السبت، 5 فبراير، 2011

مش هتكلم

مش هتكلم عن اللى حصل من يوم 25 يناير لغايه النهاردة و لسه هيحصل لأنه لسه مش خلص و الوقت هيجى و كل واحد هيتكلم و هيقول و هيكتب اللى شافه
مش هتكلم عن الناس اللى فضلت قاعدة فى بيوتها و قالوا احنا معاكوا اول يومين و بعد كده قعدوا يشتموا فينا و يقولولنا هتخربوا البلد
مش هتكلم على الناس اللى بتقول نعم لمبارك ، ولا هتكلم عن اللى بيقولوا احنا مش مع مبارك بس عايزينه يكمل ولايته ( زى ما هو قال فى خطابه ) و احنا معاكوا
مش هتكلم على الناس اللى كل يوم بحال ، امبارح مع الشباب ، النهاردة مع النظام ، و بكرة مع اللى هيكسب
مش هتكلم عن البنت اللى كلمتنى و قالتلى احنا بنكرهكوا و انتوا وقفتوا حال البلد ، و قالتلى ان اللى ضربوكوا فى ميدان التحرير كانوا مش بلطجية و حتى لو كانوا بلطجية احنا شمتانين فيكوا ، و بعد كده قالت اكتر كلمة وجعتنى لما قالت حسبى الله و نعم الوكيل فيكوا
مش هتكلم على الناس اللى بتقول احنا كل اللى عايزينه الاستقرار يرجع تانى و نرجع شغلنا و نرجع نعيش حياتنا فى امان زى ما كنا عايشين فى امان
مش هتكلم على صاحبى محمد اسامه اللى اعتقل فى ميدان التحرير يوم 25 و خرج بعدها بيومين و هو بيقول انه عيط لما سمع الناس اللى هو اتحبس عشانها بتشتمه
مش هتكلم على كل مواد الدستور اللى كل الناس فى مصر فجأة اصبحوا خبراء دستوريين و بيتكلموا عليه زى ما يكونوا قبل يوم 25 كانوا عارفين انه كان فيه حاجه فى مصر اصلا اسمها دستور
مش هتكلم على انك لما بتنزل تمشى فى مظاهرة حتى لو تحت بيتكو يبقى فيه احتمال انك هتموت و مش هترجع بيتكو
مش هتكلم على ان المصريين لأول مرة هما الفعل مش رد الفعل ، و كل التنازلات اللى مبارك بيقدمها بتدل على كده
مش هتكلم على اننا لأول مرة بنقول اللى احنا عايزينه و مش خايفين من اللى هيحصل ، سواء حد قبض علينا او حتى موتنا
مش هتكلم على الفيديو بتاع "الراجل " و حطوا الف خط تحت كلمة راجل اللى وقف يوم الاربع قدام المدرعة اللى كانت بترش ميه على الناس ، و على انى لما شفت الفيديو ده عيطت و افتكرت الفيديو المشهور بتاع الراجل اللى كل العالم سماه " المتظاهر المجهول " اللى وقف قدام صف دبابات فى الصين
مش هتكلم اننا من يوم 25 يناير مفيش حاجه اسمها مسلم و مسيحى ، فيه مصرى و بس
مش هتكلم على المسيحين اللى بيحوطوا المسلمين و هما بيصلوا و المسلمين اللى بكرة هيحوطوا المسيحين و هما بيصلوا فى قداس الاحد فى ميدان التحرير
مش هتكلم على ان اللى حصل من يوم 25 يناير خلانى عرفت ناس كتير على حقيقتها ، و خلانى اعرف انى لو مت بكرة فيه رجالة هتجيبلى حقى زى على سبيل المثال لا الحصر زيكا و عادل و محمد اسامه و جمال و مصطفى و ياسمين و ناس تانيه كتير و محدش يزعل لو مش افتكرت اسمه
مش هتكلم على الناس الاغبيا اللى مشيلين الليلة للشباب اللى فى التحرير
مش هتكلم على واحدة من اهلى قالت انها نفسها يبقى معاها رشاش و تنزل تموت كل اللى فى التحرير عشان البلد تستريح منهم و ترجع تانى مصر اللى تعرفها
مش هتكلم على الناس اللى قالت الشباب اللى فى وسط البلد بياكلوا كنتاكى و بياخدوا خمسين جنيه فى اليوم و كانوا بياخدوا اجندات لغايه ما الاجندات خلصت
مش هتكلم على ميدان التحرير اللى فيه دلوقتى امريكان و يهود و اخوان و حماس و عملا و جواسيس ، فيه كل الناس بس مفيهوش مصريين
مش هتكلم على اللى فاكريين الشباب المصرى بجد اللى فى ميدان التحرير موافق او ممكن يوافق على ان حد غيره هو اللى يحددله هو عايز ايه ، سواء كان الحد ده امريكان او دول اتحاد اوروبى او حتى العفريت الازرق نفسه
مش هتكلم على التليفزيون المصرى العظيم اللى النهاردة رئيسه اسامه الشيخ طلع مستقيل منه من يوم الخميس و نائب قناة النيل استقالت و مذيعين استقالوا عشان مش عايزين يكدبوا
مش هتكلم على المفتى ولا شيخ الازهر ولا البابا شنودة اللى قالوا سواء تصريحا او تلميحا انهم مع مبارك و انهم عايزين الشباب دول يرجعوا بيوتهم
مش هتكلم على كل الناس اللى حاولت تسرق اللى الشباب عمله و تنسبه ليهم و الشباب دول نفسهم اللى قالوا الناس دى مش بتمثلنا
مش هتكلم لا على الخيل ولا الجمال ولا عربيات الاسعاف ولا عربيات الامن المركزى ولا المدرعات اللى داست على الناس و مشيوا فوقهم
مش هتكلم على خراطيم المية اللى اترشت على الناس اللى كانت بتصلى ، يمكن عشان حسوا انهم مش متوضيين فحبوا يخلوهم بيصلوا على وضوء
مش هتكلم على الناس اللى بتاخد الكلام كوبى و باست و تحطه من غير ما تفهمه ولا تحاول تتأكد انه صح ولا غلط
مش هتكلم على الناس اللى بتتكلم على ميدان التحرير و الناس اللى فيه من غير ما ينزلوا زى ما يكون ميدان التحرير ده محتاج تأشيرة عشان يدخلوه
انا بس هتكلم على حاجتين اتنين
الحاجة الاولانية انه بعد ما اللى بيحصل ده نتيجته تبان سواء الثورة دى نجحت او فشلت يفضلوا على مواقفهم مش يغيروها
يعنى اللى قال انه ضدها يفضل ضدها على طول ، و اللى قال انه معاها يفضل معاها على طول
و الحاجة التانية ان الناس اللى بتدعى على الشباب اللى فى ميدان التحرير يدعولهم ان ربنا يثبتهم لو كانوا صح ، او يهديهم للصح لو كانوا غلط
يا ريت ندعى للى ماتوا ، مش هقول نقرا الفاتحة او نصلى عليهم فى قداس عشان زى ما قلت كلنا دلوقتى مصريين مش مسلمين و مسيحين
آخر حاجة قبل ما امشى هقول حاجة واحدة بس
اللهم ارنا الحق حقا و ارزقنا اتباعه ، و ارنا الباطل باطل و ارزقنا اجتنابه

هناك 5 تعليقات:

Tears يقول...

كلامك رائع و حاسه بحسرتك من الناس اياهم عشان انا برضة حسيت بكده لما هجموا عليه زى التتار بس ارتحت شوية لما بدات الاقى ناس بتكلم زيي

متفقة معاك فى كل حرف

همه كانوا عايزين استقرار فى اشارات المرور و طابور العيش و على القهاوى مع الشباب العاطل و فى امن الدولة و المعتقلات و التعذيب و الذل و الريس اللى قاعد بانتخابات مزوره و بيحتفل ببرلمان مزور و يقول خليهم يتسلوا

كل اللى ضد الثورة مش فاهم يعنى ايه ثورة و كرامة و حرية لانه اتربى على الذل و الخنوع و الضعف و ماقدرش لسه يتخلص منه

سيبك منهم لان النخبة هى اللى لازم تقود دايما مش العكس

يحمي ربنا شباب مصر

فاتيما يقول...

زى تيرز هقولك يا عمرو

الناس اللى دماغها صح هيا اللى بتبان صح بس المسألة محتاجة وقت
انا عارفة ان لغاية الوقت دا ما ييجى فيه الف وجع
بس اللى نزلت عشانها ..تستاهله
انا عارفة انك مش منتظرنى اقولك كدا
بس هقوله برضو


ربنا يثبت قلبك كمان وكمان
وانا فخورة انى عرفتك يا عمرو
بجد
انا بتباهى بيكم يا عيال
ل
يا رجالة
بتباهى وانا بدخل ف مناقشات جدلية عقيمة مع الغير مندسين على رأى بساكيتو ..واقولهم انى اعرف شباب زى الورد نزلوا و بيدفعوا تمن الحرية بالنيابة عننا كلنا

ربنا يحفظكم
وينصركم
ويثبتكم

:)

;كارولين فاروق يقول...

السلام عليكم ورحمه الله وبركاته
لقد عبرت يا سيدي بكل لباقه عما يدور
حولنا من اراء مختلفه متخبطه معكوسه
وانا يا سيدي وبصراحه افتخر بأولادنا وما حققوه من تغييرات يشهد لها العالم كله ولكن انا علي موقفي تجاه الاستقرار والهدوء بعدما علمت برحيل الريس
والله مع مصر

يوميات شاب منوفى يقول...

ابكي يا أهبل يا عبيط ياللي بكيت على فرعون وصدقته إنه بيحب الوطن واعرف إنه سرق منك ومن الوطن..
70 مليار دولار
والي مش عارف يساووا كام دول بالجنية يضرب نفسه خمس تقلام يبقى المجموع
350 مليار جني يعني جنيه
واللي ما يعرفش يعني ايه مليار و يطلعوا كام يضرب نفسه ألف برطوشة أديمة يبقوا
350 ألف مليون جنيه !!!!
وابكي يا أهبل يا عبيط وبرياله على كل يوم من 30 سنة فاتوا عليك وكل يوم بتتقلب وبتتنهب في حب مصر
وابكي يا أهبل ويا عبيط وبرياله على كل واحد مات من غير علاج أو سرق أو قتل أو كفر عشان معهوش حتى الكفاف
وابكي على 40% تحت خط الفقر مش لاقين حتى دولار
وابكي على نص شعبك أمي وجاهل ومبيعرفش يفك الخط و يقرا زيك الجرنال
وميعرفش يعد من واحد لعشرة ولا يعرفش الدولار من الزرار
وابكي على بلد نهبوها ونهشوها الديابة وقطعوا توبها حتت وسففوها التراب واغتصبوا أرضها و عرضها وضحكوا من صراخها ورعبها وسخروا من دموعها وقهرها
(خليهم يتسلوا !!!)
وابكي على يوم ميلادك ويوم مماتك وانت عايش ذليل مطاطي بتنضرب على قفاك كل ثانية في عمر أجلك ومن أجلك أنت بيضربوك بالقفا ليل نهار !!
وابكي يا اهبل يا عبيط وبرياله وانت ماسك بتلابيبه وتقوله متسبنيش يا فرعوني الوفي المحب المخلص للوطن يا كبير يا بويا وأمي وخالتي وكل عليتي ورمز بلدي يا طيار
يا بطل الأبطال فداك أولادي و أحفادي وقفاهم قفايا وعرضهم عرضي , كمل جميلك يا أمني وربي وصنمي ومتسيبهمش لاحسن نضيع ومنلقيش اللقمة تاني ,
كمل جميلك ياريس وورث عرشك وجبروتك وجنودك بملتوفك وجمالك وحميرك وبغالك وبلطجية ديولك بمطاويهم وسيوفهم وسكاكينهم عشان أموت وأنا مطمن عليهم وعلى قفاهم وعرضهم ,
سأظل دايما مفعول بي لأجلك أنت
سأظل دايما أبوس القدم وأبدي الندم على غلطتي في حق الصنم
ابكي يا اهبل يا عبيط وبرياله واتفرج على القناة الأولى والتانية والمحور واقرا لسرايا لحد ما تخش السرايا
واتفرج على فيلم البرىء وعش دور أحمد ذكي و البس توب عسكري الأمن المركزي وطالب بحرق أبطال الميدان أعداء الوطن !!!!
ماللي قتل سيدنا عمر وعثمان وعلي كانوا خايفين عل الوطن !!!!
نفس العبط , نفس الهطل , نفس العمى , نفس الفتن !!!!
ابكي يا اهبل يا عبيط بعينك الحولة اللي شايفه الديب حمل والشيطان ملاك
ابكي على نفسك واعرف إنك مش حتنجى من فتنة الدجال
لأنك شفت النار جنة تحتها الأنهار
العبط حيغرقونا
العبط حيضيعونا
والمنتفعين عايزين يكملوا المشوار
بعد ما قربنا نعيش أحرار
أفيقوا يرحمكم الله
واحسبوا كام جنيه في ال 70 مليار دولار
واحسبوا تمن اللي ماتوا و اللي استشهدوا وتمن ليالي الرعب والخوف والسهر
وتغيير شعار ابني بيتك باحمي بيتك
واحسبوها لو قدرتوا تحسبوها وحطوا جنب ال70 مليار صفر مالا نهاية من الأصفار
***********
ويارب نجنا ولا تؤاخذنا بما فعل السفهاء منا وبنا
يارب نجنا من فرعون وعمله وبطانته وبلطجيته وفتنته
يارب أغثنا
ياااااااااااااااارب أغثنا ومدنا بجنودك
ياااااااااااارب , افرغ علينا صبرا وثبت أقدامنا وانصرنا على القوم الكافرين
ياااااااااارب اهلك الظالمين بالظالمين واخرجنا منها سالمين
اللهم آااااااااااااااامين"

يوميات شاب منوفى يقول...

ياعمرو انا واحد قالى جزمة مبارك بالشعب عايز ايه من ناس زى دى دول مغيبين احنا بنعمل ده لوجه الله وعلشان بلادنا مش هقول اكتر من حسبى الله ونعم الوكيل