الأربعاء، 23 ديسمبر 2009

حيطه نص طوبه و شويه طوب

انا عارف انى قايل انى مش هكتب غير 3 بوستات و بالفعل كتبت منهم 2 بس البوست ده مش التالت بتاعهم .... شكله بجد يموت الزمار و صباعه لامؤاخذه بيلعب ..... البوست ده شويه شخابيط على حيطه نص طوبه انا لسه ببنيها فى عقلى
اول طوبه .....امبارح بليل على الساعه 4 كنت جعان جدا ... مشكلتى مع الوقت ده انى لما بجوع فى الوقت ده كل محلات الدليفرى بتكون عملت اللاست اوردر خلاص و مش فاضل غير ماك و كنتاكى و الاتنين اوحش من بعض ... المهم نزلت قلت اشترى اى حاجه اجيبها ... و فعلا واقف قدام مطعم كبده و مخ لقيت عربيه فيها 4 ستات ، 3 منهم فى سن الانحراف بتاع من 20 لغايه 30 كده ، و الرابعه بتلعب فى الخمسين .... عادى جدا ... اللى انا استغربته انى لقيت بت صغيره معاهم عندها يمكن 13 سنه ... هو الانحراف للاشبال بأه من سن كام
المهم قلت سيبنى منهم و دع الخلق للخالق ... شويه و عدى تاكسى فيه 2 بنات تانى برضه فى العشرينات ... و شويه تاكسى كمان فيه 2 بنات تانى برضه فى نفس السن .... شكله شارع الهرم بركه بجد ( واخد بالك ياللى فى بالى .... ههههههه ) .... يعنى انا فى نص ساعه شفت 7
تانى طوبه .... كان نفسى اروح مع عادل امبارح السينما بس قاتل الله الظروف ... بس تتعوض ان شاء الله
تالت طوبه .... انا ليا 3 مرات انزل وسط البلد و معملش حمام فى طلعت حرب ... ايه الحكايه ... انا اتحسدت ولا ايه
رابع طوبه .... برضه على وسط البلد .... قهاوى وسط البلد دى غريبه ... تلاقى عليها حاجات عجب .... يعنى مثلا تلاقى واحد ماشى بمعزه و كلب و قرد و عاملك حاوى ... تلاقى اللى بيلعبوا بالنار ... تلاقى اللى يقولك موسى نبى و عيسى نبى و محمد نبى و كل من له نبى يصلى عليه ، انا عايز 5 يكتفونى ... المهم كنت قاعد مع نادر و صديقنا عبد الفتاح من ايام الكليه على التكعيبه ... انا و عبد الفتاح بنلعب 31 و نادر قاعد بيتفرج و بينعس عشان ملوش فيها ... المهم واحده من اللى بيلعبوا بالنار عدت على التكعيبه و قعدت تلعب .... كان نادر قاعد بضهره و فجأه الوليه حوشت سبرتو كتير فى بؤها و بخته عملت حريقه مش لعبه و هييييه و ادونى قرشين عشان اغور من وشكم ... المهم نادر قام و كان هيجرى عشان افتكر القهوه بتولع .... مش عايز اقول على كميه الضحك ... بس بجد ابقى فكرونى احكيلكو المواقف البايخه اللى انا حطيت نفسى فيها و الناس ضحكت عليا ... صباح الجوافه يا نادر و اوعى تزعل منى يا صاحبى
خامس طوبه ..... اكتر حاجه صعبه ممكن اى حد يعملها انه يعمل نفسه منظر و مصلح اجتماعى طول الوقت ... يعنى انا مش بعرف اعمل كده عشان انا فاشل فى العلاقات الانسانيه .... بس بكون مستغرب من الناس اللى عاجبها الدور و متفصل ليها و تلبسه و تنام بيه و تقوم على رأى عمنا نجيب سرور
سادس طوبه ..... اجيب 30 قناه جديده و ملاقيش حاجه اتفرج عليها ... طيب ازاى يا كفره
سابع طوبه .... تفضل جينفر انيستون حبى الاجنبى الاول .... و بسمه ..... ولا بلاش ... بسمه اعجابى المصرى الاول
تامن طوبه .... يا ترى فيه كام شاب مصر بيتفرج على راجل و ست ستات عشان يتفرج على لقاء ... الله يسامحك يا عبد المنصف
البوست خلص بس الطوب لسه مخلصش ..... سلام

هناك 26 تعليقًا:

غير معرف يقول...

هههههههههههه

لقاء موش منظر اوي يعني

عموما حلو الطوب

تحياتي

اقصوصه يقول...

looooooool

حلو الطوب :)

خواطر شابة يقول...

ياسيدي مابين الخيرين حساب اكتب براحتك مفيش حد بيعد وراك
نجي للطوب
الطوبة الاولى هو ليه من حق الولد يخرج الساعة اربعة بالليل ومبيشوفش ده انحراف
رابع طوبة المواقف المضحكة التي تحصل في حياتنا كثيرة والاغرب هي المواقف التي تكون مأساوية ومضحكة في نفس الوقت
خامس طوبة كل ميسر لما خلق له هناك اشخاص يلعبون دوما دور المصلح الاجتماعي ليس لانهم يدعون ذلك او ينافقون او يدعون ماليس فيهم بل لانهم هم فعلا كذلك ربنا خلقهم كده
سادس طوبة بتحصل معابا انا ايضا الف على القنوات كلها وملقيش حاجة تستاهل ان الواحد يقعد يتفرج عليها
سابع طوبة الاذواق لاتناقش
ثامن طوبك الله يسامحك ويسامحها ويسامح عبد المنصف ههه
تحياتي لك

donya يقول...

مساء الخير
هههههههه
كل الطوب ده ومافيش حد اتعور

اغلب اللي بيحصل في وسط البلد ده اللي انت بتحكي عنه بيحصل بره برضه في اوروبا خصوصا فرنسا وامريكا

لكن بشياكه اكترمن كده

تحياتي

ستيتة يقول...

طب حد يديني طوبة ابطحه
طب زلطة
طب حديدة ونص شكارة اسمنت

يعني انا لما ابقى في الشارع الساعة دي ابقى هيء وماهيهيء يا عم انت؟

طب انا لا في سن الإينحيراف اللي هو حسب اقوالك يا خبير من 20 - 30 ولا انا المعلمة اللي عندها 50 ولا الحمد لله 13

ايه اللي انت بتقوله ده
انت عملت زي الضابط المتخلف عقليا اللي لقاني راجعة 3 بليل وقفني في لجنة
واشاسا اشاسا عمر ما حد طلب مني الرخص
المهم لقيت الواد العسكري بيقول لي انزلي قابلي سعادة الباشا
قلت له روح هات الباشا بتاعك يابني انا مبنزلش
الراجل شاف الرخصة واني زفتة استاذة جامعة ومش من الأشبال المحترفين فضل مزبهل ويقول لي انتي استاذة جامعة
ايوه يا ضنايا
حضرتك في جامعة كورومبو
ايوه يا عين امك

طب ده متخلف عنده نظرة ذكورية وطبيعي يقول علي انها حقا امرأة بلا رابط ولا ظابط
لكن سعادتك وجهة نظرك ايه بقى؟

حد يناولني مطوة

والا خلاص ها اعديها المرة دي

فرحانة انك كتبت
حتى لو كان طوب

حروف يقول...

هههههههههههههه
الدلوعه هههههههه
وش بيغمز

كومنت مشفر

نادر تعيش وتاخد غيرها اتارية مختفي ويقولي الكمبيوتر بايظ

Zika يقول...

ده طبعا من وحي الطوب والتكسير اللي في الشقه حاليا

بخصوص شارع الهرم
مره واحد صاحبي بارضه قالي انه بركه شكله هو هو صاحبك بارضه :P:P

بخصوص الانحراف
المهم كلت ايه في الاخر يعني ؟

بخصوص الوليه اللي بتلعب نار
كنت في مره انا واسماء ع البورصه وماشيين في امان الله ومعديين من جمبها وهوووووب لقيت النار طلعت
بابص جمبي مالقتش اسماء
طلعت تجري

بخصوص بقا جينيفر

انا بالنسبالي ناتلي بورتمان
وايمان العاصي

حاجه كده فضلة خيرك من خير مزارعنا

adel يقول...

ملكش نصيب في الفيلم بقي مع انه جامد كيك :):)

وزي ما قالت د/ستيتة مش معني نزولهم متاخر بيقوا سيكي ميكي

بتقعد علي التكعيبة يازُمل ...هع هع هع
عارف الست دي طبعا :):)

انا بتفرج علي لقاء .. قصدي علي راجل و ست مُزة واحدة :):)
يابن المحظوظة يامنصف

مممم اعتقد جوليا روبرتس و سعاد حسني و مات الكلام (سعاد قبل جوليا كمان)

MǿиY El-Shreef يقول...

لقاء !! :S

ع نيله ايه طيب

دي الطوبة الوحيده اللي عورتني :D

Polka Dotted يقول...

loooooooool :D

enta b3d keda 7'af 3la nafsak w matenzelsh b3d el sa3a 12.. el share3 beyeb2a kolo lamo2a7'za banat leil :D

bas ana mashoftesh abl keda eli mashy b me3za ... eb2a 2olee pleaaaase fein !

eh 7war ragel w 6 setat da ?? mesh fahma? heya leka2 el mafrod enaha ba2et angelina jolie el TV el masry wala eh ? danta law dafa3tely floos mesh 7atfarg 3la el mosalsal el BAYE7' da :D


3la fekra... dont make a last post... walahy 7anew7ashak !

Unknown يقول...

ههههههههههه

انا بحب اشوف لقاء عشان هبلها في المسلسل

جد من الاخر :)

طيب بدل ما تطلب ديلفري اتعلم تطبخ

مش احسن واوفر؟

حروف يقول...

مياسي
اسفه اني برد


بس اصل لما قريت كومنتك قعدت اضحك عشان عمرو بيطبخ احسن من اي طباخ ولا اية يا حج

هههههههههههههه

ساعات بيديني وصفات

Unknown يقول...

حرووف

شكرا على التنويه:) يعني عمرو ملان من الطبيخ شكلو :)

Che يقول...

فتاه من الصعيد
والله يا فتاه مش عارف اقولك ايه ... بس حكمه ربنا انى مقابلتش بنت بتقول على لقاء انها منظر
سعيد انه عجبك الطوب
منورانى على طول

Che يقول...

اقصوصه
اى خدمه يا باشا
منورانى يا اقصوصه

Che يقول...

خواطر شابة
اكتر تعليق تفصيلى للبوست قريته ... مسأله ليه الولد ينزل اربعه الفجر و ميشوفش ده انحراف فده هرد عليه فى بوست لوحده فى موضوع ليلى اللى ماشى فى البلد اليومين دول
منورانى يا خواطر ولا اقول يا شابة احسن ؟ ... ههههههه

Che يقول...

دنيا
مساء الخير يا باشا .... فاهم قصدك لما قلتى بشياكه .. بس يا ترى كام واحد فاهم قصدك برضه
هو انتى شغاله مع البوليس ولا ايه ... طيب لو مش شغاله مع البوليس بتسألى على اللى اتعوروا ليه ... و على العموم انا بس اللى اتعورت من الطوب ده
منورانى يا دنيا

Che يقول...

العمه ستيته
بصى يا عمه ... الظابط ده مكانش عنده نظر ... يعنى برغم انى متعرفتش عليكى شخصيا ، انما لا يمكن تكونى يا عمه كنتى لابسه زيهم او شكلك زيهم ... فهمتينى يا عمه لما قلت انهم منحرفات
و والنبى ما تقولى سوء نيه .. انا شفت و عرفت ياما لغايه ما بأيت اقدر احكم على الناس بنسبه كبيره من الصواب .. ( وش متواضع ) ... ولو على الطوب و الزلط .. موتينى يا عمه زى ما تحبى .. بس بعد كده مش هيبقى فيه عمرو يكتب
منورانى دايما و ابدا يا عمه

Che يقول...

حرووف
انا مش هفك الشفره
و بالنسبه لنادر انا شخصيا مش بشوفه ولا بسمع منه اى حاجه
نورتينى يا حروف

Che يقول...

زيكا
ايوه يا عم من وحى التكسير اللى فى الشقه ... بتفكرنى ليه بس يا زيكا
و بالنسبه لصاحبى شكله صاحبك برضه يا عم زيكا .... هههههه
اما بخصوص الانحراف فانا ضربت فى الاخر سندوتشات كبده و مخ يا كبير
و يا ريتنى كنت شفت اسماء لما جريت .. كنت قعدت اذل فيها لغايه دلوقتى .. يالا .. ما علينا و انا واثق انك قمت بالواجب و زياده
منورنى على طول يا زيكا

Che يقول...

عادل
مليش نصيب فى حاجات كتير يا عم عادل مش فى الفيلم بس ... ما علينا
طيب دكتوره ستيته تقول يا عم عادل ... انما تقول و انت ساكن فى المقطم ... انت هتشتغلنى يا عم ولا ايه
بالنسبه لجوليا فأنا بحبها برضه ... بس بحب طله جنيفر انيستون ... و طبعا مش هتكلم على سعاد حسنى لان سعاد اكبر من اى كلام يتقال عليها
نورتنى يا دولا

Che يقول...

مونى
ياااااااااااااه .... كنتى غايبه من زمان فين يا مونى .. لا باينه هنا ولا على الفيس بوك .... على كل حمدلله على السلامه
و اسف يا ستى على طوبه لقاء ... مش عارف لقاء عامله ايه بس للستات فى البلد دى
منورانى يا مونى و متغيبيش كتير كده تانى

Che يقول...

بطوطه
اخاف على ايه يا حسره ... خلينى ساكت .. ربنا حليم ستار برضه
بالنسبه للراجل ابو معزه و قرد و كلب ده ساعات بيعدى على البورصه و ساعات بيعدى على الزهره .. بس مشفتوش على التكعيبه خالص
و طبعا مش هقول حاجه على لقاء ... تقريبا كلكوا متفقين عليها مش عارف ليه ... مع انك شفتى اراء الشباب فى استطلاع الرأى اهو
و بالنسبه للبوست الاخير مش هيبقى اخير ولا حاجه .. فى الغالب هيبقى بدايه مرحله جديده .. و طبعا هتوحشونى ... ده انتو واحشنى و انا لسه هنا
نورتينى يا بطوطه

Che يقول...

مياسى
ربنا يكرمك يا رب ... اول واحده تقول انها بتحب لقاء ، حتى لو كان عشان هبلها
بالنسبه لموضوع الطبيخ اديكى قريتى تعليق حروف اهو .. انا مش هقول حاجه و هسكت خالص
نورتينى يا مياسى

Che يقول...

حرووف
انتى تقولى اللى انتى عايزاه يا باشا ... مدونتك و تعملى اللى انتى عايزه فيها

سمكه واحده يقول...

بالنوسبه للسوتات والبنات فقول قول ياعم برحتك انت ادري وبتعرف الناس وبتفهم فيهم وتقدر تميز بين الكويس والوحش اهو مش هنعدل عليك يا عمرو باشا

بالنسبه بقي للقاء انا حبتها جدا في فيلم عسكر في المعسكر هتموتي ياسوسو ده
لكن شوفتلها برنامج مكنتش علي طبعتها فمستريحتش لكلامها واخد بالك انت من الناس اللي مش بتتكلم بطبعتها دي يعني هي كويسه وتمثلها جميل

بالنسبه للطوب الحمد الله ان مفيش خساير في الارواح
ويارب ديما تمتعنا بطوبك ده
):
بالنسبه لموضوع برج الجوزاء والحمل معذره افتكرتك برج الحمل منهم لله بقي الناس اللي خلتني افتكر كده
ههههههههه

تحياتي