الجمعة، 5 فبراير 2010

خبرات مصريه ... الاول

كنت باتكلم مع صديقه على المسنجر ، فعادى باقولها ازيك عامله ايه ... قالتى متهمه ... ايه متهمه ازاى يا بنتى .. فقعدت تحكيلى و انا قعدت اضحك من غير اى تقدير لمشاعرها خالص بس بجد الموقف كان سوداوى لدرجه الكوميديا
قالتلى انها و هى بتجدد الرخصه راحت تجيب شهاده المخالفات لقت عليها 3000 جنيه مخالفات سير عكس الاتجاه ، تقريبا هى يا بتمشى بالعربيه بضهرها يا اما مقضياها عكس على طول ، الكلام ده على فكره قبل قانون المرور الجديد اللى فيه غرامه و حبس و الكلام ده .. طبعا كلنا عارفين مخالفات المرور بتيجى ازاى .... يعنى مثلا و انا بجدد الرخصه قالولى عليك مخالفه رادار فى السلوم مع انى عمرى مارحت السلوم اصلا عشان اخد مخالفه رادار هناك ، بس على رأى عادل امام انا دفعت الفاتورة عشان خفت يشيلوا العده ما ان معنديش اصلا تليفون ... المهم نرجع للبنت .. البنت لقت كده راحت اتظلمت و قالولها طيب متعيطيش و ادفعى 1500 جنيه قامت قالت لا و اتظلمت تانى قالولها خلاص ماتدفعيش حاجه و امشى .. بس رئيس النيابه ماعجبوش قام قدم استئناف و هنا بأت قضيه و لازم تروح المحكمه و فيها قاضى و نيابه و اوبااااااه ليله كبيره ..... المهم هى قضيتها كانت فى اول الرول بس هى راحت متأخرة شويه تقريبا فاكره عمو القاضى لما تيجى هيطلع قضيتها و يقولها يالا عشان تروحى ... فنتيجه للتأخير ده بأه لازم تستنى لاخر الرول ... المهم حاجب المحكمه ندا عليها الساعه 6 المغرب و هى ملطوعه هناك من الساعه 10 الصبح بس كله يهون عشان خاطر مصر .... هى وقفت قام الحاجب ( الحيوان على حد قولها ) قال العساكر خدوها على القفص انتوا هتسيبوها تتكلم من برة القفص ، زى مثلا ما يكون هياخدها على قفص الاعدام او ان القاضى هيعيط و يسيب المحكمه لو هى مدخلتش القفص ، مع انها محكمه مرور مش محكمه بجد و ده مش حاجب بجد .. بس ماعلينا و زى ماقلنا كله يهون عشان خاطر مصر ... القاضى طلع محترم ( هى اللى بتقول لانى ماشفتش حاجه ) و اداها براءه و خلاها ماتدفعش حاجه ( بس انا مش عارف اذا كانت هى دورت على رئيس النيابه عشان تطلعله لسانها و تقوله انا براءه و كده ولا لا ) .... المهم هى فرحت بس لسه البطاقه مع الحاجب عشان كانت مع القاضى عشان كانت قضيه بأه و كده ..... طيب انا عايزه البطاقه ، الحاجب ( الحيوان برضه و ده كلامها برضه ) مرضاش يديها البطاقه و غتت عليها و هى قامت مزعقه قام قالها انا ممكن اخدت احطك فى القفص لغايه ما اديكى البطاقه ( بس هو كان بينخع أوى و فاكر نفسه ضابط بروح امه ، و بروح امه دى من عندى مش من البنيه المرة دى ... دى من عندى انا ) المهم انا قلتلها انه كان عايز قرشين و هى مافتحتش مخها معاه قالتلى ما انا معرفش .. المهم اخوها جابلها البطاقه بعد ما ادى الحاجب العيديه و على طول الحاجب راح زى ( الجزمه و دى من عندها المره دى ) عشان يجيب البطاقه ..... و مشيت و خرجت
بس عرفت انها لازم تجيب صورة الحكم عشان تاخد المخالصه من المخالفات .... قامت رجعت تانى .. بس ما شاء الله عليها ناصحه ... قامت طلعت فلوس و رشت على طول و خدت صورة الحكم و مشيت فى 5 دقايق .... البنت كانت بتعيط و هى بتفتكر اللحظات السوده دى و انا كنت عمال اضحك ( منتهى عدم التقدير لمشاعر الناس ) بس بجد انا قلتلها انه ده عادى فى بلدنا و قلتلها انى دى خبرة لازم تاخدها مدام عايشه فى مصر و وعدتها انى احكيلها لما اتعملتلى قضيه مصنفات فنيه ( بس مش افلام سيكو سيكو عشان متفهموش غلط ) و خدت براءة مع انى مرحتش خالص المحكمه بس ابويا الله يرحمه جاب واسطه للقاضى اللى تفهم الموقف و نفحنى براءه ..... ولا المره التانيه اللى اتاخدت فيها فى قسم فى المندره فى اسكندريه بعد ما اتخانقت مع 3 شباب عاكسو بت كنت ماشى معاها ( و والله كانت اول مره اشوفها اصلا ) ... يومها انا اضربت ضرب ... بس فيه واحد منهم انا بهدلته ... اه والله .... بس دى حكايه تتحكى المره الجايه
يا ترى انتوا بأه ايه الخبرات اللى شايفين ان الواحد لازم يكتسبها عشان يعرف يعيش فى مصر
مستنى ردودكم ...... سلام

هناك 18 تعليقًا:

غير معرف يقول...

خبره تسليك الامور من اهم الخبرات اللازمه علشان تعيش في البلد دي

بس موقف وحش الصراحه

تحياتي

سمكه واحده يقول...

اولا
موضوع انك تمشي في كل حته ترش فلوس دي علي لعالم الزباله دي بتغظني اوووووي وبحس انهم فعلا حيوانات لانهم بيقبضوا طب فين الكرامه وايه الناس دي بجد الي تقبل حاجه زي دي
انا زيها كده مش بفتح مخي بعمل زي اللمبي ايه رئيك في السويت يافندم وشجعني يافندم علي اساس انه بيلعب في نادي حديد ولا ايه
بجد دي حاجه بتزعل وبتكسف ان في بلدنا كده نفسي اوي الناس كلها يبقي عندها كرامه ونغير حجات زفت في البلد دي

بالنسبه بقي لما كنت في اسكندريه وشباب عكسوا بنت اول مره تشوفها ههههههههههه عسل وانت بتقول اضربت ضرب بس بجد احترمتك لان ممكن اوي طلما اول مره تشوفها تقول ما تولع انا مالي لا جدع ياعمرو وكويس انك ضربت واحد بس يعني هعندنا في اسكندريه الشوباب عساسيل اوي يقولك ايه
اوعي ده انا عمل وهخلي واييييييييه ويقلعوا القميص متعرفش ليه ويجروا وري بعض وفي الاخر متلقيش اي ضرب ولا بتاع هوالين اوي عندنا بصراحه
بيسبوا بس ويشتموا واوعي يا غدع اه مش بيقولوها يا جدع وانا اقول ها هيضرب اديله ياله ولا اي حاجه بلا خيبه طبعا مش كلهم بس الخنقات الاسكندراني شويه كده بقي محدش يزعل مني انا بقول الحق
وفيه طبعا ضرب ضرب بس لسه مشوفتوش
في قله ادب بس بلا هم هههههه
ولله حاجه تزعل
انا مستنيه الحكايه بتاعه الخناقه دي
ها؟
تحياتي

الشعب لابد له من حكومه تشكمه يقول...

من اكتر الخبرات انك تعرف تمشى على الحبل ومتقعش اومااااااال,لو عملتها اهنيك انك كده هتعيش فى ام الدنيا.

هى وخبرة ابجنى تجدنى,عارفها:)

Unknown يقول...

والله ما عندي سياره تا تصير معي نهفات متل هيك

بس يعني ما تفكر اكيد عنا كمان القوانين ما شالله :)

Zika يقول...

حمد الله ع السلامه يا نجم بقاااااااااااا
اولا
موضوع صاحبتك ده والبهدله دي أمر لابد منه في بلدنا الحبيس مصر
انت ماتعرفش اني قضيت اربع ايام وتلت ليالي في المحكمه الابتدائيه في بورسعيد وقسم بور فؤاد لمجرد اني اهلاوي
اي والله لمجرد اني كنت واقف على رجلي
ياما البلد دي شوفنا منها بلاوي زرقا
ومش هايتصلح حالها
بتغيير حكموه
ولا برئيس
لا هاتيغير حالها
لما الناس تبقا محترمه ومؤدبه وبتتقي ربنا في الللي بتكتبه وفشغلها وفاللي بتعمله
لو كل واحد بس بص لنفسه وصلح عيوبه بدل ما يلعن الحكومه ولا ايه يا عمور

سارة نجاتى يقول...

ههههههههههههههه

أنا لازم موضوع قسم المندرة ده ههههههه

ده أنت ذكرياتك هنا فى الاسكندرية طلعت فل

طبعا لازم تجرب تدفع رشوة
و تتخانق مع موظفين حكومة
دى حاجة كده بتيجى مع شهادة الميلاد يعنى

سمكه واحده يقول...

فينك ؟؟؟؟؟؟؟؟؟؟؟؟
اخبارك ايه
ايه الغيبه دي كلها
بقي انا اللي مستنيه تحكي ونلوكلوك وكده يعني

Che يقول...

فتاه
طبعا خبره تسليك الامور دى تعتبر اهم خبره و الخبره الاساسيه فى بلدنا
و طبعا موقف بايخ
نورتينى يا فتاه

Che يقول...

سمكه
مسأله الرش دى بأت حاجه اساسيه فى حياتنا ... يعنى صعب تلاقى ان اى مصلحه ممكن تتقضى من غيرها
حكايه العلقه دى كانت حكايه جامده جدا و اتبهدلت يومها بهدله ما بعدها بهدله ... بس على ايامها كان الضرب الاول و بعدين الكلام بعدها
نورتينى يا سمكه

Che يقول...

شيما
يا شيما الخبرات دى تقريبا احنا بنتولد بيها ... بس بتلاقى ناس بتستخدمها و عشان كده بتنمو و تترعرع و ناس بتهملها عشان كده بتضمر على طريقه التطور بتاعت ثانوى
نورتينى يا شيما

Che يقول...

مياسى
تخيلى يا مياسى انه فيه بوست تعليقا على موضوع السواقه ده بالذات و انتى ملهمتى فيه
و القوانين هيا هيا فى اى مكان يا مياسى فى عالمنا العربى الحبيب
نورتينى يا مياسى

Che يقول...

زيكا
جامده جدا حكايه القسم دى يا زيكا ... انت كده ليك حق فى رقبه الاهلى بس كله فدا الاهلى
و مسأله اننا ننضف دى فده مش شايف انه هيحصل فى المستقبل القريب اللى هو كمان 50 سنه يعنى
منورنى على طول يا زيكا

Che يقول...

ساره
يا ساره انا ليا ذكريات فى اسكندريه اكتر مما اتذكره و كلها ايييييييه ... فل على رأيك
منورانى على طول يا ساره

Che يقول...

سمكه
ادينى رجعت تانى يا سمكه
منورانى يا سمكمك

Unknown يقول...

عمرو

ما فهمت؟ شو دخلني انا بالسواقه؟

Che يقول...

مياسى
انا فاكر فى مره انى كنت قريت ليكى بوست عن السواقه او انك كنتى بتتعلميها لو الذاكره مش خانتنى ... كان بوست انا قعدت اضحك عليه ساعتها كتير جدا و من هنا فكرتينى بموضوع السواقه
اى خدمه يا مياسى

Unknown يقول...

آآه

على فكره انا ما كنت عم بتعلم أيامها
أنا كنت بعمل "ريفرش" لمعلومات السواقه
هون النكسه!!

مع اني مش فاهمه لحد هلأ ايش اللي خلاك تضحك على هديك القصه؟

Che يقول...

مياسى
والله انا عشان اتذكر ايه اللى خلانى اضحك ساعتها ده شئ صعب حاليا ... بس اوعدك اول ما افتكر اقولك
بس اللى انا متأكد انك هتضحكى عليه اول مره ليا و انا بسوق ... كنت اييييييييه ... حاجه بهدله
منورانى يا مياسى