الخميس، 12 فبراير، 2009

يا ترى انت مين ؟

انا النهاردة مش هاتكلم عن نفسى ولا عن اى حاجه ، انما هاحكى حكايه .. اللى عايز يعتبرها حقيقية ماشى .. واللى هيعتبرها خياليه برضه ماشى .. و اللى هيشوف انها رمزيه لتالت مره ماشى
بعد الحكايه انا هاسأل سؤال واحد بس ارجو ان اللى يجاوب يجاوب عنه بصراحه و انا هاكون اول واحد يجاوب على السؤال .......... و دلوقتى نسمع الحكايه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انه زمن الحرب .. كل شئ مباح و مستباح ... لا اخلاق الا اخلاق زمن الحرب ، لا صوت الا صوت المدافع ، لا رائحه الا رائحه الموت و الخراب التى تحيط بكل شئ
من انا .. اكاد اسمعكم تسألون هذا السؤال ..... انا امرأه متزوجه و لكن زوجى فى الحرب اى اننى بكلمات اخرى امرأه مع وقف التنفيذ ، زوجه فى حبسها الانفرادى و لا امل فى الافراج حتى مع حسن السير و السلوك .. حياتى حياه عاديه و لكنه زمن غير عادى للنساء و خصوصا لامرأه وحيده مثلى لا تعرف اذا كان زوجها حيا ، ميتا ، ام انها غير متزوجه من الاساس و ان كل هذه عباره عن تخيلات امرأه ذات فراش خال تحلم بمن يبث فيه و فيها من دفئه .... رغم انى وحيده الا اننى اهتم باناقتى و بمظهرى .. اسمعهم يتسائلون ما الجدوى من تأنقى الدائم .. تخترق كلماتهم التى يلوكون بها سيرتى الفراغ المحيط بى .. احس باشواك نظراتهم تنغمس تحت جلدى لتدمينى و تذكرنى انهم احسن منى .. احسن منى فى ماذا .. لا اعرف و لكنهم هكذا يظنون
لست مغرورة الا اننى لست من الطراز الذى يمر مرور الكرام .. امر بمكان فتتوقف الحياه و الكل ينظر نحوى .... فريسه تمشى بين من يتمنون افتراسها ... هذا هو احساسى عندما امر امامهم ، لم يفترسنى احدهم الى الان الا فى خياله الا اننى اعرف انها مسأله وقت قبل ان يعبر احدهم هذا الخط الفاصل بين خياله و بين ملابسى الداخليه و عندها سيتبعه القطيع بأكمله و احاول جاهده تأخير هذه اللحظه بتجنبى اياهم .... فى بلدنا هذا يسهل فهم ان تكون صاخبا .. نبيلا .. سافلا ... عاهرة .. قواد .. قديس ... اى شئ من السهل عليهم فهمه و التعامل معه ، و لكن الهادئ الصموت دائما محل شك لعدم فهمهم اياه .. هكذا كنت اعذرهم لسوء ظنهم بى
امشى لا التفت الى احد منهم و مع ذلك اراهم جميعا ... ذلك القاضى العجوز الذى يرانى دائما عاريه كما تنبئنى ملامح وجهه ، محامى البلده الوحيد و زوجته القبيحه كالشيطان اذا كان الشيطان بهذا القبح ، هذه المرأه التى تنتشر اقاويل عنها انها تذهب الى دار السينما الوحيده و ذلك لتساعد الشباب فى استمنائهم فى محاوله منها لتزجيه الوقت و علها تقع على فريسه مناسبه ، مجموعه العانسات الشمطاوات و نظراتهم الى الجميع بحقد من اضطروا الى مشاهده الدنيا من الخارج بدلا من عيشها و هروبهم الدائم الى قاعه المكتبه لا عن ثقافه و لكنها المكان الوحيد المهجور فى ايام الحرب ، ضابط الجيش المسئول عن الحاميه الموجوده فى بلدتنا و الذى يتيه فخرا و غراما بنفسه و كله غرور منحه اياه منصبه ، و مجموعه الصبيه المراهقين الذين لا احتاج الى جهد كبير لمعرفه احلامهم الخاصه بى خصوصا مع الانتفاخ الواضح فى بنطال كل منهم كلما عبرت عليهم و مررت بهم و اخيرا فتيات ام لعل التسميه الصحيحه هى نساء بيت المتعه الموجود للترفيه عن الجنود .. انه زمن الحرب كما قلت لكم من قبل و ما ادراكم ما هو زمن الحرب ..... كلهم يتابعنى بنظراته و يحلم بى غير عالمين الحقيقه .. حقيقه اننى عندما اذهب الى بيتى و اخلو الى نفسى امارس الرقص مع تلك الصورة القديمه لزوجى .... ارقص حتى تتقطع انفاسى و بعدها اخلع ملابسى كامله و اغفو الى جانب الصورة لالحق بزوجى فى عالم الاحلام عله يروى عطشى و شوقى اليه
ذات ليله تشاجر جنديان امام دارى و قتل احدهما الاخر و كانت تلك الشراره التى انتظرها اهل البلده طويلا ليشعلوا النار فى .. استدعيت الى المحكمه للادلاء باقوالى و مع اننى شاهده الا انه نتيجه لهمسات تحولت لكلمات تحولت لخناجر تلوك شرفى و عرضى وجد القاضى نفسه مضطرا ( ام لعله كان ينتظر هو الاخر ) الى ان يسألنى عن سلوكى ... يسألنى عن سلوكى و بيت العاهرات يقع امام المحكمه .. ياله من منطق معوج و لكنه منطق الحرب ... و هنا انتقلت من خانه الشاهدة الى خانه المتهمه .. يريدون ان يجعلونى مسيحهم لاحمل عنهم الصليب و اتحمل وزر خطيئتهم الاولى ... اضطررت للاستعانه بمحامى البلده الذى كان و الحق يقال حاذقا فحصل لى على البراءه من التهمه .. اى تهمه و اى براءه لا ادرى و لكنه ادرى منى بذلك .. ليله الحكم جاء ليتقاضى اتعابه و حاول تقاضيها عينا لا نقدا كما اردت ان ادفع له و حاولت المقاومه و لكنه كان كالثور هنا رحت ارحل الى عالم الاحلام لياخد منى جسدا فقط لا جسدا و روح .. و لكننى افقت على عجزه و انطلقت اضحك رغما عنى عندما اصفر وجه هذا الثور و هو يحاول الانتصاب لاختراقى ولا يستطيع ... لعله كان الاولى به ان يستعين بأحد الصبيه لتعويض نقصه .. و انصرف
فى هذه الليله بعد انصرافه اخذت فى قص شعرى حتى لا يقع على صدر باقى القطيع الذى سوف يقتحم دارى و سريرى و جسدى .. لابقى شعرى طاهرا لزوجى و ليس لاحد سواه ... لم يتأخر القطيع و فى الليله التاليه زارنى الضابط لمعرفه ما الذى حدث لجنوده و استطاع بفضل تدريبه اقتحام جميع موانعى و لكننى كنت امارس تجربه ان انظر اليه و الى نفسى من الخارج كمن تشاهد فيلما فى قاعه السينما الوحيده فى البلده ... و توالى القطيع .. القاضى الذى جاء يهنئنى ببصيرته الثاقبه و التى اعطتنى حكم البراءه ، سيده السينما التى احتكت بى عمدا و تحسست جسدى فى السوق ، نسوه المكتبه العانسات و كلماتهم الى ، عاهرات قريتى و اعتبارهم لى منافسه لهم ، حتى الصبيه لم اسلم من مطاردتهم .... ارادونى ان اكون مسيحهم و لكننى سوف اصبح يهوذا الذى يفضح هذه البلده و يبيعها الى الشيطان ذاته .... و اتى يوم ابلغونى فيه بوفاة زوجى
جميعهم لاحظ تبدلى .. تانقى الذى لا ينتهى و ان صاحبه الان مرافقتى للرجال علنا ... لم يستطيعوا فهمى حتى الان و لذلك قرروا كسرى و تحطيمى
لم افق الا و نسوة المكتبه يشدوننى من شعرى .. يضربننى .. يمزقن ملابسى على مرأى و مسمع من الجميع و لكن لا احد يتدخل كانهم لا يروننى ... اختاروا جميعا دور بطرس ليلعبوه و ينكروننى لا قبل صياح الديك ثلاثا و لكن ينكروننى الا الابد ..... الملم حاجياتى و ارحل عن هذه البلده و لكننى حتما عائده لانتقم ... لم يودعنى احدهم الا احد الصبيه على دراجته .. كان اكثر الصبيه صمتا و اكثرهم ملاحقه لى ، لعله اكثرهم حبا لى ايضا
لم أعرف ان زوجى حى الا عندما اتى الى بلدتى الجديده بحثا عنى بعد ان بحث عنى فى البلده القديمه و لم يدله على الا صبى صغير على حد قوله ... عندما سألنى عما أريد اجبت بدون تردد " اريد العوده الى البلده مره اخرى و لكن معك هذه المره " .. و اجابنى الى ما طلبت و عدت معه .. و سوف اجد طريقا لانتقم منهم و اجعل كلا منهم يذوق الآمى على صليب قسوتهم
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انتهت القصه و دلوقتى السؤال
يا ترى كام مرة لعبت دور المسيح و كام مره كنت بطرس و كام مره كنت يهوذا ..... انا عارف انه حياتى كلها كانت موزعه بين بطرس و يهوذا و لكن عمرى ما كنت المسيح ابدا لغايه دلوقتى
مستنى اجابتكم و بصراحه

هناك 38 تعليقًا:

مياسي يقول...

ميلينا يا عمرو ميلينا!!

وبصراحه لم أفهم المغزى من السؤال!!

Che يقول...

طبعا مياسى الوحيده اللى حد معرفتى ليها اهتمام كبير بالافلام هى اللى فهمتنى ... عشان كده انا ماقلتش ان القصه تأليفى انما مجرد حاجه باحكيها و كنت عايز اعرف مين اول واحد هيعرف القصه و كان الرهان بينك و بين مدون تانى بس انتى اللى كسبتى
و السؤال سهل جدا .. مش فلسفى
كام مره لعبتى دور المظلومه و كام مرة دور الخاينه ( طبعا الخيانه مش بمعنى وحش مع ان كل انواع الخيانات وحشه ، بس انا متأكد انتى هتفهمى قصدى ) ، و كام مرة كنتى سلبيه شوفتى الحق بيضيع ادام عينك و ماعملتيش حاجه برغم كده
مستنى اجابتك يا قمر
ملحوظه : ذاكره قويه انك تفتكرى حاجه شفتيها من 9 سنين ... انا ماسك الخشب عشان الحسد

مياسي يقول...

عمرو
أنا كسبت لأني لسا متنيله على عيني وصاحيه أكيد صاحبنا المدون الثاني كان حيكسب برضو:) إلا مين هو صح؟

وبعدين يا عمرو لا 9 سنين ولا شي بصراحه أنا شفنه السنه الماضيه على OTV بعد ما صديقه عزيزه جدا رشحتلي ياه وشرحتلي القصه من وجهة نظرها:)

أما سؤالك فمش عارفه يا عمرو!!! سؤالك صعب من ناحية إنو صعب أحصر متى كنت شهيده ومتى كنت في موقف المتعامي!!!

بس حابه أحكيلك إنو عرضك للفيلم رائع جدا وممتع؛ جد حبيته وكمان نظرتك جميله وورتني ياه من زاوية مختلفة:)

Che يقول...

هاخلى المدون التانى سر بس يا رب يطلع فعلا بيهتم بالافلام .. انا قلت من 9 سنين لانى شفته سنه 2000 و كان واحد من الافلام اللى علقت معايا عشان واحد من الافلام اللى عجبتنى فكرتها جدا
عارف انه سؤالى صعب ... بس بينى و بينك كده .. صعب الاجابه ولا صعب التصريح بالاجابه .. سيبك انتى انى خدت بالى انك اخترتى دورين .. دور الشهيده و دور المتعامى .. و نسيتى دور الشرير
سعيد ان وجهه النظر اللى انا طرحتها عجبتك
الا انا عندى سؤال .. انتى لسه صاحيه لدلوقتى ليه مع ان الساعه عندك 5 و ربع تقريبا .. طب انا صاحى باتفرج على fringe و لسه مش عارف هاشوف بعده ايه .. انتى صاحيه ليه

مياسي يقول...

هههههههههه
لا يا عمرو انا ما طنشتش كوني شريره بس بتعرف الساعه خمسه الصبح يعني مش كتير مجمعه:) هو الواقع مش انو ما بدي اجاوب الواقع زي ما حكيتلك صعب أتذكر بالزبط مواقف دقيقه مش أكتر

يعني بالآخر احنا مش ملائكه ومش حاخجل من ضعفي كانسان؛ بس سؤالك خلاني انتبه لفكرة انو معظم الناس حيختارو دور الشهيد يمكن؛ لأنو احنا مغرمين بدور الضحيه بتعرف كيف:)

ولا شي يا عمرو بشتغل عالماجستير كل يوم صايره انام وجه الصبح؛ والتلفزيون شغال على fight club:)

Che يقول...

ربنا يكون فى عونك يا جميل و يقدرك على الماستر و تاخديها يا رب
و انا فعلا باحترم صراحتك كل يوم زياده عن اليوم اللى قبلك عشان فعلا غلطاتنا نتيجه لضعفنا البشرى و لاننا مش ملايكه و فى الوقت نفسه مش شياطين
و مدام بتتفرجى على fight club يبقى اكيد فاتحه mbc2 عشان هو كان شغال امبارح عليها و اكيد بيعدوه دلوقتى ... على فكرة فيلم من اكتر الافلام اللى باحبها هو و v for vendetta عشان فيلمين من اكتر الافلام اللى بيناقشوا فكرة الفوضوى و الفرق بينه و بين المتمرد او الثائر
معلش بس لما بتيجى سيره الافلام و المسلسلات مابقدرش امسك نفسى و لازم ارغى لانى باموت فيهم
انا لسه سهران شويه كتار يا جميل لو عايزة ونس عشان تكملى مذاكرة و ماتناميش قبل وجه الصبح .. على فكرة احنا بنسميها وش مش وجه بس معلش كان لازم انزل الترجمه

مياسي يقول...

:)

شكرا يا عمرو وارغي زي ما انت عايز؛ الفيلم المذكور رح أحاول أشوفه بس لما أخلص ماستر؛ بصراحه الأفلام اللي بدها تركيز صايره تتعبني:) والشيء الوحيد اللي مش عم يتعبني وأنا بحضره هو المسلسلات التركيه والسبب واضح طبعا!!

Che يقول...

ماشى يا ست مياسى هارغى زى ما انا عايز مع انى هابان مجنون بتكلم مع حالى
و الحمدلله انا ماليش فى التركى ، بس اكيد ممكن افهم السبب مع انك لو كنتى هنا فى مصر كانوا اقاموا عليكى الحد عشان مش بتستمتعى و انتى بتتفرجى على نور و مهند و تعيطى شويه .. مع انى اتذكر انه كان فى مسلسل يابانى تقريبا او كورى كان بيجى عندنا اسمه اوشين و كان عبارة عن جرعه النكد اليوميه اللى لازم ناخدها و نقعد نعيط و بعدين نحمد ربنا انه حالنا احسن من حال اوشين

عاشقه الرومانسيه يقول...

دى اول زياره لمدونتك
وده اول موضوع اقراه
فى البدايه مافهمتش المغزى
الا لما قريت لتعليق بتاعك

وانا باكمل البوست عرفت الفيلم ده فيلم اجنبى شفته قبل كده
واللى اكد لى المعلومه تعليق مياسى

بس انت مش شايف ان الاسلوب فاضح شويه
معلش ابقى خد بالك بعد كده
وممكن الفكره توصل بطريقه احسن من كده

Che يقول...

عاشقه الرومانسيه
اولا اهلا بيكى فى اول موضوع تقريه .. جميل انه فى ناس كتير عارفه الفيلم
يمكن اختلف معاكى فى نقطه ان الاسلوب فاضح شويه بس اعذرينى لانى باتفرج على النسخ ال raw او زى ما بيسموها director cut يعنى من قبل ما تعدى على الرقابه و اكيد انتى تبعا ليتعليقك اتفرجتى على النسخه المعدله رقابيا و بالمناسبه انا شلت حاجات كتير من الفيلم لانه ماكانتش فى السياق .. يعنى الفكرة مش مجرد انى استعرض انا اسلوبى فاضح اد ايه انما كان الغرض انى ابين نقطه معينه بس مش اكتر
بس مع ذلك انتى ماجاوبتيش برضه على السؤال بغض النظر عن طريقه عرضه
نورتينى و مستنى الاجابه لو حبيتى تجاوبى

GHARAM يقول...

القصة فكرتني بالأدب الروسي



أما الأجابه على السؤال فصعب حاليا ، عايزه افكر بجد فيها

حروف (دلو مرة ثانية وجرح ثاني سابقا) يقول...

مضطرة اعلق برغم اني معتزله الناس وتاركه حاجات كتير بس حساللك سؤال بدل سؤاللك ياتري كام واحد بيظلم وعارف انه ظالم وكام واحد مش شايف نفسة مظلوم يمكن السؤال واحد بس اللي بيكون ظالم غالبا مش بيشوف نفسة ظالم وبيشوف نفسة صاحب حق وكذللك اغلب الناس شايفة نفسها مظلومة بس كام واحد بيفكر في الانتقام بدل مايمشي جمب الحيط وكام واحد بيفكر انه يجيب حقة وكام مرة الحق يضيع عن صحابه معادلات صعبه جدا ومعرفش ليه حاسة ان الفيلم شفته
وبجد من سردك للفيلم افتكرت ايام الحرب العالمية وان القصة في لندن او فرنسا بس الغالب في لندن وشفت النساء ذات الفساتين الواسعة المنفوشة والبرانيت والبناطيل اللي بيلبسوها تحت الفساتين كملابس داخلية
وشفت المكان كان في بحيرة وبيوت من طابق واحد او طابقين علي الاكثر تخيلت بجد والقاضي ذة الشعر المستعار برغم الابيض بجد تخيلت كل شيء في القصة من طريقة سردك
دمت بالف خير
اجابتي علي سؤاللك كثير ما اكون ظالمه ولكن ظالمة في تفكيري في بعض الناس وبسوء ظني فيهم ولكني لم اتخطي حاجز الظلم لاكثر من هذا ولكني اجد اني كثيرا ما بكون مظلومة واصعب ما في ان تكون مظلوم هو الظلم من اقرب الناس ليك

Che يقول...

GHARAM
يمكن القصه فكرتك بالادب الروسى عشان جو الحرب و كده
فكرى زى ما ناتى عايزة يا جميل و انا مستنى نتيجه التفكير
نورتينى

Che يقول...

حروف المختفيه
انتى معتزله الناس ليه و مش باينه ليه
انا هارد على سؤالك مع انى رديت عليه فى اخر البوست .. قليل جدا لما كنت باكون مظلزم ، اغلب الوقت باكون ظالم او بالكتير محايد
اما بالنسبه للناس اد ايه يعرفوا انهم ظالمين و اد ايه يعرفوا انهم مظلومين فانا اظن ان كل واحد بيكون عارف الحقيقه جوة نفسه بس الفكرة انه مش بيصرح بالحقيقه ... ساعات عشان خوف من المواجهه و ساعات عشان فى ناس بتحب تضحك على نفسها و كده
على فكرة الفيلم كان فى بلده ايطاليه ، بس انا فهمت رؤيتك ليه انه فى فرنسا او انجلترا عشان تبعا لعمليه غسيل المخ المنتظمه احنا اتخيلنا ان المانيا و ايطاليا و اليابان بما انهم الدول اللى ابتدت الحرب انهم مفتريين بينما فرنسا و بؤيطانيا عبارة عن الضحايا .. يعنى تنويعه تانيه على فكرة الظالم و المظلوم
نورتينى يا جميل و ابقى طلى عليا من وقت للتانى

فتافيت يقول...

مش عارفة الفيلم اللي بتتكلموا عليه ده .. لان اخر فيلم دخلته اجنبي كان خلف خطوط العدو واخر فيلم اتفرجت عليه ديفيدي كان تامرا

بس انا طول عمري صريحة جدا.. وهكون صريحة في اجابتي.. يهوذا ممكن نقول 3 مرات بس مش زي ما يعوذا عمل لا.. انا قلبت المعبد كله على اللي فيه وعليا وعلى اعدائي.. مش انا اللي ممكن اضرب بالقلم على خدي اليمين فادرير له الخد الايسر.. لا خااااالص

مظلومة.. معرفش بس يمكن حسيت بالظلم مرة واحدة في حياتي وخلاص.. اصلا بكرهه جدا اني اتحط في وضع مظلومة.. ومابحبش اظلم حد

بطرس بقى.. فانا مش سلبية ومابعرقش اقول وانا مالي خالص.. انا اسانة صريحة لدرجة مزعجة جدا بجد.. وناس بتقوللي ديه مش صراحة دية وقاحة.. بس انا مبسوطة كده.. الغلط بقول عليه غاط وقدام اي حد.. ومافيش عندي تجاوزات .. يعني امشي الغلط صح علشان عم فلان ولا خالتي فلانة

بس اقولك على حاجة .. الانسان بحس انه ميكس بين الشيطان والملاك.. كلنا بنغلط ومحدش معصوم.. بس المهم اننا لما نعرف انه غلط نقول استوب نقطة ومن اول السطر.. مش فاصلة ونكمل في نفس السطر


فهمت حاجة.. طيب وانت يا عم القديس ما جوبتش على السؤال

Che يقول...

فتافيت العسل
انتى اول واحده تجاوب على السؤال بشكل مفصل و صريح
و فعلا الانسان سواء شاء ام ابى ميكس بين الشيطان و الملاك لان كل واحد ليه شيطان موكل بيه و عنده ملاك كمان فغصب عننا احنا ميكس
و انا والله جاوبت بس مش عارف محدش مصدق انى جاوبت ليه و على كل عشان خاطرك هاجاوب تانى
انا عمرى ما لعبت دور المظلوم و دايما حياتى كانت متوزعه بين الظالم و المتعامى على رأى الصديقه مياسى .. بس مش متعامى دايما .. ساعات كتير باكون هجومى عشان دى حاجه بتجرى فى دمى
نورتينى يا جميل و متشكر على الاجابه الصريحه و مستنى تعليقاتك دايما

MaNoOoSh يقول...

انا صحيح مشفتش الفيلم بس هرد بردو.. لماضة بقى
ههههههههههههههه
انا حسيت بالظلم فى حياتى كذا مرة (يمكن 4 مرات) بس للاسف مجاش الظلم غير من القرايب.. يعنى مش من بعيد.
والخيانة بمعنى انى فعلا اقلب التربيزة باللى عليها ممكن مرتين فى حياتى بس لما اتحملت اللى عملت معاه كدة كتييييييييييير جدا.
والدور السلبى بصراحة كدة بلعبة لما يكون اللى قدامى شايف نفسة احسن من البشر وبيعاملهم على الاساس دة فلما يقع فى غلط بصراحة بسيبة علشان بحس انى بشفى غليلى.. شريرة بقى
هههههههههههه

Che يقول...

منوشه القمر
اتلامضى براحتك و الفيلم ده فيلم حلو بجد
عجبتنى اجابتك خصوصا انك فى دور الخيانه بتكونى اقرب لشمشون .. و كلنا تقريبا بنعمل نفس الحاجه مع اللى شايف نفسه و المسأله مش مسأله شر ولا حاجه انما تقدرى تقولى اننا بنحس بالشماته حتى لو ماقلناش كده
نورتينى يا جميل و مستنى تعليقاتك على طول

عاشقه وغلبانه يقول...

اقد اقولك بكل صراحه
اني مسيح كتير جدا ويهوذا برضو كتير
بس المصيبه اني ماظلمتش غير روحي ولا خونت غير عقلي وتفكيري
وبطرس ولا مره

تعرف ليه
لاني بقول الحق بمنتهي البراءه اللي الناس بتسميه هبل وبالتالي بشارك في كل حاجه وليا موقف
احيانا بيطلع غلط

اسلوبك في القصص بيفكرني بالافلام الاجنبي القديمه

وانت قولت ان ده فيلم

فاكر انت شخصيات الافلام دي.

Che يقول...

عاشقه اللى ليها يومين من غير نت و افتقدناها كتير
جميل انك عرفتى تجاوبى و جميل اكتر انك جاوبتى بصراحه ... و فعلا الكلام ده بيفكرك بالافلام لانه اصله فيلم
و طبعا فاكر شخصيات الافلام القديمه .. السؤال قديمه لانى درجه
نورتينى يا جميل

GiGi يقول...

مش عارفه
بس ممكن حته بس دين الاول انت عارف ان موضوع الصليب والمسيح ده وانه اتحمل عنهم وصلب ده مش فى عقيده المسلمين حاجه تانيه

انا عمرى ماهتحمل وزر حد خصوصا اذا كان وزر زى ده
ثانيا اخاف من الناس لا مش هخاف
ثالثا ربنا يكرمك ويهديكويهدينا كلنا اتكلم احكى بطريق احسن شويه
بجد اسلوبك جميل بس حاول تحافظ شويه على استخدام الكلمات

Che يقول...

مش عارف ارد عليكى اقولك ايه يا جيجى
هاقولك على قصه قريتها مرة عند انيس منصور و مره عند احمد خالد توفيق انه مره شويه عميان جه عندهم فيل و حاولوا يوصفوه لبعض فكل واحد وصف الحته اللى حسس عليها .. يعنى اللى قال خرطوم و اللى قال ديل قصير و كده
فى حاجه عند الاجانب اسمها the bigger picture يعنى الصورة العامه و فى حاجه عندنا فى قلب اللغه العربيه و فى قلب المحسنات اللفظيه اسمها الكنايه
الصورة العامه او الكنايه فى القصه دى هى الفكرة نفسها مش الاشخاص .. يعنى لو تعرفى مثال اوضح و اشهر من مثال المسيح و يهوذا يا ريت تقوليلى عليه عشان استخدمه المرة الجايه
سيبك من القصه دى كلها .. كان فى سؤال حوالين شخصيه الانسان بشكل عام ... هاحاول ( مع انى هافشل ) انى احسن اسلوبى بس معلش .. انتى عارفه يموت الزمار و صباعه ( لا مؤاخذه على كلمه صباعه دى لو شايله اى تلميحات وحشه ) بيلعب
نورتينى يا جميل

Zika يقول...

مع ان الافلام دي هوايتي المفضله
ودراستي المستقبليه
بما اني بكتب سيناريوهات وهادرس سكربت قريب
ورغم اني حسيت ان اللي انت بتقوله ده انا شوفته قبل كده
الا اني هاموت وافتكر الفيلم اللي انت بتتكلم عليه ده
المهم قريت في التعليقات انك بتحب
figh club
&
v for vendetta
انا بالمناسبة في فور فينديتا لسه شايفه امبارح
للمره تقريبا ال13 او ال 14
ده غير ال 3 مرات لما كان في السينما
..
المهم خلينا في البوست عشان مافتحش في موضوع الافلام لاني لو فتحت مش هاسكت

لعبت دور المظلوم .. تقريبا كتير . في بيتنا وده المكان الوحيد اللي لعبته فيه لانه جوه الاسره
ولازم تضحي باي حاجه عشان الحياه تستمر مع الناس اللي بتحبهم
انا مش من هواة التضحيات انا من هواة الحقيقه
بس التضحيه في بعض الاحيان بتخليك بطل
( يارب تكون فهمت وجهة نظري )

بطرس
لم العبه ابدا
ولا احب ان اكون مثله في يوم من الايام

ولا حتي يهوذا
مثل هذه الشخصيات تشعرني بالغثيان الشديد
انا مش ملاك
ولكن حتي وان خنت في يوم من الايام
فلقد فعلتها من اجل شئ ما
ليس مصلحتي

Che يقول...

زيكا باشا .. على فكرة انت لو قريت ردودى على مياسى كنت قلتلها انه فى اتنين مدونين كنت متوقع منهم انهم يعرفوا الفيلم اللى انا باتكلم عليه هى واحده و المدون التانى هو انت يا باشا
الفيلم اسمه Malena بطوله Monica Bellucci و اتعرض اول مره سنه 2000 و لغته الاصليه الايطاليه
بما انك بتكتب سيناريوهات و هتدرس سكريبت قريب يبقى اكيد انت معجب زى بفيلم the dark knight اخر فيلم من افلام batman و اللى كان على فكرة اجمل فيلم انا شفته فى 2008 و الحوار اللى فى اخر نص ساعه من ارقى و اجمل الحوارات اللى انا شفتها فى حياتى ( على فكرة انا مكتبه افلامى الخاصه اللى عندى فى البيت 2000 فيلم تقريبا غير اللى انا شفته بس انا باحتفظ بالافلام اللى بتعجبنى ) و خصوصا الحوار بين الجوكر او المبدع الراحل Heath Ledger و اللى انا اظن انه هيكسب اوسكار احسن ممثل مساعد السنه دى و بين Aaron Eckhart او two face و اللقطه اللى فى اخر الفيلم لما Batman قبل انه يلعب دور المجرم عشان الناس ماتتصدمش فى رجل القانون اللى اصبح مجرم و قاله انه ماينفعش نخلى الناس تعرف ان الجوكر افسد افضل راجل فينا ... معلش انى رغيت كتير بس انا زيك مابقدرش امسك نفسى لما تيجى سيرة الافلام و نيجى للرد على الموضوع نفسه
كلنا لعبنا دور المظلوم فى بيوتنا لان ده حق اهلنا علينا و فاهم طبعا كلامك على التضحيه .. بالنسبه لدور بطرس انت محظوظ انك مالعبتوش و ده يدل على انك من الشخصيات الثنائيه اللون يا ابيض يا اسود ، المشكله انه كل ما بتعدى بمواقف الابيض و الاسود مابيكونوش واضحين للدرجه دى ... و بالنسبه لدور يهوذا انا ماكنش قصدى الخيانه فى حد ذاتها او فى معناها الوحش انما انا كان قصدى دور الظالم بكل تنويعاته و ده اكيد كلنا لعبناه بشكل او باخر لاننا زى ما انت قلت محدش فينا ملاك
اسعدتنى بتعليقك الثرى و منتظر تعليقات كتير منك يا باشا

a mero يقول...

أعتقد أن أشهر الأدوار علي الأطلاق هو الدور السلبي وخصوصا اذا كان لديك ضمير حساس هتلاقي مئات المواقف اللي انت حاسس فعلا ان الحق بيضيع فيها و معملتش حاجه.(بالرغم من أن الواحد بيبرر لنفسه مئات الأسباب ان مش في ايده حاجه ولكن في احيان كثيره دا مش عزر)
انا انضم الي قائمة السلبيين في بعض المواقف ولكن لم أكن ظالما أو مظلوما
بالنسبه لفيلم melena مادام عاجباك قصته هتلاقي فكره زيها في zorba greek theلو ماكنتش قريت القصه او شفت القيلم

Desert cat يقول...

دائما الانثى الوحيدة مطمع لكل ذى نفس دنيئة وكانها فريسة سهله الصيد
نا لم العب اى دور من الادوار لانى احب نفسى لدرجة الانانية ولو حاول احدهم احداث اى مكروه فيكيفنى اشارة لمن احيا بينهم من احبائى واخوتى
مودتى واحترامى

Che يقول...

امير باشا حبيب قلبى
اتفق معاك فى رايك ان اشهر الادوار هى دور السلبى
و طبعا بالنسبه للافلام انا عارف مدى اهتمامك الواسع بيها و ذوقك الرائع .. و اكيد شفت زوربا الفيلم و بعديه قريت القصه و فى امثله كتير حول نفس الموضوع
منورنى دايما يا ميرا يا حبيبى و مستنى زيارتك شخصيا انت و بل و نادر

Che يقول...

عزيزتى قطه .. انا ماكنتش باتكلم عن الانثى سواء الوحيده او غير الوحيده لانى لست من انصار ولا من مهاجمى الفيمنست .. الفكرة كانت عموما عباره عن التعرض للظلم
و بالنسبه لانك عمرك مالعبتى اى دور من الادوار التلاته فده منطقيا ماينفعش
لان حياتنا موزعه بين الضحيه و الجلاد و المحايد
لو عندك دور زياده فى الحياه الادميه انا مستنى اعرفه منك
نورتينى يا جميل

سمكه واحده يقول...

لا انا هعيط ده انا علقت يالهوي طيب اما نكتب الكلمتين قبل ما ننساهم تاني
اولا انا قعدت اقول ايه
يابت ده فيلم يابت لا
يابت شكل الكلام فيلم ومن الافلام اللي بتحبيها ارجع واقول يابت لاء دي قصه
اقول طب وربنا ده فيلم وشوفيته قبل كده وفي الاخر صوح طلع فيلم
القصد بقي
السوال صعب بجد
بس بيني وبينك كده علي جنب كده من غير ما حد ما يسمع
الواحد سعات كتير كان بيعيش دور الندل اه اكدب يعني بس مش كتير ومش في حجات كبيره بس اهو كبيره صغيره اهو كان ندل
وعاش دور المظلوم بردو
وعاش دور السلبيه كتتتير
بس السنه دي الواحد قرر يبطل سلبيه بجد ويغير من حجات كتير من حياته ويارب يستمر
ديما اسألتك كده صعبه وبتيجي بره المقرر روح يا شيخ وتعالي بسرعه
تحياتي

Che يقول...

سمكه العايمه ( على وزن بلطيه العايمه كده - مع انى ماشفتش الفيلم فربنا يستر و مايطلعش وحش ) المهم
الحكايه طلعت فيلم و هتلاقى تفاصيله فى ردى على زيكا لو مهتمه بالفيلم
و احيى شجاعتك فى الاعتراف انك لعبتى دور الندل قبل كده لانه قبل ما انتى تكتبى تعليقك كنت انا الوحيد اللى لعبت الدور او الوحيد اللى لعبه و اعترف انه لعبه
يا رب تقدرى تغيرى كل اللى نفسك فيه السنه دى و تكون احسن من السنه اللى فاتت
و معلش على اسئلتى استحملينى يا جميل
نورتينى كعوايدك و مستنى تنورينى تانى

Zika يقول...

بص يا ريس
انا قريت تعليقات مياسي وعمال اشبه علي كلمة ميلينا دي بس عشان مكتوبه بالعربي ماجاش في دماغي الفيلم ههههه
وماكنتش اعرف انه انا اللي انت متوقعه ده يمكن لو كنت لفت نظري كنت عرفته

هيث ليدجر ادم دور حياته وللاسف مالحقش يتهني بيه
ومتهيالي انه لو ماخدش الاوسكار السنه دي يبقي هي فعلا زي ما بيتقال عنها انها بقت جمعيه كل واحد بيقبضها دور

the dark night
من الافلام اللي بفضلها عامة انا بحب الغوامق جدا
الفيلم متصور تصوير هايل واخراج رائع بالاضافه طبعا للاداء الممتع من هيث ليدجر
فعلا كنت بستني يطلع علي الشاشه
وخصوصا لما راح يقابل العصابات وكان حاطط متفجرات في جيبه
المشهد ده فعلا هايل

ما شاء الله ما شاء الله انا لو ليا مكتبه خاصه بيا غير الرفين اللي سالفهم من مكتبة ابويا اكيد كنت هاقدر احط فيهم افلامي المفضله
لكن للاسف امكانياتي بتنحصر في ال ميه وستين جيجا بتوع الجهاز
وتصدق ماعدتش هم كام فيلم
بس هتلاقي عندي كل افلام توم هانكس و ليوناردو دي كابري ودينزيل واشنطن وستيفن سبيلبيرج ونايت شالامان وريدلي سكون وكوينتن تارينتينو ( عمر ما نطقت اسمه صح ) والراجل اللي معاه ده المخرج اللي شبهه ده نسيت اسمه
وهتلاقي حبيبة قلبي ناتالي بورت مان في كل حته
بص احسنلك ماتفتحش معايا في موضوع الافلام ده انا جالي هسهس من المتابعه واصلا مافيش حد بيهتم بالافلام دي من صحابي زيي فلو قفشتك رغي في الحوار ده هتحتاج ودنين كمان فوق ودانك

المهم اخيرا
فيلم intervirew with the vampire
بتاع براد بيت وتوم كروز
انت صنفته ايه ؟ سؤال بس بساله لاي حد شاف الفيلم ده !
يعني صنفته دراما ولا رعب ولا رومانسي ولا اكشن ولا اجتماعي ولا كذا حاجه مع بعض . ؟

نيجي للبوست بقي
اذا كان قصدك الظلم
فاعتقد اني عملته
كان مره فيه ظابط قليل الادب حبتين شتم واحده صاحبتي . وانا شتمته ووصل الموضوع للايد
وخلاص خالصين هو قل ادبه وانا قليت ادبه
بس انا دعبست وراه واذيته بشكل ما
لكن بعد كده روحتله واعتذرتله وهو قبل اعتذاري وللاسف كانت نهايه سعيده هههههه
تحياتي

Che يقول...

زيكا باشا
انا عشان اللى انت بتقول عليه جبت dvd writer و ماليش شغلانه غير انى انسخ الافلام و المسلسلات الاجنبى .. عندى تقريبا 200 اسطوانه كل واحده فيهم عليها متوسط 4 جيجا
فيلم Interview With A Vampire تصنيفى ليه انه فيلم فى الاول و الاخر فيلم درامى و شايل كميه مشاعر كبيره جدا و من ضمنها الرومانسيه ، اما تصنيفه على انه فيلم رعب او Horror فاظن على حسب معلوماتى انه بتكون ليه مقومات تانيه بس اكيد هاستنى اعرف رأيك عشان انت دارس مش هاوى زى او خلينا نقول انك بتصقل الهوايه بالدراسه الاكاديميه
و بالنسبه للافلام فانا عندى 2 صحابى نادر و امير بيكون محور اساسى فى جلساتنا الافلام و الكلام عنها و يمكن امير اكتر لان نادر ظروف شغله مش بتسيبله وقت فراغ كبير و احنا على طول بنقعد عندى او بنتقابل فى وسط البلد و انت ممكن تشرفنا و تقعد معانا فى اى وقت و اى مكان
سعيد انى عرفت واحد مهتم و محب لفن السينما
منورنى دايما يا باشا

Zika يقول...

بص بقي
انا بارضه عندي اتنين محور كلامنا الافلام
وتقريبا اخر مناقشه كانت علي مونيكا بيلوتشي
من حيث كل حاجه التمثيل والشكل طبعا هههههههههه
احمد وهشام .. وحوار الافلام
انا مسميهم كده

المهم
بالنسبه لفيلم interview with the vampire
هو ده اللي انا مستنيه منك
من الاخر اللي بيقولي كده باعرف انه بيفهم في الافلام
وبالنسبه للسينما انا لسه مادرستهاش
مجرد ورش فنيه لكن لسه ماتقدرش تعتبرني دارس بالمعني الاكاديمي
كمان المسلسلات الاجنبي
prison break
lost
grey's anatomy
دول المفضلين والباقي بارضه شغالين يعني حبه كده وحبه كده
المهم بس تصنيفك لفيلم براد وتوم كروز ده بالظبط
نفس تصنيفي لفيلم
وكمان فيلم
bram stoker's dracula
مش متاكد من النطق
بس ياريت تبقي فاكر الفيلم ده
بتاع انتوني هوبكينز
وكيانو ريفيز
بص من الاخر .. انت اللي جبته لنفسك واستحمل رغيي في الموضوعغ ده بقي يا ريس
سلام

Che يقول...

زيكا باشا
طبعا فاكر الفيلم ده و هو اسمه Dracula بس انما اضافه Bram Stoker جت بسبب ان الفيلم ده متاخد حرفيا عن القصه المشهورة بتاعت برام ستوكر و كبعا لما تتكلم عن سير انتونى هوبكنز يبقى انت بتتكلم عن تاريخ ممكن نقعد نرغى فيه اسبوع و مايخلصش ، الصدفه ان اللى كان عامل دور دراكيولا فى الفيلم هو Gary Oldman اللى برضه كان مشترك فى Tht Dark Knight يعنى كده تقدر تقول ان الموهبه لازم تتطغى على صاحبها دايما حتى لو هو مش عايز
و بمناسبه المسلسلات فطبعا اكيد انت متابع Lost السيزون الخامس و الاخير و مستنى Prison Break فى 14 ابريل حسب اخر تحديث للمعاد بعد ما كان المفروض انه يكون فى فبراير ، لو تسمحى ارشحلك مسلسل جامد جدا دراميا و على مستوى السيناريو اسمه Damages السيزون التانى بتاعه شغال دلوقتى و مسلسل كمان خاص بال con او الاحتيال اسمه Leverage و اكيد تنويعا على Grey`s Anatomy ممكن تتفرج على Private Practice بتاع مرات دوك ماكدريمى لما سافرت
و اخيرا اتكلم براحتك يا باشا على الافلام لانى مابصدق الاقى حد ارغى معاه عليها و يكون فاهم فيها بجد
مستنى شويه رغى زياده

مثلية تبحث عن ذاتها يقول...

قصه تجنن
تشبيهات فوق الوصف اجمل من رائعه
اما انا فلعبت دور المسيح كتييييييير و بطرس اما عن يهوذا فعمري ما لعبت دوره لأن دوره صعب و اخرته انتحار وانا اعتقد ان المصلوب ظلم افضل من المشنوق لاحساسه بتأنيب الضمير

تحياتي لأجمل الأقلام

Che يقول...

عزيزتى مثلية تبحث عن ذاتها
شكرا على المجامله القصه مش من تأليفى بس المعالجه و التشبيهات فانا مسئول عنها مسئوليه كامله
شكرا على اجابتك .. و اسجل اتفاقى معك بخصوص الفرق بين المصلوب و المشنوق لان وجهه نظرك سليمه جدا جدا
اسعدنى مرورك و فى انتظار المزيد

adel يقول...

الفيلم ده تحفة قوي علي فكرة

انا عاوز اكتب كومت كبير بس هاختصر عشان لسه قدام كتير

مفتكرش اني لعبت دور المسيح ولا وصلت ليهوذا

انا بطرس للان

Che يقول...

عادل باشا
الفيلم فعلا تحفه و اكتب التعليق اللى انت عايزه يا عم
جميل انك بطرس للان بس حاول تلعب ادوار مختلفه من باب التغيير .... هههه
نورتنى يا باشا