الاثنين، 3 يناير 2011

راس السنة الحزين

الصبح انجى كاتبه على الفيس ازاى هتعيد على عادل بعد الانفجارات اللى حصلت فى ليلة راس السنة
العصر امى بتسألنى ازاى هتعيد على دكتورة سامية بعد الانفجارات اللى حصلت فى ليلة راس السنة
بليل نادر بيقولى هو احنا هنتصل ازاى نعيد على امير بعد الانفجارات اللى حصلت فى ليلة راس السنة
اتسألت نفس السؤال من 3 اشخاص ملهمش علاقة ببعض و فى كل مرة مش بعرف الاقى الاجابة ... يعنى انا لغايه دلوقتى مقلتش لعادل كل سنة و انت طيب و مظنش انى هقولهاله خالص ، السنة باينة من اولها اهو
و لما نادر سألنى قلتله انى اتصلت بأمير يوم الاربع و سلمت عليه ، و غالبا برضه مش هقوله كل سنة و انت طيب لنفس السبب المذكور اعلاه

ركبت مع سواق تاكسى و سألنى على رأيى فى اللى حصل ، و قلتله ان اللى حصل ده غباء و ملوش اى مبرر و اللى عمل كده المفروض يتحاكم ادام محكمة عسكرية و ياخد حكم بالاعدام و يتم اعدامه بأن كل واحد يتف عليه لغايه ما نموته
سواق التاكسى قالى انه مسيحى ، و قالى ان اللى حصل السنة دى حصل السنة اللى فاتت ، و قالى هو اتكتب علينا اننا منفرحش ( قصده كمسيحين ) .... و قالى حاجة غريبة جدا و انا بعترف انى مش عندى فكرة كفاية عن الموضوع ، ان العيال اللى اتمسكوا فى حادثة نجع حمادى لغاية دلوقتى لسه مش اتحكم عليهم بحاجة
آخر حاجة قالهالى قبل ما انزل و المرارة بتنقط من صوته ان المسيحين حاسين ان البلد و الحكومه و الامن ضدهم ..... قلتله ضدنا كلنا يا ابن عمى مش ضدكم انتوا بس ( كنت زعلان من نفسى أوى عشان انا عمرى ما قسمت البلد لأحنا و هما ) و نزلت من التاكسى

طول عمرى بتكلم على الازدواجية الموجودة عندنا ، يمكن عشان كده مش استغربت لما لقيت شخص كان قالى على المسيحين كفار و بعد الانفجارات لقيته بيتعاطف معاهم ... هو انا ممكن اتعاطف مع واحد كافر ؟؟؟؟؟

طول عمرى بحب اسكندرية اكتر من اى حتة فى مصر ، بس مش عارف لما انزلها المرة الجاية هتبقى هى هى نفس الاسكندرية اللى انا عارفها ولا هلاقيها اتغيرت

انا كل مرة آخر حاجة بكتبها بتكون كلمة سلام ، انما انا حاسس انها المرة دى مش هيكون ليها محل من الاعراب ، عشان كده البوست خلص لغاية هنا

هناك 7 تعليقات:

Tears يقول...

النظام ضدنا كلنا و فعلا النائب عبد الرحيم الغول اللى البلطجية بتوعوا تورطوا فى موضوع نجع حمادى لم يحكم عليهم بل ان الحزب الوطنى زور و نجه النائب ده تانى فى الانتخابات فى استهزاء صارخ بمشاعر و دماء المصريين

محتاجين رئيس بيحب مصر و عنده شخصية

adel يقول...

انتي وانجي وزيكا وليكتر وكل حد

كل سنة واحنا طيبين ياعمرو

Che يقول...

Tears
احنا محتاجين قبل الرئيس اللى بيحب مصر ، محتاجين مصر نفسها
منورانى دايما يا تيرز

Che يقول...

دولا
يا بنى شيل الحرف الزياده فى كلمه انت دى
يعنى على الفيس كتبتها و قلنا ماشى
جاى تكتبها هنا كمان
انت مصمم بأه :))
كل سنة و احنا طيبين يا دولا

sony2000 يقول...

بجد خيفه من اللي جاي اوي
ياتري كل دا
بعدوا ايه؟

Polka Dotted يقول...

kolo byakol f ba3do now...

rabena yostor !!!

kolo bey7'abat f ba3do b montaha elet el adab

ya gama3a e7na e7'wat w etrabena keda !!

mesh ana eli 3amalt keda so don't attack me !!!

غير معرف يقول...

ربنا يستر و ينجينا لكني الان متفائلة اشعر اننا لم نعد مذنبون
اخيرا تحركنا
لكن شوية خائفة

تحياتي اول مرور
موديل
صاحبة مدونة
عايزة اخس