السبت، 13 مارس، 2010

عايز ايه

موضوع النهارده جد شويه عشان احلل اسم المدونه .... موضوع النهارده بيتكلم عن الاحلام و الغايات اللى الواحد بيبقى عايزها فى حياته
انا مش هتكلم فى المطلق لأن التعميم و الكلام فى المطلق اكبر حاجه غلط ممكن اى حد يعملها ، و برضه مش هتكلم على البرج بتاعى عشان الناس ابتدت تزهق من موضوع الابراج دى و فاكره انى فاتح المدونه دى عشان ادلل على البرج بتاعى او اعاير الناس اللى مش جوزاء .... انا هتكلم على نفسى
من زمان و انا عارف انا عايز ايه و محدد هدفى ..... طبعا دى حاجه ناس كتير مش بتعرف تعلمها لأنى عارف ان المشكله الرئيسيه عند ناس كتير انهم مش قادرين يلاقو هدف لحياتهم و عايشين اللحظه او على رأى المثل زى ما ترسى دقلها
طيب هل معنى انى عارف انا عايز ايه و محدد هدفى ابقى كده معنديش مشاكل .... بالعكس انا عندى مشكله كبيره جدا و ممكن حتى ابقى اوحش من اللى مش عارف هدفه ايه بالظبط ...... مشكلتى ببساطه انى رغم انى عارف انا عايز ايه بس مش عارف اوصل للى انا عايزه
طول عمرى شخصيه ملوله لدرجه صعب ان اى حد يتخيلها غير اذا جرب الملل ده بنفسه .... انا من كتر الملل ساعات بزهق من نفسى ، بس لسوء الحظ دى الحاجه الوحيده اللى مش بعرف اغيرها او بعرف اسيبها .... يعنى لما بتخنق من صحابى بقفل موبايلى او لو سبته مفتوح مش برد عليهم .... لما بزهق من اهلى ببطل ازورهم او اكلمهم .... بس لما بزهق من نفسى و نتيجه لأنى معنديش الترف انى اسيب نفسى و فى نفس الوقت انا مش حمار عشان اموت نفسى و اخلص منها خالص فبدخل فى حاله من حالات الاكتئاب ..... المشكله انى لاحظت انه كل حاله اكتئاب بتبقى اشد من اللى قبلها
نرجع لكلامنا على انى مش عارف اوصل للى انا عايزه ازاى و علاقتها بنقطه الملل .... ناس كتير بتقول ان برج الجوزاء هوائى جدا و ملوش امان .... انا متفق معاهم فى اللى بيقوله .... بس الفكره انى ( و انا هنا بتكلم على نفسى مره تانيه عشان محدش يقولى ملكش دعوه بالناس و خليك فى نفسك ) نتيجه لأنى مش عارف انا عارف اوصل للى انا عايزه ازاى فبجرب كل شويه طريق ... بس انا مش غبى و لازم اكل البيضه لغايه اخرها عشان اعرف انها ممششه ( و ده تعبير عبقرى مسروق من العبقرى احمد خالد توفيق ) فلما بلاقى السكه اللى انا ماشيها مش هتوصلنى بغيرها و بدور على سكه غيرها
طبعا فيه ناس هتكلمنى على الصبر و الجلد و الكفاح و الكلام الجميل ده ... بس كل ما بسمع الكلام ده بفتكر حاجه اتعلمتها فى اول شركه اشتغلت فيها .... انا اشتغلت و انا فى الكليه فى شركه ادويه مندوب دعايه و تسويق .... المهم بعد كام شهر لما فهمت الشغل عامل ازاى كان ليا واحد زميلى بيبيع اكتر ما انا ببيع مع انه بيبذل يمكن نص المجهود اللى انا ببذله .... و مشكلتى انى مبقدرش ابلع ببساطه فكره ان حد اذكى منى او اشطر منى ....... ممكن تسموها حسد او حقد او اللى عايزينه ، بس الحقيقه انى عارف امتى اعترف ان اللى ادامى يستاهل اقول انه احسن منى و امتى اقول عليه كفتجى و صاحبى ده اللى يمسيه بالخير لو لسه عايش او يرحمه لو مات كان كفتجى كبير... المهم سألت المدير بتاعى على سر الواد ده و قلت مش عيب الواحد يتعلم العيب انه يفتكر انه عارف حاجه و يبطل يتعلم .... قالى انا هقولك كلمتين ... قلتله قول ... قالى Smarter & Harder
قالى فيه ناس بتشغل مخها و بتوصل للى هيا عيزاه بأقل مجهود و فيه ناس حمير شغل ، تحرت الارض و تاكل النجيله ... بس فى الاخر الناس اللى بتشغل مخها بتوصل اسرع من الناس اللى بتشتغل زى حمير الشغل ... قالى هو بيشغل مخه و انت بتشغل نفسك .... الحق يتقال ان الراجل طلع ذوق و مرضيش يقولى انت حمار شغل
انا من يومها اتعلمت الدرس ده و عمرى ما نسيته ..... عشان كده كل حاجه بحسبها بمخى الاول ... بلعب شطرنج مع الدنيا و اشوف اخر الدور ايه ، عشان لو كسبان اكمل و لو خسران يبقى اسيب الدور ده و ابتدى غيره
طبعا مشكله انى مش عارف اوصل للى انا عايزه دى مشكله كبيره ..... بس على اد كده تعتبر مشكله صغيره بالنسبه لمشكلتى الرئيسيه اللى انا بعانى منها .... مشكلتى الرئيسيه انى على اد ما انا عارف انا عايز ايه ، بس فيه حاجات اساسيه انا مش عارف انا عايز فيها ايه ... يعنى النهارده اقول انا عايز ده ..... انام و اصحى و اقول لا انا مش عايز ده و عايز ده .... شويه و اقول عايز الاتنين ..... شويه و اقول لا انا مش عايز حاجه خالص و ابتدى ادخل الدايره الجديده من الاكتئاب
طبعا انا شخصيا مش عارف انا عايز ايه من البوست ده بس بعتبره فضفضه مش اكتر .... اسيبكو بأه عشان انام يمكن اعرف انا عايز ايه من البوست ده و هبقى اقولكو المره الجايه .... سلام

هناك 31 تعليقًا:

magi يقول...

طالما انت محدد انت عايز ايه بعد كده كل الامور التانيه ملهاش اى قيمه فى مقوله لاديسون بعد فشله 1000 مره فى انه يخترع المصباح الكهربائى قال انه مفشلش الف مره هو اكتشف الف طريقه لا تنجح
فجرب تانى واكيد هتوصل
لكن موضوع الابراج ده مش منطقى اوى هو سعات بتبقى فيه حجات صح بس اكيد مبتبقاش عامل مسيطر اواساسى ممكن الملل او حاله الاكتئاب دى يكون ليها سبب تانى خالص انت مش عارفه فى اللاوعى وتكون مثيراته حجات تافهه جدا
فدلوقتى مش لما حد بيكون عنده الم بيروح للدكتور او ياخد مسكن فانا بقترح برده انك متحلش مشاكلك دى مع نفسك لانك مش هتقدر توصل لاصل المشكله فمش عيب ابدا انك تستعين بدكتور نفسى شاطر عشان يساعدك تفهم نفسك

Che يقول...

ماجى
موضوع الابراج ده انا باخده على سبيل الدعابه .... ساعات بيبقى فيه تشابه بين مواليد البرج الواحد فعلا ، بس برضه بيبقى فيه اختلافات
مقوله اديسون اللى انتى قلتيها هيا اللى مخليانى مستمر لغايه دلوقتى لأنى بقول اكيد انا مش هفضل اجرب طرق مش هتودينى لحاجه و اكيد فى يوم طريق منهم هيودينى للى انا عايزه
مساله الدكتور النفسى دى انا جربتها قبل كده مرتين ، مره مع واحد مصرى و مره مع واحد اجنبى .... الحقيقه ان الدكتور النفسى عامل زى المدونه ، حد بتحكيله و تفضفضى معاه ... و عايز اقولك ان بعد تقريبا سنتين من العلاج النفسى ماوصلتش لأى نتيجه
مساله انى افهم نفسى دى هيا مشكلتى الحقيقيه ... انا فعلا مش فاهم نفسى ، لأنى ساعات بتصرف تصرفات بتفاجأنى انا شخصيا ... بس انا بحاول افهم نفسى
منورانى يا ماجى

مياسي يقول...

والله كأنك بتحكي عني!!
بس اتوقع انا اشطر منك بشغلة المخ هاي
لاني مش من النوع اللي بيغلب حاله كتير
بحاول ادور عالحل اللي يريحني من اول

بس الا مالني بتغابى جدا

Che يقول...

مياسى
طبعا كأنى بحكى عنك يا مياسى ... فى الاخر انتى جوزاء لو انا ذاكرتى لسه شغاله
و انا والله يا مياسى بحاول ادور على الحل اللى بيرحنى .... المشكله انى مش ببقى عارف الحل ده ايه
منورانى دايما يا مياسى

سعدية صديق يقول...

ازيك يا عمرو

والله فى بالى دايما اجى اسال عليك
بس انت دايما الاسبق للخير :))))


ربنا يحقق لك كل اللى بتتمناه يارب
ويصلح لك الاحوال


مع خالص مودتى

فتاه من الصعيد يقول...

ماهو لابد من تحديد الهدف قبل ان تحكم على نفسك بالفشل او عدم القدره على تحقيق الهدف

تحياتي

sara يقول...

bsra7a ana mfhmtsh ay 7aga mn klamk hya moshkltk kbera wla so3'yara w eh d5al el 2brag fa el mwdoo3 wa leh t3ayer el nas elly msh mn borg el gwzaaa2 ???? homa wlad nas bardo wlahi .

sony2000 يقول...

معلشي
هي بأذن الله فتره وتعدي
بس كويس انك محدد عاوذ ايه
موش احسن من اللي سبها للهوا
يجيبه ويوديه
بس شوف الوسائل اللي قدامك والحجات اللي تقدر تعملها
وفكر فيها كويس

ستيتة حسب الله الحمش يقول...

مساء الخير يا ولد خوي الغالي

انت عارف انت عاوز ايه

طب بما انك بتفضفض
وده مش طبعك الأصلي
وبما انك اول حد في حياتي يقول على وجه التحديد انه عارف هو عاوز ايه

فا والنبي والنبي ربنا يخلي لك عمتك تقول لي في بوست فضفضة برضه

انت عاوز ايه؟

انا بقى لا ها انصحك ولا الكلام ده
القصص دي مش بتاكل معاك اشاسا على رأي دولا

انا بس ومن قبيل الفضول
عاوزة اعرف انت عاوز ايه وليه هو صعب في الوصول ليه

Che يقول...

سعديه صديق
انا الحمدلله تمام .... انتى عامله ايه و ايه اخبارك
و بعدين لما تلاقينى غطست كده ابقى تعالى بس بصى عليا
منورانى دايما يا سعديه

Che يقول...

فتاه من الصعيد
الحقيقه انى فعلا محدد اغلب اهدافى ... و مشكلتى مش فى الفشل و النجاح
مشكلتى فى قدرتى على بلوغ الهدف ده
منورانى يا فتاه

Che يقول...

sara
اهلا بيكى فى اول تعليق اذا كانت ذاكرتى لسه شغاله كويس
انا مشكلتى لا هى كبيره ولا صغيره ... مشكلتى نفس مشكله هاملت
و حكايه الابراج يعرفوها الناس اللى بتقرالى من زمان عشان انا برح الجوزاء و معتز جدا بالبرج بتاعى
و طبعا انا مقدرش اعاير اصحاب الابراج التانيه عشان كلنا ولاد 9 فى الاخر ... صحيح فيه ناس ولاد 7 بس مش كتير :)
الا انتى برجك ايه ؟ هههههه
نورتينى يا ساره و اتمنى اشوفك تعليقاتك تانى

Che يقول...

sony2000
اهلا بيكى فى اول تعليق ... تقريبا انا حظى حلو فى البوست ده عشان جالى فيه تعليقين من ناس لأول مره تعلق عندى ... اللهم لا حسد
كلامك ممكن يبقى صح .. بس يا ترى انى الاحسن حالا ... اللى محدد هو عايز ايه ولا سايبها للهوا .. الاجابه بتختلف على اختلاف اهواء و مشارب الناس
و المسأله مش مسأله وسائل على اد ما هى مسأله طريق امشى فيه و يطلع فى اخره الهدف
نورتينى يا سونى و اتمنى اشوف تعليقاتك على طول

Che يقول...

عمتى ستيته
منورانى يا عمه و منوره المدونه كلها ... ضحكت و انا بقرا لما بتقولى انى مش من طبعى افضفض عشان دى حقيقه
حكايه النصح برضه مليش فيها أوى زى ما انتى انها مش بتاكل معايا اشاسا على رأى دولا اللى بالمناسبه انا مش عارف هو مختفى فين
و حكايه بوست الفضفضه ده انا هستنى لما يبقى فيه لقاء و انتى تحضريه ان شاء الله و ابقى اقولك عليها بطريقه مباشره ... عايز اشوفك فى اى لقاء يا عمه قبل ما الامن يمنع اللقاءات دى
منورانى دائما و ابدا يا عمه

سمكه واحده يقول...

اولا
اذيييييييييك ياعمرو
اخبارك ايه اتمني تكون بخير ومفيش اي اكتئاب ان شاء الله الدنيا حلوه اهو علي راي نانسي واخد بالك مفيش حاجه تدعي لاكتئاب اي مواطن يا اخي حرام عليك ال اكتئاب ايه مهو ده يبقي افتري مننا كشعب مصري ان نقول كلمه اكتئاب دي ده احنا في عيشه هنيا لالالا احنا شعب مرفه ومفيش اي مشاكل وكلنا محققين اهدفنا حتي يا اخي من كتر ما كله بلغ اماله ملينا ومش لاقين حاجه نعملها
ثانيا بقي انا مش هقلك انا شبهك وكأنك بتقول عني وكده بس بجد موضوع الموبايل ده الحمد الله اني مش بوحدي فيه والله والله والله انا يأما مقفول طول الوقت مش تعمد لا مش مشحون وبكسل اشحنه في الكهربا او بقي يرن يرن يرن ومردش ووالله تاني معرفش مش برد ليه لدرجه انه كله فقد الامل فيا وقالولي انتي معاكي تليفون ليه!
ال هو ليه ياعمرو بيه؟
ثالثا بقي موضوع الهدف
يووووووووه بالله عليك متفكرني لحسن انا فعلا بحالات كل يوم اصحي علي هدف جديد ورجع فيه وعاوزه هدفين لا تلاته طب اقلك اشتري هدفين وعليهم هدف هديه
قلبت علينا الاهداف ياعم عمرو
بس عارف انا عندي مل ان شاء الله ان كل واحد فينا هيحقق هدفه بأذن الله كفايه الامل كمان نحاول 1000 مره اكيد في المره ال1000 هتيجي
ركز معايا الفتره الي جايه عشان هقول حجات ممكن تعتبر اهداف اللي بحلم بيها وممكن تكون خزعبلات بس امتي مش عارفه بس ناويه اكتب حجات ممكن تكون مجنونه بس بحلم بيها
ان شاء الله ربنا يحققلك كل ما تتمناه انت واحنا وكل الناس يارب
(:
تحياتي

زهور الامل يقول...

اولا ازيك يا عمرو
مدونتك وحشااااااني جدا
وزعلانة منك علشان مسئلتش عليا ولا حتى بنص كيلو تفاح معطب
ثانيا بقى حالك هو حال معظم الناس ومعظم الشباب
انا عن نفسي بعوز حاجات كتيرة اوي وبكون عارفة انا عايزة ايه بس للاسف مش بقدر اخد اي حاجة انا عايزاها
لدرجة اني دايما بردد جملة أنا القدر بيعاندني
بيشوف أنا عايزة ايه وبيديني عكسه
وبطلت أحلم وبطلت أعوذ أي حاجة لاني اقتنعت ان ربنا هو موزع الاقدار والارزاق وكل واحد بيشوف اللي مكتوب ليه واللي مقدر ليه
لكن برضو بعمل اللي عليا بس سايباها لله
وعارفة اني مش هشوف ولا هاخد غير نصيبي وبقيت مرتاحة نفسيا لاني مش بقصر في حق حد ولا بقصر في اي حاجة ولا اي شغل

حالات الاكتئاب دي حاجة عادية كمان عند معظم الشباب وبتيجي لوحدها وبرضو بتروح لوحدها ويمكن بتجيني انا لما بيكون عندي مشكلة في البيت او مشكلة في العيلة لان دي اكتر حاجة ممكن تتعب الانسان
ان البيت اللي عايش فيه واللي المفروض بيرتاح فيه يكون فيه مشاكل اوحد فيه تعبان
يعني انا عايزة اقولك من كل ده انك تسيبها لله وتجتهد وتعمل اللي عليك وتحاول متدخلش نفسك في حالات اكتئاب لان مفيش حد بياخد غير نصيبه

معلش انا رغيت كتير اوي وصدعت
استحمل بقى ما انا مريحاك مني بقالي فترة

تحياتي

Zika يقول...

البوست ده هاعلق عليه لما اشوفك
عشان لو كتبت هانزل بوست اكبر من ده ميت مره

خواطر شابة يقول...

ذو العقل يشقى في النعيم بعقله
واخو الجهالة في الشقاوة ينعم
تحياتي

ندى الياسمين يقول...

اقولك انا يا عم عمرو

انت محدد انت عايز ايه او هدفك ايه
الله جميل اوي

لكن

لازم كمان تحدد انت تقدر على ايه
بتعرف تعمل ايه

يعنى هاديلك مثلا

انت عايز تسافر مثلا اسكندريه

اهو حددت هدفك

طيب هاتسافر ازاي

تحدد الاختيارات المتاحه الى ممكن توصلك هناك

هاتروح بعربيتك ولا بالقطار ولا بالاتوبيس ولا ايه بالظبط

ده طبعا هاتحدده على اساس امكانياتك
هل انت عندك عربيه ؟
طب لو عندك عربيه بتعرف تسوفها ؟
ولا محتاج تتعلم السواقه الاول

طيب الاحسن تتعلم السواقه الاول وبعدين تروح

ولا انك تروح اصلا راكب القطر

ولا ولا ولا

تحدد هدفك
تحدد معطياتك
تحدد طريقك الى هتمشي فيه

رحم الله امرء عرف قدر نفسه فعلاااااا

اعترض على مبدأ اصل لما بالاقي طريق مش ماشي فيه كويس
اسيبه واشوف غيره

انت عارف انت بتعمل ايه ؟
انت بعد ما تكون وصلت مثلا فى طريق للمرحله الرابعه

بترجع تااااااني مش هانقول تبدأ من الصفر عشان كل شغل بيعلمك حاجه جديده اكيد

لكن قول تبدأ من الخطوه رقم واحد

وعليه انت كل ما بتغير طريقك بتخسر وقتك وجهدك

طيب ايه الى كان ممكن تعمله فى موقف زي موقف التسويق

كان لازم تعرف الاول تفوق زميلك ده على اساس ا يه

موهبه خاصه او قدرات خاصه او ذكاء زي ما انت سميته ؟

ولا دراسه واجتهاد خلوا عنده مساحه حلوه يتحرك فيها

تخيل بقى لما حمار شغل يشغل مخه ممكن يعمل ايه

سوري لو استخدمت تعبيرك

ومعاك جدا فى انك فى وقت من الاوقات تقول لا استوب مش قادر ده مش طريقى

بس بعد ما تكون حللت الموقف كويس

انما هل كل مجال مش هاتتفوق فيه وتكون انت نبر وان يبقى مش مناسب لك وتدور على غيره

اكيد ده مش صح

مهم اوي نعرف احنا عايزين

مهم اوي كمان نعرف احنا عندنا ايه

وبعد كده نعمل خطوات الوصول بناءا على معطياتنا

يارب ما اكونش توهتك وفهمت قصدي

وسوري على الاطاله

سارة نجاتى يقول...

عمورة يا عمورة

مش عارفه ليه مفتقداك حشاك مختفى كده

مع انك لا مختفى و لا حاجة , بس حساك مختفى برده

يستهيأ لى لو كنت قلت ايه اللى انت عايزه ( و اللى انا بحسدك انك عارفه ) كنت ح تسهل علينا محاولة المساهمة باقتراحات

و افكس حوار الأبراج ده , عايزه أصدقه و بعدين تحصل مفرقات فظيعة , واحد زميلى بثقولى : انت برج ايه ؟
قلت له : العذراء
قال لى : مع انك ذكية يعنى
أتارى برج العذراء طالع عليهم بالغباوة

يرضيك يعنى كده ؟؟ يرضيك برده؟؟

زهرة(جنى)الاسلام يقول...

السلام عليكم
ندعوكم للدخول الى شات مونتى يوم21/3/2010
تمام الساعة العاشرة مساءا
من اجل نصرة المسجد الاقصى

فاتيما يقول...

انتا توهتنى يا عمرو

ينفع كدا؟؟!!


يا عم
انتا بتهرج و الله


مين ف الدنيا دى
بيعرف بالضبط هوه عاوز ايه؟؟


و لو عارف
هياخد وقت قد ايه
و يغير فى اللى عاوزه دا كام مرة حسب الظروف

احنا نظرياً بنحط خطط
و احلام عريضة
و افلام كتير


لكن من امتى اللى بنحطه
بيتحقق و كله و لا حتى نصه ؟؟

ساعات يتحقق اللى احسن منه

او اللى اوحش


عشان نصيب


حتى الحلو اللى فيه بيتحقق بأسباب غالبا ملناش يد فيها
بنسبة 60 او 70 ف المية



انا بصراحة
انسانة قدرية جدااا

و فى قول آخر غير عقلانية


بعتبر النجاح والفشل ف الحياة امر محتوم و مقدر
و نصيب ولازم ينشاف


و ربنا سبحانه و تعالى
من وجهة نظرى الخايبة
هيحاسبنا على السعى
و على مدى تمسكنا بأنسانيتنا
طول السكة من الولادة للممات


هنفضل بنى آدمين
ولا هنتحول لوحوش و شياطين


مبقولش لا نسعى
و لا نفكر
و لا نحسب
و لا نحط خطط
و نقعد بروتات



مين اللى قال ؟؟
اومال ربنا مدينا عمر
و مخ
و قلب ليه؟؟


مش عشان نستخدمهم
فى كدا


بس احيان كتير تلاقى
حاجات ف الحياة تعطلك
و تكركبلك دماغك و تكعبلك


و مهمتنا تتلخص فى التخلص
اولا بأول من المنغصات دى
و تأدية مهمتنا الاساسية
ف الدنيا


اللى هيا
اعمارها
و اننا نعيش صح
و نموت صح
و دى قمة العبادة
و شكرانية ربنا




توهتنى بقولك
وانتا تلاقيك تهت
انتا راخر



حلو البوست على فكرة




و جوزائى جوزائى يا عم

احنا بيهمنا

Haytham Alsayes يقول...

عزيزي تشى
بجد مبسوط بمدونتك الجميلة
اما موضوع البوست فانت فعلا محدد هدفك بس مش محدد الطرق المؤدية اليه ودي غلطة شنيعة اوى لان يبقي الهدف دة مالوش قيمة لازم تعرف الطرق ممكن تلاقي طرق طويلة وممكن قصيرة بس الشطارة انك تحدد اي طريق تمشي فيه بس في الاخر خللي عندك يقين انك عتوصل

في واحد زميلي مرة قالي لو عاوز حاجة في البلد دي خدها عنوة

انت رأيك في الرأى دة اوصل انت لهدفك عنوة وقول لنفسك بالذوق او العافية عاوصل يعني لوصل

بس خلاص
شكرا علي التواصل ياتشى المكافح
سلام

Che يقول...

سمكه
على كده احننا طلعنا شبه بعض أوى فى حاجات كتير .... و طبعا هركز معاكى الفتره الجايه و الفترات اللى بعدها طبعا
منورانى يا سمكه

Che يقول...

زهور
معلش للمره المليون يا زهور انى مقصر فى الزياره ... بس انا مش بحب التفاح ، ممكن اجيب موز بداله .... و زى ما المدونه وحشاكى برضه تعليقاتك وحشه المدونه
مسأله القدر مظنش انه بيعاند حد .. بس ساعات كتير اللى بنحلم بيه مش بنعرف نحققه مش عارف ليه ... بس اللى اقدر انصحك بيه انك متبطليش احلام ... و طبعا كلنا سايبنها على الله
و بعدين يا زهور انتى صاحبه مدونه ... يعنى ارغى براحتك و صدعينى يا ستى
منورانى يا زهور

Che يقول...

زيكا
ماشى يا عم زيكا و انا هكون مستنى تعليقك لما اشوفك
طبعا مش محتاج اقول انك منورنى يا زيكا

Che يقول...

خواطر شابه
صدقتى والله يا خواطر ... و يمكن العقل ده يكون فعلا اكتر حاجه متعبه فى حياتنا
منورانى يا خواطر

Che يقول...

ندى الياسمين
تخيلى من كتر ما عاجبنى تعليقك بفكر اكتبه فى بوست لوحده
بس هسألك سؤال ... تعملى ايه لو لقيتى كل الامكانيات اللى انتى محتجاها متوفره و مع كده مش عارفه تحققى هدفك .. هيا دى مشكلتى
بس برضه ساعات الامكانيات بتبقى اقل من الاهداف
نورتينى يا ندى و اتمنى اشوف تعليقاتك على طول

Che يقول...

ساره
والله يا ساره انا كمان مفتقدك ... يا بنتى شوفى حل فى مدونتك اللى مش بتبان على الريدر دى و بنعرف بيها بالصدفه
حكايه اللى انا عارفه و مش قايل عليه مش فارقه مع حد ... انا بس بتكلم الفكره العامه نفسها
و انا ضحكت لما قريت على حكايه برج العذراء دى ... بس بعد كده شتمت زميلك ... اصل امى برج العذراء برضه
منورانى دايما يا ساره

Che يقول...

ماما فاتيما بنفسها هنا يا جدعان انا مش مصدق
يا هلا يا هلا ... استنى ارش ميه و اطلع الكراسى فى الشمس
انا مكنش قصدى اتوهك والله ، مع انى مش عارف انا توهتك ازاى بس معلش مش تزعلى منى
حكايه مين اللى عارف هو عايز ايه فى الدنيا فأنا واحد من الناس اللى عارفه هيا عايزه ايه ... انتى برضه لو فكرتى شويه هتلاقى حاجه انتى عايزاها اكتر من غيرها ، يعنى الموضوع مش فريد من نوعه أوى كده
و طبعا انا معاكى ان النجاح و الفشل مسأله قدريه ... انا ممكن اعمل كل حاجه صح و برضه منجحش .. صدقينى انا اكتر واحد عارف النقطه دى :)
و طبعا يا باشا انت تقول اللى انتى عايزه و انا جوزاء على نفسى
نورتينى جدا يا فاتيما و اتمنى اشوف تعليقاتك دايما

Che يقول...

هيثم
ربنا يخليك على ذوقك يا هيثووم .. مسأله تحديد الاتجاهات و الطرق دى هيا مشكلتى زى ما انا قلت
و على فكره صاحبك صح ... بلدنا لسوء الحظ مينفعش فيها غير الدراع حاليا
نورتنى يا رفيق هيثم و مستنى تعليقاتك دايما