الخميس، 19 فبراير، 2009

اوعى البوست يفرقع فى وشك

كتبت بوستين فتحوا النار عليا ... ناس تقولى اسلوبك فاضح مع انى مش شايف كده ، و ناس فاكره انه بأروج للمثليين و المثليات مع انه ده برضه مش صحيح ، و ناس بتدعيلى بالهدايه زى ما اكون خرجت عن ملتهم ، و ناس تقولى انى باتكلم فى الاديان و بأدى امثله ممكن اغيرها بأمثله تانيه ( بس من غير ما يقولولى ايه الامثله التانيه اللى ممكن استخدمها ) و حاجات كتير من هذا القبيل
المهم انا هاتكلم شويه بالتفصيل عشان اللى مقراش مايتعبش نفسه و يدور على البوستات ... فى بوست انا كتبته عن شويه مناظر و مشاهد انا شفتها بعينى و فى ناس كتير من اللى سابوا تعليقات قالوا انهم برضه شافوا مناظر زى كده و اكتر و ناس افتكرت انى باتكلم عن حاجات موجوده فى كوكب تانى .. كل ده عادى .. اللى مش عادى انى اتكلمت عن بنتين اغلب الظن ( لان بعض الظن اثم ) مثليتين كانوا بيبوسوا بعض .. و طبعا ناس انبرت للدفاع عن الشرف و انهم لو فى مكانى كانوا عملوا كذا و سوو كذا و كده .. طبعا انا مش هاكون سئ الظن و اقول الناس دى بتزايد او بالبلدى بتمعر انما انا برضه لسه حسن الظن بالناس و كل اللى قلته انهم من حقهم يتصرفوا كده بس انا ما ادعتش بطوله زايفه لنفسى و قلت انى عملت زيهم .... ناس اتهمتنى انى معجب بسلوك المثليات دول مع انى قلت فى قلب البوست و ردودى على التعليقات انى بأرفض شئ زى ده انما انا مؤمن بحاجه اسمها الحريه الشخصيه لانه فى القرآن فى ايه بتقول ( فمن شاء فليؤمن و من شاء فليكفر إنا أعتدنا للظالمين نارا أحاط بهم سرادقها ) و سألت فى حريه شخصيه او ديموقراطيه اكتر من اللى ربنا قالها فى كتابه العزيز بس للاسف محدش رد عليا زى ما تكون الايه دى انا مألفها مثلا او مش موجوده فى المصحف بتاعنا كلنا ... ما علينا
و هاستعير تعليق و رد و ارجو من صاحبته ان تسامحنى بس ليا العذر انه تعليق عام مش خاص ليا انا بس
مثلية فقط يقول...
كلامك مهضوم كثير
برافو انو في ناس بتحترم حرية المثليات
بتمنى تكون طلعت من حالة الإكتئاب خالص تحياتي
09 فبراير, 2009 07:43 م
Che يقول...
مثلية فقط
الفكرة مش فكرة احترام حريه المثليات او المغايرات ، الفكرة فى مبدأ احترام الحريه بوجه عام
نورتينى
10 فبراير, 2009 06:34 ص
و انا برضه هافضل ادافع عن فكرة الحريه الشخصيه لانى مقتنع انه ربنا هو اللى بيحاسب العباد مش هما اللى بيحاسبوا بعض .. و الا لو احنا اللى بنحاسب حد يقولى مين اللى هيحاسبنى عشان اخليه يدخلنى الجنه
ده اول بوست و المشاكل اللى كانت حواليه باختصار شديد عشان مضيعش وقتكم
تانى بوست كنت باحكى فيه عن فيلم و كل العمليه انى تناولته من وجهه نظرى الخاصه و سألت سؤال فى اخر البوست .. فى مدونين كتير سابوا ردهم و مدونين تانين قالولى انه لازم استخدم مثال تانى و اقلل شويه من اسلوبى الفاضح و انى لازم اخلى بالى انه فى بنات ممكن حياءها يتخدش و كلام زى كده ... المهم اللى انا قلته كان انه اللى انا عملته اسمه كنايه ( طبعا كلنا فاكرينها من ايام امتحانات الثانويه العامه بتاعت العربى ) و قلت لو حد عنده مثال تانى افضل ممكن استخدمه يقولى عشان استخدمه .. عشان المثال اللى انا استخدمته كان على المسيح و يهوذا و بطرس ... المهم انا ليا واحد صاحبى جدا اسمه امير و امير مسيحى قرا البوست و سابلى تعليق من غير ما يحس انى جرحت او قلت حاجه تسئ لعقيدته و كان بيزورنى النهارده و سألته اذا لقى فى البوست اى اساءه منى للدين لان فى النهايه دى حاجه انا مقدرش اتحمل وزرها و قالى لا .. و بعدين سألنى انت ليه بتسأل حكيتله حكايه التعليقات قالى يا عم عمرو الناس اللى مابتفهمش كتير ( ده عشان امير مؤدب ) بينما نادر اللى سمع الحوار ( عشان هو اقرب فى الطباع ليا ) قالى يا سيدى البقر ما اكترهم و دول ولاد تييييييييت ( بعد مناقشه مع صديقه اقنعتنى ان كلمه تيييت هتخلينى ابان مؤدب عشان هى الكلمه الماشيه موضه اليومين دول و عشان برضه احاول احسن شويه من اسلوبى " الفاضح " ) و انا كل اللى قلته انى بارد على كل واحد بأسلوبه لانه اكيد مينفعش حد يكون بيهاجمنى او يحتد عليا و انا اتكلم بذوق لانه لكل مقام مقال و لكل زمان رجال .. ممكن ناس تقولى عشان دول اصحابك .. بس برضه فى مدون محترم اسمه عادل و هو مسيحى برضه معلق على نفس الموضوع و برضه ماكنش ليه اى تحفظات مع انى اعرفه و هو يعرفنى عن طريق المدونات برضه و جايز يكون فى مدونين مسيحين اكتر و انا معرفش بس الملحوظه بتاعت الدين ماجتليش غير من المسلمين مع انى ما اظنش انى تجاوزت اى خط احمر
يا جماعه فى قاعدة فقهيه بتقول ناقل الكفر ليس بكافر و انا هاسيب نص الفتوى عشان محدش يفتكر انى جايبها من عندى
ناقل الكفر له أربع حالات كما ذكرها القاضي عياض في "الشفا"47، ملخصها
الأولى: إن كان نقلها بغرض التعريف بقائلها والتحذير منه، والإنكار عليه، أوحكاه في كتاب أومجلس على طريق الرد والنقض له، فهذا تعتريه الأحكام الأربعة: الوجوب، والندب، والكراهة، والتحريم، حسب حال المنقول إليهم• فإن كان قائل ذلك له أتباع يقلدونه ويتبعونه فيما يقول فيجب النقل للرد عليه في هذه الحال، ويكون ناقل الكفر ليس بكافر، وهذا من فروض الكفاية، إذا قام به البعضُ سقط عن الباقين أوحكاه شاهدا أوحكى ذلك لمن يمكنه الرد عليه أومناظرته، فهذا يُحمد ويُشكر على ذلك
الثاني: وأما حكايتها على غير ذلك فإن كان الحاكي لها على غير قصد أومعرفة بخطورتها، وعلى غير عادته، ولم يظهر منه قبل ذلك شيء يشبه هذا، زجر وعُزر تعزيراً شديداً وأغلظ عليه وقد حكي أن رجلاً سأل مالكاً عمن يقول: القرآن مخلوق؛ فقال مالك: كافر فاقتلوه؛ فقال: إنما حكيته عن غيري؛ فقال مالك: إنما سمعناه عنك وهذا من مالك رحمه الله على سبيل الزجر والتغليظ، بدليل أنه لم يسع في تنفيذ قتله
الثالث: أما إن كان الناقل عُرف بتجرئه وتطاوله على أمثال ذلك فهذا يكفرقال أبو عبيد القاسم بن سلام فيمن حفظ شطر بيت مما هُجي به النبي صلى الله عليه وسلم فهو كفروقد ذكر بعض من ألف في الإجماع إجماعَ المسلمين على تحريم رواية ما هُجي به النبي صلى الله عليه وسلم، وكتابته، وقراءته، وتركه متى وجد دون محو
الرابع: أن يكون الناقل مكرهاً، فهذا لا إثم عليه
و فتوى كمان عشان تبعا للمنهج العلمى الشئ لا يمكن الاستدلال عليه بمثل وحيد
فتوى ابن ابراهيم رحمه الله 13/196
عن الكلمة المشهورة ( ناقل الكفر ليس بكافر ) هل هي مرفوعة أم لا ؟ وأما : ناقل الكفر ليس بكافر . فليس بمرفوع . وفي كلام العلماء ما يدل على أن المسائلة ليست على هذا إلاطلاق ؛ بل فيها تفصيل يتلخص في أن حاكي الكفر عن الغير يختلف حكمه باختلاف القرائن ؛ فان كانت الحكاية لغرض شرعي فالأمر كذلك لاجماع أئمة الهدي على حكايات مقإلات الكفرة والملحدين في كتبهم التي صنفوها وبحالهم ليبينوا ما فيها من فساد ليتجنب ، وليبطلوا شبهها عليهم ، ومن أدلتهم على ذلك أن الله تعالى قد حكي مقإلات المفترين عليه وعلى رسله في كتابه على وجه إلأنكار لقولهم والتحذير من كفرهم والوعيد عليه بالعقاب في الدارين والرد عليهم بما بينه في حكم كتابه ، وكذلك وقع في أحاديث النبي الصحيحة .وان كانت الحكاية على وجه إلاستحسان لمقالة المحكي عنه فلا شك في كفر الحاكي واستحقاقه ما يستحق المحكي عنه ، وقد عقد القاضي عياض في " الشفاء " باباً أطال فيه في بيان هذه المسالة فليراجعه السائل فان فيه ما يقنعه . والله الموفق . والسلام عليكم ورحمة الله وبركاته .مفتي الديار السعودية ص/ف 17871 في 13/8/1386
بصوا يا جماعه بالنسبه للدين انا و لله الحمد اتممت القرآن و قريت تفسير الجلالين ( اللى انا شخصيا باعتبره من اكتر التفاسير اعتدالا ) و قريت لابن تيميه المتشدد و صحيح البخارى و مسلم و معظم الكتب الموثوق فيها فى الفقه و السنه و الحديث و الشريعه .. و بالنسبه للدين المسيحى قريت العهد الجديد او الانجيل و فى كذا طبعه و قريت نسخه مما يقال عليه انجيل برنابا و تابعت الجدل اللى كان مثار حول ما يسمى بانجيل يهوذا .. و فى اليهوديه قريت العهد القديم او التوراه بالاضافه للتلمود او كتاب حكماء و احبار اليهود .. يعنى انا عندى معرفه جيده بالاديان و الكلام اللى بقوله مش تحشيش .... اللى عايز يناقش بأدله و براهين ماشى و اللى عايز يناقش بؤيئى برضه ماشى و اللى مش عايز يناقش خالص برضه ماشى و كل واحد هارد عليه باسلوبه بس يا ريت اللى يناقش يحكم عقله و منطقه الاول
و احب اشكر عمتى ستيته لحرصها الدائم على ابقاء دائرة الحوار ممتده و حبل الود موصول لانها فعلا انسانه اعتز بيها و عارف مدى حرصها انها تنصحنى لوجه الله ابتغاء فى مرضاته و لا شئ اخر و انى فعلا احبها فى الله لانى مسميها عمتى و كلكم متعرفوش انى عمتى دى انا باحبها زى امى لانها امى التانيه بالفعل و الوحيده هى و امى اللى ممكن يضربونى بالجزمه و انا اوطى اجيبلهم الجزمه لو وقعت منهم لو لسه عايزين يكملوا الضرب يمكن ده يديكم فكرة انا بحب ستيته حسب الله الحمش اد ايه و معتز بيها و فرحان انها بتعتبرنى زى ابنها و بتحاول تصلح منى لانه مش عيب انى اتغير للاحسن
و حاجه كمان احب اقولها
من كان منكم بلا خطيئه فليرجمها بحجر .... المسيح عيسى ابن مريم
اذا أتتك مذمتى من ناقص ... فهى الشهاده لى بانى كامل .... المتنبى
الى من اتهمونى بالأسفاف و التهريج أهدى مزيدا من الأسفاف و التهريج .... يوسف السباعى

هناك 69 تعليقًا:

مياسي يقول...

اوبس

هاي بتعاني يا سيد عمرو

يا سيدي؛ كل واحد حر في مدونته؛ وانا مش شايفه عندك -شيكاجو -رواية علاء الأسواني مثلا

بصراحه شايفه أسلوبك منيح وكويس؛ كمان أنا بحسب حالي مطلعه وبعرف أميز الحكي الفاضح من غيره

عادي يعني؛ وتدافع عن نفسك ليه مش فاهمه؟ بعدين قصة صليبه على كتفيه ومش عارفه شو بشوف المسلمين بيستخدموها اكتر من المسيحيين لسا!

Che يقول...

مياسى الجوزاء اللى زى اللى كنت بادور عليها بس مش عارف اوصلها
كل اللى بتقوليه ده صح و انا شايف انه صح .. بس فى ناس حاطه معايير معينه ليها و عايزانى التزم بيها
و على فكرة البوست ده مش دفاعا عن نفسى لانى معملتش حاجه غلط عشان ادافع عن نفسى انما الفكره فى حق الرد و طبعا ارد فى مدونتى مش فى مدونات الناس لانى لسه بافهم فى الاصول
و بالنسبه لموضوع الصليب هو ده كان نفس تعليقى ان المسلمين هما دايما اللى بيعلقوا على الموضوع ده
نورتينى يا جميل و شكرا على تضامنك و هنسير فى طريق الثورة معا .. طبعا اذا ماتخدناش امن دوله او مباحث

مياسي يقول...

"مياسى الجوزاء اللى زى اللى كنت بادور عليها بس مش عارف اوصلها"

ما فهمتها هاي!! معلش فهمي صاير على قدي:)

لا دخيلك مش حنروح أي مكان!! ما تخاف احنا اللي زينا مرحب فيه أساسا لأنه بيخرب المجتمع وبيحكيش في السياسه:)

Che يقول...

كنت بادور على جوزاء زى عشان الجوزاء مايفهمش دماغه غير الجوزاء اللى زيه يا جميل
و مش عارف الاقيكى عشان فعلا معرفش اجيبك منين ساعه ما اكون محتاج حد جوزاء
و فعلا احنا بنخرب المجتمع و بننخر فيه كالسوس و اساس كل المصايب و المشاكل اللى فى المجتمع و لو ينفع يعملوا هولوكست لينا عشان المجتمع يعيش

مياسي يقول...

هايني هون

كل ما تكتب بوستات بعد نص الليل تلاقيني بعلق

ابعت لي ايميل لما تحتاج جوزاء زيك:)

وعلى فكره الجوزاء فعلا فري؛ بيتقبل أي فكره وبيفكر فيها من كل ناحيه

هولكست شو دخلك!! لسه الحياه قدامي:)

وحق الرد محفوظ يا سيد عمرو؛ خد راحتك وهاتلك واحد شيشه بكرز:)

Che يقول...

انا اغلب بوستاتى بعد نص الليل لاننا خفافيش آدميه .. و طبعا معاكى فى كل اللى بتقوليه على الجوزاء و فى اكتر منه كمان
و بعدين متخافيش من كلمه هولوكست كده .. الحمدلله مفيش يهود بيدخلوا عندى والا كنت هابقى متهم بمعادة الساميه
اخر حاجه ابعتلك ايميل على ايه و انا معرفش ليكى ايميل اصلا يا مياسى .. يعنى لو معايا الايميل كنت هادور عليكى برضه
و بالنسبه للشيشه لو حكمت اننا نشرب شيشه فواكه احب العنب عشان تقيل .. ههههه

مياسي يقول...

روح عالركن اللي فوق في البروفايل تاع مدونتي

حتلاقي الايميل يا سيد تشي

بعدك جديد عهالحركات:)

العنب ما جربناه؛ بتنصح فيه يعني؟

Che يقول...

ايه الجمال ده يا مياسى .. بعد 18 سنه خدمه فى ثانوى بتقولى انى جديد
يا ستى انا عارف ان ده الايميل بتاع الجوجل انما انا بحب الياهو و بس
و بعدين بالنسبه للعنب ده جامد بس مشكلنه انه فعلا تقيل يعنى لو مش متعوده ابقى هاتى معاكى انبوبه اوكسجين لما تشربيه لغايه مانلحق نوديكى المستشفى

مياسي يقول...

أها

طيب؛ انسى بلا اسطوانه بلا غم

وانت خادم كتير؛ لازم يحيلوك تقاعد خلاص:)

Che يقول...

عندك حق والله بلا اسطوانه بلا غم .. فى حل احسن انك تشربيها فى جو مفتوح و كده يبقى الازكسجين حواليكى من كلل ناحيه
و فعلا انا حاسس انى بهنج اليومين دول
بس سيبك انتى البوست مؤدب أوى بالنسبه لانى جوزاء .. صح ولا انا بيتهايئلى ؟ ههههه

مياسي يقول...

ههههههههههه

يعني شو قصدك؟ انو برجنا مش مؤدب؟ لا وألف كلا لو سمحت نو نو:)

شو يعني "بنهج" صح؟

Che يقول...

عندك حق بس مدام احنا اللى بنقول كده على برجنا يبقى احنا احرار
و يهنج مصطلح للكمبيوتر جاى من hang on يعنى يثبت على شئ واحد لدرجه انك بتحتاجى تعملى restart عشان الجهاز يشتغل تانى

عاشقه وغلبانه يقول...

صديقه قالتلي مش عارفه ايه... مش عارفه ليه افتكرت مشهد عادل امام في فيلم السفاره في العماره لما بيقوله جيالي صديقه سنغافوريه
ههههههههههههههههههههههههههههههه

المهم ياسي عمرو
زي ماقولتلك انت لا يمكن ترضي كل الاذواق بس علي لاقل هاتحاول ترضي ناس بتحبهم ومش عيب ابدا ان حد عزيز عليا ينصحني وانا استجيب وخصوصا لو واثق ان نصيحته ليا حب فيا

ربنا يهديك يابني
ههههههههههههههههه
هههههههههه
بهزر معاك اوعي تضرب

Che يقول...

ازيك يا عاشقه يا احلى دوك
طبعا انتى هتموتى و تعرفى مين الصديقه بس مش هاقولك برضه ... هههههه
ليا تعقيب صغير على تعليقك
انا اكيد مش هاقدر ارضى كل الناس لانى حتى لو ولعت فى نفسى مش فى صوابعى برضه مش هيعجبهم و هتلاقى ناس يطلعوا كده زى ال..... و يقولوا فى احسن من كده لان البنى ادم بطبعه واطى و مايملاش عينه غير التراب
و برضه انا مش مضطر اتغير عشان الناس اللى بيحبونى لان اللى بيحبنى بجد هيعرف انه مفيش بنى ادم تفصيل انما احنا بنيجى باكدج على بعض
اهم حاجه اتعلمتها انى ارضى نفسى اولا و ثانيا و ثالثا و اخيرا ...
و بالنسبه للنصيحه انا كتبت انى باتقبلها خصوصا من اللى بيقولها خالصه لوجه الله لا يبغى جزاء ولا شكورا
و ربنا يسمع منك و يهدينا جميعا يا دوك
نورتينى كالعاده

عاشقه وغلبانه يقول...

انا عايزه اعرف مين الصديقه
كبرت في دماغي بقي..؟؟
ههههههههههههههههههههههه

Che يقول...

خليها تكبر فى دماغك يا دوك بس حاسبى لتفرقع
و بعدين انا لا ممكن اقولك على الصديقه لانى قلتلها انى مش هاقول على اسمها يرضيكى اطلع عيل
هههههههه

تامر علي يقول...

أنا بصراحه أول مره أدخل مدونتك وقريت أول موضوع ورجعت للموضوع اللي الناس انتقدتك فيه وأنا كمان هانتقدك (معلش) لكن بأسلوبي الخاص :)

أولاً: موضوع الحرية الشخصية مفهومه خاطىء عند حضرتك.... طبعاً الجملة السابقة مش هاتعجبك لكن خلينا نستخدم منهجية علمية ونختبر الحقائق ...هات أنبوبة اختبار:(

افرض إني شخص مجهول بالنسبة لك وشفتك لأول مرة وقررت إني أضربك بدون سبب وقررت أتحمل النتائج المترتبة على فعلي .
س : هل أكون مارست حريتي الشخصية بهذا الشكل ؟
- أولاً إرتكبت جنحة قانونية
- ثانياً تعديت على شخص برىء
-ثالثاًنشرت سلوك العنف في المجتمع
- رابعاً حكمت على نفسي بعقوبة

لو تذرع الفاعل بالحرية الشخصية لن تقبلها منه لأنه تعدى فيها على (آخر)
إذن هناك ضابط للحرية الشخصية وليست مطلقة. اعتقد لحد هنا متفقين

في حالة الشواذ اللي انت شايف ان من حقهم ان يمارسوا شذوذهم حلل بنفس المنطق السابق فعلهم ستجد الآتي:

- نشروا الرذيلة في المجتمع وجاهروا بهاواعتبروها حق مكتسب
- خدشوا حياء غيرهم ممن يشاركهم نفس المجلس ومش واخد خوانه
- انتهكوا حرمة من حرمات الله وحاربوه بالمعصية
- خالفوا حتى قانون نابليون المعفن اللي احنا ماشيين عليه وممكن حد يعملهم محضر فعل فاضح

* حضرتك ذكرت انك بوست واحده علشان انت رومانسي :) مش هاجادلك في الآية "من شاء فليؤمن ومن شاء فليكفر" علشان برضه انت مش فاهمها خالص وممكن اشرحهالك لو طلبت لكن هسألك سؤال لو شفت واحد بيعمل كده مع اختك هيكون موقفك ايه؟
جاوب ونكمل النقاش .

Che يقول...

استلذ تامر على
اولا انت شخص محترم عشان كذا نقطه .. اولهم انك رجعت للبوستات اصل الخلاف و قرتهم عشان تبقى عندك صورة كامله و واضحه عن الموضوع اللى انت هتعلق عليه و لازم اعترف انى كنت مستنى ناس تانيه تعلق بس من الواضح ان حجتهم ضعيفه او انهم طلعوا ناس ( بؤ ) فى الاول و الاخر .. ما علينا
تانى نقطه ان حضرتك قررت اتخاذ المنهجيه و الفرضيه العلميه اساس للحوار و ده شئ انا باحترمه جدا
نيجى للتعليق نفسه .. بالنسبه لمثال الشخص اللى ضربنى فى الشارع انا موافق عليه جمله و تفصيلا .. بس بالنسبه لتعميم نفس المبدأ على حاله المثليين فيه كذا غلطه .. بالنسبه لنشر الرذيله فحضرتك عارف ان كلمه نشر يعنى دعوه الاخريين لفعل نفس الشئ و ده انا ماشوفتش حد منهم بيدعى اى حد انه يعمل المثل .. بالنسبه لاعتبارها خطأ و بيجاهروا بيه دى صح لانى زى ما قلت انا مش موافق على اللى هما بيعملوه
بالنسبه لنقطه خدش الحياء فانا مش هاعترض بس فى توضيح صغير ان مرحله خدش حياء كل انسان بتختلف عن التانى الا لو حضرتك بتتكلم فى المطلق فيبقى تبعا لمنطق المنهجيه العلميه اللى حضرتك قلت انك هتناقش بيه فاكيد حضرتك عارف انه مفيش مطلق يعنى اللى ينطبق على (س) ماينطبقش على (ص) و هكذا
انتهاك حرمه من حرمات الله و محاربته بالمعصيه نقطه صح
مخالفه القانون الفرنسى هنا اعتراض شكلى لان القانون الفرنسى بيكفل الحريه للمثليين انما القانون بتاعنا المأخوذ عن القانون الفرنسى بس بملائمته مع الشريعه الاسلاميه و احكامها فده فعلا بيدخل تحت بند الفجر و الفسوق
و اعتراض شكلى اخر بالنسبه لمبدأ التعميم اللى حضرتك طبقته على المثالين فده تبعا لمنطق المناقشه العلميه اللى حضرتك بتقول عليه برضه مرفوض لانه معروف انه حتى بالنسبه لنفس التجربه النتيجه بتختلف بنسبه ما عشان كده اول حاجه بنتعلمها فى المنهج العلمى ان كل تجربه مستقله بذاتها
بالنسبه لموضوع البننت اللى انا قلت انى بوستها فده كان رد تهريج على تعليق جالى و انا ماقلتش ان ده صح انما الفرق بينى و بين بعض الناس اللى انا اعرفها انى عندى الشجاعه انى اعترف بغلطاتى و اصححها عشان اكون شخص احسن مع اعترافى ان الكمال لله وحده
و بالنسبه لتفسير الايه انا منتظره منك انما اغلب الظن ( و ليس كل الظن اثم هنا ) ان حضرتك هتقولى على التفسير الخاص بنزول هذه الايه انها نزلت للتهديد و التوعيه و مع ذلك انا فى انتظار ردك
شرفتنى بتعليقك بجد و مستنى باقى المناقشه

*البت المشمشية *حلوة بس شقية * يقول...

عمور
اول مرة ادخل واعلق هنا
بلنسبة للناس اللى بتنقدك
اعتقد انك عامل مدونة
عشان تكلم براحتك ولو مش هتكلم براحتك اقفلها
وطيبيعى ان مش كل الناس معجبة بكلامك
فيه كدة وفيه كدة
بلنسبة لموضوع البوست
والمثلين
هتعرف ردى فى البوست الجاى ليا

Che يقول...

شوشو هانم على سن و رمح
اهلا بيكى فى اول تعليق
و انا طبعا متفق مع كلامك انما يفضل اننا عاملين المدونات دى برضه طمعا فى نسبه من التواصل و وضع طبيعى مش كل الناس تكون موافقه على اللى انتى بتقوليه .. يعنى مش كل الناس اتفقت على ربنا يبقى اكيد مش هيتفقوا عليا
و بالنسبه للتعليق الجاى انا مستنيه
نورتينى يا جميل

حررروف يقول...

مممممممممممممم صلوا ع النبي يا خونا انا جاية اهدي النفوس وسع ياض منك له له ليها له له
بص يا عمو المدونة ليس لها اب روحي وليس لها راعي يقف وفي يدة عصا يلوش بها الغنم وكل من يعلق ويقول رئية فهو استخدم حقة في الحيرة اللتي يعترض عليها وباستخدامه كلمات جارحة او تسبب الضيق للك فلماذا يشكوا من استخدمك لحقك
انا مع الحرية الراي مع احترام الغير وعدم جرجه لا دين ولا غيرة
واللي يدخل مدونة مش لازم يسيب تعليق ويملي فراغ ويستخدم حقة فاني يغير الخطا اللي شايفه استخداما لقول الله تعالي لا يغير الله قوما حتي يغيروا ما بانفسهم
وياريت اللي يتكلم يكون واثق من اللي بيقوله وبيعمل بيه لاني متعقدة من موضوع اللي بينصح وهو بيعمل نفس الشيء وحرجع واقول الاباحه تعريفها ايه عشان ابئا فاهمه
الشتيمة ولا الهيافه ولا الاسقاط الجنسي برغم من ان حياتنا كلها بتشمل كل هذة الاسقاطات من شتائم ومن غيرة لست معهم ولست مع احد فانا اقول رائي بدون جرح احد او تخصيص لحد
وسلام ختام اقعدو بلعافية ويعني الراجل محروق اوي كاتب سؤلين محدش جاوب عليه
مين اللي بيحاسب؟
والفتوي ومصادرها ايه راي الشعب فيها
يالا سلام ياولاد كانت معكم حروف مسؤله البلوجرية اسكت يابابا منك له
انا مش معمرو ولا ضد عمرو ولا مع حد انا قلت اقول راي
وكمان انا كلامي مقصدش بيه حد بعينة
انا اقصد كل حد بينصح وبيجرح حد بنصيحته
وياريت محدش يوقع بيني وبين حد واللي فاهم حاجه غلط يجي يسالني واللي مش عاجبه يناقشني

Che يقول...

حروف العسل
انا موافق على كل اللى انتى قلتيه و يا رب الناس تفهمك صح
شكرا على تعليقك

سمكه واحده يقول...

صبااااح الخييييير
سانور عليهم
عواف عليهم اذيكم اذيكم
اولا بقي
بالنوسبه لموضوع حريه الشخصيه انا معاه جدا وكل واحد حر في مدونته والمدونه طبعا معموله لايه للفضفضه حاجه جميله يعني وبتلاقي اذواق كتير اللي بيعجبه واللي مش بيعجبه وحجات كده يعني انا بجد بحترم الحريه الشخصيه
انت حر ما لم تضر
بس في حاجه صغنتته اسمحلي اختلف معاك فيها يا استاذ عمرو باشا
احم احم
الدين بيقول حاجه مهمه جدا مش ديما بناخد بالنا منها هو انا بصراحه عشان متفلسفش اوي معلوماتي مش اد كده فمتخدش علي كلامي اختك بقي واستحملني
مش مبيقول من رأي منكم منكرا فليغيره
يعني متهيقلي لو اي حاجه غلط في مجتمعنا غلط لازم نغيرها وكلنا مسؤلين عنها
وهنتسأل ولازم كلنا نصلح المجتمع لان احنا افراد فيه وده بتعنا احنا
وكمان الرسول عليه افضل الصلاه والسلام قال
بلغوا عني ولو ايه
يعني مش هنشوف حاجه غلط ونسكت وبردو مش هنمسك خنجر وندبح في الناس بس نهدي ناس وكلنا مسؤلين عن نفسنا وعن اخوتنا والمجتمع كله
والله ده رأي
انا بجد والله مع الحريه الشخصيه
بس لو حاجه غلط مش ببقي معاها
اي نعم انا ببقي سلبيه في حجات كتير وانا علقت بكده عندك بس بنحاول نغير من نفسنا ويمكن لما نهدي حد ناخد ثواب فاهمني بس نقدر بردو ونحترم الناس كلها ونضع نفسنا مكانهم ونشوف العيوب فين
ونحاول نصلح مش احنا مخلوقين عشان نعمر الارض واولا لعباده ربنا سبحانه وتعالي

يوه ايه الرغي ده كله
اتمني مكنش وشيت علي دماغك
تحياتي دوما وادئما علي طول يعني

Che يقول...

سمكه هانم
ازيك يا فندك و اجدع سلام لاسكندريه و اهل اسكندريه و سمك اسكندريه على طول السلام
المهم بعد السلامات دى نتكلم على الرد ... انا معاكى فى كل اللى انتى قلتيه ... طبعا هاكلمك على التفسير العام للحديث اللى انتى استخدمتيه .. حق التغيير باليد مكفول لاولى الامر بس و ده ثابت فى صحيح الدين و بما اننا مش من اولى الامر يبقى ماينفعش نغير المنكر بالايد و لا ندبح بعض بالخناجر زى ما انتى قلتى فى تعليقك .. يبقى فاضل التغيير باللسان يعنى بالحوار و الحوار زى اى حاجه فى الاسلام ليها آداب انا كمسلم لازم التزم بيها و من اهمها انى ادعو لسبيل ربى بالحكمه و الموعظه الحسنه و ماكنش فظا غليظ القلب .. و تالت حاجه التغيير بالقلب و اظن انى دى معناها واضح .. و فى الاخر يظل ان فى احتماليه ان الشخص اللى انا باحاوره مايقتنعش و فى الحاله دى انا اسيبه لرب العياد يحاسبه
نورتينى بتعليقك يا جميل

سمكه واحده يقول...

بظبط ده اللي اقصده يافندم
قلت لازم الحوار بلاسلوب المحترم والرقي في الرد وملوش داعي ان احنا نجرح في بعض لان الدين تسامح وبردو اخلاق ومعامله
طيب محنا مش مختلفين (اهو امال ايه بجي)
استني اصل ماما بنتادي عليا وبشتم فيا وهروح نمسك في حناق بعض ومحدش يحوشني ولا يسلك شعري من اديها دي ماماتشي حببتشي انا هعرف اصرف معاها
بت ياسمكه بت ياسمكه اللهي يولع الجهاز ويفرقع في وشك يامدوخاني يانا
حاضر حاضر ياماما جايه اهو
ايه الناس دي صبرنا يارب
احنا علي الهوي سوري يا جماعه كان حوار عائلي علي جمب كده

مش بردو وصوا بالمعامله الحسنه وبر الوالدين اجري بقي اطبق ده
سلام

Che يقول...

ماشى يا سمكه هانم
انا مش هاحوش و هاستنى اشوف مامتك و هى بتقطعلك شعرك

mostafa rayan يقول...

سلام عليكم
بص يا عم اولا كويس انك عامل موديشرشن علشان تعرف التعليق جايلك على اي مدونة ويكون فيه تنظيم ودي حاجة كويسة وعجبتني حبيت اقولك عليها
ثانيا : انا معاك في الحرية الشخصية
بس الحرية دي في ما احله الله
يعني ما ينفعش اسيب اتنين يشوذو عادي واقول لاء اصل دي حرية يا جماعة لاء ماتنفعش لانها في غير ما احل الله وانا او تركت المخطأ بدون تعذير وتحذير الناس الناس منه ينتقل شره إلي المجتمع كله وينتقل هو من مرحلة ممارسة الخطأ في السر غلى ممارسته في العلن
فالناس دي لازم تقف عند حدها وتتواجه بكل قوة
-ثانيا : بالنسبة للالفاظ المستخدمة دي مدونتك ومن حقك تكتب فيها زي مانت عايز لأن الهدف منها توضيح ارائك بصرف النظر عن رأي الاخر في هذا الرأي او اسلوب كتابته
- اسف لو طولت
ولك مني كل التحية

Che يقول...

مصطفى ريان
انا حاطط الموديريشن عشان التعليقات اللى بتجيليى فيها شتيمه ماتتنشرش عشان انا مش هاحب ارد على اصحابها
بالنسبه لنقطه الحريه الشخصيه انا موافقك عليها و انت كمان قلت لازم تقول لا للناس اللى بتعمل كده ، بس انا عايز اسألك هتقول لا للناس دى ازاى
بالنسبه لموضوع الالفاظ انا باحاول على اد ما اقدر ان الالفاظ ماتكونش جارحه او فاضحه زياده على اللزوم
و طبعا انت ماطولتش و لو طولت براحتك يا باشا و تحياتى
نورتينى

تامر علي يقول...

طيب يا سيدي .... أولاً نشوف الآيه ... طبعاً إنت عارف إن في معنى لغوى ومعنى شرعي واحنا نستخدم اللغوي لفهم الدلالة وتحديد المعنى الشرعي له منهجية من جمع النصوص مع بعض ... زي الصلاة مثلاً في اللغة الدعاء وفي الشرع الأفعال والأقوال المخصوصة اللي كلنا عارفينها ... أعتقد لحد كده متفقين ....الآية الكريمة بتقول " وَقُلِ الْحَقُّ مِنْ رَبِّكُمْ ۖ فَمَنْ شَاءَ فَلْيُؤْمِنْ وَمَنْ شَاءَ فَلْيَكْفُرْ ۚ إِنَّا أَعْتَدْنَا لِلظَّالِمِينَ نَارًا أَحَاطَ بِهِمْ سُرَادِقُهَا ۚ وَإِنْ يَسْتَغِيثُوا يُغَاثُوا بِمَاءٍ كَالْمُهْلِ يَشْوِي الْوُجُوهَ ۚ بِئْسَ الشَّرَابُ وَسَاءَتْ مُرْتَفَقًا"

المعنى اللغوي : أنه بعد بيان الحق والباطل وإقامة الحجة على الباطل والإستدلال على الحق بالحجج الدامغة فمن شاء أي من أراد أن يتبع الحق فاليتبعه ومن أراد أن يتبع الباطل بعد قيام الحجة عليه فله الحرية ولكن ......ليس له الحق ....والدليل على ذلك أنه بعدها تطرق للعقاب مباشرة الذي سيحل على الكافر فكيف يعطيه (حق) ثم يعذبه على ممارسته؟؟؟؟؟

أعتقد إن الصورة وضحت ... علشان كده المفسرين قالوا فعلاً إن ده من باب التهديد لأن الله لايريد الضلال للإنسان ولكنه توعد من يختار الضلال بنفسه لنفسه.


بالنسبة للنقطة الخاصة الخاصة بالإعتراض على التعميم فأنا ذكرت حاله أعتقد إن نسبة الموافقات فيها عالية جداً ومش لازم تبقى 100% علشان دي حالات انسانية من فيزيا:) وبالنسبة لإعتراض نشر الرذيلة فمجرد مشاهدة إنسان يمارس عمل الطبيعي جداً إن البعض هايستحسن والبعض هايستقبح وهو ده المقصود الإستحسان يولد الرغبة وهكذا زي الدعوة بالفعل مش لازم أقول لواحد ماتسرقش بس لما يشوف قدوة لإنسان شريف فدي لوحدها دعوة للشرف والعكس صحيح.
* بالنسبة لتعليقك على سمكة واحدة في موضوع الأمر بالمعروف والنهي عن المنكر ..التغيير باليد مش للحاكم بس طبعاً ولكن لأي حد له سلطة ويقدر على التغيير باليد دون أن يترتب على تغييره باليد منكر آخر... مثلاً الأب في بيته لو شاف منكر ...يسكت ويغير بقلبه ولا يتناقش ويسيب مصيبة تحصل ؟؟

والنقاش مفتوح للرد

Che يقول...

الاستاذ تامر على
هبتدى الرد من تحت لفوق
بالنسبه للنقطه بتاعت ردى على الحديث بالنسبه لسمكه طبعا الاب شرعا و عرفا و قانونا يعتبر رب الاسره و بالتالى ولى الامر و من حقه انه يغير المنكر بايده انما انا اتكلمت على الناس اللى فى الشارع .. يعنى اكيد حضرتك هتتفق معايا ان لا حضرتك ولا انا ولا اى حد من اللى بيسيبوا تعليقات هنا من اولى الامر عشان يغير المنكر بايده
بالنسبه لنقطه ان الانسان لو شاف حاجه فى الشارع مثلا ففى ناس هاتستحسنها و ناس هاتستقبحها انا موافقك فى النقطه ، بس برضه شرعا الدعوة الى شئ انى ادعوك اليه و احببه اليك و اناقشك فيه عشان اقنعك بيه و ده حسب التعريفات اللغويه و الشرعيه ، و ماظنش ان الحالات اللى انا شفتها من المثليين و اللى انا حكيت عليها عملت حاجه من ده كله ، اما قولك ان البعض ممكن يستحسن الحاجه دى لمرحله انه يعملها فده هيكون اختياره الشخصى و الدليل على كده ان الحلال بين و الحرام بين و مع كده بتلاقى ناس بتعمل الحلال و ناس بتعمل الحرام من غير دعوة من حد انما اتباعا لانفسهم و مره تانيه باقول انى مش مع المثليين و مش موافق على اللى بيعملوه انما انا باتكلم فى مبدأ الحريه الشخصيه نفسه
اما بالنسبه للايه و تفسيرها فالحمد لله انه ظنى ماطلعش غلط .. و اكيد حضرتك من كلامك ليك معرفه بالتفسير و تعريف التفسير الباطنى للمعنى او منهج الاشاعره و الامام حجه الاسلام الغزالى .. و كمان التفسير اللفظى و اكيد حضرتك برضه تعرف ايجاز الحذف وما الى ذلك من التفاسير .... و بالنسبه لمبدأ العقاب فهو مش على " حق " الاختيار كما اوردت فى تفسيرك انما العقاب او الثواب على اختيارك نفسه و الا كان ممكن انى اسأل نفس السؤال ازاى ربنا يجازيك على شئ و انت مالكش " حق " الاختيار .. انما لان الاختيار نفسه هو نقطه الفيصل هنا فانا باتكلم على نقطه الاختيار فى حد ذاتها .. و اخيرا لو " حق " الاختيار مش مكفول لينا يبقى ربنا هايحسبنا على اى اساس .. و بالنسبه لنقطه ان ده جه للتهديد فانا متفق معاك فى كده بس باضيف انه ايضا جاء بيانا لما ينتظر المخطئ زى ما وصف الجنه جه بيانا لما ينتظر المصيب .. عشان لا يكون للناس حجه على الله فى انه ماوضحش مصير المؤمن و الكافر
فى انتظار الرد و شكرا على الحوار العقلانى الجميل

assafo anaroze يقول...

مساء النور الرفيق
سيدي على فكرة مدونتك عجبتني كثير وحط تحريرها جيد
اتناقشت حول ردود الافعال اللي جات لك بعد بوست بتاع المثلياث
سيدي لنا متفق معاك في مواقفك ان كمان من انصار الحرية الشخصية للانسان من خقه انو يمارس معتقداتو
وعلى فكرة علماء الاجتماع بيؤكدوا ان المثلية هوية زيها زي اي هوية اخرى ومن حقهم انهم يمارسو هويتهم بالرغم اني مش حعمل زيهم
و في ما يتعلق بمسالة الاديان من خق اي شخص يدين لاي دين و من حق المسلم و المسيحي و اليهودي انو يعيش في بلدو و يحس فيه انو محترم فيه وله كرامتو
وده مش حيتحقق الا بعد ما نقرر علمانية الدول العربية و اتمنى اني ده يحصل علشان كل الاخوة سواء كانو مسيحين او يهود او مسلمين يعيشوا في وئام و سلام يجمعهم حب الاوطان
مودتي
دعوة للتواصل عبر مدونتي

تامر علي يقول...

اعتقد لحد كده في تقارب في وجهات النظر نخش في الخلافات بقى :

1- انت موقفك من اللي حصل إنك مش موافق عليه بس شايف إن ده من حقهم صح طيب شوف الحديث ده.
"مثل القائم على حدود الله والواقع فيها كمثل قوم استهموا على سفينة فأصاب بعضهم أعلاها وبعضهم أسفلها فكان الذين في أسفلها إذا استقوا من الماء مروا على من فوقهم فقالوا لو أنا خرقنا في نصيبنا خرقا ولم نؤذ من فوقنا فإن يتركوهم وما أرادوا هلكوا جميعا وإن أخذوا على أيديهم نجوا ونجوا جميعا"
خد بالك كويس قوي من كلمة "ولم نؤذ من فوقنا" هم هايعملوا إيه ؟؟؟ هايريحوا نفسهم بدون أذى للآخر المشارك معهم في السفينة صح ؟؟
الحكم إيه ؟؟؟ إنهم هيهلكوا جميعاً
طيب إيه الحل للإشكالية دي
-عاوزين نأمر بمعروف وننهى عن منكر مع الحفاظ على الحريات العامة وبدون عنف
الحل من وجهة نظري أن تعبر عن إنكارك للأمر بصورة حضارية مثلاً تستدعي إدارة المحل وتنقل لهم استيائك من المنظر ... أو تسيب المحل وتمشي إنكاراً للمنكر ده ...أو تعلن عن رفضك بأي شكل محترم تختاره ...أما أن تسكت فأنت مقر لهم والمقر موافق
صح؟؟:)

Che يقول...

assafo anaroze
شكرا على مجاملتك بخصوص المدونه
بالنسبه لحريه اختيار الدين اللى انت تدين بيه ده شئ يرجع ليك لوحدك لانك انت انت اللى هتتحاسب مش انت
بالنسبه لقول علماء الاجتماع فايضا فى علماء اجتماع و علم نفس بيقولوا ان المثليه عباره عن اختلال و انحراف جنسى كاى نوع من انواع الشذوذ انما انا هنا مش باحلل وضعهم ايه
بالنسبه لمسأله العلمانيه فانا معرفش المعنى اللى تقصده بكلمه العلمانيه لان العلمانيه فى تعريفها الصحيح هو فصل الدين عن الدوله انما فى ناس بتستغل كلمه العلمانيه للتخفى طمعا فى اهداف اخرى فانا هاعلق ردى على نقطه العلمانيه لغايه ما اعرف معناها اللى تقصده
بالنسبه للسلام بين الاديان فانا اظن انه ده حلم لا يمكن تحقيقه .. لان المسأله مش متعلقه بأديان ولا علمانيه على اد ما هى متعلقه بأطماع بشريه و دى لا تتغير بتغير الاديان لانها موجوده دائما
شكرا على تعليقك

Che يقول...

أستاذ تامر على المحترم
اسجل احترامى و ارفع القبعه تحيه واجبه ليك .. لان حضرتك اقتنعت ان اللى احنا الاتنين عايزينه حاجه واحده بس بطريقه مختلفه
انا متفق معاك فى انك ممكن تبلغ ادارة المحل و متفق معاك كمان انك ممكن تتحاور معاهم حول وجهه نظرهم و تسجل اعتراضك بنفس اسلوب الحوار المهذب اللى كان بينا و انا فعلا محترمه
انا كل اللى قلته انى رغم عدم موافقتى على تصرفاتهم الا انى لا اصادر حقهم فى انهم يعملوها
و زى ما حضرتك قلت انا ممكن تبعا لنظريه الكنترول امشى و اسيب المكان و ده مش هيكون هروب انما هيكون مقاومه سلبيه و دى حاجه مؤثره جدا و فى فرق بينه و بين الهروب
لانه زى ما حضرتك قلت اهم حاجه انى اعبر عن وجهه نظرى و امارس حريتى بدون ايذاء الاخرين
احترامى الشديد ليك يا فندم

مثلية فقط يقول...

ما في اي مشكلة انو ترجع تحط تعليقي على بوست جديد .. بس منو هيدا هو التعليق يلي بيعكس وجهتي نظري عن الموضوع

انت حكيت عن المثلية من خلال تصرف شفتو و حاولت تقول انو هيدا موجود

للأسف كل المجتمع شايف انو المثلية انحراف و رذيلة و جريمة فضيعة انو لازم تجمعوا كل المثليات و المثليين و يشعلوا فيهم نار حتى يخلصوا ..... طبعا ما في مجال انو تناقش مجتمع جامد رجعي لا يقبل الإختلاف مهما كان ... زمان رفضت المرأة لأنها مختلفة عن الرجل و دفنت حية ثم صنفت درجة عاشرة بعد كل الأشياء المهمة في حياة الرجل ... هذا المجتمع المتخلف الذي لا يرحم و لا يتردد في الحكم بالموت على المختلفين لم يتقبل العلم و فضل التمسح بالأولية و الجدران بدل أخذ الأدوية ... الكل يتطفل على حياة الغير و يريد أن يعرف كيف و من ؟ ليس ثمة أدنى احترام لحرية و مشاعر الغير هذا المجتمع لا يمكنه الآن أن يتقبل المثلية ... لكن من شدة سخافته و تخلفه صدقني لن يجد في الأمر مشكلة إذا جاء أحد الشيوخ و أفتى لهم بأن المثلية مباحة ... لماذا ؟ لأن النفاق هو مبدأه الوحيد

و بعيدا عن موضوع المثلية ... لماذا نتقبل حرية الآخرين في التصرف و لا نعلق عليها ابدا إذا كنا في بلد أجنبي ؟ ما الذي يدفعنا إلى احترام حريتهم هل القانون أم القناعة الشخصية أم الخوف أو أنه النفاق و الإزدواجية التي نعيشها


تحياتي

MaNoOoSh يقول...

امممممممممممممممممم
استنى لما افكر شوية
اممممممممممممممم
بص بقى
بصراحة انا مش هعرف ارد عليك بمنهج علمى ولا رد منطقى.. يمكن علشان انا طول عمرى بفكر كتير بس رد فعلى بيبقى تبع احساسى اكتر
وانا صحيح مؤمنة جدا بمبدأ الحرية التى يلازمها المسؤولية وبناء على ذلك عليا انى اتعامل مع الاخرين بالمثل.. ولما حرية الاخرين تتعدى على شخصيتى مثلا فى الموقف بتاع البنات دة.. انا بفكر مثلا انى ليا ابن او ابنة واكيييييييد مش هتحمل انهم يشوفوا المنظر دة فرد فعلى هيبقى انى اسيبهم وامشى لانى بصراحة اجبن من انى انصحهم وصدمة المنظر مش هتخلينى افكر اشتكى للمدير مثلا.. بس الاكيييييييييد انى هبقى متألمة من المنظر دة مدة طويلة.
نطلع من الكلام دة باييييييييييييييه.. نطلع منه بانى قليلة الحيلة ومش منطقية وبنصدم من ايوها حاجة
هههههههههههههههههه

Zika يقول...

بص
انا انقد حاجه في المسلمين او الخطاب الديني يطلعلي المسلمين يقولوا مايصحش والملحدن يقولوا عليا منافق
انقد الالحاد
المسيحيين يقولولي سيبهم بحريتهم
والملحدين يدخلوا يسبوا الدين

تنقد حماس
يبقي انت كده ابن تييييييييييت وخاين
وعميل
وهكذا بقي
يا عم كبر دماغك شويه

وبالنسبه للناس اللي مختلفه معاك
وايه يعني ؟
ماهو مش عامل المدونه عشان تكتب اللي الناس عاوزاه
اكتب اللي انت عاوزه

Che يقول...

عزيزتى مثلية فقط
انا فى نشرى لتعليقك لم اتعرض لاى شئ يخص وجهه نظرك من باب الاحترام ليكى و لرأيك ، انما كان الغرض انه ابين فى ردى على تعليقك انى انا اتحدث عن الحريه الشخصيه بمفهومها الواضح و العريض ... و طبعا بالنسبه لرأى المجتمع فى المثليه فهو مثل ما ذكرتى و اكتر من كده كمان و الفكرة فعلا زى ما قلتى فى رفض الاختلاف و رفض الاخر ككل .. يعنى مثلا لو المجتمع مقتنع ان المثليين غلط يبقى اناقشهم ، ماقتنعوش هما احرار و يتحملوا نتيجه افعالهم لان المفروض اننا فى مجتمع حر يعنى برضه هتؤدى للحريه الشخصيه خصوصا ان الصاق تهمه افساد المجتمع بالمثليه فقط كلمه حق يراد بها باطل لان المجتمع فاسد من اساسه بالف سبب مش سبب واحد و مش صلاح سبب واحد هو الى هيصلحه
و فعلا زى ماقلتى ان المجتمع مصاب بحاله من النفاق و بالنسبه لتبرير اذا قام شيخ بأجازة المثليه محدش هيبقى عنده مثليه لان اغل المجتمع بيميل فى كل حاجه للعمل بالمبدأ المشهور " الصقها فى رقبه عالم " و بينسوا انهم كده بيلغوا عقلهم و بيلغوا مجرد التفكير
اما الحجه احنا ليه بنتقبل كده لو كنا فى بلد يسمح بده عشان احنا ناس منافقه و المتديني بيستندوا الى فتوى انى افعل مالا يخالف قانون البلد اللى انا فيها و فى نفس الوقت لا اخالف ضميرى
نورتينى يا جميل و اتمنى اكون وضحت سوء الفهم اللى انا وقعت فيه من غير قصد

Che يقول...

منوش
ليكى مده غايبه عنى مش عارف ليه بس لعل المانع خير
بالنسبه للرد بمنطق علمى او منهجى انا عشان اكون صريح معاكى كنت مستنى الرد من ناس تانيه انما الوحيد المحترم اللى عمل كده كان استاذ تامر على
و بالنسبه للصدمه اللى الموقف ده ممكن يتسبب فيها و طريقه تصرفك انا باحييك عليها لانها مثلا ماينفعش تقعدى تردحى او تضربى الناس .. يعنى انك تمشى او تناقشى الاداره او حتى انك تناقشى الافراد نفسهم فكل ده صح
و يارب ماتتحطيش فى الموقف ده عشان ماتحسيش بالم و صدمه
نورتينى يا جميل و ماتغيبيش كتير كده

Che يقول...

زيكا باشا
انت فينك يا باشا من زمان ... عارف اللى انت بتوصفه بالظبط والله مع انه حريه النقد مكفوله مدام بأنقد و معايا براهين او حتى بأنقد عشان اوضح وجهه نظرى لانى اكيد لازم يكون ليا وجهه نظر .. و على ذكرك لحماس و كده انا فى بوست هانشره قريب بس لسه مش وقته
ناس كتير جدا قالتلى دى مدونتك و انت حر تكتب فيها اللى انت عايزه و انت تانى واحد بعد نادر يقولى يا عم كبردماغك بعد نادر و امير ( اه تانى واحد لان الاتنين بيجوا باكدج واحده )
المهم سيبك انت البوست الجاى بتاعى اهداء مخصوص ليك و يا رب يعجبك
نوتنى يا زيكا باشا و مستنى ردك على البوست الجاى

MaNoOoSh يقول...

انا جاية ارد تانى اهو واتلامض عليك شوية
هههههههههههههه
بالنسبة لغيابى فأنا قايلة على سبب غيابى فى موضوعى الجديد..(رخامة بقى مش هقول هنا علشان تيجى تقراه -وش بيطلع لسانة-)
وكنت كمان عايزة اقولك ان الاغنية الجديدة اللى انت حاطتها جميلة قوى وعاجبانى جدااااااااا وبسيب المدونة مفتوحة علشان اقعد اسمعها
سلام بقى الوقتى وان شاء الله مغبش تانى عليك كدة واجى اتلامض واتراخم عليك كدة علطول
هههههههههههههههههه

Che يقول...

منوشه
انا جاى هوا اقرى البوست بتاعك
و يا ستى اتلامضى زى ما انتى عايزة و براحتك على الاخر
و هاحاول احط لينك الاغنيه عشان تحمليها لو عايزة
نورتينى تانى يا جميل

سارة نجاتى يقول...

ياعينى يا ابنى

عارف ليه بقول يا عينى , لأن احنا عندنا سقف من الحرية مش طبيعى يخليك تكتب شىء أو تخرج فيلم أو تعزف مقطوعة أو تطبخ بامية و لازم تنزل كاتلوج معاها , تفهم الناس قصدك منه , مع أن الناس فاهمة كويس بس لازم تلاقى حد بينتفض لدين او الأخلاق حتى لو مفيش داعى لأنهم بيداروا على بلاوى عندهم من خلال المزايدة
هم بيحسسونى أننا عايشين فى المدينة الفاضلة و أنت أخترعت
زى ما طلع ابعض يشتم فى هالة سرحان و يقول أحدهم " أصل الشباب كده عرف أن فى حاجة أسمها بنات ليل "

و نبى ايه ؟؟ طب ما أنا كتبت بوست أن ترتيب دوافعنا الدينى منها و الدنيوى و الناس راحت مدخلانى فى مواضيع مجبتش سيرتها أصلا

فكك و لا تحط فى دماغك أساسا , نفترض أنك مع حرية المثليين ( مع أنى ضد ده ) لكن مش معنا أنى مختلفة معاك ح أزايد على مبادئك و قيمك

سلام

Che يقول...

سارة نجاتى
انا موافقك جمله و تفصيلا و والله هو ده اللى انا قلته ... كل اللى اتحمقه و اتهمونى بالانحلال و الدعوه لمبادئ هدامه محدش منهم ( او الاصح اقول منهما ) دخل يناقشنى مع انى كل كلامى كان باسانيد و انا اوردتها .. الوحيد اللى دخل ناقشنى بكل عقلانيه و باسانيد كان الاستاذ المحترم تامر على
و انا فكتنى خلاص من الموضوع ده اصلا .. انا مش حريه المثليين على وجه الخصوص انا مع نبدأ الحريه نفسها
بالمناسبه ايه عنوان البوست اللى انتى قلتى عليه عشان اقراه
نورتينى يا جميل و مستنى تعليقاتك دايما

اسماء عوني يقول...

خليك علي راحتك
علي راي اسمه ايه ده
" كلام الناس لا بيقدم ولا ياخر .. كلام الناس ملامه وغيره مش اكتر "
مين بقي اللي بيغني ده مش فاكره
المهم انها لايقه عالموقف وخلاص
وهارد لك علي ماتش النهرده
وعقبال الزمالك بكره ما يفرحنا ان شاء الله
تحياتي

EmY يقول...

ايه يا عمرو مين مزعلك و انا اقطعه بس

بس يا سيدي انا مع مبدأ انت حر ان لم تضر كل واحد حر في نفسه و حياته و احنا مش الهه علشان نحاسب البشر

خليك مؤدب و قول تييييييت

Che يقول...

اسماء
بصى يا سمسم ( معلش على الدلع بس انتى اللى اخدتينى عليكى - هههه ) المهم اللى اسمه ايه ده تقريبا جورج وسوف و انا فعلا هاعمل بنصيحتك و بنصيحه اسمه ايه ده و اخلينى على راحتى
و يا ستى ماتش يفوت ولا حد يموت و يا رب الزمالك يفرحنا بكره و ادعى معايا يا رب امير عبد الحميد يتصاب عشان مايقفش فى الجون
نورتينى يا عسل

Che يقول...

EmY
محدش يقدر يزعلنى و انتى موجوده يا معلمى
و طبعا انا متفق معاكى فى تعريفك لمبدأ الحريه لانه نفس تعريفى
و غشان خاطرك بس هافضل مؤدب و اقول تييييت
تيييييييت ... ههههههه
نورتينى يا جميل و مستنى تعليقاتك على طول

اسماء عوني يقول...

سمسم
ياللا ما علينا
هههه
المهم يا سيدي
الزمالك اتعادل النهرده . وده خبر مش لطيف
كان نفسي يتغلبوا بس ياللا يعوضوه في الماتشات القادمه
المهم
انا وانا بقرا التعليقات لقيتك هتهدي البوست الجاي لزيكا
اشمعنا هه هه ليه
انا مش بتطفل ولا حاجه بس بحب استفهم لا مؤاخذه

Che يقول...

اسماء اللى بأت سمسم
بصى يا ستى بالنسبه للزمالك الضرب فى الميت حرام و الحمدلله مستواهم ابتدى يتقدم و ابتدوا يتعادلوا اهم و على الموسم بعد الجاى يبتدوا يكسبوا ان شاء الله
اما بالنسبه للبوست الجاى ففعلا واضح انك مش بتتطفلى ولا حاجه ، انما الفكرة ان البوست الجاى كله عن السينما و الاوسكار و كد و انا عارف ان زيكا ليه فى الحاجات دى
فى انتظار المزيد من الاسئله يا جميل

magi يقول...

che why caring about other people opinion's it's your blog &your rules

Che يقول...

magi
i know what are you talking about and i understand it , it`s just you care about some people and then you figure out that they don`t deserve that attention
like you say , my blog my rules
thanks alot for your comment

fashkool يقول...

ازيك يا شى .. تحياتى
طبعا انا لا اختلف معك فى ترك كل انسان وحريته الشخصيه .. والمثليات والمثليين ايضا ظاهره موجوده فى كل المجتمعات .. وتصنيفهم الحقيقى شواذ جنسيا .. والاختلاف يكون على ماذا؟
الاختلاف على من اوصلهم الى هذه الحاله .. هل هو المجتمع .. هل هو المنزل .. هل هو محاولة التقليد ..
يجب ان يكون الاختلاف فى هذا
اما اذا كانوا مخطئين او خطائين .. فحسابهم عند ربهم
اذا بحثنا فى اسباب الشذوذ قد نصل الى حل .. وقد نجد العلاج
تحياتى

Che يقول...

استاذ فشكول
اولا اهلا بيك اول مرة عندى و معلش انك دخلت لقيت ضرب النار ده
اسمحلى اختلف معاك فى نقط و اتفق فى نقط تانيه .. اختلف معاك فى وصف المثليين على انهم ظاهرة لاننا كنا بنختزلهم فى كلمه مش موفيه حقهم و انهم مجرد ظاهرة و تعريف الظاهرة انها مرتبطه بظروف و بمجرد زوال الظروف تزول الظاهره و اظن انه مش ده الحال بالنسبه للمثليين و المثليات
اتفق معاك فى وصفك ليهم لانهم شواذ بالمعنى الحرفى للكلمه انهم بيشذوا عن قاعده الذكر و الانثى مش بالمعنى اللى اغلب الناس بتقصده على انه شتيمه
اتفق معاك برضه انه حسابهم و حسابنا و حساب الناس كلها عند اللى خالقنا جميعا

ayhamjzzan يقول...

للجميع الحق أن يبدي رأيه دون تجريح أو إساءة ولنا الحق أيضا أن نناقش أي موضوع نريد سواء كان في الدين أو المثلية أو غيره أتابعك دائما وأسعد بقراءة ماتكتب تحية لك

Che يقول...

ayhamjzzan
هذا هو رأيى ايضا ان الجكمه ليست حكرا على احد و ان الحريه للجميع
سعدت بتعليقك و شكرا لمجاملتك

kemet يقول...

السلام عليكم ورحمة الله وبركاته

عزيزي
كن ما تشاء واكتب مايحلو لك بالطريق التي تجدها انت مناسبه
وعلى القارئ ان يختار ولكنه ليس عليه التحكم في رأيك او طريقته
فأنت حر
ومسئول عن حريتك

تحياتي
الى اللقاء

Che يقول...

kemet
و عليكم السلام و رحمه الله و بركاته
اشكرك بشده على تعليقك و احييك جدا على وجهه نظرك
لو اردت ان اعبر عن وجهه نظرى الشخيه فى مفهموم الحريه ما وجدت كلمات افضل من كلماتك ، موجزة و لكنها اكثر من كافيه
تحياتى

GiGi يقول...

انا من الناس اللى مش بتفهم شكرا لصاحبك
على العموم شكرا وبعدين بوست عنى
ده انا حد مهم
بس فعلا مش بقصد ليك دايما غير كل خير
وفعلا انا كان ممكن ماقلكش بس زي ماقلت قبل كده
انا يمكن بنصحك بطريقتى ممكن تكون غلط وممكن تكون صح
بس هى فى الاخر مش قصدى غير الخير
وعلى فكره ربنا بيقول ياايها الذين امنوا توبوا اللى الله توبه نصوحا
يعنى بيقول للذين تابوا
صح
مش عيب لما حد يقول ربن يهديكاو يهديكى

Che يقول...

GiGi
انا مقدرش اقول انك مش من الناس اللى مش بتفهم لانى عندى ذوق ولا صاحبى يقدر كده لانه مايعرفكيش عشان يقول كده
و بالنسبه للبوست فهو مش عنك انتى شخصيا انما عن ناس كتير دعيتهم للحوار و المناقشه و محدش استجاب و انا عشان كده بطلت اتكلم فى الموضوع ده ، و اكيد انتى حد مهم بالنسبه لشخص ما انما ماظنش كلمه شخص ما دى تنطبق عليا لاننا مانعرفش بعض معرفه شخصيه و ماتعملناش مع بعض شخصيا
بالنسبه للنصيحه ففعلا النصيحه مش عيب يمكن الاسلوب ساعات كتير بيكون عامل مؤثر يعنى مثلا تخيلى انى عندى طفل جمع 2+2 و طلعهم خمسه ممكن اقوله لا كده غلط و الصح 4 مش 5 و اقنعه بكده و ممكن اقوله انت حمار و مابتفهمش و الطشه المضمون واحد فى الاخر بس الاسلوب بيفرق .. و اصلا النصيحه انا باقبلها بوجه عام لان الكمال لله وحده بس فى النقطه اللى انتى اتكلمتى فيها انا ماكنتش مقتنع انى غلطان و مازلت مقتنع انى مش غلطان و الدليل على كده انه انتى افتكرتى انى كاتب البوست مخصوص للهجوم عليكى و مالتفتيش لاى حاجه تانيه انا كاتبها زى الآيات اللى انا كاتبها ولا الفتاوى ولا التفاسير زى استاذ تامر على ما عمل
و بالنسبه لايه التوبه اللى انتى ذاكراها فانا موافقك عليها تماما لانه ده كلام ربنا و دايما صح و كمان فى ايه فى آخر سوره الكهف بتقول " قُلْ هَلْ نُنَبِّئُكُمْ بِالأَخْسَرِينَ أَعْمَالا*الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا " ربنا ما يجعلنا من الناس دى يا رب
و ربنا يهدينا و اياكم

GiGi يقول...

بص انا مش مستعده للمناقشه انا اذا كنت عايزه اناقشك كنت عملت كده
لكن انا مش قصدى اناقشك
كل للى كنت عايزاه انك تفهم بتكلم كده ليه
لكن اناقشك لا
مش علشان ضعف لكن لانى ناقشتك فى النقط دى قبل كده
وثانيا انك مش هتقتنع بس
بالنسبه لموضوع شخص ما انا ماقلتش انى مهمه لحد ولا مشعارف ايه
عادي انا بتكلم عادى وماتنكرش ان معظم اللى قلته كان عنى
ايا كان مش مهم
انا عايزاك تبقى كويس زي ماربنا عايز لازى ماانا عايزه ولازى ماحضرتك عايز
وبالتالى مش هنختلف
ربنا يهدينى انا يااااااااااااااارب
انا مش بتخانق ياعزيزى

Che يقول...

GiGi
معلش اذا اعتقدت خطا انك داخله على بوست معمول على النقاش عشان تناقشى و على كل الغلط مردود
و فعلا انتى مش هتناقشينى مش ضعف منك و اكيد عندك اسباب تانيه غير اللى انتى ذكرتيها و انا مقدر الاسباب و طبعا تبعا لمبدأ الحريه الشخصيه حضرتك ليكى مطلق الحريه
بالنسبه لنقطه شخص ما انا كتبتها ردا على كلمه " بوست عنى انا حد مهم " اللى انتى كتباها فى التعليق يعنى انا مش جايبها من عندى انما مجرد رد
و زى ما انا قلت قبل كده البوست ده مش موجه شخصيا ليكى لانى باتمتع بالشجاعه الكفايه اللى تخلينى اتكلم بصراحه و بدون مواربه مش مجرد انى اسيب تعليقات عند حد بدون توضيح و اذا انتى حسيتى انى بأوجه كلامى ليكى فانا اظن انى مش مسئول عن نيتك الشخصيه بس واضح انه انتى متواضعه جدا لدرجه انك تفتكرى انى باتكلم عليكى مع انى وضحت انه مش عليكى
و انا شاكر ليكى انك عايزانى اكون كويس زى ما ربنا عايز بس اظن ان النقطه دى تقلقنى انا اكتر منك بس برضه شاكر لمحاولاتك معايا و اكيد مش هنختلف
و اخيرا آمين يا رب
و انا طبعا عارف انه انتى مش بتتخانقى يا عزيزتى

GiGi يقول...

شكرا
على طريقه كلامك
انا اللى غلطانه
شايفنى مش متواضعه وبتتريق
ماشي
على فكره انا مافهمتش خاااااالص موضوع حد مهم وانك تقصده بالطريقه دى
يعنى انت بتقول انى حشره بالنسبه لسيادتك عادي وانا بحب الحشرات جدا ماهى مخلوق برده
ميرسي جدا وجزاك الله خيرا كثيرا
وبرده مافيش حد هيمه حد نفسه اكتر من حد
لكن هى كانت النصيحه
بس سوري ازعجت حضرتك

Che يقول...

GiGi
انا معرفش انتى ليه خدتى الموضوع على المحمل الوحش ده انى بتريق عليكى مع انه ده مش صح انما انا عايز اقنعك انى مش كاتب البوست ده ليكى
و بالنسبه للحشرات فانا قضيت دراستى الجامعيه مابعملش حاجه غير انى ادرس الحشرات و فعلا هى مخلوقات و مخلوقات مهمه جدا كمان و ده رأى علمى من واحد قعد يدرسها لمده طويله
و انا مقدر جدا للنصيحه
و مافيش داعى للاسف لانك تعتذرى لانى ماضايقتش

Zika يقول...

فين البوست يا عم
اطلع بالبوست احسنلك

Che يقول...

زيكا باشا
و الله يا باشا لسه باتفرج على افلام الاوسكار عشان الافلام كلها السنه دى جامده
بس اكيد هانشر البوست الجديد

صوت من مصر يقول...

ياعم البوست عمال يطلع شرار قرب يفرقع ؟
بلوج هايل ياباشا

فتافيت يقول...

بس يبك انت
انا استمتعت جدااااااا بحوارك انت وتامر علي
بجد كان رائع
وبص يا سيدي انت حر ان لم تضر
وربنا وحده الاعلم بالنوايا
سلااااااااام

MaNoOoSh يقول...

انت كل دة بتتفرج على الافلام لسة؟
ما تيللا بقى وعلى راى زيكا انزل بالبوست احسنلك
وحشتنا والله يا تشى
سلام يا باشا