الأحد، 7 يونيو، 2009

احنا اتفضحنا يا رجاله + تحديث للروايه و واحد جامعه

تم نشر الفصل السادس فى الروايه بعد طول غياب دوسوا على روايتى عشان تقروه و مستنى رأيكو
تم نشر البوست الجديد فى واحد جامعه دوسوا على اللينك عشان تقروه و مستنى رأيكو فيه

_________________________________________________________________

كنت باتكلم مع حنون و بعدين قالتلى انا هابعتلك صورة و بعتتلى الصورة اللى انتوا شايفنها دى .... انا اتخضيت لما شفتها و رجعت 3 سنين لورا للحظه اللى الصورة دى اتلقطت فيها ... الصورة دى بتجمعنا كلنا بلال و نادر و امير و فناجيلى و انا و القيادى الشاب و معانا بيتر و ده واحد صاحبنا بس انا علاقتى بيه ماكنتش قويه اوى و معانا كمان يوسف و ده بأه معيد بعد ماخلصنا ( بس معيد بجد مش معيد زينا عشان محدش يفهم غلط ) و اتنين كمان انا معرفهمش .. طبعا انا مش هاقول احنا مين عشان الفضايح و الحسد و كده .... والله و اتفضحنا على الفيس بوك يا رجاله و بأينا انترناشيونال .... و بعد كده قعدت اتكلم مع حنون على الصور و ان الصورة دى تانى صورة ليا فى الجامعه لانى مخدتش غير صورتين و صورنا فيديو واحد ( بس والله كان مؤدب عشان محدش دماغه تروح لبعيد ) .. انا مش من هواه الصور عموما عشان باطلع فيها وحش عشان كده صورى قليله جدا عموما ، لدرجه انى عندى صورة بالبدله و كل مابتخلص باطلع عليها و صوره تانيه من غير بدله و برضه باطلع عليها لما باحتاجها .. بعكس حنون اللى قالت انها كل مابتخرج بتتصور و كل مابتروح الجامعه بتتصور و هيصه بأه عشان هى لما كنا فى الكليه ماكنتش بتتصور خالص و بالتالى بتعوض النقص بأنها تتصور على اد ماتقدر دلوقتى ... ساعتها قعدنا نتكلم عن ان الصور هى اللى بتفضل فى الذاكرة .. يمكن انا مش حاسس الموضوع ده دلوقتى عشان اغلب الاحداث اللى مرت عليا موجوده فى ذاكرتى بس اكيد كل ما الوقت يعدى التفاصيل الصغيرة بتاعت الاحداث دى بتقل و بتقع من دماغى و فى احداث كتير بتقع من دماغى اصلا .. ده غير ان الصور اصلا كمان بتحتفظ بلحظه معينه من الزمن و فى الغالب بتكون اللحظه سعيده لاننا نادرا ما بنتصور و احنا متضايقين الا الصور بتاعت المقالب و الرحلات ... يعنى مثلا تتصور و حد عاملك قرنين كنايه عن ودان اسمه ايه ده ... الصبور ده ... يااااه مش فاكر اسمه بس انتوا اكيد فاهمين انا قصدى ... فى برضه صور الحبيبه و العشاق و نظام علمنى العوم و النبى يا احمد بس بلاش تاخدنى فى الغويط .... الصورة دى بجد لما انا شفتها رجعت لايام الكليه ، و على اد ما كانت ايام ايام سوده و كلها هم و غم بس برضه كان فيها لحظات حلوة و ناس حلوة برضه ، و ده طبيعى مفيش حاجه بتكون كلها سوده ولا حاجه كلها بيضه بس الفكرة انك تتقبل الفكرة نفسها ان الدنيا مش بتمشى زى ما انت عايز و بجد دى فكرة صعب جدا تقبلها ... المهم نرجع لمرجعونا تانى ... الصورة دى كانت و احنا فى رابعه اول .. تقريبا فى الترم التانى ، الاوقات اللى الناس بتستعد تفارق فيها الكليه فبيبتدوا يتصورا مع بعض من باب اننا صحاب لغايه ما الموت يفرقنا و النظام ده مع ان ساعات لما واحد بيشوف الناس اللى معاه و تيجى تسأله دول مين يقولك اهى مصايب بتتحدف علينا ( فكرتنى بالحكايه المشهورة لما الملك فاروق اتنكر فى يوم و نزل ركب حنطور ، و بعدين بيسأل العربجى فى رأيه فى الملك فاروق قاله ابن كلب .. قام فاروق قاله طيب و رأيك فى ابوه الملك فؤاد قال الله يرحمه كان ابن كلب زيه ) .... الصورة دى كانت تانى صورة اتصورتها فى الكليه .. اول صورة كانت فى اول سنه .. لسوء الحظ انا معيش نسخه منها عشان تشوفوا الاختلاف من باب Before & After بس برضه الصوره الاولانيه دى عزيزة جدا ( عزيزة جلال ... ههههه ، معلش القافيه تحكم ) عليا عشان كانت و الواحد لسه برئ و ابيض من جوة ، بس مش معنى كده انى مش برئ و ابيض من جوة دلوقتى انما تقدروا تقولوا ان الواحد فى اوله غير اخره عشان بيتعلم حاجات و الا لو مابيتعلمش يبقى يستاهل القرنين اللى يتحطوا ورا دماغه فى الصور .... برضه انا اتذكر انى ليا كام صورة فى كام رحله كده بس بعيد عن رحلات الكليه ، لانى من كتر عشقى و حبى للكليه مكنتش عايز اى حاجه تربطنى بيها ..... بس اللى اشد من الصور دى كلها كان الفيديو اللى اتصور ساعه ما كان ايمن و وجدى و مراتتهم فى رابعه و انا كنت فى تالته اياميها و كانوا فاكرين انهم خلاص سايبين الكليه بس الحقيقه ان ايمن بس اللى سابها و باقى الناس فضلت فى رابعه و انا فضلت فى تالته .... ايام سوده مش بقولكوا ... بس دى حكايه تانيه و صورة تانيه .... سلام

هناك 16 تعليقًا:

MaNoOoSh يقول...

فضايح فضايح يعني
هههههههههههه

انا كمان مكنتش برضى اتصور ابدااااااااااااااااا ايام الكلية.. بس اكتشفت ان الصور فعلا بتحبس لحظة سعادة فى لقطة ممكن نشوفها ونرجع للحظة دى فى اى وقت.

adel يقول...

هههههههههههه

فضليح فضايح يعني :):)

ايام الكلية دي ايام زي الزفت اكتر ايام كرهتها في حياتي و لسه بكرها للاسف

بلا صور بلا نيلة
انا كمان مش بحب اتصور
و فكك من ال 290 اللي علي الفيس بوك كلهم وانا مش واخد بالي و حياتك

هههههههههههههههههه

مياسي يقول...

هههههههه
حلوه الصوره

انا بحبش الصور اجمالا لا جوه الكليه ولا بره وللأسف صوري من ايام الجامعه بينعدو ومش عارفه وينهم اصلا!!

بس كنت بدي اعلق على نقطة البراءة انو مره واحده صاحبتي ورتني صورها من اول ما دخلت الجامعه لحد ما تخرجت

فرق كبير بين براءة السنه الاولى وخبرة السنه الخامسه

وشو القصه الابداع مشتغل عندك بشوف؟ بوستين ورا بعض مره واحده؟

زهور الامل يقول...

ياااااااااااااه انت فكرتني باجمل ايام عمري وخليتني اضحك من قلبي تاني لما افتكرت اللحظات الجميلة بيني وبين اصحابي اللي مابقوش اصحابي واتقطعت علاقتي بيهم بفعل الزمن
وفكرتني بالصور اللي اتصورتها معاهم وعهدنا اننا هنفضل اصحاب طول العمر
ياريت الايام دي كانت فضلت بحلوها ومرهاكنا لسة زي الطير اللي بيتعلم الطيران
لكن دلوقتي بقينا نطير لما وصلنا لخر الدنيا من اللي بنشوفه واللي بنتعلمه كل يوم من الدنيا
اسلوبك جميل ودمك زي السكر
تحياتي

Che يقول...

منوش
ازيك يا جميل عامله ايه .. انا متفق معاكى ان الصور بتحبس لحظه سعاده .. بس يا ترى لو الصور دى فيها ذكرى اليمه كانت ساعه الصورة لحظه سعاده بس اتغيرت .. يبقى الحل ايه
نورتينى يا جميل

Che يقول...

عادل باشا
والله مش انت لوحدك اللى كرهت ايام الكليه الزفت ... و بعدين يا عم عادل مش بتحب تتصور ليه .. ده حتى الصور كلها ذكريات مهببه بعد كده .. هههه
و بعدين يا عم انا فكتنى من الفيس بوك كله
نورتنى يا باشا

Che يقول...

مياسى
عامله ايه يا قمر و اخبارك ايه
هو محدش بيحب الصور ولا ايه يا جماعه ... عجبنى تعليقك على نقطه البراءه .. واضح اننا مش ابرياء للدرجه اللى احنا فاكرينها
و بعدين يا ستى ولا ابداع ولا حاجه .. ده زهق و حياتك
نورتينى يا قمر

Che يقول...

زهور
انا سعيد انى فكرتك باحلى ايام عمرك و كان نفسى اقول زيك بس للاسف عندى ظروف بتمنعنى ... و طبعا انا مش عارف انتى و صحابك لسه صحاب ولا لا .. بس على كل مفيش حاجه بتفضل على حالها
نورتينى يا جميل

a mero يقول...

ايه يا عموره الصوره دي!
انا مش فاكر ان احنا خدنا صوره زي دي خالص هو لازم يعني تطلعلنا حاجه تفكرنا بالنعيم اللي احنا كنا مقيمين فيه. انا معروف في العائله باني عدو التصوير ونادرا ماتلاقي لي صوره مع اي حد في العائله وكمان دايما لما اشوف صوره ليا في وسط مجموعه احس اني هلاقي دايره حمرا مرسومه علي وشي او وش اي حد جنبي و يقولوا هي دي صورة السريال كيللر اللي بندور عليه ايام ما كان في الجامعه!
المهم ابقي كداب لو قلت ان الصوره دي كلها ذكريات سيئه ويمكن دا سحر الكاميرا انها بتقدر تخطف لحظه من السعاده تكون ناسي فيها الظروف اللي حواليك.
وكالمعتاد دايما باتبسط لما اقرا موضوعاتك وفي الختام سلام

Che يقول...

امير حبيبى
ازيك يا حبيب قلبى عامل ايه .. ايه يا عم ، هو انا رقمى ضاع منك ولا ايه
المهم يا باشا انا نفسى مش قادر افتكر الصورة دى احنا خدناها امتى .. فاكرها طشاش كده ... و انا زيك من انصار مدرسه عدم التصوير ، بس هنعمل ايه .... و بعدين هتعمل ايه يا امير لما تعرف ان الصورة دى موجوده على الفيس بوك .. يعنى العالم كله شايفنا دلوقتى يا امير
انا فرحان جدا انى بسمع منك و لو حتى على البلوج ... سلملى على الواد نادر الدزمه اللى تقريبا وقع فى بلاعه و مش عارف يخرج منها
مستنى زيارتك لواحد جامعه و هنا على طول يا حبيبى .... سلام

غير معرف يقول...

انا اللي قولت للواد يصوركم وفي الاخر تطلعوا نسيان منمم لله نادر الصور جميله لاني منورها بكل تواضع

Che يقول...

نادر البرنس
طبعا يا باشا الصورة منورة بوجودك انت و القيادى الشاب ... الا قلى .. انا سمعت انه راح امريكا ياخد كورسات فى الاضرابات و الاعتصامات و المظاهرات و كده ... الكلام ده صح ولا ايه
مستنيك يا برنس

Zika يقول...

اسكت يا عم دول سفلتوا الشارع اللي انتوا متصورين فيه ده بعد اما انتوا مشيتوا
ااااه
اوباما بقي وكل عام وانتم بخير واحشني يا ريس وواحشني بلوجك

Che يقول...

زيكا باشا
عامل ايه يا نجم و ايه اخبارك ... بقالك كتير منزلتش بوستات .. ولا يا ترى انا اللى بقالى كتير مش متابع .. المهم
انا عرفت انهم سفلتوا الشارع عشان عموا اوباما .. و النبى يا زيكا ممكن حد يصورلى اسفلت الشارع عشان املى عينى منه
نورتنى يا باشا و اكيد ليا زياره عندك قريب

micheal يقول...

اييييييييييييييييييييه..فكرتنا بايام الكلية يا عم والله
دنيييييييييييا
أتمنالك السعادة وةالتوفيق يا باشا
سلام

Che يقول...

مايكل باشا
سعيد انى فكرتك بايام زمان .... و تسلملى يارب
نورتنى يا باشا