السبت، 3 أكتوبر 2009

موديل كابلر-روس

من حوالى اسبوعين اتفرجت على الحلقه الاولى من جرايز اناتومى الموسم السادس ..... الحلقه كلها كانت متحورة على حاجه رئيسيه ...... الحزن ..... اتكلموا فى الحلقه على دى على الخطوات الخمسه للحزن .... يمكن النقطه دى عدت على ناس كتير ، بس لسوء الحظ انا على درايه بالنقطه دى جمله و تفصيلا لظروف كتير مش أوانها انى احكى عليها
باختصار شديد .... الخطوات الخمسه للحزن كانت عباره عن موديل مشهور جدا فى الطب النفسى ، اللى صاغت الموديل ده الدكتور اليزابيث كابلر روس و الموديل اتعرف بأسمها بعد كده بموديل كابلر روس ، الموديل ده ممكن يتطبق تقريبا ( و خدوا بالكوا من كلمه تقريبا ) على كل مصيبه ممكن تحصلك .... يعنى لما تتعامل مع حدث يكون اكبر من انك تستوعبه مره واحده ... الموديل ده اتوصف فى الاول للمرضى اللى بيفقدوا اطراف ... المرضى اللى بتجيلهم امراض مزمنه ذات طبيعه تؤدى للموت زى السرطانات .... الناس اللى بتبتلى لوفاه احد الاقارب او الاصحاب القريبين .... و بعد كده الموديل ده تم توسيعه عشان يستوعب حالات الطلاق ... فقدان الوظيفه ... او زى ما قلنا قبل كده اى مصيبه اكبر من الانسان يتعامل معاها وقتيا
الموديل ده بيقول انه فيه خمس خطوات للحزن .... اولهم الانكار ... انك لما تحصلك المصيبه دى تقعد تقول لا المصيبه دى محصلتش .... اكيد المقصود بيها حد تانى .... لا يا عم مش انا ، انت بتهرج ... عشان كده ممكن تلاقى ناس ساعه وفاه واحد من الاقارب متماسكه بشكل غير طبيعى و مش حاسس بالمصيبه اللى هو فيها ... اللى هو بالبلدى بنقول عليه السكينه سارقاه
الخطوه التانيه هى الغضب .... بعد ما تخلص خطوة الانكار و الانسان يستوعب ان المصيبه ده حصلتله مش حصلت لحد تانى يبتدى مرحله الغضب .... مرحله اشمعنى انا اللى يحصله كده ... ما فيه ناس كتير تستاهل تموت اشمعنى فلان مثلا .... او مثلا ليه يارب الناس دى كلها تنجح و انا اللى اسقط مع انه فيه ناس كتير حالها اوحش من حالى ... اشمعنى انا اللى جوزى يطلقنى و فلانه مع ان جوزها مش بيطيقها لسه على ذمته ..... و الكلام اللى زى كده
الخطوه التالته هى خطوة المساومه ..... الانسان خلاص خلص مرحله الانكار ... عدى مرحله الغضب ... ابتدى يحن للوضع القديم اللى كان فيه .... سواء عشان كان بيحبه زى فى حالات وفاه الاقارب ، او انه خايف يجرب وضع جديد زى حالات ان الانسان مثلا يتفصل من وظيفته و يلاقى نفسه مطالب انه يدور على وظيفه تانيه ، اللى هو بالبلدى برضه بنقول عليه اللى نعرفه احسن من اللى مانعرفوش ..... مرحله المساومه دى الانسان يقول انا مستعد ادفع نص عمرى لو ارجع زى الاول ..... انا مستعد اعمل اى حاجه بس فلان يرجع من الموت ..... نفسى اقدر اعيش كام سنه مع عيالى و اخد بالى منهم و العب معاهم قبل ما السرطان يقضى عليا ... المساومه هنا مش مع شخص .... انما بتكون بين الانسان و ربه .... و مش مساومه بالمعنى المفهوم ... انما اقرب للترجى و التذلل
الخطوة الرابعه و هى خطوة الاكتئاب ..... الانسان لقى الترجى و المساومه مش هتغير حاجه .... و لقى نفسه فى الوضع اللى هو فيه و شاء ام ابى عليه انه يتعايش معاه .... بس هو من جواه مش قابل الوضع ده ..... و فى نفس الوقت مش قادر يغيره .... يدخل فى موود الاكتئاب ... يا عم انا كده كده هموت انت عمرك سمعت عن جاله سرطان و خف منه ..... يعنى لو انا عملت قرد ابويا هيرجعلى تانى .... مهو كده كده طلقنى و اتجوز و مش هنرجع لبعض تانى ..... المرحله دى بتبقى مرحله العزله .... الانسان بيرفض انه يستقبل اى زوار .... بيتقوقع على نفسه .... بيفصل نفسه عن الواقع ..... بتبقى مرحله صعبه جدا و مش كل الناس بتقدر تعديها .... و بتحتاج وقت طويل لغايه ما الانسان يقدر يعديها .... و بعدها ... حياته بتكون بعدها مختلفه عن حياته قبلها
الخطوة الخامسه و الاخيره هى خطوة القبول ...... خلاص الانسان جرب كل حاجه .... جرب انه ينكر المصيبه اللى حصلتله على امل انها هتتمسح و تختفى و مع كده لقاها زى ما هى .... جرب انه يغضب و يثور على الوضع اللى هو فيه ، و برضه لقى انه مفيش حاجه بتتغير و انه بيحرق فى دمه و اعصابه على الفاضى .... جرب انه يترجى و يتذلل و يساوم و مع كده المصيبه فضلت زى ما هى و ماتغيرتش ...... جرب انه يدخل فى موود الاكتئاب و يعيش مع نفسه ، بس حتى ده مانفعوش ..... بيلاقى انه مفيش اى حاجه ممكن يعملها غير انه يقبل الوضع اللى هو فيه .... قبول اقرب للاستسلام ... لانه جرب كل حاجه و مفيش حاجه نفعت .... مرحله القبول دى بيجى معاها السكينه و الراحه النفسيه ..... بيكون الانسان مهيأ انه يستقبل مصيره ايا كان .... لو حد عزيز عليه مات بيهيأ نفسه انه غصب عنه لازم يكمل حياته .... لو عنده مرض بيهيأ نفسه ان العلاج هيطول و ممكن مايجبش نتيجه ..... و قيس على كده اى حاجه ...... تقريبا الانسان بيفقد كل احاسيسه ناحيه المصيبه اللى حصلتله .... و كل امله ان مفيش حد يفكره بيها
طبعا الخطوات اللى فوق مش لازم تحصل بالترتيب المذكور لان المسأله بتختلف من شخص للتانى ... برضه كل خطوه ملهاش زمن محدد .... انما برضه متوقفه على الفروق الشخصيه بين كل انسان و التانى
نقطه اخيره ..... انا كتبت البوست ده عشان البوست الجاى انا هكون محتاج فيه شرح الموديل ده بالتحديد .... البوست الجاى هيكون شخصى جدا رغم انى مش بحب اتكلم على اى حاجه شخصيه زياده عن اللزوم لانى شخص مؤمن بالخصوصيه جدا .... بس بجد انا وصلت لمرحله حاسس فيها انى ممكن انفجر لو ماتكلمتش .... حتى لو اتكلمت و محدش سمع .... مش مهم ، المهم انى اكون اتكلمت ..... سلام

هناك 9 تعليقات:

adel يقول...

هو انا ردي بسيط قوي

انا مستني البوست الجاي

الست فرويد يقول...

منطقية قوى المراحل دى يا عمرو

غالبا الناس كلها بتمر بيها مع اول المصائب

الا الندرة وهم من رحم ربى

واللى بيستقبلوا المصائب بكلمة
انا لله وانا اليه راجعون
واحساسهم صبر حقيقى وتوكل على الله وثقة فيه

ان شاء الله يارب نكون كلنا منهم


فى انتظار البوست الجاى
:)))

الخصوصية مش ضد الفضفضة

ربنا يريح قلبك

زهور الامل يقول...

ازيك يا عمرو
اخبارك ايه
بس يا عمرو
مفيش مانع ان الواحد يحزن لاننا بشر ومن لحم ودم
لازم نفرح ونحزن
بس الحزن مش لازم يطول معانا
او نفضل نقول اشمعنى انا وليه يارب يحصلي كدة
لان ده يعتبر بعد عن الله وعن الايمان
كل واحد فينا بايمانه وامله في ربنا يقدر يتجاوز الحزن ده ويخرج منه ويقدر يغير الواقع ده بعزيمته واصراره على انه يتغير

ولو كان حد في الدنيا دي محتاج انه يتكلم ويصرخ كمان هيكون انا
انا بشوف حاجات وبيحصلي حاجات معتقدش ابدا انها بتحصل لحد غيري
وبرغم من كدة دايما عندي امل في ربنا ودايما عندي امل ان بكرة هيكون افضل وكتير بقول هو ده قدري اللي ربنا كاتبهولي ومش لازم اتبطر عليه
لان في ناس كتير اوي تعبانة ومخنوقة وظروف حياتها اصعب مني بكتير

بضحك جدا وبهزر اوي وبصلي وبصوم وبشكر ربنا وبحمده على نعمه مع ان جوايا مدبوح
عملت المدونة علشان اخرج اللي جوايا فيها مقدرتش اكتب حرف واحد فيها عني وعن خصوصياتي بكتب في مواضيع تانية خالص
جايز علشان مش عايزة اعيش في الواقع بتاعي وجايز علشان اقدر اخرج من حالة الياس اللي انا فيها وجايز كمان علشان اخلي لحياتي معنى بافكاري واللي بكتبه وجايز وجايز وجايز

يااااااااه انا طولت عليك اوي
سوري يا عمرو


تحياتي

سمكه واحده يقول...

كل اللي اقدر اقلهولك بردو
زي عادل ما قال
مستنيه البوست الجاي
مش فضول ولا حاجه عيييييييب
انت عارفني سمكه مبتحبش الفضول
(وش عينه رايحه جايه)
لا بجد هقولك علي حاجه المدونه دي معموله عشان صاحبها يكتب فيها اي حاجه زي ما هو بيحب حاجه حلو حاجه مره
حاجه دمها خفيف حاجه تحزن
عباره عن مش عارفه عباره عن ايه
بس كل اللي اقدر اقولهولك ان الواحد بيستريح لما بيكتب حاجه ويلاقي في رد فعل ناس معاه ناس ضده ناس حاسه بيه
بيشتكي بيضحك بيفرح بيحزن وحاسس بان في ناس واخده بالها منه ومتبعاه
ايه العبط اللي بقوله ده ياخواتي
عموما انا مستنيه بوستك الجاي
وتأكد ان كلنا هنا اخوات وبنحب نسمع بعض وبعز بعض جدا
وربنا يديم المعروف ياحج عمر
ومتشلش للدنيا هم
كل واحد عنده حجات كتير اهو احنا مع بعضيتنا

Che يقول...

عادل
البوست اللى جاى و اللى بعده كمان عشان خاطرك يا دولا
نورتنى يا عادل

Che يقول...

فرويده
الموديل ده رغم انه فيه اعتراضات كتير عليه بس يعتبر احسن موديل عرفته بيوصف الحزن و بيوصف خطوات كلنا بنعدى بيها
اللى انتى بتقوليه صح .... عشان كده بيقولوا انما الصبر عند المصيبه الاولى
هفضفض شويه كمان فى البوست اللى جاى و اللى بعده
نورتينى يا فرويده

Che يقول...

زهور
تعليقك حلو أوى ..... بس بجد ساعات المصيبه بتكون اكبر من انك تفكرى فيها بعقلانيه و تحسبيها بالمنطق .... و عشان كده بتتصرفى بغريزتك اللى مش بتكون منطقيه دايما
و يا ستى انتى مش طولتى ولا حاجه .... مدونتك و اتكلمى براحتك
نورتينى يا زهور

Che يقول...

سمكه
مدام مستنيه زى عادل يبقى ليكى نفس الرد بتاع عادل
البوست الجاى و اللى بعده كمان عشان خاطر سمكمك
نورتينى يا سمكه

بث تجريبي يقول...

للمرة مش عارفة الكام بقول انا استمتعت جدا باسلوبك
ومن جمال البوست وفايدته انا قريته اول مرة سطر سطر.
بس بعد ما خلصت قراية حسيت انى لازم اراجع عليه تانى فروحت قريته مرة كمان تقاطيف كده على الماشى..

تسلم ايدك