الثلاثاء، 6 أكتوبر، 2009

انا من تانى

اتكلمت فى البوست اللى فات عن انى وصلت لمرحله الاكتئاب بعد وفاه والدى و معرفتش اخرج من المرحله دى لغايه دلوقتى ..... الحقيقه مش انا بس اللى دخلت المرحله دى و معرفتش اخرج منها .... امى كمان نفس الوضع ..... كل صحابى اللى يعرفونى عارفين ان امى مش قاعده فى البيت ..... الحقيقه انى الوحيد اللى فاهم سبب ده ايه .... هى مش قادره تقعد فى البيت بعد وفاه ابويا ..... البيت ده الاتنين بنوه سوا حرفيا و فعليا .... الاتنين كانوا بيشتغلوا فى السعوديه و بنوه سوا .... انا عندى نفس الحاله .... بس انا الموضوع قلب معايا انى مابقتش اقدر استقر فى مكان واحد ولا استقر على وضع واحد ...... كنت قريت تعبير استخدمه تقريبا دكتور احمد خالد توفيق فى واحده من قصصه " روح قلقه " الحقيقه انى نموذج للروح القلقه دى ..... طبعا بعتذر مقدما لو ماكنش دكتور احمد اللى قال التعبير ده
طبعا فى مرحله الاكتئاب اللى انا فيها زى اى انسان طبيعى بحاول انى اشيل الناس اسباب غلطاتى ... مش بحاول حتى افكر اذا انا غلطان فعلا .... ولا انا حمل برئ على طول الخط .... يعنى مثلا صحابى اللى طلعوا اندال و مش صحابى زى ما انا فاكر .... الغلط كله غلطهم عشان هما لما لعبوا Pick A Side و اختاروا الناحيه التانيه .... ولا ده برضه كان غلطى عشان انا بعد العمر ده كله طلعت مش عارفهم .... و جايز يبقى غلطى عشان انا اخترت غلط من الاول .... موضوع جوازى اللى اتفركش قبل المعاد ب 4 شهور .... كان غلطتها هى بس .... ولا كان غلطتى انا كمان انى مقدرتش اقرى اى علامه من العلامات اللى كنت شايفها .... ماسمعتش كلام كل الناس .... صحيح انا صحابى دول مش فارقين معايا فى حاجه دلوقتى و اصلا بطلت اقول عليهم صحابى و رمتهم من حياتى .... صحيح انى بقول لو ان سفرى السعوديه ماجاش من وراه غير ان موضوع جوازى يتفشكل ده لوحده كفايه و يخلينى احب السفريه دى ..... مش عارف انا انسان طبيعى لما اقول ان ناس اعرفها بقالى 13 سنه مش فارقين معايا .... مش عارف انا انسان طبيعى لما اقول على الجوازه اللى باظت انها هم و انزاح و ربنا بيحبنى لانى دلوقتى متأكد انها لو كانت تمت كانت هتخلص بحاجه من اتنين .... يا الطلاق .... يا انا اقضيها بأه و ابقى دون جوان و اجيبلى غواصه لنزواتى .... هههههه ... حتى فى عز القرف اللى انا بحكيه ده مش قادر ابطل تريقه
يا ترى قعدتى الوقت ده كله فى الكليه مجرد سوء حظ .... او زى ما زيكا قال فيه ناس بيكون مقدر ليها انها متخلصش الكليه على طول .... ولا يا ترى انا اللى كنت مستهتر .... انا لازم اعترف ان الغلط الاكبر عليا عشان انا كنت مدى الكليه دى بالجزمه ... بس هى انتقمت منى انها خلتنى اطول فيها لغايه ما خللت .... بس برضه فيه شويه سوء حظ
حاجه من الحاجات اللى محدش يعرفها عنى ...... انا لما بتفرج على افلام رومانسيه او دراميه لازم عينى تدمع فى اخرها .... عشان كده اغلب الافلام دى بشوفها لوحدى
.... لما اقرى كتابات فيها دراما انسانيه او تجربه حياتيه صادقه برضه عينى بتدمع ..... هديكوا مثال .... انا كنت النهارده بقرى كتاب جر ناعم بتاع عمر طاهر للمره العشرين تقريبا .... و مع كده كل الفصول اللى كاتبها بيوصف بيها علاقته بعيلته انا عينى دمعت فيها ، بالظبط زى ما حصل 19 مره قبل كده و انا بقرا نفس الفصول ..... انا وصلت لمرحله ان عقلى الباطن بيلعب معايا لعبه قاسيه أوى ..... مش قادر افتكر اى ذكرى حلوة عن عيلتى او حياتى اللى فاتت .... و مع كده لما بشوف او بقرى حاجه زى كده عينى بتدمع ... مع ان المفروض انى معنديش ذكريات يبقى اتعامل مع الموضوع عادى ..... او من الناحيه التانيه ... لو عينى دمعت ده معناه ان اللى شفته او قريته ده لمس عندى ذكرى ... او صحى ذكرى انا كنت ناسيها .... بس الحقيقه انى مش قادر افتكر اى حاجه ..... يمكن ده سبب من الاسباب اللى خلتنى اكتب مدونتى البكريه و اكبر مدوناتى سنا و احبهم الى قلبى مدونه واحد جامعه ..... عشان خفت الذكريات بتاعت الكليه تتوه منى و تتمسح هيا كمان .... قلت الحق اسجلها و انا لسه فاكرها
فى حاجه اسمها To Do List انك تكتب لسته بالحاجات اللى انت عايز تعملها .... فيه ناس بتكبها فى اول السنه و فيه ناس بتكتبها كل عيد ميلاد ليها .... و ناس بدل ما بتخليها الحاجات اللى عايزه تعملها بتخليها الحاجات اللى نفسها تغيرها ..... فكرت اعمل واحده ..... بس الحقيقه مالقتش ولا حاجه انا عايز اعملها بجد ...... كل الناس بتبقى ليها ولو انجاز واحد كل ما الدنيا تضيق عليهم يبصوا للانجاز ده و يقولوا احنا عملنا حاجه .... ناس بيبقى انجازها نجاح شخصى ... او انها اتجوزت .... او انها انتقمت من حد بتكرهه .... انا لما ببص للانجازات بتاعتى بلاقى ان الانجاز الوحيد اللى انا عملته انى خلصت الكليه .... و من وجهة نظرى انه ماكنش انجاز للدرجه دى لانى كنت هاخلصها هاخلصها ..... سيبكوا انى مجبتش الديب من ديله اصلا
انا عارف ان خير الامور الوسط ..... بس مش فى كل حاجه ..... كل قاعده و ليها استثناء ..... يعنى انا حاليا لا مبسوط ولا زعلان ..... فى الوسط ..... لا متضايق ولا فرحان ... برضه فى الوسط ..... مش عارف اعيش حياتى و استمتع بيها ... و مش عارف ماعيشهاش من اصله ..... برضه فى الوسط ....... على رأى دكتور احمد خالد توفيق ( و انا متأكد المره دى ) انى على الحياد زى سويسرا .... او على رأى عمنا محمود السعدنى مثل طنجه على الحياد فى مذكرات الولد الشقى
مش قادر اتكلم تانى لانى مش لاقى حاجه تانيه اقولها ..... و بعتذر لكل الناس اللى سابت تعليقات ... بس انا تعبان اليومين دول و كسلان كمان ..... بس اكيد هرد على كل التعليقات ..... سلام

هناك 24 تعليقًا:

سمكه واحده يقول...

تصدق بالله اني اضيقت
مش عشان حاجه لا عشان
مش عارفه اقول ايه
بس مش هقول حاسه بيك ومعرفش ايه
انا اختي ذيك تومام وكنت بستغرب واقول هي مكتئبه ليه واقول مش للدرجه متولع الكليه ايه يعني وهي لازلت فيها لحد الان ويمكن ده سر اكتئبها بتكرها ومش بتحبها ويمكن هي في سنك بس اللي مختلف انها لحد الان فيها ومش بتروح ومنفضه ليها
ومش هنقول لازم منكتئبش ولازم نفرح ونبص للحياه
اوقات كتير بيجي علي الواحد وقت بيقول هو في ايه؟
هو انا بعمل ايه
هو مفيش حاجه ليها طعم ليه
ملل اكتئاب زهق حجات كتير
عادي مهو الواحد لما يبص بردو يلاقي نفسه محلك سر مفيش اي انجاز حققه وديما عنده امل للتغير وانه هيعمل حاجه وسعات بيروح الامل ده
وكل انسان وعنده حجات كتير
تعرف بقي انا زيك في ايه؟
لو تلاحظ بتلاقيني ديما بفتكر ذكريات من الماضي وديما عايشه في الماضي
اه بهزر اه بضحك وحجات كتير بس!!!!
في حجات كتير مش بحاول افتكرها وبحاول اتجهلها عشان بتتعب وبتألم
كانت عجبتني كلمه قالتها مني ذكي في فيلم العشق والهوي
انا مش زعلانه منك انا زعلانه من الدنيااوي
هيييييييييه قلبت علينا المواجع ياسي عمرو
بص الحمد الله علي كل حال
بكره هيبقي احسن
معلش طولت عليك
وحكياتك مع انها بتزعل بس حابه اسمعها
تحياتي

الست فرويد يقول...

عمرو

الايام بتكثف الحزن والوجع فى سنين

وبتوهب الفرحة والبهجة اطنان فى سنين

اعتقد انك اخذت نصيب كافى من الوجع

خليك على الحياد

واعمل كل اللى ليك وكل مسئوليتك بدون اسئلة كتير عن الماضى لانه ببساطة عدى وبقى ماضى ،
وانتظر الفرح اللى اكيد جاى قريب

واليس الصبج بقريب؟

دى من كتاب ( لاتحزن) لعائض القرنى

انا متاكدة من المصدر ، مش ناسية زيك :)))))


ياريت تقراه لو مكنتش قريته

مع خالص مودتى

عاشقه وغلبانه يقول...

ماكنتش قريتالبوست اللي فات بس رجعت قريته لما لاقيتهم مرتبطين ببعض شكلهم متجوزين عرفي ياعمرو من وراك
ههههههههههههه
عموما انا عندي نفس الحاله
وكويس ان لاقيت حد يوصفها لاني مش عارفه اوصفها بس الفرق انك عارف ايه دخلك في المود ده واسبابه ايه انا بقي مش عارفه كل اللي عارفاه اني بنيت نفس السور اللي انت بنيته وحبست نفسي جواه ..
ناس كتير من اللي كنت اعرفهم بعدت عنهم جدا واوقات كتير بحس ان اقرب الناس ليا فعلا زي اهلي مش فرقين معايا
زود علي ده لما تحس انك عايز تروح مكان بعيد ماحدش يعرفك فيه وياحبذا لو كان صحرا
اوقات كتييييييييييييييير بفضل الصمت عل يالكلام والقعده لوحدي علي اني اقعد في وسط ناس مع اني دي عمرها ماكانت طبيعتي اني اجتماعيه فوق الوصف
بشوف وبسمع حاجات بتخليني اعيط رغم اني مش لاقيه سبب ولا مبرر يمكن جويا ذكريات نسياها زي مانت قولت بس انا مش عارفه ايه هيا
زي مانت وصفت بالظبط بضحك اه بس مش مبسوطه
يعني ممكن اقعد في وسط ناس نتكلم وضحكتي تعلي بس بمجرد مايسكتوا او ابعد انا وده بقي الطبيعي تلاقيني شارده ومش عارفه مالي
كتير بحس بتوهااااااااااان
بحاول اوقات اقرب ناس من حياتي واموت نفسي علشان اقربهم مني وانا مش عارفه لما اقربهم هاعمل بيهم ايه هو انا بعند مع مين ..؟؟
رغبه في اني عايزه اعمل حاجه تقلب حياتي وتغيرها يمكن اشوف ناس جديده واغير المكان اللي عايشه فيه
نفس حاله الاكتئاب بتاعك وجدا متشابهيين
يمكن علشان احنا الاتنين جوزاء
فينا حاجه غلط ياعمرو
ايه هيا مش عارفين

micheal يقول...

يعني أنا بجد فعلا معنديش كلام أقوله
طبعا البقاء لله في وفاة الوالد بس بإذن الله تقدر تتخطي كل المراحل دي
تحياتي وتمنياتي بالسعادة

adel يقول...

كمل يابني

انا معاك للاخر

وانا معاك ان في ناس مقدر عليهم ميخلصوش كليه بسهولة

معاك عادل من نفس المثال :):)

سارة نجاتى يقول...

فى الحالة اللى عندك دى
و اللى ساعات بتبقى عندى
و اللى كانت عند ناس تانيين

كتبتلهم روشتة , قلتلهم اقروا السيميائى لباولو كويلهو

أما بخصوص أن مفيش انجاز عندك فده ظلم لنفسك شوية يا عمرو
لأن اللى حصلك بيحصل لناس كتير و بيكملوا حياتهم
أن قريبتى اتخطبت و فركشت حداشر مرة , و عادى فرحها دلوقتى شغال و بقية قرايبى هناك , ده على سبيل المثال يعنى

she moved on
ربنا خلق عينك فى وشك مش فى قفاك عشان تبص قدام

حرروف يقول...

والله يا عمرو يمكن وانا بقرا بوست دة فهمت لية انت بعدت

ثانيا انا قريت بوستاتك اللي فاتت عشان اشوف الحالة دية من امتي ووصلت لغاية الحكمة بتاعه اللحمة والبقرة

ساعات واحد لما بيتكلم بيندم انة حكي واتكلم
علي رئي علي سلامة
وأخاف أقول لأي حد أحسن يقوم يقلبها جد حد صاحبي ينزعج يمد إيده جوه قلبه من باب الكرم عشان يشاركني الألم أو يستلفلي من لئيم حبة أمل حالة كده

ساعات الواحد من كتر الوجع مبيبقاش عندة رغبه في انة يطلعه

بس انك تبدا تحكي انا شايفه ان دة شيء كويس

بلنسبة للمدونات اللي حاطين مين دخل عندهم وانا منهم انا مش بتفرق مين علق ومين لا
الفكرة ان كلام يتقرا مش انة كام حد علق عليه الاهم كام حد قراة لان ساعات الواحد بيخش يعمل كذا تعليق ع نفس بوست

دمت بالف خير

زهور الامل يقول...

ايه يا عمرو الياس اللي انت فيه ده
موت انسان عزيز علينا ده مش نهاية العالم
الدنيا لازم تمشي ولازم تستمر
اعمل لدنياك كانك تعيش ابدا واعمل لاخرتك كانك تموت غدا
انا اعرف اتنين جيراني توأم
أبوهم مات وهما أطفال والناس بقوا يقولوا عليهم دول مش هينفعوا لانهم هيكونوا تربية وحدة ست
وصمموا وقرروا انهم يبقوا من افضل الناس
واحد منهم طلع مهندس والتاني طلع مدرس انجلش وكان الاول على الكلية
وقريبين من ربنا جدا
واتجوزوا كمان
جوزوا نفسهم وكونوا نفسهم بنفسهم
ماستسلموش للياس
كان عندهم أمل في ربنا وان بكرة هيكون افضل واحسن

مش معنى اني موفقتش في اختبار اصدقائي مرة ان اكتئب دور كويس هتلاقي حواليك ناس كويسين وبيحبوك بجد من قلبهم

مش معنى برضو انك فشلت في خطوبة مرة يبقى هتفشل تاني وكل البنات وحشين
يمكن الموضوع باظ علشان ملكش نصيب فيها
واحمد ربنا دايما وارضى باللي قاسمهولك
وان شاء الله ربنا يرضيك ويريح بالك
حاول تبدا من الصفر بس بعزيمة واصرار وان شاء الله هتكون

تحياتي

Che يقول...

سمكه
انتى اختك برج الجوزاء ولا ايه .... اصل احنا اللى حظنا وحش كده مع الكليات .... ههههههه
بصى الاكتئاب مش عئان الكليه ... الدليل على كده انى هعلق الشهاده فى الحمام .... الفكره انه حاجه سهله أوى و كل الناس بتعملها و انتى مش عارفه تعمليها .... تحسى انك فاشله بجد
موضوع الحنين للماضى ده بأه موجود جوانا كلنا .... اسمه نوستاليجيا
بس كله بيعدى و مفيش حاجه بترجع
نورتينى يا سمكه

Che يقول...

فرويده
كالعاده تعليقك قطعه ادبيه فى حد ذاتها تستحق انها تتحط فى بوست لوحدها مش تبقى فى صفحه التعليقات
مشكله الماضى انه لما يبقى فيه ابواب مفتحه كتير انتى لسه مقفلتهاش ، ممكن اى حاجه تطلعلك من الابواب دى ... و دى مشكلتى .... انى عندى ابواب اكتر من اللازم مفتحه
انا مقرتش كتاب عائض القرنى بس اكيد هقراه
نورتينى يا فرويده

Che يقول...

عاشقه
ازيك يا دوك .... طبعا مش هسألك عامله ايه المره دى لانك كاتبه فى التعليق و اللى مايشوفش من الغربال يبقى اعمى ... او بالقليل عنده ضعف نظر .. هههههه
انا خدت زمن لغايه ما وصلت للاسباب اللى انا قلتها دى .... يمكن انتى كمان تكونى محتاجه تفكرى كةيس و اكيد هتوصلى للسبب
و طبعا الحاله اللى احنا فيها دى سبب من اسبابها اننا جوزاء ... ههههه
براحه على نفسك يا دوك
نورتينى يا عاشقه

Che يقول...

مايكل
حياتك الباقيه يا موكا يا حبيبى
موضوع انى اكمل حياتى ده اللى انا بحاول اعمله حاليا
نورتنى يا مايكل

Che يقول...

عادل
هكمل و انت معايا يا ريس .... ههههههه .... كانت جامده جدا معاك عادل من نفس المثال دى .... زى كأنك بتقول معاك عادل من امام باب الكليه اللى مش عايزه تخلص ... بس هتخلص يا عادل ..... ربنا معاك و معانا كلنا
نورتنى يا عادل

Che يقول...

سارة
انتى عليكى امثله .... يعنى البنيه بتتجوز النهارده و انتى جايه تقولى اتخطبت حداشر مره .... بس كتير أوى كده ... ده على كده المفروض يبقى عندها يجى 45 سنه كده .... هههههه
على فكره انا بهزر اوعى تاخديها جد
طبعا روايه السيميائى لباولو كويلهو قريت الترجمه بتاعتها بتاعت بهاء طاهر اللى كانت من دار الهلال ... بس ده ميمنعش انى اقراها تانى
حلوه أوى حكمه ان ربنا خالقلنا عينا فى وشنا مش فى قفانا عشان نبص لأدام .... بتلخص حاجات كتير
نورتينى يا سارة اكتر ما انتى منوارنى اصلا

Che يقول...

حروف
والله يمكن البعد ليه اسباب كتير ... بس انا صعب احدد الاسباب دى كلها دلوقتى
طبعا موضوع التعليقات طلع مش بيفرق مع ناس كتير ... بس صدقينى بيفرق مع ناس كتير برضه
نورتينى يا حروف

زهور الامل يقول...

ايه ده انا علقت هنا انبارح
امال التعليق بتاعي راح فين
تاه في زحمة المواصلات ولا ايه
عموما ربنا يريح قلبك يا عمور يارب ويصلح حالك

تحياتي

Che يقول...

زهور
اولا انا بجد اسف بس انا مشفتش التعليق الاولانى .... العتب على النظر ... و السن ليه حكم برضه يا زهور ..... انا مش من الناس اللى بتخبى تعليقات .... يالهوى لحسن ماتعلقيش هنا تانى .... هو التعليق مش تاه فى المواصلات ... تاه عندى فى الانبوكس ... بس طلعته مخصوص اهو
عارفه كل اللى انتى قلتيه صح ... بس انا مشكلتى انى عرفت كده متأخر ... بس هحاول اتعلم من غلطاتى .... عشان ما ابقاش حمار
نورتينى يا زهور و اسف مره تانيه

jafra يقول...

و انا عم قول شو عم يصير معي
طلعت الحالة عامة و ابو ونوس مو تارك حدا هالايام الا قارفة
ما رح قلك عادي و رح تعدي بس في اشياء بدها قرارات سريعة لتطلع منها لانو اذا علقت ( زي ما انا علقانة )
رح نشوف نفس هادا البوست كل سنة


بتمنالك الخير

سلام

الشعب لابد له من حكومه تشكمه يقول...

ايه ده ايه ده؟؟؟؟؟؟؟؟ انا فاكره انى سيبت كومنت هنا:(
راااااااااااااااااح فين؟؟:(
اتجلبت يارداااااااااله...
مش هرد تانى هه يلا

Che يقول...

جافرا
تقريبا الحاله طلعت عامه عند كل الناس زى ما انتى قلتى ..... بس فيه مشكله انه فيه ناس كتير مش عارفه الحاله ابتدت ازاى
اخيرا شطرا لتعليقك و ربنا يوفقنا كلنا و يريحنا
نورتينى يا جافرا

Che يقول...

شيمو
لا انا متأكد انك ماسيبتيش تعليق ... انتوا هتجنونى يا جدعان
بالنسبه لزهور ففعلا سابت تعليق و انا مخدتش بالى منه و منشرتوش ... انما بالنسبه لحضرتك انا اتأكدت اربع مرات و لقيت اخر تعليق انتى سايبه على البوست اللى قبل ده مش ده ... اتأكدى انتى بأه .... هههههه
على كل نورتينى يا شيمو و كفايه وجودك حتى من غير تعليق

Zika يقول...

حاجه من الحاجات اللى محدش يعرفها عنى ...... انا لما بتفرج على افلام رومانسيه او دراميه لازم عينى تدمع فى اخرها .... عشان كده اغلب الافلام دى بشوفها لوحدى .... لما اقرى كتابات فيها دراما انسانيه او تجربه حياتيه صادقه برضه عينى بتدمع ..... هديكوا مثال .... انا كنت النهارده بقرى كتاب جر ناعم بتاع عمر طاهر للمره العشرين تقريبا .... و مع كده كل الفصول اللى كاتبها بيوصف بيها علاقته بعيلته انا عينى دمعت فيها ، بالظبط زى ما حصل 19 مره قبل كده و انا بقرا نفس الفصول ..... انا وصلت لمرحله ان عقلى الباطن بيلعب معايا لعبه قاسيه أوى ..... مش قادر افتكر اى ذكرى حلوة عن عيلتى او حياتى اللى فاتت .... و مع كده لما بشوف او بقرى حاجه زى كده عينى بتدمع ... مع ان المفروض انى معنديش ذكريات يبقى اتعامل مع الموضوع عادى ..... او من الناحيه التانيه ... لو عينى دمعت ده معناه ان اللى شفته او قريته ده لمس عندى ذكرى ... او صحى ذكرى انا كنت ناسيها .... بس الحقيقه انى مش قادر افتكر اى حاجه ..... يمكن ده سبب من الاسباب اللى خلتنى اكتب مدونتى البكريه و اكبر مدوناتى سنا و احبهم الى قلبى مدونه واحد جامعه ..... عشان خفت الذكريات بتاعت الكليه تتوه منى و تتمسح هيا كمان .... قلت الحق اسجلها و انا لسه فاكرها


ماتقلبش المواجع

Che يقول...

زيكا
والله يا صاحبى ما كان قاصدى اقلب المواجع ولا حاجه .... بس اللى انا شايله كان كتير قلت اتخفف شويه من الحمول اللى انا شايلها و ساكت
معلش يا صاحبى ... و كله بيعدى
منور يا زيكا

بث تجريبي يقول...

انت بشر
يعنى كل اللى بيحصل معاك ده عادى وكلنا بيحصله كده بس مع اختلاف الاحداث.