الخميس، 3 ديسمبر 2009

مدونات .... الاول .... محدث

تحديث ..... نزولا على رغبه الجماهير حطينا اللينكات للمدونات و كل عام و انتم بخير
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انا عارف انى كنت كتبت و اتريقت على الناس اللى لما تدخل عندهم تحس انك بتقرا صفحه الاجتماعيات فى الجرنان ... بس الحقيقه انه مينفعش بعد سنه مكتبش عن الناس اللى انا بجد حبيتها و اتعلقت بيها من مجرد شويه حروف على سكرين مش اكتر ، مع انى مشفتش اى حد فيهم شخصيا ... يمكن فيه ناس اتكلمت معاهم على المسنجر او الفيس بوك .. بس الاغلبيه كانت كل علاقتنا البوستات اللى بنقراها لبعض .... فمعلش لو حسيت انك بتقرا صفحه الاجتماعيات فى الجرنان عندى المره دى ابقى عديها و التمس ليا العذر انها اول مره بعملها ... بس لازم عشان دى كلمه حق و لازم اقولها لأنى مش عارف اذا كنت هكتب تانى ولا لا مع انها يمكن متفرقش مع اللى هقولها فى حقهم كتير ... انا هكتب من غير ترتيب و من الذاكره ... فمعلش لو سقط اى حد سهوا يبقى يسامحنى و انا هحاول افتكر على اد ما اقدر ... بس الحقيقه انه ناس قليله بس اللى انا قريتلها و محستش انى استفدت منها حاجه ، انما الاغلبيه استفدت منهم كتير ... و كفايه الوقت الحلو اللى كنت بقضيه فى قرايه بوستاتهم
نبتدى بأحسن ناس بتكتب قصص قصيره انا قريتلهم ... سوبيا صاحبه مدونه على ماتفرج و بعد كده غيرت اسمها لجبل انحسر عنه الماء و اخر اسم هو مساحه خضراء للركض ... اسلوب سلس و جميل و بينساب جواك و انت بتقراه من غير ما تحس و لما القصه تخلص تزعل ان القصه قصيره
و تانى واحده و انا هنا مش قصدى ترتيب اولويه انما ترتيب قرايتى ليهم لانى قريت لسوبيا الاول ... فرويده صاحبه مدونه حكاوى الست فرويد .... اسلوب مختلف فى القصص القصيره .... عندها جرأه فى التعبير ، بس مش الجرأه اللى تنفرك منها انما اللى خليك تعرف انها بتكتب اللى بتحس بيه ... فى بعض كتابتها ممكن تمسك اسلوب نجيب محفوظ و ساعات يوسف ادريس ... مش عن قصد منها .. و انا معرفش اذا كانت قرت ليهم ولا لا ، بس رأيى الشخصى انك لو عايز تكتب يبقى لازم تكون قريت للاتنين دول بالذات و بعد كده القائمه تطول من الناس اللى المفروض تكون قريتلهم
كمان فيه مدونه من بلد عربى بس انا بجد اسف مش قادر افتكر اسمها ولا اسم مدونتها بس لما افتكره اكيد هعمل تحديث للبوست
نيجى بعد كده للناس الصادقه أوى فى بوستاتها ... بتكتب من غير ما تعمل اى حسابات او توازنات ، انما بتكتب اللى هى بتحسه و بكل صدق و من غير تزويق للكلام .. ساعات ممكن الفاظ تصدمك ( طبعا تصدمك انت لو كنت من الناس اللى بتبقى قافشه شويه ) انما انا بحب اللى يتكلم على سجيته لانه احساس الصدق عنده بيكون عالى .... منهم زيكا اللى يشرفنى انى بعتبره صاحبى و صاحب مدونه المخرج .... شخص بيكتب اللى بيحس بيه على طول ... و ساعات بينتقد نفسه و بيقول كلام يمكن ناس غيره متقدرش تقول الكلام ده عن نفسها ... بس هو صادق مع نفسه اولا و مع اللى بيقروله ثانيا
برضه فيه آبى صاحبه مدونه كوكب آبى .... مدونه تصادميه لاقصى درجه .... دايما الناس بتختلف معاها فى صفحه التعليقات و تحس و انت بتقرا التعليقات ان الناس داخله فى حرب ... مش بس معاها ... انما حتى اللى بيعلقوا بيقعوا ساعات فى بعض و بيقعدوا يتخانقوا فى صفحه تعليقاتها ... سيبتلها تعليق قبل كده انى معرفش ازاى هى بتستفز الملكات الجداليه عند كل الناس دى فى نفس الوقت و هى ردت عليا انى مشفتش كميه التعليقات اللى هى مش بتنشرها ... ههههه
و طبعا مش ممكن انسى بطوطه صاحبه مدونه بطابيط .... واحده من المدونات القلائل اللى بيكتبوا بالانجليزى و هما فاهمين هما بيكتبوا ايه مش نظام هات القاموس و ترجملى يا عبده .... صادقه جدا و انا شايف انه بسبب موضوع انها بتكتب بالانجليزى هو السبب انها ملهاش ناس كتير بتقرا لانها تستاهل ناس اكتر من اللى بيعلقوا عندها ... انما العبره اولا و اخيرا بالكيف مش بالكم
و اخيرا و ليس بأخر مدونه ليها معزه خاصه عندى ... مع انى معرفهاش شخصيا و هى معلقتش عندى ولا مره و انا علقت عندها مرتين او تلاته بالكتير .... مدونه حساسه جدا ... و بتكتب بصدق جدا ... و اللى عاملها المشكله هو صدقها ده لانه فيه ناس بتلوم عليها انها تكتب بكميه الصدق دى ... و السبب من وجهة نظرهم انها كأنثى لازم تكتب بأسلوب لايق عن كده ... و الحقيقه ان الكلام ده بيكون طالع من بنات و سيدات قبل ما يكون طالع من الرجاله و ده يؤكد ان مجتمعنا لسه ذكورى فى تفكيره حتى لو كلنا قعدنا ننفى فى النقطه دى .... المدونه اللى انا بتكلم عليها هى خيخه صاحبه مدونه بت خيخه و اى كلام ... اسمها اللى انا متأكد انها بتحبه جدا هو مامت شريف
نيجى للناس الحلوه اللى بتكتب كلام فى الجون و بحب اقرالها ... اولهم و مش هقدر انساها العمه ستيته .... بختلف كتير انا و هى فى طريقه رؤيتنا للامور .... بس اختلاف من النوع اللى الشخصين بيكونوا فيه على نفس الخط بس مديين ضهرهم لبعض و ده مايمنعش انه لو كل واحد فيهم لف حوالين نص الكره الارضيه هيتقابلوا ( و التعبير ده مقتبس من احمد خالد توفيق على ما أذكر ) .... العمه ستيته اثبتتلى انه كل خريجين علوم بيفكروا بطريقه واحده ، و يمكن ده اللى خلى واحد صاحبى قالى انه عايز يتجوز واحده خريجه علوم عشان يبقى تفكيرهم واحد ، لاننا اتربينا فى الكليه على نفس طريقه التفكير ... بس شتان ما بين العمه ستيته و بينى .... هى أستاذ دكتور فى الكليه و انا واحد من افشل الطلبه فى تاريخ الكليه ... مدونه العمه ستيته هى مش عارفه .. بس نفسى اعرف
طبعا مينفعش انسى المدونه الصغيره فى السن صحيح بس الحق انه موهبتها فى الكتابه تطورت على نحو مريب على رأى صديقى زيكا .... سارة نجاتى صاحبه مدونه بنى آدميين .... بجد بجد بجد ليا زمن مقرتش حد بيكتب بالتمكن ده من غير ما يكون محترف فعلا .... لا كبير ولا صغير ... و بقولها بالمناسبه دى way to go
برضه مش ممكن انسى المدونه المتميزه صبرنى يا رب صاحبه مدونات رغى امراه غير مطحونه و المدونه اللى انا بحبها جدا رؤيه اسلاميه متواضعه اللى بجد فيها معلومات قيمه و مش معروفه لناس كتير
و كمان المدونه الطبيبه نورهاتى صاحبه مدونه صعبان عليا حالنا .... بجد واحده من الناس اللى بكون مبسوط لما بتسيب تعليق عندى ... بس هى مش بتدينى الشعور بالانبساط ده كتير بس معلش .... المسامح كريم
نيجى للناس اللى انا بكلمهم بأه و اصحابى و ناس عشره بلوجز قديمه .... عندنا اول واحد صديقى عادل صاحب مدونات البلد دى فيها حكومه و المدونه التانيه بحب السيما واحد من اكتر الناس الذوق اللى قابلتها و برضه من اكتر الناس اللى بتفهم فى السينما
و كمان فيه شوشو صاحبه مدونه البت المشمشيه و انا من هذا المنبر بقولها معلش يا شوشو على انى مش بسأل كتير ... بس انتى اختى الكبيره بأه و من حقى ادلع عليكى
و فيه كمان موكا ... مايكل صاحب مدونه مايكلتو و صاحب اكبر رقم قياسى فى الانترفيوهات عرفته مصر و السودان
و وسع وسع وسع للكابتن الكبير ... كابتن سيمو ... أسماء عونى على سن و رمح .... اللى مشرفانا و رافعه راسنا بره القطر المصرى و جواه برضه ... صاحبه مدونه مكعب سكر و هى فعلا مكعب سكر
و من خارج الجمهوريه كلها فيه من الاردن الشقيق المدونه مياسى .... مدونه جميله بجد و دايما اسلوبها فيه سخريه مغلفه بالادب و الاحترام ... مياسى مدونتها هى مياسى ( يا سبحان الله ) ... كل سنه و انتى طيبه يا ميسو
و أخيرا و ليس باخر ( عارف انها متعاده و مكتوبه فوق بس معنديش غيرها ) ... الدكتوره الكبيره جدا الدوك المتميزه ... عاشقه و غلبانه صاحبه مدونه عاشقه و غلبانه ( برضه زى مياسى .... يا سبحان الله ) .... انتى فين يا دوك
و طبعا اخر حاجه قائمه الاصدقاء الجدد اللى انا سعيد انى ضمتهم للريدر عندى و بكون سعيد بتعليقاتهم لما بشوفها .... سمكه صاحبه مدونه تررم و سمعنى اجدع سلام لمدونى اسكندريه
زهور الامل صاحبه مدونه اوراق الورد .... و واحده من الناس الرقيقه القليله اللى انا صادفتهم على البلوج
شيما او شيمو زى ما انا بقولها ... صاحبه مدونه الشعب لابد له من حكومه تشكمه ... و كله يوسع للمنصوره و اهل المنصوره
و طبعا مش ممكن انسى مى صاحبه مدونه رحيق الورد ... اللى انا فاكر فى مره قالتلى بتحب الورد ... انا بكل صراحه ( و ساعات الصراحه بتبقى وقاحه ) و قلتلها لا مش بحبه .. قالتلى اخص عليك ده انا المدونه بتاعتى اسمها رحيق الورد ... المهم انا ماعلقتش و هى عدتها و الحمدلله ... صحيح ... لسانك حصانك
ارجو انه اى حد انا نسيته يسامحنى و يعتبرنى مجرد انسان مش اكتر ولا اقل و الانسان بطبعه جبل على النسيان ... و معلش البوست طويل بس انا اختصرت الكلام اللى كنت ممكن اقوله على الناس الحلوه دى كلها على اد ما اقدر .... سلام

هناك 42 تعليقًا:

خواطر شابة يقول...

هنيئا على مرور سنه في عالم التدوين وتمنياتي لك بالتوفيق دائما ان شاء الله
تحياتي

*البت المشمشية *حلوة بس شقية * يقول...

هههههههههههههههههههههههه
اختك الكبيرة مين ياعم
احنا هنهزر
بس مسمحاك عشان الكلمتين الحلوين دول

غير معرف يقول...

فعلا من اكثر المدونين المميزين من ذكرتهم

تحياتي

Mafrousa يقول...

انا معاك فى بعض اللى ذكرتهم لأني بعرفهم و بزورهم
بس فيه منهم مش اعرفهم
و لو تتكرم و تحط اللينكات بتاعتهم يبقى كتر خيرك
و تبقى على الاقل مش فرستنى
سلام

سمكه واحده يقول...

انت كمان ياعمرو بيه من الناس المميزه عندي جدااااااا
عجبني عمرو بيه اوي تحس كده بالعظمه
فاكره اول مره دخلت فيها مدونتك من زماااان من الجداد ايه بس ياعمرو ده انا قديمه لالالا زعلتني
يومها قضيت نص اليوم قريت المدونات كلها وبوستات كتير منها ومن يومها بقيت استني كل جديد عندك
اسلوبك جميل ودماغك عالي
ربنا يكرمك ياله دعوه حلوه اهه
قعدت ابص علي اسمي واترقب حكم انا رخمه كنت هقتلك لو ملقتهوش حكم انا نرجسيه شويتين بس لقيته انشكحت
حتي لو مجامله
بتحس احساس جميل لما تلاقي الشخص اللي قدامك فاكرك وكتب اسمك حتي لو الاخير احنا كده بني ادمين بقي(وش مبتسم) مهو الانسان بيحب اوي يشوف اسمه يكون مذكور مش مدكور يعني
بس لو مكنتش كتبته كنت هعرف انك بتداري علي المستور وخايف الناس تلسن علينا بالكلام(وش مطلع لسانه)
كل سنه وانت طيب ياعمرو
وربنا يبارك فيك وتفضل معانا نسمع منك احلي كلام
انت من الناس الجميله
تحياتي

adel يقول...

عارف ااقول ايه علي كلامك يابرنس الليالي
انت عارف انتي صديقي اللدود من قبل ما نتقابل اهون :):)

وبالنوسبة للذوق ....زي ما قلت ساعة الصراحة ممكن تبقي وقاحة بس انا بداري زيك :):)

وابقي اتعب نفسك و حط لينكات المندونات دي لو تعرف لان في ناس انا معرفهمش و كنت عاوز ادخل عندهم :):)

Empress appy يقول...

ههههههه كنت لسه حد بيقولى على موضوع الصدام ده وبقوله ان فيه حد قالى ان عندي الملكه دي قالى انت اصلا فى الحقيقه كده
ميرسى على كلامك عنى وربنا يقدرنا على استفزاز الناس هههههههههههه
وكل سنه وانت ومدونتك طيبين شرف ليه يا فندم انك تذكر اسمى وسط الناس الحلوه دي

الشعب لابد له من حكومه تشكمه يقول...

انا قريت البوست اللى فات بس ملحقتش اعلق ظروف باه دا على اعتبار انى مهمه اوى يعنى وورايا مسؤليات رئاسة الوزرا.

المهم انا عاوزه اسالك انت ليه قلت البوست اللى فات انك ممكن مش تدون تانى؟؟؟؟؟؟؟؟؟ وبعدين انا اصلا ملاحظه اختفاءك كده من فتره.
يارب يكون كله كويس وبعدين باه تكون بنوتك بات عروسه وعندها سنه بحالها يعنى المفروض تكون بتسنن دلوقتى ,وتروح تسيبها.

كل سنه وانت ومدونتك موجودين علطول,,
ومبسوطه انك حطتنى من ضمن الناس اللى بتحب تعليقهم دا شرف يا افندم:)..

متغيبش اوى كده ..:)

ستيتة يقول...

بص بقى
تعالى نتفق على شيء
نختلف زي ما نختلف بس تفضل عارف حاجتين
خلافنا شيء صحي لأننا متحضرين
ان استحالة الخلاف ده يزعلني الا بس يعني لو يعني ممكن يعني
كان فيه تجاوز ميسمحش بيه سني
متنساش يا عمور اني عضمة كبيرة
انت غالي جدا جدا عندي ومن زماااااااااااااااااااااان
تقريبا هي علوم الله يقطعها دي اللي من كتر شمنا للأسيتك أسيد اللي هو حمض الخليك لبتوع ادبي
تقريبا من كتر شمه بقينا قرايب دم فعلا
دمنا حمضي :)

مي يقول...

هههههههههه ختامها وررررررد
الا صحيح لسة مش بتحب الورد ؟
طيب خلاص
اولا انا بشكرك لانك افتكرتنى وده شرف مكنتش متخيله انى انوله انه اسمى بس يكون فى مدونتك
ثانيا انا عرفت عمرو اد ايه انسان محترم وجميل ودايما بيحافظ على مشاعر اللى ادامه
بجد زى ماقلتلك يتقال فيك كتب
ربنا يوفقك وتفضل تمتعنا بتدويناتك وبوجود بجانبنا

زهور الامل يقول...

كل عام وانت بالف خير يا عمور
وكل عام ومدونتك الجميلة بالف خير

وكل عام وانت معانا في عالم بلوجر
اللي انا بعتبره بيتي الاول واللي برتاح اوي وانا موجودة فيه
ومع الناس الحلوة اللي زيك واللي عمري ما شوفتهم
مبسوطة اوي انك افتكرتني ووضعت اسمي في البوست بتاعك

تحياتي

سارة نجاتى يقول...

و الله يا عمرو أنت من الناس - ويتهيأ لى أنا أول مرة أقولك ده - اللى كان نفسى يبثوا صحابى فى شكل شخصى
عشان بينا حاجة واحدة مشتركة
جانب مسخرة جدا بنواجه بيه العالم + و جانب جاد دا مخلينا شايلين هم الدنيا على راسنا
ده مش معناه أننا بوشين , لا خالص
ده معناه أن احنا مش شخصية

flat
زى ما بيقولوا عن الشخصيات الأدبية فى الروايات و المسرحيات و غيره و دى مش حاجة وحشه أنك تكون فلات , ده مجرد نوعية يعنى

يعنى لينا كذا جانب
دى حاجة لقتها فى ناس قليلة جدا جدا

تحياتى ليك
ومن فضلك بلاش جو تبطل تكتب و الكلام ده , أنت مش دافع فيه من جيبك يعنى

Unknown يقول...

ههههههههه

انا كنت جايه احكيلك حط اللينكات لقيتك محدث البوست:)


يسلمو جد والله انا حسيت حالي تقريبا انا الوحيده من بره القطر المصري الشقيق وده شرف كبير ليّـا:) -صرت بحكي مصري من كتر العشره

وصفحة الاجتماعيّات مرات ما بتكون كتير بطّاله يا عمرو ماشي حالها :D

في انتظار باقي السلسله

الست فرويد يقول...

عمرو انا كنت جاية اسلم عليك واشوفك غايب ليه بقالك شوية
لقيتك جايب فى سيرتى :)))))

مش عارفه والله اقولك ايه
بس انت عارف ان انت من اكتر الناس اللى بعتز بصداقتهم واخوتهم جدا
وسعيدة ان محاولاتى المتواضعة بتعجبك
وان شاء الله دايما يارب
:))

كل سنة وانت ومدونتك بالف خير يارب
مع خالص مودتى

donya يقول...

مساء الخير
كل سنه وانت ومدونتك بخير

ان شاء الله هدخل المدونات اللي انت ذكرتهم علشان فيهم مدونات لم ادخلها ابدا

تحياتي

اقصوصه يقول...

ما لقيت اسمي :(

micheal يقول...

هههههههههههه..مصر والسودان بس؟
نسيت تقول حاجة مهمة جدا
أنا دخلت موسوعة جينس كصاحب اسرع قرار رفد في العالم
لما مضيت عقد مع الشركة بتاعة المدير السوداني ورفدوني من قبل ما أبدا الشغل
:)
يبقى دخلت الموسوعة ولا لأ
:)
شكلي حقعد بكره أقزقز في بقية المدونات اللي قلتها هنا ومش أعرفها
تحياتي

Polka Dotted يقول...

awalan THANK YOU AWEEEEEEEEEEE

:) begad

ana bakteb bel engleezy msh 3shan ay 7aga 3'er eny mesh b3raf akteb 3araby 3al keyboard :D

when i write a post i let my mind flow fa if i'm going to search for the letters i won't be able to write exactly what i think of

thank uuuuuu

Zika يقول...

يا نهار ابيض هو انا في حد بيقرا مدونتي طب والله فيك الخير يا عمنا هههههه
انا عايز اقولك حاجه بس مش هاينفع اقولهالك هنا لكن هاديك تلميحه كده
انت واحد من كام مدونه يتعدوا ع الصوابع هم اللي بقراهم وبتابعهم حتى لو ماكنتش باعلق
من الناس اللي بحب ادخل المدونه لاني باحس اني داخل مدونتي افهم انت على مهلك بقا :D
عجباني اوي حكاية way to go
سلام يا صديقي

Che يقول...

خواطر شابه
شكرا على تهنئتك الرقيقه و اجى اباركلك قريب فى عيد ميلاد مدونتك

Che يقول...

البت المشمشيه
طول عمرك قلبك ابيض يا شوشو ... هههههه
منورانى يا شوشو على طول

Che يقول...

فتاه من الصعيد
هما فعلا من اكتر الناس اللى شدوا انتباهى و علقوا معايا جامد
شكرا لمرورك و نورتينى

Che يقول...

واحده مفروسه
ادينى حطيت اللينكات يا ستى عشان تزوريهم براحتك
و بالمناسبه دى انا بعتذرلك عشان اسمك سقط سهوا يا فندم و جارى التصحيح

Che يقول...

سمكه
والله يا سمكه مش عارف ارد عليكى اقول ايه ... بس ربنا يخليكى و تفضلى تمتعينا ببوستاتك كده على طول
منورانى يا سمكمك

Che يقول...

عادل
حبيب هارتى يا دولا ... ادينى حطيت اللينكات يا عم عشان تشوف و تزور الناس براحتك
و طبعا يا باشا احنا اصدقاء لداد ... حلوه لداد دى يا دولا
منورنى يا دولا دايما

Che يقول...

آبى
يا فندم ده شرف ليا انى احط اسمك و اسامى الناس الحلوه دى عندى فى المدونه
و بالنسبه لموضوع الصدام ده عادى ... فيه ناس بتتولد بيه .... هههههه
منورانى يا آبى دايما و مستنى تكرار الزياره

Che يقول...

شيمو
كان الله فى العون يا فندم .... هههههه
و طبعا يا باشا انت تنور المدونه و تنور اى حته
كل سنه و انتى طيبه و عقبال ما نحضر عيد ميلاد مدونتك
نورتينى يا شيمو

Che يقول...

العمه ستيته
انا مقدرش اعقب على كلامك يا عمه ولا اقول اى حاجه
و تقريبا اللى قلتيه على الاحماض و الحاجات دى كلام صح
ربنا مايرجعها ايام يا رب
منورانى دايما يا عمه و كل سنه و انتى طيبه

Che يقول...

مى
يا مى الشرف ده ليا انا يا فندم ... و انا على فكره ماستهلش نص اللى الكلام اللى انتى قلتيه
كل سنه و انتى طيبه و عقبال مدونتك يا رب
منورانى يا مى

Che يقول...

زهور الامل
يافندم انا مقدرش انسا احط اسمك .... و كل الناس اللى انا كاتب عنهم ممكن اختلف معاهم و نتخانق بس اخر اليوم بنفضل اصحاب و اخوات
منورانى دايما يا زهور

Che يقول...

سارة نجاتى
والله يا سارة انا ربنا يعلم انى قصدت كل كلمه و فيه كلام اكتر انا مقلتوش
بالنسبه للشخصيات و كلامك عنها فده صح جدا ... و انتى لسه بتبهرينى بمعلوماتك العامه و المتخصصه فى احيان كتير
و انا بجد مش دافع حاجه من جيبى ... بس حاسس انى دماغى فاضيه خلاص مفيهاش حاجه تتكتب
منورانى دايما يا سارة

Che يقول...

مياسى
انتى زى القمر بتطلعى 3 ايام فى الشهر و بتحتجبى الباقى ولا ايه يا مياسى
على فكره انتى بجد واحده من اوائل الناس اللى انا عرفتها فى المدونات و اكتر واحده من خارج القطر المصرى زى ما انتى قلتى بعلق عندها بأنتظام و بتابعها على طول
و يا ستى انتى تتكلمى مصرى و انا اتكلم اردنى و كده نبقى خالصين
منورانى يا مياسى دايما

Che يقول...

فرويده
يا اهلا يا اهلا يا فندم ... بعتذر عن الغياب لظروف كتير
و انا لو اعرف انى لما اجيب فى سيرتك هتيجى عندى كننت جبت فيها كل يوم ... بالخير طبعا ... ههههه
على فكره اخر حاجه ينفع محاولاتك تتوصف بيها هى كلمه متواضعه ، ده لو جاز تسميتها محاولات من الاساس
كل سنه و انتى طيبه يا فرويده
نورتينى يا فرويده

Che يقول...

دنيا
ادخلى المدونات دى على ضمانتى و مش هتندمى يا دنيا ... و لو حسيتى بشويه ندم يبقى التمسيلى العذر و ان البشر فيما يعشقون مذاهب
نورتينى يا دنيا و مستنى تكرار الزياره

Che يقول...

اقصوصه
انا بعتذر جدا يا فندم و اعتذرت مقدما لكل الناس اللى سقطت اسمائهم سهوا من ذاكرتى
جارى التصحيح يا فندم
نورتينى يا اقصوصه

Che يقول...

مايكل
يا باشا ليس كل ما يعرف يقال ... سيبك انك اشهر من نار على علم يا عميد
و يا باشا اقعد اتسلى فيهم ... هتلاقى حاجات تعجبك
منورنى دايما يا موكا

Che يقول...

بطوطه
لا شكر على واجب يا فندم ... و انا على فكره فاهم اللى انتى بتتكلمى عليه ... لانى بعمل نفس الحاجه لما اجى اكتب على ورق ... بكتب بالانجليزى لانه اسهل ليا و لانى اتعودت عليه ... و السبب الاهم انه خطى وحش جدا فى الانجليزى
منورانى دايما يا بطوطه

Che يقول...

زيكا
يا عم والله فيه ناس كتير بتقرا مدونتك يا عم بس انتى اللى مش واخد بالك يابو الزيك
و على فكرهه انا فاهم قصدك بموضوع انك داخل مدونتك
لانى بحس بنفس الحاجه ... بنفكر بنفس الطريقه و بنتصرف بنفس الشكل .... تقريبا احنا انعكاس لبعض بس فى مرايه كبييييييييييره
اى خدمه على حته way to go
منورنى دايما يا زيكا

سارة نجاتى يقول...

مش المفروض

way to go
دى كانت ليه ؟؟
ايه بقى هو يقولك حلوة
و انت تقولوا أى خدمة !!!

ملكش دعوة يا زيكا بقى اطلع منها أنت
حتى دى جاى تقر فيها هههههههه

حروف يقول...

مااشي نستني ماشي يا عمرو

Che يقول...

سارة
معلش يا ستى ... خليكى انتى الكبيره و عديها لزيكا ... ابننا برضه
و يا زيكا قول اللى انتى عايزه يا عم ... سارة اختك برضه و مش عيب تبصلها فى الكلمه ... عادى
نورتينى يا سارة

Che يقول...

حرووف
آسسسسسسف يا حروف ... بس انا اعتذرت مقدما عشان كنت عارف ان ذاكرتى مش هتسعفنى بكل الناس و يا ستى الغلط مردود
منورانى يا حرووف دايما