الاثنين، 9 مارس 2009

خمسه اوسكار

البوست ده اهداء لزيكا و مياسى و عادل باشا لانهم اكتر تلاته مدونين مهتمين بالسينما و صناعه الافلام انا اتعرفت عليهم
و انا ممتن جدا لكل الناس اللى سألوا عليا لما طولت الغيبه شويه و اخص منهم بالذكر زيكا و مياسى و منوش و عاشقه و غلبانه و حروف بس معلش كان عندى ظروف كتير ملخبطه و الحمدلله ابتدت تتعدل
نيجى للبوست نفسه ... البوست النهارده على افلام الاوسكار ... الافلام السنه دى كلها حلوة .. اغلبها مميز ، طبعا ممكن واحد عبقرى يقول ان السبب فى ده انها افلام الاوسكار انما كان بيجى سنين تلاقى فيلم او اتنين بس اللى مميزين و الباقى افلام كويسه بس مش لدرجه التميز ، و بما ان الافلام كتير فهنتكلم النهاردة عن خمس افلام بس و نخلى الباقى لو فى العمر باقى

فيلم The Dark Knight كان اجمل فيلم انا شفته فى سنه 2008 و الحوار فيه مكتوب بحرفيه عاليه جدا .. الفيلم اكتسب شهرة فوق شهرته لما الممثل اللى قام بدور الجوكر اتوفى بسبب جرعه ادويه زياده و كانت ادويه مش مخدرات .. الممثل ده و اسمه Heath Ledger عمل حرفيا و فعليا دور عمره ، كان دور مميز جدا تفوق بيه على Jack Nicholson الجوكر القديم و واحد من اكتر الممثلين المعروفين باجادتهم لادوار السايكو ، و مش هاكون باكدب لو قلت ان جايزة احسن ممثل مساعد اللى كان مترشح ليها هيث ليدجر هى الجايزة الوحيدة اللى انا كنت عارف من هيكسبها قبل الاوسكار ، و عجبنى انما لما اسمه اتنده الناس اللى فى قاعه كوداك كلهم قاموا وقفوا لانهم هنا بيحيوا ممثل راحل مش مجرد ممثل خد الجايزة و فعلا تفوقه هيكون عقده كبيره للى هيجى بعده عشان يمثل دور الجوكر

فيلم The Wrestler واحد من اجمل الافلام الانسانيه اللى ممكن تتفرج عليها ، القصه بدون حرقها للى ماشافش الفيلم لسه عباره عن حياه مصارع اكتشف انه لو عايز يعيش لازم يبطل المصارعه ، المشكله و الحبكه الدراميه فى الفيلم انه مابيعرفش اى حاجه فى حياته غير المصارعه ليه بنت مابيشوفهاش ، عنده علاقه براقصه استربتيز بس علاقه مش مستقرة و من ناحيته هو اكتر من ناحيتها هى ، وظيفه عبارة عن مجرد دخل ثابت مش اكتر .. الحاجه الوحيده اللى بتحسسه انه لسه عايش هى المصارعه و دلوقتى عشان يفضل عايش لازم يسيب الحاجه اللى بتحسسه باحساس الحياه ... دور متميز ل Mickey Rourke فى دور المصارع و هو فعلا قال انه كان بيمثل قصه حياته .. ميكى فى التسعينات كان ممثل وسيم و موهوب جدا .. ادمن المخدرات و بعد عن السينما و اتجه للملاكمه و كسب حزامين فيها و لعب مصارعه شويه ، قعد يتعالج نفسيا 12 سنه منهم تقريبا 5 سنين كان بينام فى الدولاب و كل الناس قالت لا يمكن يرجع يمثل تانى بس هو اثبت انه مفيش مستحيل ( المعلومات عن ميكى رورك كان مصدرها الاساسى صديقى امير لذا وجب التنويه و الشكر ) .. زى ما قلت .. فيلم جميل

فيلم The Reader الفيلم ده كان من اغرب الافلام اللى انا شفتها السنه دى فى الاوسكار لكذا سبب .. انه من ايام فيلم Schindler`s List سنه 1993 ماشفتش فيلم بيتكلم على النازى و اليهود و الهولوكوست و اوشفيتز و كل الكلام ده اترشح للاوسكار ، سبب تانى انه بالنسبه لافلام الاوسكار استغربت انه يكون فى الفيلم Full Frontal Nudity بالنسبه للمثلين و الممثلات لان الموضوع ده مشهور فى السينما الايطاليه بوجه خاص ، و اخر حاجه مشهورة شفت فيها كده كانت مسلسل Rome ، بالنسبه للفيلم نفسه فالفيلم بغض النظر عن قصته اللى يمكن كعرب مانعجبش بيها انما انا هنا هاتكلم عن التمثيل فكان دور جميل جدا بالنسبه ل Kate Winslet ممثله تيتانك المشهورة او اللى اتشهرت بسبب تيتانك ، كانت اكتر واحده مميزة فى الفيلم و مش هاكون باكدب لو قلت انها كانت المحور الرئيسى اللى الفيلم كله بيدور حواليه و المشكله اللى مقابلانى فى الكلام عن الفيلم ده انه ماينفعش اتكلم عنه من غير ما اكشف احداثه فانا هاستنى اللى اتفرج عليه عشان اتكلم عليه معاه ، بس فيلم مميز و جميل أوى

فيلم Doubt فيلم رائع بكل ما تحمله الكلمه من معانى يستحق انه يكون فى ترشيحات احسن فيلم و الابطال التلاته اللى فيه يستحقوا يترشحوا للجوايز التلاته .. الجميله Meryl Streep اللى اترشحت 15 مرة للاوسكار و كانت مترشحه لجايزه الاوسكار لاحسن ممثله فى دور رئيسى و استحقت كلام كيت وينسلت اللى فازت بالجايزة لما قالت انه مجرد وجودها فى نفس الترشيح مع ميريل سترييب جايزة فى حد ذاته ، و فعلا خلتنى اسأل يا ترى ايمانى بالشئ و برأيى كافى انه يكون سبب ان الشئ ده او رأيى يكون صح .... الممثل التانى Philip Seymour Hoffman اللى كان مرشح لوسكار احسن ممثل مساعد بس الجايزة راحت لهيث ليدجر لانه زى ما الاجانب بيقولوا you can never compete with a dead guy بس كان دوره محير جدا و انسانى جدا لانه اتكلم عن الضعف الانسانى بوجه عام ... و الممثله التالته Amy Adams اللى كانت مرشحه لجايزة احسن ممثله مساعده و اللى عبرت عن الطيبه و حسن الظن الموجود فى الناس و كانت مثال جميل لان الدنيا لسه بخير مع ان الدنيا ابعد ما يكون عن الخير ... فيلم يستحق المشاهده

فيلم Slumdog Millionaire اكتر فيلم جميل شفته السنه دى ... فيلم مثال للبطوله الجماعيه ، ماتقدرش تطلع منه ممثل متميز بعينه انما فريق العمل كله مميز ، اكتر حاجه لمست روحى و انا باتفرج على الفيلم و مش هاكون باكدب لو قلت ان الاجانب ممكن يكونوا انبهروا بيها انما عمرهم ماحسوها ولا هيحسوها ان الاجواء الموجوده فى الفيلم انا شايفها بعينى فى بلدى ، السرقه .. اطفال الشوارع ، بيع الناس و استغلالها ، الفقر المحيط بكل حاجه ، لما تكون فرصتك الوحيده للنجاه من كل ده عباره عن حلم ان تكسب اللوتارى او زى بطل الفيلم تكسب المليون .... اخراج مميز ل Danny Boyle و زوايا ممتازة لمدير التصوير .. موسيقى تصويريه تعيشك فى جو الفيلم من غير ماتخدك منه بس مع كده انت ملاحظها ، معادله صعبه نجح فى تنفيذها A.R. Rahman و استحق الاوسكار عليها ... قصه جميله جدا و بسيطه جدا و من وجهه نظرى انه بساطتها هى سر جمالها و ساتحقت القصه الحصول على الاوسكار .. الفيلم كسب 8 جوايز اوسكار و كلهم كانوا مستحقين ... فيلم تخسر كتير لو ما شوفتوش

هناك 20 تعليقًا:

Unknown يقول...

سلام يا بـاشا

الله يعطيك العافيه وألف الحمدلله عالسلامه ومتشكرين جدا على الإهداء:)

ولا واحد من الأفلام هادول أنا حضرته بس استمتعت بالملخص جدا جدا؛ بيتهيأ لي اني رح أحمل فيلم القارئ وأشوفه هيك عالسريع - عالسريع يعني لما أكون تعبانه ومش قادره أدرس - باقي الأفلام حسيبهم للظروف

أنا كنت رح أعلق لو شفت الأفلام لأنو في أفلام سمعت أنها ضعيفه - زي الشك مثلا- بس مع هيك بفضل أحكم لحالي

وفين "فيكي كريستينا برشلونه"؟!!

adel يقول...

اسمي فين يا واد

دا انا السينما و السينما انا

هههههههههههههههه

حط علي الافلام دي كمان
The Curious Case of Benjamin Button (2009)

Seven Pounds (2008)

و التني ده ان شاء الله هيترشح للاوسكار السنة اللي جاية

ز كل الافلام اللي قلتها فعلا احسن افلام السنة دي

بس كمان عن دور الجوكر
ان في نقاد كتير و انا كمشاهد معاهم
ان دور الجوكر ده احسن تمثيل لحد دلوقتي من ساعة اختراع السينما

مع العلم ان شخصية الجوكر اكثر شخصية معقدة اتكتب للسينما

MaNoOoSh يقول...

نورت البلوج تانى يا تشى
وبالنسبة للبوست فالحقيقة انا من هواة الافلام جدا صحيح مش ناقدة فظيعة يعنى ولا محترفة بس بيبقى ليا وجهة نظر متواضعة فى الفيلم
وللاسف انا مشفتش من مجموعة الافلام اللى انت متكلم عنها غير اول واخر فيلم
The Dark Knight
كان فيلم مبهر وجميل بس بالنسبالى مش من اجمل الافلام

Slumdog Millionaire
عجبنى جدا جدا جدا لانى بحب القصص الانسانية دى وبالذات بقى لما تكون نهايتها سعيدة اصل الواحد مش ناقص غم.. واكتر مشهد عجبنى لما كانن بيبوس خدها بعد ما لقاها انا قعدت اعيييييييييط (من غير تريقة يعنى) بجد اتأثرت بالمشهد دة قوى
ان شاء الله اشوف باقى الافلام
سلام يا باشا وكل سنة وانت طيب

*البت المشمشية *حلوة بس شقية * يقول...

ايه ده هو انا اول تعليق

*البت المشمشية *حلوة بس شقية * يقول...

هو انا مش اول تعليق

*البت المشمشية *حلوة بس شقية * يقول...

ولا اول تعليق

مورديشن طيب ايه الاحراج ده

*البت المشمشية *حلوة بس شقية * يقول...

وبعدين مش كاتب اسمى ليه
ده انا كل يوم بتفرج على الليمبى

*البت المشمشية *حلوة بس شقية * يقول...

ماشى يا عمرو
ليتك سودا يا عمرو

Che يقول...

مياسى الجميله
لا شكر على واجب يا حميل .. الافلام دى هتلاقيها كلها جامده جدا و بالنسبه لفيكى كريستينا برشلونه انا لسه ماشفتوش عشان كده ماكتبتش عنه
نورتينى يا جميل

Che يقول...

عادل باشا
اسمك سقط سهوا و تم تصحيح السهو يا باشا
اكيد هاكمل الافلام فى البوست اللى جاى .. و انا موافقك على رأيك بالنسبه للجوكر
نورتنى يا باشا

Che يقول...

منوش القمر
ربنا يخليكى يا قمر و البلوج منور باصحابه ... و بعدين يا ستى محدش فينا ناقد فنى ولا حاجه انما الفكرة اننا عندنا تذوق و ده مش محتاج لدراسه انما الانسان بيتولد بيه و انا متأكد انك مولوده بيه زينا
و بعدين يا ستى انا مش هاتريق على العياط لانى انا نفسى باعمل كده
نورتينى يا قمر و متشكر على سؤالك عليا

Che يقول...

البت المشمشيه
معلش يا مشمشه انك مش اول تعليق بس فى بيتها عادى
و بالنسبه لاسمك هينزل فى البوست الجاى يا عسل
نورتينى مع ان ليلتى سوده

سمكه واحده يقول...

انا جيت اهو اقول كل سنه وانت طيب
بمناسه مولد النبي عليه افضل الصلاه والسلام
اللهم ارزقنا حبه
وهبقي اعلق علي البوست ان شاء الله
ليا عوده تانيه انا بس جيت اسلم اول ما لقيتك وصلت الي ارض المدونه قلت اقولك كل سنه وانت طيب وحمدالله علي السلامه
بقلك ايه؟
متجيب حته حلاوه مشكله كده اي حاجه حلوه معندكوش ولا اييه اي حاجه مش هنقي اللي تجيبوا كله كويس
دمت بخير

Zika يقول...

اخيرا
اولا شكرا يا باشا علي الاهداء الظريف ده
الافلاكم السنه دي كلها تحفه
انا مستني رايك في باقي الافلام
وبعد كده لما تشوفهم كلهم
نبقي ناذاذ فيهم كده فيلم فيلم لحد ما نجيب قرارهم
فيلم
slumdog
انا شوفته وانبهرت وانا قليل اما بنبهر بفيلم
بفضل قاعد اطلع في عيوب وغلطات
لكن بصراحه الفيلم وهمي
اتفرج عالتصوير والاماكن اللي فيها التصوير
وحركة الكاميرا
والموسيقي التصويريه
واغاني الفيلم
والاداء
والقصه
والسيناريو الحواري خصوصا بين الولد والظابط
فعلا تحس والله العظيم انه فيلم مصري
بكل ما فيه
والفيلم ده اثبات للناس اللي بتشكك في نزاهة او عنصرية الاوسكار
اهو فيلم بيتكلم عن احوال واحد مسلم في الهند وبيتكلم في موضوع مايهمش الامريكان في حاجه
وواخد احسن فيلم

التعليق ده مبداي انت عارفني بحب الرغي بس لسه اما اصحي
عشان اجيلك كده وانا فايق
:D
سلام

Che يقول...

سمكه اللذيذه
كل سنه و انتى طيبه يا جميل
مستنى تعليقك على البوست و شكرا على سلامك
اما بالنسبه لموضوع الحلاوة فانا اجيبلك الحلوانى كله مش حته بس .. انتى بس تأمرى
مستنى باقى التعليق يا جميل

Che يقول...

زيكا باشا
لا شكر على واجب يا باشا .. و فعلا كل اللى انت قلتله على فيلم slumdog صح ، تحس ان الفيلم مافيهوش غلطه مع انه متصور باقل التكاليف بأعتراف المخرج .. بس فعلا فيلم جامد جدا
و طبعا لما اكمل باقى الافلام هاتكلم عليها و هاستنى تعليقك
مستنى التعليق اللى مش مبدأى عشان انا كمان بحب الرغى
نورتنى يا باشا

حروف يقول...

ممممممممممممممممم عودا حميدا

Che يقول...

حروف
مممممممم شكرا
نورتينى

MaNoOoSh يقول...

انت غبت تانى كدة لية يا تشى؟
شكلك سايبنا وقاعد تتفرج على أفلام الاوسكار لسة.. صح؟

سمكه واحده يقول...

اهو ده اللي بخده تجيب حلواني ومش حلواني ايه ياعم فينك طب انت عملت بوست اللي بيتابع اافلام وكده
طب واحنا بنحب الحلويات مفيش بوست لينا كده ولا حتي بتبجي تزورنا
تعالوا زرونا
باي باي
يارب تكون بخير
تحياتي