الاثنين، 6 ديسمبر 2010

مش هطبل يا شحاته

أيام ماتش مصر و النيجر فى التصفيات بتاعت افريقيا نزلت الملعب قبل الفرقتين معزة مع واحد من السحرة بتوع افريقيا ..... المهم ساعتها المعزة كانت مثار تعليقات كتيرة و تريقة على المنتخب و حسن شحاته عشان " النياجرة " على رأى المعلق اللى كان على قناة النيل غلبونا و كان شكلنا وحش أوى
ساعتها كل واحد ربنا فتح عليه قعد يتريق على حسن شحاته ، و فى الآخر حسن شحاته طلع قال المدربين اللى فرقهم " بتترقع " بالتلاتة و الاربعة يتشطروا على الفرق اللى " بترقعهم " و بعدين يجوا يتكلموا عليه ، و وافقه على كلامه المطبلاتى الكبير مدحت شلبوكة
بعدها بكام يوم طلع فاروق جعفر ( لأنه كان المدرب اللى فرقته " بتترقع " تلاتة و اربعة ) فى جرنان من الجرايد اللى محدش بيقراها و قال مش " هطبل يا شحاته " لأنه شاف كل اللى موافق على اللى شحاته عمله فى الماتش ده يبقى بيطبل

فى بلدنا عايز الناس تمشى وراك و عايز دايما تبقى صح و راجل برفكت و كوركت دايما قول رأيك او الحاجة اللى انت عايزها و بعدها على طول قول قال الله و قال الرسول ، هتلاقى الناس مشيت وراك و شالوك على راسهم من فوق و احتمال يجى حد فيهم يشيل الجزمة بتاعتك و يلبسهالك زى ما الراجل اللى عمل كده فى الصورة اللى اتشهرت جدا بتاعت احمد عز

فى بلدنا كل واحد طول دقنه و خفف شنبه و لبس جلابية بيضا ( مع استثناء خالد الجندى لأنه بيلبس على طول بدل ، ماعدا ايام المناسبات بيلبس الجلابية البيضا ) بأه عمنا الداعية و مولانا و شيخنا و سيدنا ، و اثبتوا كده صحة بيت الشعر المشهور اللى قاله المتنبى من يجى الف سنة كده – اغاية الدين ان تحفوا شواربكم .... يا امة ضحكت من جهلها الأمم - مع ان المتنبى مكانش على ايامه ناس مستشيخة كتير زى ايامنا اللى زى الفل دى

فى بلدنا لما تقول رأيك و رأيك ده ميعجبش الناس ، تلاقى ناس داخلة تهاجمك من غير اى تفكير و بدون اى معرفة للموضوع و بدون ما يفهموا انت قلت ايه و قلته ليه ، حتى لو رأيك اللى انت كتبته ده كان مجرد جمله فى فيلم او مقطع من كتاب عجبك و قلت تكتبها

فى بلدنا مفيش احترام لرأى الآخر ، لأنه اصلا مفيش آخر .... فيه انا و انا ثم انا
و حتى فى النقاشات المحترمة بتفضل محترمة الى حين و بعد كده الاحترام بيضيع و بينقلب الموضوع الى قلة ادب صرف ..... انا هقول على حاجة و هى مش سر على فكرة ، الوحيد اللى اتناقشت معاه على الفيس بأحترام لغاية الاخر كان صديقى زيزو ، مع اننا فى اخر النقاش فضلنا برضه مختلفين زى ما احنا ، بس فضل اختلافنا ده بأحترام
طبعا الاحترام مش بس بيكون بقلة الادب ، ساعات كتير بيكون انك تكون بتتكلم بحجة و دليل و برهان و اللى قدامك فى نص الحوار ياخد بعضه و يمشى و مش يرد لما يلاقى نفسه اتزنق ، او يتكلم فى اى حاجه تانيه غير اللى انت بتكلمه فيها ..... و دول قابلت منهم ناس كتير الحمدلله ، بس بطلت اتضايق منهم ، يعنى حال البلد كلها كده ، يبقى هزعل منهم هما و مش هزعل من باقى البلد

فى بلدنا لسه بنقول مسلم و مسيحى و كل معسكر عامل سياج حوالين نفسه و مقفل على الناس اللى معاه و معتبر المعسكر التانى كفرة ، و الافراد اللى بيخرجوا من المعسكر بتاعهم و بيحاولوا يقابلوا الناس اللى فى المعسكر التانى فى نقطة وسط ملهاش دعوة بأى حسابات متعلقة بالديانة او الهوية بيتقال عليهم خارجين عن الجماعة و فى بعض الاوقات بيتكفروا علنى و ممكن لو رجعنا ورا شوية فى الزمن يستباح دمهم و مش بيبقوا مقبولين من كلا المعسكرين

فى بلدنا تكون بتفكر فى حاجة و تقول عكسها عشان تقاليد المجتمع و عاداته ، عشان لو قلت اللى بتفكر فيه ده بيبقى عيب و غلط و حرام ، و بيتم تهديدك بآية ( و ما يلفظ من قول الا لديه رقيب عتيد ) ... و معرفش فى الديانة المسيحية ايه المقابل للآية دى بس ممكن عادل يبقى يقولى

فى بلدنا الغلط مش انك تعمل الغلط ..... الغلط ان تتمسك و انت بتعمل الغلط
انما لو عملته من غير ما حد يعرف ، او حتى الناس عرفت بس مش عرفت تثبت ده او تمسكك و انت بتعمله يبقى انت كده صاغ سليم و صح و ممكن يجيبوا السجادة و يصلوا وراك

فى بلدنا بنعمل تماثيل للناس جوا نفوسنا و بنحول التماثيل دى لأصنام و نعبدها و مش بنقبل اى كلام عليها بيخالف الصورة اللى احنا راسمينها و ناحتينها للناس دى ..... و الناس اللى بنعملها التماثيل دى بتختلف و بتتباين .... يعنى ممكن التمثال يكون لمحمد حسان او يكون لآمال ماهر على حد السواء
بس لازم اقول ان التماثيل على اد ما بتتشابه بس رد فعل اللى عامل التمثال لما تيجى تتكلم على الصنم بتاعه بيختلف ، يعنى ممكن تتكلم مع واحد على الصنم بتاعه يشتمك ، و ممكن تتكلم معاه و تلاقيه بيقولك انا مش هرد عليك عشان انت اللى فى دماغك هيفضل فى دماغك و مش هيتغير و انا مش عايز اتخانق معاك ، و ممكن ياخد الموضوع بهزار و مش يقفش عليك و يعديها

فى بلدنا كل واحد عايزك تقول ورا رأيه آمين و مش تقول اى حاجة تانية و تتطبل لرأيه

و لكل الناس دى بقول جمله واحدة بس " مش هطبل يا شحاته " ..... سلام

هناك 8 تعليقات:

آخر أيام الخريف يقول...

هايل و أكتر من هايل ...بجد قلت كل اللى نفسى فيه :)

adel يقول...

عمرو ياصديقي
ليك عندي عزومة علي -اعوذبالله- سحلب بالشوكولاتة علي البؤقين دول :))

ستيتة يقول...

الله
قول كمان
ممكن لو مش ها تطبل وها تتعلم تمسك صاجات تبقى تاخدني معاك :)

انا بس عاوزة اعرف

لو كلنا في النواحي دي مش بنطبل
ولا بنهاود أمال مين اللي بيطبل
ياعمرو هوووناك كونفلكت النيلة كونيلة بين النظرة والتطبيق

بس استمخيت انا قوي

Tears يقول...

عجبنى تحليلك و مواجهتك للمجتمع بعيوبه

Che يقول...

آخر ايام الخريف
متشكر جدا على تعليقك ، و مبسوط اننا متفقين فى وجهات النظر :)
نورتينى :)

Che يقول...

دولا حبيبى
يا عم انا مستنى العزومه دى بفارغ الصبر :))
حبيب هارتى يا دولا

Che يقول...

العمه ستيته
كيفك يا عم و كيف اخبارك
مقاطعه الناس كلها و مش بتعلقى كتير زى الاول ليه يا عمه :(
و يا ريتنى انفع اطبل ولا امسك صاجات ولا حتى ابقى كداب زفه ، كنت هستريح كتير يا عمه ، بس مش طبعنا ولا نصيبنا نبقى كده :)
الحقيقه انه هيفضل ناس تطبل و ترقص كمان يا عمه ، عشان هى دى مصر يا عمه :))
منورانى دايما يا عمه و بفرح لما اشوف تعليقك

Che يقول...

Tears
اظن ان لم تخنى ذاكرتى الضعيفه ان ده اول تعليق و يا رب مش يبقى آخر تعليق ( سيبك انى عارف اصلا انه مش آخر تعليق ) ... اهلا بيكى قبل اى حاجه :)
على فكره ، انا مش بواجه المجتمع بعيوبه ولا هقول انى نفسى اغيره ولا اى حاجه ، كل اللى بعمله انى بسجل وجهه نظرى و بسجل موقفى عشان اعرف انا واقف فين بالنسبه للمجتمع ده
نورتينى و مستنى تعليقات كتير :)