الأحد، 4 أكتوبر 2009

تطبيق الموديل

اتكلمت فى البوست اللى فات على موديل كابلر-روس و اللى بيوصف خطوات الحزن و شرحت كل خطوة بالتفصيل ... يمكن مش تفصيل أوى ... بس تفصيل كفايه انه يدى فكره شامله عن الموضوع
انا هتكلم النهارده عن نفسى شويه .... ايام الكليه كنت واحد من افشل الناس فيها ... قعدت 10 سنين لغايه ما اتخرجت .... و كنت و ما زلت حالف ان الشهادة الكرتون لما اخدها هاعلقها فى الحمام عشان ده مقامها عندى ، بس انا لغايه دلوقتى لسه ماخدتهاش ... الظاهر ربنا مش رايدلها انها تتعلق هناك ..... بدايه التغيير اللى حصلى كان و انا فى سنه تالته أول سنه .... ذاكرت كتير و فى الاخر سقطت السنه على ماده ... طبعا الناس بتوع تجاره و حقوق و آداب هيبقى عندهم الكلام ده عادى لان السنه عندهم 10 او 11 ماده بالكتير .... احنا بأه الترم عندنا 12 او 13 ماده .... يعنى من مجموع 25 ماده انا عدت السنه كلها عشان ماده زياده .... ساعتها ابتديت اطبق موديل كابلر-روس من قبل حتى ما اعرفه ..... دخلت فى حاله الانكار طول السنه و عمال اذاكر على اساس انى ناجح و انى بمعجزة هينجحونى السنه و اطلع رابعه لما اخلص الترم التانى ... شويه و لما السنه خلصت دخلت فى مرحله الغضب و مبقتش طايق نفسى و لا طايق الكليه ... و دى كانت الفتره اللى حلفت فيها انى هعلق الشهاده فى الحمام لما اخدها .... بعديها دخلت فى مرحله المساومه و الترجى ... انى مستعد اعمل اى حاجه عشان اطلع لسنه رابعه .... ويا لهوى على الايام اللى ندرت انى هصومها و الصلاه اللى ندرت انى هصليها .... و مع كده مطلعتش رابعه برضه ..... بعد كده دخلت فى الخطوة الرابعه ..... خطوة الاكتئاب ..... مابقاش فى حاجه فارقه معايا فى الدنيا .... و لا اى حاجه بتهمنى ..... الخطوة دى انا طولت فيها أوى زى ما طولت فى سنه تالته كده .... سبت الكليه اصلا و مبقتش بنزلها .... و شويه و سبت البلد كلها و سافرت و مكنتش ناوى ارجع تانى ... الغريبه انى لما سبت البلد مقلتش لحد من صحابى انى ماشى .... و لا سلمت على حد .... كنت بعتبر صفحه الكليه بالناس اللى عرفتها فيها فصل و اتقفل فى حياتى خلاص ..... لغايه دلوقتى مش عارف ايه اللى رجعنى فى الغالب انى رجعت عشان امى ..... المفروض بعد كده انى ادخل فى الخطوة الخامسه و هى خطوة قبول انى سقطت و ابتدى اشوف اعمل ايه .... بس والدى تعب فى الفتره دى .... و بعديها بشويه ربنا رحمه من تعبه و توفاه .... دخلت الدايره دى تانى من الاول
بعد كده خلصت الكليه ..... عايز اقولكوا انى ماحستش بفرحه غير فى اول يوم عرفت فيه انى خلصت بجد ..... بعد كده الموضوع كأنه عادى ..... الغريب انه فيه ناس كتير اعرفها و كانت ظروفها زى ظروفى حست بنفس الاحساس ..... مجرد الفرحه مش عشان خلصنا .... انما عشان خلاص اترحمنا من القرف و القلق بتاع الكليه .... مش عشان الشهاده اللى احنا خدناها فى حد ذاتها ... مش عارف اوصفلكوا الاحساس ده ازاى ..... انا لغايه دلوقتى فاكر كلمه بلال صاحبى قالهالى لما خلصنا الكليه ..... قالى يا عم عمرو احنا هنفرح على ايه .... يا عم شوف سننا بأه كام .... ايام الكآبه دى انا كان عندى 26 سنه ...... و فعلا كان كلامه صح .... يمكن مش صح مطلق بس فعلا صح
مرحله الاكتئاب دى دخلتنى فى حاجه جديده ..... انا قلت انه معدش فيه حاجه فارقه معايا ولا حاجه تهمنى .... الكلام ده انا مكتشفتش مدى صحته غير لما بصيت لحياتى تانى .... الناس اللى كانوا اصحابى مابقوش فارقين معايا يعرفونى ولا لا ..... ده بغض النظر عن الحاجات اللى انا عرفتها بعد كده عن الناس دى و خلتنى اعرف انهم ماكنوش صحاب مخلصين بالدرجه دى او ماكنوش صحاب اصلا ، بس ده مش موضوعنا ..... اهلى تقريبا مابقتش بشوفهم ولا حتى فى المناسبات الاجتماعيه و مبقاش فارق معايا يكلمونى ولا لا ، ده طبعا كان ليه تبعات تانيه بس برضه مش موضوعنا ...... عملت لنفسى سور كبير أوى و انا جواه .... مش بخلى حد يعدى السور .... عشان كده مش بستغرب لما حد يقولى انه مش فاهم انا بفكر ازاى .... لانى بطبيعتى الجديده مش بدى حد الفرصه دى اصلا ..... كل الناس اللى بتقرب منى انا ببعدها و بزقها بعيد عنى .... بعمل كده من غير ما باخد بالى ..... انا مش فاكر امتى آخر مره انا ضحكت من قلبى .... بضحك كتير ، دى حقيقه ..... بس مش من قلبى .... بتبقى مجرد حاله من السعاده الوقتيه مش اكتر ولا اقل .... الطبيعى بتاعى انى اكتئب و تجيلى حالات اكتئاب مكلمش حد فيها ..... بس الحالات دى مش بتطول ولا بتيجى كتير ، عشان كده الناس القريبين منى اتعودوا على انى ممكن اغطس و مردش على تليفونات ولا اقابل حد بس بعد كده برجع تانى ....... مش فاكر امتى عملت حاجه انا بحبها و بستمتع بيها ..... حتى القرايه اللى بعتبرها مش هوايه انما عاده ..... العاده دى اتقطعت ..... فى الفتره الحاليه من حياتى انا فى قمه التوهان .... خدت قرارات مصيريه و مش عارف اذا كنت هندم عليها بعد كده ولا لا ..... الزمن بس هو اللى هيعرفنى اذا كنت هندم ولا لا ..... مفيش حاجه فى مكانها بالنسبه ليا
اتكلمت كتير و مع كده مخرجتش كل اللى جوايا .... معلش استحملونى عشان طولت و يمكن اكون نكدت على اى حد بيقرا البوست ده ..... و للناس اللى انا نكدت عليها انا آسف بجد ...... سلام

هناك 19 تعليقًا:

Empress appy يقول...

انا مستمتعه برغم من انى حسه بمراره بس عاوزاك تفضفض

مي يقول...

انت شفت كتير وبالرغم من عدم حصولك على الشهادة فى ميعادها بسبب ظروف او بسبب اكتئاب او ظلم اواواواو
ده ميمنعش انك بتعترف بالوقت ده ومستخبتش من الاحساس ده
بس على فكرة انت مستسلمتش لده وسافرت وفعلا حققت ناس كتير مقدرتش تحققه حتى لو انتظموا فى التعليم وكانوا من اوائل الدفعة
بص قراراتك دى دلوقتىاكيد انت فاهم بتعمل ايه ومادام انت مستريح خلاص
وصدقنى انت بالذات يا عمورة تقدر تبدا من الصفر فى اى مكان وتوصل
لانك دماغك نضيفة هههههههههه
يلا بقى حاااااااااااااااا تقولى ايه؟

زهور الامل يقول...

ربنا يوفقك يا عمرو
وهو وحده قادر يصلح حالك ويخرجك من حالة الياس والاكتئاب دي ويغير مجرى حياتك خالص
بس نصيحة مني قرب من ربنا شوية وادعيه واترجاه وخلي املك فيه كبير

ومتبعدش عن اهلك لانهم هما اللي ليك في الدنيا
قرب منهم وحبهم واشركهم معاك في مشاكلك علشان متحسش انك عايش لواحدك

كل واحد فينا بتجيله ظروف صعبة ويحس انه اتحطم بس الشاطر فينا هو اللي يقدر بعزيمته وقوة ايمانه يتغلب على الظروف دي

تحياتي

adel يقول...

انا مع ااااابي

انا عاوزك تكمل ياواد

وايه حكاية السور دي ؟
عشان كده مش بتسال :)

*البت المشمشية *حلوة بس شقية * يقول...

فضفض يا معلم

الشعب لابد له من حكومه تشكمه يقول...

اى حد فينا مر بدا كله..
فكر كويس جدااااااااا فى قراراتك اللى بتاخدها وربنا ميجيبشندم ان شاء الله لان الندم اقسى احساس ممكن نحسه..
وبعدين لو متكلمتش فى بلوجكك هتتكلم فين؟تكلم نفسى فى الشارع؟؟؟
الكلام بيخفف كتير اوى...
ربنا يريح قلبك وبالك يارب(دى كانت دعوة جدتى ليا وافتقدت الدعوه دى لما ماتت)ادينى قولتهالك اهو

سارة نجاتى يقول...

بص يا عمرو
منكرش أن مفيش حاجة عدلة فى اللى قولتها
بس
اكتئابك سببه أنك لم تسلك نفس الطريق اللى أهلك - مجتمعك متوقع منك أنك تسلكه
يعنى ان كبنت فى البيئة اللى حواليا عشان أبقى ناجحة لازم أعمل الأتى
( أشتغل شغلانة برستيج - أتجوز واحد برستيج - أجيب عيال بأسرع وقت ممكن كأننا بناخد هدية على فيديو الفرح - و يفضل يكونوا بنت و ولد )

لو روحت مثلا قلتلهم أنا عايزه أدرب يوجا و أشتغل مع الاجئين فى السودان
و اجل موضوع الجواز ده
ح يحسوا أنى فشلت بمقاييسهم هما

باولو كويلهو نموذج للفشل فى بدايات الحياة
طلع من الكلية عشان يدرس سحر و شعوذة
تخيل فجعة أمه فيه
و أدمن مخدرات
و لف العالم و هو فقران و نام على الأرصفة
بس قدر يعمل من تجاربه دى حاجة عظيمة
شوف هو سلك طريق غير هذا المتعارف عليه فى النجاح عندنا
بس هو طلع أشطر

معلش أنا رغيت كتير بس كنت حساك مضايق و عايزه أفك عنك
أما بخصوص أنك بتضحك كتير بس مش من قلبك
فأنت شكلك بتتجسس عليا ؟؟ هه؟؟
قول يلا و اعترف

أه , متكلش على هدية عيد ميلاد المدونة انا اتفقت مع زيكا على خاتم سوليتير
شوف أنت بقه لازم تحافظ على برستيجك و تجيب أحسن منه هههههههههه
سلام

Che يقول...

آبى
هحاول افضفض مع انى مش متأكد انى هعرف
نورتينى يا آبى

Che يقول...

مى
موضوع الشهاده ده هتكلم عنه فى البوست الجاى بتوضيح اكتر شويه .... موضوع انى بعترف بالوقت فده طبيعى .... يعنى ابقى راجل كبير كده و اكدب .... ترضيهالى برضه ...هههههه
موضوع ابدأ من الصفر ده الله اعلم بيه ... بس انا حاليا على الشرطه بتاعت الصفر و هبقى اعرفك اللى هيحصل
مفيش حاااااااا
نورتينى يا مى

Che يقول...

زهور
ربنا يخليكى يا رب على دعوتك الحلوه و ربنا يتقبل منك يا رب
موضوع اهلى ده موضوع كبير و يمكن انا مش وضحته كويس ... بس هحاول اوضحه بعد كده و ابقى احكمى انتى و انا قابل حكمك
نورتينى يا زهور

Che يقول...

عادل
والله يا دولا يا حبيبى انا مقصر فى حقك جامد ... و مش انت لوحدك ... معاك زيكا و موكا فى نفس الكفه كده .... بس والله لازم اصلح الغلط ده
و مدام انت مع آبى يبقى اقعد جنبها و استنى لما افضفض
نورتنى يا عادل

Che يقول...

شوشو
هفضفض يا كبيره
نورتينى يا شوشو

Che يقول...

شيمو
بجد تعليقك حلو أوى ..... و بج برضه مهما قلت مش هعرف اشكرك على الدعوه اللى انتى دعتهالى اللى كانت جدتك الله يرحمها بتدعيهالك ..... ربنا يجعل مثواها الجنه و يجمعنا بيها على خير ... و يصبرك على فراقها
نورتينى يا شيمو

Che يقول...

سارة
ضحكت جدا لما قريت تعليقك اللى انتى بدأتيه بكلمه جامده " منكرش انه مفيش حاجه عدله فى اللى انت قولته " صباح الصراحه يعنى .... طيب طبطبى عليا و انا فى حالتى دى .... هههههه
عارفه .... اللى انتى قولتيه فيه جزء كبير صح .... انا مشكلتى انى عايش فى مجتمعين .... مجتمع عايش فيه بجسمى و مجتمع عايش فيه بعقلى و ده سبب من اسباب مشاكلى
طبعا مثال باولو كويلهو مثال مشهور و ممكن نقول كمان يجى 100 مثال زياده عليه
موضوع الهديه بتاعت المدونه ده انا رديت عليه عندك يا سارة و كل سنه وانتى طيبه تانى
نورتينى يا سارة

Zika يقول...

انا حاسس اني شايفك

Che يقول...

زيكا
والله انا فاهم قصدك ايه يا زيكا ... على فكره انا جاتلى نفس الحاله لما قريت البوست بتاع عيد ميلادك ... كان صريح أوى ... موجع أوى ... جميل أوى و صادق أوى .... و كل حاجه فيه أوى أوى ... سيبك انت ... شكلنا اتخلقنا للنكد يا ابو الزيك
مشاركنى الكآبه يا زيكا

بث تجريبي يقول...

حتى وانت مكتئب وشايف انك بتنكد على غيرك
بردو حاسة بالاستمتاع يالقراية ليك
انت هايل.
والدليل على انى مستمتعة بجد بكلامك رغم انى عارفة انك ممكن مش تشوف الكومنت بتاعى ولا تعبر اهلى ببصلة انى بكتب الكومنت ده دلوقتى ومفضية نفسى وعمالة اقرا فى بوستاتك القديمة .
لانى بجد حاسة انى لقيت وسط مدونات عوااا كتير مدونة بجد تنفع تتقرى.
ميرسى جدا

Unknown يقول...

انا حابب اقول اني بقرا البوست ده و بقول انت بتحكيني في الدراسه و فتره الشغل
شجاعه منك انك تتكلم و تقول الكلام ده و تشارك بيه
مشاركتك عامله لي سنده قوية في وقت انا فيه مش عارف انا في انهي مرحله من المراحل الخمسه ولا انا باخد اللفه تاني
ممتن للمشاركه و ليك

Che يقول...

كلامك فرحنى جدا يا مينا و سعيد ان كلامى لسه نافع بعد 5 سنين .. بالتوفيق يا كبير