الخميس، 22 أكتوبر، 2009

دوريان جراى و صورته اللى جوه كل واحد فينا

العنوان بتاع البوست احتمال ناس كتير تكون عارفاه ... عنوان لقصه من اشهر القصص العالميه ... صوره دوريان جراى ... القصه بأختصار بتتكلم عن دوريان جراى ... شاب وسيم امور صديق لصديقه رسمله صورة عشان شاف فيه الملامح اللى عايز يرسمها لما يحب يوصف الجمال و الوسامه ... المهم ان دوريان جراى لاحظ انه لما العمر بيعدى بيه ... لما بيعمل حاجات غلط و مبيحبش حد يعرف عنها حاجه .... وشه بيفضل زى ما هو ... اللى بيتغير و بيبان عليه هو الوش اللى فى الصوره ... و نهايته فى القصه كانت لما بص فى الصوره بعد زمن طويل و شاف الوحش اللى باصصله من الصوره و عرف انه هو ده نفس الوحش حتى لو وشه مش باين عليه و ساعتها مات .... معلش انا بعتذر عن اى اخطاء فى سرد القصه لانى اخر مره قريتها كان من 14 سنه تقريبا
المهم .... القصه ليها مغزى فلسفى مهم ... انه كل واحد مننا عنده صوره زى صوره دوريان جراى دى و مخبيها عن الناس ... صوره ليه بكل اخطائه و غلطاته اللى محدش يعرف عنها حاجه .. صوره ليه بكل القبح الموجود جواه و برضه محدش يعرف عنه حاجه .... على فكره ده مش شئ وحش ... ده شئ طبيعى ... لاننا بشر .. بنغلط و بنكرر غلطتانا و بنعمل حاجات مش متخيلين اننا ممكن نعملها
المقدمه الطويله دى ليها لازمه .... طبعا عالم المدونات و المدونين عالم ثرى و كل حاجه موجوده فيه .... فى الغالب الواحد بيتشد للناس اللى بتفكر زيه و ليها نفسه نظرته فى الحياه ... انا مثلا عندى 4 بلوجات انا بحب اقراهم جدا ... و طبعا مش هكتب اساميهم ... مش عشان حاجه ... بس عشان انا مش بدور على شخصنه الموضوع انما بتكلم على المبدأ نفسه ، و برضه عشان انا مخدتش اذن المدونات و المدونين دول انى اتكلم عليهم بالاسم .... المهم اتنين من المدونات دول بيتهاجموا و منهم واحده على الاخص بتتهاجم على طول ...... اول مدونه اللى بتتهاجم على طول الناس بتهاجمها على اى حاجه ... حتى انا فى مره قلتلها انى بستعجب ازاى تقدر تطلع الملكات الجداليه عند الناس اللى بتعلق عندها .... انا شخصيا حاسس انها لو كتبت حتى آيات من القرأن برضه الناس هتلاقى حاجه تهاجمها فيها ... اغلب الهجوم مش بيكون على الموضوع نفسه ... بطريقه ما الموضوع بيتحور و بيلف و بيوصل لنقطه واحده ... يا شيخه اتحجبى ... ده باللفظ واحد من التعليقات اللى اتنشرت عندها ..... كل التعليقات اللى بتهاجمها بتدخلها من المدخل ده ... انها مش متدينه كفايه ... و دليلهم على كده انها مش محجبه .... انا هنا لا بدافع عن الحجاب و لا بهاجمه ... بس يا جماعه هى حره ... و كل واحد فينا حر ... يعمل اللى هو عايزه و يقول اللى هو عايزه مدام اللى بيقوله او بيعمله مش بيضرنى فى حاجه ... يعنى لو هى محجبه لنفسها .. مش محجبه برضه لنفسها ... فى الاخر انا يهمنى طريق تفكيرها و انا لو مش متفق مع طريقه تفكيرها ممكن ماروحش عندها تانى .... سيبكم انها هى نفسها مش بتنكر ان الحجاب فرض .... بسيطه اهى .... انما الناس بتهاجم و بتسيب تعليقات من مجهول ( و ده مش لاقيله تفسير تانى غير انهم اجبن من انهم يواجهوا بشجاعه او انهم مش مؤمنين بجد باللى بيقولوه ) و حاجات زى دى كتير ..... طبعا اكيد المدونه دى لو بتقرى هتكون عرفت نفسها دلوقتى ... ههههه ..... المدونه التانيه الهجوم عليها بيكون متقطع و على فترات ... بس برضه من ناحيه الدين ... بس المره دى مش من ناحيه الحجاب انما من ناحيه تانيه .... المدونه التانيه بتكتب بطريقه عفويه جدا ... تقريبا مقتنعه ان اقصر طريق بين نقطتين بيكون الخط المستقيم ، عشان كده مش بتقعد تزوق الكلام ، انما بتكتبه زى ما بتفكر فيه .... الهجوم بيكون من ناحيه انها المفروض تختار و تنقى الالفاظ اللى بتكتب بيها .... عشان حرام ... و عشان متخدش حياء الناس اللى بيقروا ، مع انه تقريبا على رأى انسان عزيز عليا الحياء ده اتشلفط و اتشرشر خالص و مبقاش فيه حته مش مخدوشه ، مع ان اللى بتكتبه كلنا عارفينه و فاهمينه و بنستخدم المفرادات دى فى حياتنا اليوميه .... طبعا المدونه الاولانيه تقريبا عرفت مين هى المدونه التانيه ... ههههه برضه ... انما ازاى الناس دى تفوت الفرصه و ميقلبوش الموضوع وعظ و ارشاد ... يعنى المدونات دول كل غلطتهم انهم بيكتبوا بصراحه و من غير ضحك على الدقون ( و افهموا الدقون دى على مزاجكوا ) ... يعنى دلوقتى احنا وصلنا لمرحله انه اللى بيتكلم بصراحه هو اللى بيتهاجم و اللى بيكون حلو و مخبى كده هو اللى بيطبله و الحلوين اللى زيه ناقص يقولوا عليه رضى الله عنه لما تيجى سيرته ..... التالته مفيش هجوم عليها عشان هى بتكتب بالانجليزى و اللى انا لاحظته انه مفيش حد من الناس اللى بتهاجم و بتحاول تهدى الناس لجاده الصواب بيقرا بالانجليزى ، تقريبا عشان دى لغه الكفار و الله اعلى و اعلم
مدون تالت و من اعز اصدقائى على البلوجز مع انى لسه متشرفتش بمقابلته شخصيا بس ده الحقيقه عشان كسل منى .... برضه الناس بتنتقده كتير و مش هقدر اقول بينتقدوه ازاى بس برضه من ناحيه الدين .... انما هو قال كلمه حلوه أوى و اكيد هيعرف انى بتكلم عليه لما يقرا الكلمه دى ... قال اللى شايف ان فلوسى حرام ميخدش منها .... و عنده حق فى كلمته دى
طبعا من باب الرد على الانتقادات دى ان ناس بتقولك الدين النصيحه .... انا معترف بكده ... بس برضه من الدين ان النصيحه متكونش بطريقه منفره .... و بعدين لو لقيت الشخص اللى ادامك مش عايز يتنصح يبقى سيبه ، و يوم القيامه لما ربنا يسألك ابقى قول انا نصحته او نصحتها و كده انا اخدت اخلاء طرف خلاص ..... ناس تانيه بتقولك من باب تغيير المنكر ... ماشى .. بس من الاولى انك تغير المنكر اللى انت بتعمله الاول و اكيد انت بتعمل منكر لانه برضه اكيد انك مش ملاك ربنا منزلك لينا ..... و فى الاخر برضه انت حر لو المضمون معجبكش متجيش تانى .... بس الغريبه ان نفس الناس اللى بتنتقد بلاقيها المره التانيه برضه بينتقدوا و المره التالته و المره العاشره ... تحس انهم فاضيين ملهمش شغلانه غير الانتقاد ... او الواحد فيهم بيصحى بيقول انا ههدى شويه ناس النهارده و ارجعها عن ضلالها ... و قبل ما ينسى يقوم يقول ان شاء الله عشان تبقى النيه صحيحه و يكون قدم المشيئه الاول
طبعا مينفعش اجيب امثله على المدونين و انسى نفسى .... انا بلا فخر تمت مهاجمتى من جميع النواحى ..... انى لازم انتقى الفاظى ..... انى لازم اتدين شويه ( طبعا مقلوش انى البس حجاب ) ... و انى حياتى كلها حرام فى حرام و غلط فى غلط ... يعنى انا جمعت المجد من جميع اطرافه
اخيرا انا ابويا الله يرحمه علمنى حاجه ساعه لما كنت ببقى محروق أوى من الناس اللى مورهاش غير الانتقاد .... قالى لما حد يكلمك قله اللى بيصرف عليا قرش يجى يحاسبنى بيه ... و الله يرحمه معرفتش مدى صدق مقولته غير لما فكرت فيها .... يا جماعه اللى بيحاسب العباد هو ربنا ... قلتها و بقولها و هقولها لغايه ما اموت
مش قادر ازود فى الكلام لانى بتخنق من الموضوع ده ..... و فى الاخر يا ريت كل واحد يبص لصوره دوريان جراى بتاعته الاول قبل ما يبص للناس .... سلام

هناك 26 تعليقًا:

زهور الامل يقول...

ايه يا عمور مالك
انت عامل ثورة ليه ومزعل نفسك كدة
على رايك اللي بيجبلي حاجة يحوشها

بس انا ليا راي برضو مفيش مانع ان الناس تنتقد بس طبعا مش عمال على بطال لان ده هيعتبر حقد ومرض نفسي
ومفيش مانع برضو اني اتقبل النقد بكل نفس راضية وهادية واحاول ارد عليه واقنع اللي قدامي بوجهة نظري ده لو انا مقتنعه بيها

لكن الناس اللي بتنتقد عمال على بطال دي المفروض نتعامل معاهم بكل برووووووووووود علشان نفقعهم هههههههه

وكل واحد فينا فعلا مليان عيوب ومصايب واخطاء ومحدش معصوم من الخطأ

وسيبك انت مواضيعك بجد روعة وحلوة اوي وذات اهمية جميلة

تحياتي ياعم وفك التكشيرة دي بقى

adel يقول...

اااااااااايه دنيا
حاسس اني اعرف المثال التاني :):)

بص يابنتي محدش ملاك و اللي تفتكرة ملاك ......(كمل انت)

انا ماشي بمبدا جميل موز و مريحيني قوي
محدش بيحاسبني غير ربنا ....يبقي
طظظظظظظظظظظظظظظظظظظظظظظظظظ في اي حد
ده مش معناه ان اللي ينتقدني عشان شئ كويس مش هسمع له
بس اللي يتدخل في حياتي بيني و بين ربنا و الهجس ده ااقول طظ لاني كبير كفاية اني اعرف انا حابب اعبد ربنا بانهي طريقة

ياخي انا واحدة اصغر مني دخلت تهديني للطريق المستقيم
بقولها انتي دارسة دين و فقة و الحاجات دي ...بتقولي لا ....قولتهالي هتهديني ازاي و انا علي الاقل قارئ و هاحراجك ...فضلت ترغي لحد ما جابت اخرها و احرجت و قطعت معايا
يعني اللي اساسا بيدخل يقولك الفاظ ولا دين ولاحتي صور في المدونة ...هو ماله ياعم
كل واحد هيتحاسب عن نفسه بس

10/10 ياواد

لو عرفوه هيحبوه يقول...

السلام عليكم ورحمه الله وبركاته

اسال الله ان يوفقك لكل ما يحبه ويرضاه

نتمنى زيارتكم لنا فى حمله لو عرفوه هيحبوه للتعرف على حياه النبى صلى الله عليه وسلم

micheal يقول...

المفروض نتعلم من الأخ دوريان ده
:)
فعلا أنا بلاحظ أن المدونة اللي قاصدك عليها مجرد ما تكتب أي حاجة تلاقي سيل الشتايم والتجريح جاهز وفعلا ده في الغالب موجه لشخصها قبل ارائها
عالم منفسنة بعيد عنك
:)
نفس الفكرة بالنسبة لإيناس الدغيدي.أول ما تيجي سيرتها في أي كلام ألاقي الناس اتعفرطت من قبل حتى ما يسمعوا هي قالت ايه
:)
يلا اللي يعيش ياما يشوف
تحياتي

Zika يقول...

انا مش قادر احدد مين اول مدونتين
لكن مين التالت ؟
المهم
صورة دوريان جراي للاسف كله بيحاول يخفيها لانها بتعبر عن الجانب اللي مش عايز الناس تشوفه
انت دماااغ

سمكه واحده يقول...

صح جداااااااااا يا عمرو الكلام اللي بتقوله انا معاك فيه بجد
انا شخصيا مفيش حد بينقدني
عارف بقي الناس الي بتتنقد وتتشتم انا بحقد عليهم وبحسد فيهم و
لان كل ما يذيد
الجدل علي شخص تحس انه صح او مش شرط انه صح بس انه مميز وكويس بالعكس
زي الممثلين بظبط كل ما تذيد الشائعات كل ما يشتهروا اكتر ويبقي ليهم ظهور او انهم مش مهمشين يعني حاجه زي كده
هو انا مش عارفه اوصل المعلومه بظبط
بس اقصد يعني انا في مدونتتين
حبتهم جدا وفيهم مدونه انتقدت كتير جدا جدا بس انا بحترمها جدا وبحبها جدا وبحترم تفكيرها واسلوبها
وواحده تانيه والاتنين عكس بعض تمام واكيد في ناس كتير كده
والله انا قلت كتير ان المدونه دي حاجه شخصيه هي مش شخصيه اوي لان مكتوبه وناس كتير بتقرها
بس ملك صحبها والله اللي عاوز يدخل ويعلق باحترام واللي مش عجبه ميعلقش بسيطه خالص يغير القناه كده يدوس علي الريموت
يعني
عموما سيبك انت
كلها عيشه والسلام
عامله ايه انت
وفعلا كلنا مليانين بلاوي
محنا بني ادمين
تحياتي

sandy يقول...

بتتكلم فى الجون عندك حق الناس بدل ماتركز على انها تصلح عيوبها بتركز على عيوب غيرها زى مايكون عيوب غيرهم دى هى اللشريط السود الى بيلبسوه على عنيهم عشان ميشفوش هما عاملين ازاى (فى النهايه الى بيته من ازاز ميحدفش الناس بالطوب) بس الى بيخنقنى اكتر انهم مبينتقدوش اللى اعلى منهم وليهم عندهم مصلحه زى مايكون حرام

Che يقول...

زهور
انا مش عامل ثورة ولا حاجه ... انا لسه هعملها ... هههههه
على فكره انا مش ضد الانتقاد فى حد ذاته .. بس الانتقاد بيكون ليه اساليب محترمه .. لانه بدون الاساليب دى هيكون مجرد قله ادب او تصفيه حسابات .. مش عيب ان الواحد يراجع حساباته ... مش عيب انه يقول انه غلط ... العيب انه يفضل يهاجم الناس عمال على بطال
منورانى يا زهور

Che يقول...

عادل
انا عارف بقيه المثل ده يا دولا .... هههههههههه
مقلتليش انت على حكايه اللى عايزه تهديك دى ... طيب بأماره ايه ... على رأيك لازم تبقى متمكنه الاول عشان محدش يحطها فى كورنر
و كلمتك صح جدا يا عادل ... كل واحد هيتحاسب على نفسه ... مبسوط ان البوست عجبك
منورنى يا عدول

Che يقول...

مايكل
والله يا موكا يا خويا المدونه دى لو قالت ريان يا فجل ممكن يتهموها بالسب و القذف فى حق الفجل
حلوه عالم منفسنه دى .... انا معاك برضه فى سيل الهجوم على ايناس الدغيدى .. تحس ان المسأله مواسم كده
منورنى يا موكا

Che يقول...

زيكا
اول مدونتين ان تعرف واحده فيهم كويس ... دور كده شويه فى ذاكرتك و فى الفيس بوك بتاعك هتلاقيك تعرفها ... المدونه التانيه الله اعلم انت تعرفها ولا لا
المدون التالت هتعمل عبيط بأه كأنك مش عارفه ... يا عم ابقى اقرا بوستاتك و انت تعرفه ... ههههههه
ربنا يخليك ليا يا زيكا
منورنى يا زيكا

Che يقول...

سمكه
انتى بتبانى و بتختفى على فترات يا سمكه ليه .... انا فاهم وجهه نظرك ... بس ليا اختلاف بسيط معاكى ... بصى مش شرط ان كل ما زاد الهجوم على شخص يبقى الشخص ده ناجح او صح ... ممكن يبقى غلط ... بس هو اكيد و لازم هيطلع مختلف عن الاغلبيه اللى بيهاجموه
منورانى يا سمكه

Che يقول...

ساندى
وضه طبيعى يا ساندى انه محدش بينتقد حد اعلى منه ... لاننا ناس جبانه من ناحيه ... و من ناحيه تانيه بنقول الكبير ده مسيره فى يوم ينفعنى او زى ما انتى قلتى يبقى ليا مصالح معاه
مشكلتنا النفاق
منورانى يا ساندى

Zika يقول...

كده اول مدونه عرفتها والمدونه التانيه لاجل الفضول يعني ابقا قولي في الدس
المدونه التالته بقا
يعني انا عملت هندي وانت بارضه بتسيحلي ههههههههه
واظرفنا بوست جديد بقا عشان عايز اقرالك

Che يقول...

زيكا
قشطه عليك يا زيكا .... و عنيا يا باشا ... هكتب بوست جديد
منورنى على طول يا زيكا

الست فرويد يقول...

هههههه
عمرو
حاسستنى بالجهل علشان انا مش عارفه
استتنج المدونات اللى بتتكلم عنها

متهيالى الناس نسيت اللى تقصده وقعدت تحل الفزورة زى

:))


عموما كل واحد حر فى مساحته الافتراضية

واللى يختلف المفروض يكون بادب لا اللى هو قليل الادب

:)

مع خالص مودتى

أحمد مختار عاشور يقول...

ممتاز جداً

soly88 يقول...

الدين أو المعتقد ده شيىء شخصى تماما
فقد انتهى عهد الرسل
المهم احنا بنتكلم فى بلد الدعاره والشذوذ الجنسى نسبهم عاليه جدا
وايضا باقى الأنحرافات زى الرشوه والسرقه
والقتل
انت عارف ده ليه ؟
لأن احنا بتوع القشور

سارة نجاتى يقول...

حبيب قلبى و الله , بوست فى الجون
بالذات اللينك بدوريان جراى ده
لأ بجد

you have got a point

" أنى أبحث عن ما ينقص الأخر لأكمل انسانيتى "
حكمة قالها فيلسوف مش فاكره اسمه

اقرأ بقى ردى على سيادتك عندى
سلام

donya يقول...

مساء الخير
الحقيقه كلامك كله صح الصح
مش بس في التدوين في الحياه كمان تحس الناس قاعده لبعض
حاجه غريبه جدا
لو كل واحد اتلهي في اللي عنده هنبقي زي الفل
ربنا هو اللي بيحاسب
وكمان ربنا بيحب الكلمه الطيبه
وهو ده ضريبة الصدق
لكن الكذاب طبعا هو اللطيف ابو دم خفيف المنافق الصادق
تحياتي

Che يقول...

سارة
سلام مربع يا جدع منك ليه لسارة و كله يوسع
بجد تعليقاتك دايما بتحسسنى بالثراء الفكرى ... لما قلتى الحكمه بتاعت الفيلسوف فكرتنى بنادر صاحبى .... هو كمان غاوى اقباسات و بيوظفها صح زى ما انتى بتعملى
و على فكره انا قريت ردك عليا
نورتينى يا سارة

Che يقول...

فرويده
يا ستى المدونات دى مش سر ولا حاجه ... يمكن بس كل العمليه انك مش بتدخلى عندهم كتير بس هما واضحين أوى للمتعود يقراهم ... و على كل هبقى عليهم بس فى الخباثه
متفق معاكى فى كل كلمه قلتيها فى تعليقك
نورتينى يا فرويده و ديما بتسعدنى رؤيه تعليقاتك

Che يقول...

أحمد مختار عاشور
متشكر يا أحمد على التعليق
نورتنى يا أحمد

Che يقول...

سولى
كل اللى انتى قلتيه صح ... بس برضه كل الحاجات اللى انتى قلتى عليها موجوده فى اى مجتمع ... الفكره اننا نواجهها و نحاول نصحح الغلط و كل واحد يبتدى بنفسه بس
نورتينى يا سولى

Che يقول...

دنيا
مساء النور .... مقتنع جدا بكلامك ، بس المشكله انه فيه ناس بتنصب نفسها ظل الله على الارض
و دايما كلمه الصدق هى اللى بتوجع و بتقف فى الزور
نورتينى يا دنيا

بث تجريبي يقول...

اولا
معلش ان التعليق بتاعى جاى متأخر اوى يمكن عشان انا مش اتشرفت واتشرفت دى بجد بمدونتك,قبل كده بمعرفة مدونتك.

بس احب اقول قبل ما اعلق على حكاية دوريان جراى انا مش فهمتها منك وعشان افهمها روحت دورت عليها على النت وفهمت انت تقصد ايه.

وقبل ما اعلق على المقصود بالظبط من البوست احب اقولك انى تقريبا فهمت انت تقصد مين.

انا الحاجة اللى جات على تفكيرى وانا بقرا موضوعك حكاية سمعتها عن سيدنا ابراهيم وعجبتنى اوى
ملخص الحكاية دى ان فى راجل جه خبط على باب سيدنا ابراهيم وطلب منه تقريبا انه يطعمه فراح سيدنا ابراهيم سأله عن ملته فالراجل اجابه بانه وثنى او مش فاكرة ديانته بالظبط
المهم سيدنا ابراهيم راح مش رضى يديه مطلبه.
ربنا عاتب سيدنا ابراهيم على ذلك
ومش فاكرة النص بالظبط اللى قاله ربنا ولكن اتذكر ان ربنا_ عزوجل_ بيرزق الشخص ده وهو بيعبد غير ربنا فربنا عاتب سيدنا ابراهيم على كده.
المهم من القصة دى ايه
ان ربنا نفسه بيرزق الناس وهى بتعبد غيره فده بيدل على اذا كان ربنا _ عز وجل_ بيرزق الناس دى وهى بتعبد غيره فها نيجى احنا يا بشر ونعمل اوصياء على غيرنا .
ولكن دى مش يمنع ان فى حاجة اسمها الامر بالمعروف والنهى عن المنكر فى الاسلام
ولو تأملنا جملة الامر بالمعروف والنهى عن المنكر هنلاقى كلمة بالمعروف وليس بالاجبار ولا بالغلظة ولا باىشئ اخر يعنى اللى شايف غيره بيعمل غلط واجبه انه يحاول يساعده على انه يبقى صح بس لازم يكون قبل كل شئ ان اللى ينصح غيره يكون هو الاول صح.

فى الاخر بجد انا استمتعت بمدونتك جدا .