الاثنين، 1 مارس، 2010

ثرثره مسائيه

اول حاجه يا جماعه عايز اعتذر لكل الناس اللى علقت على البوستات اللى فاتت و انا مردتش عليهم لسه ، بس بجد انا عايش حاله فظيعه من الزهق و ده مخلينى مش قادر اعمل اى حاجه ، بس الحمدلله ابتديت اطلع منها
تانى حاجه البوست ده عباره عن شويه فضضه ... يعنى تقدروا تقولوا انى قررت ليه تكتئب لوحدك لما ممكن تكئب الناس معاك ..... طبعا انا بكتب البوست ده و انا بسمع رباعيات الخيام و الست بتغنيها عشان اخرج شويه من حاله الكآبه
انا رحت معرض الكتاب السنه دى ... بصراحه مش فاكر انا ليا اد ايه مرحتش معرض الكتاب ، بس كان دايما السبب اللى بيمنعنى انى بحب الكتب جدا و دايما بحس انى لو معايا مليون جنيه برضه مش هيكفونى كتب .... عشان كده كنت امتنعت عن انى اروح معرض الكتاب عشان بقعد مفلس بعديه مده طويله جدا .... و اللى كنت بعمله انى بوزع الكتب على السنه كلها عشان محسش بتعب مادى بعد ما اشترى الكتب
طبعا ممكن ناس تضحك و تقول الكلام اللى بقوله ده مش منطقى بس يا جماعه انا واحد بشترى فى السنه تقريبا ما متوسطه 400 كتاب .... يعنى صباح الافلاس لو افترضنا ان كل كتاب ب20 جنيه بس
المهم عوده لموضوع المعرض انا كنت ناوى انزل اشترى كتاب مايكل و الصباغ و احضر حفلات التوقيع بتاعتهم و كفى الله المؤمنين شر القتال .... المهم انتيمى التدوينى و بره التدوين برضه زيكا قالى يا عم مش بتنزل ليه المعرض ، قلتله السبب ... قالى يا عم ده كان زمان ، السنه دى بالكتير هتشترى ب 300 جنيه كتب مش اكتر .... المهم انا فعلا نزلت المعرض و الحق طلع زيكا مش بيكدب ... المعرض السنه دى وحش جدا .... يعنى فعلا اخرك 500 جنيه للاصدارات الجديده .. طبعا المبلغ بيتضاعف لو انت هتكمل مجموعاتك الادبيه القديمه زى ما انا بعمل حاليا بمناسبه انه مفيش حاجات كتير حلوه
المهم انا فى المعرض ده قابلت الصباغ و كانت اول مره اقابله .... الحق يقال انه خالف الصوره اللى انا كنت راسمها و ده تأكيد لمثل تعرف فلان ، اه اعرفه ..... شخص ودود ، عشرى ، ابن بلد و دمه خفيف ..... طبعا انا مش بعمله اعلان ولا بنافقه لأنه مش بيدخل عندى اصلا المدونه
و برضه قابلت مايكل .... مايكل انا اعرفه لمده سنه عن طريق المدونه و كانت اول مره اقابله و طبعا مكانتش الاخيره ولا هتكون الاخيره ...... الجميل ان الاتنين منزلين كتب السنه دى فى المعرض .... طبعا مع اعتراض مايكل على اى حد يقوله انت كاتب ، بس بجد كتابه جامد جدا
و برضه قابلت سوووو ..... سوووو ده بأه مشكله .... عارف الانسان اللى سخريته ممروره من كتر ما شاف فى الدنيا .... دى كانت نظرتى الاوليه و عادل اكدها .... قالى ان سووو ممكن يكون بيتكلم فى موضوع جد جدا و بطريقه جاده أوى و انت مش قادر تمسك نفسك من كتر الضحك ...اكيد هيكون ليا مقابلات تانى معاه لأنه بجد انسان تخسر كتير لو معرفتوش
المهم و احنا فى المعرض بقول لزيكا انت كنت متصور صوره عار يا زيكا .... و نسيت ان اللى بيتريق على حاجه بتقعدله .... نتيجه لحضور حفلات التوقيع اتصورت مع الصباغ و زيكا ... و يا لهوى على الصور لما شفتها .... اليوم ده كان حر جدا .... و انا مش بحب اتصور بطبعى .... النتيجه ايه ..... صوره ليا و انا بلمع من العرق ... و شعرى بايظ برضه من الحر و عشان انا مش بسرحه ... افتكر اخر مره سرحته فيها كانت من حوالى 12 سنه كده .... و عشان انا مش بحب اتصور فتلاقينى مش بعرف اخد البووز الحلو ولا بضحك ولا اى نيله .... تخيل بأه الصوره .... واحد بليمع و شعره بايظ و مش بيضحك و شكله قرفان من نفسه و من الدنيا و من الناس اللى بيتصور معاها .... لا و فوق ده كله بكرش حلو كده طالع و واخد موقع حلو فى الصوره .... انا نفسى الصباغ يشيل الصور الوحشه دى و يخليه مع الناس اللذيذه ..... و صدق زيكا لما قالى بتتريق على صورتى و انت صورتك احداث ..... و انا من هذا البوست بقوله حقك عليا يا عم زيكا يا كبير
نتيجه لظروف بايخه بمر بيها اضطريت انى ادور فى الالبومات و الصور القديمه .... انا كنت من زمان لميت كل صورى و حرقتها و حرقت النيجاتيف بتاعها ايام ما كانت الصور ليها نيجاتيف مش ديجتال زى دلوقتى ، عشان انا بطلع وحش فى الصور ... المهم مع كده لقيت شويه صور ليا و ده اثبت مبدأ ان الصور لا تتلاشى و لا تتولد من عدم ..... المهم مع الصور دى و الصور بتاعت المعرض و الصور القليله اللى موجوده ليا من ايام الكليه ، قدرت اشوف التطور الطبيعى لعمرو
حاجه غريبه جدا ..... يعنى ايام الكليه لما كنت بتكلم على ان الواحد يبقى عنده 25 سنه كنت اقول يااااااه ... كانت حاجه بعيده أوى بالنسبه ليا انى اوصلها ... و لما اتخرجت من الكليه بعد عقد من الزمان كنت عديت ال25 دول اصلا ..... و حاليا انا على اعتاب ال30 و بحاول اتمسك فى العشرينات على اد ما اقدر ..... عندى احساس انى مسافه ما دخلت ال30 يبقى كده انا عديت مرحله نص العمر زى العناصر المشعه و جاهز للانفجار ( الله يخرب بيت الكيميا اللى لحست دماغنا ) .... و غصب عنى تداعت لراسى الاحلام اللى كنت بحلم انى احققها
الاحلام دى تبتدى تقسمها .... احلام مراهقه و دى مصيرها انك تضحك عليها و تقول انا كنت بفكر فى الحاجات دى ازاى و انا صغير ... و احلام مأجله انت لسه محققتهاش .... و احلام ملغيه لأنك دلوقتى اكبر و اعقل من ايام ما حلمتها و لقيت انه مستحيل انك تحققها ..... و تبتدى تعمل كشف حساب لنفسك و تشوف ايه من الاحلام اللى ممكن تحققها انت فعلا حققته و ايه اللى انت فشلت فى تحقيقه .... حاجه صعبه جدا و خصوصا لما تتكلم مع نفسك بجد مش تشتغل نفسك و تقول الظروف و الجوابات
حاليا انا فى دماغى 3 حاجات مش هقول 3 احلام ولا 3 مشاريع .... هديهم وصف 3 حاجات و بس ، بحاول اعملهم ..... بس المشكله انهم عايزين مجهود انا مكنتش فاكر انه هيبقى كتير كده بس طلع كتير جدا جدا جدا ....... بس ادينى بحاول و طبعا انا بستعين و هستعين بمساعده اصدقاء و حبايب و كل الناس بس ربنا يسهلها من عنده
طبعا مش هيفوتنى انى اشكر الناس اللى سألت عليا ... بس عذرى ان فى فتره احتجابى عملت حاجات كتير كنت مفتقدها .... رجعت اقرى تانى ... يعنى مثلا انا حاليا بقرى الف ليله و ليله الطبعه الاصليه اللى نازله تبع سلسله الذخائر اللى تبع هيئه قصور الثقافه و دى كنز والله يا جماعه ، بس يا ريت الاخوه و الاخوات المتشددين ميقروهاش .... برضه بقرا مدونات كتير مع انى بسيب تعليقات قليله جدا .... مدونات قديمه و مدونات جديده ..... و برضه بتفرج على افلام من كتر ما الافلام اللى بنزلها قربت تخلل على الهارد قلت احاول اى حاجه فيهم ... و بنام كتير زى ما اكون مش هنام تانى فى حياتى
احلى حاجه انى عملت فى البوست ده حاجه انا مكنتش بعملها قبل كده .... يا ترى مين اللى هيقولى انا عملت ايه و انا اديله الجايزه اللى يطلبها
كفايه ثرثره لغايه كده و اشوفكو المره الجايه ...... سلام

هناك 16 تعليقًا:

مياسي يقول...

بس حابه اعلق على جزئية الفراغ اللي هيك بتعمل فيه كل شي

حاليا انا بهالمرحله

ومش متزكره اخر مره رحت فيها معرض الكتاب متى كانت
اه بلى
في عمان من سنتين تقريبا

Che يقول...

مياسى
واضح اننا كلنا فى نفس المرحله .... تفتكرى عشان جوزاء ولا عشان ايه يا مياسى
منورانى يا مياسى على طول

فتاه من الصعيد يقول...

كويس انك طلعت من مرحله الزهق

مستنيين جديدك

تحياتي

الشعب لابد له من حكومه تشكمه يقول...

جميل انك رحعت بتكتب ,,,
بعتذر طبعا على التقصير الفظيع الشنيع اللى انا عملاه معاك وشى منك فى الارض:(

micheal يقول...

أيوة كده..لحقت نفسك..قال كاتب قال
:)
مبسوط أنك جيت حفل التوقيع يا عمرو ومتقلقش من موضوع ال30 ده اوي كده

magi يقول...

فعلا المعرض السنه دى كان وحش جدا وانا تقريبا مجبتش حاجه تذكر ما عدا شويه حجات كانت ناقصه عندى
بالنسبه للصور عادى كلنا عندنا صور عار بس مش لدرجه حرق النيجاتيف يعنى :D
المهم انا شفت الصور بتاعت حفله التوقيع قبل كده ومأخدتش بالى انك انت الى فى الصور الا بعد مقريت البوست
ربنا يوفقك فى كل احلامك وتحققها كلها

سارة نجاتى يقول...

أنا عايزه شوية فراغ هههههههه

حلوة حكاية أنك تكتب تداعيات دماغك
يعنى بدأت بحاجة و اتكلمت فى حاجة و خلثت بحاجة تانية خالص
بس هى دماغنا بتفكر كده فعلا

منورة انا

Zika يقول...

هههههههههه يا عم الصور دي احلى حاجه في الدنيا
بنفتكرها ونعد نضحك
ده انا هابقا اوريك شوية صور ليا ممكن ماتعرفنيش تاني بعد اما تشوفهم
بس بنمسكهم ونعد نتريق
بص الواد زيكا كان عامل ازاي
وننزلها لبعض ع الفيس وبتبقا فضايح
بس على الاقل بتلاقي حده تتعلق بيها في الايام الحلوه اللي انت مريت بيها عشان بس ماتقولش لنفسك انك كل حياتك كانت غامقه
باقوم مطلع الصور دي كلها واعد اتفرج عليها
واضحك كاني لسه في موقف ما اتصورنا

المعرض ماكانش على المستوى وده فعلا اللي شوفناه انا وانت ماكانش منظم وكان زحمه
الفرغ ... أمر لابد منه

*** حور- نور*** يقول...

هى حالة الزهق دى منتشرة اليومين دول ليه؟
ياترى من الجو الوحش ولا الأكل الوحش ولا الحكومة الوحشة ولا المواصلات الوحشة ولا الناس الوحشة
ايه ده دا كل حاجة بقت وحشة حتى المعرض اللى بنروحه علشان نفك الخنقة بقى وحش
أقولك على حاجة خليك زى مانت واوعى تقول انى وحشة

Che يقول...

فتاه من الصعيد
والله يا فتاه انا مش مبسوط من مسأله انى طلعت من حاله الاكتئاب لأنى راجعلها ... اصلى انا و الاكتئاب عشره قديمه من زمان
و يا رب الجديد يعجبك
منورانى يا فتاه

Che يقول...

شيما
ربنا يخليكى يا شيما و مش تتكسفى منى .. حد يتكسف من اخواته برضه :)
منورانى يا شيما

Che يقول...

مايكل
طبعا يا عميد لازم الحق نفسى ... ههههههه
منورنى يا مايكل

Che يقول...

ماجى
كل الناس اتفقت فعلا السنه دى ان المعرض كان اسوأ سنه
بالنسبه لمسأله الصور بيتهايئلى بعد ما شوفتى الصور عرفتى انا ليه كنت بحرقها ... هههههه
منورانى يا ماجى

Che يقول...

ساره
والله يا ساره انا مكنتش مخطط انى هكتب كل ده ... بس انتى قلتى وصف عبقرى ، تداعيات
و فكره مسأله اننا بنفكر كده .. يا ترى قصدك مين بكلمه بضمير الجمع ؟ ( وش محقق شرير )
منورانى يا ساره

Che يقول...

زيكا
انا دولا حكالى عن شويه صور ليك ايام ما كنت بشعر .... بس انا يا عم مجرم فى الصور و انت شفت بنفسك
حته الماضى دى ساعات انا بحاول اهرب منه من غير فايده يا زيكا
طبعا مش هقول منورنى عشان انت عارف من غير ما اقول يا زيكا :)

Che يقول...

حور نور
والله على رأيك .... كل حاجه فى حياتنا وحشه جت على المعرض
بس سؤال مهم ... الدنيا فعلا وحشه و عشان كده احنا شايفنها وحشه عشان هيا وحشه بجد ، ولا احنا اللى وحشين و بنعمل اسقاط على الدنيا
و طبعا مش هقول عليكى وحشه
نورتينى يا نور