الخميس، 15 أكتوبر، 2009

افلام ... افلام .... افلام

البوست النهارده عن السينما و الافلام .... ناس كتير بتحب الافلام الاجنبى ، بس حبهم بيتوقف عند مرحله المشاهده ... ناس تانيه حبهم مش بيقف عند المرحله المشاهده بس انما بيحاولوا يتعلموا حاجه من الفيلم اللى بيشوفه عشان ما يكونش مجرد وقت هما ضيعوه على الفاضى ... ميزه الافلام الاجنبى انها بيبقى وراها فكره ... مش مجرد فرجه و بس .... ده مايمنعش انه فيه افلام ماتستاهلش الوقت اللى هتضيعه من عمرك و انت بتتفرج عليها ..... انا النهارده هتكلم على شويه افلام من خلال نقطتين بس ..... Flash Back و كلمه الفلاش باك كلنا عارفين معناها .. بالاضافه لانه تكنيك معروف جدا مش بس فى السينما انما فى الروايات كمان .. بس مشكلته انه فيه ناس قليله تقدر تستخدمه بحنكه .... النقطه التانيه هى نقطه التضليل Misleading يعنى ان المخرج يضحك عليك .... الفيلم يكون كله ماشى فى اتجاه و فى أخر الفيلم تلاقى نهايه غير اللى انت متوقعها و تلاقى المخرج بيبرر الاسباب بتاعت النهايه دى .... ده تكنيك اصعب .... لانه بيرسم نهايتين للفيلم و كل واحده فيهم منطقيه .... يعنى كأنك ماشى بالاحداث فى خطين مش متوازين و لا متقاطعين ... انما التشبيح الادق ان الخطين فوق بعض و متطابقين فى اغلب النقط الا النقط اللى بتؤدى للنهايه


اول فيلم هتكلم عنه هو فيلم مشهور جدا فى تاريخ السينما .... و نادرا ما تلاقى حد مهتم بالافلام متفرجش على الفيلم ده .... الفيلم هو The Usual Suspect طبعا الفيلم فيه ناس كتير بس الشخصيه المحوريه اللى فى الفيلم هى كيفين سباسى .... ممثل موهوب جدا .... خد جايزه اوسكار فى فيلم مثير للجدل The American Beauty فيلم جميل جدا .... بيبتدى بمشهد النهايه و بعد كده بتلاقى كيفين سباسى بيحكى حكايه الفيلم اللى ادت للمشهد ده .... طول الفيلم بندور على مجرم ... كل الناس تعرف اسمه بس محدش شاف وشه و عاش عشان يحكى اللى شافه ..... طبعا الفيلم فيه مفاجأه ..... طبعا جايزه الاوسكار اللى اخدها عن فيلم الجمال الامريكى كانت التانيه ... لانه خد جايزه اوسكار عن دوره فى الفيلم ده .... فيلم تخسر كتير لو مشفتوش



الفيلم التانى هو فيلم مشهور جدا و من ثيمات الافلام العالميه برضه ... الفيلم فيه استخدام للفلاش باك .... بس فيه استخدام اساسى للتضليل .... من بطوله اتنين من اكتر الممثلين المحترفين و الموهوبين ... براد بيت و ادوارد نورتن .... بطوله مشتركه بكل ما فى الكلمه من معانى .... الفيلم فيه برضه استخدام للسايكودراما .... يعنى الدراما المبنيه على اساس نفسى ..... فيلم من الافلام اللى متزهقش منها .... تفضل ماشى مع الفيلم لغايه ما فى اخره تقابلك مفاجأه كبيره جدا ... السؤال اللى الفيلم بيطرحه من وجهه نظرى هو انه جوا كل واحد فينا الخير و الشر ... الملاك و الشيطان ... بنحاول دايما نعمل الصح .... بس عمرك سألت نفسك لو عملت الغلط ممكن تندفع لغايه فين و ايه اللى ممكن تعمله .... سؤال فلسفى ... بس ناس كتير بترد اجابته للدين .. الاخلاق .. التقاليد ... عادات المجتمع ... و حاجات كتير تانيه .... بس تخيل لو انك تحررت من كل الحاجات دى ... ايه اللى ممكن تعمله .... و ايه اللى هيفضلك .... طبعا انا بتكلم على الفيلم العبقرى Fight Club ... بجد فيلم مش هتندم على الوقت اللى هتقضيه فى الفرجه عليه



فيلمنا التالت هو فيلم من اوله لغايه اخره مرتكز على الفلاش باك .... و فى رأيى الشخصى انه احسن فيلم اتعمل بيستخدم التكنيك ده .... انا لغايه دلوقتى كل ما اشوف الفيلم ده ما الاقيش حل للابداع اللى انا شفته غير ان المخرج يكون مسك السيناريو و ابتدى تمثيل الفيلم من اخر مشهد لغايه ما وصل لاول مشهد .... الفيلم محبوك بطريقه جميله جدا ... من احسن الافلام اللى ممكن تتفرج عليها فى حياتك كلها ..... لو عملت لسته لاحسن 10 افلام هيبقى فيها ... احسن خمسه ، برضه هيبقى فيها ... احسن تلاته ، اكيد فيها .... و فيه احتمال لو قلت ايه احسن فيلم اتفرجت عليه يطلع هو الفيلم ده ..... اجمل حاجه فى الفيلم انه عامل زى الدايره ... الشكل الهندسى الوحيد المتكامل و اللى اى نقطه فيه بتؤدى لاى نقطه تانيه ... و هتفهم معنى كلامى مع اخر مشهد فى الفيلم ... لان اخر مشهد هيوديك لاول مشهد ..... طبعا انا هنا بتكلم على الفيلم العبقرى Memento .... بجد لو مكنتش شفت الفيلم ده حاول انك تشوفه .... السؤال اللى انا لقيته فى الفيلم ده سؤال غريب شويه .... يا ترى انت بيبقى ليك هدف عشان عايز الهدف ده يتحقق ... ولا بيبقى ليك هدف عشان لازم يبقالك هدف ... يعنى الهدف فى حد ذاته ، غايه ولا وسيله



الفيلم الرابع واحد من احب الافلام لقلبى ... انا شخصيا دخلته فى السينما ..... و عايز
اقولكوا انه فى نص الفيلم بالظبط حصل دروب عند ناس كتير جدا .... و ناس تاهت فى الفيلم .... لانه لغايه نصه بيفضل ماشى فى خط مستقيم و بعدين عند نصه بتلاقى ان كل اللى انت شفته اضحك عليك فيه ... كل ده عند مشهد واحد ... انا بعتبر المشهد ده من اكتر المشاهد عبقريه فى تاريخ السينما ... مش هنكر انى احتجت اتفرج على الفيلم لمره تانيه عشان اتأكد انى فهمته صح ... و عشان كمان اتفرج على الفيلم بزاويه تانيه بعد ما فهمت التريك اللى فيه ... و مع كده استمتاعى ماقلش لحظه واحده عن اول مره شفته .... الفيلم ده برضه من الافلام اللى مرتكزه على السايكودراما ... و بتستخدمها استخدام ممتاز ... السيناريو فيه صدف كتير ... بس لما تشوف الفيلم هتلاقى انها مش صدف بس هى مقصوده و ليها دور و ليها دلاله ... و الصدف اللى مش صدف اللى انا بتكلم عليها هى اسماء الكاركتارز اللى فى الفيلم .... نهايته مش متوقعه بأى مقياس من المقاييس ... خصوصا ان نهايته فيها مفاجأه لحاجه انت هتكون افتكرت انها خلصت اصلا ...... طبعا انا هنا بتكلم على الفيلم الجميل Identity ... طبعا مش عايز اعيد نفسى و اقول اللى ماشفش الفيلم ده مش هيندم لما يشوفه .... مش عارف اذا كنت ممكن اتكلم على السؤال او الفكره اللى بيطرحها الفيلم ولا لا ... بس هى من وجهه نظرى انه محدش فينا ليه شخصيه واحده ... كل واحد فينا ليه اكتر من شخصيه ... و ده مش نفاق لان النفاق انك تتعامل فى نفس الموقف بأكتر من رأى ... مش عارف اوصل وجهة نظرى ... و مش هحاول ... استمتعوا بالفيلم و قولولى رأيكوا


الفيلم الخامس و عوده مع الفلاش باك ..... فيلم Vintage Point .... الفيلم من بطوله جماعيه ... زى ماهو مكتوب على التاج بتاع الفيلم .... 8 اشخاص ... 8 وجهات نظر .... حقيقه واحده .... الفيلم فيه استخدام كتير للفلاش باك ..... حدث واحد حصل ... بس المخرج بيوريك الحدث ده من زوايا مختلفه ... حسب مكانك من الحدث .... المشكله انه برغم ان الحدث واحد بس كل واحد بيشوفه بطريقته .... و فى الاخر فى حقيقه واحده بس للحدث برغم الزوايا المختلفه للموضوع .... الفيلم بيطرح فكره فلسفيه بس حقيقيه فى نفس الوقت .... انه مش شرط اللى انت تشوفه انا اشوفه بالضروره حتى لو كنا بنتناول نفس الموضوع .... بيفرق فى كده مكانك من الموضوع نفسه ... انت معارض ليه ولا مؤيد ... قريب منه ولا بعيد ..... بس فى الاخر
كل واحد ليه وجهه نظره


الفيلم السادس لسه شايفه من اسبوع تقريبا الفيلم ليه اسمين ..... الاسم المشهور بيه و هو Fragments ... و الاسم الرسمى للفيلم و هو Winged Creatures .... بس التسميه اللى هو مشهور بيها من وجهه نظرى احسن ... الفيلم هنا فيه استخدام لاسلوب الفلاش باك .... برضه بيتعرض لحدث واحد ... بس بيحكى تأثير الحدث ده على كل الناس اللى كانت موجوده ساعه وقوعه ..... و ازاى ان حدث صغير ممكنيغير حياتك كلها و يخليك تاخد قرارات مكنتش هتاخدها ..... فيلم انا استمتعت بيه .... فيلم مش هقدر اقول ممتاز ... انما هستخدم كلمه جيد


اخر حاجه عشان انا طولت عليكوا أوى فى البوست ده و هى مش فيلم ... انما مسلسل ... المسلسل لسه جديد .... اتعرض منه 3 حلقات بس و الحلقه الرابعه هتتعرض الاسبوع ده ... الفيلم ده بيتناول فكره الفلاش باك بس بمنطق معكوس .... انا مش هحرقه لحد لانه اصلا انا شخصيا معرفش احداثه كلها لسه ... بس الفكره بتاعت المسلسل متاخده من اسمه ... Flash Forward ... قصه المسلسل ببساطه ان كل الناس هتشوف لمحه من مستقبلها .... و السؤال اللى المسلسل بيطرحه هو ... يا ترى انت ممكن تاخد قرارات مش عشان هى صح انما عشان انت شفت انها هتحصل فى مستقبلك ... يعنى بصوره تانيه ... لو انت شفت مستقبلك ... يا ترى هتمشى فى الطريق اللى مؤدى للمستقبل اللى انت شفته ده و ده هيأثر على قراراتك و اختياراتك .... فكرته فلسفيه اوى المسلسل .... المستقبل فى ايدك لسه و ممكن تشكله بأختياراتك ولا المستقبل اتكتب خلاص و انت مش ممكن تغيره ..... فكرته هى السؤال اللى ناس كتير بتتجادل حواليها و هتفضل تتجادل ليوم القيامه .... انت مسير ولا مخير
آخر حاجه عايز اقولها ان البوست ده اهداء خاص لعادل لانى عارف هو اد ايه مهتم بالفن و السينما ... و برضه لزيكا مع ان زيكا مش باين اليومين دول .... و معاهم مياسى ... لانها فى بوست سابق كانت هى اول واحده قفشتنى و انا بعمل معالجه لفيلم شفته فى بوست من بوستاتى ... و مش هقدر انسى بطوطه ... الوحيده اللى علقت عندى فى بوست المسلسلات الاجنبى و كان عندها فكره انا بتكلم على ايه .... طبعا مش معنى كده ان دول بس اللى يقروا .... انما كل الناس انا برحب بيها مقدما و مستنى تواصلكوا على الافلام اللى انا كتبتها دى كلها و يا رب ماتكونوش زهقتوا منى .... سلام

هناك 14 تعليقًا:

Zika يقول...

تسلم ع الاهداء
بوست جميل اوي بجد ويارب الناس كلها تقراه عشان يعرفوا قيمة الافلام دي ويعرفوا يعني ايه سينما ناجحه حتى لو كانت تجاريه
الافلام اللي انت عرضتها اللي بتتناوي منطق الفلاش باك من افضل الافلام اللس استخدمت المنطق ده
مش عارف ممكن " بالب فيكشن ينجرج معاهم ولا لأ "
pulp fiction
لانه اصعب كتير من الفلاش باك
طبعا الفلاش باك دي سلاح ذو حدين
يا اما تتفرج وتتلطش قلم وتنبسط اوي
يا اما تقول يا بضاااااااااااا وماتبقاش عايز تتفرج عليه تاني
ودي نقطة قوه او ضعف عند المخرج انه مايزهقش من الفلاش باك
انا النهرده خدت لفه في المدونه عشان كات وحشاني بوستاتك يا كبير

Che يقول...

زيكا
انت فين يا ريس مش باين ليه ... خدت بالى من اللفه اللى انت اخدتها و زى ما انت شايف انا كاتب انك مختفى فتره و مش عارف انت فين
على فكره انا مش ناسى بالب فيكشن ... بس البوست طويل أوى و انا متكلمتش على كل الافلام اللى انا بحبها ... ده موجود فى البوست الجاى هو و افلام كوينتين تارنتينو ... تسلملى يا غالى و ماتغيبش كتير كده يا عم
منورنى يا زيكا

adel يقول...

ربنا يخليك ياعمرو علي الاهداء
بجد انت اتلكمت في نقط تهمني قوي
1-السينما بتمثل ايه و خصوصا السينما الامريكاني لان الناس ابتدت تقول دول بيغيبونا مش بيعملوا فن ,,,,,طبعا ده كلام بزراميط

2-انا مهتم قوي بالفلاش باك رغم ان كل اللي قعدت معاهم كتاب بيقوليلي حاول متخليش في الفيلم فلاش باك او فويس اوفر (صوت يعني يحكي) ....عشان ده بيضعف الفيلم

3-دي ليها علاقة باللي قبليها ..انا بقالي فترة نفسي اعمل مدرسة سينما نفسية في مصر لان المدرسة دي مش موجودة و مفتكرش اتعمل منها فعليا الا فيلم واحد حاضر في ذهني (الاختيار) بيتاع يوسف شاهين

4-زي ما قال زيكا مش بس دول في افلام تارنتينو اغلبها فلاش باكات صياعة جدا بجد .... راجل مجنون بس بموت فيه

5-المسلسل ده انا بجد منزل التريلر علي الفيس بوك و بشجع الناس تشوفه
انا مشوفتش لوست ولا بريزون بريك ولا الهتش ده ....ده قصة تانية رجعني اتفرج علي مسلسلات بجد من ايام فريندز

6-انا الافلام اللي ذكرتها بعشقها بجد في مش هزود دلوقتي حاجة ....بس هارجع تاني :):)
حابب البوست قوي الصراحة

Che يقول...

عادل
يا باشا لو ماعملتش تعليق لواحد بيفهم فى السينما زيك هعمل تعليق لمين ... ارد بأه على تعليقك اللى ريحتنى انك عملته نقط .... طول عمرك منظم يا دولا
1 - السينما فن مهم جدا فى حياتنا ... و مشكلتنا اننا معندناش سينما دلوقتى ... بس انا مختلف معاك فى نقطه صغيره ان ساعات الافلام الامريكانى بتكون شايله رساله معينه بتحاول تغرسها بشكل باطن
2 - الفلاش باك زى ما انا قلت انه تكنيك مهم جدا فى السينما و فى الكتابه كمان .... ساعات بيكون نقطه ضعف و ممكن يكون نقطه قوه ... بس مقدرش استغنى عنه .... كمان الفويس اوفر او الناراتور نفس الكلام ... الفكره انت هتعرف توظف الحاجات دى صح ولا لا
3 - السينما النفسيه مش واخده حقها عندنا فى مصر ... يمكن الافلام اللى اتعملت منها قليله زى الاختيار .. الاخوه الاعداء ... كمان مش هقدر فيلمين انا شايف انهم اتظلموا جدا مع انهم من وجهة نظرى حلوين جدا ... زى النهارده و 45 يوم ... الاتنين لاحمد الفيشاوى على فكره ... مش هعلق على النقطه دى دلوقتى
4 - افلام تارنتينو دى عايزه بوست لوحده ... الراجل ده عبقرى جدا جدا جدا .... بيستخدم اساليب جديده فى الاخراج و فى التصوير و فى التمثيل كمان لانه كممثل بيعرف يوجه الكاست بتاعه بشكل ممتاز ... ربنا يسهل و اكتب بوست عنه
5 - المسلسل ده جامد جدا جدا جدا على فكره ... لازم تشوفه لو لسه ماشفتوش لانه بجد شكله هيطلع طلقه ... بالنسبه لبريزون بريك .. التمثيل فيه مش أوى .. مفيش غير استثناء واحد روبرت نيبر الممثل اللى عمل دور تى باج ... الممثل ده جامد جدا جدا على فكره يا زيكا ... بريزون بريك مليان افكار جديده ... اسلوب كتابه مشوق جدا ... بس مش تمثيل .... لوست بأه ده حكايه تانيه خالص ... برضه مفيش تمثيل ... يمكن باستثناء واحد او اتنين منهم طبعا الراجل اللى عمل دور بنجامين لاينوس و على فكره كان مترشح لجايزه الايمى السنه دى ... الفكره فى المسلسل ده برضه استخدام الفلاش باك بكثره .... المسلسل عيبه انه فى بعض الحلقات كان رتم المسلسل بيهرب من الكاتب .. بس ده طبيعى لانه فيه ورشه كتابه مش واحد بس اللى بيكتب عشان كده ممكن تلاقى اختلاف بين الحلقات و بعض
6 - مستنى لما تيجى تانى تبص على الافلام و تقولى رأيك فى تحليلى ليها
انا مبسوط ان البوست عجبك ... على فكره انت خلتنى فى ردى اكتب بوست تانى .. بس ده لانك اتكلمت فى نقط كتير و مهمه جدا
منورنى يا عادل و مستنى التعليق الجاى

BaTaBeeT يقول...

ummmm akid nice and enjoyable post :D

I love the movies that you enjoy watching them for the first time because of the suspence... and then you watch it for 1000 times knowing its end just to see how these geniuses act !!!

Fight Club... I simply enjoy watching them speak and say the lines that I know by heart...

Have u seen the prestige??
AMAZING !

abt memento... I guess the movie is amazing yet I believe guy pierce killed it :D

Che يقول...

بطوطه
بالظبط هو ده اللى انا بتكلم عليه ... الاستمتاع بالفيلم مش مجرد انى اشوفه و خلاص ... بالنسبه لميمنتو جاى كان بيمثل الدور مظبوط ... واحد ملوش اى احاسيس نتيجه لانه ملوش اى ذاكره ... يمكن المشهد الوحيد اللى كان لازم يستخدم فيه احاسيسه لما كان فى المطعم مع كارى ان و قالتله غمض عينك و اوصفلى احساسك بزوجتك
فايت كلوب طبعا فيلم مهما اتكلمت عليه مش هوفيه حقه
و اكيد شفت برستيج .... من احلى الافلام اللى شفتها ... و فيه تشويق لغايه الاخر ... على فكره اكيد هتكلم عنه
نورتينى يا بطوطه

زهور الامل يقول...

بص يا عمرو
انا طول عمري بعشق الافلام الامريكية وبستفيد منها جدا جدا وخصوصا افلام الخيال العلمي والرعب والاكشن والرمانسي كمان
يعني كله كله
بحس ان فيها فكرة ومفيدة اوي وفيها شغل جامد مع اني ساعات بحس انهم مزودنا شويتين في الخدع بس ماعلينا
برضو دماغهم حلوة وتحس انهم نوروا مخك شوية
بس بقى للاسف انا بعيدة تماما عن مشاهدة الافلام دي قولتلي ليه؟؟؟
لاني خوافة جدا وكنت بتفرج على الافلام دي مع عمتي ربنا يمسيها بالخير لانها من سني بس من بعد علاقتي ما اتقطعت بيها وانا بطلت اتفرج على الافلام دي لاني بصراحة لو شوفت فيلم من دول مش هنام لمدة شهر وهخاف اتفرج لوحدي

تحياتي

Che يقول...

زهور
مقدرش ازود كلمه واحده على اللى انتى قلتيه ... بس مش كل الافلام رعب .. فيه افلام دراما ... فيه افلام كوميدى ... يعنى ممكن تتفرجى على اى حاجه غير الرعب عشان تعرفى تنامى
نورتينى يا زهور

Zika يقول...

اهو
عرفت ليه انا مابجييش
عشان بافضل مستني تنزل بوست وادخل كل شويه اتفرج ع البوستات القديمه
ماتكتب يا عم انت بقا

مياسي يقول...

عمـرو

اول شي مرسي عالاهـداء واسفه عالتأخير عشان قرأت البوست بتركيز كمان مره
بالنسبه للافلام اللي زكرتها انا حضرت:

الجمال الامريكي -ممتاز جدا
الهويه- كويس

مومنتو- متعب جدا!!! كتير بدك تركز فيه وانت بتحضر

نادي القتال: للاسف مره وحده زمان وما عدتها عشان احكم عالفيلم منيح:(

بس خطر في بالي انك نسيت فيلم "تأثير الفراشه" لاشتون كاتشر؛ مش هو كمان بيلعب على وتر الخيارات وتأثيرها على حياتك؟؟

اسماء عوني يقول...

ازيك يا عمرو
بالمناسبه انا لسه متفرجه على ميمنتو من قريب
للمره التلاته واربعين مليون
فعلا فيلم مشكله والمخرج مجنون انه يجيله الجرأه يعمل ده
وحشتني يا كابتن ماجد انت

Che يقول...

زيكا
احرجتنى يا زيكا .... و عندك حق فى اللى انت قلته و عشان خاطرك انا هنزل بوست النهارده
منور يا زيكا

Che يقول...

مياسى
ولا يهمك يا قمر ... انتى عامله ايه و اخبارك ايه ... انتى مختفيه ليكى كتير .. لعل المانع خير
بالنسبه لفيلم تأثير الفراشه فانا على فكره مكنتش ناسيه ... بس لقيت انه مش مناسب لنوعيه الافلام اللى انا كاتب عليها و استخدامها للفلاش باك ... الفيلم اقرب لنوعيه What If ... و انا لسه هكتب بوست عنه لوحده
منورانى يا مياسى

Che يقول...

اسماء
ياااااااااااااااااااه ... انتى فينك يا كابتن من زمان ... مختفيه و مش باينه ... و بتظهرى على الفيس بوك على فترات ... و المدونه بتاعتك العنكبوت عشش فيها ... ايه يا عم
ميمنتو فيلم رائع و مينفعش تزهق منه حتى لو اتفرجت عليه اربعين مليون مره زيك كده يا كابتن ... هههه
بس ايه نظام باقى الافلام معاكى
ماتغيبيش كده كتير علينا يا كابتن
منورانى يا سيمو