الاثنين، 22 مارس 2010

امى

عدى عيد الام و خلص عيد الام و انا مكتبتش حاجه امبارح عشان كنت بتكلم مع امى و امى ... اه ، عندى 2 امى مش امى واحده
الاولانيه هيا امى اللى بجد اللى كانت حامل فيا و كنت تاعبها و قارفها .... تاعبها و قارفها و هيا حامل ... و تاعبها و قارفها و هيا بتولدنى .... و تاعبها و قارفها و هيا بتربينى و انا صغير ... و تاعبها و قارفها لغايه دلوقتى
و التانيه هيا عمتى ... عمتى اللى عملت فيا جميل مينفعش انساه بس مينفعش اتكلم عليها هنا عشان عايزلها بوست لوحدها ..... و عشان كده لما بقول للعمه ستيته يا عمه ده معناه انى بعزها فوق الوصف والله على ما اقول شهيد
لما بفتكر امى ( اللى هيا امى بجد ) بفتكر القرف اللى هيا شافته معايا و لسه بتشوفه .... انا مكنتش عيل شقى ، بس كنت عيل مقرف بجد .... يعنى لما كنت صغير كنت افضل اعيط لغايه ما تشيلنى ... بس مش تشيلنى و تقعد او تشيلنى و تقف ساكته .... لاااااا .... انا كانت لازم تشيلنى و تقعد تتمشى بيا فى الشقه ، يعنى هد حيل من كل ناحيه
برضه بفتكر ايام زمان لما كبرت شويه و كان عندى يجى سنتين او تلاته كده .... عارفين المرحله المقرفه اللى العيال بتبقى فيها زاحفه و متسلقه فيها كده زى الحشرات ، اهو انا قصدى على المرحله دى ..... كان زمان للى عاشو زمان التليفزيون بتاعنا محترم و ابن ناس ... مفيش دش ... يا دوب الاولى و التانيه و حلو أوى كده .... و فوق كده التليفزيون كان بيشطب و بيعمل وششششش اللى بطلنا نسمعها دلوقتى الساعه 12 بليل عشان الناس تتخمد و تشوف مصالحها .... الاستثناء الوحيد كان يوم الخميس ، البلد كلها اجازه تانى يوم ، فبيسمحو للناس بسهره مع مسرحيه بتخلص على الساعه 2 بليل .... طبعا امى و ابويا الله يرحمه كانو بيسهرو يتفرجو و ينامو متأخر ... اجازه بأه .... انا كنت بصحى على الساعه 7 الصبح الوقت اللى انا متعود عليه و انزل من على السرير و اروح على المطبخ ..... ايامها كنا لسه فى شقه دار السلام ... شقه 62 متر ... يعنى لو 3 افراد ماشيين سوا فى نفس الوقت يبقى لازم عسكرى مرور ينظمهم جوه الشقه .... المهم كنت بروح على المطبخ و افتح الدولاب التحتانى
امى كانت بتخزن الرز و المكرونه و الحاجات دى فيه .... انا زى الشاطر اطلع الحاجات دى كلها و افضل افضيها حواليا فى شكل دايره ..... و لما اخلص و ملاقيش حاجه افضيها اجيب ايد الهون و اقعد ادق بيها على الارض ..... طبعا عايز اقولكو انه بعد كام اسبوع امى بأه عندها انعكاس شرطى ناحيه صوت ايد الهون ، هيا تسمعه من هنا و تصحى ابويا و تقعد تتخانق معاه و تقوله شوف ابنك نيل ايه ، و شوفلك صرفه معاه ، قوم اضربه و الكلام ده ..... المهم امى اتعلمت تشيل الحاجات دى فى الدولاب من فوق عشان انا ملاقيش حاجه افضيها ، فأكتفيت بعد كده بدق ايد الهون على الارض
برضه افتكر لما كنت فى مرحله 4 سنين او 5 كنت لما بنيجى اجازه من السعوديه ما اصدق انطلق عشان السعوديه مفيهاش فسح ، فيها كل حاجه ما عدا الفسح ... اقابل بنت الجيران و افضل العب فى الشارع لغايه ما الدنيا تضلم عليا ، و بعدين اطلع البيت ... طبعا امى تستلمنى بزعيق و ضرب و شد على الحمام .... و بعد الحمام تقعد تفلينى ( طبعا طول النهار صايع فى الشارع و بلعب مع عيال معفنه ، هاخد منهم ايه غير القمل يعنى ، و ده اللى خلانى كل ما افتكر كده افتكر اللمبى و هو بيقول واحد مصاحب على علوكه و اشرف كخه عايزه يطلع طيار ) و طبعا لأن الموضوع ده كان بيتكرر كل يوم هيا كانت تتغاظ و تقعد تفلينى جامد لدرجه انى كنت بحس ان شعرى هيتقطع و اقعد اعيط و تقولى احسن ، تستاهل عشان تبطل ... بس لا انا بطلت صياعه ولا هيا بطلت تفلينى جامد
بمناسبه الحموم و كده افتكر لما كبرت شويه و كان عندى يجى 7 سنين بطلت اخلى حد يحمينى ... اصل انا على غير الشايع عنى بتكسف جدا .... المهم امى فى يوم قالتلى ادخل استحمى بعد جوله مكوكيه فى الشارع كعادتى ... مش فاكر بأه عشان الصابونه كانت جديده و كبيره على ايدى ، ولا انا اللى مكنش ليا مزاج استحمى .... المهم الصابونه وقعت منى فى الكابنيه ... مش اطلعها ولا انادى على حد يطلعها ... لااااا .... شديت عليها السيفون و دلقت عليها ميه لغايه ما اختفت ... المهم امى دخلت بعد كده تدور على الصابونه مش لقياها ... تسألنى اقولها انا استحميت و سبتها ... مافهمتش غير لما شافت الميه بتبقلل .... يومها اضربت ضرب ... اضربت على انى كدبت و على انى رميت الصابونه و كانت جديده .... و من يومها اصبحت اكثر حرصا فى الكذب لغايه ما ربنا تاب عليا و بطلت العاده الهباب دى
افتكر برضه و انا عيل لما كنا فى السعوديه .... امى بتخلص شغل على الساعه 2 الضهر ... نتغدى و ننام و تذاكرلى شويه و بعد كده فاضيين .... انا فى الفتره دى اتعلمت كل آداب الاتيكيت .... كانت امى تجيبلى طبق مسطح و تحط فيه رز مش مستوى و ناشف ، و انا المفروض اطلع الرز بالمعلقه من الطبق للكيس من غير ما اوقع منه رزايه واحده ... طبعا ياما اضربت على الرز اللى كان بيقع ..... برضه كنت بضرب لو عملت صوت و انا بشرب الشوربه ، يمكن ده اللى خلانى اتعودت على انى اشربها بارده شويه و نفس الكلام بالنسبه للشاى و الاكل عموما .... اضرب لو كان على شفايفى اكل من اللى انا باكله .... اضرب لو اكلت و بؤى مفتوح.... اضرب لو غلطت و مسكت الشوكه باليمين لدرجه انى قعدت مده طويله من حياتى اعلم الشوكه و اقول انها اولها حرف الشين اللى هو اول حرف من كلمه الايد الشمال عشان منساش و اضرب عليها .... و حاجات كتير جدا .... انا على اد ما كنت بكره الايام دى عشان كانت عباره عن حفلات مستمره من الضرب بس كل يوم باكل فيه سواء مع حد او لوحدى بفتكر امى و بدعيلها على انها علمتنى الحاجات دى
اخر حاجه هقولها و مش كلام انشا ولا حاجه ... انا طول عمرى اقول لو امى معملتش حاجه اكتر من انها كانت حامل فيا و ولدتنى يبقى ده كفايه و انا مش هقدر ارد الحاجه دى مهما عملت ... يعنى لا تربيه ولا سهر جنبى و انا عيان ، و لا مذاكره ، ولا قلق ايام نتايج الثانويه ، و لا زعل عليا ايام السقوط فى الكليه ، ولا اى حاجه تانيه ... يبقى برضه انا هفضل مديون ليها طول العمر و 10 اعمار على عمرى كمان
عشان كده انا بقولها هنا زى ما قلتلها امبارح .... كل سنه و انتى طيبه يا حبيبتى و تفضلى معايا على طول ......... عمرو

هناك 21 تعليقًا:

adel يقول...

هههههههههههههههه
نكتة الموسم

عمرو بيتكسف :)
هنهرج بقي :@:@:@

لو زيكا سمعك هيفضحك

Che يقول...

عادل
انا لسوء الحظ منفعش اقفل البوست ده فى وشك انت و زيكا عشان السبب ده ... لو زيكا سمع كده شكلى هيبقى وحش أوى
دبرنى يا دولا اعمل ايه

مي يقول...

ههههههههههههه
تصدق فعلا عيل مقرف جدا
ده انت كنت رخم رخامة يا جدع
ضحكتنى جدا وبرضه مامتك خبت الحاجة وانت لسة مستمر فى دق الهون
فظيع جبااااااااااار
مالكش حل والنعمة
ومصاحب عيال مقملين ههههههههههه
بس شكلك كنت عسول ياميرو وبتتضرب تسمع الكلام


عجبنى البوست من الاخر شديد شديد
كل سنة والامهات بخير والمفروض كلنا نشكر مامتك انها جابت لنا ميرو العسل

(:

Che يقول...

مى
فينك من زمان يا بنتى ... على فكره اللى انا كتبته اقل من الحقيقه والله ... فيه حاجات مقدرتش اقولها
و بالنسبه للملحوظه بتاعت امى و تشكريها و كده ... ( وش مكسوف مووووت ) ... ههههههه
منورانى يا مى

ستيتة يقول...

يا ما شاء الله
دي الست مامتك كانت تضاهي صافيناز جبروتا
وانت برضه سبحان الله وكأن أمامي حمبوزو بكل معنى الكلمة
ههههههههههههههههههههههههههه

انا بقى بعد ما علمتني اصول الإتيكيت والشياكة
قررت أضرب ده كله عرض الحائط والسقف كمان واتحول لبيئة بيئة اخر حاجتين تلاتة
تفتكر ده عند فيها؟ :)

انا عارفة من بدري بتقول لي عمة ليه علشان كده بحب هاذوه الكلمة منك وحقيقة يمكن ميكونش لها اي معنى من حد تاني

كل سنة ومامتك طيبة وربنا يفرحها بيك بقى ونجيب إسي عباسط حمودة ونقف كلنا نغني أنا موش عارفنييييييييي ولا الراجل اللي بيجيب لي هسهس ده اللي اسمه دياااااااااااااب والعوووووووو :)

Magi Mostafa يقول...

كل سنه وكل الامهات بخير وربنا يكون فى عون مامتك

زهور الامل يقول...

ههههههههههههههه يا نهار مشجر ياعمرو

ده انت كنت عيل مقرف اوي

ده انا لو خلفت عيل كدة هرميه من البلكونة وارمي وراه ربع جنيه علشان حد يرضى ياخده

هههههههههههه

كل سنة ومامتك بخير وبصحة وسلام ومالية عليك دنيتك

تحياتي

صفــــاء يقول...

كل سنه وكل أم طيبه
وكل عيد أم ومامتينك بكل خير وصحه

يابنى هو احنا خدنا من أهلنا اكتر من العلق ؟
وبكل ما يخطر لك على بال
من أول منفضه السجاد لحد عصايه الغليه

هيييه دنيا اهالينا برضه واحنا نستحملهم

بوست ظريف جدا

تحياتى لك

غير معرف يقول...

ولسه فاكر كل القرف ده هههههههههه ده انت قلبك اسود اوى على فكره دى اول مره اسيبلك كومنت انا اصلا مستجده فى متابعه مدونتك بس احب اهنيك لانك بصراحه عجبتنى اقصد اسلوبك طبعا متفهمنيش غلط وبما انك هاتشوفنى كتييييير ف مدونتك وبما انى مش عامله اكونت على بلوجر فهاتلاقينى غير معرف بس انا هاسيب اسمى ف الاخر منعا للالتباس
ROKA

*** حور- نور*** يقول...

يا لهووووووووووووووووى الله يكون فى عون مامتك والله انا لو مكانها أولع فيك
ايه الشقاوة دى كلها دااحنا مكناش عيال بقى يا نهار أبيض
المفروض مامتك تاخد جايزة الأم الحديديه
ربنا يخليهالك وكل سنه وهى طيبه

Che يقول...

العمه ستيته
والله يا عمه واضح اننا كلنا بنعمل نفس الحاجه .... بس اغلب الظن و ان بعض الظن اثم انك كنتى بتعملى كده من باب العند
نورتينى يا عمه

Che يقول...

ماجى
و انتى طيبه يا ماجى انتى و مامتك و كل الامهات
نورتينى يا ماجى

Che يقول...

صفاء
والله على رأيك يا صفاء .... بس شفتى الموضه اليومين دول ... حقوق الطفل و احرمه من المصروف ..... و احنا مكناش عيال ولا ايه ، ولا كانو لقينا ادام باب الملجأ
نورتينى يا صفاء

Che يقول...

زهور
والله عارف يا زهور انى كنت مقرف و معترف بكده والله .... بس انتى مش تتريقى ... اللى بيتريق على حاجه بتقعدله فى عياله ، و ابقى ساعتها اشوفك هتعملى ايه
قال ارميهم من البلكونه .... ليه ، ده لو لقياهم فى البخت مش هتعملى كده
نورتينى يا زهور

Che يقول...

روكا
طبعا لسه فاكر القرف ده و فاكر اكتر منه كمان ... هو انا مودينى فى داهيه غير ذاكرتى دى
و طبعا يا باشا انا فاهمك صح ... انا اصلا مش بعجب نفسى ... ههههه
نورتينى يا روكا و مستنى اشوف تعليقاتك على طول سواء معرف او غير معرف

Che يقول...

حور
والله يا حور كلكم بتقولو كده انما ساعه الجد الله اعلم هتعملو ايه
و بعدين اللى انا عملته ده مكنش شقاوه .. كان قرف و بس والله
و لو على الجوايز امى تستاهل جوايز كتير اولهم على انها جابتنى للدنيا اصلا :)
نورتينى يا حور

سارة نجاتى يقول...

ههههههههههه
يعنى كمان كنت بدخل المطبخ الصبح و أقعد أبعتر فى الحاجة

بس (و لأننا كنا مسافرين زى حالاتكوا ) لما كنت برجع كنت خوافة أوى أنا قعدت من تلات لأربع سنين بعد ما استقرينا هنا أوى أتأقلم م ع الحياة كنت بخاف من الناس أوى
معرفش ازاى أنت كنت بتقدر تعمل شيفت كده ؟؟
لو امى معملتش حاجه اكتر من انها كانت حامل فيا و ولدتنى يبقى ده كفايه و انا مش هقدر ارد الحاجه دى مهما عملت

ده حقيقى جدا , و عشان كده أنا دايما بقول لو السجود لغير الله كان الواحد سجد لأمه بس , ربنا يخليهالك يا عمرو
و يخلى امى ليا

Haytham Alsayes يقول...

ياااااااااااااه ياتشي

انت اتبهدلت يابني كل دة اتعمل فيك
بس ولا يهمك طلع الحاجات دى بأة علي ولادك ان شاء الله وخاصة حكاية الاتيكيت
دى

تحياتي لك وسلامى لوالدتك العزيزة وربنا يكرمها ويجازيها خير

فتــافيت (رحاب الخضري) يقول...

عمرو.. والله لك وحشة

بس انت بتقول بطلت كدب.. ليه بقى بتقول انك بتتكسف (وش مطلع لسانه)

انا ضحكت كتيييييير على البوست ده
من اول القمل (وش نافش منخيره).. لحد الشين والشوكة.. هههههههههههههه

ربنا يخليك ماما وعمتو.. ويخلي لنا كلنا مامهتنا.. امين

السينيور يقول...

استمتعت بقراءة البوست جدا
والله يكون في عون والدتك ده انت كنت كارثة متحركة على قدمين
وربنا يخلهالك يارب
تحيتي لك

صفــــاء يقول...

آة صحيح مش فاقع مرارتى ولا فارسنى غير حكايه حقوق الطفل دى وأحترام خصوصياته وقرارته قال عشان يقوى ثقته بنفسه

احنا كانت خصوصياتنا بتطلع مع الصويت اللى بنصوته آخر الليل واحنا راجعين من الشارع بعد كفاح مرير فى اللعب فيه