السبت، 7 فبراير، 2009

خمسه اكتئاب و خنقه

طول الاسبوع اللى فات و انا مكتئب و مازلت فى طور الاكتئاب لسه ، المهم كنت باخرج كتير عشان افك عن نفسى ( و طبعا افك هنا معناه انى اخرج من حاله الاكتئاب مش افك زنقه مع انه كله محصل برضه ) .. المهم الاسبوع اللى فات على أد ما كان كئيب كان مليان بمواقف كتيره شويه منها اللى اصبح طبيعى و منها اللى كان over شويه ... هاتكلم عن المواقف بس من غير ترتيب
الاسبوع اللى فات كنت عند صاحبى و حبيبى وجدى مشروع ( و ده شخصيه مشهورة على واحد جامعه ) و كنت باتكلم معاه هو و مدامه اللى كانت زميلتنا فى الكليه برضه ، المهم الكلام ودانا لايام الكليه و كان كل واحد فينا بيقول من اكتر دكتور كرهه فى الجامعه و كرهه ليه و طبعا جبنا فى سيرة الناس كعاده كل المصريين لما مالقناش حاجه نتكلم فيها و انتهت الجلسه بالنسبه ليا انى نايم على السرير عندهم و من كتر تعبى و عشان نومتى الغلط عمال اشخر ( بس العجيبه انى عشان ماكنتش رايح فى النوم أوى كنت سامع نفسى و انا باشخر و كنت متضايق من صوت شخيرى جدا ) و بعديها روحت البيت و اتقلبت كملت نوم
موقف فى يوم بعد كده ، كنت فى Starbucks فى سيتى ستارز و كان قاعد ادامى انا و اصحابى جروب بنات .. عادى جدا ... المهم فجاه لقيت بنتين منهم بيبوسوا بعض french kiss من كتر ما كانت حاميه و مولعه انا قلعت الجاكت بتاعى .. طبعا كل الناس بصوا ليهم بس محدش قال حاجه .. طبعا انا بالنسبه ليا انا مقتنع ان الحريه الجنسيه دى جزء لا يتجزأ من الحريه الشخصيه بس لازم اعترف ان الموقف كان صادم و عشان محدش يقول انى ضد المثليين او معاهم باقول ان الموقف ده لو كان حصل بالصورة دى بين ولد و بنت برضه كنت هاعلق عليه ( امال السينمات و الرحلات و جنب سور جنينه الحيوانات بليل و الشقق عملوها ليه لما هنبوس بعض فى الشارع ، على الاقل يختاروا ركن هادى فى الكوفى شوب يبوسوا بعض فيه مدام مش قادرين يصبروا للدرجه دى ) ... بس بارجع و اقول انه محدش قال حاجه برغم العنتريه اللى بتبان فى مواجهه المثليين .. بس كله كلام ... حاجه اخيره ماعرفش ليه جروب البنات ده فكرنى بمسلسل The L Word لما كانوا بيتجمعوا فى الكوفى شوب بتاعهم
كام يوم كمان و كنت عند صديقى ايمن و مراته و برضه كانوا معانا فى الكليه و فجاه هايدى مراته فكرتنى بموقف انا كنت ناسيه لدرجه الانكار ، و اصل الحكايه انى كنت فى سنه تانيه اول كليه بنت قالتلى انها عايزه ترتبط بيا و انا كنت رافض بس لازم اعترف انه بعد الحاح منها و من ناس تانيه استمر لمده 6 شهور وافقت .. المهم البنت دى كانت مسافرة فى رحله و انا ماشى معاها قبل ما تسافر بيوم و كنا خارجين من الجامعه و بعدين انا كنوع من انواع الوداع قبل ما تسافر بوستها فى الشارع ( شايفين الرومانسيه ) .. حظى الاسود هايدى شافتنى و فضحتنى تانى يوم فى الجامعه ، مش تقول اخويا و ادارى عليه ... المهم هايدى قالتلى على حاجه كنت اول مرة اعرفها ، ان البنت دى يوم ما انا قلت انى موافق ارتبط بيها راحت و كلت ودن البت هايدى و فى الاخر تقولها " تخيلى لما انا و عمرو نبقى متجوزين و هو ماشى طول النهار فى البيت بالشورت ( عشان فى الايام دى البوكسرات كانت لسه ماوصلتش مصر ) .. و ماعرفش اعمل ايه و عمرو بالشورت و ماعرفش اسوى ايه و عمرو برضه بالشورت " لغايه ما هايدى سألتها " هو هيقضيها كلها شورتات ولا ايه ، ده حتى كده الواد يجيله برد ( مش باقولكوا اختى و بتخاف عليا ) " تقوم ترد عليها " اصله طويل و الشورت هيجنن عليه " .. طبعا انا كان اول مره اسمع حوار الشورت ده بس الحق يتقال فرحت بنفسى جدا بعد الشهاده الغاليه دى انى اجنن فى الشورت
و فى الايام دى افتكرت موقف جامد عشته فى اول سنه فى الكليه ... واحد صاحبى كان نازل مشوار و قالى اروح معاه و عشان كنا لسه خارجين من ثانوى كنا متعودين نركب اتوبيسات .. المهم ركبنا الاتوبيس و كان فاضى و قعدنا .. شويه و لقينا راجل قام و نزل من الاتوبيس و بعد شويه الست اللى كانت قاعده جنبه صرخت و قالت ان الراجل سرق منها كيس الفلوس ، طبعا كنا مشينا و لو رجعنا ندور على الراجل كان ممكن نلقى مصباح علاء الدين و مانلقاش الراجل .. الناس بتسأل الست و سرق كيس الفلوس ازاى من الشنطه يا ست ردت و قالت كيس الفلوس كان فى صدرى مش فى الشنطه .. الكمسرى قالها و ماحستيش بيه و هو بيسرقه من صدرك ، الوليه بعبط ازلى لغايه دلوقتى عمرى ماشفته تانى ردت و قالت " حسيت بيه بس ماكنتش فاكرانه حرامى " ... طبعا الاتوبيس اتقلب مسخرة و الناس قعدت تتريق على الست و الشباب و الرجاله فجأه عايزين يروحوا يقعدوا جنبها بس انا نزلت و ماكملتش حكايه الست دى
اخر موقف عشان انا عارف انى ممل و زهقتكوا النهارده كنت من يومين قاعد فى كوستا بتاع المعادى و كان قاعد ادامنا ولد و بنت .. الواد شكله ستايل شويه و البنت شكلها مش أد كده .. قاعدين عمالين يهزروا .. يحط ايده على كتفها .. تحط ايده على رجله .. فى اللذيذ يعنى و فجأه قامت قعدت على حجره و هما بيتفرجوا على حاجه فى اللاب توب بتاعه .. و انا ارجح ان الحاجه دى كانت سيكو سيكو عشان كده قعدت على حجره .. يا اما عشان تدارى عليه عشان هو كان لابس بنطلون قماش كلاسيك ، يا اما الشوق كلها .. و عشان ماكونش سئ النيه جايز كانت عايزه تحس باحساس الطفوله معاه
معلش البوست النهارده فى ناس هتشوف انه سافل شويه .. بس الحاجات اللى انا قلتها والله والله والله بتحصل و كلنا اكيد شفناها .. و اللى هيزعل يعتبر البوست مجرد فضفضه ... سلام

هناك 49 تعليقًا:

magi يقول...

انا مصدومه صدمه ميعلم بيها الا ربنا من الكلام الى قراته فى البوست ده
انت يا بنى كنت فى كليه العلوم ولا فى شرطه الاداب

انت متأكد ان الكلام ده حصل فى مصر ولا دى احلام يقظه ولا ايه

كلامك محسسنى ان الناس ماشيه تبوس بعض فى الشارع

كلنا شفناها فين ده وامتى يعنى ؟

Che يقول...

magi
يا ترى ايه سبب الصدمه ... و والله كنت فى علوم و ممكن تسألى عمتى ستيته اهى دكتوره عندنا فى الكليه و ممكن تاكد ليكى كلامى
انتى محسسانى انك انتى اللى فى دنيا تانيه و ايوه ده بيحصل فى الشارع و فى الجامعه .. انا لسه ماعرفتش دفعتك كانت ايه بس بما انى قعدت فى الكليه كتير ففى احتماليه انى اكون صادفت دفعتك و لو كده ممكن احكيلك على ناس من الكليه مش اتكلم فى العام و على اللى بيحصل بره
منورانى للمرة التانيه فى نفس اليوم يا جميل

magi يقول...

بص انا كنت محدوفه فى علوم فى الاقاليم حاجه قرف يعنى مش نواحيك خالص

فى دنيا تانيه ليه انا الى من ساعه مدخلت المدونه دى اكتشفت انى مؤدبه زياده عن اللزوم دانا لما كنت بكلم زميل واحده صحبتى عشان يصورلنا ورق محاضرات كنت بحس انى ارتكبت جريمه فى حق الانسانيه والاخلاق والاداب العامه ههه بس اقولك الحمد لله انى مشفتش الكلام ده ربنا رحمنى

Che يقول...

و النبى ما تقوليلى يا ماجى انك كنتى فى علوم المنصورة ... هههه
و على فكرة الحاجات دى موجوده فى كل مكان بس لازم اعترف انها باينه أوى عندنا فى القاهرة و اسكندريه
و فعلا الحمدلله انك ماشفتيش الحاجات دى

ستيته حسب الله الحمش يقول...

مش مفوتهالك
لامنكن ابدا افوت البوست بدعوى انه كله كلام يخليني اخجل
ادخل يا خجل وتعالي ياستيته يا مفترية

اولا مكتئب؟ تعاذك الله من الأكتئاب وليه وعلشان خاطر ايه تكتئب ياوالدي ده انت في اجمل سنين العمر متعك الله بالصحة والعافية وبعدين لسه مدخلتش دنيا علشان الولية مراتك تجيبك لمس اكتاف وتعرفك معنى الأكتئاب

طبعا مشاهد العشق والهوى دي نفسي اعرف انا عينيه عمراها ما شافتها
هل هذا لأني عميا ؟ ولا لأن عيني لا تبحث حولي ؟ ولا لأني ستيتة برئية؟
بس اقسم بالذي رفع السماء بغير عمد ترونها لو شفت مشهد ستار بكس لكنت فرجت عليهم امة لا إله إلا الله وده ليه؟
يمكن علشان صعيدية ولسه عندي دم؟ يمكن علشان لسه عندي بقايا اسلام بيقول من رأى منكم منكرا وحسبي الله في الدكور اللي كانوا بيتفرجوا؟ يمكن علشان على ما يتنشر في الصحف خبر الفضايح اللي ها اعملها ده يكون رادع لأمثالهم ويروحوا يداروا نفسهم في حيطة ربنا يوقعا عليهم؟ والأحتمال الأكبر علشان ان شاء الله ربنا مايخسفش بينا زي آل لوط؟ ولا سعدتك شايف ايه

يوه يا عمة ده انتي مملة وقديمة قوي في الدنيا ومعندكيش مروتة ولا تؤمني بالحريات السخصية؟

ايوه لا أؤمن الا بما انزل في كتاب الله وملعون ابو الحريات السخصية ولا احنا منخدش من الغرب غير العفن الأسود "الأسبراجلس" ونسيب العلم والفضاء والذرة

البت كانت بتحلم بيك بالشورت؟ عادي يعني دي بتحصل في كل العائلات وانت كنت اعقل من دخول القفص بدري وفلسعت
وبعدين مامتك يعني ليه مش بتتغزل في جمال سموك زي اي حماده عزو مصري؟ كلنا طول النهار نقول للولاد تبعنا "ياحلاوتك يا دامالك خليت للحلوين ايه؟"

بالنوسبة لكوستا المعادي كويس والله انك لقيت فيه ترابيزة
وانا لما ظروفي السودة بتوديني كوستا دايما اسأل نفسي "أيه ميزة هذا المكان عن أي مكان آخر؟ الاقي اللي عزمني يقول استيلش؟؟؟؟؟؟؟؟ ياخي طظ في الاستيلش وقررت أني لا أجلس الا على قهوة حنتيرة الي في دار السلام .. وده ليه؟ علشان قهوة بلدي وانا احب كل شيء يتبع بلدي عاداتا وسلوكا ومجدعتا

وملعون أبو الأستيلش والتخنث ورجالة آخر زمن بتوع البوكسر

وسلم لي ع التروماي

Che يقول...

يا مراحب يا عمه .. عامله ايه
ايه الجبروت و العافيه اللى فى الرد دى .. اللهم لا حسد
سعادتى مش شايف اى حاجه .. انا عارف انه ربنا هو اللى بيحاسب العباد مش هما اللى بيحاسبوا بعض .. و بعدين تفتكرى انهم مثلا مش حاسين او مش عارفين ان ده غلط او حرام .. بجانب انى استغربت لما لقيتك بتقولى انك مش مؤمنه بالحريه الشخصيه و بتؤمنى بكتاب الله مع انى زى حضرتك مؤمن برضه بكتاب الله اللى فيه ايه بتقول " من شاء فليؤمن و من شاء فليكفر " تفتكرى بعد صلب العقيده و اساسها و بعد الايه دى فى حريه شخصيه او ديموقراطيه اكتر من كده .. مش صح ان احنا جبنا الحريه الشخصيه من الغرب .. الصح اننا جبنا بعض اسوأ عادات فى الغرب بس ماجبناش الحريه الشخصيه
و بعدين مامتى مش بتقولى يا حلاوتك و كده عشان انا قاعد لوحدى ... و بعدين البوكسر بأه شعار المرحله حتى بيبقى باين من تحت البنطلونات الساقطه بتاعت الشباب البيجى بيجى اللى بيروح و يجى
سؤال اخير ... هى قهوه حنتيره دى فى دار السلام الجزيرة ولا الملأه
منورانى و منوره المدونه دايما يا عمه
قبل ما انسى ... ماجى علومجيه زينا يا عمه

ستيته حسب الله الحمش يقول...

ربنا قال من شاء فليؤمن ومن شاء فليكفر

حلو قوي قوي قوي الموضوع ده

طيب لما كان اللي بيكفر بيكفر كان من حقه عادي خالص في بلاد الأسلام يجيب عاداته ويحطها اما عيون المؤمنين

جاوب "اجباري"بمقال طويل
اثبت انه في بلاد الأسلام في القرون الأولى ايام قوة الأسلام كان من يكفر يستطيع فعل الفاحشة والمنكر على قارعة الطريق؟

اجابة مايعة اسقطك
اجابة غلط ارجعك علوم

اهلا ماجي معلش دخلتي وسط العاركة

MaNoOoSh يقول...

انا كمان مصدومة وأيوها صدمة من الكلام دة.. طب الحمد لله انى قررت اخاصم الخروج من زمان اللهم الا مع الأهل او اقرب الاصدقاء الى غلاوة الأهل علشان مشوفش المناظر دى
مش عارفة ليه مع انى طول عمرى مقتنعة بكلمة حرية شخصية وان كل انسان بيتحمل نتيجة اختيارة لكن بردو انت حر مالم تضر واكيد ناس كتير ممكن تتضر من المواقف دى فلازم الواحد يوقفهم عند حدهم وعلى رايك امال هم اخترعوا الحتت الضلمة والشقق المفروشة ليه
ههههههههههههه
والله هم يبكى وهم يضحك
لأ صدقنى مش هينفع نسكت على اللى بيحصل دة لأنة هيسحب المجتمع من سىء الى العن وأضل سبيلا
وربنا يستر علينا وعليكى يا مصر
وعلى العموم بعد كدة لما تكتئب متبقاش تروح الحتت المثيرة دى (للاكتئاب طبعا.. اوعى تفهمنى غلط) تانى
المهم تخرج من الاكتئاب بقى وتحس بالسعادة تانى.

Tamer Diab يقول...

ايه يا عم تسي انت مستقصدني يا عم
مره تعليق عن سوتيتة ومره بوست يغمني كده
ليه يا عم الأكتئاب ده بس
أنا شفت ده فعلا وبالأخص موضوع البنات الي بتبوس بعض دي بس انت فصلت اوي ليه كده
بس بصراحه الي موتني م الضحك
موضوع الست بتاعة الأوتوبيس ولعلمك عندي قصة شبيه لدي بس مينفعش احكيها خاااااااااااالص مسخره بجد بقي
الموضوع اصله كان متطور اكتر من كده بمراحل
عموما انا بحب المواضيع الي بتسير الجدل دي :)
ابقي نورني يا عم الحاج تشي

Tamer Diab يقول...

عارف موقف البنات ده شفته مره فين ؟
في قاعة الظل بتاعة ساقية الصاوي
كان يوم حفلة روك
وطبعا كل الي حاضرين من نوعية عجيبة الاشكال والألوان والشعور
ولقيت مجموعة شباب واقفين في قاعة الظل وبعدهم بمترين والله واحد ساند ضهره ع الحيط والبت واقفه قدامة بضهرها وحاضنها وبيبوسها
يعني م الاخر ناقصه سرير ونفرح بالنونو
بس عشان اكون صادق طلعت تييييييييت امه والشباب الي كانت واقفه طلعوا ما شاء الله ما شاء الله أرايل كلهم وبيزعئوا معايا
ولكن الحمد لله بما إن شكلي يسمح اني اكون حاجة مهمة في البلد الي عمرنا مهنبقي مهمين فيها دي
دخلت طوقت فيهم صح وهما كده كده كانوا فرافير اخر حاجة وانا طبعا شبراوي
تخيل منظري بقي ومنظرهم
مكنش ناقصني غير كذلك وعلي دماغ الواد
ده غير الافاظ الحميدة الي سمعتهاله هو والبت والعيال

hasona يقول...

السلام عليكم

مكتئب وكئيب - ( ماذا تبكي من تصريف هذا الفعل ) كلنا مكتئبون
طابع الكآبة بدا يغلب علي حاجات كثير فينا وفي حياتنا و معظم ما يحيط بينا

وكأنه الداء والدواء
،،،
عمال تشخر - طبعا لحقت نفسك و قدمت السبب بسرعة (علشان نومتي الغلط)بس الغريبة انك سامع ومتضايق ومش عملت حاجة
،،،
الحرية الشخصية ( الحرية الجنسية ) مش في كل الاماكن ومش في كل الاوقات
وبمبدأ ( حرية أصبعك تقف عند عيني ) مش ينفع طبعا
أنا مش باناقش موضوع المثلية - لكن مش من الطبيعي أن أي انسان يتجرد من كل ملابسه ( وأكرر كل ملابسه ) ويكون كما ولدته أمه ( بس الفرق انه كبير دلوقتي عقليا وجسمانيا) ويعمل كده ويقول دي حرية شخصية
،،،
شكرا لك لأني باعتبره فضفضة عن واقع مرير
و ( شعب أسف أن أقول سلبي )لأننا استوردنا حاجات كثيرة ولم نطبق منها الا ما يخدش حيائنا - ويضيع غيرتنا - وخوفنا علي بعضنا

أشكرك - لأني بأعتبره دعوة للتغير
والتغير يبدأ من الداخل
فيه حاجات كثيرة غلط - وبيصدر عنها أمور خطأ( أوعي تقول أني بألمح لموضوع شخيرك وانت نايم) والله مش في نيتي خالص))
ومع ذلك لم نواجها - حتي أصبحت الان عادي خالص- و اللي جاي أفظع

يعني الحاجات اللي أخدناها من الغرب أساءت لنا ولكرامتنا- أصبحنا مجرد مستهلكين ومقلدين لا أكثر

أسف علي الاطالة - لكن هذا أقل ما يقال


شكرا علي موضوعك
وتقبل تحياتي

Eng. Ahmed Abo El-Ella يقول...

هو ده في اطار الحريه الشخصيه؟
طبعا لأ
لأن حدود حرية الآخر تقف عن طرف حريتي
وأنا من حريتي أني مشفش المنظر ده

مياسي يقول...

واااو عالبنتين وواو عليك!!! شو هاد؟!!

الصحيح شي من الآخر

أقسم بالله العظيم اني دخلت البكالوريوس وقربت أخلص ماستر وعمري ما شفت أي شيء مخل لدرجة إني بلشت أشك بحالي!!!

يا ربي مش معقول أكون بالجامعه وما أشوف شي بس هاد اللي كان يصير معي!! اتعقدت جد!!

وبالنسبه للبنتين؛ ما عمركيش شفت شباب سوا عشان أنا ملاحظة انو كل قصصك مع بنات بس:)

بس هلأ جد برأيك لو نفس الموقف صار مع شابين؛ برأيك ايش كانت ردة الفعل رح تكون؟؟

انت كنت مكتئب؟ ممم وانا كمان عندي اكتئاب خفيف؛ يمكن عشان هيك كنت فاهم انو بوستي الأخير كئيب

صحيح يا عمرو؛ انت شو بشتغل؟

Zika يقول...

حلوه اوي حكاية البوكسر هيبقي شعار المرحله ده ( اصل انا بقرا البوست بالتعليقات )
المهم
انا عايز اقولك بحكم شغلي انا كنت لفتره باشتغل مدرب رقص في احدي النوادي الصحيه زي ما بيقولوا عليها بالعربي , ( معناها بالعربي معفن اوي ) صدقني اللي انت بتقول عليه ده ومصدوم منه كنت بشوفه يوميا وبكل انواعه
لا وكله كوم واللي جايين يتعلموا رقص وفاكرين انهم اول ما ارقص مع واحده هاقوم قالب نفسي جون ترافولتا وهي تبقي نيكول كيدمان ونحب بعضينا وشغل ما تيجي نرقص ده

الفكره ان فيه ناس كتيره عايشه لوحدها يعني مش حاسه ان فيه ناس ان ممكن حد يعترض ان ممكن حد يقول كلمه سخيفه
وبعدين " اذا بليتم فاستتروا " مش لازم
سيااح يعني
اما بالنسبه للبوس والله انا عندي نظريه دق تكون صح وقد تكو غلط بس البوس بيفرق يعني ملا تسلم علي واحده صاحبتك في الشارع وتبوسها غير لما تجيب واحده تقعد علي حجرك في كافيه زي الواد بتاع كوستا ده
ولا ايه

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

عاشقه وغلبانه يقول...

اصبر بقي اما ابطل ضحك وابتدي في قله الادب
اعذرني اصل الكلام مايتفوتش
ستيته صعيديه وقالت رأيها
انا بقي فلاحه وما ادراك وما الفلاحين

اولا موضوع الاختين علي قد مافهمت وقله الادب دي
دي مش حريهع شخصيه ابدا
حريتي الشخصيه تتوقف عند حدود حريه الاخرين
وبمنظرهم اللي يخلي الواحده ترجع من القرف يبقوا تعدوا علي حدود حريتي
وانا ماسيبش حقي ابدا
كنت عايزه المح السفاله دي ونشوف رد الفعل


موضوع الست المحترمه بتاع الاتوبيس مش عارفه ده غباء ولا قله ادب
عييييييييييييب يابشر


الاخت بتاع الشورت .... هي البنات جرالها ايه
دي حتي لو في خيالها كده تتنيل علي خيبتها ومش تحكي

اخيرا بقي بخصوص كوستا والاتنين اللي فيه
اذا بليتم فاستتروا
جاتكوا القرف مليتو البلد

Che يقول...

عمتى ستيته انتى نفسك رديتى على نفسك لما قلتى ايام قوة الاسلام مع تحفظى ان الاسلام مش ضعيف انما احنا اللى ضعفا و زى الحديث ما بيقول بدا الاسلام غريبا و سيرجع غريبا و احنا فى بدايات عصر غربه الاسلام للاسف الشديد
اما بالنسبه لموضوع العادات فى البلاد اللى الاسلام دخلها فهتلاحظى انها كلها بلا استثناء بعد خروج الاسلام منها ارتدت الى عادتها الاولى و كمان اشتدت فى المغالاه فى العادات دى
اتمنى انك ما ترجعنيش الكليه تانى عشان انا ما صدقت خرجت منها
نورتينى يا عمه و مستنى تعليقاتك الثوريه دايما ان شاالله نتحبس فيها

Che يقول...

منوش
فعلا كان قرار سليم انك بطلتى خروج غير مع الاهل و الاقربون بس المشكله ان الحاجات دى موجوده فى كل مكان دلوقتى
و بالنسبه للموقف اللى لازم ناخده انتى شايفه ايه الموقف اللى ممكن يتاخد .. يعنى فى الاخر انتى هتلاقى من حقك انك ترفضى التصرفات دى لانك مش من اولى الامر الشرط اللازم شرعا لتغير الامر بيدك .. بس فعلا انا لسه مقتنع ان دى حريه شخصيه مع اختلافى فى اسلوب التعبير عنها
نورتينى يا جميل و ما تغيبيش كتير علينا

Che يقول...

اولا يا عم تامر انا مش مستقصد حد والله و انت بالذات يا باشا بس الفكرة كانت فى كام يوم سواد و راحو لحالهم و اكيد الست بتاعت الاتوبيس دى كانت فلته و فرحت اوى لما حكيت الموقف بتاعت الساقيه انا اتبسطت لان الناس حسستنى انى باتكلم عن شئ خرافى مش موجود بس الحمدلله ربنا بعتك ليا عشان تاكد للناس دى انى لسه عاقل فى بلد مجانين ... كانت تعليق جامد على مرتادى الساقيه مع ان كلهم مش كده بس فعلا قطاع و نسبه كبيره منهم بالشكل اللى انت وصفته ده و انا لما بطلت اروح قالولى اصلك بلدى من دار السلام و مش عارف تفهم الثقافه مع انى شايف انى مش لازم اكون من القطاميه هايتس مثلا و مش لازم برضه اروح الساقيه عشان اكون مثقف و كنت ارد عليهم و اقولهم انا ابتديت قرايه من و انا عندى 7 سنين يا بقر و انتو جاين تكلمونى على الثقافه دلوقتى
نورتنى يا عم تامر و اجدع سلام لشبرا و الدوران و خلوصى و اكيد هاجى ارد الزياره يا باشا

Che يقول...

حسونه باشا منورنى دايما
الاكتئاب و الكآبه ده حالات عاديه عندى زى ما هى اصبحت عاديه عند كل الشعب تقريبا
بالنسبه لموضوع الشخير فده و الله السبب ده غير انى عند انسداد مزمن فى الجيوب الانفيه و ايام الشتا و البرد بتبقى عذاب عليا و على اللى خلفونى و لسوء الحظ الانسداد المزمن مالوش علاج دائم عشان كده مش فى ايدى حاجات كتير اعملها
انا معاك انه فى ناس بتسئ فهم و استخدام مبدأالحريه الشخصيه
بالنسبه لانك فاهم انى بادعو للتغيير فانا اسف انى اقولك انى مش بادعو لكده لانه مفيش حاجه هتتغير اللهم الا التغير للاسوء لاننا زى ما انت قلت شعب سلبى كل الحكايه كانت مجرد دردشه و فضفضه مش اكتر
و يا سيدى الفاضل طول زى ما انت عايز ادينا بندردش و بنتكلم
شكرا لمرورك و منتظر زيارتك دايما

Che يقول...

باشمهندس احمد
بالنسبه لتعريف الحريه الشخصيه فممكن نختلف فيه للصبح و بالنسبه لموضوع انك من حقك ماتشوفش المنظر ده فده صحيح .. بس التعامل هنا يتم على طريقه المحطات الفضائيه ، يعنى مش عاجبك ودى وشك الناحيه التانيه او اعمل مش شايف كده
نورتنى يا باشمهندس

Che يقول...

مياسى القمر
مش انتى لوحدك اللى دخلتى و خلصتى من غير ماتشوفى بس الحمد لله هتلاقى فى التعليقات اللى فوق و اللى تحت اللى يؤكد كلامى و ان اللى انا قلته ده موجود و فيه اكتر منه كمان
بالنسبه لموضوع انى شفت شباب قبل كده فده حصل مرة واحده و كانت فى قلب جامعه القاهره فى كليه تجاره قدام كافتيريا عند باب تجاره شفت شاب داخل على مجموعه شباب بيسلم عليهم بالايد و لما وصل عند واحد منهم باسه بوسه french و كان الموقف عادى جدا بالنسبه للشباب و البنات اللى واقفين لدرجه انى انا اللى حسيت انى مختلف و متخلف بينهم
و بالنسبه للاكتئاب فوضع طبيعى اننا نكون احنا الاتنين مكتئبين ، مش جوزاء زى بعض
و بالنسبه للشغل فانا اشتغلت حاجات كتير انما حاليا بشتغل مدير للمستشفى بتاعت والدتى
مستنى زيارتك على طول يا قمر

Che يقول...

زيكا البرنس
فكرتنى بايام ما طقت فى دماغى انى اتعلم فلامنجو و فعلا رحت حجزت فى مدرسه لتعليم الرقص اللاتينى فى الزمالك كانت صاحبتها ست من البرازيل على ما اذكر و يا لهوى على اللى انا شفته هناك .. اكتشفت انى فعلا و حقيقه من طبقه تانيه و من طينه تانيه غير الناس اللى هناك
بالنسبه لحكايه الناس اللى عايشه لوحدها فده صح بس فى ناس واخده الحكايه بلطجه و اللى مش عاجبه يورينى نفسه
و بالنسبه لموضوع البوس فانا باتفق معاك فيه ( مع ان ده هيفتح النار عليا ) لان فعلا لما اشوف ناس صحابى فى نادى او كوفى شوب و اسلم عليهمو بوس و سلامات و طيبون و كده اكيد غير انى اخد واحده على حجرى من باب عاطفه الابوة اللى عندى
منورنى و محسسنى بالكسوف انى لسه مازورتكش لحد دلوقتى

Che يقول...

عاشقه حبيبه عمتى ستيته
انا مستنى لغايه ما تبطلى ضحك و تمسكى نفسك
الرد على موضوع الحريه الشخصيه ده ممكن هما يردوا عليكى و يقولولك بتبصى علينا ليه و لو مش عاجبك ماتبصيش .. و بالنسبه لرد فعلك فانا فعلا لما اخرج المره الجايه هاعزمك انتى و عمتى ستيته عشان نفسى اشوف خناقه يمكن اعرف افش غلى فيها
الست المحترمه بتاعت الاتوبيس انا متاكد ان الموضوع كان غباء و عبط منها مش قله ادب لانها لو صايعه كانت لمت الدور من الاول
الاخت بتاعت الشورت انا مش هاعلق عليها و بالنسبه لسؤالك البنات جرالها ايه فانتى ممكن تسالى عمتى ستيته
الاتنين بتوع كوستا انا معاكى انه فعلا اذا بليتم فاستتروا
و انا بقرا كلمه جاتكوا القرف مليتوا البلد حسيت انك تفيتى على الشاشه ... هههه
منورانى على طول

GiGi يقول...

بص بجد انا كان ممكن ماارد على البوست ده وخلاص
وعلى فكره انا قريت فيه يمكن تلات سطور بالكتير
ونفسي ربنا يهديك
وعلى فكره المدونه دى الصدقه الجاريه اللى فى عمرك اذا كان كلها كده فشوف الناس عتفضل تقرا ايه وانت هتاخد سيئات اد ايه
هتقولى دى حياتى ومواقف حصلت وانا بنقلها
اقولك طيب ماانا ممكن بقى اجيب صور ممثله عريانه واقول دى موجوده
او اوصف مشهد حصل وبيحصل واقول اصله اتعمل ماشي وانا ليه اخليه ايدى تكتب حاجه زي دى
غير كده انت حر فى حريتك لكن حريتى انا او اي بنت انها تقرا كلام زي ده سورى مش من حقك
اسفه لانى عارفه انى شديده بس فعلا انت ماكنتش كده

Che يقول...

GiGi
اولا انا متشكر انك شرفتينى بالرد عندى
اجى للرد على تعليقك
بالنسبه لدعائك انه ربنا يهدينى فربنا يسمع منك و نحن و اياكم يا جيجى
و بالنسبه لتعليقك ان المدونه دى الصدقه الجاريه فى حياتى فانا اسف انى اقولك انك فعلا ما تعرفيش حاجه عن حياتى ولا عن الحسنات و السيئات اللى انا باعملها فى حياتى عشان تحكمى انها الصدقه الجاريه فى حياتى
بالنسبه لانك تجيبى صور عريانه او توصفى مشهد حصل فدى حريتك الشخصيه انك تكتبى اللى انتى عايزاه فى مدونتك
بالنسبه لكلامك انك و اى بنت انا مش من حقى افرض عليكوا انكم تقروا الكلام ده فده صح لانى اكيد مش باشدك من شعرك او مداينك بفلوس عشان تدخلى تقرى و تعلقى ، اما بالنسبه لموضوع البنات التانيه فانا شايف انك عممتى لانك هتلاقى بنات معلقه عندى
اخر حاجه عايز اقولها انى رديت عليكى بدافع الاحترام انك كتبتى تعليق طويل بتقولى رأيك فيه مع انك زى ما انتى قلتى انك قريتى تلات سطور بالكتير يعنى ماهتمتيش تقرى البوست للاخر عشان تعرفى انا باكتب عن ده ولا بادعو الناس انها تعمل ده ولا ايه حكايتى بالظبط
فى حاجه عايز اقولهالك انه بما انك متدينه أوى كده فاكيد انتى عارفه انه ربنا اللى بيحاسب العباد مش العباد اللى بيحاسبوا بعض
و اخيرا ما تتأسفيش على حاجه لانك فى النهايه كنتى بتقولى رايك
اما موضوع انا كنت كده او ماكنتش كده فانتى لو متابعه هتعرفى انى عمرى ما قلت على نفسى انى مؤدب او خجول او اى حاجه تانيه .. بس انا مقتنع انى لازم اعامل كل واحد حسب معاملته ليا
نورتينى و مستنى تعليقاتك دايما

MEDUS يقول...

بص ما الاخر انت راجل صح وبتتكلم صح وكله كله صح واللي يبص من الشباك وميشوفش يبقى ايه؟؟؟

Che يقول...

MEDUS
ربنا يكرمك يا باشا .. و انا اظن اللى يبص من الشباك و مايشوفش يا اما يكون اعمى او يكون ..... و كل واحد يفهم النقط زى ما هو عايز
نورتنى يا باشا

GiGi يقول...

ياعزيزي وانا معلقتش الا لانى بحترم سيادتك وانت عارف
وبعدين انت دخلت فى مليون حاجه
موضوع الصدقه الجاريه ماقلتشانك وحش او كويس لانه ببساطه مش حقى لكن بنبهك انها غصب عننا كلنامدوناتنا دى صدقه جاريه موجوده بعد مانموت طيب هتبقى ايه بقى واللى فيها ايه كل واحد عارف كاتب فيها ايه
ثانيا موضوع التعميم يااستاذى العزيز ماليش دعوه ان فى ناس علقت بس فى اكتر ماعلقش ولا ايه رايك
ثالثا انت ماتقدرش تقول انى متدينه او لا وبالتالى انك بتقولى انى متدينه الله اعلم ممكن اكون حد وحش جدا يعنى ببساطه انا مش بقولك كده لانى اللى مفيش زيي خالص
ياريت ابقى حد كويس انا بس بحترمك جدا وبتمنى ازور مدونه زميلى العزيز على طول ومايبقاش فيها حاجه احس انها اخجلتنى
رابعا موضوع انى حره احط موره وحشه او لا اكيد انا مش حره انى اعمل كده وزى ماقلتلك فى حريه نس ادامى لازم احترمها وثانيا برده زي ماقلتلك دى صدقه جاريه كل كلمه ولا صوره سيئه وحد قراها او شافها مع فى ميزانى الحسنات بقى ولا السيئات على حسب انا بعرض يه
خامسا لازم تعرف انى بحترمك جدا وماقلتش ده الا لانى شايفه ادامى انسان رائع بكل ماتعنى الكلمه فلما فاعتقد انى لازم انبهك لما يكون فى حاجه غلط اعتبرها من وجهه نظرى بس ايا كان الهدف خير
على فكره ماكانش يهمنى انك تنشر تعليقى اللى فات انا كنت بوصل رساله لاخويا العزيز وبس وماكنتش عايزه حد يقرا
وبرده زي ماتحب المره دى تنشر او لا
انا بكلم اخويا وزميلى وبنصحه نصيحه بينى وبينه
اسفه اذا كنت قلت حاجه دايقتك لكن فعلا مش قصدى غير الخير وربنا اعلم

Che يقول...

الصديقه العزيزه جيجى
اولا انتى اهلا بيكى فى اى وقت لانك فعلا من الناس المحترمه اللى مش بتحول الخلاف فى الرأى الى خلاف شخصى و بتتكلمى بمنطقيه و ده شئ قليل فى ايامنا دى و انا احترم ده جدا و انا فعلا مقدر انك اتكلمتى معايا بدافع انك بتدخلى على مدونه انسان عزيز ( و ده شئ يشرفنى ) و انك عايزة تحسى انى ما خدشتش حيائك بكلمه كده او كده و عشان الناس المحترمه اللى زيك انا كتبت فى اخر البوست ان اى حد شاف البوست سافل او over شويه يعتبره مجرد فضفضه مش اكتر يعنى مش دعوه للاصلاح او دعوه لعمل الشئ ده كل الموضوع كنت باسجل مواقف عشتها يعنى كنت باتكلم من دور الراصد لظاهرة موجوده فى حياتنا و على فكرة فى مدونين كتير اكبر منى سنا و مقاما علقوا على نفس الظواهر بس من زاويه تانيه
و بالنسبه لنشر التعليق انا بانشر اى تعليق و خصوصا للناس المحترمه اللى زيك عشان فى الاخر انا مش ملاك و باغلط و مش عيب انى اتعلم من غلطى و ان الناس العزيزة عليا و اللى انا عزيز عليهم ينبهونى لانه فى النهايه محدش عايش فى الدنيا دى لوحده
و انتى مش محتاجه للاعتذار عن اى حاجه لانك قلتى رأيك بكل ادب و احترام سواء انا متفق مع الرأى ده او مختلف معاه
انا اللى اتمنى انى ماكونش كنت حاد اوى فى الرد بتاعى و اسف اذا ضايقتك فى اى جزئيه من الرد
نورتينى و مستنى تعليقاتك المحترمه دايما

مثلية فقط يقول...

كلامك مهضوم كثير

برافو انو في ناس بتحترم حرية المثليات


بتمنى تكون طلعت من حالة الإكتئاب


خالص تحياتي

Che يقول...

مثلية فقط
الفكرة مش فكرة احترام حريه المثليات او المغايرات ، الفكرة فى مبدأ احترام الحريه بوجه عام
نورتينى

مثلية تبحث عن ذاتها يقول...

دايما بشوف تعليقاتك عند بلوجرزو بقول الشخص ده دماغه عجباني بس اول مره ازور البلوج وفعلا البوست عجبني جدا زي ما توقعت

سعدك بزيارتك جدا

GiGi يقول...

عجبنى قوي مغيرات دي
شفت انا متابعه حتى التعليقات ازاى

Che يقول...

مثلية تبحث عن ذاتها
شكرا على مجاملتك ان دماغى بتعجبك لانها تقريبا الشئ الوحيد اللى كان معايا من زمان و هيفضل معايا لاخر الزمان
و سعيد انى كنت عند حسن ظنك و البوست عجبك
شرفتينى بزيارتك و مستنى زيارتك دايما

Che يقول...

عزيزتى جيجى
تعبير مغايرات ده تعبير عربى قح و هو المضاد للمثليات
و انا سعيد انك بتابعى التعليقات لان ده معناه ان اختلافنا كان على اساس محترم مجمله الاختلاف فى الرأى مش اختلاف شخصى
مستنى تعليقك على البوست الجاى اللى هينزل كمان شويه
منورانى دايما

Desert cat يقول...

هو كل زمايلك متجوزين بعض
انت بس اللى خرجت من الكلية من غير ما تتجوز زميلتك اللى كانت بتتخيلك بالشورط
انا حاسه اننا فى مصر يورك
:))

Che يقول...

قطه
والله كل اصحابى متجوزين من الكليه ماعدا واحد فيهم اتجوز من كليه آثار بس برضه كنا نعرفها
و انا الوحيد اللى ماتجوزتش من جوة الكليه او من براها
و الاخت بتاعت الشورت اتجوزت ليها اكتر من سنه دلوقتى
ماتغيبيش عليا عشان باحس بوحشه
نورتينى يا عسل

فتافيت يقول...

ههههههههههههههههههه

هو انت تكتئب تفضح الدنيا كده .. ليه بس

كوستا انا بموووت في بانيو الكابتشينو بتاعته.. الفناجين بتاعته عندها سمنة مفرطة

ويا شورتاك يا سيدي.. استر نفسك والمدونات مليانه عوانس يا ابني وطويل وبشورت انت كده فتنه .. استر نفسك احنا في امشير.. بس قوللي الشورت لونه ايه عااااااااااااااااا

ام عن الفرنش كيس.. يا مررررري كده علنا في ستي ستارز .. امل لو كان ستي ضلمة كانوا عملوا ياه؟؟؟ سؤال مهم ويطرح نفسه ويحتاج اجابه نيههههههااااااااي

بس يا عم الله يبارك لك يعني البت تتحايل عليك 6 شهور علشان تكلمها.. وفجأة كده الرومانسية تاخد حدها وتبوس في الشارع لا اخص عليك اخص.. امال السكاشن معملولة ليه؟؟ .. ولا معامل علوم مبنية ليه؟؟ .. تصدق زعلت منك

فكك يا باشا من كل حاجة وكبر دماااغك ملعون ابو الاكتئاااااااااب

ربنا يفرح قلبك .. وهو فقراير بغباوته والله محدش مصدقني

كبر يا رفيق عمرووو

فتافيت يقول...

اه صحيح.. هو انت بتشخر وانت نايم؟؟
ليه يا ابني توقف حالك؟؟.. انت مش عارف انها خلعت جوزها بسبب الشخير.. يلا خير
يارب محد ياخد باله بقى انك بتشخر وانت نايم

فتافيت يقول...

اه الوليه بتاعة الاتوبيس ديه حكااااااااااااية وكتاب الله

ايه الوليه ديه.. زعلت على كيس الفلوس .. يلهووووووووي

ده حتى حقه الشرعي قدم خدمة وخد تمانها

انا معنش جاية هنا تاني لاني شكلي هاهيس موت

وانا اصلا ماستورش في ايوتها مدونة

Che يقول...

فتافيت
اهو انا ساعه ما بكتئب باكون بايخ ... هههه
بالنسبه للبانيو بتاع الكابتشينوا اكيد انتى بتتكلمى على الحجم الصغير لان الحجم الكبير ممكن 3 اصحاب يشربوه سوا
و بالنسبه لموضوع الشورت ده فانا والله كنت اول مره اعرفه و قلت التعليق اللى اتقال عليه بس .. و بالنسبه للفتنه انا عارف انى فتنه على طول بشورت او ببنطلون ... هههه
و بالنسبه لموود الرومانسيه فده كان عشان نسبك الدور
و عندك حق ملعون ابوه الف مره الاكتئاب
بالنسبه للشخير فده غصب عنى والله .. انسداد مزمن فى الجيوب الانفيه و بتعذب فى الشتا بس اعمل ايه .. ابطل اخد نفسى عشان انتو ترتاحوا
الست بتاعت الاتوبيس دى كانت جكايه والله بس شكل الكيس كان مليان .. طبعا اللى كان مليان هنا كيس الفلوس عشان دماغك ماتروحش لبعيد ... ههههه
و اتفضلى و هيسى زى ما انتى عايزة يا فندم ... مش هاقولك زى مدونتك انما هى مدونتك و قولى اللى انتى عايزاه
رد طويل على 3 تعليقات زى السكر
مستنى ردودك دايما يا قمر

سارة نجاتى يقول...

أنت مرزق يا حبيبى , كل ما تمشى فى حته تلاقى مناظر

الصراحة احنا كمصريين بنحب ندخل أوى فى خصوصيات الناس , يعنى ما تقعد على حجره و لا ان شاء الله فوق راسه احنا مالنا ؟؟, لكن الصراحة أن لو من ستاربكس المفروض كانوا يكرشوا البنتين دول أو أى بنت و ولد بيبوسوا بعض لأنمجتمعنا غير مستعد لسه لهذا القدر من الحرية الشخصية ( و لا اى قدر الصراحة ) و أن لا أخفيك أنى منهم برده .
أه بالمناسبة الاجابة " الشوق كلها "
لأن مش معقولة ح يفرجها على مناظر يعنى
بس بالمناسبة هايدى دى مش كويسة ’ المفروض مش كانت سيحت للبنت من غير موافقتها سواء فى الرحلة أو فى حوار الشورت ده , ازاى أصلا قدرت تعيد لك الكلام ده فى وشك ؟؟ههههههه

سلام يا باشا

Che يقول...

سارة
انا عارف انى مرزق بس كمان عارف ان كل مكان فى الحاجات دى لو حتى بدرجات مختلفه.. و بتوع ستاربكس كانوا ممكن يخافوا عشان انتى عارفه كلمتنا المشهورة انت مش عارف انت بتكلم مين لانه ممكن فعلا يكون واحد ليه قيمه فى البلد دى ... و موافقك جدا على موضوع اننا لسه مش مستعدين لاى قدر من الحريه الشخصيه .. و يمكن تكون البنت بتاعت كوستا الشوق كلها زى ما انتى قلتى ، علم هذا عند ربى
اما هايدى فسيحت للبنت على حاجه بعد تقريبا 9 سنين او اكتر يعنى مش تسييح زى ما انتى متخيله ، و بالنسبه لهايدى فانا اعرفها و اعرف جوزها و اعرف اهلها واحد واحد و نفس الكلام بالنسبه لجوزها و زياده على كده اعرف اصحابهم اللى هما صحابى فى نفس الوقت من 12 سنه تقريبا او اكتر شويه يعنى احنا اكتر من الاخوات دلوقتى و ربنا يديم علينا الاخوة دى
منورانى يا جميل

سمكه واحده يقول...

هههههههه انا بحس اني لما بدخل المدونه دي اني بتفرج علي افلام انت بتروح فين يابني والحجات دي موجوده عندنا هنا؟
اشوفها فين دي حضرتك والله حجات غريبه بس لعلمك اصدقك اي حاجه مش بعيده اليومين دول
والله ضحكتني علي الست اللي فكراه حرامي ده اظاهر اني اتأخرت اوي علي الزياره
ياااه بجد في بنات كده واله ما بهزر بكلمك بجد في ناس كده
عندهم حق الشوباب ميثقوش في حد
هما كده البنات الموكوسه دي هما سبب وكستنا دي منهم لله ياجدع
بستمتع بحكاويك بس ربنا يهدي بجد

سمكه واحده يقول...

اقلك علي حاجه صحيح نسيت
في مره احنا طلعين انا واختي وصحبتي علي سلم في مول كان ورنا بنت وولد وكل واحده فينا علي درجه سلم بنهزر وكده فجأه لقيت اختي وشها اصفر واحمر وكانت هتعيط لما طلعنا بقلها مالك قالتلي كان في ولد وبنت شكلهم كده بيبوسها وعيطت واتخنقت وقعدنا نطبطب عليها انا وصحبتي يمكن غارت ولا حاجه بهزر اليوم انا ضحكت بجد قلتلها طب وانتي تعيطي ليه قالتلي اتخضيت حسيت بقرف واتكسفت قعدنا نتريق عليها وقلتلها طب شورليلي عليهم وورتهملي وهما مشين بيني وبينك كنت عايزه انط في كرش البت والله بس خفت الواد يكون لسانه طويل ولا قليل الادب بس في الدين بتعنا بيقول ايه من رأي منكر فليغيره اهو ده نوع من السلبيه وهنتحاسب عليها بسبب جبني مشفتش المنظر حاجه مقززه بجد
بس عذرت اتخي ليه بقي
ابقي اكملك في بوست تاني

Che يقول...

الحمدلله يا سمكه انك شفتى حاجه بعينك او بعين اختك و والله الحاجات دى كتير أوى اكتر ما تفتكرى انا بس باكتب اللى ينفع اكتبه
و بعدين المسأله مش ان الشباب مش بيثق فى البنت المشكله انه مش واثق فى نفسه و اللى عمل زى كده بيبقى عارف انها هتتردله عشان كده بيبقى مقلق
ملحوظه على جنب كده : مبروك فوز الاتحاد على الزمالك و الاتحاد سيد البلد
منورانى على طول يا جميل

ست الحسن يقول...

تصدق البوست ده بتعليقاته ضحكوني وانا كنت مخنوقة فعلاً

بس موضوع كيس الفلوس ده كان نكتة قديمة أوي من أيام الترماي
فكرة انها تحصل فعلاً .... كوميديا توقع م الضحك

بس انت خلتني ندمت اني مدخلتش جامعة القاهرة
فعلاً فاتتني حاجات كتير

والمناظر اللي بتحكي عليها موجودة وكتيرة بس بصراحة عمري ما اتخبطت فيها بس دا ميمنعش اني عارفاها

مبسوطة من خفة دمك
وبساطتك في الحكي

Che يقول...

ست الحسن
الحمدلله ان البوست و تعليقاتع فكوا من خنقتك شويه
بالنسبه لحكايه الترماى انتى شكلك مش كبيرة للدرجه دى انا فاكر ان اخر مرة ركبت الترماى كان من يجى 20 سنه ايام ما كان موجود فى السيده زينب و اخره فى باب اللوق
و بعدين بالنسبه للندم على جامعه القاهرة فالبلد كلها بأت جامعه القاهرة يعنى مفيش داعى للندم
و الحمدلله انك متخبطيش فى منظر من الناظر دى
و اخيرا شكرا على مجاملتك
نورتينى يا جميل و مستنى تعليقاتك دايما