الخميس، 27 مايو 2010

tshanj

شهر و نص من ساعه آخر مره كتبت فيها بوست .... و لسوء الحظ كان بوست عن السرقه و الناس افتكرت انى تعبان من الموضوع ده و عايز اشكر كل الناس اللى سألت عليا فى الفتره دى و خصوصا العمه ستيته
فى الشهر و نص دول حصلت حاجات كتير أوى .... منهم انى و انا بعمل محضر للحاجه اللى اتسرقت منى اتعلمت انه اوحش حاجه ممكن تحصلك مش انك تتسرق .......... لاااا ، الاوحش انك تروح تعمل محضر عشان الحاجه اللى اتسرقت منك
و فى خلال الفتره دى الصدفه قادتنى لحاجه انا مكنتش عارف انى ممكن اتعلق بيها للدرجه دى .... الحكايه انى كنت فى يوم على الفيس بوك عادى و بقلب فيه .... لقيت زيكا كاتب لعادل بيقوله انا مش معاك فى المشوار ده يا ريس عشان المذاكره ...... عادى جدا اتنين صحاب بيتكلمو سوا ... و انا برضه عادى جدا اتحشرت و قلتلهم مشوار ايه ياااض منك ليه
المهم عادل بعتلى لينك لأيفنت حوالين ورشه سينما ، فيها تعليم سيناريو و اخراج و تصوير و مونتاج .... و قالى خد الابليكشن املاه و ابعته .... انا الصراحه دخلت على السايت اللى عليه الابليكشن عشان احمله و املاه لقيت السايت واقع ... المهم انه كان تبع جروب اسمه تشانج ، و على فكره الاسم مكتوب صح مش انا اللى غلطان فى السبيلنج بتاعه ... الاسم بيتكتب زى ما بيتنطق
المهم قلت لعادل قام بعتلى نسخه من الابليكشن بتاعه ... انا غيرت الاسم و العنوان و رقم الموبايل و زودت شويه افلام و شلت شويه افلام و كده و بعته على الايميل
تانى يوم عادل قالى هننزل بكره نحجز ... قلتله ماشى ... المهم هناك قابلنا واحد بأه من اعز الناس عليا ... عبدالله حسن ... اللى كان المانجر بتاع الورشه ... عادل كان يعرفه و سلم عليه ... المهم و انا جاى مع عادل لقيته بيقولى انت ايميلك كذا كذا ... انا الصراحه استغربت ، اصل كده عبدالله يا مكشوف عنه الحجاب يا اما انا اللى الايميل مكتوب على وشى .... عبدالله قالى اصلى انا امبارح جالى ايميل فيه نسخه من ابليكشن عادل فقلت ده اكيد صاحبه ، و انت النهارده جاى معاه ، يبقى انت هو
و اشتركت فى الورشه .... عايز اقولكوا انى استمتعت جدا جدا جدا بكل حاجه فيها ، و اتعلمت حاجات كتير جدا جدا جدا .... و اكتر اتنين عايز اشكرهم هما عمرو سلامه مؤلف و مخرج فيلم زى النهارده بتاع بسمه و احمد الفيشاوى و هو اللى ادانا سيناريو ، و تانى حد هو شريف البندارى و هو اللى كان بيدينا اخراج و عمل فيلمين قصيرين و تعب أوى معانا و ادانا حاجات كتير فى وقت قصير جدا
طبعا بعد ما الورشه خلصت قسمونا مجموعات عشان كل مجموعه تعمل فيلم قصير و نشترك فيهم فى المسابقه اللى كانت بعد الورشه .... عبدالله هنا اخدنى بعيد عن عادل و خلانى فى جروب معرفش فيه اى حد خاااااالص ..... و دى كانت احلى حاجه فى الورشه دى ...... لأنها خلتنى اتعرف على شخصيه اتمنى انى اشتغل معاها تانى و تالت و عاشر و هيا ساندرا اللى كانت المخرجه بتاعت الفيلم .... و هيا اسمها ساندرا شريف مش ساندرا نشأت زى ما كل واحد بيعرف انها المخرجه و اسمها ساندرا يقوم قالش القلشه دى
و طبعا ما ينفعش انسى صاحبه فكره الفيلم مى ابراهيم ... اتخانقت معانا كتير جدا ساعه التحضير و ساعه التصوير ... بس انا متفهم وجهه نظرها انها تعبانه فى الفيلم عشان كده صعبان عليها انه يتشال منه اى حاجه .... بس الشهاده لله لما كانت بتفهم احنا عملنا كده ليه و بتقتنع كانت بتوافق
طبعا احنا كنا 7 فى بدايه الفيلم .... بس بعد كده نزلنا لتلاته عشان 3 اعتذروا و الرابعه اللى هيا المونتيره بتاعتنا شروق كانت مشغوله ، بس بعد كده حضرت معانا اخر يوم تصوير و اليوم بتاع المونتاج
بالنسبه للفيلم طبعا الفيلم مليان غلطات ... التصوير مش حلو ، و ده عشان كنا بنصور بكاميرا سايبر شوت مش السيمى برو او حتى هاندى كام ، و ملهاش لازمه اقول الظروف اللى تسببت فى كده
برضه تسجيل الصوت مش واضح لنفس السبب .... و برضه الاضاءه وحشه و ده عشان احنا مكنش معانا سبوتات اضاءه و لسوء الحظ كان عندنا الماستر سين ليل ... دول الاسباب اللى خارجه عن ارادتنا
الاسباب اللى كانت بسبب اننا بنتعلم فدى كانت موجوده فى الشوتات و فى المونتاج ... بس بفضل ربنا و بفضل عبدالله حاجات كتير اتدارت ساعه المونتاج .... و برضه لازم اقول ان عبدالله صاحب فكره اننا نحط ساوند تراك للفيلم
برضه مش هنسى اشكر كل الناس صحابنا اللى ساعدونا و اشتركو فى تمثيل الفيلم اميره و عماد و ايناس و طبعا على اللى هو برضه واحد من تيم تشانج و تيفا اللى هو برضه واحد من تيم تشانج و ساهر و شريف و انور
طبعا انا عارف ان الفيلم وحش ... بس الحقيقه انه بالنسبه لأول مره يعتبر كويس و انا بجد حابه جدا ...... اتعلمت منه كتير و يا رب نفس الغلطات مغلطهاش تانى
الناس لما شافت الفيلم عجبها الحمدلله فى المجمل .... فيه ناس بأه و كلهم للأسف من معارفى ... واحد فيهم قالى ايه الزباله اللى انت عاملها دى .... انا رديت عليه انه فعلا زباله ، بس زباله انا بحبها ، و قلتله انى اول مره فى حياتى اعمل حاجه من غير ما اكون مغصوب عليها .... انما هو كل انجازاته فى الحياه انه مربى شنبه و فرحان بيه مع ان شنب الصرصار يعتبر اكبر بالنسبه لحجمه ..... انه خلص كليه ، و كلنا خلصنا كليات – ناهيك عن انى مخلص نفس الكليه زيه – يعنى الفكره مش انجاز أوى ..... انه اتجوز و خلف ، طيب ما هى الكلاب فى الشارع برضه بتتجوز و تخلف ... انه شغال فى شغلانه متعبه و مقرفه ، طيب ما هو الحمار بيشتغل و بيتعب اكتر منه .... ده كان واحد
اتنين تانين قعدو يتريقوا على الفيلم ... الواحد اللى فوق ده كان ليه انجازات على الاقل من وجهه نظره ... الاتنين دول بأه ملهمش اى انجازات
انا ليه بتكلم على الناس دى .... مش عشان انا مضايق ... انا كنت ساعتها مضايق ، لأن التريقه دى اسهل حاجه فى الدنيا و انا لو حبيت اتريق عليهم هتريق عليهم فى الف حاجه و كلهم هيكونوا فيهم .... انا بتكلم عليهم عشان اقول للى بيقرا انه مايهتمش بكلام الناس .... مدام مقتنع باللى انت عملته يبقى طظ و الف طظ فى الناس ، لأنه فعلا صدق المثل ناس لا يعجبها العجب و لا الصيام فى رجب
طبعا مش هقدر انسى اقول على الافلام اللى كانت معانا فى المسابقه ... فيلم لعب عيال اللى كسب المركز الاول و ده اللى عاملينه عمر و منه و انديرا و هاله ..... فيلم بيانو و ده بتاع عادل حبيبى و سعيد و بيتر و عمر ( بس ده غير عمر بتاع لعب عيال ) و ماهى و دينا ..... فيلم بنى آدم و ده بتاع يمنى و ماهى و رنا و نسمه و برضه عادل حبيبى تانى .... و فيلم فسحه و ده بتاع اسلام و يحيى و هاديه و مصطفى و محمد
على فكره انا مبسوط جدا بتجربه الورشه دى و بمعرفه كل الناس دى و بتمنى انى اشوفهم تانى و اشتغل معاهم تانى
آخر حاجه لازم اقولها انى لازم اشكر فريق تشانج كله على المجهود اللى عمله فى الورشه دى ... بس بجد بخص منهم عبدالله اللى بشكره تانى ، و كمان على طه اللى ساعدنا فى التمثيل و بجد كان تمثيله جامد جدا
اللينك ده بتاع الفيلم ... يا ريت تشوفوه و تعرفونى رأيكوا

معلش انى طولت المره دى بس دى جايه بعد شهر و نص من التوقف عن الرغى .... اشوفكم قريبا .... سلام

هناك 19 تعليقًا:

dr.lecter يقول...

انا شفت الفيلم الاسبوع اللي فات ونسيت اقول تعليقي عليه بس اديك قولتها بنفسك
ان شالله المره الجايه تكون احسن

Che يقول...

dr.lecter
طيب انا عايز اسألك سؤال ، و انا مستعير السؤال ده من زيكا
فى المجمل الفيلم عجبك ولا لا ؟
نورتنى يا ليكتر

ستيتة يقول...

الفكرة حلوة
الموسيقى عجبتني مع الفيلم
البنت الخياطة عملت دورها حلو

الخلاصة الفكرة مع المشهد بتاع نائب الرصاص عجبوني جدا

التصوير انت قلت اللي فيها والمرة الجاية يبقوا احلى

طب فين بقية الأفلام اللي اتصورت
مش ممكن نتفرج عليها؟

عارف اللي مفرحني ايه؟
انك عملت شيء بتحبه
صعب قوي تعيش في حاجة مفروضة عليك ومش بتحبها ويعدي العمر ولما تكتشف انك مخنوق تلاقي الأيام مبقاش فاضل فيها حاجة

مبروك يا عمرو
من قلبي

غير معرف يقول...

هحمل الفيلم واقول رايي... بس هنده وماتزعلش :)

تحياتي

غير معرف يقول...

الفيلم فكرته معقوله ..
عارف المشكله فين ... في بعض الممثلين

في ناس بتمثل كويس وناس موش قد كده

الفيلم كان ممكن يكون احسن لولا مشاهد القهوه اللي الصوت فيها كان سيء جدا

التجربه عموما كويسه لانها اول تجربه ..

هو حضرتك عملت ايه بالفيلم ؟... علشان ننقد اداءك بالمره :)

تحياتي

Che يقول...

العمه ستيته
والله يا عمه دى اكتر حاجه مفرحانى فى التجربه كلها .... انى بجد حبيت اللى انا بعمله
و بالنسبه لباقى الافلام موجوده على اللينك ده
http://www.youtube.com/my_subscriptions?pi=0&ps=20&sf=added&sa=0&dm=2&s=uL3aCPY3KXM&as=1

دول 4 افلام من الخمسه ... هجيبلك اللينك بتاع فيلم بيانو بتاع عادل و ابعته
منورانى على طول يا عمه

Che يقول...

فتاة
كلامك صح بالنسبه للممثلين .. بس ده عشان احنا اللى مثلنا .. يعنى لو خدتى بالك من التتر هتلاقى اسماء اللى كاتبين السيناريو برضه فى الممثلين
الناس اللى مثلت حلو أوى من وجهه نظر كل الناس الخياطه و هيا على فكره صديقه عزيزه و شغاله فى بنك اجنبى ، و على اللى عمل دور المدمن
انا عملت ايه فى الفيلم ... ساعدت فى كتابه الحوار للفيلم ... علمت الديكوباج مع المخرجه ، الديكوباج يعنى تقطيع المشاهد المكتوبه فى الاسكربت و تقسيمها لشوتات و تحديد زوايا التصوير ..... كنت مسئول عن الاتفاق على كل الماديات بالنسبه للقهوه و باقى المصاريف و بعد كده كنت بحاسب زمايلى فى الفيلم ..... ساعدت عبدالله فى المونتاج على اد ما قدرت و عرفت و خصوصا ان المونتاج ده مش تخصصى خالص ... مثلت دور صاحب التاكسى فى الفيلم ( و من غير ما تنتقدى عارف ان ادائى كان وحش :P )
ده بس اللى انا عملته فى الفيلم :)
منورانى يا فتاة دايما

Haytham Alsayes يقول...

يااااااااه يا تشي اخيرا كتبت حاجة

الفيلم شفته وفي حاجات حلوة في الفيلم زى الموسيقي مثلا وفكرته مش بطالة
واكيد الجي احسن وافضل

ربنا يوفقك

تحياتي

KEBLAWYAT يقول...

السلام عليكم

طيب هم لسه بيقبلوا ناس ؟

ولو تسمح ممكن اللينك

هشوف الفيلم واقلك رأيى

غير معرف يقول...

كل ده عملتوه ... طيب تمام

عموما ده كويس بالنسبه للامكانيات وانها اول مره

وماتبقاش تمثل تاني بقا :D

تحياتي

مي يقول...

طب والله كان مية مية اول خطوة لكم وتطلع حلوة وكمان مش لكم اى تجارب فى الحكاية دى كويس اوى


استمرررررر دى حاجة جميلةاوى انتوا عملتوها كفاية عمل جماعى فى روح الحب


بشكرك عليه والله ياعمور

زهور الامل يقول...

عمور
الف حمدالله على سلامة برجوعك لمدونتك وبيتك التاني خمسة جدا وعودا حميدا باذن الله

ثانيا الف مبروك على الفيلم ويارب بالتوفيق ان شاء الله

والفيلم جميل جدا وتجربة رائعة ولو في اي دروبات في الفيلم متزعلش نفسك لانه لسة اول فيلم وطبيعي هيطلع فيه غلطات بس المهم انك تتعلم من الغلطات دي وتحاول تتجنبها الفيلم الجاي باذن الله

وسيبك من العالم المنفسنة الحاقدة اللي بتقعد تكسر في ماديف الواحد دي ومتسالش في حد
وطالما انت عملت حاجة بارادتك وانت حاببها يبقى فعلا طز في اي حد يعترض

تحياتي ليك

Unknown يقول...

موسيقى الفيلم حلوة جدا,انت جبت كذا حاجة جنب بعض بس بسرعة.. حسيت إنها عالطاير كده,كلهم بتجمعهم حاجة مشتركة .. المعاناة و الفلوس ودى وصلتها كويس جدا, إن شاء الله اللى جاي يكون أحسن وأحسن

Che يقول...

هيثم
والله يا هيثم كانت فيه حاجات كتير فى حياتى أوى
مبسوط ان الفيلم عجبك ... الموسيقى اختيار مى ابراهيم زميلتى فى الفيلم و هيا تعبت أوى و سمعت موسيقى تكفيها ل 10 سنين ادام
منورنى يا هيثم

Che يقول...

قبلاوى
ممكن تعملى اضافه على الفيس او تبعتلى رساله عليه و انا ابعتلك اللينكات بتاعت الجروب و تتواصل معاهم
نورتنى يا قبلاوى

Che يقول...

فتاه
والله ده رأيى برضه ... بس كان مجبر اخاك لا بطل :)
منورانى يا فتاه

Che يقول...

مى
ربنا يخليلكى يا مى .... و اهم حاجه هيا روح الحب دى
منورانى يا مى

Che يقول...

زهور
مبسوط ان الفيلم عجبك ... و انا سيبتنى من العالم المنفسنه دى :)
منورانى يا زهور

Che يقول...

مشمش
اهلا بيك فى اول تعليق لو انا لسه ذاكرتى شغاله كويس
ثانيا شكرا جدا على الكلام الحلو اللى انت قلته فى حق الفيلم بس لازم اقول ان ده مجهود كل الناس اللى معايا فى الفيلم مش مجهودى لوحدى و الحمدلله انه طلع حلو كده
نورتنى يا مشمش و مستنى اشوف تعليقاتك على طول