الأحد، 21 يونيو 2009

رشه جريئه و ما لها من تبعات عميقه

كنت من اسبوعين تقريبا قاعد فاضى مش لاقى حاجه اعملها .. المهم قلت اتفرج على اى حاجه فى الدش لقيت فيلم رشه جريئه بتاع اشرف عبد الباقى و ياسمين عبد العزيز ، مش عارف اذا كنتوا فاكرين الفيلم ولا لا .. بس ده الفيلم اللى اشرف عبد الباقى جه من بلده عشان حلمه يبقى ممثل و ساعتها قابل ياسمين ، و ان ان ان تششش .. جمع بين الحسنيين بأه ممثل و ياسمين حبته .. المهم مش موضوعنا ...... الفيلم كان فيه مشهد لما اشرف كان بيمثل على المسرح و واحد من الجمهور قعد يقوله حرام عليك .. اتقى الله .. يا كفرة .. و كلام زى ده .... هو اضايق جدا بس ساعتها ياسمين قالتله انه مش هو المقصود بالكلام ده شخصيا ، و ان الراجل كان بيحاول يورى الناس اللى فى المسرح انه احسن منهم ... نوع من انواع التطهير الذاتى بس التطهير الذاتى او الخلاص الكاذب مش الحقيقى ... و نزلوا ساعتها بأغنيه جامده جدا .. " عيل صغير عمل صوابعه كدهه مسدس و قال لصاحبه طريخ طراخ ... قام صاحبه طاوعه و ساقله فيها و اهله قالوا ده طخه طخ " ... و ياسمين بعد كده قلتله متبوظش المسرحيه .. الراجل عمل متدين و انت عملت متضايق تبقوا خالصين
مقدمه طويله شويه بس ضروريه مش من قبيل اللت و العجن او ارغى مثلا ... انا لما شفت المشهد ده و سمعت الاغنيه دى ساعتها قعدت افكر شويه .... انا كنت بابقى متضايق جدا من الناس اللى بيستنكروا حاجات و بعد كده الاقيهم هما نفسهم بيعملوها ... من ضمن الناس دول شويه مدونين و مدونات ... انا هنا مش باتكلم على اشخاص عشان محدش يفهمنى غلط انما بأتكلم على موقف و مبدأ .. و انا مش من هواه انى اتكلم عن نفسى كتير ، بس برضه مينفعش احكى حاجه حصلت لحد تانى مع ان الموضوع ده حصل مع ناس كتير و انتوا يمكن تكونوا منهم ... هاديكوا مثل ... فى شخصيه على البلوجز قعدت شويه تنصحنى انى استخدم الفاظ احسن من اللى انا بأستخدمها ، و انى اقرب من ربنا و انى ابقى متدين ، و الشخصيه دى عملت بوست لمناقشه حالتى انا شخصيا دون ذكر اسمى ، و ناس قعدت ترد عليها و تقول ربنا يهديه ، و يا رب يبقى كويس و كلام كتير زى كده ظاهره التقوى و الله اعلم بباطنه ... المهم نفس الشخصيه دى مشهورة انها اى حد بيختلف مع رأيها او توجهها الفكرى او العقائدى بتقول عليه كلمه " بروح امه " و هى دى الكلمه اللى بتستخدمها بالنص ... الشخصيه دى المفروض انها شغاله فى مجال التعليم و انها كمان فى اعلى السلم فى المجال ده ... قياسا على طبائع الاشياء ، و على فكرة فكره القياس مش غلط لانها الاساس فى اى حاجه و اشهر مثال على كده بيت الشعر العربى القديم اللى بيقول " و اذا كان رب البيت بالدف ضارب ... " .. يبقى المفروض انى انا اللى مش دكتور جامعه ولا حاجه بالعكس انا كنت فاشل جدا فى الدراسه لما الاقى الشخصيه دى بتستخدم كلمه " بروح امه " يبقى انا استخدم كلمه ايه فى وصفى لحد انا مختلف معاه ... و يبقى الناس اللى فى الشارع تستخدم ايه فى كلامها ( هما الحقيقه بيستخدموا كلمه تانيه برضه من كلمتين و برضه اخرها كلمه امه بس الكلمه الاولانيه انا مش هاقولها عشان عيب ) ... عادى .. هى حرة و مدام متصالحه مع نفسها يبقى انا مالى .. بس الغريب ان نفس الناس اللى كانت بتهاجمنى هى هى نفس الناس اللى بيقعدوا يقولها ربنا يجزيكى خير ... الحمد لله انه عندنا واحده زيك ... ربنا يكتر من امثالك ... زى ما تكون هى مثلا رابعه العدويه و ربنا بعتهالنا تانى ..... ده مثال
مثال تانى .... شخصيه جامعيه ذات دراسه علميه افتت ان مفيش حاجه اسمها تحور الفيروسات و ان انفلونزا الخنازير دى اتطورت فى المعامل البيولوجيه الامريكيه .. و ادت مثال بفيروس الايدز ... الشخصيه دى فى لحظه تجلى ( لانها فى الغالب كانت متقله الصنف شويه ) لغت علم كامل اسمه علم الفيروسات او Virology و ان الكلام اللى قعدنا ندرسه حوالين التحور و شريط الدى ان ايه و الاشكال المختلفه من الفيروسات ده كلام فاضى و عباره عن معلومات حشاشين و احنا درسناها .... انا مش هاجادل فى ده لانه غلط و انا ابقى غبى زى الشخصيه دى لو جادلت فى حاجه واضحه و مثبته علميا ... بس فى نقطه محيرانى ... الشخصيه دى بتبان على انها قمه التدين .. لو انا افترضت ان مفيش حاجه اسمها تحور الفيروسات ... وان الفيروس ده اتعمل فى معامل امريكا البيولوجيه كسلاح .. هيكون اتعمل منين ... اخترعوه مثلا .. لو اخترعوه يبقى التسميه الاصح انهم خلقوه و ان معنى كده انهم لو خلقوا فيروس يبقى بكره يخلقوا بنى ادم و ساعتها يبقى مفيش ربنا ( استغفر الله العظيم ) مدام احنا بنعرف نخلق .. و طبعا الكلام ده غلط لان ربنا هو اللى بيخلق كل حاجه ... يبقى عندنا الاحتمال التانى .. انهم طوروه من فيروس موجود فعلا بس غيروا فيه شويه صفات وراثيه ... و التطوير ده هو اللى اسمه التحور يا ساده ... لان مش شرط التحور يتم بطريقه طبيعيه و ممكن يتم بطريقه صناعيه ... الغريب ان الناس اللى علقت على الموضوع ده قعدوا يشكروها على الفتح العلمى ده و الحقائق المذهله اللى هى قالتلهم عليها و على نور العلم اللى هى ولعته عشان تنتشلهم من ظلمات الجهل و التخلف و طالبوها بزياده المعلومات العلميه و كان ناقص الاقى حد منهم يقولها الله يا ست ولا اعد ... انا مش معترض لان فى ناس من دول دراستهم كانت ادبيه و يمكن ميعرفوش الكلام ده .. بس لما الاقى خريجين طب و صيدله و علوم موافقين على الكلام ده يبقى لازم اسأل امال الناس دى اتعلمت ايه فى كلياتها ... مع العلم انى سألت ناس لسه بتدرس و قالولى انهم لسه بيدرسوا التحور و الطفرات .. يعن العلم اللى انا درسته ماتغيرش مثلا و انا مش عارف ... ولا يمكن عشان الشخصيه دى فى سلك التدريس يبقى كلامها قرآن منزل و انا معرفش ... ده كان مثال كمان
اخر مثال عشان انا مرارتى ابتدت توجعنى و انا مش حمل عمليات .... انا ما اتكلمتش على خطاب اوباما خالص .. قريت كتير حواليه تعليقات سياسيه محترفه و اراء ناس بسيطه و كلام ناس من اللى هما بيعملوا حاله اشبه بالزراط الفكرى ( الاول كان فيه قئ فكرى و دلوقتى زراط ، تحس اننا قاعدين فى حمام مش فى مدونه و انا من موقعى هذا هاسميه حمام الفكر ) و سمعت الخطاب و عندى فيديو ليه و قريت نص الخطاب عشان ميبقاش فيه تأثر بحاله الكاريزما العاليه اللى عند اوباما و اتكلمت مع ناس كتير حوالين الخطاب ده ... اغرب حاجه ان فى ناس زعلانه جدا من اوباما منهم الشخصيه بتاعت " بروح امه " و شخصيه تانيه تابعه ليها فكريا و الشخصيه التانيه دى اييييه .... تلميذه رابعه لان رابعه هى اللى بتقول " بروح امه " ... انا عن نفسى شايف ان الراجل كان صريح معانا .. قال ان علاقه امريكا باسرائيل غير قابله للكسر و ده كلام صح و لو اى حد افتكر اى حاجه تانيه يبقى حمار ... و قال انه هيحاول يفعل حل الدولتين على ارض الواقع .. و اتكلم على المحرقه ( مع اعتراضى على ارقام المحرقه و على المبالغه فى وصفها بس انا مش بأنفيها .. هى حصلت بس مش بالاعداد دى ولا بالبشاعه دى .. و على كل دى كانت ايام حرب و كل شئ مباح فى الحروب ) .... المهم و انا باتكلم مع تلميذه رابعه ماكنش عاجبها كلام اوباما .. حقها هى حره .. بس يا ترى احنا كنا مستنين منه ايه .. يقولنا يالا نرمى اسرئيل فى البحر سوا .. و لما اتكلمت على حل الدولتين و قلت ان الفلسطينين نفسهم عايزين الحل ده قالتلى مش مهم الحكام .. المهم المسلمين ( و خدوا بالكوا من كلمه المسلمين دى لانها كده حرمت اى واحد فلسطينى مسيحى من حق انه يدافع عن بلده لانه مش مسلم ) .. و قالتلى ماينفعش نقول ان فيه فلسطينين باعوا ارضهم لليهود ( مع ان ده حصل و منهم ناس عايشين ولا اغاخان نفسه ) ... و اننا المفروض نحارب .. و اننا .. و اننا .. و كلام كتير ... انا سألتها سؤال واحد بس مخدتش رد عليه لغايه دلوقتى والله اعلم هاخد رد عليه ولا لا ... يا ترى اشمعنا احنا المصريين عرفنا نطلع اليهود من سينا بعد 6 سنين و الفلسطينين مش عارفين يطلعوهم من فلسطين بعد اكتر من 60 سنه .. مش كده يبقى فى حاجه غلط .... على فكره كل امال العرب مجتمعين بالنسبه لفلسطين و اسرائيل العوده لحدود يوم 4 يونيه 1967 و محدش خد باله ان اوباما خطب عندنا يوم 4 يونيو 2009 .. اختيار اليوم مش صدفه ، بس مين اللى يفهم
و اخيرا انا هانهى كلامى بكلام نجيب سرور .. العبقرى اللى احنا قتلناه و قلنا عليه زنديق و كافر و ابن كلب مع ان كلامه حكم مع انه قاله من اكتر من 50 سنه برضه و الكلام اللى انا هاكتبه هيكون ناقص لانه انا مش باكتب الالفاظ دى فى المدونه و الكلام هيكون على اننا نكون واقعيين شويه مش عايشين فى عالم الاحلام

يا عم سيبك بقى و قولى كلام ينفع
و .... ام الشرف نفعنى و استنفع
الفن يا عم بورصه يعنى خد و ادفع
و وطى .... و صلى على اللى فيك يشفع
و قلنا ننضف بقى قالوا بلا وكسه
والله لتحصل بدال النكسه ميت نكسه
سلالالالالالالالالام

هناك 40 تعليقًا:

الست فرويد يقول...

ايه يا عمرو ده ؟
كله ده من الاغنية :)
انا بحبها وعمرها ما عملت معايا مود الفلسفة العالى اللى جالك ده
هههههه

خمسة بجد بقى
باختصار متشغلش بالك بالناس المدعين دول
علشان اللى بيقول حاجة ويعمل غيرها
ويمثل دور ملوش اثر جوه
ده شخص غير متزن نفسيا لا يستحق منك الا الشفقة

والناس ده كتير وبتضحك على نفسها قبل ما بتضحك على الناس علشان توصل لحالة وهمية من الاستقرار

المهم متزغلش انت نفسك وهدى اعصابك :)
احسن انت دخلت السياسة على الطب على الدين على كله

وعملت بوست من عجينة غضب
هيحرقهم كده من غير نار ههههههه


دمت بل خير وسعادة
وارق التحية لك

Che يقول...

الست فرويد
والله انا كنت فعلا مفقوع من الموضوع ده .... بس بعد الاغنيه خلاص ... و فعلا ابتديت اعمل بنصيحتك و انفض للناس دى و اشيلها من دماغى ... و معلش على عجينه الغضب دى
نورتينى يا جميل

adel يقول...

أنا بحب الفيلم ده جدا و الاغنية اكثر من رائعة لانها فلسفية جدا زي ما انت قلت و الفيلم سينمائيا جيد
بس مش هتكلم عن السينما هنا كمان :):)

التطور معروف عليما ولا مؤاخذة البني ادم العادي اللي مسمعش عنه يبقي جاهل و اللي سمع و قال مش موجود يبقي حمار و خسارة فيه العلام حتي لو دكتور جامعة
انا عندي دكاترة علي فكرة حمير في الجامعة و احنا بنفهم اكتر منهم صدقني

الالفاظ دي حرية شخصية مش عاجبك متدخلش تقرا ...انا عن نفسي مبحبهاش بس بقرا الناس كلها و افتكر حاجة حصلت ....انا في مدون كوميدي كتب مقالة تحفة بس جاب الفاظ بقول لواحدو مدونة علي الحوار فراحت قالتالوا و شالهم من غير ما اعرف ...دي لفتة طيبة منه مع اني معترضتش لانه حر و انا كده كده هقرا له

و انا اتكلمت عن اوباما بضحك و هزار بس كان فصدي جد و الناس معجبهاش ...تاني يوم لفيت فيلم مكسر امريكا اسمه
THE OBAMA DECEPTION
و بعته لبعض الناس فسكتوا
احنا مش ولاد امريكا ولا اي ولة و امريكا مش هتقطع علاقة مع حد عشانا ان شاء الله حتي نيبال مش اسرائيل و ياريت من الناس اللي بيدفعوا عن قضية فلسطين غيابيا يقروا تاريخ شوية ....انا عن نفسي بحب فلسطين و ليا اصحاب هناك بس رأي معترض مع اللي بيقول اسرائيل هتمشي ....علي انهي اساس !!!!!!!!

اختيار نجيب سرور جامد و الراجل ده احسن من كتب شعر في بلدك اصلا :):):)

زهور الامل يقول...

ازيك يا عمرو
انت مش خمسة جد بس انت جد في جد في جد
في ايه في القران فيما معنها
يامرون الناس بالبر وينسون أنفسهم افلا يعقلون
وده اللي احنا ماشيين عليه اليومين دول
كل واحد بيحاول يعمل فزلوك وعايز يغلط غيره وهو الغلط راكبه من فوقه لتحته
يا عم كبر دماغك واكتب بالاسلوب اللي يعجبك انت وشايف انه بيظهر اللي جواك ويظهر شخصيتك
احنا بقينا في عالم غريب وكله تناقضات ومتعرفش ايه الصح من الغلط
تحياتي

Che يقول...

عادل باشا
واحشنى جدا يا عدول .. عامل ايه يا واد و ايه اخبارك و اخبار مصر على حسك كده .. طبعا يا باشا انا ماتكلمتش على الفيلم سينمائيا عشان لا يفتى و مالك فى المدينه .. اى خدمه يا عم عادل .... هههه
اللى انت بتقوله على اساتذه الجامعه ده يا بنى انا عارف اضعافه ... ده انا قضيت عقد كامل من حياتى معاهم و شفت مصايب .... و بالنسبه للالفاظ فانا عارف كده انا باتكلم على الازدواجيه فى المعايير اللى هى نفس النقطه اللى بنلوم امريكا عليها فى علاقتها معانا كعرب و مع اسرائيل
و انا اتفرجت على الفيلم ده و جامد على فكرة .. تصدق انهم ابتدوا ينتقدوا اوباما و الراجل لسه طازة كده
و طبعا يا باشا نجيب سرور ده برنس و احنا قدرناه بعد ما مات و مبسوط ان الاختيار عجبك
نورتنى يا باشا

Che يقول...

زهور الامل
والله النهارده يوم نادر من الايام اللى انا فيها جد و غتت و كئيب كده .. بس معلش ... المره الجايه هكون خفيت و رجعت خمسه جد بس مش جد فى جد
والله انا عارف الايات دى كلها .. و باستشهد بيها .. بس المشكله ان الناس دى مش عارف عندهم قرآن غير بتاعنا ولا احنا اللى فاهمين القرآن غلط ولا ايه ... الله اعلم
جامده جدا كلمه فزلوك دى .. ربنا يجازيكى خير عشان ضحكتينى فى عز النكد اللى انا فيه
انا فعلا باعمل اللى انتى بتنصحينى بيه ... بس انا كنت مفقوعه مرارتى بس
نورتينى يا جميل و ميرسى على التعليق

Magi Mostafa يقول...

فيلم رشه جريئه من افلامى المفضله مع انى بقالى سنين مشفتهوش هبقى اراجع عليه

لكن فعلا زى مانت قلت اى حد بيقول اى حاجه والناس عادىوراه وولاالضالين امين لانهم اتعودوا على كده مبقوش يشغلوا عقلهم
اتعودنا ان دكتور الجامعه بيفهم فى كل حاجه وان كل واحد قال حديث او ايتين يبقى ده عالم بالدين ومن ده كتير والى يعيش ياما يشوف

ديالا يقول...

اتنصحون الناس بالبر وتنسون انفسكم


عادي جدا الامثله دي موجوده تقولك حاجه وعلي طول يعملوا عكسها بيكيلوا الامور بمكيالين مكيال للناس ومكيال ليهم


فمتخدش في بالك

اما بقي حوار اوباما انا بامانه مرضتش اتفرج عليه ولا حتي اسمعه

هيعملنا ايه يعني

احنا بس الي نقدر نعمل عشان دي بلدنا فلو مقدرناش نعمل

يبقي مين هيعملنا

Che يقول...

ماجى
طيب و بعدين يا ماجى هنعمل ايه ... الناس دى قربوا يبقوا الاساس فى حياتنا ... و يا ترى احنا خلاص مبقاش عندنا دماغ نفكر بيها لدرجه اننا بنسمع كلام اى حد و بنمشى وراه
مش عارف اقول ايه اكتر من كده ... نورتينى يا ماجى

Che يقول...

ديالا
صدق الله العظيم ... والله انا متفق معاكى فى اللى انتى قلتيه
و فعلا احنا مش هنقدر نستنى مساعده من اى حد قبل ما احنا نساعد نفسنا الاول
نورتينى يا جميل

اسماء عوني يقول...

الناس اتجننت يا عمرو
كل واحد بيقول اللي بيجي علي دماغه خلاص
والكلام ده بالذات ماينفعش بالذات في المواضيع العلميه او السياسيه ممكن في المواضيع الاجتماعيه يبقي كل واحد له راي
لكن موضوع علمي زي ده متهيالي محتاج منهج
عموما
انت ازيك وايه اخبارك
طمنا عليك يا عم

Sweet Violet يقول...

اولا الفيلم ده فعلا انا بحبه جداااا

و الاغنية لما سمعتها على فكرة عملت معايا زيك بالظبط

^_^

^^^
انا كنت كتبت بوستين عندى بخصوص الجزء الاول من البوست

على اللى بيعترض على شئ و هو نفسه بيعملوا

و اللى بيقولوا شعارات و هما اصلا بيعملوا عكسها

http://upstream2.blogspot.com/2008/09/blog-post_25.html

http://upstream2.blogspot.com/2009/03/blog-post.html

بس انا عندى اعتراض على كلمة متصالحة مع نفسها

مافيش حد متصالح مع نفسه هتلاقى كلامه عكس افعاله

^^^^
الناس اللى كانت منتظرة ان اوباما يحرر فلسطين و يعدل حال البلد ..الخ

بجد انا كنت مستغربة جداااا من فكرهم ..لان اوباما ليس الا رئيس دولة لها سياسته مش هيغيرها هو علشان خاطر سواد عيوننا o_o

و كمان بلاش تدقق قوى فى كل حاجة علشان انت اللى هتتعب فى الاخر

^_^

Che يقول...

اسماء
ازيك يا سمسم عامله ايه و مش باينه ليه ... بالنسبه لموضوع الناس اتجننت ده فانا معاكى لان كلنا مجانين بدرجه ما ، بس الفكرة ان فى ناس جنانها بزياده شويه
و برضه موافق على ان كل واحد بيقول اللى يجى على دماغه و خلاص بس المثل بيقول اذا كان اللى بيتكلم مجنون يبقى اللى بيستمع عاقل .. و كده يبقى احنا كلنا مجانين اللى بيتكلموا و اللى بيستمعوا
بالنسبه للموضوعات العلميه و الكلام فيها فواضح انك مش بتشوفى تليفزيون .. الماده المفضله للفتو دلوقتى هى العلم تطبيقا لنظريه الزعيم ان العلم لا يكيل بالبتنجان
و اخيرا انا كويس و تحت النظر يا كابتن
نورتينى يا كابتن و متغيبيش كده

Che يقول...

فيلوت
الفيلم ده تقريبا من الكلاسيكيات و احنا مش واخدين بالنا لان تقريبا كل الناس معجبه بالفيلم و بالاغنيه
بالنسبه للبوستين اللى كتبتيهم انا هاقراهم حالا و اعلق عليهم .. بالنسبه للاعتراض احنا ممكن نتناقش حواليه .. انا عكسك شايف ان الواحد ممكن يكون بيعمل عكس كلامه و متصالح مع نفسه لانه مش حاطط نفسه مع الناس اللى بيطبق عليهم قواعده و بيكون شايف نفسه فوق القواعد دى و بالتالى بيكون هو صح و باقى الناس غلط
و اوباما آخر حاجه انتى قلتى المفيد .. الراجل اكيد مش هيشتغل لمصلحتنا احنا و اكيد هيشتغل لمصلحه بلده و لو عمل اى حاجه غير كده يبقى خاين و متهم بجرم الخيانه العظمى كمان و يتضرب بالنار
و اخيرا انا ساعات كتير والله بفوت بس بأجى عند نقطه معينه و بحس انه خلاص التفويت مينفعش ... و فى الاخر انا اللى بتعب زى ما انتى قلتى .. بس بتعب شويه صغيرين لانى برجه افوت و ما ادققش أوى
نورتينى يا جميل

سارة نجاتى يقول...

و اللع يا عمرو أنا البوست ده خلانى احترمك أوى
حساك صادق كده فى كلامك
أولا أنت لازم ناس كتير ترفضك كفاية أن اليوزر نيم بتاعك "تشى "

ثانيا : لا أصولى و لا سلفى و لا بتدعى حاجة منهم مع أن دى الموضة اللى ماشية اليومين دول

و بعدين هو ايه المشكلة لما حد يشتم ؟؟
يمكن تستغرب كلامى ؟؟ بس أنا بأرتاح للشخص اللى أقابله لاول مرة و الاقيه بيشتم , لأنه محاولش ينتجمل أو يدارى مشاعر السخط اللى عنده و عبر عنها بتلقائية

و بعدين طب ما يوسف شاهين و أحمد فؤاد نجم ( و الاتنين اعلام فى تاريخ الفن و الأادب فى مصر ) كانوا بيشتموا و يعبره عن غضبهم بصراحة فى حوارتهم و فنهم كمان

عمرو , فكك

Che يقول...

سارة
ازيك عامله ايه يا جميل و مش باينه ليه ليكى كتير
والله انا زعلان ... احترمتينى من اخر بوست بس ... لا بجد زعلان
بالنسبه لاختيار اسم تشى فانا اخترته عشان هو رمز للثورة مش مجرد مشهور و خلاص
ثانيا انا مش اصولى ولا سلفى ... مش شرط عشان ابقى مسلم صح انى ابقى سلفى او اصولى ... ده غير ان تفكيرهم مايناسبنيش
بالنسبه للشتيمه فانا مش بحب الشتيمه مع تسليمى الكامل ان لسانى زفر و بعرف استخدمه بشكل كويس ... طبعا اختيارك ليوسف شاهين و عمنا احمد فؤاد نجم دول فعلا اعلام ، و زودى عليهم عمنا كلنا محمود السعدنى
و فكتنى خلاص يا ساره
نورتينى يا جميل

حلم بيعافر يقول...

ابوخ حاجة فى البنى ادم
هى انه يتظاهر بصفات مش فيه
ساعات تحس ان اللى بيتكلم ده ولى ولسه له شوية ويطير من كتر المواعظ والكلام اللى بيطيره
لكن تيجى تشوفه
تلاقيه فاضى
ويمكن تلاقيه بيعمل عكس اللى بيفوله بالظبط

Che يقول...

حلم بيعافر
اولا اهلا بيك لاول مره منورنى فى المدونه و يارب ماتبقاش اخر مره
كل اللى انت قلته صح ... و ده بالظبط السبب اللى خلى ناس كتير مش طايقانى ... انا بكتب فى المدونه زى مابتكلم فى الحقيقه ... يقولوا خليك مؤدب
بقول انى مش شيخ و انى الدنيا بهدلتنى و علمتنى الصياعه .. يقولوا ربنا يهديك
بقول انى مش منافق و بوشين .. يقولوا ده آداب عامه لازم المرء يلتزم بيها ... مش عارف اعمل ايه
نورتنى يا باشا

Polka Dotted يقول...

الناس اللى بيستنكروا حاجات و بعد كده الاقيهم هما نفسهم بيعملوها
don't get me started on that !!!

w abt your friend who wrote a post abt you... look we can see things we don't like and advice people we care for... but its not our place to JUDGE !

w kolo kooooooom w el nas eli mesh fahma ay 7aga w btetkalem fi kol 7aga... zai nas la tafkah she2 fil seyasa b3d 7'etab obama sb7an allah kolo b2a yefham fil seyasa w da7'len katben ra2yohom

boss ya sadiki... bala waksa !

Che يقول...

بطابيط
شكلك مستفزة على الاخر من الناس دى ولا ايه
about the judgment u r right , only GOD can judge me
بس تقولى لمين و تفهمى مين و كله فاكر انه حامل مفاتيح الحكمه الالهيه
الناس بتوع السياسه دول بأه حكايتهم حكايه ...dont get me strated on that ... جمله حلوة أوى
و فعلا بلا وكسه
نورتينى يا جميل

*البت المشمشية *حلوة بس شقية * يقول...

يا عم سيبك بقى و قولى كلام ينفع
و .... ام الشرف نفعنى و استنفع
الفن يا عم بورصه يعنى خد و ادفع
و وطى .... و صلى على اللى فيك يشفع
و قلنا ننضف بقى قالوا بلا وكسه
والله لتحصل بدال النكسه ميت نكسه
هههههههههههههههههههههههههههههه
انتا يا واد انتا بتجيب الكلام ده منين بس

هو انا اساسا
من محبين اشرف عبد الباقى لانو بجد انسان غايه فى الاحترام
والافلام طبعا عارفينو
كل شوية يجبوه

Che يقول...

شوشووووووووووو
الكلام اللى فوق ده مش كلامى والله يا جميل ( لو كلامى مش هانكره يا سعاده البيه ) ... هههه
الكلام ده بتاع نجيب سرور فى اشهر قصيده ليه و اسمها الاميات .. بس انصحك انك تقريها على مسئوليتك الخاصه لانها للكبار فقط
الفيلم ده جامد جدا جدا جدا اخر حاجه
نورتينى يا جميل و ابقى طلى عليا كل شويه

The illusionist يقول...

يا عم سيبك بقى و قولى كلام ينفع
و .... ام الشرف نفعنى و استنفع
الفن يا عم بورصه يعنى خد و ادفع
و وطى .... و صلى على اللى فيك يشفع
و قلنا ننضف بقى قالوا بلا وكسه
والله لتحصل بدال النكسه ميت نكسه

هههههههههه
يا خبر ابيض
كل ده
بس اهم شئ انت بتحاسب على نفسك الحكايه مش ناقصه عمليات والذى منه
وبالنسبه للنكسه
فهى قري

Che يقول...

THE illusionist
اهلا بيك عندى اولا و معلش انك جيت فى البوست ده بس خليها عليك المره دى و البوست الجاى هيكون فرفشه
نيجى بأه لنجيب سرور .. الراجل ده عبقرى .. كل ما اقرى اللى كتبه من 50 سنه احس زى ما يكون لسه كاتبه النهارده
و طبعا لازم احاسب على نفسى لانها بجد مش طالبه عمليات و هم ... و النكسه حصلت خلاص
نورتنى يا باشا

غير معرف يقول...

ربنا يكرمك وجزاك الله خيرا ويكفى ان فى ربنا مطلع
انا ماردتش عليك يعنى حجتك اقوى منى
ماشي انا ماردتش
يكفى ان فى رب شاهد والحمد لله ان الرب اللى بعبده عادل
كمان مره شكرا جدا جدا جدا
ويارب الامر اليك

Che يقول...

غير معرف
كالعاده تحويل كل حاجه لحاجه لشخصيه ، مع انى لو كنت عايزها تبقى حاجه شخصيه كنت نشرت انا كنت باتكلم مع مين .. بس زى ما انا قلت قبل كده انا باتكلم على مواقف مش على اشخاص

The illusionist يقول...

والله تلاته انت عسل
ومعاك فى البوست الجديد

Che يقول...

THE illusionist
صادق من غير حلفان و ربنا يخليك يا باشا
و كلنا مع الله ان شاء الله يا عمونا و تنورنى
نورتنى يا باشا

soaad fakoory يقول...

اول مره ازور المدونه ..
كل اللى بيحصل ده من حاجه اسمها التدين الشكلى المظهرى وكل واحد بينافس الآخرين على انه اكثر منه ايمانا وهم غايه فى الفساد ..
ولو كل واحد منهم خلاه فى نفسه .لا ضرورى يتمنظر على الآخرين ..
واختيار ابيات نجيب سرور..جميل.

سالى فوزى يقول...

الشخصيات الثلاثه اللذين جاؤا فى البوست منتشرين جدا مش فى المدونات فقط بل فى الحياه العاديه انا كان عندى استاذ فنون جميله بيعلمنا الصوير او الرسم وبيرسم خطوط جميله
وهو بيرسم اشوفه بيتمتم بكلمات غير مسموعه فسألته مره بيقول ايه طلع انه بيستغفر ربه وهو بيرسم ..واول مايخلص يقطع اللوحه !!!!!
تناولك لهذه الشخصيات ملىء بالسخريه
والضحك ..
اسعدنى مرورى وشكرا..

Che يقول...

soaad fakoory
اهلا بيكى اول مرة و يارب ماتبقاش ماتبقاش آخر مرة
فعلا هو تدين مظهرى ، و التدين المظهرى ده ظاهرة موجوده فى كل الاديان و كل البلاد .. بصى على الحرب اللى بوش ابتداها تحت فكرة الحروب الصليبيه ، بصى للتطرف الموجود بين المسلمين و المسيحين عندنا فى مصر ، و المثال الاكبر اسرائيل اللى قايمه اساسا على فكرة الارض الموعوده
سعيد ان اختيار ابيات نجيب سرور عجبك
نورتينى يا جميل

Che يقول...

سالى
اهلا بيكى لاول مره و مستنى الزياره الجايه
الشخصيات التلاته فعلا كادوا يبقوا هما الاساس ... انتى بأه جيتى على الجرح .. انا مش عارف اذا كنتى فاكره موضوع تحريم الموديل عندكوا فى فنون جميله و انا شخصيا مش عارف اذا كانوا لسه مفيش موديلز ولا رجعوهم ..بس الاستاذ ده عنده حاله عاليه من الفصام ... يعنى مدام انا مقتنع ان اللى بعمله حرام لدرجه انى استغفر ربنا و انا بعمله .. يبقى ايه اللى جابرنى اعمله
شرفنى مرورى عندك و منورانى

دون كيشوت يقول...

طول عمرك جامد ياواد ياعمرو بس الناس دي احنا بنقلبلهم من زمان لو تفتكر بس ايه اللي فكر كبيهم دلوقتي؟؟؟

Che يقول...

دون كيشوت
حبيبى يا عم نادر ... عندك حق والله انى الناس دى بنقابلهم من زمان ، يا ترى فاكر الاخت بتاعت انت قدوة للشباب الصغير اللى هينحرف لو قرى اللى انا باكتبه ولا نسيتها
و ايه اللى فكرن بالناس دى فمن الواضح انى مكنتش لاقى حاجه انكد بيها على نفسى و لقيتها
شد حيلك فى المدونه بتاعتك يا ندور

Unknown يقول...

عمرو

طوّل روحك ليه فاتح النار عالكل هيك؟
وبعدين يا سيدي انسى؛ انتا موضوع الناس شورايهم فيك ليه هيك مغلبك؟

صعب ترضي كل الناس فأحسن تطنش اصفى راس :)

بس جد من الاخر:)

Che يقول...

مياسى
انتى فين يا قمر .. طولتى الغيبه أوى المرة دى
والله يا مياسى انا مش فاتح النار على حد .. الفكرة اننا كجوزاء مينفعش نسيب حد يقول علينا حاجه و نسكت .. و بعدين انا مش هامننى رأى الناس .. انما هما اللى مش عايزين ينسونى مش انا اللى مش عايز انساهم .. يعنى رضينا بالهم و الهم مش راضى فينا
و انا بدور على انى ارضى واحد بس .. عمرو
Gemini : Reflection Of Perfection
نورتينى يا قمر

micheal يقول...

يا عمرو
أنت فيلسوف بجد..تفكيرك عاجبني جدا
مش عارف حتصدقني ولا لأ لو قلتلك أن المشهد بتاع رشة جرئية جه في دماغي امبارح بالليل رغم أني مشفتش الفيلم من مدة كبيرة جدا
الأقنعة والاستهبال بقي الشيء العادي في حياتنا
مقتنع جدا بكلامك عن تحور الفيروس وعقلي رافض يصدق حاجة تانية غير كده
بجد أنا سعيد جدا اني قرأت البوست ده واتعلافت علي مدونتك
تحياتي

Che يقول...

مايكل باشا
يا عم مايكل انا لا فيلسوف ولا حاجه ، انا واحد عايشها و خلاص
و طبعا يا باشا مصدقك ، انت هتكدب ليه ... بينا قضايا او محاكم لا سمح الله
الاقنعه دى مش شئ عادى فى حياتنا يا مايكل ... انما تحس انها هى الاساس دلوقتى
انا اسعد يا باشا انك قريت الموضوع و عجبك لدرجه انك علقت عليه
نورتنى يا باشا

Zika يقول...

يا عمنا الدنيا كلها بقت كده كله بيفتي وخلاص وكل واحد قراله كلمتين صدفه بيتنطط بيهم علي اللي جمبه :D
هو انت ليه حاطط نقط مكان كلام في القصيده :P

Che يقول...

زيكا باشا
صدقت يا زيكا والله ... كل واحد بيفتى و كل واحد قراله كلمتين بيتنطط بيهم على اللى جنبه
و انا حاطط نقط فى القصيده عشان انا بتكسف ....... ههههههههه
نورتنى يا زيكا