الأحد، 7 نوفمبر، 2010

شوية كلام

لأول مرة من اكتر من شهرين امارس فعل الكتابة
حاسس ان صوابعى تقيلة على الكيبورد مع انى يوميا بكتب عليه سواء عربى او انجليزى ... بس من الواضح ان الكتابة للكتابة غير الكتابة للشات لما تكون بتتكلم مع الناس لو انت حالتك النفسية تسمح ، او انك تكون بترد على اللى بيقولوه لو حالتك النفسية ماتسمحش
مش عارف اتكلم على ايه لأنه حصلت حاجات كتيرة فى الشهرين او التلات شهور دول .... يعنى اتكلم مثلا على فكرة ان الناس فى مصر اغلبها بأه مهووس بفكرة الدين ، و اسهل طريقة انك تتهاجم بيها لما تتكلم على اى حاجه فى الدين و اننا وصلنا فعليا لتطبيق مقولة ماركس المشهورة الدين افيون الشعوب
يعنى افتكر ان عادل لما حط لينك لواحدة عاملة نفسها شيخة و قالت انه حرام نقعد على الكراسى ( ايوة والله ده نص الفتوى بتاعتها ، ان الكراسى كانت موجودة على ايام الرسول و ماكنش بيقعد عليها عشان حرام ) أتهاجم لدرجه ان واحد دخل جابله لينكات لحاجه فى الكنيسة انا مش فاكرها عشان انا مهتمتش ادوس على اللينك لأن اللى عمل كده اخد الموضوع على محمل صراع اديان مش على ان عادل كان بيعرض فتوى قراها لا اكتر ولا اقل .... انما ازاى عادل مسيحى يعمل كده فى فتوى بتاعت مسلمين يبقى الرد اننا نجيب حاجات للكنيسة بتاعته و محدش احسن من حد ، مع ان عادل قال انه فى الكنيسة حاجات هو بيرفضها شخصيا ، و فى الآخر عادل شال اللينك بكل التعليقات اللى عليها عشان وجع الدماغ
ولا انا لما اتكلمت على واحد عامل شيخ قالك انه حلال نبيع الآثار ، بس لو مجسمة او على هيئة تماثيل يبقى لازم نطمسها ( و هنا ارجو من كل واحد يفتح القاموس بتاع ثانوى اللى هو مختار الصحاح تقريبا و يطلع معنى الطمس ) .... و لما اللى عامل شيخ ده اتهاجم و ناس رفعت عليه قضايا عشان لو حد عمل بالفتوى بتاعته بكرة هتلاقى تلاقى فواعلية بيهدوا فى ابو الهول ، راح مكسكس ( الكلمة دى مش كلمه قبيحة ، دى معناها جاب ورا بس بلغه السواقين ) و قال انا مقلتش ..... مع انه لما اتكلم كان بيتكلم على الهوا و فيه تسجيلات مش بيتكلم فى طرقه بيتهم عشان يقول انا مقولتش .. يعنى ببساطه الراجل ده مستحمر كل الناس اللى اتفرجت عليه ، و واحد ربنا فتح عليه و قالى تأدب فى مخاطبة العلماء يا جاهل مع انه الله اعلم مين فينا الجاهل ، انا ولا هو ولا الشيخ بتاعه
ولا على رحاب لما حطت فيديو لواحدة عندها على الاقل 50 سنه و اكتر بتقول ان عباد الشمس كافر و ملعون و بيعبد الشمس مش بيعبد ربنا و بتطالبنا اننا نعدم عباد الشمس تقريبا ... و واحد دخل علق عندها و قال اننا المفروض كمثقفين ندفن راسنا فى الطين و ثقافتنا ملهاش لازمه عشان الست دى ذنبها فى رقبتنا و فى الآخر راح مسح تعليقاته لما اتكلمنا معاه بالمنطق ، بس واضح انه عنده لا منطق فى الدين

اتكلم على التعب اللى انا حسيت بيه لدرجة انى رحت عملت تحاليل شاملة و طلعت كلها زى الزفت الحمدلله ... دهون عالية ، انزيمات كبد عالية ، وظائف كلى مش متظبطة ، تحاليل دم مش منطقية ... الحاجه الوحيدة اللى طلعت مظبوطة هى تحاليل البول
اتكلم على انه بسبب التحاليل انا ممنوع من اكل اللحمة و الفراخ و الفول و المشروم و البيبسى و الشاى و القهوة و الشيكولاتة و اى حاجه مقلية ولا اى اكل من الشارع لمده شهر على الاقل و بعد كده نبقى نشوف ، و انه ليا 3 بيضات بس فى الاسبوع و يكونوا مسلوقين ، و مليش غير انى اكل سمك فى الشهر ده و انى زهقت من السمك بكل انواعه عشان انا مش باكل غير تونه و طواجن سمك و سمك فى الفرن و بكرة هاكل سمك مشوى و حاسس انه هيطلعى خياشيم من كتر ما اكلت سمك ... بس الحق يتقال انا بوظت النظام ده مرتين فى الفترة دى

اتكلم على انى اخيرا فصلت عضويتى فى النادى عن عضوية اهلى و بأه ليا عضوية مستقلة و ان الخطوة دى جت متأخرة تقريبا 5 سنين او اكتر شويه ... و انى بسبب العضويه دى فضلت اروح النادى لمده 3 اسابيع ورا بعض و انا اللى كانت آخر مره دخلته كانت من 7 سنين تقريبا

اتكلم على انى غير مستقر نفسيا و متقلب بدرجه ازيد من اللى انا شخصيا متعود عليها فى شخصيتى الملولة بطبعها ، و انه نتيجه لكده بكون يوم فرحان أوى و اليوم اللى بعده بكون فى قمة الكآبة ... و ساعات بأخد الحالتين دول فى نفس اليوم

اتكلم على انى مليش نفس اكتب اى حاجة مع ان فى دماغى افكار كتير جدا و لو قعدت اكتب فيها محتاج يجى 4 شهور من الكتابة المستمرة يوميا عشان اخلصها .... و مش بعمل اى حاجة غير انى اكتب الافكار دى فى ملف وورد و ارميه عندى عشان لما يبقى ليا نفس اكتب ابقى ابص عليهم و اكتبهم

اتكلم على انى مفتقد جدا كتابات سارة نجاتى و دماغها فى الكتابة اللى بتعجبنى جدا و انا مش عارف هى مش بتكتب ليه ..... بس الأولى انى اسأل نفسى انا شخصيا مش بكتب ليه

اتكلم على الفيديو اللى انا مصوره لنادر و بلال و عبد الفتاح ، و الفيديو التانى اللى انا مصوره لزيكا و دولا و مليش نفس امنتجهم و انزلهم عشان الناس تشوف التهييس بتاعنا .... ماتخفش يا زيكا انت و دولا .. سركوا فى بير

اتكلم على الصديقة اللى انا اعدت اكتشافها و اكشاف شكل علاقتنا من جديد لما بأت الدار امان على حد قولها ... و انا هنا مش هكتب اسمها عشان انا عارف انها فى الغالب يمكن تتضايق لو انا عملت كده بس هى عارفة نفسها

اتكلم على ساندرا اللى كان نفسى اشوفها و اضطريت الغى معادى معاها عشان فى اليوم ده كنت فى اسماعيلية عشان اطلع الشهادة بتاعت الدبلومة ، و انا من هنا بقولها مش تزعلى يا ساندرا و هعوضها قريب جدا

اتكلم على عبدالله و الناس بتوع تشانج و ازاى كانوا واحشنى جدا و بجد انا فرحان انى شفتهم و فرحان اكتر انى شفت نتيجة الشغل اللى عملوه و بيعملوه و اد ايه بحس بشوية امل و تفاؤل و انا المتشائم السوداوى بطبعى

اتكلم على الاحاسيس اللى انا بعيشها و لسه بختبرها لأول مره من مده طويلة أوى ، و اد ايه انا خايف و متردد بس بقول ان الموضوع محتاج قفزة ثقه ... او زى ما الاجانب بيقولوا
Leap of faith

فى الغالب مش هتكلم على اى حاجة من الحاجات دى و هفضل محتفظ بيها لنفسى .... سلام

هناك 8 تعليقات:

adel يقول...

قريته علي الفيس بس قلت اعلق هنا
مش عارف ليه
يمكن عشان نفس الكلام اللي بتقوله تقريبا حصل معايا بالملي

علاقت-تعب-نظام وانا بكره النظام-كتابة متوقفة مع اني فعلا عندي افكار تاخد 6 شهور كتابة بالميت في 100 حاجة
مقالات وريفيوهات و3 افلام طويلة و 1 قصير وشوية شعر منتهوش

ومع ذلك متنح للفضاء السرمدي القاتل

Haytham Alsayes يقول...

اولا حمد الله علي السلامة
ثانيا ربنا يشفيك ويعافيك
ثالثا اكتب اي حاجة في الكتابة عزاء ورسالة

تحياتي ياتشى

ستيتة حسب الله الحمش يقول...

مقصرة انا في السؤال عنك مع اني والله مش نسياك
قلة ادب عمات

اتكلم على انى غير مستقر نفسيا و متقلب بدرجه ازيد من اللى انا شخصيا متعود عليها فى شخصيتى الملولة بطبعها ، و انه نتيجه لكده بكون يوم فرحان أوى و اليوم اللى بعده بكون فى قمة الكآبة ... و ساعات بأخد الحالتين دول فى نفس اليوم

طيب
شوفلنا حل بقى :)

سلامتك من النظم الغذائية يا عمرو
انت لسه صغير يا بني خد بالك من نفسك

Che يقول...

يا دولا انت تعلق على الفيس ، تعلق على البلوج ... تعلق مكان ما انت عايز يا باشا
عارف انا الفضاء السرمدى اللى انت بتقول عليه ده :))

Che يقول...

هيثم
الله يسلمك يا هيثم باشا و تسلم يا رب من كل شر
و الله يا هيثم انا مش بيبقى ليا نفس اكتب خالص
بحاول ، بس انت عارف المحاولات اللى من غير نفس بتكون وحشه اد ايه
نورتنى يا هيثم

Che يقول...

العمه ستيته
يا عمه مش مقصره ولا حاجه و متقوليش على نفسك كده
انا اللى عايز اعرف انتى مالك متضايقه ليه اغلب الوقت الايام دى
و رمضان خلص ، و العيد الصغير خلص ، و الاجازات خلصت و ادينا داخلين على العيد الكبير و لسه مش اجتمعنا فى اى لقاء من بتوع المدونين
لعل المانع خير يا عمه
منورانى على طول يا عمه

شيرين سامي يقول...

قريت البوست و حيرتني في شخصيتك غالباً بعرف الناس من كلامهم بس يمكن عشان انت برج الجوزاء
سلامتك و في انتظار كتاباتك
تحياتي

М€ŝЋМΣŞĦ يقول...

ربنا يشفيك و ترجع تشرب بيبسى و تاكل لحمة زى مانت عايز.

موضوع الفتاوى ده مكلكع و نتيجه مباشرة للجهل بالدين إللى بقى زيادة قوى بين رجال الدين!! أبسط دليل .. عمرو بن العاص دخل مصر و حتى الأن مسمعناش عن تمثال طمسه عمرو أو أى مسلم حتى الفتوى العبقرية فى وقتنا هذا .. جايز إللى أفتى مختلف مع سيدنا عمرو فى حاجة !!

المواضيع إللى اتكلمت فيها كتير بس مش عايز أطول عليك أكتر من كده
تحياتى