونه الاقيك سابقنى يا عم نادر .. ده ينفع برضه
ربنا يخليك على مجاملتك يا حبيبى
منورنى يا نادر دايما

زهور الامل يقول...

أنا سحلانة سحلانة سحلانة منك اوي يا عمرو
علشان انت بتوقل ان بتوع المنصورة حلوين علشان الفرنسيين
بالعكس بقى ده احنا اسرنا لويس التاسع عندنا في دار ابن لقمان بعيد عن كل الستات وكمان مش ضيفناهم في بيوتنا طبعا انت فاهمني
وبعدين انا من المنصورة واصلي تركي ومعظم المنصوريين اصلهم تركي وانا حلوة اهو ونغشة وزي القمر ( وش مطلع لسانه)
وبعدين الجمال جمال الروح والقلب وليس الشكل
انا سعيدة اوي بالجولة الجميلة اللي انت عملتها دي باتوبيس مصر للسياحةهههههههه وانا استفدت معلومات كتير اوي مكنتش اعرفها عن المحافظات وفضايح المحافظات كمان
وانت عارف بقى اننا شعب بنومت في الاشاعات والفضايح هههههههه انا بهرج
دومت بكل خير

Che يقول...

زهور
انا مقدرش على سحلك والله يا زهور ، و بعدين مش انا اللى بقول و الله دى مصر اللى بتقول ... ههههه
و طبعا انا عارف ان انتوا اسرتوا لويس التاسع ... بس برضه عارف ان انتوا اسرتوا عسكر كتير و منهم شويه اسلموا و اتجوزوا مننا .... و والله زى ما قلت لشيمو انا مكنتش اعرف حكايه الاصول التركيه دى بس ادينى عرفت و طبعا انا عارف انك حلوة و نغشه و زى القمر اهو ( وش بيجامل ) ... هههه
مبسوط ان رحله اتوبيس مصر للسياحه عجبتك .... و بالنسبه للفضايح فانا قلت اللى ينفع اقوله منها مش كلها ... يعنى انتى عارفه ان فيه حاجات مينفعش تتقال
نورتينى يا زهور

مياسي يقول...

الصراحه احلى وحده اللي بتحكي عالمنوفيه

معظم البنات اللي عرفتهم كانوا من المنصورة؛ البنت فيهم اللي مش حلوه كتير بتحس عندها مشكله لأنها من المنصوره المفروض :)

*البت المشمشية *حلوة بس شقية * يقول...

ايه ياعم نسيت اهم حاجة فى بنها العسل
ان شوشو منها

Che يقول...

مياسى
عامله ايه يا قمر .... و طبعااحلى واحده اللى بتحكى عن المنوفيه ولا انتى عايزة تودينا امن الدوله ولا ايه
و والله انا عارف الاحساس بتاع بنات المنصورة اللى مش حلوين مع الاعتراف ان الحلاوة حلاوة الروح
نورتينى يا قمر

Che يقول...

شوشو
معلش يا شوشو سامحينى على ذاكرتى الخربانه .... و انا من منبرى هذا اعلن ان شوشو من معالم بنها العسل
نورتينى يا جميل

سارة نجاتى يقول...

هههههههههه
ايه يا عمرو ده ؟؟ أنا قلت الولد ح يطلع زفة متعددة الجنسيات

بس هو ده الكلام ع الاسكندرية بجد , أنت اتكلمت عن الاحساس فيها و ده حقيقى , بس الهريسة دلوقتى بقت أحسن عند طلعت على فكرة , تلاقى منه فى بحرى و محطى الرمل هههههههه

سلامات

Che يقول...

سارة
كان نفسى ابقى كده يا سارة بس الحقيقه انى لافف شويه زياده عن الناس العاديه
و بالنسبه للكلام اللى انا قلته عن اسكندريه انا مش عارف انتى قصدك على انى كلام بس كله حقيقى و النعمه ... و كويس انك قلتيلى على طلعت .. المره الجايه ابقى اجيب منه هريسه
نورتينى يا جميل

sandy يقول...

اه ده كلو يا ميرو البوست ده جامد اوى بس متكلمتش ليه عن القاهره وبناتها والكورنيش وسهرها اه مش عجباك معانك منهاالمهم البوست ده عجبنى موت وعوزاك تتكلم اكتر على المنياويه

micheal يقول...

يخرب عقلك..بوست في الجون وحواديت مسلية جدا من أول زينب لحد بنات اسكندرية
ايووووووووة يا جدع بتجيب الكلام ده منين
عن نفسي مش بطيق الاسماعيلية بسبب جمهور الاسماعيلي وطبعا بلد الريس دي أساسي
:))
تحياتي

Che يقول...

ساندى
الكلام على القاهرة و الجيزة و اسكندريه عايز 100 بوست مش بوست واحد و وعد منى هاتكلم عليهم تانى
الطلب التانى بتاع الكلام على المنياويه اكتر من كده ده مقدرش اعمله .... يطخونى يا ساندى
نورتينى يا جميل

Che يقول...

مايكل باشا
عامل ايه يا مايك يا حبيبى و اخبار الانترفيوهات معاك ايه ... ربنا يخليك و انا مبسوط ان البوست عجبك
الحكاوى اللى فى البوست و اكتر منها كمان جبتها من كتر اللف و الدوران و من كتر الناس اللى انا عرفتها من كل بلد
و بالنسبه للاسماعيلى ... بصرة
اما بلد الريس فحرس يا مايكل لحسن انا سامع ان امن الدوله شادد حيله اليومين دول
نورتنى يا باشا

Zika يقول...

الا قولي يا عمرو
انا واخد بالي ان كلمة اسوا ناس تقابلهم في الجيش جت بعد امبابه
وبحكم اني من امبابه
انت تقصد ايه يعني الجيزه عامة ولا امبابه
ولا انت رجعت للتعميم تاني هههههههههه
بس حلوه الرحله دي يا حج
نزلني بقي علي جمب لو سمحت

Che يقول...

زيكا باشا
كلمه اسوأ ناس دى انا قصدى بيها على الجيزة يا ريس مش على امبابه ... و انا اقدر اقول حاجه على امبابه و انا عارف ان زيكا منها ... ده حتى ابقى قليل الادب .. ههههههه
و اى خدمه يا عم على الرحله و المرة الجايه انت الكرسى بتاعك محجوز كده كده
نورتنى يا باشا

سمكه واحده يقول...

ايوووووووووووو يا جدع علي الكلام
ايه الحلاوه دي
لعلمك بقي انا سبت كل البلاد وقريت عن اسكندريه بس عنصريه بقي
طب ده حتي بنات اسكندريه اخر جدعنه ياشيخ حرام عليك
بس بردو عند راي من اجمل بنات مصر بنات المنصوره اجمل وارق بنات
اهو ياله ياعم بس اللي اعرفه وكل مصر تعرفوا
انه عشان الحج نابليون عمل شغل جامد اوي الله يباركله مش كان يعدي نوحينا شويه منه له بقي
اول مره اعرف ان اصلهم تركي ومالوا الاتراك زي القمر بردو
عموما المنصوره كلها زي القمر
واسكندريه جميييييييييييله مش عشان بلدي بس انا بحبها
وليا عوده تانيه اشوف كل المحافظات
اخبراتك ايه يا عم عمرو
تحياتي

سمكه واحده يقول...

ههههههههههههههههههه
بيقلعوا ملط ايه يا جدع انت حرام عليك طب وحياتك كنت في الزنقه من كام يوم وكان في واحده بتتخانق مع واحده ووقفت اتفرج العيال اصحابي شدوني من افايا بس ادتها بالشنطه علي وشها لكن هدومهم عليهم ياعم حرام عليك بس الحق يتقال محدش سلك بينهم
وبنها العسل عسل بردو
بص انت قلت كلام كتير علي المحافظات كلها روح ياشيخ الله يباركلك
وبردو هدعي علي عمك نابليون لو كان جه نوحينا شويتين

Che يقول...

سمكه
انتى فين يا بنتى و فين اراضيكى و بحارك .... مش باينه خالص و مفيش جديد على المدونه و الواحد مش عارفلك ايميل يطمن بيه عليكى
اسكندريه طبعا اجدع ناس ... و بالنسبه لبنات المنصورة انا عارف زيك اللى كل مصر عارفاه ، بس ده ميمنعش ان الواحد بيتعلم حاجات جديده و على رأيك برضه الاتراك حلوين .... اما حكايه خناقات الزنقه فاسألى انتى عليها هتلاقيها صح .... ده انا شفتهم بعينى ( وش مكسوف ) ... و بعدين كفايه دعا على نابليون ، يعنى الراجل عشان بوست كتبته بعد ما مات بزمن هنقعد ندعى عليه
نورتينى يا سمكه و ماتغيبيش كتير أوى كده و لازم تلاقى طريقه تطمنى الشعب بيها عليكى

salwaa يقول...

حواديت جميله ودمها خفيف ولكنى من زمان اعرف ان حكاية زينب هى عن بنى سويف لما قال للكمسارى تذكره لى ولزينب اختى يا فاندى فقام الكمسارى بتقبيل زينب اخته .فقاله باستك العافيه يا فاااندى..
على العموم كل المصريين شعب خانع وطيب وعلى راى المنوفى شريطين على كتفى ولافدان عند امى ..
موضوع جميل وجرىء..

Che يقول...

سلوى
اولا اهلا بيكى لاول مرة و يا رب ماتكونش الاخيره
تانى حاجه شكرا على تعليقك ... انما بالنسبه لحكايه زينب انا باسمعها من ايام ماكانوا العيال بيعايرونى بيها ايام الشقاوة ... يمكن زينب بتاعت بنى سويف غير زينب بتاعت المنيا
بالنسبه لنقطه ان كل المصريين شعب خانع فانا مش متفق معاكى فى النقطه دى انما الحقيقه انه شعب طيب لدرجه غير معقوله و عنده كميه من التسامح مش موجوده عند اى حد تانى .. بس حكايه خانع دى نختلف حواليها
جديد المثل ده و اول مره اسمعه
نورتينى يا جميل

Haytham Alsayes يقول...

السلام عليكم
علي فكرة انا اول مرة اخش مدونتك بجد رائعة والبوست جميل وعجبني اسلوبه اما بنات المنصورة مش كلهم حلوين علي فكرة ههههههه
تقبل تحياتي

Che يقول...

هيثم باشا
و عليكم السلام و رحمه الله و بركاته واهلا بيك اول مره فى خمسه جد و انت كنت شرفتنى قبل كده بس فى واحد جامعه
اشكرك على تعليقك .. و بالنسبه لموضوع بنات المنصورة انا عرفت كده .. بس خلى بالك عشان البلوج مترشق بنات حلوة من المنصورة و احترس نفسك
على فكره انا كنت لسه حالا بأبص على مدونتك الفردوس الضائع .. هاقرى و اسيبلك تعليق معتبر مش نعليق و خلاص لان تعبك باين فى البوست
نورتنى يا باشا و مستنى الزياره الجايه

غير معرف يقول...

اول حاجه انا من المنيا وى
وى بعدين الناس ال كانت بتعايرك ليه ما حولتش انك تغير رايهم وى موش انتا بس كول المتياويه انا بضايق قوى لما حد يقولي يا بلد زينب وى في ناس تيطلع اشاعات كتير وى يستهزؤو بي رجوله المنياويه وى يقولو ان زينب دي كانت معه جوزها في القطر راح خمسه بي سلاح هددو الراجل وى اغتصبو زينب قدام جوزها بس انا موش بيهمني كلام الناس وى بواجه اي حد يقول علينا كدا وى قمة الثقه ان تصمت عندما يثتهزك بك الاخرون لانهم يعرفون من هم وا من انتم وى المنيا ما جابتش غير رجال اقويا وى العالم يعلم بي ذلك وى احذرو غضب الاسود غضبو وى مركزي اشهدلو انو كولو رجال اقويا وى باقي المراكز المنيا

غير معرف يقول...

والله انتى كلامك صح انا من المنصورة وطنطا واصل عيلة ابويا فرنسي و امى تركى وهم الى اتنين من طنطا والمنصورة برده انا كنت عاوز اتاكد من حاجة فعلا طنطا والمنصورة كانوا بلد وحده اصل فين ناس كتير بتقول ان هم كانوا بلد واحده وانا كمان سالت ناس كتير الرد بتعهم كان ب نعم حتى الاستاذ بتاعى كان بيقول ان هم كانوا بلد واحده

سنيوريتااا يقول...

انا كمان من المنصوره بس عايشه ف سينا بس عاوزه اقول ان بنات المنصوره مش بس حلوين دول ملكات جمال كان نفسي أعيش فيها بس الظروف بتخلينى بروحها كل اجازه بس وبصراحة سينا بلدى اللى اتربيت فيها وعشت ع تقاليدها وبحبها لأن ذكرياتي كلها فيها

Che يقول...

بنات المنصورة حاليا مش على نفس مستوى الجمال من 10 سنين مثلا يا سنيوريتاا