الجمعة، 16 أبريل، 2010

سرقه مسلحه

من حوالى 3 او 4 سنين كنت فى يوم نازل الصبح بدرى على الساعه 7 تقريبا ، مش فاكر انا كنت رايح فين .... المهم اللى انا فاكره انى كنت ماشى و لقيت ادامى تجمهر من الناس ملمومين و انا مش عارف اللمه دى على ايه ..... قربت شويه من مركز اللمه ، لقيت واحد وارم من الضرب و الناس لسه بتضرب فيه و رابطينه من رقبته بحبل و شابكين الحبل فى عمود نور ..... المهم انا بقولهم هو عمل ايه ، واحد قالى ده معرفش مين نزل يصلى الفجر و خد باله من الواد ده نازل من بيت و عرف انه حرامى قام ماسكه و نده الناس و من ساعتها نازلين ضرب فيه .... قلتله يعنى الواد ده بيتضرب من الفجر .... قالى دى عيال مبرشمه و مش بتحس بالضرب
المهم انا مشيت شويه بعيد عنهم و كان جاى فى سكتى واحد محترم لابس بدله و شايل شنطه حلوه كده ... سألنى هو اللمه دى على ايه ، قلتله على اللى فيها .... لقيته بيدينى الشنطه و راح داخل وسط اللمه و ضرب الواد قلمين و رجع خد منى الشنطه و مشى فى طريقه
انا فاكر انى استغربت يومها جدا من اللى الراجل ده و اللى عمله و اللى الناس الكتير الملمومه بيعملوه و ليه هما كلهم نازلين ضرب فى الواد الحرامى ده ، و قلت دى تقريبا سياسه القطيع و نوع من انواع تفريغ الكبت و الظلم اللى الناس حاسه بيه فى شخص الحرامى و كلام كتير من الحلو المجعلص بتاع الكتب ده .... بس لازم اعترف انى اكتشفت السبب الحقيقى من يومين
يوم الاربع اللى فات كنت نازل مشوار .... المهم قلت اعدى على البنك اسحب فلوس عشان مكنش معايا اللى يكفى .... الحوار ده كان على الساعه 7 و نص العشا .... المهم قبل البنك بدقيقه بطلع المحفظه عشان اجهز الفيزا عشان اخلص على طول لأنى كان عندى معاد و كنت متأخر عليه جدا .... فجأه حسيت بحد بيخطف المحفظه من ايدى و كان الحد ده ورايا .. ببص لقيت عيلين يمكن 16 او 17 سنه و دخلو فى حته ارض تبع الاوقاف ..... انا طلعت اجرى وراهم
طبعا انا رجليا بايظين نتيجه لحادثه قديمه و ده كان السبب اللى خلانى ابطل لعب فولى ... المهم وقعت مره على رجلى اليمين البايظه و قمت جريت شويه .... طبعا بجرى وسط ارض زراعيه ، طين و قنايات و ضلمه و حاجه هباب يعنى ... و هوب وقعت تانى ، و مع كده حصلت واحد فيهم عشان كان اتكعبل ... المهم الواد لف و ضربنى بمطواه فى رجلى اليمين لسوء الحظ ، يعنى مش كفايه هيا بايظه لوحدها ، لا و اتضربت فيها بمطواه كمان ..... طبعا طول ما انا بجرى عمال اقول حرامى و الناس عماله توسع ليهم الطريق ... مش لازم اقول انى ساعه لما اتضربت بالمطواه كنت فقدت اى امل انى احصلهم خلاص لانى كنت بعرج ساعتها
الناس اللى فى الطريق بيسألونى اسئله المعيه بأه ... يقولولى هو فيه ايه ، على اساس انى لما بقول حرامى انا كده بلعب معاهم الكاميرا الخفيه ، و واحد يقولى كنت زعق بصوت عالى شويه عشان الناس تسمع اكتر ، قلتله ما انت سمعت ، عملت ايه يعنى ... قالى انا خفت يضربونى بحاجه ... المهم الناس قالولى انهم شافو العيلين بيدخلو شارع ، دخلت وراهم و لقيت توك توك ، رحت راكبه و قعدت الف فى المنطقه لمده ساعه ... الواد سواق التوك توك قالى ان العيال دى هتتدارى لمده اسبوع على الاقل بس قالى هنفضل نلف عليهم و انت و حظك
و الناس تقولى المحفظه كان فيها فلوس كتير ، طيب كان فيها ورق مهم ، و اسئله من دى كتير ... انا بالنسبه ليا المحفظه بالفلوس فى داهيه ... البطاقه و الرخصه و كارنيه النادى هطلعهم بموجب المحضر ، و كروت الفيزا اتصلت بالبنك فى نفس اليوم و وقفتها ..... الفكره فى الاحساس نفسه ... يعنى انا مش هقول حاسس انى اخدت على قفايا لان ده اللى حصل فعلا .... اتسرقت و اتضربت بمطواه و معرفتش اجيب حقى ، يعنى اخدت على قفايا رسمى
و الناس تقولى مكنش لازم تدخل وراهم الزراعه دى عشان دول ممكن يقتلوك فيها ، و فيه عيال شمامين و حراميه بيبقو فيها و كلام من ده كتير .... يعنى المفروض اتسرق و اقعد اتفرج على اللى سرقنى و انا ساكت ..... و طبعا معرفتش مدى الجبن و مش لاقى وصف تانى اقل من الجبن اللى بأه موجود جوا الناس غير ساعه السرقه .... يعنى اكتشفت انه ناس كتير لو اتحطت فى الموقف ده مش هيجرو ورا العيال ، ده غير انى شفت بعينى ان الناس بتوسع الطريق للعيال دى
طيب انا اللى غلط عشان ابويا ربانى انى مبقاش جبان و انه مبيقبضش الروح غير اللى خالقها ، ولا الناس دى اللى غلط عشان الجبن اللى جواهم ، و اللى هما شايفين انه حكمه مش جبن و بيقولو اديك جريت وراهم نابك ايه غير ان رجلك ورمت و اتعورت و خدت غرزتين فيها
المهم الناس قالتلى ان العيال دى فى الغالب هتاخد كل حاجه من المحفظه و بعد كده هترمى المحفظه فى الشارع و انى ابقى اسأل على المحفظه ...... طبعا انا اتصرفت كل التصرفات القانونيه ... وقفت الكروت ، عملت محضر ، سألت الناس على المحفظه و سبت رقم موبايلى عشان لو لقوها يتصلو بيا
الاهم من كده انى لجأت لحاجه حلوه جدا .... كل منطقه بيبقى فيها ناس عارفه العيال الحراميه ... انا رحت للكبار دول و قلتلهم على اللى حصل و قلتلهم انه ليهم الف جنيه على كل عيل لو جابوهم ... اللى انا بفكر فيه هعمل ايه لو جابوالعيال دى و قالولى تعالى استلمهم
و والنبى محدش يقولى اوديهم القسم لأنه مش هيحصلهم حاجه هناك كبيرهم قلمين و خلصنا على كده ، ده اذا العيال ماتهمونيش انى خاطفهم ... و برضه محدش يقولى ولى الامر و السلطه و تنفيذ العقاب لانى متأكد انه لا ولى الامر ولا السلطه هيعملو حاجه ... انا عايز اقتراحات عمليه مش مجرد كلام نظرى ..... و اللى يرد عليا قبل ما يرد يعرف انه اكتر حاجه وجعانى هيا كرامتى ، يعنى الموضوع مجرد انتقام بحت و ملوش دعوه لا بالحق ولا بالقانون ولا اى حاجه تانى
المهم بالعوده للسؤال الاولانى ... انا عرفت ان الناس لما كانت بتضرب الواد الحرامى فى الغالب كل واحد فيهم اتسرق قبل كده او يعرف حد اتسرق و بيرد فى الحرامى ده اللى معرفش يرده فى الحرامى اللى سرقه ... انا عارف كده لأنى عارف انى لو شفت حرامى فى الشارع و انا شايل شنطه ، هدى الشنطه دى لاى حد و اضرب الواد قلمين و بعدين ارجع اخد الشنطه و امشى فى طريقى
حاجه اخيره عايز اقولها مع ان ملهاش علاقه بالموضوع .... يا جماعه اللى معاه رقم موبايلى يبقى يتصل او يبعت رساله ... و اللى معاه المسنجر يبقى يسبلى اوف لاين عليه او يبعتلى رساله على الايميل .... و اللى معاه الاكونت بتاع الفيس يبقى يبعت رساله او يسبلى كومنت على الوول .... و اللى معوش حاجه يبقى يسبلى تعليق هنا كرساله شخصيه و انا مش هنشرها
ادينى قلت عشان محدش يبقى ليه حجه و يقولى مش عارفين نوصلك ..... سلام

هناك 29 تعليقًا:

فتافيت يقول...

اكتر حاجة ضحكتني في البوست كله.. صاحبنا ابو شنطة حلوة.. موت من الضحك عليه.. ههههههههههههههههه

خد حقك ومعرفش ازاي.. بس ما دخلش الشرطة في اي حاجة .. صدقني هاتتلط فيها :(

بالنسبة بقى للفيسبوك والميل وكل الكلام ده

ابقى ضيف الفيسبوك بتاعي عندك.. هو في المدونة.. اوكشن

ستيتة حسب الله الحمش يقول...

ياأخي انا لا عارفة اتضامن ولا اتخض ولا حاجة خالص
انا قرأت وتنحت وحطيت نفسي في نفس الموقف وحزنت
ما انا لو مكانك كنت ها اجري وراهم
انت جريت علشان والدك الله يرحمه علمك ان ما يقبضش الروح الا اللي خالقها
وانا كنت ها اجري وراهم غشومية ويافرحة امي بيا

يا خسارتنا يا عمرو
يا خسارتنا
الله يرحمنا كنا شعب من الجدعان
بقينا شعب بؤووووووووو
زي اسماعيل ياسين
بتوع كلام مجعلص وخلاص

مش عارفة تاخد حقك إزاي بس رجلك عاملة ايه دلوقت
ده المهم
تحمد ربنا على اللطف
وتحمد ربنا ان المطوة مجتش في بطنك
وتحمد ربنا انك لسه عايش
لأن علشان الإيييييييييمن يتحرك لازم المواطن يا يموت يا يصاب بعاهة مستديمة

تفتكر هم سرقوك فقر
ولا سرقوك حزن من كونهم بلا أهل
ولا سرقوك عدم رباية
ولا سرقوك لأنهم مدمنين
ولا سرقوك علشان عهد المجاعة وليس عام المجاعة؟

لو عرفوا يجيبوهم اعمل فيهم اللي انت عاوزه
بس يمكن هم كمان يقولوا للأخ الرفيق المعلم الكبير ها نديك ألفين ع الراس وتحل عنا وها يجيبوا له الألفين دول في ساعة زمن

سلامتك يا عمرو ألف حمد الله على سلامتك
والله سلامتك وكونك بخير كرم وفضل ونعمة بميت محفظة
وكرامتك مش مفروض توجعك
انت جريت ورا حقك ومقصرتش
المشكلة في
مصريتنا شعبيتنا زلنطحيتنا حماها الله

سمكه واحده يقول...

عسل ياعمرو
ههههههههه
عارف ماما اتعمل فيها نفس موقفك بس الموبايل من يومين بظبط
شايله الشنطه في امان الله ومعاها شنطه فيها حجات جت ست زي الهجمه كده زقتها متعرفش ازاي وقعت منها الشنطه وواحده تايه نزلت مع ماما بتعبي معاها الشنطه وتقولها ياعيني الناس زقوا الست ياحرام والاتنين لخموها وواحده فتحت شنطتها وهي مش حاسه وهوب خدت الموبايل ماما بتقول انا مفيش ثانيه وببص حوليا لقيت الاتنين فص ملح وداب واكتشفت ان الموبايل اتسرق ومشيت ابص ملقتهمش وقعدت يومين اتنين تعيط ونفسيتها تعبانه وانا مستغربه بقي ياماما عشان موبايل ياستي فداكي في ستين دهيه قالتلي لا انتي متحسيش بيها انا حاسه اني كرمتي اتهانت بجد حسيت احساس وحش محدش يحسه غير اللي حصله زي مش مساله موبايل ونفسيتها بجد كانت تعبانه بجد وانا محستش غير دلوقت وانت بتكلم وبتحكي علي موقفك وناس كتير قالولها فداكي افرضي شوفتيهم وجريتي وراهم حد فيهم عملك حاجه ولا ضربوكي ولا ولا
فادكي فداكي
فداك ياعمرو باشا
(.
شوف بجد حاجه تحرق الدم والموضوع ده انتشر سواء سرقه ماديه او معنويه
حاجه تحزن انا من راي لو جابوهوملك امممممممممم
مش عارفه والله بجد مش عارفه
سبني افكر وارجعلك تاني
والف سلامه عليك ياسيدي
هنقول ايه بس مش هنقول مظلموين اصل البلد وحشه والحاله كرب والناس عاطله ومبرشمه دي اخلاق وتربيه من جوه البيت والانسان نفسه

تحياتي

magi يقول...

هو الطبيعى دلوقتى ان الناس لو شافت حرامى بتوسعه مش جبن قد مهو شبه تأكد ان الحرامى معاه سلاح ما ممكن يستخدمه ضدهم
وفعلا ده الى حصل معاك واتعورت وكان ممكن يعورك جامد لا قدر الله
ساعتها هتبقى استفدت ايه
انا رأيى لو جبت العيال دى توديهم القسم وتجيب ناس من الى كانو موجودين وقتها يشهدو معاك

فتاه من الصعيد يقول...

لا بلاش انتقام ... لان انت عملت اللي عليك وهما عملوا زي ماكل حرامي بيعمل ..

وعلى فكره ده تهور انك تجري ورا العيال دي ... لان اكيد معاهم سلاح ابيض وكويس انهم موش عيال تشرد وألا كانوا ضربوك ضربه قاتله لالا قدر الله

وعموما خساره الفلوس ... وبلاش الانتقام ده :)

تحياتي

مي يقول...

الف الف سلامة عليك ياعمور
والحمد لله انك طلعت من الحكاية دى سليم
بس دول عيال فاقدين يعنى بايعين نفسهم واحمد ربنا ان المطوة جت كده ربنا ستر الحمد لله
مكنتش جريت ولا تدور عليهم دول شوية صيع مدمنين ولو يعنى لاقيتهم انت يابنى مستغنى عن نفسك طب احنا عايزينك

الحمد لله انك كويس والف سلامة عليك وفداك مليون حاجة

Haytham Alsayes يقول...

السلام عليكم

تشى الف سلامة عليك الحمد لله اللي جات علي مطوة في الرجل مش حاجة تانية لاقدر الله ربنا ستر

اما بأه عن الانتقام فانك اللي عملته في الشرطة ولا يعمل حاجة العالم دى اساسا مش فاضية لنا

المهم انت رحت لكبرات المنطقة ولو جابوهم انت تعمل ايه؟

الصراحة مش عارف اقولك ايه بس ممكن تعمل زي ابو شنطة بس عاقولك دة برده مش عينفع الحقيقة انا مش عارف اتضامن معاك في حل المشكلة واسف للحصلك زعلت بجد

الف لا بأس عليك وابقي طمني علي صحتك وعملت ايه معاهم

مع السلامة

BaTaBeeT يقول...

رابطينه من رقبته بحبل و شابكين الحبل فى عمود نور ..

da begad ??? da beye7sal fi bani2admen begad 7ata law 7aramy?

el7amdulelah enak saleem w en el matwa gat 3la ad reglak... fi bya7'doha fi weshohom... aw aswa2 b2a b esabat gamda

لفكره فى الاحساس نفسه
sa7... toz fil flos wel wara2... el e7sas...

7amdela 3la salamtak :)

زهور الامل يقول...

الف سلامة عليك يا عمرو
والله انا زعلت علشانك
الف سلامة على رجلك
بس انا لو منك مش هجري وراهم علشان دول عيال مجرمين وممكن يقتلوك او يبهدلوك
وده مش اسمه جبن ولا حاجة لانك بتحافظ على نفسك
هما اللي الجبن ماليهم لانهم بيخطفوا ويجروا ومتسلحين ورا سلاح او حاجة تحميهم وانت اعزل

انا لو منك اشوف مجموعة من اصحابي ولما الناس يجيبولك العيال دول حاول تستفرد بيهم في مكان وتضربهم علقة يحلفوا بيها العمر كله لان القسم مش هيجيبلك حقك

اصلا السرقة زادت جدا اليومين دول والواحد بقة ماشي يتلفت وراه
وكمان تعاطي المخدرات زاد جدا والمعظم بقى ماشي مسطول وشكله يخوف

وبعد كدة خلي بالك من نفسك

والف سلامة عليك مرة تانية

صفــــــاء يقول...

لا بجد انا اتصدمت لما قولت انك اتصبت بمطوة
الف سلامه عليك دة أولا
ومش هقولك بقى ثانيا فداك
لا مش فداك يا معلم
هات العيال دى
ولو هتدفع عليهم قدهم
هاتهم من قفاهم واعمل اللى يقدرك عليه ربنا
كون ان الناس بقت جبانه ... فهى بقت جبانه جدااا ومايقولكش كدة غير بنت
زمان كانت بس واحدة تقول واحد عاكسنى وتلاقى الدنيا كلها عليه
دلوقت لو اغتصبوها فى الشارع هتلاقى اللى هيعمل مش سامع ولا شايف
كله بيوسع الطريق وكله بيبعد عن الشر ويغنى له
الف سلامه عليك كمان مرة والحمدلله انك بخير

سارة نجاتى يقول...

سلامتك يا عمرو يا رب تكون أحسن دلوقتى

بس أنت مالك بتحكى على حوار المطوة ده كأنه بيحصلك كل يوم يعنى ههههههه
أنا مختلفة مع اللى انت عملته تماما

طبعا لما حد يعتدى عليمك طبيعى أنك ترد عليه
بس لا ترموا أنفسكم فى التهلكة و يعنى هما اتنين و انت لوحدك هما معاهم سلاح و أنت لأ , هم مبرشمين و أنت لأ
هما رجليهم سليمة و انت لا
هما طالعين بيجروا فى منطقة عارفنها كويس و انت لأ
هما عارفين أن الناس بقيت تنحة و أن اسطورة ملوك الجدعنة و دى حاجة فى طبعهم انتهت و أنت لسه حاطط امال عالية ههههههههههه
يبقى بالمنطق كده .. كان لازم مجريش وراهم
أنا اعرف ناس المطوة دى جات فى رقبتهم و ماتوا ..
لكن لو انت متأكد أنك كنت ح تجيبهم بحكم تكافؤ القوة خلاص
يعنى فاكر الموقف اللى انا حكيت عليه فى البلوج بتاع الشاب الامور المتحرش ؟؟
أنا طلعت أجرى وراه و قلت حراااااااامى عشان الناس تجيبه ( افتكرت يعنى ان لما أقول حرامى حد ح يعمله حاجة ) الناس وقفت تتفرج عليا و جه واحد يعرفنى بنفسه هههههه ويسألنى انى فى كلية ايه وبتاع ههههههه
أنا طلعت اجرى وراه بسبب غريزى دى نقطة
و لأنى كنت عارفه أنه احتمال كبير يكون مش مسلح لان شكله ابن ناس و باين عليه فايق مش تحت تأثير دراجز مثلا

أنا بقولك كده عشان متندفعش و تضيع نفسك أونطة يا عمرو ابنك عايزك ههههه
و عروسة ابنك طبعا اللى هى انا يعنى

ما علينا
بالنسبة للولاد .. لازم تسلمهم للبوليس و تعمل محاضر رسمية
لو عملت محضر رسمى و شبرقت القسم بشوية فلوس ح يظبطوك .. و ح تبقى قضية رسمى و كل حاجة ..
أو تقدمهم لمصحة علاج ادمان بالعافية ههههههه ده لو عايز تعمل حاجة ذات طابع تأديبى شوية ..بس ده حل خيالى برده
البوليس طبعا ده الطبيعى يعنى يا عمرو

ستيتة حسب الله الحمش يقول...

وبعدين يا جبيصي يابني
مختفي ليه قلقتني عليك
طمني لو سمحت بميل او تعليق او اللي تقول عليه
طمني على رجلك وصحتك وفداك اي حاجة يا عمرو
سلاموز يا بن اخويا العزيز جدا

Zika يقول...

أنا رايي لو مسكت العيال دي تحلقلهم اقرع
وتاكلهم علقه حلوه
وتسيبهم للحكومه ..مش في القسم في الشارع
وفاقرب فرصه
سافر ..عارف هاتوحشني بس سافر عشان انا زهقتلك

العيسوى الصغير يقول...

اتا اشوف انى اموت الاول وبعدها اتسرق

*** حور- نور*** يقول...

عارف اللى يغيظ فى الموضوع إن الناس هى فعلا اللى بتوسعلهم الطريق وخايفين مهم ميعرفوش يعنى وحدة ومالكش حق تلومهم
معلش بقى ربنا يعوض عليك وكويس انها جات على قد كده
دا أنا حتى قريب كنت عاملة حادثة والعربية اللى كنت راكباها مكنش فيها حد سليم ودخلنا المستشفى مغمى علينا خرجنا منها بدون اثبات شخصية حتى
الواحد مش عارف يعمل ايه بجد ربنا يسامحهم

Che يقول...

فتافيت
والله انا كل ما افتكره اضحك برضه ... بس فى الغالب حاليا هعمل زيه :)
نورتينى يا فتافيت

Che يقول...

العمه ستيته
والله يا عمه كل اللى انتى قلتيه صح ... الحاجه اللى مش عجبانى هيا ردود الافعال اللى بتحصل بعد ما الناس تعرف ... مش عارف انا الغلط ولا الصح
منورانى دايمه يا عمه

Che يقول...

سمكه
الف سلامه على ماما و بالنسبه للرد على السؤال اللى انا سألته فانا مستنى ردك اهو ... فكرى على اقل من مهلك
نورتينى يا سمكه

Che يقول...

ماجى
الاقتراح بتاع القسم صعب التنفيذ لكذا نقطه .... اهمهم انك مش هتلاقى حد يشهد معاكى عشان احنا من جوانا جبن فظيع من ناحيه الاقسام و اى حاجه فيها حكومه
فاللى هيحصل ان العيال دى هتقول انى خاطفهم .. و بدل ما اكون انا صاحب حق هبقى لابس قضيه
نورتينى يا ماجى

Che يقول...

فتاه
والله نفسى بجد ما افكرش فى الانتقام بس بجد مش قادر ... و بالنسبه لأنى جريت وراهم فده كان رد فعل منعكس مش اكتر .. يمكن لو كنت فكرت ماكنتش هجرى وراهم
نورتينى يا فتاه

Che يقول...

مى
الله يسلمك و زى ما بيقولو عمر الشقى بقى
بالنسبه لأنى جريت وراهم فدى وجهه نظرك و وجهه نظر ناس كتير بس لسوء الحظ انا مش منهم
منورانى على طول يا مى

Che يقول...

هيثم
الله يسلمك يا باشا .... طبعا اللى انت بتقوله على اللى حصل فى القسم صح جدا و مسيرى اقولك ايه اللى حصل فى القسم يوم ما رحت اعمل بلاغ
مستنى تفكيرك و مستنى اعرف الرد
نورتنى يا هيثم

Che يقول...

بطابيط
على فكره ده بيحصل و بيحصل اكتر منه والله ... و فكره انه بنى ادم حتى لو حرامى انا موافق عليها ... بس ممكن تعتبرى اللى بيحصل ده نوع من انواع العداله الاجتماعيه لأنه مفيش قانون يحميكى فى البلد حتى لو العيال دى اتعملها قضيه لأنهم فى الغالب بياخدو 3 شهور و بيطلعو تانى يسرقو تانى و تالت
منورانى يا بطوطه

Che يقول...

زهور
انا اصلا مستنى ده يحصل ان شاء الله عشان اشوف هعمل ايه فى العيال دى
منورانى يا زهور

Che يقول...

صفاء
واحده من القلائل اللى قالو اللى انتى قلتى عليه .... ادعيلى بس انا الاقيهم و انا ادفع عليهم وزنهم
منورانى دايما يا صفاء

Che يقول...

ساره
انا عايز اقولك كل ما بفتكر الموقف بتاع الامور اللى متحرش ده بتضايق والله و بقعد اشتم و كلها شتايم للاسف الرقابه مش هتوافق عليها
بس عايز اقولك حاجه ... انا برضه لما جريت وراهم جريت وراهم برد فعل غريزى و مافكرتش فى كل اللى الاسباب دى ساعتها ... اكيد فكرت فيها بعدها و فى اسباب اكتر منها كمان
و بالنسبه لنقطه القسم و كده .. الحل ده يعتبر خيالى ... هو الحل الصح ، بس مش فى بلدنا والله يا ساره
منورانى على طول يا ساره

Che يقول...

زيكا
والله انت حبيبى و دايما بتفكر نفس الافكار بتاعتى و بتلهمنى بأفكار جديده
صدقنى يا زيكا انا لغايه دلوقتى متردد اسافر ولا لا
و انت واحشنى و انا هنا لسه ماسفرتش
حبيب قلبى والله يا زيكا

Che يقول...

العيسوى الصغير
كلامك صح ... بس لو اتعرضت لموقف سرقه و النبى متنساش تحكيلى عليه عشان اشوفك مت الاول ولا اتسرقت
نورتنى يا باشا

Che يقول...

حور
اهم حاجه انك سليمه ... و بالنسبه للبلد فدى بلدنا ، و القضاء بالقدر جزء من الايمان
نورتينى يا حور