الاثنين، 12 أكتوبر 2009

الغايه و الوسيله

طبعا كلنا عارفين مقوله ميكافيللى الشهيرة اللى الراجل ده اتظلم و اتسب و اتلعن بسببها " الغايه تبرر الوسيله " ...... طبعا كل الناس سواء اللى فاهمين نقطه الاخلاق غلط او بيحبوا يمثلوا انهم عندهم اخلاق او حتى عندهم دوافع تانيه غير الاخلاق اصلا بيهاجموا المقوله دى .... و يقولك دى استغلاليه و انتهازيه ..... المقوله دى لو طبقناها مش هيبقى فيه اى نوع من العلاقات الانسانيه غير النوع اللى بتحكمه المصالح ..... المقوله دى لو صح يبقى مينفعش نحكم على اى حد لانه ببساطه هيكون ليه غايه عايز يوصلها و هيوصلها بطريق غير شرعى او طريق ملتوى
بعيد عن التشنج و العصبيه و النعرات الدينيه و الاخلاقيه نتكلم شويه بالعقل ....... اولا احنا دايما بنمسك فى الكلام بلفظيته مش بمعناه او جوهره .... يعنى انا عايز اى حد يقولى الفرق بين مقوله ميكافيللى و مقوله الضرورات تبيح المحظورات .... اهو الاتنين كلام زى بعض ..... او حد يقولى الفرق بين اللى يتصرف بمبدأ ميكافيللى و بين تصرف رجال القانون فى كل مكان بأنهم مثلا يسيبوا تاجر المخدرات الصغير فى سبيل انهم يوصلوا لتاجر المخدرات الكبير او المستورد للمخدرات اصلا .... او حتى الحاجه المعروفه فى القانون بأسم شاهد ملك ... و هو شخص بيكون مجرم بالظبط زيه زى الناس اللى معاه فى القضيه ، بس هو ابدى استعداد انه يتعاون مع البوليس فى انهم يمسكوا كل الناس قصاد كده انه يبقى شاهد ملك و يتم اعتباره مجرد شاهد و لا يتم محاكمته على الجرايم اللى عملها
الفرق الوحيد بين الحاجات دى و مقوله ميكافيللى انه اننا دايما بنكيل بمكيالين .... يعنى بنقول دى حاجه تستاهل و دى ماتستاهلش .... دى صح و دى غلط
يعنى مثلا تاجر المخدرات الصغير غلط بتوزيعه المخدرات دى ولا مغلطش .... طيب لو غلط يبقى ياخد جزائه و لو مغلطش يبقى خلاص .... انما انك تعمله استثناء فى سبيل انك بتدور على غايه اسمى و اكبر .... يبقى ايه الفرق بين الفعل ده و الفعل اللى انت بتهاجمه .... ولا حاجه .... اللهم انك صاحب سلطه و بالتالى بتفرض سلطتك عليا انى اقبل حاجه و ارفض حاجه و الاتنين واحد ... يعنى ببساطه بنعمل زى علاقه امريكا بأسرائيل و علاقتها بينا و الكيل بمكيالين و الكلام الحمضان اللى مش جايب همه ده
ايه الفرق بين انى اقول مقوله ميكافيللى و اقول الضرورات تبيح المحظورات .... الفرق ان الاولانيه ميكافيللى اللى قايلها و التانيه من التراث الدينى بتاعنا .... مع انى اتعلمت ان المبدأ مش بيتجزأ ..... يعنى يا ابيض على طول ... يا اسود على طول .... مش شويه ابيض و شويه اسود و شويه رمادى ..... بس الحقيقه اننا بنستخدم المبادئ و بنحافظ عليها طول ما هى بتخدمنا .... انما لما تبقى ضدنا ..... لا يكلف الله نفسا الا وسعها .... لا ده فى فرق ( مع ان الفرق يا فى الشعر يا فى ...... ) ..... كل قاعده و ليها استثناء ...... و كلام زى كده كتير
انا عن نفسى شايف ان الفرق الوحيد موجود فى حاجه واحده بس ..... الغايه اللى انت عايز تحققها غايه مشروعه فى حد ذاتها ولا غايه غلط ..... و الحاجه التانيه .... انك لو استخدمت وسيله ما بغض النظر عن ان الوسيله دى صح ولا غلط .... انما ماتلومش حد بعدك لو استخدم نفس الوسيله ...... يعنى هديكوا مثال ...... المثال ده من القرآن عندنا .... فى قصه سيدنا موسى و سيدنا الخضر .... لما الخضر قتل الغلام و سيدنا موسى سأله ليه قتلته ... رد عليه ان ابويه مؤمنان و انه كان هيرهقهم طغيانا و كفرا .... الغايه هنا غايه نبيله .... ربنا بيكافئ عبدين من عباده و مش عايزهم يتبهدلوا بسبب ابنهم و ان ربنا هيعوضهم خيرا منه ... الوسيله فى المكافأه دى هى القتل اللى كل الاديان و الشرايع و التطبيقات البشريه اتفقت انه غلط .... بس عشان الغايه نبيله محدش اتكلم على الوسيله
مش عارف هتفهموا انا قصدى ايه بالبوست ده ولا لا ..... على كل حال مستنى ردودكوا ...... سلام

هناك 13 تعليقًا:

Polka Dotted يقول...

ana fahma,... bas mesh fahma leh !

boss... el sa7 sa7 wel 3'alat 3'alat... wel nos nos.. nos nos

y3nee law el 3'aya kwaiesa wel waseela mesh kwaiesa awee (zai 7war el 7'edr we sayedna moussa) yeb2a okay...

laken matbararsh el waseela l 3'aya awsa7' menha :D

yalla kolo b2a kosa !

زهور الامل يقول...

والله انا محتارة زيك بالظبط يا عمرو
بس اللي اعرفه ان لو الغاية كويسة ونبيلة يبقى مفيش مشكلة لو الوسيلة مش كويسة
لكن لو الغاية وحة هتبقى دي المصيبة
وفعلا عندك حق الضرورات تبيح الحظورات لو فكرنا فيها كويس هنلاقي معناها هو ان الغاية تبرر الوسيلة
مش عارفة بجد انا محتارة والموضوع مش سهل

تحياتي

عاشقه وغلبانه يقول...

كلامك صح
متفقه معاك فيه
ومش لاقيه تعليق عليه
وكنت هامشي من غير ماعلق وانا مستمتعه بالبوست
بس قولت افوت اعرفك اني جيت اخد الجمعيه بس انت ماكنتش موجود
ههههههههههههههههههههههه

adel يقول...

بص انا معاك ان المبادي مش بتتجزأ
وفعلا الغاية تبرر الوسيلة برضه
الفصيل في الموضوع ده
الظروف اللي قصدك

ااقولك انا هاعمل مش فاهم اسهل

sandy يقول...

بس انا مقتنعه جدا بالمبدا ده واللى اثنين واحد بس احنا اللى بنستخدمه حسب غايتنا الشخصيه بس معناه واحد انى ممكن اعمل حاجه وحشه صغيره عشان امنع مصيبه كبيره زى ما اسيب تاجر مخدرات صغير عشان امسك الكبير وتكون عينى عليه برده وزى مابستخدم السمك الصغير عشان اصتاد السمك الكبير مش عارفه بقى ده اصدك ولااااااااااا عموما قولى لو مفهمتكش فهمنى تقصد ايه سلام

Che يقول...

بطوطه
كلامك كله صح و تقريبا نفس وجهه نظرى ... مسأله مش فاهمه ليه صدقينى انا كمان مش فاهم ... تقريبا انا بكتب البوستات دى و انا مش واعى ولا ايه
ملحوظه اخيره ... اكتر حاجه بتعجبنى فيكى صراحتك .. 1+1=2 .... بتتكلمى على طول و من غير تزويق
على فكره انتى ليه كسلانه مش بتنزلى بوستات اليومين دول ؟؟؟
نورتينى يا بطوطه

Che يقول...

زهور
المشكله فى الكلام اللى انتى بتقوليه و انا بقوله انه فيه ناس ملهاش شغلانه غير انها تحكم على حياتنا و اذا كانت صح ولا غلط ... مع انه عادى يعنى ... اعيش حياتى زى ما انا عايز
نورتينى يا زهور

Che يقول...

عاشقه
يا دوك انتى تشرفى يا فندم فى اى وقت و من غير ميعاد سابق .... انتى مش من الناس اللى تعدى على السكرتاريه الاول ... انتى تزقى الباب و تدخلى المدونه على طول ... ماتبقيش تنسى تدفعى فلوس الجمعيه الاسم الجاى
نورتينى يا دوك

Che يقول...

عادل
بالظبط هو زى ما انت قلت يا عادل ... الفيصل فى الموضوع ده هو الظروف و الغايه نفسها
و انت فاهم اهو كل حاجه يا دولا ... هتمثل ليه بأه ... ههههه
نورتنى يا عادل

Che يقول...

ساندى
هبقى اقولك على رأيى المره الجايه يا جميل .... هههههه
نورتينى يا ساندى

micheal يقول...

طب ايه رأيك أني فهمته رخامة
:))
لأ ..بجد ماكيافيلي حاسه اتظلم في المقولة دي زي ما الكل فاكر أن داروين قال الإنسان أصله قرد مع أنه لم يقل ذلك حرفيا
هي عموما زي ما أنت وضحت العملية نسبية في التطبيق
تحياتي

Che يقول...

مايكل
ناس كتير أوى اتظلمت يا مايكل للفهم الخاطئ او الفهم المتعمد الخاطئ او لتصفيه الحسابات ... منهم طبعا داروين ... مشكلتنا اننا بنحكم على داروين انه كان غلطان بعد يجى 100 سنه كده ... المفروض لو هنحكم صح نقيس كلامه بمقاييس زمنه هو مش زماننا احنا ... كلامك صح يا موكا
نورتنى يا مايكل

بث تجريبي يقول...

بص انا بتفق معاك فى الجزئية التانية من البوست اللى هى نقطةمشروعية الغاية او عدم مشروعيتها .
لكن اختلف مع حضرتك فى الجزء الاول من البوست وهى قياس مقولة ميكافيللى على القاعدة الشرعية -الضرورات تبيح المحظورات_لان ده قياس مع الفارق حيث انه يوجد بين القاعدة الشرعية والمقولة دى فرق.
والفرق على ما اظن واضح من ناحية انه فى الامور الشرعية او عامة لما يكون هناك فعل لابد منه ولكن هناك ضرورة شديدة تمنع الشخص او تعوقه عن هذا الفعل لوجود محظور ما فانه فى هذه الحالة يجوزاتيان هذا الفعل مع هذا المحظور ومثال على كده فى الصلاة اللى من شروط صحتها ستر العورة فلو انسان كان لديه ضرور وهى عدم وجود ما يستر به عورته فانه فى هذه الحالة تجوز الصلاة مع عدم ستر العورة اللى هو بالطبع محظور شرعى.
والمثال اللى ضربته يعتبر تطبيق لقاعدة الضرورات تبيح المحظورات.
بخلاف مقولة ميكافيلى_اللى لو عملت سيرش على عنه ف النت هتعرف هو قال المقولة دى ليه وفى ظروف ايه بردو_.
اللى هى من وجهة نظرى مقولة بتقوى الجانب الانتهازى لدى اى شخص
----------------------
رغم اختلافى معاك فى النقطة دى الا انى بجد مستمتعة بقراية مدونتك
سلاموز