السبت، 12 ديسمبر 2009

البدايه ... التانى

البدايه كانت من سنه تقريبا .... كنت بتكلم فى الموبايل مع صديقه من اكتر الناس القريبه ليا برغم ان اللى يعرفنا كويس يقول اننا مينفعش يبقى اصدقاء لاسباب كتير بس فى النهايه الموضوع بيختلف من شخص للتانى .... المهم الصديقه دى قالتلى تسمع عن البلوجز .. قلتلها اه ، اشمعنى ... قالتلى طيب انا هبعتلك عنوان بلوج و خش اقراه كده و قولى رأيك فيه ... قلتلها ماشى و خدت منها البلوج و دخلت قريته ... انا كنت قبل كده بأكتر من 3 سنين بقرا بلوجز ، بس كانت كلها بلوجز انجليزى لأصدقاء أجانب انما عمرى ما قريت بلوج عربى ... دخلت و قريت و عجبنى الجو مع انى كنت عارفه قبل كده .... و بعد كده قلتلها انا قريت البلوج و علقت عليه كمان ، قالتلى طيب ما تعمل بلوج و تكتب فيه و اديك بتتسلى و جرب و مش هتخسر حاجه و الكلام ده .. قلتلها ان شاء الله والموضوع خلص لغايه كده .... طبعا عرفت بعد كده بزمن ان البلوج ده كان بتاعها .....الغريب انها هيا نفسها بطلت تكتب على المدونه بتاعتها ... يعنى هى اللى شجعتنى و خلتنى احط الفكره فى دماغى فى الوقت اللى هيا شالتها فيها من دماغها مع انه ده كان المفروض اللى انا اعمله لأنى جوزاء و كل الجوزاء عندهم ميل غريب انهم يبتدوا مشاريع و يزهقوا منها و يسيبوها فى النص ... يمكن دى اكتر حاجه مخوفانى من الجواز ... بس انا بقول ان الجواز ده مشروع العمر مش مجرد مشروع ينفع اخلع منه فى النص .... ما علينا
بعد كده قعدت أخد و أدى مع نفسى ... انا اللى يعرفنى يعرف انى كنت بكتب قصص من ايام ما كنت فى ابتدائى ... قصص عبيطه صحيح بس كانت محاوله منى ان المعلومات اللى عمال احشيها فى دماغى احاول استفيد بيها بشكل او بآخر .... و كنت و انا فى خمسه ابتدائى عامل كشكول بكتب فيه ... الحقيقه انه جمهورى اللى كان بيقرا كان يتعد على صوابع الايد الواحده ... ابويا و امى و عمو ثروت و مراته طنط عزة ( حاسس احساس بايخ و انا شحط و كبير كده و لسه بقول عمو و طنط ... بس هقول ايه عليهم ... الحاج و الحاجه مثلا ) و دى ناس كانوا صحاب ابويا و امى .... و كان دايما عمو ثروت لغايه ما كبرت يقولى مفيش حاجه كتبتها جديده و انا اعمل فيها انى كبرت و بطلت لعب العيال ده
السبب اللى خلانى ابطل كتابه كان حاجه غريبه ... جوز خالتى و انا فى اعدادى او فى بدايات
ثانوى تقريبا كتب 3 قصص و طبعهم و ادانى نسخه هديه من التلات قصص ... مش عايز اقولكم ... اكتشفت انى كنت عبقرى فى اللى انا كنت بكتبه و انا عندى 10 سنين ... اللى انا قريته كان حاجه مش قادر اوصفها ... حاجه هم و سواد و تشيب الكتكوت اللى ريشه منتوف ... و من ساعه لما قريت القصص السوده دى قررت انى ابطل اكتب عشان ميجيش يوم و الناس تتريق على اللى بكتبه ( سيبكوا انه اصلا الناس كده بتتريق و انا نفسى بتريق على اللى بكتبه ، بس اهى بتعدى و الكلام مش بيلزق ) ... تسميه جبن .. ماشى .. عدم ثقه فى النفس .. برضه ماشى .. استسهال و هروب .. ميضرش
المهم بعد ما كنت قريت البلوج بتاع الصديقه اللى انا كنت قلت عليها بكام يوم كان نادر صاحبى عندى هو و امير و بلال مكنش جه .. بفتح معاهم الموضوع لقيت الواد نادر عمال يشجع فيا أوى انى اعمل مدونه ، لدرجه انى حسيت ان الواد ده هيتربح من المدونه بتاعتى بشكل ما او انه هيقعد يتريق عليا بعد كده مع اصحابه على اللى انا كتبته ... انا ساعتها ريحت نفسى و نفضت للموضوع .. بس انتوا عارفين الدوده .. مش بتسيب حد فى حاله .. قعدت تنخور فى لامؤاخذه دماغى ( دماغى ياللى نيتك وحشه مش حاجه تانيه ) و تنخور لغايه ما عملت المدونه و ابتديت اكتب فيها و ليا سنه مصدعكوا معايا و جايب وجع القلب لنفسى ... و هنا تكرر نفس الموقف بس بصوره اخرى ... الواد نادر قعدت اقنع انا فيه انه يعمل مدونه و يكتب .... و فعلا عمل المدونه و ابتدى كتابه و كتب تلات بوستات يتامى قاعدين جوه المدونه بيعطوا عشان لوحديهم .... بس انا عرفت منه انه بيكتب بس فى الخباثه بس هو قال ان اللى بيكتبه محاولات خاصه بيه عشان محدش يتريق عليه ، و الكلام ده كان اتقال لما كنا اتكلمنا على مدونه بتكتب بأسلوب ركيك جدا ... فكرنى بأسلوب جوز خالتى .... و هو قعد يدافع عنها ، و يقولى انا مقدرش اصدم حد هاوى و مش محترف كتابه ... قال يعن احنا اللى محترفين كتابه ... و اسلوبها مش وحش أوى ... شوف الكذاب ... المهم انه هو نفسه مش مقتنع باللى بيقوله .... طبعا لأنه من كتر ما قرا بأه يعرف يفرق بين الغث و السمين ( حلوه الغث و السمين دى يا زيكا ) ... ما علينا .... طبعا نادر قعد قرا البوست اللى فات و انا قلتله انى مكتبتش اسمه فيه عشان انا كتبت على الناس اللى معرفهاش معرفه شخصيه و اتعرفت بيهم عن طريق المدونه و قلتله انه هيجى اسمه فى بوست لوحده عشان هو حبيبى من ايام الجيزه و انا كده عملت الصح و زياده شويه .... عد الجمايل بأه يا نادر
على فكره ... انا المدونات دى اكتر حاجه فى حياتى واظبت على انى اعملها ... انا عمرى ما أفتكر انه فيه اى حاجه قعدت اعمل فيها لمده سنه متواصله حتى لو كان فيه غيابات فى النص ... تقريبا عشان موضوع الجوزاء و اننا بنحس بالملل بسرعه و بنزهق بسرعه ... بس لازم اعترف ان الوقت عدى بسرعه و انا محستش بيه عشان الصحبه الحلوه و الناس الجدعان و اللى يحبنا ميضربش نار عشان العروسه حامل
و على فكره برضه ... ده تانى بوست من التلاته اللى انا قلت عليهم انى هكتبهم .. ليكوا فى ذمتى بوست كمان و ابقى كده خلصت ضميرى .... سلام

هناك 30 تعليقًا:

adel يقول...

تمام قوي

مش عارف ليه هتقفلها بعد 3 بوست و تقول هاعتزل التدزين ولا هاخد اجازة و الكلام الحمصي ده اللي انا عارغة كويس

مي يقول...

طب فكر تقفلها يا عمور وهتشوف هعمل فيك اييييييييه
لحسن انا مفقوعة منك
يادى ام الجوزاء اللى شاغلك ده
يابنى انسىىى عيشها من غير ماتبص للجوزاء لحسن افخخ مدونتك واخليها خمسة تفخيخ
بس والنبى عثل بجد ليه مكملتش قصصك ؟
طب محتفظ بيهم ولا؟ حلوة عمو وطنط احب اسمع مبرراتك ههههههه الحاج وحاجة
على فكرة نيتى مش وحشة (وش بيغمز)
سيحت لنادر هههههههه حلوة حبيبى من ايام الجيزة
شكرا ليك انك واظبت سنة كاملة بس وحياة اللى خلفونى ماهخليك تسيبها انا بقولك اهو وعلى فكرة العروسة حامل لانها ضربت بوست عرفى
سلالالالالاموز

سارة نجاتى يقول...

أه شكلك بتفرش الفرشه
عشان تخلع
مش سايباك أنا
هو دخول الحمام زى خروجه
( نفس أعرف اشمعنى الحمام يعنى )

غير معرف يقول...

عارف ايه اكتر حاجة بحبها ف بوستاتك
انك بتحسسني اننا قاعدين ف قعدة واحدة واننا صحاب من زمان
وبنتكلم وبنتناقش وبنضحك ونتريأ
كأننا اصحاب عمر
لدرجة اني بتخيل اننا لو قاعدين بنتصور هانلاقي كل واحد فينا عامل للتاني 7 بوابعه من ورا على دماغه
:))
وان صحابك اللي بتحكي عنهم لو قابلتهم فالشارع هاعرفهم

بحس انك حد صادق اوي وصريح مع نفسك
ومعانا


بحب اجي هنا
:)

اقصوصه يقول...

ما اقدر اقول

غير

الله يسامح اللي كان السبب

لووووووووووووول

زهور الامل يقول...

طب انا برج الحمل وبرضو بمل بسرعة
وعندي احساس كبير اني هخلع قريب اوي من المدونة دي
مع انها شغلت حيز كبير اوي في حياتي ودخلتني عالم تاني غير مجرى حياتي
وبحبها جدا وبحب كل المدونين الموجودين في عالم بلوجر
بس مش عارفة ليه ساعات بحس اني برضو لواحدي او ان في حاجة نقصاني فيها
الموضوع ده مخليني بقالي كام يوم مش عايزة افتحها خالص ولا اكتب حاجة جديدة
واوقات كتيرة اوي بحس اني ضئيلة جدا جمب المدونين الموجودين وبحس اني ماليش مكان بينهم
بس ياريت يا عمرو بجد تستمر في التدوين لان احنا بجد بنحب نقرالك جدا

تحياتي

خواطر شابة يقول...

"و على فكره برضه ... ده تانى بوست من التلاته اللى انا قلت عليهم انى هكتبهم .. ليكوا فى ذمتى بوست كمان و ابقى كده خلصت ضميرى .... سلام"
كلمات بتدي احساس لاعب بيلعب ماتش الاعتزال لاياسيدي ملناش في ذمتك بوست واحد لينا كثير فيا الله شد حيلك ونحن في الانتظار
تحياتي لك

الشعب لابد له من حكومه تشكمه يقول...

اجل باه البوست التالت ده على اد متقدر...
ينفع كده يعنى هتمشى وتسيبنا لوحدينا فى بلوجر,:(
دا انت بابا وانت ماما وانت انور وجدى..
طب يعنى لما اقول ان من اوائل الناس اللى علقت عندهم وهم عاملين موديريشن(تشىىى,,يرحمكم الله)
ويسألونى عليك ويقولولى مين ده وراح فين:((
اقول ايه:(

وبعدين ايه موضوع الابراج ده,اوعى تصدقه اوى,يعنى لما تخلف ان شاء الله هتزهق من ابنك وترميه بره الشقه:) واهو ده مش هيبطل زن باه..

وبعدين يعنى هو انت لازم نتحايل عليك..
هتقعد يعنى هتقعد هنجيب حبل ونربطك فيه على باب البلوج..

اصحابك لوذاذ اوى على فكره:)

Zika يقول...

يابني ماتحاولش .. مش هاتخلع من هنا
هاجيبك هاجيبك
انت تبطل وشويه ساره تتهف فعقلها وتبطل وسين يبطل وصاد يبطل
اخش انا اقرا ايه بقا ان شاء الله
فاكس ليك بعد البوست الجاي استراحه ممكن
لكن غير كده انساااااااااا

micheal يقول...

يا بيه وتقفل ليه..اكتب وقول غنوتك واشكي بلوتك وادينا بنقرأ لحضرتك
:))
مش عارف ليه فكرتني بجملة
لو كل واحد عزل عشان تحتيه واحدة رقاصة البلد كلها حتبات في الشارع

Magi Mostafa يقول...

حلو انك بتكتب من زمان اوى كده بس ليه هتيطل تدون وليه بغد 3 بوستات لسه مش دلوقتى عارق بتفكرنى بأيه بواحد كل يوم الصبح يقول انا هنتحر بكره طب طمان يوم طي يعد متعشى الاول وهو لو ناوى يغملها كان انتحر من سكات مغ الفارق طبعا
اتمنى انك تراجع قرارك ده و متبطلش ولا حاجه

Che يقول...

ماجى
اولا بعتذر لكل الناس لأنى متعود ارد على تعليقاتكوا بالترتيب بس المره دى استثناء عشان تعليق ماجى شدنى انى ارد عليه
نيجى للتعليق ... انا عارف انه شئ جميل انى فعلا بكتب من زمان .. بس دى مش انا اخترتها .. انا ببساطه عملت كده و اكيد كنت ساعتها صغير على انى افكر انا بعمل كده ليه
مسأله ليه هبطل بعد 3 بوستات فواضح منها انك مقرتيش اول بوست من التلاته بالظبط ... انا قلت انى يمكن ابطل ، يمكن اخد اجازه .. بس مش عارف بالظبط ... و كل الناس قالتلى انه ده عادى بعد أول سنه تدوين و انا بصراحه مش عارف انتى كملتى سنه تدوين ولا لسه .. بس لو كملتى يبقى اكيد عارفه هما بيتكلموا على ايه ، و لو لسه يبقى هتعرفى لما تكملى السنه ان شاء الله
مسأله ليه بعد 3 بوستات بالتحديد .. فده عشان اللى انا عايز اقوله ياخد 3 بوستات بالتحديد ... يعنى انا مش قايل كده عشان اعمل استفتاء او استبيان و اشوف مين عايزنى اكتب و مين عايزنى ابطل
سيبك انه قرار انى ابطل مش زى قرار انى انتحر ... الفرق واسع ... يمكن من ناحيه المبدأ يكونوا الاتنين حوالين ليه معملش الحاجه على طول ... يعنى النظريه من غير التطبيق اكيد بيبقى فيها خلل
حاجه اخيره بس متزعليش منى ... انتى تقريبا الحروف العربى اتمسحت من على الكيبورد عندك عشان انا عملت مجهود انى افهم اللى انتى كتباه عشان الحروف متلخبطه ... بس دى بسيطه ... فيه بيتباع استيكرز عليها الحروف و بتتلزق على الكيبورد ... يعنى حل بسيط و مش مكلف
و بجد انا نفسى انى مبطلش تدوين ... بس لسه مش عارف انا هعمل ايه بالظبط
نورتينى يا ماجى و مستنى تعليقاتك دايما

Polka Dotted يقول...

enta leh wa7'ed el blog 3la enno mashroo3 ???

el blog is a space to scream, a place to let it all out.. so don't ever abandon it !

غير معرف يقول...

كل سنه والمدونه طيبه

تحياتي

سمكه واحده يقول...

جايه اقلك

حكايه الملل بسرعه دي مش في برج الحمل لوحده
ده كل الناس وانا من النوع اللي بيمل يمكن من نفسه كمان بسرعه
كمان موضوع التدوين جميل بس بيجي علي الواحد سعات يضايق وميعرفش هيكتب ايه وسعات يبعد وسعات يقرب ومتعرفش حجات علي بعض واحاسيس كتير مختلفه
بس انت بذات زي ما قلتلك لما بقري بوستاتك كننا كلنا معاك وبتكلم بطبعتك وبتعيشنا معاك
عشان كده مدونتك جميله
وانا يمكن دخلت علي سنه ونص في التدوين
معرفش انا بدون ايه هههههههههه
بس حابه الناس والتواصل شوفت ناس جميله وقربنا كلنا من بعض من غير شات ولا حاجه
تحس كده حاجه غريبه وعلاقه اغرب
سبحان الله
كل سنه وانت طيب ياعمرو

حروف يقول...

اممم عمرو اجي الاقيك حتعزل امممممممم
بص انك تزهق تتخنق متلقيش حاجة تتكتب او تستاهل انها تتكتب

وانك تقعد شهر بين بوست وبوست
دة عادي بعد سنة تدوين

بما اني عندي سنة وشهر تدوين

انما تقفلهااا معتقدش

الواحد بيغيب ويغيب وبردوا بيرجع

كل سنة وانت طيب
ليك وحشة

Che يقول...

عادل
يا عم عادل مش هقفلها .. بس اجازه طويله فى الغالب ... و يا عم كلمه حمصى قديمه طحن
نورتنى يا عادل

Che يقول...

مى
والله يا مى كان مجرد تفكير بس طلع تفكير فاشل ... فى الغالب هتبقى اجازه و مش هكتب بأنتظام
نورتينى يا مى

Che يقول...

سارة
فى الغالب عشان الحمام هو بيت الراحه ... ههههه
نورتينى يا سارة

Che يقول...

غير معرف
انا سعيد بالكلام اللى انت او انتى قلتيه
بس سعادتى هتزيد لو عرفت مين اللى قال الكلام الحلو ده
منور او منوره ... ههه

Che يقول...

اقصوصه
آمين يا رب ... ربنا يسامحه يااااااا رب ... ههههههه
منورانى دايما يا اقصوصه

Che يقول...

خواطر شابه
خلاص مبقاش ماتش اعتزال ... اصبح ماتش اصابه
منورانى دايما

Che يقول...

شيما بتاعه الشعب اللى هتحكمه
كل شئ بمعاد يا شيما .... و بعدين والله الموديرشن ده ليه اسباب تتعلق بحمايه الجمهور مش بحمايتى انا ... انا لو عليا مش بتكسف من حد
منورانى يا شيما

Che يقول...

زيكا
طيب انا عارف سارة و عارف نفسى .. بس يا ترى مين سين و صاد دول
و على كل انا هعمل بنصيحتك .... اجاااااازه
منورنى على طول يا زيكا

Che يقول...

مايكل
هههههههههههه كبيره على حته كل واحد تحتيه رقاصه دى
و بعدين يا عم مايكل جاهين ... مش هتبطل الاقتباسات الفنيه دى
منورنى يا مايكل

Che يقول...

بطوطه
والله مش موضوع مشروع ... بس انا بطبعى مش بثبت على حاجه لمده طويله ... و فعلا انا صرخت هنا لغايه ما ضغطى على و دماغى طقت خلاص
منورانى دايما يا بطوطه

Che يقول...

فتاه من الصعيد
و انتى طيبه و عقبالك يا رب
نورتينى يا فتاه

Che يقول...

سمكه
والله يا سمكه انا موافق على كل اللى انتى قلتيه ما عدا حاجه واحده
انا جوزاء مش حمل يا سمكه .... ولا تكونيش انتى الحمل ... ههههه
نورتينى يا سمكه

Che يقول...

حرووف
طلع عندك حق يا حروف ... و انا مكنتش اعرف ان مدونتك اكبر من مدونتى بشهر ... يعنى تقول مدونتك يا ماما ...ههههه
و يا ستى لو على الوحشه انا مرمى هنا على طول
منورانى يا حروف

Che يقول...

زهور
بجد انا اسف انى مخدتش بالى فى الرد بالترتيب ... يمكن عشان برد على البوستات الساعه 7 و نص الصبح ... بس برضه اسف
على فكره كل اللى انتى قلتيه ده صح .. يمكن بأستثناء مسأله الوحده عشان مش دايما بتبقى صح .. و ساعات بتبقى صح و مبنعرفش نخرج منها
و بمعرفه انك برج الحمل يبقى كده عرفنا سمكه بتتكلم على برج الحمل ليه و الغلط عندى انا
منورانى يا زهور دايما