الأربعاء، 3 يونيو 2009

الله اعلم

منير و فيروز
فى حاجه غريبه انا خدت بالى منها ..... اغلب اللى بيحبوا منير بيكونوا فى نفس الوقت بيحبوا فيروز و بيسهروا معاها بليل .... يعنى انا مثلا باسمع فيروز لما باكون عصبى او قرفان و سبحان الله دايما بتخلينى اهدى و اروق و ابقى فريش مش عارف ليه .... و طبعا منير .. الكينج و الكبير كبير ... مهما اتكلمت على منير ماينفعش تديله حقه .... كمان تلاقى الناس دى ( اللى انا منها ) اننا بنحب عموما الاغانى القديمه و الناس القديمه و بنتكيف منها ليه .... الله اعلم

تموره
مدام اتكلمنا على منير و فيروز انا فى حاجه عايز اعرفها ... هو تمورة شعر الصدر حسين المشهو بتامر حسنى كان تعبان و هو بيمثل عمر و سلمى 2 ولا ايه ... اصلى خدت بالى انه مش مبين شعر صدره غير فى 3 مشاهد بس و باقى الفيلم لابس تشيرتات و ساتر نفسه .... كنت دايما باستغرب لما تامر يبين شعر صدره ، تقريبا فاكر ان ده بيزود فى السيكس ابيل بتاعه او مثلا انه هو الراجل اللى عنده شعر فى صدره و احنا كلنا ناس اجروديه مثلا .... كنت باقول هو محدش قاله ليه ان السبعينات ايام ما كانوا بيفتحوا القميص لغايه نص صدرهم فى مصر و لغايه سرتهم فى لبنان خلصت خلاص و اننا دلوقتى بنمشى بهدوم مفتوحه ..... و جايز يكون تامر عايز ينافس المطربات اللى بيبينوا صدرهم مثلا فهو كمان بيبين صدره و محدش احسن من حد ... الله اعلم

الزمالك
يا ترى بعد ما مرتضى خسر الانتخابات هيطلع الملفات ( اللى شكله عامل لكل واحد فى مصر ملف و شايله عنده ) هيطلع ملفات ممدوح عباس امتى .... بس عموما انا متفائل ... الزمالك السنه الجايه هيلعب على المركز الرابع مش المركز السادس زى السنه دى عشان السنه دى كانت كبوة .... و الى كل عشاق الزمالك ... الزمالك راجع تانى ... بس هيتأخر شويه عشان راجه فى تك تك ..... تفتكروا هيوصل امتى ..... الله اعلم

العلاج بالتدوين
مكنتش اعرف انه فى حاجه اسمها العلاج بالتدوين ... يعنى مثلا الايام اللى كنت باكتب فيها كتير كنت باعتبر نفسى عندى اسهال فكرى و بخلص منه على البلوج و كنت لما تجيلى الحاله دى ابطل اخد لاكتيلوز و اكل حمص عشان راسى تمسك شويه و ابطل كتابه
بس قريت عند Isolde و عند Enjy كمان انه فى حاجه اسمها العلاج بالتدوين و طبعا انجى دكتورة نفسيه فاكيد فاهمه هى بتقول ايه ... بس لو كده يا ريت كانت كل مشاكلنا ينفع تتحل بالتدوين ... انما انا بحس اننا بنكتب عشان مانطقش و تجيلنا نقطه مثلا ... الكلام ده صح ولا غلط ..... الله اعلم

تليفزيون الحياه
اللى بيتفرج على الحياه يحس ان رمضان خلاص الاسبوع الجاى .... عمالين يجيبوا اعلانات على مسلسلات رمضان قبل رمضان ما يجى بشهرين تقريبا ، يمكن على اساس اننا تفضى نفسنا بأه فى رمضان عشان المسلسلات ... جايز .. الله اعلم
تانى حاجه على تليفزيون الحياه هى برنامج بنى ادم شو بتاع احمد ادم .. انا عندى سؤال واحد بس ... المزز اللى بتبقى قاعده فى الاستديو دول بيبقوا جايين مع البرنامج ولا متأجرين ولا ايه ..... حد سمع الضحكه اللى كل واحده فيهم بتفقعها ... بحس انى قاعد فى كباريه او ديسكوتيك على احسن تقدير ... ولا يمكن عشان انا فى بلد مفيهاش ستات فى الشارع فبحس الضحك ده اوفر شويه و هو ده بأه العادى بتاعنا فى مصر .... الله اعلم
تالت حاجه و اخر حاجه على الحياه برضه ....... هما ليه لما بيجيبوا اعلان عن مسلسل بيقولوا اسامى كل ابطاله و مابيقولوش اسماء فنين الاضاءه و مساعدين المخرج و كده .. يعنى هى جت على دول .... الله اعلم

انا حاسس انى كنت باهيس و دلوقتى لازم ابطل تهييس .... سلام

هناك 26 تعليقًا:

الست فرويد يقول...

:)
وتبطل ليه
خليك يا راجل كمل تهييس زى ما انت عايز
انت كده بتخالف تعاليم الدكتور انجى فى العلاج بالتدوين وده عواقبه خطيره
ههههه

لا بجد شويه بقى
بوست جميل
وفعلا تقريبا كل اللى بتسمع فيروز بيسمع منير واضيف لك حاجه كمان البنات اللى بتسمع منير برضه تلاقي معظهم بيعشقوا انغام مش عارفه ايه العلاقه بس انا لحظتها

انا سعيده جدااا بزيارتك الكريمه للبوج
بس ملحوظة على الهامش هى مش صاحبتى لان البوست فصة قصيره
حرام عليك انا مش الست بتاعة النميمه دى :)

ان شاء الله هازرك كتير علشان اشوف باقى التهييس :)

ارق تحياتى لك



+

Che يقول...

الست فرويد
يا مراحب يا مراحب بيكى فى اول زياره و يا رب ماتكونش الاخيره
بالنسبه لنقطه انغام دى انا مخدتش بالى منها .. ليه يا عمرو ، ليه يا عمرو .. جايز عشان انا مش بنت .. ههه
انا اللى ساعد بزيارتى للبلوج بتاعك ، و بجد انا اسف كنت فاكرها صاحبتك .. و بعدين مين اللى قال انك لما تحكى اللى بيحصل بينك و بين صحابك تبقى نميمه .. ده على كده انا رايح جهنم بصاروخ
انا فى انتظار الزيارات الجايه و هاحاول اكتر من التهييس عشان خاطرك
نورتينى

adel يقول...

1-منير و فيروز و معاهم عملرو كمان و حنان ماضي و نجاة و عمرو خيرت

احمدك يارب

و انا بعشق قديم منير و عمرو

2-تمورة ده ربنا ينتقم منه ...دا انا كنت بحبه بس كرهني فيه ....حتي اغانيه قربت اكرهها

3-انا معايا ملفاتك ياعمرو و متخبطش اكترمن كده ...لو فين هجيبك ....انا معايا ملفاتك

4-انجي كلامها صح و هو العلاج بالكتابة عموما مش بس تدوين

5-هو في حد لسه بيتفرج علي التلفيزون ولا احمد ادم اصلا

Che يقول...

عادل باشا
جامد دا التعليق بتاعك .. عامله فى شكل نقط .. الامتحانات شكلها مأثرة عليك .... هههههه
و يا عم عادل ربنا يخليك متفتحش ملفاتى اللى عندك
نورتنى يا عدول

الشعب لابد له من حكومه تشكمه يقول...

فى الاولى طبعا معاك انا عشقى الاول والاخير فيروز وعايده الايوبى(نفسى الاقى حد عارفها:(
بالنسبه لمرتضى فاتك انت وهو ماسك عمرو اديب ههههههههههههه وال اييييييه هيطلع هو كمان ملفاته الراجل ده معاه 80 مليون ملف لكل مواطن مبيتهدش.بس بصراحه انا كان نفسى يكسب فى الانتخابات بيعمل متعه واثاره وتشويق فى الحياه وشكلك ذملكاوى صح..فاكره لما كان رافع الكاس وماشى يلف بيه فى الملبع والجماهير تقول العبيط اهو ههههههههههه مسلى والله.
اول زياره ولن تكون الاخيره.

Che يقول...

شيمو
اولا اهلا بيكى فى اول زياره و يارب متبقاش الاخيره
على فكرة انا عديت على البلوج بتاعك بس كانت زياره سريعه لظروف التزويغ من الشغل
نيجى للتعليق ... انا عارف عايده الايوبى بس انتى متزعليش نفسك
و بالنسبه لمرتضى انا شفته مع عمرو اديب و دول ليهم حلقات كتير زى مسلسلات رمضان كده ... و كلامك صح مرتضى عنده 80 مليون ملف
بس على فكرة انا مش زملكاوى ... ربنا يسامحك .... اهلاوى دائما و ابدا
نورتينى يا جميل و مستنى الزياره الجايه

MaNoOoSh يقول...

بالنسبة للأغاني فعلا اللى بيحب فيروز او منير تلاقيه بيحب الاغاني الطربية
بس انا بحب فيروز ومش بحب منير قوي بصراحة.. لكن فعلا بميل للأغاني القديمة شوية


وبعدين فعلا التدوين ممكن الواحد يعتبره علاج نوعا ما الواحد بيهيس براحته فيه

هيس هيس ولا يهمك.

Che يقول...

منوووووش
رحت عندك لقيت تاج ( انا مش عارف ايه موضه التاجات اللى ماشيه بين المدونين دى ) .... المهم انتى عامله ايه يا جميل
غريب انك مش بتحبى منير .. اول حد اشوفه بيحب فيروز و مش بيحب منير ... هههههههه
الظاهر ان الشعب كله عنده عقد عايز يطلعها فى التدوين و التهييس و كده
و يا ستى انا هافضل اهيس .. بس على صغير عشان ماتجننش
نورتينى يا جميل

عمرو يقول...

أهلا يا جدع
خمسة هزار. انت النهاردة بتسهل ولا بتدون؟ يعني ناخد على كلامك ولا لأ؟
خمسة جد. أنا مش موافق على حكاية منير وفيروز دي. بصراحة أنا مش باعترف بالمغني, أنا باعترف بالأغنية. يعني مثلا بالرغم من إني مش باطيق تامر إلا إني باحب أغنية "بتغيب" قوي جدا خالص

أنا جربت العلاج بالتدوين ونفع معايا. فعلا فكرة لذيذة

فتك بعافية.. يعني العواف
:)

Che يقول...

عمور
ازيك يا باشا
خمسه هزار .. النهارده انا مش عارف ظروفى ايه فالاختيار ليك يا باشا ... هههه
خمسه جد... مقتنع معاك بأن الاغنيه اهم من المغنى ، بس انا شايف ان منير و فيروز كل اغانيهم حلوة او ده رأيى ... و بكده نبقى احنا الاتنين متفقين
و مسأله العلاج بالتدوين او بالكتابه عموما او بالفضفضه بوجه شامل طلع ليها مريدين كتير
و الله يعافيك يا عمور

micheal يقول...

فعلا بحب فيروز ومنير..بس برضه بسمع تيمو شعر الصدر حسين لأسباب تانية لا علاقة لها بالغناء..حتفهم لما الألبون ينزل
:))
بخصوص علاج التدوين..فتقدر تقول مجربه
أما الحياة،فزيها زي أي قناة مش وراها الا المسلسلات في رمضان
:))
تحياتي

Che يقول...

مايكل باشا
اهلا بيك فى اول زياره ... غريبه ان ودنك واخده على منير و فيروز و فى نفس الوقت بتسمع تيمو , مع انى مفهمتش ايه الاسباب بس مستنى الالبون عشان اعرفها
و بالنسبه لحكايه العلاج بالتدوين دى شكلها منتشرة موت و انا مش عارف
و بالنسبه للحياه فلا تعليق .. يا عم انا عايز اتفرج على المسلسلات برضه ... ههههههه
نورتنى يا باشا

Unknown يقول...

عمرو كيفك؟
بما أني مش من جماعة الزمالك أحب أحكيلك أنا بحب فيروز ومنير بس فيروز أكتر وكمان أنغام عندي غير

-تامر حسني فكنا منه رجاء !!!

والعلاج بالتدوين ناجع جدا؛ أنا عن نفسي مش كتير نفعني-لأنه ما استخدمته لهالهدف-بس بعرف ناس استفادو منو كتير جدا!!

وهيس براحتك على قولتكم؛ هي يعني كمان مدونتك ومش حتمون عليها؟!!

micheal يقول...

علي فكرة أنا في الأغاني كوكتيل..بسمع منير وفيروز وتيمو وعمرو دياب وكاظم وعبد الحليم ومحمد فوزي وشادية ووردة وصباح وهشام عباس ونانسي وإليسا وهيفا وروبي وعمك شويري..ومتسألنيش السلطة دي كلها جت منين
:))

مثلية فقط يقول...

فيروز و منير رائعان ... فن شامل كلمات و احساس و ألحان و تاريخ أضاف لبلد كل واحد منهما... مصر فخورة بمنير الملك و لبنان فخورة بفيروز العظيمة

أما باقي فتامر أتفه من أن أعلق عليه و القنوات الفضائية العربية صفر على الشمال

تحياتي

Che يقول...

مياسى القمر
ازيك يا جميل و مش باينه ليه ...مفيش حد من انصار الزمالك حتى فى الزمالك نفسه فعادى يا مياسى .... تانى مرة يجيلى ربط بين فيروز و منير من ناحيه و انغام من الناحيه التانيه ، شكلها علاقه و انا مش واخد بالى منها .. بس عذرى انى مش بنت ... و الله ... هههههه
و يا ستى فكيتنا من تامر حسنى و لو عايزة انا ممكن امسحه من البوست خالص ، بس انتى تهدى نفسك
و بالنسبه لموضوع العلاج بالتدوين انا كده هاعمله رابطه لانه واضح انه منتشر جدا .... و ادينى بهيس برضه ، هو انا ورايا ايه غير التهييس
نورتينى يا قمر و ماتغيبيش كتير

Che يقول...

مايكل
على فكرة يا باشا تقريبا كلنا كده ... محدش بيسمع واحد بس انما بيبقى فيه مغنى انت بتحبه اكتر من غيره فبتسمع اغلب اغانيه ... ده مايمنعش ان فيه ناس تانيه بتسمع اغانيها
نورتنى يا باشا

Che يقول...

مثليه فقط
اتفق معاكى تماما فى كل اللى قلتيه على منير و فيروز ... و اتفق اكتر مع اللى قلتيه على تمورة او تيمو على رأى مايكل ... بس اختلف معاكى فى اللى قلتيه على القنوات العربيه ... اغلبها صفر على الشمال بس فى قناتيم او تلاته مش صفر على الشمال
نورتينى يا جميل

زهور الامل يقول...

انا سعيدة لزيارة مدونتك الرائعة
واتمنى تشرفني بالزيارة لمدونتي الجديدة
http://awrakelward.blogspot.com

Che يقول...

زهور الامل
شرفتينى بزيارتك ز اكيد هارد الزيارة فى اقرب وقت ممكن
نورتينى

أنا حر يقول...

انا بسمع كمان عمرو وحنان ماضي معاهم على فكرة
ومش بحب تامر ولا شعرلا صدره
وبكره مرتضى جدا وزملكاوي جدا جدا جدا ومش هيرجع على تك تك ولا حاجة لان الاهلي استلفه منه علشان ملقاش موصلات بعد اخر ماتش في انجولا ;)
زمالك وافتخر
رمضان كريم
تحياتي

Che يقول...

انا حر
انا بحب عمرو فى اغانيه القديمه اكتر و بسمع حنان ماضى مع انها ملهاش اغانى كتير
و تقريبا محدش بيحب تمورة
و انا مش هاعلق على نقطه انك زملكاوى .. انت حر يا عم
الله اكرم يا نجم
نورتنى يا باشا

Polka Dotted يقول...

Mesh shart eli yesma3 mounir yekon beyesma3 fayrooz... ana sa3at el mood beygebny mounir bas mabyeb2ash fayrooz !

saneyan ... Tamer... Ya3 !
begad el ka2en da law afal 2ameeso momken yeb2a 7aga nag7a la2en 3ando el mokawemat .. w mbawzha b 3'azaret sha3ro... ya3 ! :D

belnesba le mosalsalat ramadan... el geel da kolo metrabby en ramadan = mosalsalat, mesh 3ebada
rabena yehdee !

Che يقول...

BaTaBeeT
awlan ahlan beke ya fandm , no2tet mounir we fayroz momken yeb2a feha a5d we rad , we mtf2 m3ake en elmood sa3at howa ele bey7kom
belnesba le tamora 7abeb elmalaien fa ana msh hatklm 3leh wla 3la sh3r sedro wla 3la ay 7aga
we a5eran no2tet elmoslslat ana mewaf2 3leha , bs 3ande so2al howa ente mn ane geel we at3ashm eno ma ykonsh so2al bay5
nawrtene ya gamel

Polka Dotted يقول...

ana mn nafs geel el mosalsalat bas al7amdulelah maba7ebesh atabe3 :D

ana mesh kebera ya osta Che i'm only 24 :D

Che يقول...

BaTaBeeT
Wallahe ya fandem ana msh 2sde , bs howa kan mograd tsa2ol
we b3den da kda ana akbar mnk la2ne kman 8 days hab2a 28 sana ( ya 3ene 3lia we ana 3agoz kda we ento kloko shabab ) .. bs hyia de el7ya .. c'est la vie
menwrane dayman ya gamel