الأربعاء، 13 مايو 2009

يعنى ايه مصر

يعنى ايه مصر ... سؤال صعب أوى لانك مهما قلت مش ممكن تختصر بلدك فى كلام مهما كان الكلام ده
مصر عندى حاجات كتير هاقولها و حاجات اكتر مش هاقولها
مصر يعنى لما اعدى جنب الجامعه و افتكر سنينى فيها و ايامى الحلوة و المره فى قلبها .... مصر يعنى شارع عبد العزيز آل سعود و سينما جالاكسى و البروفيترول بتاع لارين و كووك دوور و جنينه النصر اللى ياما فطرنا فيها فى رمضان و كنا فاكرين اننا كل سنه هنفطر فيها انما مفيش حاجه بتفضل على حالها .... مصر يعنى وسط البلد و حمامات طلعت حرب مول اللى انا عامل معاها تعاقد و عربيه الكبده اللى ادام سينما اوديون و القهوة اللى ورا نفس السينما و قعداتى عليها مع نادر و بلال و امير او نادر و بلال او نادر و امير او حتى نادر لوحده يعنى نادر العامل المشترك دايما فى وسط البلد ..... مصر يعنى اسكندريه فى الشتا و ايام النوة و الترام اللى كنا بنركبه عشان الفسحه و ايامى الغامقه فى ابو خروف مع وجدى .... مصر يعنى العين السخنه و شط السادات اللى الميزة الوحيده اللى فيه الكوبرى اللى كنا بنط من عليه .... مصر يعنى راس البر و رحلتنا السوده لهناك باتوبيس تاتا هندى من مواليد سنه 70 و ازاى تاخد الطريق من هناك للجيزة فى سبع ساعات ... مصر يعنى شرم و سانت كاترين اللى لازم تطلعه قبل الشمس ماتطلع عشان تلحق تدعيلك دعوتين يمكن ربنا يستجيب منك زى ما استجاب من سيدنا موسى ....مصر يعنى الغردقه و السنوركلينج ...... مصر يعنى خط الصعيد و تربه ابويا اللى فى بنى سويف و اهلى اللى فى المنيا و اصحابى اللى فى كل محافظه لغايه شلاتين .... مصر يعنى الهيئه المصريه للكتاب و دار الكتب .... مصر يعنى بيتنا اللى دايما كان بيت اخواتى مش اصحابى بلال و نادر و امير و الموز اللى دايما كنت اطلبه من نادر لغايه ما افتكر انه جاى جبلايه لان الموز ده مهمت كانت كميته لازم يخلص ... مصر يعنى ايمن و مراته و وجدى و مراته و حجاج و مراته و الوكيل و مراته و عيالهم بالمرة .... مصر يعنى عبد الرؤوف و حكمت اللى زى ابويا و امى و اللى بيحبونى بجد و انا كمان بحبهم من جوايا .... مصر يعنى انمار اكتر واحد قريب منى مع انه زعلان منى انما اكيد مسيرى اصالحه عشان بجد هو واد جدع برغم انه دايما عيل بس قلبه طيب .... مصر يعنى كل اللى عرفتهم فى الجامعه و انا عرفت كتير ، حبيت منهم ناس و كرهت منهم ناس بس كلهم علموا فى حياتى و علمونى كتير .... مصر يعنى امى و عمتى و جوز عمتى اللى هما ابويا و امى التانين و اخويا اللى مهما بتخانق معاه انما هو الوحيد اللى من دمى و انا و هو بس أخر اتنين رجاله شايلين اسم العيله و الالحاح اننا لازم نتجوز عشان اسم العيله مايضيعش و يمكن اللى من الصعيد يفهموا اللى انا بتكلم عليه ... مصر يعنى كل بنت ارتبطت بيها سواء سيبتها او سابتنى ، كل بنت اعجبت بيها و عبرت عن اعجابى او احتفظت بيه عشان ماكنش ينفع انى اعبر عنه و اعتذر انى مش هاقول اسامى اى واحده فيهم لانى ماتعودتش اكون ندل .... مصر يعنى الحسين و تفتطر عند العهد الجديد و حمام فرحات مع ان فى ناس كتير مش بتحب فرحات ... مصر يعنى جامعه الدول و قدورة اللى ياما مشانى مفلس و كافيهات جامعه الدول اللى اكلت مننا كتير و خصوصا لوكيشن مع ان برضه فى ناس كتير مش بتحبه .... مصر يعنى الهرم الكبير اللى انا لحقت ادخله قبل مايمنعوا دخوله و معرفش اذا كانوا فتحوه تانى ولا لا ..... مصر يعنى تاخد الاتوبيس من موقفه لغايه اخره عشان تعرف بلدك و انت لسه فى ثانوى ..... مصر يعنى تلعب بلياردو لغايه ماتحس انك ممكن تدخل بطوله العالم و تبطله بعد كده .... مصر يعنى لعب البولينج لغايه ماتحس انك مش قادر ترفع ايدك و ان صوابعك بتوجعك موت من مسكه الكورة ... مصر يعنى الاهلى و تفرح لما يفوز و تتغم لما يتغلب و تغيظ الزملكاويه و الاسمعلاويه بتوع المانجه بعد الماتشات دايما او تستخبى منهم ..... مصر يعنى المرمطه فى الشوارع و شغل الميديكال ..... مصر يعنى قهوة التجاريه بعد الساعه اتنين بليل .... مصر يعنى سامح و حسين و اوسه و جارحى و الصياعه اللى لغايه الصبح .... مصر يعنى دورات الفيفا مع جيمى و تيفا و وليد و الافلام و المسلسلات الاجنبى اللى كنا بناخدها من بعض

زى ما انا قلت فى الاول مصر يعنى حاجات كتير انا قلتها و حاجات اكتر انا مقلتهاش
و اخيرا مصر يعنى حنون او حنوووووووووووووووووون زى ما انا بأقولها على طول
انتم بأه يعنى ايه مصر بالنسبه ليكم ............ سلام

هناك 14 تعليقًا:

Unknown يقول...

مصر بالنسبة الي مكان نفسي أزوره كتير

وخايفه أنصدم :) وينك مختفي صح؟

Che يقول...

مياسى
دايما سباقه بالخير
صدقينى مش هتندمى ابدا على زيارتك لمصر .... و انا كنت مختفى جوه قوقعتى عشان كان عندى اكتئاب ، جوزاء بأه ما انتى عارفه الجوزاء و طباعه ، بس خلاص انا رجعت الحمدلله و خرجت من القوقعه
نورتينى و منورانى دايما يا جميل

عاشقه وغلبانه يقول...

مصر يعن يحياتنا وايام عمرنا اللي عشناها

انت مختفي فين ياعمرو..؟؟؟؟

عاشقه وغلبانه يقول...

كان عندك اكتئاب..

ياضنايا

ماتسيبش روحك ليه تاني

الجوزاء دي هاتجيبنا ورا

Che يقول...

عاشفه
ازيك يا دوك عامله ايه و ايه اخبارك ، معلش عارف انى مقصر فى حقك بس سامحينى
عارفه يا دوك اللى انتى قلتيه ده هو الخلاصه والله مصر يعنى حياتنا و ايام عمرنا اللى عشناها
و معلش على شويه الاكتئاب بس انتى جوزاء و عارفه بأه الجوزاء و عمايله
نورتينى يا دوك و اكيد هازورك قريب جدا

سمكه واحده يقول...

امممممممم
اولا
انا زعلانه زعلانه انت مقصر خالص مع سمكه عموما عرفت انك مكتئب يا جدع سيبك مش لسه بقلك
الحلو قال جالي ولا جاشي طب مش انا اكتئب بردو؟؟؟
فتره وبتعدي علينا كلنا

بس انا زعلت انك مقلتش اسامي البنات لان انا زي منتا ولازم تعرفني اموت في النداله ههههههههه

اما بقي مصر بالنسبالي حجات كتير لو قلتها هكتب ميت بوست انا كنت بكرها زمان كنت عبيطه وعماله اشتم واشتم بس انا بجد بجد بموت فيها بحلوها ومرها وزحمتها وعفشتها وحلوتها جميل مصطلح عفشتها ده(جبر يلم العفش)
قلت كلام كتير عنها انا ذيك ومرتبطه بأحلي ايام عمري في كل حته فيها ده علي اساس لفتها كلها ال يعني ال
ما علينا المهم هلوك كتير ودماغك هتصدع مش هقول حاجه غير لما تزورني(وش مطلع لسانه)
بلخصها في جمله واحده عجبتي
علي فكره انا دللوقتي حالا باكل لب وسدواني ولب ابيض وكاجو من المقله مصري يعني اتفضل؟
هلخصها في حاجه
(الجمله هي او السؤال)
شقي انت ام سعيد؟
الاجابه
انا مصري,يعني سعيد بشقائي!!!!
دمت بكل خير

adel يقول...

يعني ايه مصر ؟؟

مصر كل ده و نسيت اهم حاجة

اللي اشهر من الهرم
اللي اطول من العلم
اللي مانضربش يوم بالقلم

عمك عادل يا عمرو يامحترم

ههههههههههههههههههههه

واحشني قوي ياواد
و اكتئاب بصرة يامعلم :):)

و بعدين سلام جامد من بلد الحضارة و الحجارة
تحية من جامعة الدول و شارع جامعة الدول
تحية من الهرم و شارع الهرم

ههههههههههه

MǿиY El-Shreef يقول...

مصر بالنسبالي ..

ماتش كورة وبطوله واستاد :)

Che يقول...

عادل باشا
طبعا يا باشا مانسيتكش ولا اقدر انساك ، بس بجد انت و المدونين الجدعان مكانكم مش كلمه صغيرة فى بوست انما ليكم بوست بابه
و سمعنى سلام اجدع ناس و انا و انت
نورتنى يا باشا

Che يقول...

مونى
فعلا الاستاد ده تجربه و لو مرحتويش الاستاد ساعه ماتش اهلى و زمالك يبقى عمرك مارحت استادات
ماتغيبيش علينا يا جميل
منورانى على طول

MaNoOoSh يقول...

قعدت افكر كتير قوى وفى الاخر لقيتنى فعلا مش عارفة.. لا عارفة مصر بالنسبالى ايه ولا عارفة انا بالنسبة لمصر ايه.

Magi Mostafa يقول...

حلو اوى الموضوع ده وفعلا الذكريات البسيطه الى ممكن تكون تافهه هى الى بتخلى الوطن اسمه وطن
مصر بالنسبه ليا يعنى لما اروح المتحف المصرى والاقى ناس من جنسيات الدنيا مبهورين بتاريخ اجدادى ولما اروح مع اصحابى نتمشى ناكل ايس كريم فى عز الشتا ولما الزمالك يخسر والبيت كله يبقى شمتان فيا ودى بتحصل كتير للاسف
مصر حلوه اوى

Che يقول...

منوش اللى يارب ماتكونش لسه مخنوقه
احترت أوى و انا بقرا التعليق بتاعك ، يعنى انا عارف مصر بالنسبه ليا ايه و عارف برضه هى مش بالنسبه ايه ، و اكيد انا مش عارف مصر انا بالنسبه ليها ايه ، بس استغربت انك مش محدده مصر بالنسبه ليكى ايه ... مش عارف .. جايز تكون حاله اكتئاب من اللى عامله زى الانفلونزا عندنا فى مصر و تخلص و تعرفى مصر بالنسبه ليكى ايه انما اكيد عمرك ماهتعرفى انتى بالنسبه لمصر ايه
نورتينى يا جميل

Che يقول...

ماجى
عامله ايه يا جميل و عامله ايه فى البعثه و يارب يسهلك و تخلعى من البلد بسرعه ، و ده على فكرة ده مش متعارض مع فكرة البوست ككل يعنى مصر بالنسبه لكل واحد فينا ، عجبنى أوى استخدامك لكلمه وطن فكرتينى بأغنيه محمد فؤاد فى فيلم امريكا شيكابيكا تقريبا اغنيه يعنى ايه كلمه وطن
و بعدين ماتزعليش أوى على الزمالك لان ده العادى و المفروض تكونى خدتى حصانه .. هههههه
نورتينى يا جميل و مصر فعلا حلوة أوى