الجمعة، 9 أبريل، 2010

سياسه لا اكثر ولا اقل

رغم انى مليش نفس اتكلم فى السياسه الا انه من الواضح ان كل حاجه فى بلدنا بتؤدى للسياسه بشكل او بآخر ........ شئ مؤسف اننا منلاقيش حاجه نقدر نتكلم فيها من غير ما يكون داخل فيها سياسه ، مفيش حاجه نستمتع بيها ، او تعذبنا و برضه ميكونش ليها دخل بالسياسه .... كل حاجه فى بلدنا فى الوقت الحالى ، و فى كل الاوقات بالمناسبه متعلقه بالسياسه
من 3 اسابيع تقريبا انتشر على الفيس بوك و فى المنتديات و حتى فى قعدات الاصحاب الفيديو المشهور حاليا بتاع وزير التعليم ( و حقيقه انا مش عارف الوزاره لسه اسمها التربيه و التعليم و لا اكتفو بالتعليم على اساس اننا شعب مش هينفع فيه التربيه ) ساعه لما مر على مدرسه و لقى التلاميذ فى الحوش و المدرسين مش فى الفصول و الناظر مش موجود ..... طبعا كلنا سمعنا عن الفيديو ده اذا مكناش اتفرجنا عليه كمان
استغربت جدا لما الناس شافت ان الوزير حاد جدا فى تعامله مع المدرسين و الناظر و سخريته منهم ..... سبب استغرابى ده ان الراجل اتريق عليهم بس مش اكتر ، طبعا مش معنى كده انى موافق على التريقه ، بس الظاهر الناس ناسيه مين ابو الوزير ده ... ابو الوزير ده يا افاضل هو زكى بدر وزير الداخليه الاسبق .... و اللى ميعرفش زكى بدر يروح يسأل الناس الكبيره عليه ... زكى بدر على ما اتذكر كان من اوائل الناس اللى دخلت الشتيمه و الضرب ( سواء بالايد او بالجزمه ) لمجلس الشعب ...... و ده اختزلته منى الشاذلى فى حوارها مع الوزير فى جمله تحمل من الخبث اكتر مما تحمل من البراءه او انها تكون مجرد تعليق عادى لما قالتله " اللى خلف ما متش " .... طبعا الراجل خد الجمله ببساطه ، و الله اعلم لو كان خدها على انها حقيقه او انها مدح
اللى انا مستغربله ان الوزير زعلان جدا من حال المدرسه و اللى شافه .... طيب المدرسه دى على الاقل لقى التلامذه جوه المدرسه .... فيه مدارس تانيه مفيهاش لا تلامذه و مدرسين ولا ناظر ولا اى حاجه ...... الراجل استغرب من التسيب اللى وصلناله ، زى ما يكون مش عايش معانا فى مصر ، و ميعرفش انه كوزير مسئول عن كل المدارس و منهم مدرسه عندنا فى الهرم مش مهم اسمها بس اللى عايز يعرفه هقوله عليها .... المدرسه دى مدرسه بنات ثانوى عام و كانت مشهوره بأن نسبه لا بأس بيها من الطالبات اللى فيها حوامل ، و انا عارف الموضوع ده من ايام ما انا كنت فى ثانوى يعنى تقريبا من 16 او 17 سنه ، الله اعلم تطورو دلوقتى و اصبحو بيروحو المدرسه بعيالهم ولا لسه بيكتفو بالحمل
ناهيك طبعا عن مدارس الاولاد ، و عن التعليم التجارى و الفنى ، و الكارثه اللى عندنا فى التعليم اللى اسمها سياحه و فنادق و فى الغالب بتخرج رقاصات و طبالين و بلطجيه ..... و انا مش بقول كده من باب انى اخلى سمعه المدارس وحشه انما اللى بقوله ده اقل من الحقيقه بكتير ..... و اللى مش مصدق ينزل يشوف بنفسه ..... طبعا انا هنا بتكلم عن مدارس الناس اللى على اد حالها .... المدارس الهاى كلاس و الاميركان دبلومه طبعا شئ تانى ، لأن البوظان فيها مدعم بالفلوس ... يعنى مش مجرد صياعه بلا امل زى مدارس الغلابه ، انما بوظان و فساد رسمى
حقيقه انا مش عارف الوزير ده هيطلع اكبر امل لمصر فى تحسين التعليم ولا هيطلع مجرد افعال لتلميعه شخصيا ، خصوصا ان مسيره الراجل ده كانت سريعه أوى فى بلد اشتهرت بالروتين و كاتب القرفصاء .... من دكتور فى الجامعه لعميد كليه ، لنائب رئيس جامعه ثم رئيس جامعه و بعد كده وزير ، و احتمال تكون الخطوه الجايه رئيس وزرا
نسيبنا من موضوع الوزير و نتكلم على حاجه تانيه برضه اساسها سياسه .... البرادعى ..... الراجل ده من ساعه لما طلع و عمل حراك سياسى فى البلد و كل الناس بتتكلم عليه .... و الحقيقه برضه ان الراجل لغايه دلوقتى مش قال اى تصريح انه هيرشح نفسه للانتخابات الرئاسيه ، انما الناس هيا اللى رشحته ... جايز عشان مش عايزه جمال ، و جايز عشان مش عايزه الاخوان و جايز لمجرد فكره التغيير و التجديد
انا قريت ما اصطلح على برنامج الاصلاح السياسى بتاع البرادعى ، و لقيت كل المطالب اللى فيه هيا المطالب اللى كل القوى السياسيه ( سواء اتفقنا انهم فعلا قوى ولا مجرد ناس بتؤدى ادوار ) بتطالب بيها .... بس اللى يفرق البرادعى عن غيره انه ليه خبره سياسيه دوليه مش مجرد خبرات محليه و شويه شجب على شويه استنكار و معاهم رشه مظاهرات ......... بس برضه دى نفس نقطه ضعف البرادعى انه مش عايش فى مصر و جايز ميعرفش كتير عن احوالها الحقيقيه .... بس برضه من الملاحظ ان البرادعى ابتدا يتدارك النقطه بتواجده اكتر فى الشارع المصرى مع الناس و فى وسطهم
بس الملاحظ انه حاليا لا صوت يعلو على صوت البرادعى ..... يعنى الاخوان رغم ضجيجهم العالى ( اللى انا شايف انه ضجيج بلا طحن ) ملهمش صوت و منشغلين حاليا فى مشاكل مكتب الارشاد و الاعضاء بتوعهم اللى فى المعتقل ..... و برضه اليسار على اختلاف الوانه و تنظيماته ملوش صوت حاليا ..... و برضه مفيش صوت لا ايمن نور ولا جميله اسماعيل ( لأن الحقيقه ان السجن انتقص كتير من بريق ايمن نور مش لمعه اكتر ) .... يعنى الراجل ده محدش لا عارضه ولا آيده ، مع استثناء الشباب اللى فى حركه كفايه و اللى بعضهم نقل نفسه من خانه اليسار الى خانه يسار الوسط
مشكله البرادعى انه محدش هيقف معاه فى البلد عشان دى اصول اللعبه السياسيه فى بلدنا ، و اللى الله اعلم هو فاهمها ولا لسه محتاج فيها دروس ... الاخوان ممكن يقفوا معاه على الحياد و جايز يساندوه ،مع ان ده احتمال مستبعد لأن الراجل ده من اساس افكاره الدوله المدنيه اللى بيعتبروها الاخوان رجس من عمل الشيطان ، بس لو لقو ملهمش مصلحه مع البرادعى هيكونو اول ناس تبيعه زى ما عملو ساعه انتخابات مجلس الشعب اللى فاتت و اتفقو مع التجمع على تقسيم الدوائر الانتخابيه بينهم على رأى المثل انا و اخويا على ابن عمى و انا و ابن عمى على الحكومه ، و بعد كده كانو اول ناس باعت التجمع و كل الاحزاب التانيه ، و ده مش غريب على الاخوان على فكره لأن دى حقيقتهم من زمان ، يعنى طبعهم مش هيشتروه
يمكن اليسار يقف مع البرادعى بضمير شويه عن الاخوان ، بس مشكله اليسار فى مصر انه من زمان مفهوم غلط و ان اليساريين دول ناس كافره و هيروحو النار و اللى ساهم فى كده كانت الحكومه و الاخوان على التوازى كل طبعا لمصالحه الخاصه ، و طبعا بما اننا كلنا ما شاء الله علينا داخلين الجنه و على راس كل واحد فينا قنديل و على راس البعض قنديلين فأحنا عشان كده ضد اليسار من غير حتى ما نسمع اى حاجه من افكار الناس دى ..... بس احقاقا للحق جزء من الازمه دى كان اليسار نفسه سبب فيها من غير الدخول فى تفاصيل مش هتفيد اى حد دلوقتى
يفضل للبرادعى الناس اللى عايشه فى مصر بجد و طالع عين اللى خلفوها .... بس مشكلتنا ان لقمت العيش بتذل .... و انا هنا بتكلم بصراحه و بواقعيه و من غير اى شعارات ..... و المسأله نسبه و تناسب ..... يعنى لو فيه 5% مستعدين يضحو عشان افكارهم و مبادئهم هتلاقى قصادهم 95% عايزين يعيشو و يربو العيال ، و لو مفيش عيال يبقى عايزين يعيشو و يجيبو عيال عشان يربوهم
بس يفضل السؤال الحقيقى .... البرادعى فعلا عايز يغير من البلد حتى لو مكنش هو جزء من النظام اللى هيغير ، ولا هو مستنى اللحظه المناسبه عشان يعلن انه نفسه يبقى رئيس جمهوريه او رئيس وزرا او اى حاجه من النظام ده ..... السؤال ده هنستنى عليه شويه عشان نعرف اجابته

هناك 8 تعليقات:

زهور الامل يقول...

ازيك يا عمرو باشا
اخبارك ايه

بص يا سيدي انا هقولك على حاجة
عندنا هنا في المنصورة مجرد ان المحافظ الجديد اتعين
الراجل كان داخل بصراحة في الاول شادد حيله وعامل فيها الاسد اللي هيصلح البلد
بقى ينزل بجلبيه في وسط الناس ويركب تاكسيات ومواصلات عادية ويستدرج الناس في الكلام علشان يعرف حال البلد
ودلوقتي عامل حملات جامدة جدا على مراكز الشباب والمدارس ولحد دلوقتي ماشاء الله عليه ماشي زي الفل وربنا يستر ومايكونش برضو بيلمع نفسه في الاول

بالنسبة لزير التعليم انا مشوفتش الفيديو بصراحة بس سمعت عنه من زمايلي في الشغل وبجد اتمنى من كل قلبي ان الراجل ده يستمر بالطريقة دي لان بجد مابقاش في حاجة اسمها تربية ولا تعليم في البلد
انا تحت بيتي مدرسة قسما بالله انا عمري ما شوفت بوظان ولا استهتار زي كدة مع انها تعتبر افضل مدرسة في المنطقة وكمان في بلد ارياف يعني ملمومة شوية وبصراحة لسة موصلتش لمرحلة البنات الحوامل دي وبرضو ربنا يستر

وكمان احنا زعلانين ليه من الضرب بالجزمة انا عن نفسي شايفة اننا شعب جبان لازم تضربه وتقسى عليه علشان يمشي

نيجي بقى لعمو البرادعي
بصراحة برضو انا شوفت معظم لقاءات الراجل ده وهو يمكن اه نقطة ضعفه انه كان بعيد عن البلد ومش عايش فيها

بس برضو اللي فيها وعايشين فيها يعتبروا بعاد كل البعد عنها وعايشين في الغيبوبة وعايشين مع سياسة رجال الاعمال فقط وسايبين الشعب المطحون ياكل طين ومايعرفوش عنه حاجة

لكن بصراحة البرادعي من لقاءاته حسيت ان الراجل ده عايز يعمل حاجة كويسة للبلد دي وعايز ينهض بيها وحاسس بيها وباهلها وكان عندنا في المنصورة الاسبوع اللي فات
معتقدش ان الحكومة الموجودة حاليا نزلت المنصورة بدري كدة
وبرضو ربنا يستر
اهو احنا مصيرنا في ايدين مليون ريس للمركب ومش عارفين هيودونا لفين

موضوعك جامد اوي يا عمور تسلم ايدك


تحياتي

فتاه من الصعيد يقول...

اتفق معاك طبعا

بس اعتقد ان الاخوان هيقفوا مع البرادعي لانه وعدهم بحزب سياسي :)

تحياتي

صفــــــاء يقول...

خمسه جد ؟ بعد اللى قولته دة مين عايز جد ؟
دى احوالنا من اكتر من 30 سنه وبقت العادى بتاعنا خلاص
وماتفتكرش ان احنا مش بنتكلم فيها عشان منعرفهاش
احنا مش بنتكلم فيها عشان مانفضلش نتكلم فى الفاضى ونحرق دمنا

الجد بيجيب الضغط وبنوعيه الكوميديا اللى فى السوق دلوقت بقت هى كمان تجيب القرف
غير ... جرب الحشيش

فتافيت يقول...

بمان ان صفاء قالت جرب الحشيش
بدل الجد والكوميديا .. فالحشيش فيه ازمة
يبقى الحل اننا نعيش نتفرج وبس
على فركة انا مابحبش البرادعي ولا من مؤيديه خالص
ده مايعرفش حاجة عنا بجد.. مستحيل ينفع.. :(

Che يقول...

زهور
والله يا زهور جايز فعلا يطلع الموضوع كله ان الغربال الجديد بيبقى ليه شده ... و جايز يبقى بجد
مشكلتنا اننا مش بنثق فى الحكومه .... ولا فى اى حد بصراحه
بس اللى انا عارفه ان الزمن لوحده هو اللى هيجاوب على اسئلتنا كلها
مبسوط ان البوست عجبك
نورتينى يا زهور

Che يقول...

فتاه من الصعيد
من ناحيه المبدأ اى حد ممكن يعمل حزب ، بس الفكره ان ايديولوجيا الاخوان غير ايديولوجيا البرادعى تماما
بس برضه يفضل انى مش بثق فى الاخوان اكتر من ثقتى فى شويه تعابين
نورتينى يا فتاه

Che يقول...

صفاء
والله يا صفاء انا عشان كده مقضيها ضحك و تهريج عشان مش عايز اموت صغير
بس بالنسبه للحشيش ففيه ازمه فيه و مش لاقينيه حاليا .... لسوء الحظ
نورتينى يا صفاء

Che يقول...

فتافيت
والله يا فتافيت لسه قايل لصفاء على ازمه الحشيش
بالنبسه للبرادعى فانا متعادل بالنسبه ليه ، بس فكره التغيير فى حد ذاتها فكره جذابه
و ادينا منتظرين
نورتينى يا فتافيت و متغبيش كده تانى