الخميس، 2 أبريل 2009

خمسه جد

اظن ان دى اول مره اكتب موضوع جد أوى فى المدونه دى .. المهم سيبنا من المقدمات
هاحكى على حاجه صغيرة و شخصيه مع انى مش باميل لمناقشه اى حاجه شخصيه سواء ليا او لاى شخص تانى ... من كام سنه وقعت فى مشكله كبيرة و ماكنتش عارف اخرج منها ازاى ، انما ربنا بعتلى اللى ساعدنى و خرجنى من مشكلتى و ماكنش يعرفنى .. وبعد الشكر كل اللى طلبه منى انى لو عايز ارد المعروف بتاعه انى اساعد اى حد يكون فى مشكله من غير ماكون مستنى اى حاجه مقابل كده
المهم النهارده شفت الشخص ده .. شفته بعد سنين و شفته فى بلد غير بلدنا و بعد السلامات و كده سألنى اذا كنت ساعدت اى حد ولا لا ... الحق انى احترت ارد عليه اقول ايه ، كان سهل اكدب عليه .. بس اكدب على ربنا ازاى .. المهم قلتله انى ماسعدتش اى حد و ماكنتش مهتم بحد اغلب الوقت غير نفسى
الشخص ده حملنى امانه انى اساعد اى حد و قالى ان اللى بيعمل الخير و بيرميه البحر الخير ده بيرجعله تانى بس اكتر
قعدت افكر مالقتش طريقه اساعد بيها اى حد خصوصا انى مش فى بلدى و معرفش حد فى البلد اللى انا فيها .. و فكرت انى الطريقه الوحيده اللى اقدر اساعد الناس بيها هى النت ..... اغلب المشاكل بتاعتنا اللى مش بنلاقيلها حل مابنسألش حد لاننا فى الغالب بنتكسف من الناس اللى نعرفها .. بنتكسف لان المشكله ساعات بتكون محرجه و ساعات عشان بنخاف صورتنا تتهز فى عيون اللى يعرفونا
انا عملت جروب على الفيس بوك و هاسيب عنوانه ، و كمان هاسيب اميلى عشان اللى مش عايز يدخل على الفيس بوك ، و كمان اى حد ممكن يبعت اللى عايزه فى تعليق و كده كده التعليقات عندى عاملها موديريشن يعنى محدش هيشوف اللى هيتبعت
حاجه كمان انا الاسم المشهور بيه هو عمرو تشى او تشى على طول مش عمرو خالد يعنى مش هاعمل واعظ لانى عن نفسى عملت بلاوى كتير .. و كمان انا مش هاقول انى اسامه منير و هاقعد احل كل المشاكل ... الفكرة انى عديت بأغلب المشاكل اللى الشباب و الناس الكبيره شويه عدوا بيها عشان انا كانت المشاكل هوايتى انى ادخل فيها بس برضه انا مش كلى المعرفه يعنى فى حاجات كتير ماعرفهاش ... اى حد يقدر يساعد يساعد يا جماعه ، و اللى عنده اقتراحات حوالين ازاى نقدر نساعد بعض يقولهالنا ، و اللى عنده مشكله عدى بيها و يقدر يساعد اى حد تانى يا ريت يعمل كده .. فى الاخر انا مش متوقع استجابه او متوقعها ضعيفه لدرجه لا تذكر ، بس عشان اديت الامانه اللى عليا
عنوان الجروب على الفيس بوك
http://www.facebook.com/group.php?gid=85430985029
و الايميل بتاعى
a_m_e_81@yahoo.com
و مستنى رأيكوا حوالين الموضوع ده

هناك 20 تعليقًا:

fnoonh يقول...

انا اول تعليق ماليش دعوة
فنونةوبس
اوك

fnoonh يقول...

نعلق بقى

موضوع رائع رائع بس ياريت بجد نحل فيه مشاكل ولو عندنا علم نقدمه اما لو ماعندناش نقول الله اعلم
بس بجد موضوع جميل وربنا يعينك ويقدرك تكمله ويقدرك على فعل الخير ديما ويرشدك للطريق الصواب ويبعد عنك كل المشاكل
ويحسن خاتمتنا ياااااااااااااارب
تقبل خالص تحياتي

Che يقول...

فنونه
والله انا نفسى فى كده ، بس السبب اللى مخلينى مش متفائل انى اظن انه محدش هيكون مشاكل او جايز الناس هتتكسف مش عارف
يمكن الناس تتشجع لو ابتديت بنفسى

Unknown يقول...

:)

فكره حلوه برضو
وما تخاف الناس بس يكون عندها مشكله بتصير بدها من طوب الأرض يحلها- عـ سلامتك طبعا:)

بس تعرف ايش اللي لفت نظري؟
المساعده يا عمرو مش ضروري تنطلب؛ ممكن تكون شفاف وتحس انو البني آدم بده اللي يساعده وتساعد من حالك:)

الموضوع بس بدو شوية تركيز:)

Che يقول...

مياسى القمر
كلامك صح ، بس شويه تركيز ازاى

سارة نجاتى يقول...

احساس حلو اوى يا عمرو بجد

بس أنت و هو الموضوع معكوس معاكو ليه ؟
ممكن بعد عشرين سنة لو ربنا اداك طولت العمر تقابل حد و تكون انت فى موقع تقدر تساعد منه و تساعده
يعنى المواقف اللى تقدر تساعد فيها بجد ح تتحدف عليك يعنى ح تتحدف عليك
س يمكن مش دلوقتى
و ح تقابل الشخص اللى لازم ترد فى الدين غصب عنك بس يمكن بعدين

و بعدين أن معيا دور برد

و مكسلة أطلب رنا صاحبتى

بليز شوف حل للبرد

و تطلب رنا تقولها على الميعاد اللى اتفقوا عليه بكره هههههههه

Che يقول...

سارة
مش عارف الموقف حصل بالطريقه دى ازاى .. المهم انه حصل
المهم بخصوص مشكلتك بما انها اول مشكله استقبلها فلازم احتفل بيها .. طبعا مش قصدى انى فرحان فيكى عشان عندك مشكله ... ماعلينا
البرد تقدرى تشربى برتقان كتير لو انتى مش من هواه انك تاكليه زيى
و بالنسبه لموضوع رنا فانا شايف انك ممكن تكلميها بنفسك عشان حل اى مشكله بيبتدى بالمواجهه ... ههههههه
يا رب اكون قدرت افيدك
نورتينى يا جميل

صمت المشاعر يقول...

فكره جميله ومفيده كتير

ربنا يارب يقدرك وتقدر تحل مشاكل الناس اللي هيحكوها

دمت بكل خير

اسماء عوني يقول...

كنت عاوزه ابقي اول تعليق بس مالحقتش
بس انا بقيت اول ميمبر في الجروب
الدنيا هناك فاضيه لسه
يعني انا هناك انا وانت والشيطان ههههههههههههههههههههههههه
مساء الخير
فينك كده مش بتظهر ليه؟

غير معرف يقول...

الموضوع جميل والفكرة اجمل بس نصيحة منى ابعد عن المشاكل الزمن دا لو عندك مشكلة حاول تحلعا بنفسك واقولك ماينوب المخلص الا تقطيع هدومه
تحياتي
medus
http://illupo77.blogspot.com

MaNoOoSh يقول...

الفكرة دى كنت شفتها فى فيلم قبل كدة اسمة
pay it forward
وقعدت اعيط عياط لما عنيا ورمت
بس هى فكرة جميلة جداااااا
وياريت فعلا انك تقدر تطبقها وكمان حاجة هتخرجك من الوحدة ولو شوية بسيطة
بالتوفيق يارب

Che يقول...

صمت المشاعر
يارب نقدر نساعد ولو واحد بس

Che يقول...

صمت المشاعر
نورتينى

Che يقول...

اسماء
ربنا يخليكى يا سمسم و يا متشكرين بنماسبه انك اول عضوه فى الجروب .. وبالنسبه للشيطان فده حبيبى ..ههههه
وانا فى الدنيا
نورتينى

Che يقول...

medus
انا هاحاول ماعملش بالنصيحه عشان انا عايز ارد الامانه
نورتنى

Che يقول...

منوش
الفيلم ده تقريبا بتاع كيفن سباسى و هيلين هنت لو ذاكرتى لسه شغاله
و يا رب تقدرى تساعدينا انتى كمان
نورتينى يا جميل

Bant EL7ag Dracula يقول...

عجبنى الفكـــــــــره جدا على فكره وربنا بوفقك وتلقى الا يستاهل تقف جنبو

وربنا معاك

Magi Mostafa يقول...

فكره هايله
انا بعمل نفس الحكايه تقريبا من زمان
بس الموضوع صعب جدا على فكره

أسما يقول...

بص هي الفكرة جامدة، بس انا بقي مش عايزة اطرح مشاكلي، انا عايزة اساعد، ممكن اساعدك ف حل المشاكل اللي تجيلك، ما تستهونش بيا ، انا قديمة زيك ف موضوع المشاكل ده. انا ف الخدمة

Che يقول...

lsodle
يا فندم انا يشرفنى ... و كمان لو عندك اى مقترحات ممكن تشاركينا فيها ، و عندك ايميلى و جروب الفيس بوك
بس انتى ليكى كتير مش بتنشرى حاجه جديده ليه
نورتينى